صَباح / مَساء الخيرات
إزيكوآ يا حَلوين ؟!
هالفتَرة بحاول أنَزل تدوينات بَسميها تَدوينات التَصفية ،، غرفتي كلها عُلب مُنتجات مَخلصه وَ مُجربة
بس ما فَضيت أدون عَنها بَفترة إنقطاعي لذلك بَحاول كل يُوم أخلص شيء ، يَعني راح تملون مَني
مازالت تردني رسائل منكم مُطالبين بَمنتجات مِن الصيدلية بأسعار إقتصادية ، وَ مُمتنه لإقتراحاتكم وَ تواصلكم مَعي
وَ ما أكذب عليكم جربت كثير مُنتجات من الصَيدلية طلعت أي كلام وَ ضرتني أكثر مِمَا فادتني منها شاور جل من برجوا
( ترى لو فيه مُنتج رخيص وَ فاعل ما بَشتري الغالي ، فلوسنا ما لقيناها بالأرض نَقوم من صَبح الله نترزق الله ، فلا تَفكروني من ثقافة بهايط بكريماتي ، كريماتي مَحداً بيدري عَنها غيري ، لأن ما بَقابل الناس وَ حامله اللَوشن بَيدي وَ الشاور جَل ) ..
المُشكله مو بمنتجات الصَيدلية المُشكلة بالنَوعيات إللي يوفرونها لنا في مُنتجات كثير مُميزة وَ جيدة لكن ماتتوفر عندنا وَ إن توفرت يوفرونها بنسخة مُخصصة للشرق الأوسط
وَ تكون مو بجودة الأصلي هذا إن ماكان مغشوش أو يكون مُبالغ في أسعارها ، عموماً إذا قريت مُنتج مَكتوب بالعربي أبطل فيه أحبه يكون مُستورد لأني بصراحة ما أثق بالإنتاج العربي ، وَ الطامة الأكبر إلإستغلال الحَاصل في الصيدليات
تصوروا مره كنت بأحد الصَيدليات الكبيرة بالرياض وَ كنت أدور شامبو خالي من السلفات لقيت مُنتج شكله غريب وَ مبين إن محد معطيه وجه بالصيدلية
يادوب لقيت البلسم وَ الشامبو من نفس المجموعة عاد بالرف ماكان فيه الا إثنين واحد سعره ٩٠ ريال سعودي وَ واحد سعره ١١٠ ريال سعودي وهو نفس الشيء ، ليه فرق ٢٠ ريال لولا شيء !!
الغَبنه وَين لما رجعت البيت بحثت بقوقل عن إسم الماركة طلع سعر الشامبو بـ ٢ دولار ههههههههههه أو ٦ دولار يعني خموني ..
المهم تدوينتنا اليوم عَن مُنتجين من الصيدلية مشهورين جداً مافي بلوقر أجنبيه إلا مدحته وَ مافي مجلة أمريكية إلا وطلعته السماء
( المُنتجات إللي كذا تشككني بجودتها تَحس إن وراها إعلان )
مُنتجاتنا اليوم من شركة أفينو ( AVEENO )
أفينو مُتوفرة بأغلب صَيدليات الرياض تقريباً ..
لَكن شريته من صيدلية حتى مَعرف إسمها صَيدلية كحتوته بشارع الثلاثين مُقابل بنده ( وَ أذكر وَقتها دخلت هالمَنُعطف أشتري شُوكولآ )
بسم الله نبدأ بأول مُنتج ..
Aveeno Daily Moisturizing Lotion
لوشن أفينو المرطب للجسم بالشوفان
سَعره : فوق ١٠٠ ريال مُو متذكره كَم بالضبط
مُواصفات اللوشن ~
– اللوشن ماخذ جائزة ألور لعام ٢٠١٥م وَ تقييمه عالي من قِبل المُستخدمين
– المرطب يوعدك بترطيب البشرة في يوم واحد فقط وَ راح يعطيك نتائج كبيرة خلال إسبوعين من الإستخدام المٌستمر
– أيضا يوعدك بترطيب يدوم ٢٤ ساعة
– غير دبق وَ تمتصه البشرة بسرعة
– خالي من العطور
– نون كوميدوغينيك يعني لا يسبب إنسداد المسام
– يخفف الشعور بالحكه
– يرطب الجلد حتى في الظروف المناخية الصعبة كالبرد وَ الرياح
المعروف عن افينيو هي إعتمادها على إستخدام مُنتجات من مكونات طبيعية مثل الشوفان وَ الصويا
المادة الفاعلة بالمُنتج ،’
هُو خُلاصة دقيق الشوفان المعروفة بترطيب البشرة الجافة وَ خاصة إللي تعاني من الحساسية أو الأكزيما أيضاً إللي يساعد على توازن حموضة البشرة
أيضاً المادة اللي تساعد على حبس الرطوبة هي الـ دايميثيكون ( مِن مُشتقات السيلكون )
كما يَحتوي المُنتج على الفازلين
للعلم مُنتجات أفينو بدأت في السوق بعام ١٩٤٥م لين شرتها جونسون بعام ١٩٩٩م لذلك تلقون منتجاتهم مكتوب عليها ٧٠ عام من الخبرة
ثاني مُنتج ..
Aveeno Active Naturals Hand Cream
كريم اليدين من أفينو بالشوفان
سعره : حول ٦٠ ريال تقريباً أو ٥٩ ريال أو ٥٠ ريال إذا مو غلطانه وَ قد يكون أعلى
مَواصفات كريم اليدين ~
تقريباً سيم سَيم اللوشن مافيه هالفروقات اللهم تَكه القوام أثقل وَ غير دَبق
رأيي عَن اللوشن وَ كريم اليدين من أفينو ،’
اللوشن عادي ريحة الشوفان كأنها كَتمه كأنه تغطستي بدقيق بدأ يَسوس
وَ كريم اليد ريحته تذكرني بمنظف السجاد إللي يجي على شكل بخاخ وَ براسه فُرشة
وَ تنزل رَغوه مَنه عرفتوه ( ههههههههههههه تراي مَنب مُتحامله بجد بجد كذا ريحته ) ..
