يآ مَية وَ لكم
شَخبآركم يآ حريمآت وَ يآ بَنوتآت وَ يآ كُل الأصَناف إللي تَتآبعني
[ جَديده كل الأصَناف ] ..
فَضفضه جَمآليه ،’
عاد هالجَمال وَ مقاييسه سَببت ذبح وَ مذابح بين الناس
وَ خلت هاللسان يَطول طُول الشَبر وَ الشبرين , حَتى وَصل للأمَتار
عآد أنا أسَتمتع جداً لما أشَوف حقارة النَفس البشرية وَ دنائتها ( مَع إشمَئزاز دآخلي )
عَجزت أفهم البَعض , تعبنآ نَقول وَ تعبنآ نفهم , دايم الكَثير وَ ليس الكَل يملك صَندوق بالمُخ
إن فلانه جَميله لأنه عَمليات , فلانه جَميله لأن فيه ناس يَخدمونها , فلانه جَميله لأن وَ لأن وَ لأن
دايم فيه أعذار لسبب هالجَمال ,, بالرُغم هالناس مؤمنين بَوجود الله يَعني مو ناس كَفره
إنمآ مؤمنين بَوجود الخالق إللي جَمل هالمخلوقات بالحُسن , وَ ووزع هالأرزاق , فليش أنتم مُعترضين على خلقة رب العالمين وَ أصبحتوآ من الشاتمين وَ العائبين !!
[ عندكم مُشكله مع تَوزيع الأرزاق !! أم تظنون أن الله عاجز على خَلق الجَمال !! ]
أوجه هالإستعجاب لَكم ؟!
الشيء بالشيء يُذكر فيه دراسه أثبتت إنه عمليات التجميل ما تَجمل
لكن مُمكن تظهرك بشكل أصَغر من عُمرك , وَ الناس إللي خضعوا لعمليات تَجميل غالباً هُم الناس إللي كانوآ جميلين بالأصل , يعني عَندنآ جُويل بحلق
هي ملكة جمال لبنان وَ جميله بالأًصل لكن لما زَينت عملية التَجميل صارت أكثر حداثه
وَ صار شكلها مواكب للمَوضه وَ عندنا ناس شيون مازالوآ شَيون حتى بَعد عمليات التَجميل
الدكاتره زَعلانين من هالدراسه لأنهآ راح تقلل سَوقهم وَ تضر عَملهم وَ أقتصادهم
لكن هي دراسه حَقيقيه , عمليات التَجميل مُستحيل تَوجد جَمال من العَدم
نرجع لمَحور حَديثنآ ..
أنا بَحياتي صادفت عَينات من الناس عَجيبه صَراحه ما فَهمت مَغزآهم بهالحَيآه
منهم شفتهم بالأنترنت وَ منهم بالوآقع
تَجيني وَحده شينه شَينه شَينه بَمعنى شَينه , أقولهآ هيفاء وَهبي جَميله
تَقولي وووووووووووووووووووووووووووووووووووووووووع
آآآآآه من كلمة وَع وَدي أقَص لسان كل وَحده تَقولهآ
هالحَين أذا هيفاء وَع ؟! طيب إللي أقل مَنهآ جَمال شَنقول عليهآ
ترى هَيفاء وَهبي مُجرد سَين من الناس ( يَعني مو شرط نكون مَتكلمين عن هيفاء وَهبي )
قبل لا تَحكمين بَوع وَ ماوع , أنا أتَخيل أحد يَشبهني بَهيفاء وَهبي
حسب نَوعية التَشبيه رآح أزَعل , لكن لو شَبهوني بَجمالهآ بَتشقق , أو شَبهوني بأناقتهآ
لكن لو شَبهوني فرضاً بسلوكياتهآ بَزعل ( بالرُغم الله أعلم بَسلوكياتهآ لكن مَثل مايَظهر لي ما أفَضل هالتَشبيه )
تَشوف لك فرضاً مَيجن فَوكس
[ وَ برضو ميجن فَوكس سَين من النآس يعني مُجرد مَثال ]
تَقولين لهآ حَلوه بَتقولك : وووووووين فيه أحلى مَنهآ
طيب نَدري فيه أحلى مَنهآ , كَون فيه ناس أحلى من ناس هذا ما يَقلل من جَمآلهم
تَقولين لهآ حَلوه
تَقولك : يارب السَتر أخذوا الدَنيا وَ نسوآ الأخره
وَمين قال أن حَنآ نتكلم عن جَنه وَ نآر نتكلم عن الجَمال بَغض النَظر
تَقولين لهآ حَلوه
تَقولك : بَصراحه الزَين بالسَمآر
طيب مَين قالك إن السَمار شَين ؟! لكن مايَمنع أنهآ بيَضاء وَ حلوه
تَقولين لهآ حَلوه
تَقولك : لو خشمهآ أطَول بتطلع أحلى لو أسمن بَتطلع زَينه
لو عيونهآ سَود
لابوك وَ لا بَو جَدك , يَعني وَش نرجعهآ للمَصنع !! عشان يَوافق مَقاييس مَخك
بَجد خيرررر وَش هالعَقول السَميكه !! .. وش مفاد كلمة لو
مالهآ مَفاد غير أنه خلقة ربكم مَب عاجبتكم وَجالسين تَقولون لَو مآ لو
تَقولين لهآ حَلوه
تَقولك : بس وين مافي رَجال يبي وحده فنانه جَمالهآ لكل من هب وَدب
وَش علاقتنآ هالحَين أذا فيه رجال يَبيهآ أو مآ يبيهآ
تَقولين لهآ حَلوه
تَقولك : وَ الله ماشفتي القبيله الفلانيه بناتهم خَقه وَش ذي
تَصير جَزمه قَدآمهم
سؤال وآحد , ماتعرفون تَقولون للشيء حَلو بَدون بسبسه !!
