صَباح / مَساء الحُب
مَوضوعنا اليوم يُعتبر مُكمل لـ موضوع خطوات كريم الأساس المَثالي ( للإطلاع أضغطي هُنا )
ألا وَ هو مثبتات الماكياج أو ( الـ Makeup Setting Sprays )
وَ نحتاجه بشدة في أجواء الخليج الحَارة وَ خاصة في المَناطق الرطبة
وَ إللي يلبسون غطوة يحتاجونه أكثر مِن غيرهم
وَ بما إن الموضة الدارجة لماكياج ٢٠١٦م هو الديوي لوك ( المَظهر الندي ) راح تكون حَاجتنا أكبر له
لأن مِثل ماتعرفون بالمَظهر الديوي نضطر نَبتعد عَن كُل شيء باودري قَدر الإمكان وَ هالمُثبتات راح تَخلينا نستغنى عَن الباودر
أغلب البخاخات المَشهورة مِن عقود وَ إللي تم تداولها على أنها مُثبت للماكياج في الحقيقة هَي مو مصنفة كمثبت ماكياج مِثل :
منتج ماك الشهير MAC Fix plus ( هي عبارة عَن بخاخات مُتعددة الإستخدامات )
وَ درج كثير عند الناس إستخدامها كمُثبت بما فيهم رذاذ المَياه المعدنية
قد تُساعد هالمُنتجات بتجنب المظهر الكيكي ، أو ترطيب البشرة ، إعطاء ثبات بَشكل بسيط لكن فعلياً هَي غير فاعلة في تثبيت المَاكياج بشكل مثالي وَ سبق قلت هالكلام بهالمَوضوع وَ جردت أغلب مُثبتات الماكياج ( للإطلاع إضغطي هُنا )
طبعاً فيه ماركات كثيرة بدأ يلمع نَجمها كمثبت ماكياج أو فينشينق سبري بشكل مُخصص مِنها الغالي وَ منها الرخيص ..
وَ أثبتت فعاليتها مِنها إللي يعطي مَظهر ديوي وَ مِنها إللي يعطي مظهر طبيعي وَ منها ماهو مسيطر علي الدهون
اليوم راح ألقي الضَوء على أحد الماركات الشهيرة إللي أنتشرت بكثرة وَ أرتبط إسمها بمُثبت آخر مِن ماركة مشهورة راح أذكره بآخر الموضوع
SKINDINAVIA
وَ راح أتكلم تحديداً عن : MAKEUP FINISHING SPRAY
عشان ما تلخبطون عِندهم مَجموعة لما قبل الماكياج وَ هو عبارة عَن برايمر سبراي خالي مِن السيلكون ( ماجربته وَ لا هو موضوعنا اليوم )
وَ أيضاً عندهم مَجموعة إللي هي مُثبته للماكياج للمسات الأخيرة وَ مصنفة لثلاث منتجات ( مثبت عادي ، مثبت مسيطر على الدهون ، وَ مثبت للعروس )
راح اتطرق اليوم لمُنتجين مِن هالمنتجات ألا وهو :
– المثبت العادي ( Skindinavia The Makeup Finishing Spray )
– المثبت المسيطر على الدهون ( Skindinavia The Makeup Finishing Spray Oil Control )
وَعود مُثبت ماكياج سكندينافيا ~
ـ يعطي ثبات للماكياج من ١٢ ساعة حتى ١٦ ساعة دون أن يبهت ( حسب حرارة الجو )
ـ مزود بتقنية السيطرة على الحرارة ( Temperature Control Technology ) راح أفصلها بعدين
ـ يعطي حيوية للألوان كالظلال وَ البلشر وَ يمنع بهتانها
ـ يناسب جميع أنواع البشرة
ـ يقي الماكياج مِن السيحان وَ التلاشي في الصيف وَ الرطوبة وَ من الجفاف في الشتاء وَ الرياح
ـ يعطي مظهر صحي وَ يجعل الجلد أكثر سلاسه
ـ خفيف الوزن وَ يسمح للبشرة بالتنفس من خلاله
ـ غير لزج ( لايسبب الإلتصاق) وَ تحسين كأنك مو حاطة أي شيء علي عكس المُنتجات المُنافسة بالسوق
ـ يمنع تجعد الكونسيلر وَ تكتل الباودر عند الثنيات
ـ هيبوالرجينيك أي لا يسبب حساسية
ـ غير كوميدوغينيك أي لايسد المسام
ـ خالي مِن الزيوت oil free
ـ خالي مِن المواد الحافظة ( الباربين )
ـ Cruelty-free أي غير مُجرب على الحيوانات
ـ العبوة الصغيرة تكفي للإستخدام ٩٠ يوم ( أي لثلاث أشهر مُتتاليه )
ـ المُنتج المخصص للسيطرة على الدهون فيه ميزة إضافية وَ هي يتحكم بإفراز الدهون وَ يمنع سيحان كريم الأساس وَ يخفف مِن لمعان البشرة
المنتج ذو شعبية بين المحترفين في عروض الأزياء وَ في استديوهات هوليوود ، سكيندينافيا ماركة مُتخصصة فقط بمُثبتات الماكياج وَ تطور مُثبتاتها للإستخدام الخاص بالفنانين لساعات طويلة وَ تحت حرارة الإضاءة وَ التصوير العالية بدون الحاجة لإعادة الماكياج أو عَمل رتوش
خاصية تبريد البشرة أو السيطرة على الحرراة ~
هالخاصية ماخذة براءة إختراع
مثل ما ذُكر في موقع الشركة حرارة البشرة العادية تخلي البشرة تفرز رطوبة بالتالي تجفف البشرة وَ الماكياج مما يسبب تصدع الماكياج وَ تقشرة ،
أيضاً تجعل الماكياج باهت مِما يضطرك لإعادته أو عَمل رتوش عليه ، أيضاً جفاف البشرة راح يخلي البشرة تفرز دهون أكثر عشان ترطب البشرة وَ راح يتولد عندنا بشرة مدهنة تبقع الماكياج ..