بالنسبة لي ما أشوفهم يستحقون الشَراء بهذا السعر ، كَمنتج مواده جيدة وَ بيكون سعره ٤٠ ريال للوشن فرضاً
وَ ٢٥ ريال لكريم اليَدين ، برفع لهم القُبعة وَ بصفق لهم ترطيب جَيد ، خالي من العطور وَ تركيبة خاصه بَهم ، بالرُغم ما أشوف فيه هالتركيبة الفاعلة
وَ المُنتج برضو من مُحتوياته الفازلين وَ الزيوت البتروليه مُو ممدوحه للبشرة الدهنية أو المُعرضة للحبوب وَ البثور بالرغم مُصنفينه لا يَسد المسام
بس الفازلين وَ السيلكون يسدون المَسام ، مُنتج أشوفه أفضل للبشرة الجافة وَ البشرة إللي تعاني من الحساسية لأن هالنوعين من البشرة بحاجة لمُنتجات تَحبس الرطوبة
– هل بترجعين تَشترينه ؟!
لا وَ ألف لأ ، إلا إذا سعرهم صار رخيص ، وَ النقطة الأخرى ما أشوفه يَستحق أتعنى وَ أجيبه من برآ
ما تتصورون وَش كثر كنت أشوفه عند الأجانب وَ أقول خسارررره مو موجود عَندنا ، يوم جربته قلت على وَش هالضَجة ؟! ..
مُمكن إللي عندهم حساسية وَ أكزيما يحسون بفرق ، لكن على أسعاره بروح أشتري مُنتجات يوسرين أفضل منه مافيه تركيبة فريدة من نوعها عندهم وَ إن كان عالشَوفان بسويه ماسك بالبيت وَ بآخذ فوايده لجسمي
– هل كريم اليدين ترطيبه كافي ؟
بصراحة كريمات اليدين نادراً ما ألقى شركة كريم اليدين عندهم يستحق نادراً جداً
اليدين أكثر شيء يتعرض للغسل بالجسم وَ أكثر شيء يَجف وَ تتعرض للشمس وَ الحرارة وَ الكرف وَ الغبار
ما شَفت ترطيبه كافي أبداً ، آوكيه مُرطب بس ما فيه شيء زَيادة ، لا مُضادات أكسدة وَ لا أحماض وَ لا واقي من أشعة الشَمس
ياليت يَتعقلون شوي بالأسعار المَطروحه ، لو سعره مثل جليسوليد وَ لا نيفيا راح ينحكم عليه بشكل آخر
لكن هل يَعقل أسعارهم أغلى من مُنتجات الصيدلية وَ هو مُنتج تجاري
تَجربة غير مُوفقة
وَ مدري للآن وَش السبب إللي خلآ الناس يَطيرونه السما ، مُمكن يعانون من حساسية أو مَن جفاف
مافيه مُكون واحد يَقول أنا كويس إشتريني .. إللي جَربته وَ مره حبته تَدلي بدلوها يَمكن أحد يستفيد من رَدهآ
إنتظروني غداً بتدوينه قَد تُلائم الكثير
تَدوينتي القادمة راح تَتعلق بالشعر
دُمتم بَحب
وتسجيل حضور من المارد لعيونك
آآآهب .. صاحي المارد حَقك نَورتيني
فيس يصيح كتب رد وطار
المهم
الله يكثر من المنتجات المخلصه عشان ماننحرم من حسك التدويني
بخاطري اعرف ليش الصيدليات الي اسعاراها شاطحه ودي امسك تاجر واحقق معه واشوف صافي الارباح كم
اما وصفك ع الريحه يجنن هههههه انسدت النفوس من التجربه ويمكن الي تستخدمه بتتركه
جربتي كريم افالون لليد ؟؟
دعوات قلبيه بهالساعه
يآهلا بَك ..
هههههه عادي مَشاعرك وَاصله لووووول ..
وَ الله الصيدليات صاروا يوظفون ٥٤٣٢٢٢٢٣٤٤ موظف شيء طبيعي بيتحملها المُستهلك
وَ لا ننسى إن الوَكيل لكل مُنتج له دَور بزيادة الأسعار .. الصيدلية ماهي إلا جامعة لعدة وَكلاء وَ موردين ..
لا ما جربت كريم أفالون لليدين ، أعجبك !! أو يستحق الشراء أفيديني ..
إذا يستحق بشتريه
عن نفسي حبيته ترطيبه مريحني يعطي اليد نعومه مااعرف بيناسبك او لا
من كثر ماحبيته يمكن الي موجوده عندي تقريبا ١٠ في كل حته تلاقي واحد
وللمعلوميه ماشريته اخذه من العياده تقريبا سعره حدود ٣٠ او ٤٠ هذا اول يمكن الحين شطح
من مكوناته سيتوستير ايل الكحول ،ستريك اسيد ، زيت البارفين ، فازلين ،لاثولين ، تراي ايثانول امين ، ميثيل بار ابين ، بروبيل بارابين ، جلسرين ، واخيرا عطر وماء نقي
وانا اكتب التركيب تذكرت حصص الكيمياء
كتبتهم عشان اختصر عليك المسافه لو شايفه تركيبته مافي شي جربيه خويتك غشيمه بالمحتوى
من زمان ما رديت أول ما تنزلي تدوينه ،، صباااح النور 3> 3>
و ايوا صح وريت الدكتوره حق الجلديه اللي اروحلها جهاز فورريو لوناا و نبهتني على شي انو بعد ما اخلص استخدامو و قبل ما استخدموا اعقموا بكحول او مسحه طبيه شي زي كذاا >> ادري مو مكان الكلام هذا هنا بس عشان بققولك انو لو تبي تنبهي البنات يعني و كذا و شكرا. 3> 3>
صَباح الحُب يا قَمر ..
