مساء / صباح الناس الطَيبه
هالمَوضوع آوحتلي به وَحده من البنات بالأنستغرام إسمها NOOR_DREAM
كَتبت كلآم جَميل بخصوص الهَوية الخآصه بأحد الردود عَلى مَلفي
وَ للأسف الردود طَغت فَوق بَعض حتى مآ قَدرت آشَكرهآ كَما يَجب
لكن صَدقوني كلآمكم دائماً يَوحي لي بأفَكار جَديده
وَ هذي فائدة التَواصل بَشكل عآم وَ الإطلاع على أفَكار الآخرين
هي إللي تَوسع مَداركك بالغآلب
فَمن هالمَنبر أشَكر جَميع إللي يَتابعوني
[وَش رآيكم وَ أنا مَسويه مَنبر وَ حآله وَ شخصيه ] ..
الواحد كل ما كبر كل ما أحتوى نَفسه أكثر
وَ قدر يدافع عن ذَوقه وَ هويته الخاصه وَ مايكون وَقتهآ مخلوق برمائي
مُش برمائي بَرمائي أقَصد يَقدر يحدد هَويته وَين بالضَبط
لما نَكون صَغار نتأثر بالأكبر مَنآ أو بالشَخص الأكثر شُهره مَنآ
أذَكر وَ أنا صَغيرة طَلعت موضة الشوزات الرياضيه إللي خَيوطهآ فَسفوريه
كل بَنات عمي وَ خالي لآبسينها , إلا أنا .. بالرُغم كانت عآجبتني بَس أمي حآرمتني مَنهآ
تَقول بآيخه وَ عباطه وَش تبين فيها
كل الناس لآبسينهآ , بالغَصب بتسوين مَثلهم
[ ترى لو رَجع بي الزَمن لورا بلبسها , لكن مرات أقول أمي مَعهآ حَق ربما أمي ذَوقها كان كلاسيكي أكثر ]
المُهم أن أمي الحَبيبه رَحمة الله عليها ما رَضت إني ألبسها هذا وَ أنا بالإبتدائي
وَ لما صَرت بالمَتوسط , كانوآ البنات يلبسون الخواتم المَطاطيه السوَداء
[ المُهم خَويتكم إللي هَي أنا كانت مَطبعه تَحب الدرآسه , أذكر أني قلت لأمي بذاكر زَين زين بَشرط تجيبينهآ لي هالخَواتم بلبسهآ بالمَدرسه بَسوي نفسي كَشخه عأساس ]
قالت لي آبشري بَجيبهآ لك
راحت السَوق وَ جابت لي خاتم عليه شَكل دُولفين وَ فيه خرزه مُوف
الخاتم للأن مَوجود عَندي لأنه فَضه , وَ قالت هذا إللي جَبته لك
أمي وَين الخاتم الأسوَد !!
جبتي لي شيء كَيوت يا أمَي وَين الخاتم الأسَود
قالت : حَق بنات مُش مرتبين الخاتم الأسود , مو شيء شيك
وَ شفته بالسَوق ماعجبني بلاستيك مَدري وَش قلعته
المُهم إن أمي حبيبتي أنا بَنتها وَ حلالها وَ أتوقع لو عَندي بنت بَسوي زَي أمي
وَ بقولهآ لأ لا تلبسين ذآ وَ سوي ذآك
وَ آخر هَبل سَويته بَحياتي , الله يَذكر ذيك الآيام بالخَير
الزمام المُغناطيس , العَيب مَب بالزمام إنمآ كَونه مُغناطيس
طبعاً لو أحج ما بترضى أمي بالزَمام , بالرُغم أنا يَعجبني
وَ السبب : إنه بَزمن أمي كانوآ اللي على عُمر أمي يهربون من شيء إسمه زَمام
لأن جداتهم هُم إللي يَزينون زَمام , فيظهرهم بشكل قديم فَهمتوا شَلون يعني بَزمن أمي المَتطوره هَي إللي مآفيهآ زَمام , كَنت أصَيح آبيه !!
وَ أبوي فَله يَقولهآ خليهآ تَسويه وَين المُشكله
تَقول : لو مَت تسويه لكن طالمآ أنا عآيشه لأ
ترجعنآ لورا لَيش ؟!
طبعاً هذا رأي أمي وَ عادي أشوفه على كريستينا أجيوليرا يَعجبني
لكن ماراح أسَويه خلآص مَقتنعه لكن مايَعني أنه مازال عندي رَغبه أخرم مَكان آخر بَجسمي
كل هالوَقت أمي حاولت تأثر علي بأسلوبها إللي أكَيد يختلف عن أسلوب جَدتي ( إللي هي أم أمي )
وَ أنا كَبرت وَ طلعت بشخصيه مُختلفه , حتى أختي بَشخصيه مُختلفه عَني تماماً
لكن كلنآ مُنسجمين مَع بعض وَ نكمل بَعض
حتى بالسَوق ماعَمرنآ أشتهينا نفس القَطعه سُبحان الله
دايم أشوف شيء حلو أقولها يليق عليك خَذيه أنتِ بيطلع عليك أزين مَني
وَ هي العَكس , حتى مرات هَي تقولي شَوفي هاللبَس مَصروع يَليق عليك وَ تنقي لي وَ تتعنى
مَصيره ما يطلع طابع الإنسان الخاص حَتى لو أهله كانوآ بالنسبه للناس شَيك
هُو رآح يتخذ شيء خاص به , حتى لو الناس عارضوه مُمكن يمارس طابعه الخاص حتى لو بالخَفاء
[ وَ هذا الشيء الغَير مُستحب ] ..
بمُراهقتنا نتأثر , سَواء بالمُوضه الدارجه بالمَدرسه
أو حتى بمُعلماتنا أو بأكشخ بنت بدراستنا
حتى بنات الجَامعه بَعضهم بعد التخرج يستمرون بنفس أناقتهم بالجامعه
وَ ماتصير تعرف تَكشخ إلا بهالطَريقه , مُمكن حتى الزَمن يتغير وَ يتطور
وَ هي ماتقدر تطور مَن نفسهآ لأن هي شَفت ستايل من وَحده بجامعتها
كانت شَيك وَ لكن هي وَقف بها الزَمن عند آخر سنه دراسيه لَها وَ ماعاد تَطورت
عَيونا طبعاً تشف بدون ما نَحس
إجباري نتأثر كلنا ببَعض , التأثر بالجَوانب الحَسنه تَطوير مع قولبتهآ بطابعنآ الخاص .. التأثر بشكل كُلي وَ طمس هويتك الخاصه وَ تقمص شخصيه جَديده يُعتبر تَقليد , لاحظوا المبتعثين شلون أناقتهم تَغيرت , إللي راح اليابان يصير ستآيله ياباني , وَ إللي رآح أوروبا يصير مايل للستايل الأوروبي
وَ مبتعثين أمريكا يَصير ستآيلهم أمريكي
وَ فيه مَثل يقول : صاحب السعيد تسعد ، وصاحب الشقيَّ تشقَ
طبعاً مَوضوعي ما يَنطبق عالأناقه فَقط
حتى على الناجحين , أنا مؤمنه إن قليل الحَظ إذا صادق سَعيد الحَظ يجيه الحَظ
لأني مَنب مؤمنه بالحظ أساساً , مؤمنه بالسعي وَراء الهدف
وَ السعيد ذَكي وَ مُثابر وَ يعرف يحقق أهدافه بالحيآه
حتى مُجاورة الأنيقين تَزيدك أناقه وَووعي
العُلماء كَذلك, المُثقفين أيضاً
بَعضهم لا شاف إنسان مُثقف بالتلفزيون فرضاً يتكلم بمَوضوع مآ
نفسه عَطول تكره اللي عَكسه تَماماً ,, وَ يقووووووول خير للآن عايشين هذول
مآتوآ , الله يَخلي المَدري وَش وَ المَدري وَش
للأسف هذا هُو الإنسان إللي عُمره مآ راح يَتطور ولا يَحاول يشوف إللي عَكسه أو غيره
وَ يتفكر شَوي
أنا أعرف بنات للأسف مَضيعين حياتهم بالنَميمه
يَعني لمآ نَجتمع ما يَتكلمون إلا عن الشَغلات إللي أساساً مافيهآ شيء هادف
طبعاً ما أقولكم نَتكلم عن طَبقة الأوزون !! إنما شيء فَعلاً يَسلينآ وَ يبعث لنآ بالنفس الهَدوء وَ الإستقرار
مَب يعودنا على مَطالعة فلانه وَ علانه شيء مُزعج جداً
هالحَين أغلبهم هذا حالهم
شَفتي ساره زَوجهآ وش جاب لهآ !!
بنات عَمي الشهر إللي فات راحوآ باريس حَسره علي زَوجي حتى دبي مآ يَطلعني
شفتوآ بيت آخوا نَوره ؟! ماشاء الله متعاملين مَع مقاول لبناني دارس بإيطاليا
[ بَصراحه إللي يَسمع بيقول هالآدميه بُكره ناويين يبنون بيت جَديد ] ..
حَتى آخر مره كنت ببوتيك من البوَتيكات
بنت توري البائع صَوره الظاهر من الآنستغرام وَ تقوله عَندكم زي كذآ ؟!
يَقولهآ لأ ما عَندنا
تقول إلا البنت قالت لي مَن عندكم ؟!