لذلك هذي التكنولوجيا تشكل طبقة خَفيفه الوزن غير مرئيه تَسمح للبشرة بالتنفس وَ بنفس الوقت حبس الرطوبة داخل الجلد بحيث ترشح الرطوبة خلال ١٦ ساعة ببطء فالنتيجة ماكياج زاهي يدوم طول اليوم دون أن يفقد الألوان ، بشرة رطبة بدُون جفاف وَ لا إفراط في إفراز الدهون وَ بدون أن تسد المسام
نتائج الأبحاث السريرية ~
ـ ٩٠٪ من المستخدمين ظل فيهم الماكياج برونقه مثل أول مامدوه
ـ ٩٤ ٪ أعطاهم توهج صحي وَ طبيعي
ـ ثبت أنه يساعد على إن الأساس يبقى في الثنيات وَ لا يتزحزح وَ يخطط
بالنسبة للنوع المسيطر على الدهون :
ـ ٩٠٪ أعطاهم نتيجة مطفية طوال اليوم
ـ ٨٥ ٪ أعطاهم سيطره عالدهون
سَعر المُنتج :
حجم ١١٨مل بـ ١٢٥ ريال
حجم ٢٣٦مل بـ ١٦٥ ريال
إللي مَعي الحجم العادي
مكان التوفر : أسواق طيبة ( وَ لا قبل كان غَير متوفر بالسَعودية )
طَيبة قامت تنافس سَيفورا وَ هارفي نيكلز مَهب هَينه وَ الله ههههههههههه
طريقة الإستخدام ~
بعد الإنتهاء مِن وَضع الماكياج
ـ ترج العبوة جيداً
ـ يبخ المُنتج بمسافة لاتقل عن ٢٠ سم
ـ يرش على كامل الوجه بشكل حرف T أو X
ـ تحتاجين مِن ضغطتين إلى ٤ ضغطات
شخصياً أحب لما أستخدمه أبخ بختين بالهواء قبل لأرشه بوجهي عشان مايكون فيه إحتمال إن البخ يكون مُتقطع
أو فيه ذرات كبيرة بحكم أن المُنتجات إللي تحتاج رج مرات تتصلب بمجرى البَخاخ ..
فيه بعد شغلة أحب أبخ البخاخ قَبل لا أمد الماسكارا مَع العلم هالنوع يُوعد أنه يثبت الماسكارا
لكن شخصياً ما أغامر وَ ابل وجهي بـ بخاخ بعد الماسكارا
طريقة إستخدامي لمثبتات الماكياج ~
١- بخ عادي على كامل الوجه لتثبيت الماكياج
٢ – لتثبيت الحواجب ،’
مرات أحب حَواجبي تكون كثيفة وَ مظهر الشعر واضح وَفيه رونق وَ ما أحب يكون مَظهرها بودري أو مبين إن فيه مستحضرات ..
فأرش بالفُرشة المُخصصة للحاوجب ( إللي تشبه فرشة الماسكارا )
أرش البخاخ فيها وَ أمشط شعر حواجبي (تعطيها مَظهر طبيعي وَ ثابت ) خاصه إني أحب الشَعرتين إللي أول الحاجب نافرة حَبتين
وَ حلاته خلاص يَثبتها لك وَ هي نافرة كأنك خَلقه كذا وَ لا كأنك راسمه ، خَطوة لا أستغنى عنها بَماكياجي [ جربوها وَ علموني ]
٣- لعمل ريفريشنق للماكياج ،’
هالطريقة حلوة لما تبين تجددين ماكياجك وَ تعطينه بهاء بعد يوم طويل ، تبلين البيوتي بلندر بالمثبت وَ تتطبطبين على الماكياج ، أو العكس تبخين وجهك وَ من ثم تطبطبين بالبيوتي بلندر ، راح يصقل الماكياج وَ إذا فيه أماكن تقطع فيها الماكياج راح يتعدل ..