يا عيني عليك وَ الله إنك شاطرة وَ حريصة
بس هو فعلياً مفروض ما يحتاج عشان السلكون ما يحتفظ ببقايا ، أنا قبل الإستخدام أغسله زين بنفس غسول الوجه إللي بقى بيديني
وَ بعدين أبدأ أنظف وَجهي ..
شَكراً شكراً لإهتمامك ..
بشرتي جافه واكثر شي اعاني منه جفاف يديني تعبني هالموضوع ?
جربي كريم لوكسيتان لليدين ، للآن أفضل الأفضل
وَ لو مره ما يمنع تسوين جلسة بارافين مُستحيل ما تترطب وَقتها
جربي كريم سيتافيل او كيوفي بتلقينه بالصيدليات انا بشرتي جافه وحساسه والدكتور وصاني على سيتافيل مره حلوين وطبين ♥️♥️
و على طاري الكريم كنت مره متحمستلو بس بعد التدوينه انقتل الحماس خلاص احسو مايسوى اشتريه ولا اتحمسلو ،، انا مرتاحه لحد الان مع حق لوكسيتان.
لوكسيتان إز ذا بست ما يَبيلهآ كلام
هههههه حبيت إنقتل الحَماس ، يسلم لي حَماسك
توسا ..احب فيك وكم ذكرتها ذكرك للمنتجات حتى الي ماحبيتيها وذكر الأسباب وكذلك وصفك لقوامها ورائحتها فظيع ههههههههههههه ما أجملك إنت رائعة
توسا امس ارسلت لك ع انستا منتج وبرسلك الأن منتج ثاني
أحبك يالزين
حَياك الله أرسلي ، وَ أنا بحاول بالوَيكيند أشيك زَين على كل الرسايل وَ قد ما أقدر بَقتنيهآ وَ بجربهآ
وَ الزين زَينك توتآ إللي مَنورتني دائماً وَ أبداً
يعطيك العافيه وعجبني تشبيه الريحة هههههههه
الحين كل مابشوفه بالصيدليه بضحك
انا احب دوف فالنهار لانه بسرعه تمتصه البشرة ونيفيا وقت النوم لاني احسه ثقيل شوي
يوسرين الافضل للبشرة الحساسة والاكزيما
الحين اقدر انام وضميري مرتاح بعد مانزلت التدوينه
في امان الله
حبيبتي أم زياد حتى لو ما رَديتي أدري إن حسك مَوجود دائماً
نوم العوافي يالغالية ، الله يخلي لك زياد
يوسرين أنا جَربته مُمتاز وَ برضو جربت أفين مش آفينو مُمتازين جداً
وَ حلو تنوعك بين الكريمآت ، حَلو التغيير وَ دوف وَ نيفيا أسعارهم حَلوه
والله حنا معاناه مع زيادة الدراهم أكلونا ، أنا مو زعلانه إلا ليش لوكسيتان رفعو سعر كريم الايد و الرجل 🙁
يعني حتى كريمات العيون طقت ال٧٠٠ ماهازا
المهم وصفك له عجيبب هههههههههه
عاد نبي تدوينة رياضيه نتحمس شوي صايره أتعشى مليون مره هههههههه
نفانيفو إنتِ ما ينخاف عليك .. سَمبتيك ..
شَفتي ؟! طلعوا أجور المَوظفين من ظَهورنآ 🙁
والله البراند بكبرها ما عرفتها الا من دكتورة بنتي لما جاتها حساسية و نصحتني بهالشركة ،، و ما شفت فيها اي تميز و لا حسيتها جيدة للعناية
الصدمة انه منتجات كثير تتباع في السوبرماركت الأجنبي ببلاش ألاقي اسعارها مبالغ فيها عندنا ،، أفينو تقريبا معظم منتجاتهم ما تتعدى ٢٥ دولار ،، و عندنا بمية و شي ،، للأسف التجار يستغلون المستهلك المتلهف للمنتجات المستوردة و التاجرات يجيبوا البضائع بسعر التجزئة و مع تكاليف الشحن و الربح يطّلع المنتج بذيك القيمة و هوه أساسا ما يستاهل ،، احس صار عندي سخط كبير و تذمر من هالشي ،،
بخصوص الهاند كريم لحد الان ما لقيت شي يطغى على لوكسيتان بزبدة الشيا ،، أصلا ما لقيت شي مقارب له في الجودة ،،
للأسف مش دائما نلاقي بديل رخيص و بجودة عالية في منتجات العناية ،، الوضع ارحم بكثير في الميك أب و ممكن نلاقي بدائل اقتصادية ،، و اشوف اللي ح تشتري من أفينو ح تضيع فلوسها على ولا شيء ،، منتجاتهم اقل من عادية و ما تستحق الاقتناء على الإطلاق
ما تنلامين ، سَخطك واقعي ..
كل شيء أساساً صار غالي فكثير رواتبهم ما عاد تَكفي ، وَ حنا بَزمن الكماليات ..
الآن فرضاً طلع الآيفون الجديد .. بتلاقين حتى إللي ظَرفه صعب بيروح يَشتريه لأن نحن بزمن الكماليات إللي ماعنده هالكماليات بيعتبر نَفسه مو بهالعَيشة
ما بالك مع غلاء الأسعار شلون الحياة بَتصير 🙁
وَ صدقتي بالمَيك آب الوضع أهون بكثير بس كعناية للآن مافيش ، وَ كريم لوكسيتان بزبدة الشيا للآن محداً قادر يذمه ..