قالهآ ماركتنا ماتصنع هالشيء ماعليه أختي غَلطانه وَ أشغلتنآ وَ أشغلت الناس
وَ أخرتنا وَهي إلا تبيه يَطلع لهآ نفس الغَرض بشكل مُستميت
قَتلتني للأمانه
كل الناس بجَميع دُول العالم مُختلفين إلا حنآ بالوَطن العربي صَرنا طَقم وَ الله
مُتشابهين بَشكل مَب طَبيعي , حتى بَمحطاتنآ العربية
برنامج وآحد يشتهر بالتوك شو فرضاً الكل يقوم يسوي برامج توك شو
فنان غنى بالمَغربي الكَل يغني مَغربي
فنان غنى سوداني الكَل يغني سوداني
يآآآآربيه أول ماطَلعت أغنية عيضه المنهالي أذكرهآ للآن كان أسمَهآ ( مهما جرى )
بدايات إنتشار الغناء الإماراتي بالطريقه التراثيه , عَقبهآ بوابة الغناء الإماراتي مآ أنقفلت
مثل ماكآنوا عشان ينجحون لازم يغنون مصري , الحين لآزم يغنون إماراتي
حتى الفنانات اللبنانيات ذبحونا يغنون خليجي
كله عَشان هالكَم VIP تترقص بحفلته وَ تجلس هالفنانه تَغني أغاني رابح صقر
بلا حَياء وَ لا حشيمه لهويتهآ الفنيه كلاً يبي يَلهف قروشه
حَتى قَمة القرف لمآ يصير اليوم الوَطني السعودي هالفنانات
إللي أساساً لو شفتيهآ وَهي سكرآنه بتقولك : يلعن الخليج وَ سنينه
أول وَحده تنَزل : آبارك للشَعب السعودي باليَوم الوَطني
[ هههههههههههههههههه مآفي هَويه خاصه فيه vip يَدفع يآحبيبي وَ لا مادرت عن هَوى دآرنا ]
وَ فيه شَعب مَتخلف يَطبل وآآآآآآو تَحبنآ وَ يََضعف عند كَلمة وَطنيه , لا بالله مآ حبتكم
حبت عباطتكم , وَ حبت هالكَم خروف
مُجتمع يَحب كل من يَطبل له
هذول الناس الكَبار وَ الإعلاميين , مآ بالكم بالناس البسيطين وَ العاديين ؟!
شلون صارت هَوياتهم مُتزعزعه بكل شيء , بلبس وَ بعطور وَ بأراء , وَ ….. إلخ
الهَويه الخاصه مَب شيء للأناقه وَبس حتى بَتحديد المباديء
بحياتنا العربيه نَشجع التقليد وَ الخضوع وَ المشي على أهواء الكَل حتى نَكون مَحبوبين
حتى بأهوائنآ وَ الأمَور البسيطه
بَعض الناس يَحبون الخيار السَهل
يَشوفون الناس وَش يحبون يزينونه , وَ يتجاهلون هُم وَش يحبون
تَصدقون مرات أختي تَقولي مَحتاره آي لَون مناكير آسَوي
أقَولهآ سوي : تيفاني ههههههههههههههههههه
مُستحيل مآ يَنهبلون عليه
[ شَفتوآ نصيحتي هَذي تخرب بيَوت ] ..
حَتى مصطلح تيفاني نَفسه يَخوف
أنا ما أدري ليه الوآحد مايَكون مَثل ما هُو , حتى بالشَغلات إللي يَحبهآ
وَ أقل القليل حتى بالشَغلات إللي آكلهآ : مَره تصدقون أستغربت من شيء
إعلاميه مَشهوره , تكلمت عن الفلافل وَهي تذكرهآ قالت : الله يزيد النَعمه ؟!
وَ هي مُتقززه
بصراحه مَستغربه وَش سبب وَضع هالجَمله مع الفلافل ؟!
ما آبي أظَلمها يَمكن فيه سبب , يعني هل مَعقوله لهدرجه الواحد صار يقلل من حَجم النَعم
فيه أُسر كامله تقتات على الفُول وَ الفلافل لأن سعره بمُتناولهم
وَ المُشكله البَطلات اللي ورآها يردودن وووووع فلآفل
[ صَدق بعض الناس مايَستحقون النَعم , لو يَنحرمون مَنهآ أزين عَشان يعرفون قَيمة هالتَكبر ]
حتى بالأكل مالنآ هَويه خاصه
صآر إللي ياكل مرقوق وَ جريش مُتخلف
وَ إللي ما ياكل باستا وَ ستيك وَ ميشيد بوتيتو هُو وآحد ماعَنده سالفه وَ وين عآيش
يا عَرب آرحَمونآ ,, لو كل وَحده تَشوف أبو جَدهآ وَش كان يَركب من سيآره
راح يَنصقع رآسها بالجدار , كثير آجدادهم وَ أجداد أجدادهم كآنوا يركبون الحَمير وَ البغآل
مَب الخَيول , لأن الخَيل مب مُتآح للكُل
وَ خويتنآ بذآ الزَمن تَقولك يََعععععع عالمَرقوق
مُقزز الجريش
[وَ أجدادك شَلون نمَو وَ كبروآ ياروح أمَك وَ جيتي عالحيآه أيتهآ المَخلوقة الضَعيفه ] ..
وَ كله كُوم وَ الرجال الحَديثين إللي رآكبين المُوجه
مآعَلينا خَلونآ نَشوف الهويآت الخاصه فاشونياً
لأن أحس كثير يَهمهم النَظرة الفاشونيه مَب بالمُجمل
STARS
بَنتكلم عن أطلالتهم الخارجية , مآلنا علاقة بأرواحهم أو هوياتهم السلوكيه
لأن هُم بالغالب نَجوم وَ مُمثلين يَقدرون يَمثلون وَ يسوقون لأي شيء
وَ بشكل عام نَجوم هوليود هُم صَناعه بَحته بأطلالتهم مافي أي جَهد خاص من ناحيتهم
إلا ما نَدر جداً جداً , شركة الإنتاج إللي تَحدد لهم الماكياج , الملابس , وَ ترسم لهم قالب يَمشون عليه , فيه ناس خلاص صاروآ أيكون وَ لهم هويتهم بَزمن من الأزمان أو مازال بَس قله
هُم بالأساس مَصنوعين , مَثل الليدي قاقا صَناعه بَحته
وَ فيه ناس أنا ما عاصرتهم بَزمن قَديم لكن هُم أيكون وَ ما أتوقع أنهم صناعيين لأنهم ظَهروآ بزَمن آقشر , مثل : بوب مارلي , مايكل جاكسون , ديانا روس , ويتني هيوستن , الفيس برسلي وَ مارلين مَونوروا , كانوا ظاهره ماراح تتكرر وَ يحق لهم مالا يَحق لغيرهم
بكل الصَور رآح أبتدأ مَن اليَمين لليَسار
جيسيكا آلبا | Jessica Alba
مَن يوم يومهآ تذكرني بنوال الزَغبي ولاحظوا ستايلهآ من يوم أشتهرت حتى اليوم نفسهآ , مَع تغيير طفيف بما يتناسب المَوضه .. لكن دائماً شعرهآ مشقر وَ دايم مسمره نفسهآ
ريانا | Rihanna
دائماً تفضل المظهر الصاخب حتى لو صبغت أحمر أو أشقر ترجع لنفس ستايلهآ بالشعر الأسود القَصير إللي يَميزهآ عن غيرهآ , سمارهآ مَع مكياج عيونهآ وَ روجهآ وَ ملابسهآ مَع أظافرهآ مُميزه وَ خاصه فيهآ , حَتى لو قآلوا لنا أرسموا ستايل ريانا رآح نقدر نرسَمه
جيسيكا بيل | Jessica Biel
فنانه رياضيه وَ بجسمهآ دائماً حتى بطريقة لبسهآ يظهر هالستايل عليهآ , ماتَميل للصرعه , أو حتى للأنوثه الزائدة بالرُغم مُصنفه بطلة إغراء لكن هي إغراء من نَوع آخر
شعرهآ لو تدورون بكل صَورهآ نفس الألوان وَ تتدرج وَ تتنوع الدرجه حسب المَوضه
ساندراً بولوك | Sandra Bullock
مَن يوم عرفناهآ شعرهآ ستريت حتى لو لففته نَحس التلفيف مَركب عليهآ
حتى لو صَبغته ترجع للون الشَعر البني , وَ لايق عليهآ الستايل
تشارليز ثيرون | Charlize Theron
الجَميله وَ الساحرة تشارليز ثيرون , صَراحه آتعب وَ أنا أقول مُميزه وَ جميله بنفس هالصَوره كانت فاتنه بأحد الحَفلات طَلتهآ ما يَختلف عليهآ إثنين , بالرُغم إن الشَعر الطَويل يَشكل أنوثه بالمرأة طاغيه , إلا أنهآ من الفنانات القلائل إللي الشَعر القصير بطريقة الجَز , تَخبل عليهآ بالرَغم أيضاً حتى خامة شعرهآ مو حَلوه شعر كثير مَجعد وَ كثير خَفيف لَكن فنانين عآرفين الصَبغه إللي تَليق عليهآ , عارفين شَلون رقبتهآ وَ أكتافهآ بتظهر جَميله أكثر بقصه بهالشَكل ..
