صَباح / مَساء الأشكال المَريخيه
أمَزح أمَزح ..
المُهم إللي عارفيني زَين , دايم بيلاحظون إني أعلق على حَواجب الفنانات
وَ أنتقدهم وَ يمكن 90% من إللي بالوَسط الفني ما تَعجبني حَواجبهم العرب بالذات
الغربيات الفنانات ماشيات بالسليم بالرغم حواجبهم خلقه مَهب حلوه
بينما البلوقرز الغَربيات سواء بالآنستا أو باليوتيوب × , يمكن بناتنا العربيات العاديات آزين مَنهم
الحَواجب بعمرها مَا كانت شيء صعب رسمه بالنسبه لي ..
يمكن لأني محظوظه بطبيعة شعر حواجب سهلة الرسم وَ التحديد ، وَ متعوده غالباً ع القلم .
بس عن تجربه القلم إذا أُستخدم مُباشره على الشعره يطيحها ، وَ فعلاً حواجبي خفت مو مثل قبل ..
لذلك إللي حابه تستخدم القلم ضَروري ما تتَهور أثناء إستخدامه يَوماً ما بعلمكم شَلون تستخدمونه بَدون ما يَضركم ..
مُنتجنا اليَوم من أنستازيا | أنستاجيا
Anastasia Beverly Hills Dipbrow Pomade
هذي تدوينه خفيفه بتكون ريفيو عن منتج انستازيا للحواجب ، وَ بإذن الله بنزل تدوينه عن طريقة رسمي للحواجب لأني ما أعتمد على منتج واحد برسمها إذا كنت مصلحه فُل ميك آب ..
مقارنه بين أنواع منتجات الحواجب من أنستازيا ،’
القلم ، وَ منتجنا لليوم ، وَ التنتد جل
The Photo From beautypointofview
رَكزوا عالصَوره المُنتج إللي بتكلم عنه هو بوميد إللي بالوَسط
شآيفين شَلون قَوامه عالجَلد ؟!
اللون هو لون الشوكليت
سعره : حَول 70 رَيال سَعودي ..
غير مَتوفر بالسَعوديه
لون شَعري الحالي بني غامق , وَ مع ذلك غامق اللون عَلي فأرشحه صَراحه للي شَعرها أسود
تقدرين تخففينه بذكاء أو لو لون بشرتك غامق راح يَمشي معك
ما أفضل الحَواجب يكون لونهآ غامق آبداً أبداً تعطي مَظهر غير مَقبول بالوَجه
فأفضلهآ دائماً أفتح من لون الشعر بكذآ درجه , رَكزوا على حَواجب إليسا وَ هيفاء وَهبي دائماً درجات ناعمه ما تَعطي الوجه ثقاله أو عُمر زياده
عُموماً لو شَريت لون غَيره رآح أضيف رَيفيو آخر له .. هذا إضطريت أسَتخدمه بطريقه مٌعينه حتى أخفف من لَونه ..
مُنتجنا قوامه شبيه بالجل لاينر طبعاً هو وتر بروف مقاوم للماء يعني بيرفكت بالحر وَ الرطوبه وَ أيام المطر ، أيضاً قوامه سلس للمد على الشعر وَ الجلد بنفس الوقت ، كميه بسيطه منه للغايه تكفي ، تقدرين تستخدمينه لإعطاء مظهر طبيعي يعني تغطيه خفيفه ، أو للتغطيه السميكه
مُلائم للحَواجب الخفيفه جداً وَ الكَثيفه
يجي بـ 8 ألوان أو ظلال بالأصح ، هذي أمثله عليها ،’
The Photo From makeupatoz
هي مَصوره فقط 5 ألوان هُم 8
أسماء الألوان ~
Blonde – Taupe ـ Auburn – Soft Brown – Medium Brown ـ Dark Brown ـ Chocolate ـ Ebony
وَ هذا مَظهرهم عالحَواجب , لحظوا كله يَعتمد على تَكنيك الوَضع
لو قَسيتي رآح يَقسى مَعك وَ العكس صَحيح
The Photo From makeupatoz
إللي مَعي هُو لون الشَوكليت ..