أكيد كل شَخص حلو فيه الأحلى مَنه , وَ فيه الأطعم مَنه وَ فيه إللي يَتذوقه أكثر من تَذوقك أنت له
وَ العَكس صَحيح , ماتعرفون تتذوقون الجَمال بَصمت
وَ الله الوآحد يَستحي يَستحي من الأمَور إللي يَشوفهآ
أنا مرات أقَول هالناس شَلون تربوآ !! بحظيره حيوانات .. شهالهمجيه إللي هُم فيهآ
وَ الدليل قاطع بَملفات الأنستغرام ,, ماشاء الله النفوس تطلع تحت مُعرفات وَهميه
ماخلوآ ملف ميريام فارس , مَلف نوال الزغبي , ملف إليسا
مَلف وَ ملف .. كلهآ قذف وَ سب وَ كلآآآآآآم عن القُبح وَ الجمال
وَ نسينآ إن الإنسان إللي يَنزل نفسه لمُستوى هاللي هُم شايفينهم قبيحات
بيكون أقَبح مَنهم بَكل تأكيد
على طاري الجَمال وَ القبح
شَوفوآ هالصَوره رقم ١ للفنانه أليسا ( أنا مَنب من مَتذوقات جَمال أليسا )
لكن أحب لون بشرتهآ وَ البرونز إللي تَزينه
[هالحين بتنط علي وَحده بتويتر وَ لا بالتقييم بتقولي : مين قال مَسويه بَرونز هي سَمره خلقه !! ]
غير أناقتهآ وَ أختياراتهآ إللي ما أشَوفهآ إلا رآكبه مَع اليسا بالرُغم جَسمهآ مَب رشيق
لكن هي الوَحيده إللي ما أقَدر أقول عنهآ شيء
الصَوره نقاء وَ نظافة وَ ترتيب وَ شعر وَ كل شيء بَصراحه يَلق
لا تَصيرون من الناس إللي بَس وَ مابَس , العمليات أخذت مَجراهآ مع أليسا
لكن ما يَمنع إننآ نَقدر نَتذوق بقية مَحاسنهآ
بَينما بالصَوره رقم ٢ بَصراحه بهالصَوره يَوم شفتهآ بالأنستغرام أنَصدمت وَ ماطلعت صَورتهآ من مُخي
لكن ما أنَصدمت من شَكلهآ لأن واضح إن الصَوره ملتقطه غَلط ,, أنَصدمت إنهآ مُستميته على عَدم حذف الصَوره , بالرُغم مافي أحد بالكومنتز إلا عاب عليهآ بَطريقه سيئه جداً تجرح المَشاعر
لا تَقولون لي ظَهرت على حقيقتهآ وَ غيره
لأن الصوره رقم ٣ من نفس الرَحله وَ طالع شَكلهآ طَبيعي
فلاحظَوا جزء من الجَمال أيضاً الذكاء بطريقة الَظهور
وَ نعرف وش نَظهر للناس وَوش نَخفي عَنهم ,, مب دائماً العفويه حَلوه
ولا المُبالغه أو الزَيف
مَقاييس الجَمال | Beauty standards
تَدرون إن نفرتيتي مُصنفه إنهآ جَميله وَ إن مقاييس جَمالهآ مَثاليه
تَخيلوآ شَكلهآ على الزَمن الحديث بَتحديثات جَديده رآح يَكون شكلهآ مُوديل
وَ سهل تَحويره وَ تنويعه وَ ووجهآ يَقبل كثير من الستايلات , وَ وملامحهآ سَهل تحويرهآ
وَ مرسومه رَسم بالرُغم أنآ ما تَستهويني مَلامحهآ لكن كمقاييس هَندسية جَميله
مثلاً أنجلينا جَولي كثير من الغرب يَشوفونهآ جَميله
لكن كَمقاييس هَندسيه مُصنفه أنهآ غير جَميله
لَكن أنا أحب لون عَيونهآ وَ نقائهآ ملامحهآ غريبه وَ تعجبني
لكن هُم مصنفينهآ بهالشَكل
ميريندا كير الكَل منهبل عليهآ , كَمقاييس مقاييسهآ غير مَثاليه
لكن مَلامحهآ بريئه وَ حبوبه , تَدخل القلب عَطول
طبعاً المقاييس الجَماليه هي عَمليه هَندسية بَحته , مَب معتمده عالذوق وَ الهوى
يعني يَقيسون البُعد بين العينين وَ بين العينين وَ الأذن , وَ بين العيون وَ فتحة الفم
وَ أبعاد الجبهه وَ الأنف وَ الفم … إلخ بَنسب مُعينه
يَعتمدونهآ أطباء التَجميل , ماتَشوفون يَقولون لكم مافي طبيب تَجميل
إلا راح يَطلع عَيب , لأن غالباً الإنسان الجَزء اليميني ما يَتطابق مع الجَزء اليَساري
وَ أكثر الأشخاص جَمالاً هُم الأقرب للتَطابق
فدايم نلاحظ بالشَعوب إللي يعانون من نقص التَغذيه تباين الأبعاد بَشكل واضح
لدرجه مُمكن يعطي الشكل الدَميم
وَ بنفس الوَقت التطابق التآم مُمكن يَعطي نَفور وَ يصنف إن هالشَخص
ملامحه صَناعيه وَ يقولون عن شَكله ( مُزعج ) لأن مافي إنسان ملامحه مُتطابقه 100%
وَ عفكرة بَصورة نفرتيتي مَوجود الرَسم البياني للمَقاييس على الصَورة اليَمينيه
المَقاييس الجَماليه صَح مَضبوطه , لكن مالهآ علاقه بالذَوق العام
مثلاً نحن كَعرب ما نَتذوق بَعض أنوآع الجَمال , مثلاً لو نَشوف وَحده من أوروبا الشَرقيه
مُمكن ما يَعجبنآ جمالهآ البارد , بَس بنعرف نَطلع الحلوه فيهم بَنقول هذي حَلوه
وَ بنعرف نَطلع الشَينه فيهم حتى لو ما تَذوقنآ مَلامحهم أو ما حبينهآ
وَ نفس الشيء يَسري على الملامح الأفريقيه وَ الآسيويه
تَصدقون أني شَفت أثيوبيات جَميلات بَمعنى جَميلات لكن للأسف فيه عندنا عائق فَكري
إن لون البشرة يَلغي الجَمال بالرُغم فيه أثَيوبيات فاتحين كَثير
مَلكة جمال العآلم 2013 ميجن يونج
صَح فيه بنات عَندنا أحلى مَنهآ من وَجهة نَظرنا , لكن ما يَمنع أنهآ جَميله
بَملامح أسَيويه , فلازم نَقدر هالشيء مُستحيل نقيس الجَمال فقط على عرقنا
يَعني فيه ناس يردون عليهآ بَحسابهآ بالأنستغرآم شَغاله
طيب هالشَغاله تَرضين تشتغل عَندك ؟! ولا بتخافين من رشاقتها وَ ملامحها
وَ ضحكتها وبرائتها !! ما أتوقع بتخلينهآ عند زَوجك حتى سآعه وَحده
بيآكلهآ وَ بيقشرهآ بَعد
فَعيب وَصف مَثل وصَف شَغاله ,, لأجناس وَ أعراق بَمهن مَتواضعه
علماً إننا بأوطانا العربية نخالط ناس صاروآ مننا وَ فينآ وَ داخلتهم عروق فكيف نَهينهم بهالشَكل ؟!
نجرحهم أكيد لو قروا مَثل هالرد ..
الجَمال واسع مب مَحدود بفكرك أو بذَوقك ..
تَذوقنآ للجَمال جيني ,،
فيه دراسه أثَبتت إن تَذوق الناس للجَمال جيني
حتى بتلاحظون إن العيله الوَحده تَقدر نَوع مُعين من الجَمال , بالرُغم مرات مايكونون عايشين بَبيت وآحد
حتى بنلقى ناس أفارقه عايشين بأفريقيا , ذَوقهم مُطابق لأفريقيين مُهاجرين
بأمريكا أو أوروبا , يَعتمد عالجَين
أذكر مره شَفت برنامج عن أنتشار حبوب لتكبير المؤخره بأفريقيا
وَ ماشاء الله الحريم إللي طَلوآ مؤخرتهم جداً كبيره , وَ مع ذلك قالوآ لهم ليَش تكبرونها ؟
قالوآ أنهآ ثَقافه وَ جمال خاص بَهم
[عاد بَتقولون لي لأ المؤخره جَميله , أدري جَميله بَس مُو بالحد إللي تتَوقعونه يَعني كيم كردشيان تُعتبر بَدون مؤخره قَدآمهم ] ..