ما قدروا يذمون سوا السعر 🙁
ارتوس يعني أمانة الواحد يستحي منك .. لك فضل كبير علي وعلى الكثير لأنك توفرين الوقت و الفلوس لنا لما انتي تجربين هالقدر من المنتجات ولا تحصرين تجربتك ع نفسك تاخذ منك وقتك،، ومالك !! واحنا بكل بساطة نتابع مدونتك التفضيلية ونقيم اذا المنتج ممكن يناسبنا و لا لا .. ياشيخه الله يفرش الارض ورد ويرزقك من فضله باللي تبين ♥ ..
لك ودي
فَيس يَدمع ، بَجد دعوتك ذي بالله تَسوى وَ لا ما تَسوى ؟!
تسوى مليون ريفيو وَ ريفيو ، وَ لك بالمَثل ..
يَكفيني أسَعد بوجودكم وَ محبتكم وَ أخوتكم
لا خَلا وَ لا عدم
ارتوس ليش ماتطلبيه من اي هيرب حرام ارخص سعرو ب 40 ريال والشحن رخيص مره إذا طلبتي أشياء ب 162 الشحن ييجي ب33 يوصل لكل دول العالم و إذا رحتي وايتس أو النهدي اشتري كوتاج للجسم متأكدة بتعجبك خالية من البارابين و العطور طبيعية وخفيفة و اورجانيك كمان ياليت تجربي منتجات يوسيرين تراها جميلة جربي غسول الوجه وإذا تبغي تجربي منتجات الجسم اشتريها من اي هيرب ارخص مره أغلى سعر مره يوصل 60 ومرطبات الجسم والغسولات تجي ب 20 و 30 وهنا نشتريها ب 100 وشويا
الآن رَدك آفادني .. شكراً شُكراً ..
بالنسبة لمُنتجات يوسيرين أستخدمها بس عَندي بعض المُلاحظات عليهآ بس مُمتازة وَ كويس عطيتيني بَديل رخيص
وَ كوتاج كثير بنات مَدحوهآ فعاد بجربهآ على وَصفكم وَ نشوف ، وَ إن شاء الله خير
بصراحة ردك يبيله تَقييم لازم أضيف خاصية التقييم للمُدونة
الله يسعدك وَ ينولك مُرادك
يسعد هالصباح ويديم لنا الطلات الحلوة ….
هو بالعادة الاجانب حقين اعلانات سيم سيم اللي عندنا طبعا البعض مو الكل انا ققلت بما انه بالشوفان بيكون واو بس يلا طلع عكس توقعاتي امع اني حسيت بكتمة من وصفك الريحة هههههههههههه خليتني اعيش جو الريحة … انا استخدم لترطيب الجسم الزبدة سواء كانت بالكاكاو او الشيا احس اني ضميري مرتاح هههههههه مدري وش دخل بس اللوشن مايعطيني احساس الترطيب الكامل يكون متواجد فقط بحال كانت عندي طلعة مفاجئة عشان الجسم يمتصه اسرع ..
كوني بخير وسعيدة
ياهلا صَح اللوشن خفيف عالبشرة ، لذلك إللي جسمها يحتاج أكيد تآخذ الكريم بترتاح كثير ..
مَنورتني يا لَيدي
يارب على الاخطاء الاملائية اللي صارت النوم مأثر علي العذر والسموحة شوهت المدونة):
هههههههههه بالعَكس حاشاك إنتِ تنورين المُدونة
وَ ماعليه غالأخطاء الأهم المَعلومة وَصلت .. بحاول أنزل تَدوينتي أبَكر
????
نحممدوه قبل اسبوع سويت طلبيه من iherb
وكنت بحطه بالباسكيت بعدين هونت قلت طلبيه ثانيه اخذ اللي يلزمني اهم
مررررررة شكرا شكرا
الله يعطيك من خيري الدنيا والاخره
ترى أفَدتوني .. زين ما سَويتوا ..
وَ مبروك عليك الآغراض ..
آمين يارب وَياك نورتيني
يسعدلي صباحك
احس ريحة الكريم شوربه مادري له
الزبدة ليه حنا دايما اسعارنا غاليه حتى الكويت ارخص مننا
لا لا ما يشبه الشوربه .. شبه الموسلي الخربان أو كوكي الشوفان حق البقالة
ما أدري عن أسعار الكويت ، بس أسعار دبي غااااالية بَعد 🙁
يالبببى اكثر شي فرحني انك كل يوم بتطلين علينآ
والله جد توسه تحصلين مدح لمنتج وهوو مايستآهل ابد
ويرفعونه للسماء وفوق مذا مُبالغين ف سعره
انا اقدر بهالقيمه اجيب اثنين مرطب لليد
عاد احتاس كذا بس معاكِ انتِ تعلمت كيف اختار
اللي يناسبني وعرفت كيف احافظ ع بشرتي بأشياء
بسيطه حتى بعضهاا اقرأ ردودك ع البنات واصور الشاشه
كل كلمه تقولينهاا قآعدين نستفيد منها والله
مُ ننحرم منك يااارب
*قُبله* احببببببك
حبيبتي إنتِ ، أكيد خلاص بعد اليوم مافَيش إنَقطاع .. إن شاء الله طبعاً
القادم بيكون أجَمل وَ أجمل ..
وَ عقولتك أقدر بهالقيمة أجيب إثنين مو وآحد ..
وَ أنا بعد أستفيد مَنكم وَ من تجاربكم ، شوفي فيه كَم رد بهالتَدوينة أفادني
لا خلا وَ لا عَدم ..