صوره للحواجب بشكل طبيعي ~
The Photo From cosmeticsobsession
رأيي عن المنتج ،’
طبعاً ما أقدر أحكم عليه بشكل دقيق لأن فترة إستخدامي له قليله ، أشوف أي منتج لازم يستخدم لـ 3 أشهر على الأقل وَ تشوف ضرره ع البشره
فيه بنات سألوني هل ينشف ؟!
ما بعد طول معي لكن لتلافي هالمشكله لما تخزنونه أتركوه بالمقلوب يعني على الجهه إللي فيها الغطاء وَ بما انكم مستعجلين ع التقيم عجلت بالبوست .
لحد الآن افضل منتج جربته للحواجب ليه ؟
• ألوانه كثيره وَ منطقيه يعني لاهي محمره للغايه وَ لا شهباء
• شكله أقرب للطبيعي في حال أستخدم بكميات قليله
[ أنا أسَتخدمت المُنتج 10 مَرات .. وَ مع ذلك لاحظوا شكل العَلبه ما تَحرك مَنهآ شيء ] ..
• سهل الإستخدام وَ سهل التحكم فيه
• ثباته ممتاز مايسيح مع الوقت ، بس للأمانه ماجربته في المسبح ههههه
بالنسبه لعيوبه إذ تعد عيوب ،’
• صعب التوفر بالسعوديه تلقونه عند التاجرات لذلك تضطرين تشترين على عَماها
•مامعه فرشه إذا قارناه مع تاتو ميك اب فور ايفر
• ريحته مو حلوه تشبه البلاستك بس خفيفه غير مؤثره
نهايةً راح أشتري مَنهم الأقلام وَ لون أخر غير هاللون إللي عَرضته وَ أيضاً الباودر
راقت لي جداً مُنتجاتهم فأحس مُستعده إني أغامر مَعهم وَ أنا مُتطمنه وَ ووقتهآ راح أطرح تَدوينه تَسر خَواطركم
فيديو لإنستازيا لطريقة الاستخدام ~
http://www.youtube.com/watch?v=q-qdeYpp5XI
إجَتهآدات الغَربيآت
http://www.youtube.com/watch?v=Wq5kuFIDIYs
http://www.youtube.com/watch?v=zsh8kOcw70o
دُمتم بَحب
مُلاحظة / هذه التَدوينه تَم نشرهآ سابقاً بتاريخ 08-08-2014
حواجبي تاريخها طويل
عاد السوالف مَنك لا تُمل 🙁
امبيه التعليق كله طار
ماقدرت احدد درجة اللون المستخدم بااول فديو تعليمي لطريقة الاستخدام ؟ احد يفيدني
ارتوووس بليييز
i tried the brow wiz from Anastansia ..it’s a beauty and easy to draw.. it’s not a pencil more of gel pencil.. doesnt hurt the brows’s hair.
بالضبط سهله وَ مالها أي أثر جانبي على شعر الحاجب
أسعدت بتواجدك وَ مرورك على تدويناتي
ماشاء الله عليكى
الله يوفقك يارب
انا القلم طيح حواجبي وماسبق استخدمت جل لرسم الحواجب
بكل شغف انتظر تدوينه طريقة رسمك للحواجب
جد مررره احبه❤️واهم شيء تكون الرسمه تناسبك عيب بعض البنات انها تبي تقلد رسمة اي فنانه وهي غير شكل الوجه ر الملامح ،،بس الشاطره تبرز ملامحها مو تقسيها ..يعطيكي العافيه ياقلبي
ارتوس هل الجل يسبب سقوط شعرة الحاجب ؟؟ قريت هالمعلومه يقولون تسبب انسداد او شي زي كذا .. واذا كان صحيح الاستخدام اليومي يأثر ولا لا ؟ وشكرا
ما قَريت هالمَعلومة , تَحققي مَن وين جَبتي هالمَعلومة ؟!