وَ لَدرجه إن هالأفريقيات كانوا يرسلون هالحبوب لمعارفهم بالخارج
ألحين لا تَجي وَحده بليز تسألني عن هالحبوب لأنهآ خُرافه وَ أدت بَمقتل كم وَحده بأفريقيا
حتى لو تلاحظون كليبات الراب وَ الهيب هُوب ( الفن إللي نجومه من أصول أفريقيه ) كلهآ هزهزة مَؤخرات , هُم يَشوفون هالشيء أهم شيء وَ أجمل شيء , وَ جينيفر لوبيز وَ بيونسيه قدموآ هالثَقافه وَ حتى كيم وَ بالنهايه كيم تَزوجت أفريقي , وَ جابت بيبي من أفريقي لأن هي تَسعى لأرضاء ذَوق إللي حَولها
وَ الأوروبيين يَنسطلون عالسيقآن الطَويله , يَعني زيهم زي كل الرَجال يَحبون الصَدر وَ المؤخره
بس مو هاجسهم وَ مايحبون الفات وَ الجسم المَكدس , حتى أذكر الأجانب على لسانهم أيثليك ( صَحي )
وَ بتلاحظون حتى بالأفلام الغربيه دايم يقولك سيقانهآ ببالي ,, بينمآ أحنا السيقان آخر أهتماماتنآ
عندهم لو الوَجه زيرو أهم شيء الجَسم
بينمآ أحنا أهم شيء الوَجه وَ الجسم لو زيرو مَب مَشكله
أصلاً نقول عالرشيقه عَصله
لَكن لو لآحظتوآ مَع العولمه صارت ثَقافتنآ شَبه وَحده وَ كل مآلهآ تقرب أكَثر وَ أكثر
وَ بين الناس المَتطورين ما نَشوف هالفروقات الكبيره , بينمآ أكيد فيه ناس مازالوآ على نهجهم
فيه وَحده اليوم سألتني وَهي إللي أوحت لي بهالمَوضوع
بما مَعنآه هل الجَمال للبيضاء ؟!
أذكر أني جاوبت أن هالنَظره لمَحدودي التَفكير
لكن مازال الجين يَلعب فينآ لعب ,, وَ بنلاحظ إن فيه أم مُستحيل تَزوج أبنهآ من وَحده سمراء
بالرُغم الأم سَمراء وَ أبنهآ أسمر , وَ هو يقول أبي شَقراء ؟!
طيب يالمَليح مَين بيآخذ خَوآتك !!
يقول تَحسين نَسل وَ ليه تحسين النَسل بهالطَريقه ؟!
دَليل إن فيه بنَظرتكم قَصور للونكم , وَ أشكالكم , طيب أنت تبي تآخذ بيضاء
وَ تبيهآ هي تقبلك يالأسَمر ؟! دام بنظرك أنت مَعيوب ..
يعني هي تخرب نسلهآ عَشان سَواد عيونك ..
فعلاً شيء مُحزن هلي يَصير
وَ صديقه لي أمهآ مَتهاوشه مَعهآ وَ رفضت تنزل مَعهآ عرس لأن بنتهآ مَسويه تان
قالت وَش أقول للنآس بنتي سَمراء !! وَ الله بتعنسين بالبَيت ؟!
بينمآ فيه عَوانس سُمر وَ بيض بهالدَنيآ , الرزَق مب وآقف على أحد
هالفَكرة مُتشبثين فيهآ الرَعيل الأول أكثر شيء ..
بالرُغم أنهآ مَوجوده حتى داخل البنات إللي يَزينون تآن ,, لو قلتي لهآ ماشاء الله سَمارك حَلو
وَ التآن حلآه , تقولك : لآآآآآآآآآآآآآآآآآآآآآآآآ أنا مَنب سَمره أنا بيضاء بَس حارقه نَفسي
[ طيب ليش أنتِ تحبين السَمار وَ أنتِ سمره ليَش زَعلانه ] ..
وَ هي أساساً لما تَبالغ بالبرونز تبي تَقول أنا مَنب سمراء بَس تأثير التآن
ففيه ثقافه هنآ للبياض ما نَقدر نَغيرهآ كلهآ متَعلقه بالجَين
نفس الشيء يَسري عالشعر الطَويل , ماتَقدر تقنع الناس إن الشَعر القصير جَمال
يعني يقولون عسى ما شَر : جآها الخبيث ؟!
تقولين لهم سَتايل البنت قاصه , يقولون لآ لآ بَسم الله وَش ذآ
الجَسم المربرب ,,قَولي للناس فيهآ سيلوليت
أو مؤخرتهآ يادوب تَمشي بهآ يَقولون لك وين وش تبينهآ بَدون أنوثه ؟!
هذي ثقافه وَ جين صَعب يتغير بَس جين عن جَين يبدأ يتحور شَوي شَوي
فلازم الناس إللي تغيروآ أو فضلوآ ذوق مَعين , مانجَلس نهاجمهم لأن مُمكن ينكرونه قَدامك
لكن بَمشاعرهم الدآخليه هُم يَفضلونه , فلَنحترم ذَوق كل شَخص وَ خصوصيته
مؤثرآت عاطفيه ،’
تَدرون إن فيه مؤثرات تَخلينآ نَتذوق الجَمال بَشكل مُختلف
يَعني أخوات خطيبك أول ما يَجون يخطبونك , تَشوفينهم حَلوين عَشان خطيبك يَصير حَلو
وَ تقولين لأهلك حَلوين صَح ؟!