هالي بَيري | Halle Berry
الجَميله السَمراء
تتوقعون لو وَحده من فناناتنآ بَتسوي مَثلهآ !! بنلاقاهآ قَوس قَزح
حتى بنلقى أختلاف بين لون جَسمهآ وبشرتهآ , بينمآ هذي لون وآحد وَ ستايل وآحد
لون الشَعر جذاب عليهآ وَ لآيق لهآ نادراً ماتروح للأشقر وَ الأحمر وَ دائما ًترجع لنفس الستآيل
كوين لطيفه | Queen Latifah
الفنانه السَمراء إللي مَعتزه بأناقتهآ الخاصه دائماً بنفس درجات هاللون
وَ نفس التسريحه حتى لو تَغير تَرجع لهآ , مَعتزه بوزنهآ وما حَرمت نفسهآ من شيء تلبس إللي يَليق عليهآ , وَ مرتبه وَ غالباً ماتميل للسموكي عَشان يبرز ملامحهآ أكثر وَ يعطيهآ إتساع بالعَين يوزان أمتلاء وَجههآ
الفنانه آديل | Adele
ذات الصَوت الرائع
الغنَوجه المربربه ,, لو عَندنا كان سَوت مَثل ديانا كرزون جرت وَراء النحف بَس محداً أصلاً فاكر هي نَحفت وَ لا سَمنت ,, صارت آرجوز تَجري وَراء الفاشن وَنست شيء أسمه الفن إللي هي طَلعت من الآساس لأجله ..
آديل دايم نفس الفساتين , تَهتم بصبغ أظافرهآ وَ بشده
مَكياجهآ وَ لون شعرهآ مُتناغم مَع شخصيتهآ , الصحف الأجنبيه أنتقدوآ مظهرهآ وَ شبهوهآ بقالب من الشَمع , كناية عن كثرة الماكياج
وَ فيه ضَغوط كبيرة من شركات الإنتاج إنهآ تنحف
مونيكا بولوتشي | Monica Bellucci
آتعب وَ أنا أقول يازين إللي لآ كَبرت أحترمت عُمرهآ
شَوفوآ البساطه , شَوفوآ لون الشَعر جَمال لا مُتناهي ..
حنا لو الوَحده لون شعرهآ كذا : بيقولون خيررررررررر يا قَدمك ما تَغيرين مللتينآ
ليندسي ويكسون | Lindsey Wixson
شَوفوآ أسنانهآ الفرقه بين الأسنان ( الفلجه ) لو وَحده نفس شَكلهآ عَندنا بَيقولون لهآ خير أنتِ ووجهك تبين تصيرين عَارضة أزياء رَوحي زَيني لك تَقويم بدل الفَلسفه , أشتهرت بهالفتره وَ طرطعت , مُستحيل مآلقى صَورتهآ بأي مَكان
لو جَويل بتَقولهآ برسلك عَند دكتور مَدري وَش يزبطلك أسنانك وَ يركب لك فينير
وَ تخرب جَمال البنت الطَبيعي وَ هالبراءة
ليندسي ويكسون صارت علامه تجاريه بارزه أسنانهآ وَ شفايفهآ تطَبع على التي شيرتآت وَ يسوق لهآ , على كفارات الجَوالات .. إلخ
سَيندي كروفرد | Cindy Crawford
بشامتهآ المُميزه خلت الشامه بَصمه مُميزه لهآ بالرُغم لو تركزون بشكل شامتهآ أقرب للحبه المُنتفخه وَ مع ذلك , شامتهآ صارت مآركه مُسجله, كل من تبي تَكون حلوه تَحط لهآ شامه
كلوديا شيفر | Claudia Schiffer
مين يَقدر ينسى شقارهآ المُميز
بالرُغم مُحاولة المُنتجين إنهم يخلونهآ شبيه بارجيت باردو بحكم التقارب بالمَلامح لكن طغت هويتهآ الخاصه
أنغام
ما عَمرنآ شفنآها بستايل مُفجع , مُمكن تَسوي صَرعه عشان ألبوم غنائي
قَصة كليب , لكن تستمر عليه ؟! مُستحيل
حتى أسنانهآ رتبتهآ بالمَعقول , بالمُستوى إللي يَساعدهآ على نَطق الحروف الغنائيه بالشَكل المَطلوب
ديالا مَكي ,
الإعلاميه إللي مَن يوم شفت إطلالتهآ بنفس ستايل الشَعر وَ الماكياج
تغير بالمَوضه بَشكل طفيف غَير مُزعج , وَ دايم ستايل
حنا لو بنت شَعرهآ بهالشَكل بيقولون خيرررررر شَكلك قَديم
أو ما تَغيرين , ما تَملين من شَكلك .. يا جَماعة الخير الناس يَحبون أشكالهم
وَ كثير حتى عندهم خَوف من التَغيير وَ التجديد , فَموآ شرط الواحد يَغير وَ هو مو مرتاح أهم شيء هو حاب الشيء وَ مقتنع به
حتى فيه ناس يقولون : حنا ملينا من شَكلك أنتِ ما تَملين ؟!
أو طيب غيري , شكلك دَقه قديمه
أو تَشوف شعرك أسود , تَقولك : أنا عَن نفسي ما أحب الشعر الأسود بس طالما مَرتاحه فيه
الله يَهنيك
[ مو عارفه وَش لزمه تعليق بهآلشكل , عن نفسك وَ لا مو عن نفسك ]
مَتى رآح نقتنع إن لَكل إنسان شَكله الخآص , وَ الهوى إللي يَحبه ..
سيرين عبد النَور ,
مَن يوم يومهآ بهالمَلامح
شوفوآ قريب صَبغت أحمر أنا ما عَجبتني بس ماراح بَعيد وَ بعيد عن روَحهآ ,, بالرُغم أختهآ شقراء وَ عيونهآ مَلونه
تَدرون فيه بنات عَندنا حَلوات وَ نعومآت صاحباتهم ينصحونهم يَختي مللتينآ غيري ستآيلك
ستايلك مُملل , شكلك مُملل وَ صامت , شكلك نَعوم بزياده قرفتينآ
[ بَصراحه شيء عَجيب ]
الهَويه الفعليه ~
تَصرفاتنا وَ أرواحنا وَ سلوكياتنآ
سَبحان الله هَذي إللي لَو وَش ماحاولنآ نهذبهآ إلا ما تَظهر الحَقيقه
لو بَعد شهر أو شَهرين أو 6 أشَهر أو سَنين
زَمان لما كنت بالثانوي , أيام تطبيق بنات الكليه
كانت وَحده تَطبق وَ الظاهر خَجلانه مَن البنات , وَ هي حَبوبه وَ حلوه
فمن خَجلهآ صار عَندها زي اللزَمه ترمش كَثير
زميلتي إللي جَنبي لليَوم أذَكرهآ ضَحكتني
قالت : حركة المَعلمه حلوه مَعطيتهآ براءة بحفظهآ عَشان أقلدهآ
يعني الآدميه فيهآ عَيب وَ ذي شايفه عيبهآ مَيزه لأنهآ طالعه بَها حلوه
وَ تبي تآخذ هالعيب بَعد وَ تنافسهآ عَليه , ما أدري صَراحه وَش هالعَقل !!