برضو هالطريقة تقدرون تستخدمونها لما تشترون مثبت ماكياج يطرطش ( بخاخه غير جيد ) راح يقلل لكم حجم الذرات و يسهل نشفانه
اللي الكثير مايعرفه إن سكيندينافيا هي إللي طورت مُثبت أوربان ديكاي إللي حَقق شُهرة واسعة مِن بداية إنتاجه وَ هالشيء مكتوب في عبوة آوربان ديكاي وَ مكتوب في الموقع أيضاً
وَ قريت مُكونات الإثنين نفس المُكونات ، كلا المُنتجين يتكونون مِن ١٧ عنصر ، فيه إختلاف بَسيط في ترتيب نسب العناصر يكاد لايذكر
رأيي عن مثبت ماكياج سكندينافيا ،’
حبيت المنتجين وبما إني عندي منتج أوربان ديكاي قبل ، فعلاً مطابقين تقريباً لبعض حتى الريحة تَكاد تكون مُتشابهة ماشفت فرق يذكر ماعدا الباكجينق ( التعليب )
قد يكون منتج أوربان ديكاي قوامه أخف بشكل غير ملحوظ ، وَ المرش مداه أوسع أو يمكن لأني تعودت على علبة مرش أوربان ديكاي بما إنه عندي من فترة لكن فعلياً ماشفت ذاك الفرق وَ ماأدري فعلياً إذا فيه فرق أو يتهيأ لي
وَ طبعاً علبة اوربان ديكاي لونها يعشقه البنات بس عيبها تلقط وسخ بشكل عاد جاني الوسواس القهري لما أشوف البنات مصورينه مبقع ( طيب عَشان الصورة نَظفوه عالأقل .. )
طبعاً ماقدر أحكم على المنتج ١٠٠٪ كوني مُستحيل أقعد بالماكياج ١٦ ساعة حدي ٦ أو ٨ ساعات بالكثير وَ للأمانه قعدت بهالمنتج ٥ ساعات فقط
لكن حبيته ، فعلاً يثبت الماكياج ، يشيل المظهر البودري ، يعطي الوجه صحصحه ، يعطي الألوان رونق ، وَ لا يكتل المَاكياج آبداً
عاد تعرفون الرياض جافة مانعاني من الرطوبة بس جربته بهاليومين ( الجو مُمطر عندنا يعني تعد فيه رطوبه نسبياً ) جربته بدون ما أستخدم بودرة ماكياجي ثابت ماتزحزح وَ لا خطط وَ هالشيء بسبب إن البخاخ يحتوي علي الدميكثيون المعروف إنه ينعم البشرة
جربت الأثنين العادي وَ المسيطر علي الدهون صراحه ماحسيت فيه فرق بالمفعول ، مع إن بشرتي دهنية ، لدرجة عشان أقارن بخيت كل شق مِن وجهي بنوع ، وَ برضوا بعد ٥ ساعات ماحسيت بفرق لكن فيه فرق بالإحساس لايذكر ، المسيطر على الدهون إحساسه أخف شوي من العادي
لكن كونه يُسيطر على الدهون أو يعطي مظهر مات ما شَفت هالشيء ، لأن النوع الآوريجنال يعمل بكفاءة معي فما حسيت بالفرق لكن كوني أتقن الماكياج وَ أتبع خطوات مُلائمه لبشرتي ماأعاني من هالشيء ، مُمكن غيري يلاحظ فرق
عيوب المُنتج ،’
مافيه عيوب تذكر بالمُنتج لكن إللي مايعجبني هي العَناوين الرَنانه إللي تحب تكتبها الشَركات بالخط العريض
يعني تقنية التبريد مدري السيطرة على الحرارة !!
أشوفه شيء مُبالغ في وصفه أوكي قد يكون المُنتج يعمل كطبقة عازلة شَفافه تحمي الرطوبه الخارجيه وَ فقدان الرطوبة الداخلية ..
لكن ما أعتقد فيه شي بالكون مُمكن يسيطر علي حرارة الجسم ، مُمكن يبرد الجسم أثناء البخ لا أكثر خاصة أن المُثبتات غالباً تحتوي علي الكحول ، وَ الكحول مَعروف أنه يُعطي برودة للبشرة بالساعات الأولى ..
أيضاً مصطلح هيبوالرجينيك هو مصطلح مطاطي بدأ أستخدامه بعام ١٩٥٣م بمُنتجات التجميل وَ حتى بالأنسجة ..
مافي مُنتج مضمون ممكن ما يسبب الحساسيه إطلاقاً ، لكن فيه بشرة مُمكن تتحسس مِن الماء ، لكن المَعنى الدقيق لهالكلمة أنه أقل أحتمالاً لتسبب الحساسية ، فكون المنتج يحتوي على كحول فهو قد يحسس الناس إللي تتهيج بشرتهم من الحكول ، على فكرة الكحول بالمُثبتات هي إللي تعطي الإحساس الخفيف أيضاً هي إللي تخلي المَرش يعمل بكفاءة كونها تنشف بسرعة فتعطي مظهر مَصقول ، بعكس البخاخات إللي ما تحتوي على كحول ذراتها مُمكن تبقع لأنها تطول عشان تنشف
هالمَوضوع مُكمل لما سَبق طرحه
السِر يكمن بالتَفاصيل وَ التكنيك ، الكثير قد يملك نَفس المَواد لكن البعض لا يَهتم بالمُلاحظات
مثلاً بمُنتجنا اليوم ، عَدم رج العبوة جيداً قبل الإستخدام ، أو عَدم البخ من المَسافة المُحددة
قد يسبب تأكسد بالماكياج ، شيء طَبيعي عدم الرج راح يخليك تبخين مواد المُنتج بطريقة مَنفصله لأن الماء راح ينفصل عن بقية المُكونات
آتمنى تَركزون دائماً عالتفاصيل ، كثير مِن القراء أو المُستخدمين حتى للمُنتجات يتجاهلون طريقة الإستخدام
( حَتى مُمكن الكلام إللي كتبته وَحده تنط على السَطور نَط ، خلاص هذي ضريبة العَجلة )
مُلاحظة أتمنى ما تَلخبطون بهالمَوضوع بين مثبت ماكياج آوربان ديكاي وَ بين فيتامين آوربان ديكاي وَ سبق وَ كتبت عَنه للإطلاع ( إضغطي هُنا )
نَلتقي بإذن الله خلال اليومين القادمين بموضوع يَهم صاحبات الدوامات الصَباحية
دُمتم بَحب
?
