صَباح / مَساء الدَلال
هالريفيو ماكنت أبي أطرحه إلا لما أشتري ألوان أخرى مِن هالنوع
لكن إستعجلوني البَنات في الانستا وَ نزلته بناء على طلبهم
[ كَيفني وَ أنا حَبوبه ألبي النَداء ..]

البودره الكثير يعقد عليها الأمال وَ يعتقد إنها تصنع المعجزات
شخصياً أشوفها مُكمل للمَاكياج مُو ضَروره قصوى لكن أعتقد مع طبيعة الجو عندنا وَ طبيعة بشرتي الدهنيه ، كنظام حمايه لابُد أستخدم بودره خاصه إذا كان ساعات وضعي للماكياج طويله .

لذلك حددي هَدفك من إستخدام البودره ~
• هدفك بس انه يَمتص الدهون
• يغطي البشره
• يعطي لمعه وَ رونق
• للكونتورينق وَ تحديد الملامح
• أو للإضاءه ( هايلايتنق )
أو … أو … أو …

طبعًا كل ُنوع بَاودر له تأثير يَختلف عن غيره اللوس باودر غير عن الكومباكت ، وَ الحديث يطول مُو هذا موضوعنا ..
البودره إللي بتكلم عنها اليوم نَوعها كومباكت باودر يعني يعطي تغطيه لابأس بها ، بالإضافه إنها شير ( sheer ) ، يعني تغطيه شفافه مو قويه
فاللي تحب الماكياج الثقيل أنصحها تبعد عن هالنوع من التغطيه ( شير ) أي شي مكتوب عليه شير يعني شبه شفاف وَخفيف , سواء فاونديشن أو باودر أو رُوج
CHANEL
Les beiges healthy glow sheer powder spf 15

سَعره : 250 ريال تَقريباً ..
متوفر بَجميع نقاط بيع منتجات شانيل ( دبنهامز , سيفورا , باريس غاليري , هارفي نيكلز )

حبيت هالبودره لأنها تعطي مظهر طبيعي وَ بنفس الوقت تعطي تغطيه خفيفه تناسبني ،
طبعاً ماكذب عليكم شكل العلبه أعجبني خاصه إني من عشاق اللون الأبيض ، يجي معها فرشه أغلب خبراء التجميل مدحوها وَ قالوا ياي تهبل ، تصميمها ما أكذب جميل سلس وَ اشبه مفعولها بفرشة المروحه ، مع إنها ناعمه بس حسيتها خشنه لتحت العين ، عموماً ماحبيت الفرشه لابأس بها بس دائماً الفرش اللي تجي مع المنتجات مصيرها تنركن على جنب

شريت أفتح لون اللي هو 10 ، لان هدفي أستخدمها تحت العين وَ لأبراز بَعض المَناطق بالوَجه لَيس على كامل الوَجه ، بأيام الطلعات الخفيفه وَ النهاريه

قوام الباودر خفيف وَ ناعم مايعطي مظهر كيكي أو باودري ، سلس وَريحته طيبه ، أيضا ً يعطي رونق للبشره وَ لمعه صحه
وَ مثل ماقلت تغطيته خفيفه يناسب الصباح أو الماكياج الخفيف الطبيعي ، غير إن فيه نسبة حمايه 15 اس بي اف , يعني راح يَحميك من تلوث البيئه وَ أشعة الشَمس الضاره

أمده بالكبوكي برش ، يعطي تأثير افضل من الفرشه إللي جت معه
أشوف أفضل طريقه لإستخدامه إنك تختارين لونين واحد للهايلايتنق وَ واحد للكونتورينق بدرجات خفيفه للغايه ، يعطي مظهر محدد وَ طبيعي بنفس الوقت ، أو تختارين لون يناسب بشرتك وَ تستخدمينه على كامل الوجه ، بس انتبهوا اللون اللي معي فاتح
وَ أشوفهآ البودره المثاليه للفاينل تتش اليَومي

كيفية مده لاعطاء مظهر طبيعي ؟
http://www.youtube.com/watch?v=8ey8md9k5ks

هُنا إستخدمتها مع المجموعه الكامله
http://www.youtube.com/watch?v=gRAfNE1JW7U

طَبعاً لحد الآن ما علمتكم شَلون أسَتخدمهآ بالضَبط ..

طريقتي الحاليه ،’
أمد كونسيلر خفيف تحت عَيني وَ على كامل وَجهي السي سي كريم 
وَ بعدين أستخدم لوس باودر بالجبهه وَ الذقن وَ الخشم ..