أخذت مَوقف الصَدمه
كُل أنثى , كَل ذكر , كُل حيَوان , له تَصرف خاص به
يحَب شغلات وَ يكره شَغلات ما يَتطابق فيهآ مَع الآخر وَهذي إللي أنا أشَوف
يأثر بهآ الجَين , يعني الجينات وَ التربية وَ الثقه بالنَفس .. إلخ
بس المتَصنع صعب ينجح معها
مرات أزَور ناس ببيوتهم , أحب أدَخل مطبخهم
أستغرب أشوف مثلاً صديقتي تقلي بطاطس , أكتشف أنهآ تقليه وَ تقلبه بطريقه خاصه فيهآ
كلنا صَح بس كل وآحد له طَريقته
حَتى يعجبني لمآ أدَخل ألقى وَحده حاطه بطاولة المَطبخ علبه مَكتوب عليهآ سُكر
وَ الثانيه قهوه , شآي … إلخ
[ أحنا ببيتنآ مافي هالشيء وَ لا راح أسَويه طريقتنآ مَره غير بالتعآمل مَع هالأشياء]
لكن لمآ أشَوفه عند غيري يَعجبني عليهم , وَ يعطيني إحساس حَلو
تَصدقون بالله عمتى كانت نَظيفه جداً جداً
لكن فاشله فَشل ذريع بالطَبخ , لكن مُدمنة أدوات مطبخيه وَ الشغلات الكَيوت
أمي الله يرحمهآ : كانت تقولهآ وَش تبين بذي القدور كلهآ وَ أنتِ ماتطبخين
تقولهآ إلا أطبخ
هَي تَشوف نفسها تَطبخ وَ يعجبها تقتنيهم
وَ تلقون ثلاجتهآ مليانه مَغناطيس , طبعاً هالمغناطيس مو شَكل جمالي بلا هَدف إنمآ لتثبيت المُلاحظات وَ الأمور المَهمه بَس ماشاء الله عليهآ مافي مَجال بالثلاجه شيء تَفاحه , شيء موَزه , … إلخ
كانت نَهفه وَ لهآ طابعهآ الخاص
حتى الأطفال لمآ يَجون بيتهآ , أذكر كنا نَقول بتخاصمنآ تخاف على بيتهآ
خاصه إن شغلاتهآ كلهآ كيوت وَ جذابه للأطفال
[ حتى صاروآ يقولون هذا زي مَطبخ فلانه ]
هَويتهآ الخاصه بالرَغم اللي تَزينه وَ تطبقه بمَطبخهآ يَعيق الطبخ
لكن يناسبهآ لأنهآ ماتَطبخ
هذي الشَغلات هي اللي تَميز كَل وحده عن الثانيه
كيف لمآ نروح عند ناس نلقآهم مبخرين بيتهم , منظفين مغاسلهم وَ مرتبينهآ بطريقه مُعينه
شلون صافين الصابون , شلون مرتبين المناشف
متى يَقدمون القهوه , الشآي , العصير , كيف يَقدمون كل شيء
يَعجبني الناس إللي مازَالوآ مَحتفظين بتقديماتهم الخاصه , حتى لو مآصارت كُول
أنا فَي وَحده من صديقات أمي بعد الساعه 9 المَساء مُستحيل تزورينهآ نايمه
فأغلب زياراتنآ لهآ 8 الصَباح , تنفتح نفسي لمآ أروح لها , ألقى الفَطور المَضبط وَ المتعوب عليه
تتنعنش نَفسيتي , أذكر أيام زَمان وَ الناس الطَيبين وَ الصحيين
إللي ينامون بَدري وَ يقومون بدري , طبعاً أنا بعَيده عن ذلك أحب السَهر
بس يعجبوني لهم هَويتهم
فيه ناس لمآ نَقولهم زَرنا فلانه : اللي تَنام بَدري وَ تقوم بَدري
يقولون خيرررررررررررر وَش هالسخافه , عايشه بعالمهآ الخاص وَ المُمل
[عجيبين البَشر كيف كل وآحد يبي كل شَخص على نَظامه ]
فيه حركات وَ طباع هي عيوب أساساً لكن تكون جَميله على شَخص
لأنهآ طالعه من غير تَكلف
مَثل أعرف عيله كآمله حرف الراء مايَنطقونه زَين , يعانون بالدراسه خاصه بَحصص القرآن
فيه ناس مُصرين إنهم يَتدلعون , وَ يقلدونهم , بينمآ اللي يَعرف الأم وَ الأب بيعرف إنهآ لزمه بالعَيله
كانت جَميله على هالبَنيه
لكن مُو مَعنآته أنا لو بَسوي مَثلهآ بَطلع حَلوه وَ كيوت
حتى البنات لمآ تتزوج شَخص , تجَلس تدور حركات من صَديقآتهآ
وَش أسوي , شَلون أتصرف , فيه ناس ينصحون صديقاتهم بَشيء مَثل : تعطري زَين عبي جسمك عطر
بالنَهايه تَكتشف زَوجهآ يحب ريحة جَسمهآ الحقيقي
وَ كانت نصيحتهم فاشله جداً , لذلك محداً يقلد أحد بالأمَور الحياتيه
نَحسن من حياتنآ بالأمور العلميه وَ الثقافيه , وَ السلوكيات الفَضه نحسنها
لكن الأمور الأختياريه وَ المزاجيه ما نَغيرهآ , نَحب نفسنآ مثل ما أحنا
إلا أذا يوماً ما أحد أشتكى من تَصرف نَصدره
وقتهآ بنعرفه أنه خطأ , أو غير مُستحب … إلخ
كيف الواحد ياكل , كيف الوآحد يشرب , كيف يَمشي , كيف يَتكلم
مُمكن 100 شَخص يتصرفون نفس التَصرف بنفس حَدود الأدب وَ مع ذلك كل إنسان مُميز بَطريقته
لكن مُمكن نتعلم
لما كَنت صَغيره كنت لمآ أوزع على أحد عَصير , كنت أمَيز الحرمه اللي تَقولي شُكراً
أو تسلمين , من اللي تآخذه وَ تشفطه شَفط , أستانس إذا أحد قالي تَسلم يَدك .. إلخ
هذي شَغلات الوآحد يَطورهآ , لسانه يَكون عَذب وَ تصرفاته كَلهآ أنوثه
وَ ذوق , غير مؤذي وَ لا جآرح
الحيآه عَجيبه , كلاً منآ له بَصمته الخآصه
بالنهآيه هالبَصمه تقدر تصنفه إمآ شخَص محبوب أو كريه
فَيه ناس يَستفزونآ بَس من طريقة أكلهم
مُمكن نَوصل لمَرحلة عَدم الإنسجآم مَعهم
يَقولون : كل على ذوقك وَ البس على ذوق الناس
وَ أنا عَندي آكل على ذَوقي وَ ألبس على ذَوقي
وَ أتحمل رَدات الفعل , يَعني مو بالغَصب أرضي الجَميع
يحق للناس يتكلمون فيمآ بينهم يَقولون فرضاً وش هالهبل اللي لآبسته آرتوس
لكن الآهم مايقولونهآ بَوجهي , كيفهم عاد يحشون يسون اللي يَسوونه مُش أختصاصي
لَكن للأسف فيه ناس الآن ياكلون على ذَوق فلانه
تقولين لهآ دنكن دوناتز حلو , تقولك : وووووووووووووووووووووووع
كرسبي كريم وَبس , عَقووووول
الشركتين نفس الفكره , وَ الأختلاف مسألة ذَوق
الحَديث لآ ينتهي وَ يَطول وَ متشعب وَ مآ أبي أغتت عليكم وَ أطنب حد المَلل لأن كلهآ تفاصيل وَ ملاحظات خاصه
نَلتقي بَتدوينه آخرى
دُمتم بَحب
مُلاحظة / هذه التَدوينه تَم نشرهآ سابقاً بتاريخ 11-12-2013
جمييييييييييييل كلامك قريته وارجع اقراه تسلم يدكك ..
ياحَظي بَوجودك .. مَنورتني دُوم
ارتوس جديا عجز عن شكرك والله من فترة حاشتني ضيقة بسبب مو قادر اغير نفسي زي فلانة وعلانة ولازم اصير زي كذا ولا اي شي جديااا اشكرك لدرجة اشتريت كتاب الكاريزما صدق ابي اتثقف من هالناحية بس علشان نفسي مو علشان احد او اصير زي احد والله اشكرك كثيرررررر انتي فتحتي مخي لاشياء كثير جعلك بالجنة
إعتبريها فَترة إنتقالية , وَ بإذن الله تَعدي ..
تمنياتي لَك بحياة سَعيدة وَ مستقلة بهويتك الخاصة وَ المتفردة
مع اني قريت التدوينة سابقا بس قراتها مرة ثانيه بنفس اللهفة و الاعجاب ، ارتوس انت جميلة بقلم فاتن
أخَجلتم تَواضعنا , وَ لي الشرف بقرائتك لها للَمره الثانيه
فعلاً ارتوس اوافقك كلامك ، تدوينتك جداً رائعه و واقعيه ، كثير منا غير من عاداته الجميله اختياره بالاكل ولبسه كله عشان يرضي الناس قبل لا يرضي نفسه، انا اعترف كنت وحده من البنات اللي قبل لا اكل اشوف صحباتي وش يطلبون واقلدهم ، اشوف ستايل لبس اختي واقلدها ، كنت ما احب انتقادات الناس بالنومه بدري ، صرت اسهر والنتيجه صارت عكسيه علي صار عندي هالات بس عشان ايش!! عشان ارضي الناس . انا فعلاً ممتنه لك لوجودك في حياتنا
أخَجلتيني , لَيتنا نَقلد بالزَين وَ بالشيء الإيجابي
شَكراً لإضافتك لأن أتوقع كثير يستمتعون لما يقرون تَعليق مَثل تَعليقك
نورتيني
الله عليك ، بالرغم اني قد قريت هالتدوينه قبل الا اني ع طول لما شفت عنوانها وعرفت انها نفس التدوينه اياها قمت سويت لي كوب شوكلاته ساخنه ورجعت اقراها بحب واستمتاع وبنفس الانبهار والاعجاب السابق وازود بعد ..
احب لما تتكلمين وتثرثرين اكثر من لما تتكلمين عن الاناقه والفاشن لان التفاصيل الصغيره اللي تذكيرنها والتعمق في الامور يسعدني بشكل ماتتصورينه
احبك والله ياارتوس رغم الاختلاف الشاسع بيننا الا اني احترم كل شيء فيك لانك شخصيه ملهمه ومؤثره ودايما ماتعزفين ع الوتر ، اتمنى اغلب تدويناتك تكون ثرثره وسواليف مطوله لانها تخترق شرايين القلب بلا استئذان ..