حظي دخلت مع اول نزول الموضوع?
يعطيك العافيه … لحد الان ما جربت مثبتات يمكن لاني ما احتاجها كثير
ههههههههه لَبى قَلبك نَورتيني
تم ?
هلا هَلا رَحاب
أتوقع نَمتي وَ قَمتي وَ أنا تَوني
كل شوي أقوم أشوف المدونه ما خذه قلبي ??.
اذا شفت منتج يعطي وعود كثيره يبدا الشك عندي ، تقنية التبريد ذكرتني لما كنا صغار دائمًا بالمدرسه نتمنى مكيف صغير عند وجهننا سمعونا سكندينافيا?.
حبيت فكرة الريفريشنق والمثبت بشكل عام أحس بفيد كثير لما يكون عندي مشوارين بنفس اليوم و ما أحتاج لهم لمكياج خاص .
???
هلآ بَسوس ..
وحشتينا ياجميله ?
ما يَوحشك غالي
مكاني وًكمان توت بالنيابة بعد نذالة النت ♥️?????
ههههههههه بَتنتحر تَوت
كلنا ????? من ٣ وربع و احنا نحدث وًهو معلق و نستنى و نرجع نسال بعض .. سوينا حالة طوارىء و بنقلك بس ما عرفنا نوصلك ?????
ههههههه الله يسعد قلبك كيكتي
اويلي انتحرت وانتهى والي ماسك الردود الحين جماعتي من الج…..
المثبت هذا اهم شي بمناسبات الصيفيه لازم لازم اقتنيه الرطوبه عذاب والله وباذن الله لو تيسرت وجربته راح احكي لك عنه
واعجبتني حركه الحواجب وتخيلت الشعرتين النافره تجنن عليك ههههه
باطلب طلب غريب
تكفين لو لقيتي منتج يوعد بالبروده ويفي بوعده دليني عليه ماابي تبريد لوجهي بس ابي تبريد كامل ? كاني شطحت
يعطيك العافيه سوس
كأنك حاسه والاه قرب الصيف و المناسبات و وجود منتجات مثل كذا جداً ضروري خصوصاً صاحبات البشرة الدهنية و المختلطه . حبيته و إن شاءالله بشتريه بس بما ان منتج سكندنيفيا مو موجود بمنطقتي فأتوقع راح اجرب اربان ديكاي ..
احب مواضيعك اللي كذا ، التكنيك اعتبره اهم من ريفيو المنتجات ، لأن احس متى ما عرفتي التكنيك اتوقع كل شي بيفيد معك ..
و بس و الله احبك احبك . داخله عشان اقولها اكثر من انو اعطيك انطباع عن الموضوع لأنك تعرفيني اي موضوع من تحت يدك يعجبني ..
يسعدك ربي سوس
مكان dnr_1 بالنيابة ??
يعطيك العافيه توسه كالعاده مواضيعك جميله وبالفعل انامحتاجه لمنتج كذا لان مع حراره هالصيف المكياج يسيح وباذن الله بجربه ❤️❤️
صباح الحب ?
طريقة الحواجب الحمدلله داااايم مااستغني عنها هالحركه حتى قبل لا اعرف ماسكارا الحواجب كنت استخدم مثبت شعر عشان اثبتها تعجبني وهي طايره تعطي منظر طبيعي .. بس حركة مثبت الماكياج جديده علي ان شاءالله بجربها ??
الله يعطيك العافيه كل تفاصيل التدوينة مهمممة ❤️ شكراً سوس ?
الصراحه ماتوقعت ان مثبتات المكياج ضروريه وذات فعاليه
توقعت مجرد دعايات لا اكثر
يمكن لاني جربت ماك فكس بلس كمثبت وماحسبت بفعاليته بتثبيت المكياج فاعتقدت كلهم نفس الشي
راح اجرب اربن ديكاي بما ان الماركه متوفره عندنا
عجبتني فكره استخدامج له بالحواجب … مادري اي اللي يثبت اكثر ماسكارة الحواجب الشفافه او مثبت المكياج
انا استخدم ماسكرا الحواجب
واكيد ناطره الموضوع الصباحي على ناااااااار
جنج تدرين ماصارلي يومين متوظفه :))))
الله يعطيج الف عافيه ارتوس
صباح الرضا ..?