دُمتم بَحب
ياصباح النور يامعطاءه ياكريمه …
اي صفي صفي وانت تقولين هالكلمه كني اشوف رفوف الصيدليه تتطاير من مخي ?هههههههههه …
بالفعل صادقه انا مارح امشي وانا ماسكه كريماتي الغاليه معي بكل مكان ومحدن داري فالدعوه مش هياط الدعوه البحث عن الكمال الكمال لو لقيته بتفاحه اكلتها بكريم باقرب صيدليه بامشيء واذيع لقيت الكريم اللقطه صدق والله هذي نظرتي اهم شيء يكون ذا نتيجه واضحه نتمنى يكون بسعر معقول مش رخيص على الاقل لكن مو غالي وعلى غير سنع ومو معناته نتجه للسيء عشان مانقدر نوفر الغالي برائي اتجهه للاشياء الطبيعه واللي يحتاج لها جهد افضل من اني اضيع العشرة والعشرين …
بقولك هاللحين انا اللي عايشه بقمقم هالمنتج ماسمعت فيه الا منك ?…
والله يام السوس مافي منك ولك انت معام واحنا منك نتعلم ^^
آهلا توسه
آه حاسه فيك لما تتحمسي لشئ ويطلع مو قد الحماس
هههههههههههههههههه عجبتني انك ماتقابلي الناس باللوشن والشاور
وكلام منطقي
مو القيمه والشكل كثرر ما الجوده والفاعليه للمنتج
والله يعين على ارتفاع الاسعار
اصلا المنتج نفسه يختلف سعره من صيدليه لاخرى
كريم اليدين
اجمل شئ جربته للآن كريم افالون للجلد الجاف
لان بشرتي جافه واليدين بزياددده فهو اكثر شئ ناسبني
وربي لايحرمنا من تجاربك ورفيوهاتك
الي تجيب السعاآده ?
حقيقي وانا كنت اقول الاجانب اقتصاديين بالمنتجات ما يلعبون بفلوسهم
لكن يبرقون من ارخص المنتجات ، وصارت السالفه كذا
شخصيا لو سعره اقل فعلا راح اجربه
تسلمي كلك بركه ،
عرفنا افضل المنتجات منك وابتعدنا عن سيئها منك ومن تعبك ..
معوضه يارب بالافضل
اكثر شي يزعجني الاكزيما في باطن يدي والاصابع من ظاهر الكف ماخليت شي ماجربته بس للاسف مافيه فايده بالرغم محافظه على الترطيب ومتعايشه معها بس تعبتني لو لفحه غبار جات قلبت يدي جافه متصحره جربت كريمات كثير الغالي والرخيص واحس باقي جافه مو مترطبه واخر الكريمات اللي جربتها يوسرين ونوكس وبايو ديرما ولوكستيان اشوفه الافضل بينها
يعطيك العافيه ي عسل
صباح الورد للجميلة
الله يسسعدك ارتوس يا رب
كان بخاطري اجربه من كثر المدح قلت ما اتفق الكل عليه إلا لأنه رائع و انقذتيني من تجربته
لكن فيه جملة بتدوينتك احبطتني هو فيه منتجات مخصصة للشرق الأوسسط ؟؟!!
ضاق صدري و اشوف اللي عندنا مضروووووب ؛ فيه منتجات كوتاج بصيدليات وايتس سبق و قريت لك رد بتجربينها و انتظر تجربتك
لأن بالفعل احمد ربي اني ما اشتريت أفينو
الله يجزيك عننا خير الجزاء و يرزقك ما تتمنين و أعظم
بعد ماقريت بوست الانستا مافيني اي حماس الا لكلامك العسل
وﻻ المنتج ماتحمست له وخصوصا اني مبسوطه ومرتاحه على منتجاتي المتواضعه
اللي تناسب ميزانيتي ^_^
الغلا ونصب التجار ينرفزني ونفسي بس اعرف ليه
حتى مثل ماقلتي نفس المنتج يجي للشرق الاوسط غير لييييش مالنا رب
وبالذات اننا بالسنوات الاخيره ماعدنا زي قبل كل البنات بدوا يهتمون ويشترون
دمتي لنا ي صاحبة اليدين الجميله
تراي معجبه بيدينك مشاء الله بقووه وحلمي بمخالب زيك بس ماقدرت^_^
من بعد تجربتي لكريمات اليد من لوكسيتان معد فتحت مجال لغيرهآ لكن اسعآرها الفلكية تخليك تفكر تجرب حتى لو الجديد خيب ظنك .. من فتره شفت صورة كريم منتشره وف كل مكان ويطلبونه من موقع امريكي وانه بزيت الارغآن وترطيبه كويس بمآ انه عضوي فوائده اكثر فقررت اطلبه لكن الصدمة ان سعره اقل من ريال سعودي !!!!! وش ذا الكريم اللي بنص ريال ؟؟
نيفيا وفآزلين لو يصلحون تصفيه م راح يبيعون علبه بريال ..
ع الله يطلع زين ..
وانتِ لك من قلبي قُبلة ود ♡
انا كنت ناويه اشتريها بس ماحب اي شي فيه ريحه احس بكتمه ومن بعد سيتافيل وكيوفي صرت ماغيرهم لان بشرتي حساسه وبسرعة تتهيج
على احر من الجمر لبوست lovingtan ?