ممكن أهلك يَقولون بالعَكس خوآته مب حَلوات هُو الحلو … إلخ
بس لأنك عايشه بَمرحلة الدغدغه للحَواس فَرحانه
وَ عقب الزَواج تشوفينهم شيطان رَجيم
نفس الشيء لو شَفتي وَحده تذكرك بَوحده ماتحبينهآ بتكرهينهآ
وَ بتشوفينهآ بَشعه , مو بَس كذا كل ماشفتيهآ بَتقولين يا ثَقل دَمهآ
بالرُغم الكل يَشهد لهآ بالجَمال , وَ أنتِ منتب غيرانه مَنهآ بس عيونك مَب قادره تَشوفه
برضو هذا مؤثر نَفسي
لو أخوك مَثلاً مسافر , وَ شفتي فنان يَغني يَشبهه بَتقولين يالله حَبوب هالفنآن
يازينه ,, بينمآ أول منتب قايمته من أرضه , شَوقك لأخوك يَحركك
برضو الإنسان يَحب إللي يَشبهه مرات , لأنه يَظن إذا قال عن هالشَخص جَميل
بيكون هُو جميل أيضاً وَ الناس راح يَشوفونه جَميل , يَعني مثلاً لنفترض أني أشبه ميجن فوَكس ( خلوني أحَلم لووووووووووول )
بتلقوني دايم أقول وآآآآآو جَميله وَ أحطهآ رمزيتي , وَ ألبس مَثلهآ وَ أصبغ مَثلهآ مب لأني مُعجبه فيها , إنمآ أحاول أتقولب بقالبهآ حتى أكسب من هالجَمال
[ طبعاً أنا منب كذآ إنمآ مُجرد مَثال وَ نحصل هالشيء بالمُراهقات أكثر ]
الناس برضو إللي مَتعقدين من شغلات ,
مثلاً خشمهم قصير بزياده أو طويل بزياده , أو شعرهم مفلفل
تلقونهم يحبون نقيضهم , مُستحيل يتقبلون أحد يشبههم فما يَحبونهم أبداً
وَ هذول قَله , بَس بالنهايه هذي عَواطفهم
فيه العاطفه إللي تكلموآ عنها أطباء كثير وَهي عاطفة الحُب الأول وَ مازال السبب مَجهول
حتى بتلقونهآ ببعض الذكور , تلقونه يقول أبي أتزوج وحده شكلهآ كذا , بالرُغم الشكل إللي واصفه مَب حلو
بس خلاص يبي يعوض حُبه بهالشَكل , بتلقونه يَقول لزوجته أصَبغي كذآ
قَصي كذآ , ألبسي كذآ .. يبيهآ نسَخه من وَحده ثانيه بالرُغم زَوجته أحلى مَنهآ بأشَواط لكن الصَوره الذهنيه إللي عالقه براسه صَعبه تُزال , لذلك الحريم يخافون من صاحب التجربه الأولى وَ خاصه إللي مُتعب وَ غير مُنتبه لتصرفاته
[ خَوفتكم صَح !! … بصراحه شيء يَخوف حتى أنا أخاف أني أطَيح بَواحد هالشَكل ]
الشُهرة ،’
دايم الناس المُسلط عليهم الأضواء يَكونون جَميلين مين مآكان
سَواء سياسيين أو لاعبين كُره , أو أعلاميين أو حتى لو كانوآ نجوم يوتيوب أو أنستغرام
نلقى كثير تقول أنا أشَبه فلانه بالرُغم هي أحلى من فلآنه
أنتوا خلوكم مَعي أول مايُعرض مُسلسل جَديد
بتقولون بسم الله مالقوآ غير هالبَطله وَ البطل فيه أحلى ليتهم جابوا فلَان أو علآن
بينمآ مُجرد ما تَوصلين الحلقه 15 تَكتشفين نفسك مُعجبه بأشكالهم
وَتشوفينهم حَلوين , خاصه المُراهقين يَصابون بهالحاله
زَي لمآ أشتهرت بيرين سات وَ توبآ وَ هازال كايا
مافي أحد شَفته إلا شبه نَفسه بَوحده فيهم , إللي تَقولي شعري زَي توبا
وَ إللي تقول طولها زي بيرين سات وَ إللي تقول إنهآ دغبوجه مثل هازال كايا
المُهم أنهم شبهوا نفسهم , حتى تصفيفات شعورهم وَ ملابسهم
صاروآ يحاولون يتشبهون بهم , بالرُغم قبل كان للدَفاشه عَنوان
فالشَهره لها تأثير إننا نَشوف أشخاص مُعينين حَلوين أو لأ
حتى الشَخصيه لما تَكون طيبه نَشوفهآ حلوه , وَ الشرير نَشوفه كريه
حتى لو مَثل مسلسل ثاني إنه طَيب , خلاص مرات يَعلق بالقلب إنه كَريه
تأثير الأعلام وَ المُحيطين بك ،’
الأعلام يأثر , مَين كان قبل ميريام فارس وَ شاكيرا يتباهى بالشعر الكيرلي
خاصه بالخليج !! بلبنان وَ الشام من يَوم يَومهم يَحبون الشعر المُجعد
بس حنا قَطعياً , عُقبها صاروا البنات فخورات بالكيرلي وَ يحبونه وَ يعشقونه
مَين قبل الإعلام كان يَحب المؤخرات إلا بَعد جينيفر لوبيز وَ كيم كاردشيان
صاروا الناس ينفخون , محداً صار راضي حتى إللي عَنده صآر يحقن
حتى حليمه بولند صارت تلبس الأسفنجه , بالرُغم كان عندنا عيب الوَحده تروح تشتري أسفنج لمؤخرتهآ أو ترززها بَوجيه العآلم ، حتى بيونسيه بأحد الحفلات طارت أسفنجتهآ لوووووووووول
مرات الأعلام يروج للشعر الأشقر وَ خلى الناس كلهم يصبغون زيتي وَ يحت شَعرهم
وَ مرات يروج للحواجب الرفيعه وَ مرات لحواجب الشَنب وَ مرات للصدر الكبيره وَ مرات …. إلخ إلخ
تَحسبون هالترويج أعتباطي ؟!
هذا مَدروس تجاره بَحته , مافيا للأناقه فَعليه تَديرها مافيات كبيره غَرضهآ تجاري
يخَلون الأحمر هالشَهر مَوضه وَ الشهر الجاي مَب مَوضه
يَخلونك هالسنه تنفخ صَدرك لمقاس سي وَ السنه الجآيه تشيل الحَشوه
وَ إن شاء الله بتكلم عن مافيا الأناقه بَتدوينات أخرى
لكن للمَعلوميه كل دَور الأزياء تخضع لها لمآفيا وَ يتم الأتفاق عديزاينات مُعينه تُطرح بالأسواق
طبعاً مو المَقصد مافيا وَ أسلحه إنمآ مُنظمه
أتمنى أكَون خفيفه على قَلوبكم
وَ أتمنى الكل يَفهم صَح , وَ أنا ما ذكرت إلا أمثله وَ لا المَوضوع مُتشعب وَ كبير
وَ لا ناويه أصَيبكم بالمَلل , وَ لكن الإنسان من المَفترض يَتذوق كلآمه قبل لا يَنطقه على الآخرين
هل راح يصاب بالأذى إذا ما أحد نطق عليه نفس كلامه ؟!
إذا كان الإنسان يَنطق بما يَجهل وَ بدون حسيب أو رقيب
وَ مجرد بربره عالفاضي وَ المليان , ماراح يَختلف عن البهايم
وَ فيه شيء أنا مؤمنه به , إللي مايَشهد لأحد بالجَمال هُو الإنسان البَشع وَ المشوه نفسياً
ماعَمري شَفت جَميله تعيب أحد , لكن 80 % من قليلات الحَظ بالجمال
هُم إللي يَعيبون الناس كأنه بأنتقاص الأخرين كَمال لهم
دايم تقولين لهآ فلانه حلوه تَقولك بَس فيه أحلى ..
أو مُو مرررررررررره , أو ويييييييييييييين , أو لا تبالغين
أو نفس الكلام إللي طَرحته فَوق بخصوص ميجن فوَكس ..
وَ بسبسات الحريم إللي ما تَخلص
دُمتم بَحب
مُلاحظة / هذه التَدوينه تَم نشرهآ سابقاً بتاريخ 03-10-2013
يَ جمالك انتي وجمممممممممممممممممممممممممممممممال روحك فعلاً كلام من واقع للاسف
شكراً لك يسعدك الباري حبيبتي
ياجمالك يا ارتوس أهنيك على رجاحة عقلك
وكلماتك وبساطة امثالك
خليتني اكتشف شغلات إيجابيىة فيني
لكن كنت احطم نفسي كثيييييير
كل الشكر لقلبك
متابعة جيدة لكِ .
كللاااام بالصميم الناس اذواقهم مختلفه مو ضرؤري اللي يعجبني يعجب غيري
حَبيبتي سَوسو
وفتحت اللاب توب لعيونك و لعيون مدونتك الجميلة ..