وقعت بغرام المنتج خلاص والأحلى إنه بطيبة يعني مافيش أسهل من كده ??
جربت مثبت المكياج من إلف وكان فيه ذرات لميعة واضحة مرة ما إنتبهت لنوعه كنت مستعجلة وركنته بالدرج ومتحسفة عليه أعطاني زي شدو حكيمة بالحيالة * دعابة ?* رح أجرب أرشه ع البيوتي بليندر وأطبطبه على وجهي .. ?
مرة شكراً أرتوس من القلب قريتها مرة و ثنتين وبرجع أقراها ثلاث معلومة جديدة أعجبتني الدميكثيون منعم للبشرة صرت أعرف وظيفتها لما أقلب المنتج وألقاها ..?
فلتكِ بخير دائماً .. ?
الله يسلم هالإيدين اللي تكتب و تصور..و يسلم هالروح المثابرة اللي تُلهم و تنشر وعي ..و تصحح مفاهيم …مافي منك ي جميلة..?
سبحان الله ارتوس تشوقني طريقتج بكتابة المواضيع مشالله لدرجة ودي أشتري كل شي تكتبين عنه حتى لو ما احتاجه هههه ?
يعطيج العافية وفعلاً أدعيلج استفدت منج وايد وشجعتيني بما إني من الفئة الكسوولة?
يسعد صباااااااااحك توسه….
الله يعطيك العافيه ويسعد قلبك ع هالتدوينه بصراحه حمستيني اجربه خصوصا اني ماقد جربت مثبت للمكياج من قبل ولا جربت غير فكس ماك وكانت تعجبني نتيجته انه يعطي مظهر صحي و رفريشنق للمكياج…وطريقتك ف إستخدامه مع فرشة الحواجب حلوه وان شاء الله اطبقها واشوف النتيجة لأنه يعجبني شكل الشعرات الطايره بداية الحاجب….
ألف شكر حبيبتي ??
صباح الخييييررر
اعتقد مواصفاته تخليني احط بخاخ ماك على جنب
واستخدم هالمثبت صراحه مواصفاته مُغررريييه
اهممم شي الثباااات لان بشرتي جافه
يخف المكياج بسرعه المكياج اليومي قصدي
الله يعطيك العافيه ماقصصرررتي ?
يسعد صباحك سوسوو ??
وانا حبيييت كتيير المنتج وعجبني وحطيتو بأول قائمة المشتريات يلي لازم اطلع بهالوينكد جيبن ?
المشكلة بطيبة انا ماحبيتو لهالسوق لسبب طريقة حفظ المنتجات عندن ابدااا مو صح وحده من رفقاتي قالتلي رح اخدك على محل في اغلب يلي ببيعوه عالانستغرام تشوفي بعينك وتختاري رحت معها وكان اواخر الصيف وشووب
بصراحة الشوب والعجئة ماخلوني اعرف ركز شو اتفرج واشتري دغري بضوج وبمل ولما شفت كيف البضاعة كلها محفوظة باماكن كتيير شوب تردد واخدت فرش وهيك قصص
بالنسبة لالي منتجات التجميل محتاجة حفظ متل الادوية تحت تبريد ودرجة حرارة معينة لهيك هالسوق بتردد اخد شي منو ولا هو ياريت بيهتمو فيه اكتر بهالشغلة لانو فعلا بوفر كتير شغلات رغم انو في تقليد بس شفت الأصلي
متحمسة جربوووو ورح اخد للبشرة الدهنية لانو بشرتي دهنية متلك وبخبرك اكيييد خصوصا حركة الحواجب والشعرتين عجبتني جاري التطبيق حالا هههههههههه ??
يعطيك العافيه ارتوس
افديتيني كثير ونادر نلقى تدوينه تتكلم عن المنتج بكل تفاصيله
ووحبيت طريقتك في رسم الحواجب ?
وجا ببالي انو لوتثبت بنفس طريقتك بمثبت الشعر ينفع؟!
على بال مانشتريه ???
مساء الأجواء الجميله
كـل مآ تنزلين تدوينه مآاقدر امسك نفسي لين أفتحها وكل شوي اطل عليها آهرب من الشغل هههههههه
والله قٱم حظ طيبه سبحان الله ؤبيصير زحممممممه تدرين متئ جوه اذا بكره عيد احب اروح هناك لمآ تشوفين الناس صدق أحساس عيييييد هههههههههههه
ٱما بالنسبه للمثبت حبيت انها يعطي لوك ندي والأحلئ فكرة الشعرتين بالحاجب بجربها لان لمٱ ارسم حواجبي أحب اول شعرتين ماتنرص وأمشطها بماسكارا الحواجب عشان يبين شكلها طبيعي
تشكرآت توسه العسل ?لا عدمناك يآ جميله
حبيت المنتج مرة على اني ما قد حربت منتجات تثبيت ،، بس حبيت هالمرة اجربه ، واككيد رايك ما نستغني عنه وباذن الله راح اخذ لي واحد منهم ، بالنسبة للحواجب جلست اضحك وانا اقرأ حتى انا احب الشعر بالبداية طاير على فوق احس منظره طبيعي وجميل ، بس ما يثبت معي فترة طويلة ،، بجرب طريقتك اكييييييدد ?? ومنتظرينكك في التدوية الجديدة خصوصا اني اداوم الصبح ، تحمست له من الحين ???