هل من شَخص له إطلاع واسع أو لأ , بَكلا الأحوال لو خايفة إستخدمي بودرة الحواجب تَفي بالغرض
وين نلقى هالمنتج الصراحه انا افضل الجل عن القلم
فعلاً القلم أسوأ منتج للحواجب هرت حواجبي منه بس الحمد لله ترجع تزين لما توقفينه .. انستازيا عندي اوبرون كلها القلم والباودر والجل هاللون كلن يكرهه هو محمر يليق تماما ع اللي شعرها الطبيعي احمر لكن لما الشعر يكون طبيعي غامق ما يليق ابداً وانا اخذته دلاخة صراحة بالمحل جربته وعجبني لما رجعت البيت لقيت إني غلطت بس فتحت حواجبي واستخدمته صار اللون بطل جداً ولا فيه أي اثر للون الأحمر بالعكس حبيت الدرجة وهالكلام عن الجل اما البودرة جميل اللون ما به خلاف والقلم نفس لون الجل استخدمه لما أبي احدد حواجبي بس احاول ما اقربه ع الشعر علشان ما يطيح ميزته نحيف وما يحتاج بري وغالباً ما يحتاج ترتيب بالكونسيلر اما الباودر يا جمالها تستاهل كل ريال كنت مجربة بودي شوب وبينفت بس انستازيا فرقت عنهم بكثير ناعمة وتقدرين تحددين حواجبك كآنك مستخدمة جل يعني انا احيانا استخدمها لوحدها وطرف حاجبي احدده بالقلم على خفيف لأن ما فيه شعر كثير. فكرت آخذ الباليت كامل واجرب كل ألوانها من كثر ما حبيتها لأنه بسعر ثلاث او اربع مع بعض.. تدوينة جميلة يعطيك العافية عزيزتي xoxo
رغم اني املك حاجبين اقدر اقول ان من النوع اللي مش خفيف كثيفه ولا فوقها مشبوكه بشكل خفيف مع بعضهم
مشكله ان لما احفها:p يعملونهم لي والله مسخره من قلب هههههههههه كان مافيني حاجبين ويحددونهم لي بحف الخيط
وانا دائما اطلب بس تنظيف الشعرات وحول الحاجبين عشان احافظ ع طبيعه حاجبيني
لكن للاسف اضطريت ان اتوقف عن تنظيمهم عند احد لان يبهدلونهم
من ايام مدونتك بشمواه وانا انتظر طريقه بالحواجب رسمها تنظيفها وتضبيطها
نعم اثق فيك وبخبرتك وتعليمك الصح وتحذيراتك حتى حرفيا بطبق الحكي لما تنزلي تفصيليا عنه
اوقات افكر انا اضبطها بموس صغير بنفسي بس اتراجع اخاف ادمر اكثر من اني اعمرها ههههه
تعجبني الحواجب الكثيف ومليانه ومرتبه رسمتها تناسب الوجه وتظهره بشكل لطيف وللاجمل
مش المزعج اضافه ياليت تقولي للعالم ممكن يسمعوا منك حواجب التاتو الفحم خلاص يبطلوها* قلوب منقسم نصين *
جميلين وحلوات ويخربون اشكالهم وجوه خاليه من التعبير ومصطنعه
انا حواجبي ثقيله جداً ومره متحمسه على جل الحواجب هذا بس مدري
احس مارح يعطي حواجبي لوك طبيعي لأنه بيكون يعني مدري كيف -ان شاء الله فهمتي-
ومره شكرا حبيبتي.
حبيبتي ارتوس ممكن تفيديني باللون المناسب لحواجبي مع لون الشعر الأحمر ?
ارتوس ياليت تجاوبيني
حواجبي لونها اسووود وشوي سميكة مو مره المهم مناسبه لملامحي خصوصا من النص الى النهايه والرسمه كمان مرتبه بس مشكلها خفيفه مره من البدايه فا احتاج اعبي البدايه بس ..