.
.
مع اني قرأتها قبل لكن رجعت اقرأها ..
.
عجبتني جزئية القياسات الجمالية ..
وزي ماقلتي كل واحد يتذوق كلامه قبل لا ينطقه هنا مربط الفرس ..
ياعَيني .. نَورتيني يوم شفت أسَمك أبتسمت
حَسيت بالحَنين لَوقت سابق ..
وَ أكيد كل شَخص لو حط نفسه مكان هالشَخص لتجنبنا الكَثير بهالحياه من الهَموم وَ المشاكل
كلامك جمييييل تدوينتك قد قريتها بس ارجع اقراه .. وكل مااقرا جزئية يذكرني اقول ايييه هذي تقريبا نفس فلانه ليت تقرا هالكلام عفكره انا احب الحرية الشخصيه يعني مهما كان احب امشي على مزاجي ومااحب التحكم بس مشكله اللي لازم يفرض رايه وخصوصا عن الاظافر بغض النظر عن الجمال .. ومره وريت وحده ماهلاغا جابري اكيد تعرفينها وقد فازت اظن بملكة جمال العالم وقالت وععع مو حلوة ومدري وش بحاول افهمها بقول وجهة نظري ماتخلي مجال قلت بخاطري انقعي بتفكيرك احسن ياكثر مانواجهه هالعينات .. تسلم يدك
ماهلاغا حَلوه بالتأكيد , و بالنهايه حتى لو ماتعجبنا ماتَوصل لمرحلة الوَع ..
أحترامي لَفكرك وَ إحترامك للحريه الشَخصيه ..
صحيح،
خصوصا لما قلتِ الإنسان يميل لنقيضة،
ويغيير معاييره الخَاصه إتجاه الجمَال عشان عيب فيه
مثل وحدة متعقده من شكل أسنانها، لكن تلاقينها تمدح
جمال بنت، عشَان أن اسنانها مرتبه!
مع أن هي جمميله و اسنانها عَاديه لكن هي متعقده
فَ ألغت جمالها و تعتقد أن غيرها أجمل عشان الأسنان.
هي طبيعة بالبشر إلا مارحم الله،*الطمع *،
يبي نقطة الخير اللي عند غيره مقابل يضحي بكل خيراته.
أحيان هالطمع يكون من صَالحه لأنه بيسعى للأفضل
وأحيان هالطمع ينقلب ضدّه،
خلنا واقعيين، لو وحده تعَاني من صغر شفايفها
تتمنى يكونون ممتلين أكثر
و نفختهم ممكن يكون شكلها شاذ ،
الله يخلق الإنسان بأحسن تقويم
والجمَال بإعتقادي المحافظه والعنَايه.
شاكره لك نَقلك نَظرتك وَ فكرك
مٌشاركتكم تُثري المَقاله , نورتيني
الكلام سليم مية بابالمية بس أتوقع طبع المرأة له دور في الانتقاد وفي انها تطلع عيوب في الشي
شخصيا الناس اللي يقولوا ووع أو بنتقدون الناس بتجريح أو تعييب في الشكل أحس عندهم عقد نفسية وبالنسبة لمهلاقا ما أدري أنا عارفة انها جميلة جدا بس فيها شي مو مريح تحسيها صناعية أكثر من إنها طبيعية بعض اﻷحيا أشك انها تتنفس كأنها قالب بلاستيكي أو عروسة باربي
أنا مو من متذوقين جمال مهالاقا لكن مٌستحيل اقول عَنهآ بشعه أو غير جَميله
مُمكن أقول جَميله بس مو ذوقي او شكلها حلو بس صناعي
اننا نَعيب شيء مو مشكله بس مش عطول , فيه ناس الكلمه الحلوه وَ المدحه ماتطلع منهم فهذي مٌشكله ذاتيه بأرواحهم
يسلم بؤك .. يا في قلبي كمية غيظ من هالحريم! ولا وحدة عندهم حلوة كل هالجميلات قبيحات بعيونهم وهي ليتها بس تلفت ع المراية وتطلع لي مقاييس الجمال اللي عندها، مو استنقاص فيها والله بس ما فيه مقارنة بين الثنتين وفي هالحالة تلقائياً اعمل مقارنة غريبة اعتبر نفسي رجال واختار
هههههههههه ضَحكني رَدك
يا زَينك .. قتلتني كَلمة غيظ , أجدتي التَعبير
ذكرتيني بوحده كنا بالمدرسه وصديقتي لابسه سلسال قلب قالت لها وحده من البنات كيوت ساسالك مره ناعم وكذا
ردت وحده ثالثه قالت عندي احسن منه !! ؟
طبعا حنا وجيهنا تلونت عاد ردت صديقتي بشري امك عاد انفقعت ضحك
النوعيات هاذي هي اللي اذا مدحتي شي تستنقصينها
ومره كذا مدحت وحده يوجهها انا نيتي ازيدها ثقه بنفسها وهي بالحقيقه حلوه
المهم قالت وحده من الجالسات معناانتي احلى منها قلت ومن قال اني قاعده اقارن ولا عشان مدحتها راح تكون احلى مني
ولو كانت مافيها شي
هالشخصيات يتبلد لسانك عندها…
يا حَلو سَوالفك ..
فعلاً شيء عَجيب , كثير تعجبنا أشكال ناس هم أقل منا جَمال بس يعجبنا شَكلهم كذا ذوقنا
وَ مرات أروح عند ناس فرضاً مغيرين أثاث بيتهم وَ ذوقهم مو ذوقي وَ لا أنا بشتري مَثلهم
بس مايمنع أقولهم عالبركة أو التجَديد حلو , أو الغرفة حَلوه تفتح النفس ..
حتى لو ماكانت ذاك الزَود , لكن عادي وَش ينقص فَيني ؟! لا شيء
تحمست بالرد ولا شكرتك بصراحه مدونك جميله وبكل شي تنزلينه باالانستا وتدويناتك دائما رائعه
وجد انتي شخص صعب يلقى مثل صدقه وصراحته
اني رائعه دوما وابداً…..
خذي راحتك .. ردك أكبر شَكر
من جد حبيت الكلام اللي فوق كلام مو عادي كلام من القلب للقلب احس إني لازم ارجع أتفهم اللي حواليني أو المجتمع بشكل عام ويكون عندي بعد نظر عموما حبيت فلسفتك جدا رائعة موفقه حبيبتي
شرفتيني , وَ إن شاء الله دوم أكون عند حسن الظن
مبروك على المدونة الجديدة..
بصراحة انا عانيت من هالشي طول حياتي انا سمراء و شعري كيرلي عكس اخواتي… ف كان دايما يقارنوا بيني و بينهم.. كبرت و فيني عقدة صرت اشوف نفسي مب حلوة و محد يقترب مني… و هالشي خلاني التجي اني اثقف نفسي,, على الاقل اكون ذكية.. بس لما خلصت الدراستة صرت انتبه لنفسي و زادث ثقتي بنفسي.. يمكن ما عندي مواصفات اخواتي بس فيني ملامح حلوة.. فصرت اتعلم المكياج و ابرز ملامحي.. وصرت اكثر وحدة من اخواتي انيقة في اللبس… لحد ما الكل صار يقول اني صرت حلوة و احلويت و انيقة.. انا ما سويت هالشي للناس سويته لنفسي لاني احب اكون في عيوني حلوة و احب نفسي و هالشي ما غلط..