يسعد صباحك وكل أوقاتك ..يعطيك العافية سوس
?
رووعه
عجبتني جدا حركة تثبيت الحواجب احتاجها..
انتظر الموضوع الجاي بفارغ الصبر ..
شكراً من القلب آرتوس
يسعد هالمساء الجميل
دايما تدويناتك مميزه
حبيت المنتج مع الاجواء الجميله القادمه اكيد بنحتاجه وبشده
طريقتك مع الحواجب حبيتها لزم اجربها
في انتظار تدويناتك الجديده
ي مساء الحب
غلبني النوم امس مآقدرت الحق ع التدوينه
بس شوفيني اول ماروقت دخلت ع طول اقراها
بالنسبه لمثبت المكياج ماكان عندي هوس اني اخذه
بس بعدين نزل ماك فكس بلس وشفت عليه مدح كثير
خصوصاً انه متعدد الاستخدام وقلت باخذه
للحين مآشريته بس خيره مااخذته لأنو المنتج اللي
كتبتي عنه غطى عنه بمليون مره اعجبني
حتى مميزاته عجيبه ولاهوو بذاك الغلا سعره مناسب
بإذن الله باخذه بأقرب فرصه قلتلك منك بنتعلم المكياج
المثالي بإذن الله
ربي مايحرمنا منك ي قلبي
دُمت لي?
ماشاء الله عليك يا ارتوس يااا ملهمه يا ملمه ??
اللي يرضينا حصلناه وانتي شوو يرضيك مننا والله بجد انتي انسانه مختلفه من كل الجوانب
ان شاء الله اجرب اربن ديكي بما ان ماادري وين ينباع السكندنافي عندنا
يعطيك الف عافيه يارب
حبيييته من القلب
انا جربت كلارنس بعد ماتكلمتي عنه وحبيته
بس هذا شكله لايعلا عليه
يعطيك العافية ارتوس
ارتوس حبيت التنبيهات اللي اخر التدوينه صحيح مرات سوء طريقة الاستخدام يضلم كفاءة المنتج ?
ارتوس تصويرك عقدني ??
جميل ويفتح النفس ❤️
يا مسسآء الفل آرتوسه
أحلى شي إني ضامنة بحصل المنتج عندنا هههههه
والاحلى سعره مناسب للجميع أن شاء الله
انا دايما كنت اعتبر البودرة اهي الحل الوحيد اللي ممكن يثبت المكياج من فترة لفترة
بس من عرفتج وعرفت أن في طرق وايد في تهيئة البشرة قبل المكياج ممكن إنها تساعد في انه يتم فترة أطول
كل يوم نتعلم منج الزود ما شاء الله عليج
المنتج من كلامج ووصفج حسيت شكثر أهو خفيف على البشرة
أن شاء الله بخليه مع قائمة مشترياتي هالمرة
مانفقدج يآرب ❤ والقادم اكيد بيكون أجمل
حبييييت?
ان شاءالله يطلع هوالمطلوب لان عندنا الرطووووبه شي?
مايخلي شي ثابت تلاقيين ماكثر من كريمات الاساس لان ماحب وجهي يطلع بعد ساعه مخطط ?
الف شكر ارتوسه?
يسعد مساك ارتوس
مدونه جميله وخفيفه وجد المثبت يفرق في المكياج قبل ماكنت اهتم فيه بس بمجرد اهتميت في وضعه عطاني اللوك الطبيعي مو البودري واحس البشره متجانسه مو مكتمه
قلووب إلى عندك
يا صباح الجمال …
هي العقول و القلوب عند بعضها الظاهر..
انا من فتره اشتري لي ميك اب ولي وجزء لجلسات التصوير الطويله وفجاة تتغير بشرة المودل
اذا راح الرونق او بدات تخف الالوان وجربت نوعين مثبته وهي معروفه عند الميك ارتست
بس هذا مواصقاته جذبتني من انستقرام لهنا (قلوووب قلوووب فرحانه)
وحبيت دقة التفاصيل الي مانشوفها عند اي بنت مثلك
ماننحرم يارب
يامساء الانتكة والجمال
كالعادة مايحتاج اقولك وش اكثر اعششق مواضيعك الميكابية احس عقب خطواتك وتكنيكاتك يصير مكياج الوحدة كانها مارلين مونرو (كناية عن قمة الجمال والترتيب) والاهتمام بادق التفاصيل عاد تبين الصراحة يارتوس انا من عشاق المكياج وللاسف اني لي سنين اوعد نفسي اتعلم واتطور لكن مكانك سر واعترف اني مرات احس اني صريعة الكسل والاحباط لكن من تالي اقتعنت وعرفت ان الجمال اسلوب حياة وثقافة وفكرة وانه جزء مهم من الذات وبالتالي لازم يكون عندي شيئين عشان اقدر احافظ على جمالي واستمر بالاهتمام وهي اولا العلم وثانيا الروح الايجابية لاني لاحظت الشيء يكون بقمة الاتقان اذا كان مزاجي زين و رايق واعرف اسويه واول خطوة سويتها رتبت مكياجي كامل وشفت الناقص عندي ورحت اشتري مع صديقة لي وبعدها اليوم سويت فتلة لوجهي ومرررة مبهورة من النتيجة وابشرك سويت نيولوك وناويه اوريك الصور دايركت اذا فضيتي.