أخَجلتم تَواضعنا , وَ صحتين على قَلبك كوب الشَوكولآ الساخن
بالنَسبة للإختلاف هذا إختلاف صَحي وَ جميل لَربما إختلافنا يَكملنا كَشعوب
نَورتيني بَكلماتك
اوافق على كلامك صحيح ان الواحد لازم يحافظ على هويته خصوصا الناس اللي لا قابلت واحد اجنبي ذابت عندهم كل قيمهم ومبادئهم ساعين مثل ماقلتي للارضاء، بس مااوافقك اني احط “فنانين” كمثال او كتطبيق.. اساسا هالفنانين واخبارهم وايش لبس وايش سوى مااحد يتابعه الا اذا كان راعي اختصاص او “فاضي”، لان في بالحياه اشياء كثيره اهم منهم ومن انحطاطهم. هذا الانسان لما يعطي الشيء اكبر من قدره ويميل افكاره عن هدفه الرئيسي يتولد عنده مشاكل من غير مايحس، ان الله لايغير مابقوم حتى يغيروا مابأنفسهم. شكرا لك
يآهلا وَ غلا نَورتيني وَ الاختلاف لا يفسد للود قضيه
لكن حتى تكونين بالصورة مافي أحد أخذ فنانين كَقدوة لكن هم لوحات أعلانيه بالأزياء وَ الموضة وَ كثير يعرف جديد المَوضه من خلالهم
يعني ما أعتقد أني بقدر أتكلم عن الفاشن بضرب أمثله على صحافيين أو كُتاب , وَ لا وش رايك ؟!
و عفكرة حتى الفنانين هذول لهم دور إنساني بالمُجتمع , إستسخافهم معناته تجاهل كادر وظيفي كامل
له دَوره بالمُجتمع , إذا فنانين مُجتمعنا هابطين لا يَعني الكَل هابط .. ما أتوقع نقدر نتكلم عن السيدة فيروز بمثل هالشَكل !! ..
والكثير من أمثالها .. إذا عندك وجهة نظر دينية بالأساس بتكونين أكثر تسامح مع الأخرين أفضل من وصفهم بالإنحطاط
كوني أكثر تسامح مع الأخرين وَ على هُونك
احيوا ارواح ؟ طوروا بلاد ؟ عمروا بنيان ؟ نشروا التعليم ؟ احنا لما نعمل عمل ننتظر نتيجه لكن ايش النتيجه المرجوه منهم بالنهايه؟ فيروز وغيرها ايش قدمت ؟ وايش النظال اللي قدمته؟ اول شيء سووه خالفوا امر ربي ومن يقوى انه يخالفه؟ نقول الممثلين ممكن يعالجون قضايا انسانيه واجتماعيه مع العلم انه التمثيل بانحدار ومااشوف اي قصص تعالج لكن مغني ؟ عازف ؟ خصوصا شريحه معينه من الفنانات الجدد كهيفاء ومريام وغيره! الفن عموما احساس وتجسيد مااتوقع هالاشخاص قدروا ينفذونه باختصاصتهم.
وحبيت اعقب انه الهويه ماتقتصر على الشخص الخارجي والموضه وبس. لها جوانب كثيره.
أكيد الهويه ما تقتصر على الشكل الخارجي , هذي أحد جَوانبها ..
أنتِ تناقشيني بجانب بسيط لامسته عند الناس , لو بنتكلم بكل جانب يبيلي مُجلدات ..
بالنسبه للفنانات , كلنا نخالف أمر الله مو بس الفنانات .. كلنا لنا هفوات وَ غير مُنزهين
سالفة وَ الله أني أسوي نفسي الأفضل محد يعرف مَين منا الأفضل , وَ مين فينا آخرتها راح ينال رضى الرحمن
وَ شلون راح تكون خواتيمنا , أنا ما أحبذ الناس المُتفاخرين بَدينهم هالمَوضوع شأن خاص لا يعلمه إلا رب العالمين
يا كَثر المنافقين بمُجتمعنا خارجهم الصلاح وَ باطنهم الفَسق ..
بالنسبة للفنانين , أنتِ قلت هيفاء وهبي وميريام !! ذكرتي ناس دخيلين على الفن ..
لكن إذا تبين أجيب لك فنانين مَوهوبين وَ مُحترمين ترى فيه , إذا أنتِ لفتوك هذول ترى فيه الأفضل منهم وَ لأنهم مُحترمين محداً درى عنهم ..
وَ أساساً هالعينات مالهم أي دُور بالمُجتمع سُوى نشر الفسق فعلياً وَ الإنحلال الأخلاقي ..
وَ للأسف تسللوا للناس وَ دخلوا لهم بسبب قنوات فضائية هباطه أعطتهم حَجمهم وَ تركت الفن الحقيقي , ما بتكلم بفتاوي
بتكلم بَفن حقيقي .. إذا بتكلم عن الجوانب الفنيه وَ تاثيرها على الثقافه بندخل بَموضوع آخر وَ تدوينه أخرى .
وَحياك الله
ي حبنيلك يختي .. تدرين انتي الوحيده اللي ممكن اقرا كلامك مرة وثنين وعشر وانا بكامل حماسي واستمتاعي ببساطة انتي من الشخصيات الملهمه لي في كل تفاصيلك الاقي شي جميل ي حظنا فيك :*
فعلا ارتوس غياب هوية الشخص شي يحزن والله قبل فترة رحت للجامعة حسيت البنات يشبهوا بعض خصوصا اذا كانوا صاحبات 🙁
من ناحيتي احب احتفظ بطلتي لاني مقتنعه فيها واحب نفسي بهالطله
اختي الصغيره لسا بعمر المراهقه دايم تتسوق معنا وتسأل هذا حلوا والا لا مستحيل تسوي شي ف حياتها بدون ماتشاور واقولها اذا كان عاجبك خذيه خلي لك ذوقك وشخصيتك الخاصه حتى لو ماعجبت غيرك !
شاكره لَك أطرائك وَ كلامك الحَلو بحقي
وكلامك وَسام على صَدري ..
بالنَسبة لأختك هو إنك تشجعينها عالأختيار , وَ لكن مسألة وقت لأن تَوها صَغيره وَ الإنسان بفترة المُراهقة يَميل إلى التَقليد قليلاً
لكن دُورك فعال إتجاههآ , أحييك
سبحان الله التدوينه هذي بالذات قريتها في توقيت بطل،،
المشكلة مو في الناس اللي تنتقد أسلوبك و شخصيتك،، المشكلة في الناس اللي تحسسك انه إنتي غلط و بطريقة جدددا سيئة،،
عموما الأشخاص اللي يحبوني عن جد ح يتقبلوا شخصيتك بكل عيوبها و مميزاتها و يستمتعوا بأنهم يكتشفوا فيك هالجوانب الخاصة
احببت تدوينتك جددددا،، رجعتني شوي لنفسي
يالله وَ الله نَورتيني ..
إللي ينتقدك بحده وَ بعنف أكيد هو يواجه مشكله خاصه إتجاه نَفسه وَ مشكلة شخصيه إتجاهك
أما المُحب لك راح يَتقبلك بجميع أشكالك وَ ألوانك , وَ بيشوف عيوبك مزايا بدون تَذمر
أسعدت من قلب قلبي بَحضورك
أرتوس ماأدري وش أقول صراحة :$
كلامك جميييل وراقي , صح لسانك وربي يسلمك ويحفظك لأحبابك 3>
غَمرتوني بَمحبتكم ..
ياحظي فَيكم وَ الله ..
تدوينه رائعة بكل المقايس اسلوبك ثري وجميل ويجعل الشخص ينطلق بافكاره بينما هو يقرا مقالتك، مع الاسف هذا واقع حال الكثيرين منا وخصوص هنا في اوربا الشغلة مؤلمة اكثر لان المسلمين والمحجبات مو قادرين يميزون هويتهم ولا لغتهم يعني ابسط مثال عدنا بالجامعة الطلاب بشكل عام يتكلمون لغة البلد بالرغم ان الاثنين يملكون نفس لغة الام بس لان اللغة العربيه او لغة الام مو تريند ماعدا طريقة اللبس والاكل هذه قضية اخرئ ، يارب يصلح الحال للاحسن بس مقالتك اجت ع جرح القلب واسلوبك اتعب واقول رائع اقل شي شي مجموعه قصصيه ع هل اسلوب الجميل والسرد المتقن .
تحياتي
إمتناني لَك , خجلتيني بعباراتك
عَطيتيني أكبر من حَجمي وَ الله ..
صَح فيه ناس مَتخليين عن هَويتهم بس أتوقع فيه جماعات ثقافية تَحاول تعزز العروبه وَ إن كانت بعض المُحاولات فاشلة
إلا أنه يوماً ما راح يوصلون
بججد العالم صايرهه كذا ممله ، نفس اللبس نفس التفكير ، كل شي كل شي
ذكرتيني بمره كنت بمشغل سوت لي شعري وماعجبني قالت وحده ححلو لاتخربينه كلي الي يعجبك والبسي الي يعجب الناس قصدها شعرك بيعجبهم ؟ طيب انا ويني في الموضوع انا مو مرتاحه كذا ؟ لا مو لازم اهم شي الناس!
شكراا على الطرح الراائع ، عجزت اعبر
حَبيت كلمة أنا وَيني في المَوضوع ؟!
فعلاً وَينك ..