ادري الناس اذواق بس كل شخص فيه شي حلو اذا ما عيونه انفه او شفايفه او طبيعة بشرته او شعره… كل شخص لازم يدور الجمال اللي بداخله.. و اللي يشوف الناس مب حلوين هذا مشوه من الداخل للاسف..
سوري طولت بس بغيت اكتبلك تجربتي مع كلام الناس.. غيري يمكن بيتعقد اكثر و تصيرله امراض نفسية و الغيرة بتلعب فيه… بس انا الحمدلله الكلام اثر فيني فترة و الحين اذا حد قالي شي اقوله السمار الحين يشتروه بفلوس و الكيرلي كل وحدة تدفع عشان تسوي مثله…
صَراحه مُشكلة , وَ كل نَوع من الجَمال مَطلوب
وَ أحييك على تعزيز ثقتك بَذاتك وَ شيء أضاف لَك إنك طورتي نَفسك ثقافياً
حتى لو كنتِ ملكة جمال العالم , الثقافة تَزين الشَخص من الخارج
كﻻم رائع جدا بس طويل اقترح عليك اﻻختصار في الكتابه
صَراحة أغلب مُتابعيني مَقترحين الإطالة ..
اول وَحده تَقول أقترح الإختصار ؟! المَدونة مافي أحد راح يَدخلها إلا إذا فاضي ..
وَ هذي تدوينة ثرثرة ليست مَقال علمي ينتظر مَنه الإختصار ..
حياك بإقتراحك , وَ لكن لو أختصرت لن تتضح الصَورة وَ جميع جوانب الإختلاف ..
وَ إللي مَل أو طويل عليه الحَكي , مُش مُضطر يقرأ
بالعكس حلاة تدوينة ارتوس انها تكن طويلة التاثير يكون اعمق انسى نفسي وانا اقرا يعجبني استرسالها في الحديث والكلام وهذا الي يميزها عن غيره وحاط لها بصمة خاصة
توسة حبيبتي يعطيكي العافية وياارييت تتكلمي عن عمليات تكبير الصدر جدا منتشرة بوقتنا الحاضر.
أنا مع الرضا عن الذات
إذا هالشيء يريح راعيته فشيء راجع لها , لكن الصدر الصغير له مُحبين وَ الكبير كذلك
فليش الواحد يغير نَفسه إذا ماعنده أي عيب , أما اللي يغيرونه لضمور أو تدلي او ترهل ما أعتقد ملامين
أهم شيء الإرتياح مع الذات
طيب يا ارتوس بسألك، أنا أحيانا اشوف نفسي جدا جميلة مع إني سمرا واحب البس الألوان المفرحة لكن اللي حوليا ولما اقرأ وكذا أن السمر مو حلوين ومدري وش، تحطمت لكن اقول في نفسي خير اتضايق انا حرة بس برضضوا ارجع زعلانة، فصرت اشوف نفسي قبيحة والبس الون الأسود ولا اغير اي شي ولا اهتم بميك اب او كريم ولا شي احسني غريبة وأكره السوق بسبة كل ما اشتري لبس أو مثلا مناكير تجي العاملة أو العامل ويقولوا لا ذا مايناسبك $_$ خير؟ ولا مثلا كريم العامل يقولي ذا بيبض احسن، من قال إني بابيض؟ فصرت خجولة خجولة اشتري اي شي واستحي اشتري وإذا اشتريت أزعل ع نفسي واستحي اقول لأمي أبي وأبي وإذا قلت تجاهلت أو عارضت، وصرت كمان لما اشوف بنت بيضة وجميلة اتحطم لكن ما اسب أو احسد صحيح أحيانا ما احس برضى عن نفسي لكن الحمدلله ربي أعطاني و رزقني بأشياء يتمنوونها غيري، أتمنى انك فهمتي وتردين علي.
ليش كَتبتي مَع إني سَمرا !! لحظي إنتِ بنفسك ظلمتي نفسك
قلتي أشوف نفسي جميلة مع إني سَمراء ؟! عمره الجمال ما أرتبط بلون أو جَنس أو عرق حطي هالشيء ببالك
بكثير من الأوقات السمار يعزز الجَمال ❤️
بالنسبة للألوان بالعَكس , الناس يسوون تان وَ يسمرون عشان يقدرون يلبسون الفَوشيا الفاقع وَ الفسفوري وَ الألوان الفَرحه
أما الأسود نظره قَديمة وَ غلط إنه يحلي اللون بالعَكس يشحب ..
بالنسبة للعمال وَ الموظفات ما عَليك , هم يبحثون عن رضا الزبون فأكيد فيه زباين جايينهم طالبين أنهم يبيضون أو غيره
حتى بأختيار لون المناكير فيه بنات يقولون نبي لون يخلي يدينا بيضاء , فَعادي ما عَليك منهم
إنتِ بنفسك تقدرين تخلين كل الأمور تصب لصالحك بقناعتك وَ إهتمامك بنفسك وَ بالعكس إزهي بنفسك
كل وحده لها حَق تفرح بما أعطاها الله , وَ مثلها مثل غيرها تكشخ وَ تلبس وَ تتأنق .. إلخ
عطاري البياض الفنانة شكران مرتجى سوي بحث عليها لو ما تَعرفينها بيضاء بيضاء
هل البياض عَطاها كَرت ؟! أبداً ..
للمعلومية انا ما البس شي الا اشوفه يتناسب مع بشرتي ولا وجسمي
مؤمنه بأن ربي العالمين خلقنا في أحسن صورة ومعايير الجمال تختلف من شخص لآخر، انا ما اشوف ابدا شخص قبيح الكل له جماله الخاص فيه الأقل جمال ولكن مافي قبيح لأن القبح قبح الأخلاق، برافو عليج لما ذكرتي الاثيوبيات لاني فعلاً اشوفهم جميلات، احتقر اللي تقعد اتقول ويع ويع واللى عاديه واللى كلها عمليات تجميل خيييييير أن شاءالله هذي هي القبيحه عندي لو أجمل انسانه، الجمال الخارجي مهم والداخلي أهم.
حبيبتي ياليت تطرحين مواضيع الثقه بالنفس والآخرين ومواضيع عن الإيجابية وكيف الواحد يتخطى الصعوبات عندي مشكله اني أخاف أواجه أي شخص غلط في حقي ما أحب الصوت العالي اتوتر لو كنت على حق
ههههههه أنا صَوتي حاد مو عالي وَقت الحق
أطير عَيون , بَجد بجد فيه ناس لدرجه قوتهم قَوه لكن أمام قوة الحق يذبلون
ما أدري هل لأحساسهم بالذنب أو خوفاً على برستيجهم يتبعزأ أمام موقفي ..