والله يسعدك أكثر وأكثر ♥️♥️
صباح الخير يا وجهه الخير ❤️
تصدقين كنت ناويه اخذه الفتره ذي وكنت بجيبه من اي هرب كويس دونتي عنه ‘(
عندي كريم نهاري من إستي لودر من زمان ب اكلمك عنه يبرد بشكل وأحس بشرتي بعده فيها انتعاش جربيه 🙁
الله يحفظ لنا هالنشاط ويحفظك ويحفظ احبابك ..جربتها في امريكا بصراحه ماتسوا حتى بسعر ارخص مع اني كنت مواظبه عليها بس ماش ..ومتحمسه اوي للتدوينه الجايه
ي صبآح النشاط
والترويقه علئ التدوينه،،
ههههههههههه قتلني وصفك له انه مثل منظف السجاد حسيت وصلت الريحه من الوصف للآن مالقيت مثل ترطيب بالمرز بس مشكلته الوحيده انه علئ زبده وهذا اللي ما حبيته،
اما بالنسبه لرد اللي فوق كريم افالون اشوفه جميل بس قوامه ثقيل شؤي ترطيبه حليو انا صرفه لي مستشفئ حكومي لان رحت عشان ايديني كانت تجف بسررررعه جاز لي عشان ببللش هههههههههه منطبق علي مثل اللي مو من مالك يعجب حالك،،
سؤالي جربتي قفازات اليدين حقت الترطيب؟؟؟؟؟؟ كانت بزين الاريجان واللافندر وشي ثاني نسيت اذا مو غلطانه استخخدمتها وكانت جداً جميله وترطيبها بعد
شكرآ آرتوستنا الجمييله
مشكوره على التدوينه
في الإمارات موجود فكافور الشور جل وسعره على ما اذكر ما يتعدى ال 30
هو حلو بس المشكلة نفس ما قلتي الريحه كتمه ما ارتحتله
ماشالله عليك توسه عندك طوله بال انك تجربين أشياء لخاطرنا..
الله يبارك لك بوقتك ورزقك يارب ويسكن امك الفردوس الاعلى يارب..
اول ماعرفتك قبل ٦ سنوات بالغربه وكنتي اختي اللي ماجابتها امي وانتي ماتدرين هههههههههه لازم يومياااا اقرأ لك اي شي تكتبيه اهرب من الدراسه عشانك فكأنك اختي اللي تسولف علي وسوالفها تجنننننن تهبل ماتنمل تسليني بوقت غربتي واستفدت كثييييير منك ولازلتي اختي حبيبتي للان بغربتي قبلااااتي لك ..
افا طلع افينو كيذا !! من كثر ماأشوفه تحمست احسه شي راقي ويسوى بس شفت سعره بالصيدليه حسيت مبالغ فيه وبعد كلامك احمد ربي ماأخذته والله بنغبن ههههههههه
بعد عيني ياأرتوس تتعبين وتحوسين عشانا 🙁 الله يوفقك ويفتحها عليك ويزيدك من فضله يارب
وبالنسبه لآي هيرب جدًا ممتاز مابقى وحده اعرفها مانصحتها تآخذ منه اسعارهم طبيعيه وشحنهم مباشر بس ماكنت ادري ان افينو عندهم , جربي تدخلينه بإذن الله ماتندمين
يابعد قلبي ماقصرتي
بس بجد الصيدليات عندنا تلاعبو بالاسعار وعلى
اشياء ماتسوى ريال واحد
الله يسعد قلبك على هالتدوينة
يسعدلناا قلبك الابيض ?
مافيه بلووقرر وحده تتكلم بعقلانيه وواقعيه زيك انتي الوحيده الي فاهمه هم البنات وحاسه بشغفهم للجمال ونفس الوقت فاهمه انه مو الكل ظروفه الماديه تمام ، الله يكتبلك سعآاده الدارين ويحفظلك احبابك ?
حبيت تنويعك بالتدوينات هالفترة .. حرام والله سعره مبالغ فيه مرة 🙁 امممم كريمات اليدين جربت كثير انواع من الصيدلية وعادية ماشي الحال بس بالنسبة لكريم اليدين من لوكسيتان حسيت ان بديله الارخص هو كريم اليدين بزبت اللوز من ذا بودي شوب .. للأمانة ما جربت كريم لوكسيتان بس قد جربته بالمحل لوووول 🙂 بس عاجبني الكريم مرررة لليدين هو يجي نوعين زبدة وكريم ما جربت الزبدة بس اتمنى تقتنين الكريم هذا من بودي شوب وتقارنين بينه وبين لوكسيتان 3> مشكووورة
ماشاء الله قاعدة تجازفي بالمنتجات لاجل تفيدي وتغطي كل الفئات ❤
الله يرزقك من واسع فضلة ويزيدك من فضلة وعلمة درجات
م تقصري ربي يسعدك ❤
فعلا ياارتوسه شفت عليه مدح واشتريه من النهدي ياخساره الفلوووس فيه ريحته ?وربي QVافضل منه مليووون مره
الله لايحرمنا منك ??
هلا بالنور والبلور…
أتفق معك بخصوص منتجات مخصصة للشرق الأوسط,… ومدري ليش يجينا أخس شي عندهم..
قبل كم يوم كنت أسولف مع أخوي على نفس الموضوع .. هو بأمريكا ومعه جفاف شبه دائم بيدينه لأنه يستخدمهم في التدريم والشغل كثير فبشرته جدا خشنه و يستخدم المرطبات والكريمات على طول….و يسولف لي أنه اشترى كم شغلة من الصيدلية ماتتجاوز 30 دولار وانها أطلق مية مره من كريم كان يشتريه من هنا بحوالي 370 ريال ..
عاد يقول هم أدرى ببشراتهم و وش يناسبها .. لكن لما يصممون شيء للبشرة الشرقية يصير شغلهم تخمين لأن مهما كان عندهم دراسات ما بتكون بدقة و ثقة الدراسات اللي أجروها على أنفسهم ,…
أفرغي ما بجعبتك وأتحفينا يا عسل …
ماننحرمش
مساء الخير ارتوس يعطيك العافيه
انا شريته من الدرق ستور يوم كنت بكندا
وبصراحه كان زيه زي اي مرطب ثاني لا وشاريه علبتين كبار ضغاط وواحد معاها مجانا زي الي انتي عارضته
يعني خفيف عالبشره بس ترطيبه ابدا مو زي زبده الشيا وغيره خصوصا اني اعاني من حساسيه بيديني سعره مو فاكرته بس اكبر علبه كانت ما اتوقع تتحاوز ال٣٠ريال يعني عندنا كل شي مدبل سعره ع ايش عموما في منتجات ترطيبها اجمل واحسن مثل كريم Eucerin وشركه لوكسيتان
ي صباحكك ي صباحكك ??✨
حمدلله بخير يجعلك بخير آبلتي ?