أسعدت بما كَتبتي , وَجودك كان له بَصمه
ارتوسه انا متابعتك تقريبا لي سنه ونصف و اتذكر اول يوم فتحت مدونتك جلست تقريبا اكثر من ساعتين وانا اقرا كل التدوينات جدا شخصيتك مميزة و تعلمت منك اشياء كثير من ناحية الفاشون و الميك اب و كلامك عن كيف نطور من شخصياتنا .. ❤❤ انتي بالنسبة لي مصدر الالهام وكل ما احس انه مافي شي يلهمني ادخل علئ انستقرامك
🙂 ما أقدر أقول غير لساني يَعجز عن شَكرك
لأن بَجد بجد عكثر ما كلامكم مُحفز وَ مُشجع
عكثر ما هُو يَحملني مسؤولية تَقديم المَزيد وَ المفيد وَ الأفضل لمُتابعيني لأن صَرت أحس علاقتي بمُتابعيني علاقة أكبر من علاقة كاتب وَ جمهور
نَورتيني
كلامك جميل ويمس الواقع استمتعت بقراءته للمرة الثانية
أنا لاحظت في نفسي اني لما أسوي شي أو أختاره بناء على ضغط الناس ما يطلع حلوو عليا وكنت أعاني كثيير أكثر شي مع أمي الحبيبة بس الحمدلله أحس بانت هويتي كثير بعد ما تزوجت يمكن عشان الزواج أعطاني استقلالية أكثر
سَعيده لأرتياحك الذاتي مَع نفسك
والله يَخلي لك الوالدة يآرب
أول شي احب ابرك لك في هالمدونة ، الله يجعلها عامرة ..
عامره بوَجود أمثالك
نورتيني
تراني كتبت تعليق وش طولة مدري وين طار 🙂 ما طلع لك الا التهنئة
أعتبريه وَصل .. نَورتيني
تكلمتي عن موضوع جداً مهم ومتشعب ، وما اخفيك انا كثير افكر واتكلم حول هالموضوع ، وصدقاً اقول لك من زمان وانا اكثر ما يعجبني فيك -تحديداً في الانستقرام- تميزك او تفردك ، مو بسبب اختلاف مواضع او طريقة التصوير فقط ، لكن شخصيتك كانت واضحة في برنامج كثرت فيه النسخ البشرية .. طبعاً مع الكلام عن موضوع التفرد ، يروح بي مخي للناس العكس ، فيه ناس تفهم التفرد ان تكون عكس الناس وغير الناس وتخرج عندنا الشخصيات الشاطحة والخارجة عن المألوف لمجرد طرح فكرة اني شخص مختلف ولي شخصيتي ، وبين هذا وذاك تضيع الشخصيات ..
طبعاً انا مثلك الى فترة قريبة ، تبنيت وحاولت اتبنى الكثير من التقليعات ، او حتى الاشياء اللي كنت اشوفها جميلة على غيري ، كنت اظنها جميلة علي ، ومؤخراً قريب يمكن من سنتين ، بديت استوعب ، ان لكلٍ هويته ، مهما خرجتي منها وحاولتي تطلع بشكل او بآخر ، لذلك راقبي تصرفات الاشخاص اللي غيروا هوياتهم ، خصوصاً مشاهير العالم العربي ، مهما حاولوا ما يطلعون من جلدهم ، يتبع
تابع مثال : اليسا في ستوديو الفن في اول التسعينات نفس شخصيتها وطريقة تفكيرها ، مع بعض الاختلافات البسيطة الطبيعية في نظري ، اما نانسي عجرم مثلا ما راح اقول من التسعينات ، خذيها في الالفية الاخيرة اكثر من اربع خمس كركترات اعتمدتها على فترات مختلفة من البنت الكيوت للبنت المثيرة ورقص مصري الى الام والشخصية الرزينه ، ما تقنعني شخصيتها اطلاقاً
ختماً ، اظن انه مهما حاولنا بيأثر علينا تفكير المجتمع ، وممكن يوجهنا بطريقة او بأخرى ، المهم تحجيم هالتأثير ، ومحاولة اظهار الشخصية ، وبس .
السموحة طولت مررة من طبعي احب البربرة ههههههه لو اني دارية الفت كتاب .. واعذريني مدري ليه يطلع كلامي مفصل ، امسيحها بوجهي والا امسحي بها بوجه اللي صمم الموقع اللي يحاول يسكتني ههههههه 🙂
بالعَكس حبيبتي كلامك يَعبر عن وَجهة نظرك
وَ يثريها بَطريقه أو أخرى , يعني كثير أكيد راح يستمتعون بكلامك لو قَروه ..
المُجتمع أكيد يأثر بَك , لكن نتمنى يكون هالتأثير إيجابي بَدون إلغاء الهَويه الخآصه
سعيده جدا جدا بهالمدونه الله يبارك لك فيها .. جد كلامك درر بسم الله عليك
مره شكرا لا تحرمينا من هالطلات الحلوه
وَ أنا سعَيده أكثر بتواجدك
بالرغم اني احب تدويناتك الجماليه جدا واستفدت منها كثير
لكن اعشق اكثر هالنوع من التدوين اللي فيها فضفضه وكلام من خاطرج. فعلا فعلا استمتع فيه. يتأكدلي اني انا معجبه بانسانه تستحق الواحد ينعجب بفكرها وجمالها ❤️❤️
وَ الله لي الفَخر بإنسانه مَثلك
فعلاً تجبرين الواحد على إحترامك , ماشفت منك إلا كل خير
وَ نَورتيني
ارتوس ياارتوس لايق عليك انك تكوني محرره في صحيفة او حتى المديره جمالك جمال متأكدا انك حتصيري شي كبير بالمستقبل احبك.
وياريت تتكلمي عن الحبوب البيضا اللي تطلع تحت العين بالضبط مااقدر اشيلها ولااتحكم فيها لانها مغلفه مو زي الرؤوس السودا معذباني والإلهي:’
نقدك يشبه نقدي جدا من ناحيه الاشخاص وكل واحد له رايه وبصمه والشي اللي يعجبه .. انا برراي لا طالما الشي مايخس الدين للك الحريهزي ماتبغي تسوي وتبدلي وتحطي .. وولاسف ناس حولي اكره الحوار معهم .. لانو اللي ينقال منهم هو الصح .. وبنفس الطريقه يقولون احنا مانتدخل ولا نرفض رينا .. لاكن الواقع فرض .. ولا بعد زعل.. ف اطر اكون جدا سطحيه .. وانتي ارتوسه جمليه وتضلي جمليه ب هالكتبات الرائعه من قلب لطيف وعقل مفكر ورايقي .. اشكرك ع كلامك الجميل
نَورتيني ..
الأفضل الإنسان ما يَتطفل بحياة شَخص إلا إذا حس إن له قَبول , لأن النتائج بتكون عكسية
حتى لو راح تنصحين أحد بأمر دَيني , إذا إنتِ خلقه مالك قَبول ما راح تستفيدين شيء سَوى إنك تكلبينه على الدَين
فالأفضل تبحثين عن شَخص قريب مَنه ينصحه بأمر دَينه , هذا لو فعلاً الواحد عنده رغبه لتغيير هالشَخص للأفضل
وَ خوف شَديد عليه نابع من مَحبه من عقوبة الله , أما غير ذلك لا أراه مُجدي .. وَ بالنهاية وَجهة نظر
لأن التَطفل يُعد تَطفل
هذي ثاني مره اقرى التدوينه استمتعت فيها ع اني متذكره اغلب الكلام وراكز بداخلي
صحيح كلامك اغلب اللي اشوفهم حولي انطمست هويتهم وصاروا يقلدون فلانه وعلانه ،واذا ماقلدتي هذا معناته عندهم ماتطورتي
اذكر يوم كنت تقريبا بالمتوسط لبسي كان غير عن خواتي كنت كل مااروح السوق اجلس ابكي عند امي لين اخذ الشي اللي عاجبني مع اني كنت البس اشياء شاطحه بس والله للحين مقتنعه فيها وحابتها ولبستها وانا مرتاحه مع انه الناس تستغرب ويمكن يحشون من وراي الا اني المناسبه الجايه القى كم بنت مقلدتني وناسخه شكلي 🙂
اعتذر عن الإطاله
عَشقت إضافتك ..
أهم شيء قَلتيها كَنتِ مرتاحه مع نفسك , بالنسبة لنسبة الشَطوح هي مسألة نَسبيه
اليَوم يشوفونك شاطحه بعد كم سَنه يَسوون مَثلك
نورتيني
كلامك رائع برسل الرابط لأمي ☺️ لطالما عانيت من هذه الناحية مع أمي تبيني أكون نفس البنات اتذكر من زمان ايام الخصل البنية و الشقراء كانت تبيني اصبغ نفسهم و بعد الفترة القريبة اللي هبوا باللون الزيتي و الرمادي و هالاشياء بس انا ما اشوف شيء يناسبني و يناسب شخصيتي و لون بشرتي غير سواد شعري الفاحم
يآهلا نَجلاء ..
ليكون أعرف أمك ؟! .. أسمك شككني صَراحة
وَنورتيني
يا جمالك يا آرتوس.. وأنا أقرا التدوينة يمر على بالي وضع صديقاتي كل شي كتبتيه ينطق على مجتمعنا ودائم أحاول ادافع عن نفسي مع إني مقتنعة إن ما لهم دخل في ذوقي بس يضيقون صدري كثير لدرجة صرت أكره اختلط بأحد كلش انتقاد وتعييب مع إن بعضهم لو بيدها عملت لك كوبي آند بيست لكن طول ما انتي تختلفين عنها يعني إني كخة .. أحوبك يا آرتوس ❤️
نَورتيني وَ الله ..