بخصوص موضوع اليوم بصراحة فكرة ممتاز انك سويتي سلسلة عن تكنيك وخطوات المكياج النجاح وزين فردتي موضوع كامل للمثبتات لانها اكثر شيء نخلط ونخربط بينها وبين البخاخات المنعشة وصراحة اختيارك جدا موفق لبخاخ سكندافيا بعض المنتجات عليها ضجه وهي خربوطية بس هذا سبحان الله احس حلو ولاعمر احد ذمة واكثر شيء عشقته بالمنتج خاصية تبريد البشرة أو السيطرة على الحرراة واهم فقرة بالموضوع هو طرق استخدامها مررة افادتني وفتحت عيوني على فوايد اكثر.
يعطيك العافيه يائلبي .. للامانه مالي خبرره مع مثبتتت المكياج
ولا جربته بسس مره شفت اجنبيه (يعني مو سعوووديه) شفتها تتفلسف ع وحده رحمتها صراحه
تقولها احطلك مثبت مكياج وهذيك مستسلمه تقول ايه تخيلي طلعت من شنطتها مثبت الشعر القددديم مدري وش اسمه
بس الي لونه ذهبي وعليه صوره بنت شعرها بوي اخر مره شفت هالمثبت ع تسريحه امي زمااااااااااان
وتبخ ع وجججها كم بخه قالت خلاص كذا تمام انا عيوني طاحت من هول المنظر قلت هذا حق الشعر سلامات وش دخله
بالمكياج قالت ينفع للثنين عادي .
موقف هذا ذكرته لمن شفت تدوينتك
والله يجزاك كل خير وينورلك اللي ببالك ويخليلك احبابك يارب ♥♥
ويوم سعييد لك ياروحي ♥♥
بصراحة مالي خبرة مع مثبتات الماكياج لكن ان شاء الله حقتنيه واجربه كون بشرتي دهنية واحيانا يتأكسدد المكياج ، والصيف مقبل احتاجه جدا جدا ، جاري تخصيص ميزانية له ???، ومادري اشبها التدوينةًمن امس احاول ادخل مش راضية واليوم الحمد لله دخلت معاي ، يلا ان تصل متأخراً خيراً من ان لاتصل ابداً ?، شرايك بس ???
الله يعطيك العافيه ياارتوس ??
ماشفتي يارتوس الكوفيرات اللى يجوون في البيت تبخ لك مثبت الشعر الذهبي ?فوق الكتمه من البخاخ ضرر على البشره
وانتظر تدونيتك لنا يالمدوامين ??
يعطيك العافية
سُبحان الله كنت اليوم مع مجموعة من الزميلات نتكلم عن الميك اب بشكل عام و المنتجات اللي كلا منا تستخدمها .
وحدة من الزميلات طلعت لي علبة من ماركة اناستازيا من النوع الباودر لرسم الحواجب ، و طالع تازل مدح فيها ) تذكرت كلمتج التحيز للتجربة ( ? ، المهم قلت لها ما شاء الله شي طيب انها مناسبتج لكن انا شخصيا م اُرهق نفسي ف رسم الحواجب ازيل الشعر الزائد شهرياً بملقط و هي كلها كمن شعرة تكاد لاتذكر عشان احافظ ع شكلهم الطبيعي، شوية ماسكرا شفافة بعدها تمشيط بفرشاية الحواجب و إنتهينا ، بهالطريقة بكون حافظت ع شكل الشعر و توزيعه و بعثرته اللي افضلها شخصيا .
قالت لا بس انتي حواجبج مب مرتبة شوفي الشعرتين اللي ف البداية !
مع كل اسف إلى الآن نظرية رسم الحواحب كأنما رسمت ب المسطرة ، زوايا البداية المستطيلة و زوايا النهاية الحادة موجودة و معشعشة ب عقول البنات .
صرنا نشوف رسوممممات حواجب و ليس حواجب طبيعية او ع الاقل اقرب للطبيعة
هههههههه صادقة طيبة صارت تنافس سيفورا و دبنهامز بعد 🙂
بما انه متوفر بطيبة بشتريه او اربان ديكاي بما انهم نفس المفعول ؛ حبيت نتيجته خصوصاً بالصيف و بشرتيي كثير تعرقها فان شاء الله انه فعال معي
أما الحواجب أحس للآن ما توفقت بمنتجات ممتازة كنت مخططة ع ماسكرا حواجب ماك و لفتني رأيك تسبينها و استبعدتها
و هو اكيد يعتمد ع طريقة الرسم ؛ طريقتك بالسبراي بسسويها حبيت وصفك و بالضبط هذذا الشكل اللي يعجبني
ممنونة لك يا سوس و الله الله يزيدك علم و نور يا رب ..’’