وَ آخر شيء أستخدم هالبودره من شانيل تحت العين وَ أعلى الخد بعد ما أكون حطيت بلاشر ..
لو شفتوا العلبه ماراح تَحسونهآ لَميعه , وَ لو حتى مررتوا أصابعكم بالمَحل ماراح تَحسونهآ لَميعه ..عرفتوا لمعة النظافه وَ كأنك مسنفره وَجهك !! كذا بالضبط
مَظهر نظيف وَ مصحصح وَ مصقول
يعني هالمُنتج شَخصياً على قد ماهَو بسيط وَ لو شريتيه تحسينه عادي قد ما يَعطيك فاينل تَتش مَثالي ..

شَوفوآ مَعي الصَوره

مافي هالفرق الكبير , بس عالطَبيعه غير وَ إللي ماعَندهآ مُشكله من شراء مُنتجات غاليه وَ تعطي مظهر بَسيط وَ للأيام العَاديه أنا أنصحهآ تشتريه , تعرفون فيه بنات تَقول / لا مَظهر يَومي أبي مُنتج سَعره أقتصادي ..مُمكن تحصلون شبيه له من ناحية الفاينل تتش وَ هو بودرة ماك المينرالز باودر , بس شَخصياً ما أستخدم من ماك أي شيء باودر أو فاونديشن أو كونسيلر درجاتهم ماتَعجبني , وَ لا ريحة مُنتجاتهم وَ غير كذا زعلانه منهم زايدين الأسعار عندنا بَشكل خيالي وَ بضاعتهم ماتسوى , مايفرق مرات عن شانيل وَ ديور وَ جيرلان إلا 50 رَيال وَ على جَوده أقل ..وَ تعليب أقتصادي , أنخبلوووووآ هُم وَ أسعارهم ..
إذا بتشترين من ماك من الإنترنت ..مُمكن

وَ هذا سَواتش للألوان من هالبآودر ،’

5 ألوان .. أبتداءً من 10 إلى 50
وَ الألوان الغامقه خياليه عالبَشره لو حابه هالمَظهر الصحي الخُمري
المُنتج خفيف عالبَشره وَ ماتحسين وَجهك فيه شيء طَوال فترة إستخدامه
إيدي بَصراحه عليه 24 ساعه , لو بطلع مَشوار وَ آبي أصير حلوه وَ مسَمسَمه مافي إلا هَي , تَعطيني الشيء إللي آبيه .. خاصه إن طلعاتي غالباً تبدأ من 4 عَصراً للساعه 10 مَساءً وقت حر شَديد للغايه
لا يَقطع وَ لا يبهذلني وَ لا يَخلي وَجهي يَبرق , بالرغم اللمَعات دائماً ماتتامشى مع الوَجه الدَهني ..
بإذن الله لما أشتري درجه غامقه تتلائم مع البرونز راح أطرحهآ وَ برضو بطرحلكم الدرجه المُلائمه لبقية الوجه بحال كان لونك طَبيعي بدون برونز , لكن هالرَقم مَثالي لتحت العين وَ إبراز آعلى الوَجنتين , حتى لو ماكنتِ بيضاء لأن بالأساس ماهوب هاللون القَوي .. مو مثل مو مبين بالعلبه , لكن ما أنصح به لكامل الوَجه هاللون بالذات حتى لو لونك مثل حليب المرآعي ..

تبين يكون شكلك قديم كثري باودر فاتح بوجهك , تبين يكون شكلك دافيء مثل طلة إليسا خلى الباودر يكون قريب من لونك أو عالأقل على لونك مُش أفتح ..
الأسيويين رُبما يليق عليهم بسبب طبيعتهم الثقافيه وَ بشرتهم الصفراء , وموروثهم الجمالي التاريخي يحب هالمَظهر الأبيض ..

إللي دايم يجرب لي وَ تضبط معه يَحاول يَجرب هالباودر بمحلات التَجميل
لا تَشترونهآ جربوهآ بالمَحل وَ خذوا كم لفه وَ شوفوا نتيجتهآ ..
أرجع أكرر هَي مو مخصصه لتحت العين أو للوجنات عادي هي مُجرد باودر
إنتِ حره تحطينهآ بأي مكان تَبينه

دُمتم بَحب

مُلاحظة / هذه التَدوينه تَم نشرهآ سابقاً بتاريخ 13-08-2014