لا تَحاولين تدافعين عَن نفسك مَفروض تكونين بارده
لأن رأيهم شَيء خاص بَهم , الدفاع معناته تَشوفين نفسك غَلطانه
أضحكي وَ ستانسي قَوليلهم ليه حارقين أعصابكم !! كلاً بذوقه
ياااحبي لك يختي تدوينة تفتح النفس فعلًا ،، بالذات بهالوقت مع الإنفتاح الكبير بين العالم ، الواحد يحتاج مثل هالكلام كتذكير ، جد حبيت❤❤❤
من ذوقك يالغالية
رأاااائعه انتي ملهمه الجميع وسعاده كبيره لنا ..حبيبة قلبي انتي
حبيبتي جُوجُو ..
مره فرحت بالمدونة لأني أستمتع لما اشوف تجاربك وأقرأ كلامك ، أسلوبك في الكلام مميز ويدل على أن شخصيتك قوية ، صراحه اتمنى تكون عندي هذي الفصاحة في الكلام والبصيرة الي عندك تجاة الي نشوفة في الوطن العربي .
جربي تَكتبين يَمكن يكون عندك وَ مابعد أكتشفتي هالمَلكه
ياحلو هالتدوينه ارتوس
ثلاث مرات اقراها ولا امل
بجد بجد تمنيت اني انا الي كاتبتها من زود ماهي عاجبتني
الله يوفقك وتصيرين احسن واحسن واحسن
يالله مَين قَدي , أخجلتيني
يسعد صباحك / مساك آرتوستنا ()
تدوينة جميلة وموضوع كثير حلو
ومن جد هالعينة بالمجتمع تجيب لك الغثيان وكله كوم واللي يعيب الأكل كوم ثاني خاصة لاصرتي تاكلين معاه ياه شي بشع جداً
يع هذا ما ادري كيف طعمه / يوه هذا في ريحه / أُف شهالطعم الخايس ولا يطلع لك نغمات مع التنعفق > ياشينهم أكره الأكل معهم بشكل ><"
وبرضو من ناحية أنا إنسانة سالفة مناكير ألوان فاقعه أصفر فاقع فسفوري لمبة كلش ماتدخل مخي أحبها على أظافر الناس أحياناً بس مستحيل أحطها على آظافري ! من ناحية إذا صرت أتسوق وشف ألوان كذا قشيتها لأختي لأن أعرفها تحب هالشي وبقوة .
ويطول الحكي عن هالموضوع من نواحي كثيرة بالحياة .
ويخزي العين آرتوس تدويناتك شكثر جميلة و بحبها بتابعك وبستفيد منك بشكل يسعدك ربي يختي ! من كل قلبي بتمنى لك التوفيق () …
وَ يسعد لي قَلبك غاليتي
وَ الله كل رَد أحسن من الثاني , خَصوصاً ذكر مَواقفكم أو نظرتكم بهالحَياه
مَرورك أضاف الكثير
كلامك جدا راقي يا أرتوس .. فعلا ما أجمل شخصياتنا الحقيقية الغير متكلفة و اللي تحمل طابعنا الخاص ..
لما كنت في الثانوي مرت علينا الأستاذة توزع علينا أوراق الاختبار و لما انتهت و وزعت عطتنا محاضرة عن شكر الآخرين .. و إن من 40 بنت ما شكرها إلا بنتين
صرت أهتم بوجوب الشكر للآخرين حتی بعد ما دخلت الجامعةو صار هذا جزء من شخصيتي .. صرت أحس بالامتنان لكل شخص يبذل جهد عشاني .. عاملة الكافيتريا دكتوراتي زميلاتي حتی سواق الباص و كل شخص … صرت أعبر عن امتناني بالكلمات و بعض الافعال البسيطة و الابتسامة
الامتنان اللي أعبر عنه بأبسط طريقة و يعتبرونه البقية تملق ..
كنت أمسح السبورة عن دكتورتي اللي سوت عملية في يدها و تعب عليها تحركها و علی الرغم من تفوقي اللي ما يختلف عليه اثنين .. كانوا يقولون إني ما أحصد درجات عالية إلا بأني أتملقها و أتمصلح قدامها ..
من حق كل شخص يتصرف بالطريقة اللي يحبها و تعجبه .. و مو من حق أي أحد ينتقد تصرفاته طالما ما تغضب رب العالمين ..
شكرا لك و شكرا لذوقك
هذا مو تَملق , هذا إحترام وَ تقدير
فَعلاً امر هالمُجتمع عَجيب
الشاعر أحمد شوقي يَقول : قم للمعلم وَ وفه التبجيلا , كاد المعلم أن يكون رسولا
يعني هذا شيء إيجابي , وَ من لا يَشكر الناس لا يَشكر الله
وَ الجفاء وَ القسوة وَ شوفة النفس صفات كريهه
أحييك على أخلاقك العالية
قمة بالرووووووعة والرقي.. راق لي جداً جدا جدا
أخجلتم تَواضعنا ❤️
يسلم بؤك على قول اخواننا المصاريا
سابقا كنت من هذا النوع وكنت اخجل من نفسي
كنت افكر ايش حيعجب الناس قبل لا اسأل هل هو يعجبني او لا
وبعدها جاتني حالة طفشان صار ما همي وصرت البس اي شي واكل
اي شي وكنت احسب اني اتغلبت على الشي الي جوتي الي كان
همه الناس بعدين اكتشفت اني اهملت حتى الي ابغاه انا
احيانا تختلط الامور بس ترجع المياه الى مجاريها وكلامك يساعد في رجعتها
وحمستيني على شغلة انه يكون للوحدة شي مميز يفكر الي حوليها بها
وجاري العمل على هذا الشي
لا تحرمينا من فلسفاتك
أحم أحم , أخجلتم تَواضعنا , وَ سعيدة إن التَدوينة نالت على إعجابك
وَ سعدت أكثر بإضافتك لها تَجربتك الشخصيه
نورتيني
تعجبني فلسفاتك دائما اقراها و اقرأ ردودك صح أني مو دائما أوافقك بارائك بس أحب أقرا كلامك أحس انه مميز و فعلا يعبر عنك الحين الناس مو بس بالشكل متشابهين حتى بكتاباتهم و كلامهم و ذوقهم سبحان الله متشابهين ههههه كثري لنا من فلسفاتك و الله مرة حلوة
حتى الأم وَ بنتها يختلفون بالأراء هذا لا يعني العداوه أو البَغضاء ..
دايم توصلني ردود مثل ردك تقريباً , أنه مو دائماً أوافقك بالأراء بس أحب أقرأ كلامك ..
غلط إن الناس يكونون نُسخ من بَعض , وَ حتى لو عَجبك رأيي بَمكان مَا ..
هذا مايعني إن كل أرائي ستوافقك , هل تعتقدين فرضاً إني أكتب كل أفكاري ؟! بالتأكيد لأ
ولا أكتب حتى ١ ٪ منهآ لأن مو كل فَكر لك قابل للنشر أو مَقبول إجتماعياً ..
دايم أحس لما أحد يكتب لي كلمة صَح أني مو دائماً أوافقك بالرأي , كأنه يَخاف يَعطيني شرعية
أو مَنبر , أستغرب من هالكَلمة وَدي صراحة أكتب موضوع عنهآ , ليش دائماً نضع الإستثنائات !! ..
وَ نورتيني ❤️
أنتظر التدوينة عن ” ليش دائماً نضع استثناءات”
– أحب فلسفتك :$
جد كفيتي ووفيتي، ابدعتي يالغاليه في طرح الموضوع ماعندي أي تعليق غير أني أتمنى فعلاً هالتشويه الذاتي والفكري والسطحيه يختفي من مجتمعاتنا
حبيبتي أنتِ , أسعدت بتشريفاتك لي بأغلب تَدويناتي ..
على سالفة الجريش و المرقوق.. الاسامي تختلف عندنا بس الهدف واحد,,, الحين صارت موضة تشوفي كل وحدة تصور و قبل فترة كانوا يقولوا وع… حتى الاكل تقليد فيه..
للاسف في مجتمعنا الخليجي التقليد صاير افة لازم نتخلص منها… صرنا نادرا ما نشوف اشخاص لهم هويتهم الخاصة و ستايلهم الخاصة.. حتى الحين اذا رحتي عرس بتشوف الكل نفس موديل الفستان نفس المكياج نفس التسريحة.. الكل مقلد فنانة معينة.. و المصيبة الكبرى لما تجي شخصية مشهورة تقلد شخصية ثانية.. صرنا نشةف اشباء هيفاء في كل مكان للاسف..
جميل انه الشخص يكون له شخصيته المختلفة ستايله المختلف تحسي انه الشخص المختلف دايما الاضواء عليه و دايما يكون مميز..
دُرر دُرر ..
أسعدت جداً بإضافتك .. الإعلام له دُور برأيي
ثرثرتك رائعة اول مره اتمنى البوست مايخلص وانزل بلهفة
اشياء انا عارفتها بس انتي ذكرتيني فيها شي جميل لما الواحد يعتز بنفسه
انا من يومي صغيرة ومبينه ان انا غير لي طابع شخصيتي غير عن الباقين مدري كيف بس احاول اتميز عن الباقين مو بالشكل بالتصرفات!!