وصفك للريحة خلا الدنيا تلفبي ?? مشكلة البشرة الجافة كل شيء يحطو فيلو شوفان و شيا شوفان و شيا ..اعفن ريحتين عندي ?? نفسي تصير بشرتي غير جافة عشان بس ابطل استخدمهم ? ف البداية اتحمستلو ب ما انو يتصنف ك منتج طبيعي بس م كنت عارفة انو موجود هنا و لا بدبل الدبل ي سلاممم ي سلام محلايا والله أخدو .. ي ستي عن تجربة اي وحدة فيها اكزيما زبدة الشيا انا عانيت منها ف قدمي- يكرمكم -و جربت علاج بالليزر و م فادني غيرها ، و للي متعقدين من روايح الكريمات البشرة الجافة زي ? املللك شور مِلكك ف الحياة يساعد والله ؛ ابله ارتوس ب الله كريم لوكستيان م تضايقك ريحتو ?? م كان احد متحمس قدي و بس استنى فرعو يفتح عندنا بس جربت كريم الايد منهم و انا خلاص ? ريحتو تضايق ثقيلة مرا ؛ ابله انا متحمسة لأَنِّي اكتشفت ويب سايت ح يساعد مرا اللي دوبهم بدأو يهتمو لمكونات منتجات العناية زي ? خلاص ليمتى اشتري ع عمايا اتعقدت خلاص م عاد ابا اشم شيء طبيعي بزيادة ع اللزوم ? رسلتلك هوا ع الدايركت و جد جد متحمسة كل العالم يعرفو عنو لأنو جد ساعدني اعرف الأحماض بما اني لسى قريب اهتميت فيها .. و محفوظات بنات الإمارات فيلو .. ف مرهم و مرطب للشفايف من مراد مرا داخل مزاجي اجربو ككل البراند يحمس م صدقت عرفتو ?? الا م مر عليك صح ابله ! بس حيرتني منتجاتهم شويتين بعض المنتجات اللي تناسب البشرة الجافة تكون برضو لليجنق و انتي إيجنق .. طب انا لساتني صغيرة يبالي اعمل سيرش اكثر ?? بليز ابله انا مرا مبسوطة عليه و حابة العالم تعرف الويب سايت لأنو بططططططل هوا شوفي انا اتحمست شويتين و كتبت كلام طويل ف سلكي ?? ي كسيفتي .. اهم شيء ينعرف الموقع عندي للبنات ليا يومين مو ع بعضي مني عرفة كيف اعرفو ع العالم .. كلمت كم بلوقر من الإمارات بس احس م فهمو مقصدي عليه انو مو تجربي تطلبي منو لا -عشانو بس ف الإمارات – ابا يتشهر لأنو مرا يساعدك تعرفي ايش مكونات الكريم مثلاً و تبحثي اصلا ع المنتج ع حسب المكون اللي تبيه لنفرض حمض الهاليورنيك الغاية منو او العلاج و برضو ف تعريف لكل مكون و ايش فايدتو للجسم ??? أقولك بطططططل لازم لازم تشيكي عليه انا مرا فادني لأنو سهلي بدل م ابحث كل مرا عن مادة او حمض او او او .. ي رب م لخبطك كلامي ?? مني عارفة ايش أقول كمانا ??
شكراً ?✨
اذا عمرك تجاوز ١٨ سنة مو بدري على الانتي ايجنق، وإذا انت فوق ٢٥ المفروض تفكري جديا في الموضوع.
لان دايما الوقاية خير من العلاج.
الاجانب احسهم يبالغون بزياده وخصوصاً بعد فرانك يوم طلبته قعدت احسب الايام والساعات متى يوصل وفي النهايه مثل اي مقشر :/
مدري طبيعه اجسامهم غير وتبان عليهم النتايج ولا وش السالفه :|!!
جعل الكريمات المخلصه يكثرون م نبي نفقدك بالتدوين? ..احلى وصفك توصفين من قلب هههههههههههه زينك .. منظف السجاد يابوووي على ريحته ?… م ابي اكثر كلام الكريم مثلا لو ابي اشتريه اخذ كريم اليد .. ياحب الاجانب للمبالغه زي بعض اللي عندنا اكره المبالغه الزايده عن حدها ?..
انا جربت عينات من الكريم وكانت رائعة جداً.
لكن استخدمتها لوجهي مو يدي.
عندي حساسية بوجهي والمنطقة تكون دائماً جافة وفيها قشور.
قد ما استخدمت من مرطبات ما طلعت بنتيجة، لحد ما طحت على افينو. في البداية استخدمت الازرق مع مقشر وجه يومي من جونسون يالقريبفروت والحمدلله ماعاد تشوف القشور وبشرتي رطبة بدون ما تكون زيتيه.
ما جربت المنتج المتوفر عندنا بس العينات اللي اخذتها من الشركة الام مباشرة.
كنت استخدم قبله كيو فيو صحيح القشور تروح مع المقشر لكن المنطقة تظل جافة بغض النظر عن استخدام المرطب وافينو حل لي المشكلة هذي جذريا. ممكن زي ما قات فعليا ان فائدته للي عندهم حساسية او اكزيما. او ان المنتج عندنا ملعوب بمكوناته.