يااااااااابعد الدنيا ياارتووووووس .. تصدقين عاد حسيت كاني مبطييييييه عن اهلي … هاليوميييين كل شي عندي معفوووس فوق حدر .. بس بعد مساحتي الصغيرة اللي اروق فيها هي معك انتي .. جواااالي المهربد بط مرارتي امس يوم شفت الحماس ..ثلاث بوستات بوقت واحد وتنا الطالبة اللي مسويه نفسي نجيبة ماحظرت وﻻ شاركت وربي انكسفت منك حييييييييييييييييييييييل … حتى المدونه لي شهووور احاول ادخل بس معللللق جوااالي الهم .. وقبل نفس العلة صارت لي …بس من جد سحرك عجيييييييب .. صنف نااااادر وبقووووة ..انا ثقيلة بالعادة ونادرا مايسترعي انتباهي احد ..وحتى لو لفتني شي ماادمن عليه كثر ماادمنتك ..صفاءك وعذوبتك .. سلاسة غريبة تسحرك ..تشدك غصب .. عن جد انتي غيييييمة … بس فعلا ابلة ارتووووس رتح اضل طالبتك النجيبة للابد .. تعلمت منك الكثييييير وحاسه ان اللي بجعبتك اكثر من اللي شفت ..
يا اهلاً ?
وحشتيييييني والله و مره فاقده الجو عندك بالمدونة او بانستقرام
سوالف البنات و ردودك يالله
قبل فترة كنت ابحث عن شي في قوقل و دخلت مدونة جميلة و قرأت عن الموضوع اللي ابيه ولما خلصت نزلت بقرا التعليقات؛ لقيتها صفر !
جاني احباط مره و حسيت المكان ميت
مسكينه البنت
المهم ؛ بعدها استوعبت اهمية التعليقات في المدونة و ان هذا حقك علينا عشان يظل المكان مشعلل و منعش ?
بالنسبة للموضوع حبيته جدا خصوصا اني اسمع عنه كثير
لكن ما فهمت كيف الية عمله ..
و عجبني استخدامك له بتثبيت الحواجب
احيانا لما اتوضأ للصلاة تصير حواجبي كذا و كنت احب شكلها
الحين عرفت منك كيف اسوي ذا الشكل دايم و ثابت ?
اسعدك الله وعن الشر ابعدك ?
اهليين ارتووس
يسعد صباحك يارب ?
طيبه صاير مير ازحم من سيفورا ههههههه
يعطيك العافية على التدوينة والتفاصيل الدقيقة
يسعدك يارب
صباح الخيرات سوس…. ماشاء الله اي منتج تكتبين عنه نوقع بغرامة على طوول…. وكالعاده احطها بالويش لست لحد مخلص علاج بشرتي لاني الحين جالسه استخدم كريمات قبل جلسات الفراكشنل ويااارب تعطينا نتايج طيبه….. وبالنسبة للموضوع الجديد اتمناااااااا يكون عن واقي الشمس… وربي يعطيك حتى يرضيك وقلووووووب من القصيم لبيتكم ? ? ?
مساء الحب ..
قضيت طول اليوم وانا إلا والا اقرأ التدوينه وأخيرا خلصتها. .
تحمست اني اجربه انتي مو بس خلتيني أحب الماكياج انتي خليتني أحب اتعلم أدق تفاصيله انا ما عندي ذاك الشغف بس وصفك مدري ليش احسه بيرفكت واتخيلك واتخيلك مكياجك. .. ارتوس مواضيعك تسلط الضوء على أماكن ما يقدر غيرك يوصلها لنا مدري ايش سرك أن شاء الله اجربه. …
دش مزاجي هالسبراي منو تعرف وين القاه بالكويت
ارتوس متي تخلين بوكس الكومنت فوق تعبت و انا انزل
و عندي اقتراح ليش م تسوين بنهايه كل شهر صفحه لنا عشان نكتب راينا عن المنتجات الي انتي تكلمتي عنها احس هالشي لاااازم و له داعي حييل انج تسوين الصفحه هذي
ارتوس دامك تكلمتي عن المكياج والاخطاء الشائعة ليش ماتتكلمين عن الاضاءة لانها لها دور وابي اعرف بخصوص المرايا الصغيرة الي مع لمبة شكلها دائري هل هي زينة لاني اعاني من سوء الاضاءة بالبيت.
تصدقين ماعمري شريت فكس بلس ههههههههههه انا من البنات اللي ماتشتري الاشياء اللي يهبون فيها الناس مدري ليه وحتى الكونتور ماشريت ولا دخل راسي و باليتات اوربان ديكاي ما شريت شريت مثبت فور ايفر وماحبيته لوجهي ماعرف ليه احسه يلزق بوجهي ارشه مثلك للحواجب لان شعر حواجبي صعب وحواجبي خلقتها كثيره وشعرتها طويله تتعب بالرسم أحيانا لازم أقصها ، بس لازم أجربه بأذن الله ياكثر اللي ابي اجربها ههههههههه
مسائك سعد
ايش رايك بمثبت ميك اب فور ايفر