اضحك على نفسي لما اتذكر بس فخورة بهالشي الحين احس صرت اخف من قبل واتمنى ترجع شخصيتي بارزة مثل اول كلامك بصراحة حفزني والهمني كثير
شكرا لك وكثري مثل كذا تدوينات تناسب لك تصلحين ي اختي تشتغلين بجريدة والا مجلة
بالفعل كلامك صحيح مية المية
انا نفسي عانيت من هالمشكلة سنين مع عائلتي وهذا اصعب شي في وجهة نظري لان عانيته ..
انا تربيت مع اولاد فميولي دائم كلاسيكي في اللبس الشعر الالوان الخ في حين ان جسمي وسحنتي مايضبط عليها الا كذا وللاسف عائلتي تضغط علي وباانتظار مني اكون كيوت وغنوجه هههههه مع اني احس اذا مثلت اني كذا حيكون تقولب بقالب مش لي ح اكون مو انا انما شخص ثاني ..
في حين اختي الصغيرة يضبط عليها الكياته والالوان الخ
في فترة لاحظت تفضيل اختي علي في هالمجال
لكن مازلت مصره على استايلي لانه يلبق لي بعد فتره اللي كانت هي السبب في اثارة الموضوع من البداية صارت هي تحاول تقلدني ..
والان كل اللي حولي اتعودوا علي لدرجة اني اثرت في تذوق اخواني الذكور في النواحي هذي ..
ولا يزال يعجبني استايل اختي عليها لدرجة قف ولا اتخيل انه علي ولا اتخيل غيره عليها
قلب الموضوع ..
احيانا صعب نقنع ناس نحبهم بشي معين نحبه مع الزمن بيتعودوا .. واللي يحبوا التبعية هم اللي رح يوقفوا في وجهك ..
كفيتي ووفيتي حبيت اذكر وجهة نظري ..
وفقك الله لما يحب ويرضى
كلام فاتن ومنمق يدخل القلب
صادقه صرنامستنسخين من لعض لابعد درجة حلو يكون لك بصمتك في الحياه وبصمتك في مجتمعك اللي حولك
حلو تبدعين باللي احبينه حتى لو صار غريب عن الناس
كلامك وائع جدا
ماتتوقعين قد ايش يعجبني كلامك واقنعتيني
ثاني مره أقرا هالتدوينه لإني جالسه أتثقف من خلالك .. عن جد شكرا يا ارتوس
على فكره أروق على التدوينه الطويله لاتفكرين تختصرين
سبق و قريت تدوينتك هذه .. يمكن قبل 3 شهور و صحيح لامست شيء في قلبي و حسيت نفسي فعلا شيء مميز .. و إن شخصيتي المختلفة و أطباعي فرضت أساليب التعامل معها فرض على المحيطين حولي
مثلاً : كنت نادر و نادر جداً أأكل الدجاج ,, كنت أشمئز من ريحته .. لكن في حالة انطبخ كويس ممكن أكل من الصدر بس … لكن في مرة زوج أختي جاب حمام لأمي و أبوي و أتذكر إني شميت ريحته صابتني حالة غثيان فضيعة
كرهت بعدها الطيور جميعها .. حتى الدجاج و صرت ما أجلس عالسفرة لو كان الغداء دجاج
كانوا إخواني ينقدون هالطبع و هالإنتقائية الزايدة .. لحد ما صاروا بلا وعي منهم يحترمون هذه الرغبةو لما يشتهون يطلبون من برا يعملون حسابي إني عشاي لحم .. و صاروا ينبهوني لو كنا بعزيمة إن الفطاير الفلانية محشية دجاج انتبهي لا تأكلين منها..
و هنا صرت أحس بالانتصار .. شيء في داخلي ينتشي و أحس إني شريرة
لما رجعت بعد 3 شهور أقرأ تدوينتك حسيتها مدتني بالطاقة من جديد كأنها شحنتني عشان أواجه التحدي الجديد اللي الناس استغربت منه
لكني مكملته مكملته بإذن الله
شهر يناير الماضي تخرجت من الجامعة بتقدير good تخصصي كان رياضيات .. لكن التخصص ما كان سهل و النظام مش متعاون أبداً .. و معدلي هذا أعتبر من الأوائل بدفعتي
لكن أبوي و أمي ما كانوا مقتنعين إن بنتهم اللي ينضرب فيها المثل بتفوقها و ذكائها بعد ما قضت 5 و نصف في الجامعة تخرج بهالمعدل ..
أكره التبرير و الشكوى .. و كيف بشرح معاناتي لأمي و أبوي إني أتعب و أجيب توتال يتعدى 55 من 60 قبل الفاينل .. لكن بسبة نظام سخيف يفرض إنه تتوحد أسئلة الشعب كلها و يختلف كل شيء علينا و أنجح في المادة ب C و فيها منة هالدرجة بعد ..
رفضت الإنصياع لاقتراح أمي و أبوي في إني آخذ دبوم تربية و أحقق حلمي الجميل بإني أكون أستاذة .. كنت محتاجة لأشبه ما يكون بفرصة جديدة .. عشان أقول هذه أنا صدقوني ما تغيرت .. لو نحصل فرصة أدرس الرياضيات من الصفر بدرسها بس بعيد عن غبنة جامعتي
و بشكل أو بآخر تحققت أمنيتي بما يشبه المعجزة .. و ببدأ من الصفر من مكان جديد لكن بتخصص ثاني مقارب للرياضيات .. و سجلت في الكلية من جديد بشهادة الثانوية و المعجزة إنهم ما دققوا إن شهادتي اللي عدت خمس سنوات
ما حسيت بالجبن أو بأدنى نية للتراجع .. لكني حسيت بالخذلان من كلام البعض اللي لامني بطريقة سيئة .. شهادة البكالوريوس اللي خذيتيها تجيب لك أحسنها وظيفة .. و وش الفايدة تضيعين زود سنتين من عمرك عشان شيء ما منه فايدة ؟؟
لكن عجزوا يفهمون إن داخلي شيء محتاجة أثبته و أظهره للوجود .. و إن حلمي الجميل صار حاجة أكثر تطور في إني أكون أكاديمية قد الدنيا .. و أنا متأكدة إن إذا ربي مد في عمري و عمرهم بيشوفون إن طلب العلم خير .. و إن شبابي أبفنيه في شيء يعود علي بالنفع في الدنيا و الآخرة
شكرا لك آرتوس .. شكراً بقد السماء
كلامش كببير
كثري من هذا النوع من المواضيع
ابداً مامليت وانا اقرا
تهبلين ❤️❤️
وشكراً
راااااااائع
وللرد بقية هههههههه قاعده اجرب سجلت ولا بااااااقي. خخخخ
كلامك جدأ جميل البوست رائع..
احب طريقة تفكيرك ..وأحب طريقتك في الانتقاد ..يعجبني أسلوبك في إنتقاء الكلمات ..
انتي شي جميييل
جداً أستمتعت وأنا أقرأ وتكاثفت الأفكار براسي حبيت بساطتك بالكلام والبعد عن تعقيد الموضوع??
تعليقي يعتبر متاخر جدا على تاريخ التدوينة ههههههه
المهم
انا من الناس اللي ذوقي ثابت مهما حاولت اشطح ارجع زي ما كنت وبنفس النظام
مثلا ذوقي باللبس كلاسيك ومرتاحة فيه اتبع الموضة بدون صرعات
مو انا صح وغيري غلط بس هذا ذوقي .
شعري اسود واحب لونه عمري 25 وماقد صبغته وكل ما افكر اتردد وابطل
في حين اختي الصغيرة نسيت لون شعرها الطبيعي من صبغة لصبغة ومن قصة لقصة هي تحب تغير وتجرب
انا افضل اكون في الSAFE SIDE
كثييييير من اللي حولي من صديقات وغيره يرددوا ملينا من شعرك على طول ستريت واسود وطويل
ومكياجك على طول ناعم وهادي .
اقولهم انا مرتاحة فيه كذا الكيرلي مرات اعمله واحبه بس مو دايما يمسك بشعري او يطلع مرتب
وبانسبة للمكياج ملامحي صغيرة وماهي حادة ما تتحمل مكياج قوي زي اللي تحطه هيفاء مثلا
جربت وغيرت بس الا ما ارجع لخطي الاساسي حتى اخواتي في السوق يمسكوا القطعة يقولوا ستايلك خذيها هههههههههه
عندي اخت جسمها صغير يعني بنيتها صغيرو زي ايفا لانغوريا
نادرا اشوفها تاخذ بنطلون على طول ستايلها كيوت وتناير قصيرة وفساتين وهي مرتاحة كذا
ما اعرف ليش الناس تحول تفرض رايها علينا وانه نغير ونصير مو مرتاحين مع نفسنا ولاعارفينها .
زي اللي يقنعوني اصبغ ازرق واعمل بيرسنغ في اذني واقص زي هالي بيري مثلا !!
اقولهم طيب والشخصية ؟؟!! شخصيتي ماتمشي مع هذا اللوك واللي ما يعرفني وشافني اول ما اتكلم حيعرف انه شكلي مو زي شخصيتي ليش التناقض طيب؟؟
لازم هيئتنا تعبر عن شخصياتنا اولا واخيرا .
دايمًا تدويناتك متعة خاصّة الله يديم قلمك