لكن طالما الشيء ما تحبينه لا تَخوضينه وَ تجنبي كل شخص ظلمك
المُجابهه مو بهالسهوله , حتى لو أنت قوي تستنزف جزء من تفكيرك وَ ووقتك و صحتك وَ راحة بالك
الأشخاص السيئين تجنبيهم فقط أكتشفت هالشيء أفضل مع الزمن , أرتقي وَ خلاك كلاس .. يقولون لك خلك سما وَ أترك القاع للقاع
إلا إذا هالظلم قائم عليك وَ مازال وَ مأثر على حياتك الشخصيه
تَقولين لهآ حَلوه
تَقولك : وَ الله ماشفتي القبيله الفلانيه بناتهم خَقه وَش ذي
تَصير جَزمه قَدآمهم
هههههههههههههه فعلا ياتوسه طفشت من كثر مااقراها بالكومنتس مصيييبه ماخذين بنفسهم مقلب!
طيب ايش الي يمنع انه يصير فيه جميلات وغير جميلات في القبيله هذي وغيرها؟ تحسسني ان الجمال محصور فيها وقبيلتها او اهلها فعلا عقول عجيبه!
تصدقين انا من محبين الصدر الصغير وصدري صغير لما اقول لوحده هالكلام تقول ووووع ولا بس تبين تبينين انه مافيك عيب؟
فعلا شي مستفز
هالتدوينه بالذات ارجع لها كل فتره وفتره واحب اقراها تخليني احب نفسي واتذوق جمالي وجمال غيري ❤❤❤ لقلبك ❤:$
تذكرت صديقتي جميله ماشاءالله لكن عندها ثقه غطت عاللي اجمل منها تشوفينها اي شي تلبسه البنات ينجنون عليها مهما كان مرات تلبس فستان سادة بس الكل يعجبه ويسألها من وين
اعطت الناس فكره عن كونها ستايل ومافي اجمل منها وبالفعل الكل ينظر لها بهالنظره ، والكل يرجع لها لو بيختار لبس ويبغى يصير ستايل
طبعا انا ماحب ارجع لاحد الا لو كنت محتاره ومشوشه جدا لاني مؤمنه ان ذوقي هو ذوقي مافي احد بيقدر يقرر عني لوول
اتمنى يصير عندي نص ثقتها
تخيلي مره ايام المدرسه سوت حركه انها طلعت التيشيرت من القميص من تحت ( مادخلته جوا التنورة) ماخلصت السنه الا ونص البنات مسوين نفسها
حتى قالت لي شوفي كيف يقلدوني ومتضايقه من هالشي تحب دايما تكون مختلفه
سوري طولت عليك بس والله الموضوع يحمس للسوالف ههههههه
الكلام خلاني ادرك تصرفات٥٠٪ من الناس اللي حولي [[اللي مايعجبهم شي ابد وكل الجمال في الدنيا تجميل وبما انو تجميل.. ففي وجهه نظرهم شين]] اعرف وحده ماتقول لي الا بالاشياء اللي مو كويسه فيني ومستحيل يوم تمدح حاجه في شكلي مثلا ..بشرتك خربت او طلع لك حبوب ..مع انو عندي مراية ومستحيل اطلع من البيت بدون ماشوف شكلي
شكررررااا …..
تدوينه جميله جميله جميله .. وفقتي فيها شكرا لك يا انيقه
أول شي حابه أهنئك على دي المدونه الرائعه اللي حبيتها كتير، وحبيت اقولك انا كنت من متابعينك ف شامواه وكنت أحب اكتر مواضيعك اللي عن البشره وكمان الطبخ لأنو اعشق الأكل.. و للآن استخدم ماسك الشاي الأخضر ههههههههه..
تاني شي.. في شي ينرفزني ف نظرة بعض الناس للجمال وهذا الشي صار معايا شخصيا و لو م كنت أثق ف نفسي كان خسرت كتير..
انا كنت مخطوبه و ب فترة خطوبتي خطبني شخص اخر، طبعا رفضناه لأنو كنت مخطوبه، قدر الله وبعد 3 سنوات اتفسخت خطبتي بعد فسخ الخطوبه ب أسبوع رجع خطبني اللي اول رفضناه.. طبعا بعد تفكير واستخاره و استشاره وافقت وكانت هنا الصدمه، بس قبل اقولك الصدمه حابه اوصف شكلي وشكل اللي صار زوجي والحمد لله..
زوجي ابيض على أحمر يعني كتيييير ابيض ماشاء الله وشعره سايح ناعم جدا وطويل يعني ف 179 تقريبا..
انا سمرا على برونز لوني طبيعي مش تان، شعري طويل ل اخر ظهري سميك وكثيف وويفي ناعم، وزني تقريبا متناسب مع طولي .. 164 طولي.. وزني 55..
المهم نجي للمصيبه :
أول م وافقت وانتشر الخبر، أغلب صحباتي تلفونات واللي جوني وكلام كبير كلهم نونه كيف توافقي الرجال ابيض وانتي سمرا، يجلس يعايرك ف لونك، نحنا نعرف الرجال، طبعا أغلب صحباتي متزوجات ، ي بنتي فككك انتي شعرك ويفي و الرجال شعره سايح، اخواته كلهم بيض وشعورهم سايحه، كلهم أطول منك ومن ذا الكلام اللي فيه كمية سخف كبيره..
طبعا انا ولا كأني اسمع، ب الرغم انو كان في شي يعورني من كلامهم لأنهم صحباتي..
لما اتزوجت تفاجأت انو زوجي جالس يقول انتي زي مواصفات البنت اللي ف خيالي وتعبت وانا انتظرك، وانو اكتر خبر فرحني فسخ خطوبتك، انا كنت ابغى بنتك ف لونك ف جسمك زي طول شعرك سبحان الله وكأنك انتي البنت اللي ف أحلامي، ليا الآن 5 سنوات متزوجه عمر زوجي م عاب شكلي ابدا ابدا ابدا رغم انو من قبايل مختلفه ولانقرب ل بعض.. وصرت كمان أم ل طفلتين الحمدلله والآن لما أحد يشوفني مع زوجي، على طول بعدها يكلموني نونه ليه م تاخذي أبر تفتيح انتبهي لنفسك زوجك ابيض، نونه ليه م تسوي كيراتين انتبهي اخواته شعورهم ناعمه ويستمر مشوار السخف و التخلف وتقيم الناس على الكيف..
اللي حبيت اوصله، انو كل بنت جميله و انو مفهوم الجمال من شخص للتاني يختلف. بس اللي يعزز دا الجمال هوا الثقه ب النفس، و الاهتمام والا كلام الناس م يقدم ولا يأخر..
أأسف على الاطاله الكلام خرج عفوي لأنو موضوعك خلاني اتكلم غصب عني..
استمري ف طرح الجمال، وأتمنى لك الأفضل دائما وابدا..