اذا جيت اعبيها بلون اسود تصييير اوفر واذا بني يصير فيه تفاوت مادري احس شكلي غلط بني واسود واذا حطيت لون فاتح ما يناسبني مادري والله وش الحل
توقعي مديم براون تناسبني ابي لون على رمادي مو على احمر بس مالقيت ..
???
Bonjour artos
اهم شيء اني ارد لحالي ومتأخر بعد بس احس من حقك علي اني ارد لانك كتبتي لنا >> تفلسف صح ؟
المهم الحوااااجب و ما ادراك ماالحواجب معضلة العصر بالنسبه لي اول فنن تعلمته بالمكياج الحواجب وكانت تعجبني قديما حواجب نجوى ونوال الزغبي وحالياً هيفاء بالرغم مش ستايلي بس حلوة
تدرين مرررة وحدة من اللي عندهم اسلوب مرررررة قالت تدرين وش احلى مافيك وانا عارفة انها بتجيب العيد لان ملامح وجهها ماتبشر بخير خخخ قالت : رسمتك في حواجبك خخخخ حتى ماقالت حواجبك عشان ماتنسب الحلو لي على طول او انها فاهمة انها مش طبيعي انا طبعاً قلت لها شكككراً وانتي مو اول وحدة واصلاً عمري ماشفت احد بالجامعة يعرف يضبط حواجبه >> كذب بس ابي اقهرها
وحدة خواتي بيييضاء وشعرها فااحم وترسم حواجبها اسوووود ياااااالله اذا شفتها اتضارب معها لا انا اقتنع ولا هي تنقنع
فالحواجب حتى اقرب المقربين منك مممكن يجلطونك فيها
Je t’aime artos
لي فترة لا بأس بها استخدمه حبيته اكثر من الباودر
وتقريبا احاول ارسم حواجبي بطريقة سندس القطان واحسها حلوه
صحيح مابعد صرت ماهره مرره بس تعطيني نتيجه حلوة وترضيني ..()
اللي عندي دارك براون وحواجبي شبه خفيفه
توي اشوف هالتدوينه اسمحيلي برد عليها مه ان لها سنه اتوقع بس احس واجب علي ارد عليك من حقك علي كامتابعه ❤❤
عندي زيه جل حواجب جايني هديه من اختي شاريته من امريكا مرره روعه جاي مع فرشه صعنونه وتجننن عجزت القي مثلها عندنا
ولونها تشوكلت مع ان حواجبي سودا بس ناسبني بسس بعد فتره نشف معي
بس شكلي بشتري ذا احسه راح يذكرني باللي نششف
وشكررا من القلب ع هالمعلوماات الدميله ❤❤❤
بعد زمن من اهتمامي بالحواجب وتشقير وكذا
خلاص تركتها على طبيعتها
وشفت انه شي مريح لكن مدري عن الناس
انتي سوس لما تشوفين وحده ست مش بنت لوووول
حواجبها على طبيعتها تنقدين؟
هل تقولين ما عندها اهتمام؟
طيب اذا كانت متهندمه تعرفين ان عدم تعرضها لحواجبها
قناعه مو قلة مفهوميه؟
مع ان عندنا جدات يدعسون على الزمن وطايحات تشقير
وصبغ واحيانا يا حياتي ما يمديها فتجيك في المناسبه
كل اللي على اطراف الحاجب احمرار ولسع من التشقير .
هلا عزيزتي ?
حواجبي ولله الحمد حلوه وطالعه مرسومه وكثيفه ، فعشان كذا محتاره آخذ الجل؟ او اكتفي باني اخذ باودر لان اخاف يعطيني مظهر انها مو طبيعيه ، خصوصا بان حواجبي سوداء ، لكن ان شاء الله اشوف حل ، شفت سناباتك عن بودرة مورفي للحواجب فكرت فيها بس اذا اخذت اخاف الالوان الثانيه مارح استفيد منها ، وجزاك الله خير ي قلبي