ع مدحك للوكستيان رحت وشريت منهم كريمات لليد وللجسم للبشره الجافه الصرااحه لعبت في جسممي ودمرت بشرتي وقلبت لوني ازرق كان احد حابس الدم بجسمي بس هذا من استخدام اول مره سويت فيني هالحفله 🙁 لو استمريت وطنشت اللي صار ايش يصير فيني !!!! عمريي ماتندمت ع منتج شريته قد هالشيء لدرجه ذا مريت من عند المحل او اي حساب في الانستجرام يتكلمون عن منتجات لوكستيان علطول انزل تحت تحت تحت ماابي اقراء خلاص جتني عقدده مع ان هالموضوع صار له ثلاث سنوات بس للحين بقلبي
اذا ماعندك مانع ابي كريمات للبشره الجافه للجسم يااختي طفشت اشتري وماحصلت اللى يرضييني او اللىي يعجبني ابي تقترحين وانا اشوف اللى يناسب لي
ياااالله من جد انتي نعمه من رب السماااء لنااا احبك واعشق اهتمامك تقريبا لي اسبووع طايحه على مدونتك توني اعرفهااا وودي اصيح من الفرحه ان حظي جابني لهاا وقبل يومين عرفت لك حساب بالانستا وضفتك فيه الله يسعدك وويوفقك ويحقق لك اللي تبين
شريت كريم اليد الصغير من فترة 3 شهور تقريباً كتجربة لان عجبني شكله
وقلت اغير عن كريمات اليد المعتادة اللي استخدمها دايم
من صيدلية الدواء ب 50 ريال، وفعلا السعر مرة كثير على العلبة الصغيرة
ترطيبه كويس بس زي ما قلتي ريحته مو لهناك 😀
و كمان قلت ماراح ارجع اشتريه مرة ثانية
( الساعة عندنا العاشرة و الربع أما في السعودية الثانية عشر و الربع) يعني أقول صباح النور و إلا مساء النور…هههه إلي يعجبك
المنتجين أول مرة أسمع عنهم و ماهم متوفرين عندنا ..و لو توفروا ما راح جربهم لأنو شعورك وصلني..أكره الكريمات المرطبة إلي تعطي الشعور السلكوني..كان طبيب الجلدية يوصفهالي لان أعاني من أكزيما في الرجلين و اليدين ..الاكزيما خفيفة و تختفي إذا داومت على الترطيب..سبب الاكزيما كان مواد التنظيف الي تلامس إدي و رجلي كل يوم أثناء التنظيف
المهم هذي الكريمات مجرد ماتغسلي أديك بالمية يختفي الترطيب و ترجع أيدك حقل جاف..تقولي عمرها ما ترطبت
أنا أستعمل لوشنات فازلين من يوم ماذكرتيهم في موضوع “سلسلة تفتيح لون البشرة” في شمواه
استعملت كريم اليدين و كريم الرجلين بالاضافة للوشن الجسم…ترطيبهم ناسبني
لكن كان هناك فرق بين اللوشنات المكتوبة بالعربي و بين الأصلية…الأصلية أروع “الاروبية”..لقيتها في محل تجميل كل منتجاتو اصدرات لأروبا …و جربت لوشن نيفيا للتفتيح الي ذكرتيه و كان اصدار ألماني “ترطيبو كان خفيف”..بعد أسبوع من الترطيب صار جسمي يشع نظارة و الله بدون مبالغة”لون بشرتي الأصلي أبيض شفاف لكن من التعب و الاهمال صارت باهتة”و “أرطب جسمي مرتين باليوم”
كل اللوشنات إلي ذكرتيهم في موضوع “سلسلة تفتيح لون البشرة”جربتهم و كلهم ناسبني الحمد الله …لكن النسخة كانت لأروبا مو للشرق الأوسط
أهم شيء عندي لبس القفازات و البوت المطاطي “مدري شو اسمه” للكرف و الغسيل (الوقاية أهم شيء)
سامحيني طولت عليك …دمتي جميلة روحا و قلبا و جسدا
انا استخدمته قبل ماادري انه مسوي ضجه فعلا حسيته عادي ولا حبيته مره .. ومن جد مستحيل اشريه بالسعر الي تقولين . لاكن انا شريته من برا السعوديه اتذكر سعره معقول علشان كذا اخذته اجربه ولا حسيته فيه شي غير …يسلمووو
تسسسلم اناملك ياارب على هالتدوينة حبيبتي
جزاك الله جنات الفردوس ???
وصفك للريحة عنجد ضحكني هههههههه وصدمني كمان.. أنا شخصيا متعودة على كريم يوسيرين ومرتاحة عليه ودااائما عندي.. بس بتزكر مرة خلص من عندي وكنت بالسوق وما كان متوفر النوع اللي بجيبه دائما من يوسيرين ولقيت Aveeno أعتقد كان عليه عرض أو كانوا عاملين إعلانات المهم شدني وقلت خليني آخده أجربه وانا ما عمري قرأت عنه من قبل.. والحلو انو النتيجة مرضية كتير وحسيت انه كتيييير شبه يوسيرين.. وبصراحة ما في الريحة اللي بتوصفيها.. والله بس قرأت البوست تبعك رحت شميت الكريم كم مرة بس فعلا ريحته كريم عادي متل أي كريم من غير عطور.. يعني شبه ريحة يوسيرين.. للعلم أنا ساكنة بكندا ما بعرف ازا المنتجات بتختلف.. بس انا شايفة بالصورة انو مكتوب على اللي عندك كله بالإنجلش فالمفروض انه يكون نفس الأجنبي يعني مو انتاج عربي.. أنا اللي عندي تقريبا نفس الكلام بس العبوة طبعا أكبر وشوي مختلف ترتيب الجمل بس المهم انو نفس المنتج بالضبط ونفس المواصفات 🙂
جزاج الله خير ??
هالايام كان ببالي كثير وفكرت اشتريه
بس زين قريت تجربتك شلته من بالي هالفتره
بس لو حكتني يدي وشريته ? برجع واكتب تجربتي باذن الله
دمتي بحب?