كلام روغة
وفي انتظار الحديث عن مافيا الأناقة
كلامك حلو انا فيني الملامح الاسويه عيوني شوي صغار ماتخيلين ان اقاربي الي حولي كيف محقرين فيني بطريقه غير مباشره بنت خالي نفسي ويحقرون ويحشون في خلقتهاا بعدين مع سواللف وضحك يقولون انتي تشبهيلها وملامح شغاله اذا شافو ا احد اوفنانه كذا والمشكله زي ماقلتي شيون
مافي أحد منا أختار شكله , بالعكس ممكن يكون شكلك ستايل وَ مميز مع المَوضه
بس لو أستغليتيه صَح , يوووووه أنا أحب الأشكال اللاتينيه , ممكن يكون شكلك لاتيني وَ حتى لو صار شكلك كوري
الكل الحين ميتين بالكوريين , كل الشعوب فيها حلآ بس اللي عندنا مُعقدين وَ سطحيين
وَ بصراحه لو قصدهم يعيبون عليك عيب عليهم هذا إسمه تشمت وَ تقدرين تصارحينهم
وَ تقولين لهم هالأسلوب بشع أو مايعجبني وَ إنه حتى أنتم فيكم عيوب أقدر أصارحكم بها وَ عشانكم متشابهين مو شايفين عيبكم
وَ لأني مُختلفه عنكم حسيتوا بالفروقات , وَ لا كل واحد حامل عيبه ترى
فعلا , كلامك صحيح و ما انكر اني لما كنت اصغر بالسن , كنت انتقاديه بشكل لكل وحدة جميله و ادور العيوب فيها و مستحيل اقول عنها جميله ابدن ابدن ._. !
طبعا كنت محاطه بعاهات من ناس اكبر مني و لما ابتعدت عنهم و اختفى تاثيرهم من حياتي , تقولبت صح و بدات تظهر شخصيتي الفعليه و قمت اتصرف بعفوية و صرت احب ارفع معنويات العالم حوليني تخيلي ! عجبني شيء بقول ما شاء الله و بصرح فيه .-.
هذاك اليوم مرت من قدامي بنت بالجامعة شعرها جدا جميل , و قلت لها مرا حبيت شعرك ! المهم ملامح البنت راحت و ضحكت ضحكة وحدة متفاجاه و قالت لي ثانكيو يو ميد ماي داي :””””””
حبيت صراحتك ماشاء الله عليك , مافيها شيء الواحد يكون سلبي ثماً يتغير وَ يصرح بهالشيء
أحييك أحييك ..
وَ تصريحك للشخص بشيء فَيه وَ يستحقه ما يُعتبر إنتقاص مَنك أبداً
إنما الجمال بَحد ذاته .. نَورتيني
Wow موضوع عندي الكثير من الفضفضه..
اولا انا اعترف اني بشريه واغار رغم الغيره مالها علاقه بالطيبه يعني غيرتي بيني وبين نفسي ماتوذي احد رغم يوم ماحس بشعورالغيره من احد اتضايق من نفسي لاني ماحب اظلم نفسي واعاملها كدرجه ثانيه انا مرا احب نفسي بدون انانيه والحسد يختلف طبعا ماتمنى الشر لها او افرح بتعاستها
وماحب اجرح احد لاي سبب حتى اللي يجرحوني ماقدر اسبهم واشتمهم لاني احس بقذاره في فمي يمكن اسب السفاحين الاشرار لكن سب وستم وبذاءة كلام على ااشياء
كلنا لنا اراء ونظره مختلفه ليش
غير اش الشيء اللي يستحق انك تنامين في الليل مرتاحه والشخص اللي جرحتيه سهران يفكر بكلامك الجارح والمسلم مدري المؤمن ليس بالفاحش البذيء
وشيء استغرب الناس تتهاون فيه اللعن الاشخاص اللعانون لايحق لهم يوم القيامه الشفاعه لغيرهم يعني استهانه باشياء صغيره وسهله كله لسان ليش مانتحكم فيه
من المواقف اللي اتذكرها :
كنت اتابع فلم لبيباشاباسو الممثله الهنديه وانا من المعجبين بجمالها وصحبتي كانت معايا قالتلي حلوه بس وسخه ماتتنظف انا بصراحه انصدمت ماعرفت اش ارد
لاني انا سمرا اقرب للحنطيه يعني السمار وساخه الناس اللي ركبهم واكواعهم سودا من الملانيين مو من قل النظافه
يعجبني الجمال الايبوي والقوقازي والافريقي لكن اللي معجبين بالاسييويبن ياحرام يجيهم سب وتحطيم كيف تفرقون بينهم كانها شغاله
مدري ليش البعض مايشوف الجمال الغريب المميز جمال حتى اللي يقولون عليهم وع على اقلها قولوا مملوحه
اختلف معاكي وان عمليات التجميل تخلق فرق خاصة في كوريا والصين المساله ان سوء الخلق والتربيه مالها علاقه بالشكل سببها
قلة دين قاة اخلاق ماتربوا سمعوا الالفاظ في بيئتهم وتعودوا عليها عندهم روح شريره يمكن تعرضوا لضغوط من المقارنات تعرفين طبع السعوديين وحرام هصا الطبع عالمي
البعض مايعرف يرفع من قدر شخص ويمدحه بدون مابنزل من قدر شخص اخر رغم الشخص الاخر ماله علاقه في الموضوع
شكرا” على الموضوع كان عنجي كلام كثير بقوله لكن نسيت اش بقول المهم ان حتى الغير جميله ممكن تكون جميله بروحها وبكلامها واذا ماقدرت تكف لسانها منها اجر لها ومنها ماتنحط في موقف محرج انا ماقصد ان القبيحين مايحق لهم يعطون رايهم في الجمال لكن اللباقه والادب وعدم السب هي انسب طريقه لاي شخص بيعطي رايه في اي موضوع وخاصة في المواضيع اللي تكون الاراء فيها نسبيه نسبه للشخص وذوقه
شكرا” مدونتك جميله♡♡
يقولون لك الغيره أحرقت دَيره , كلنا نَبي نكون أفضل بالتأكيد لكن لازم الواحد يعود النفس على الفضيله ..
وَ اللي ما يَغار كذاب بيكون شخص ما عَنده طَموح , لكن فيه غيره طبيعيه وَ غير مَرضيه وَ أنا أشوف أنك إنسانه مُحترمه وَ مهذبه
عالأقل ما تأذين أحد , يعني على قَولتك شيء بداخلك ..
بالنسبه لتصرف صَديقتك رُبما ما تَقصد السمر , يمكن تقصد الفنانه بحد ذاتها ..
فيه حتى فنانات بيض بس شكلهم جداً قذر , لاحظي الفنانات الإنجليزيات , حتى بعض الفنانين يشتكون من قذارتهم بَموقع التصوير ..
عمره ما أرتبطت النظافه بأبيض وَ أسمر , النظافه هذا شيء شخصي حتى غير مَحصور ببلد
واضح إن بقلبك كَثير من الكلام وَ حسيتك زَعلانه شَوي من حال المُجتمع
بالنهايه أنتِ لا تكدرين خاطرك , صَدقيني كل شخص وقح وَ جرح شخص بيجي من يجرحه بَجرح أكبر
نَورتيني وَ شاكرة لك هالإضافة
صادقة في انستقرام شفت هالعينات بكثرة زي إلى يقولون حظ القبايح بالسما لايح حمدالله بس يعني انا جميلة بس حظي شين ههههههههههه يقولونها أكثر شي لما وحده عادية بنظرهم تتزوج واحد حلو..
ههههههه صَدقتي ..
يومياً نشوف هالعبارة تتَكرر
شاكرة لك ارتوس على هالمقال الجميل …مع اني اقرا لك كثير لكن هذا ماقريته من قبل …انتي رائعه بحق واسلوبك مقنع
وانا من الناس الي استمتع بقراءة تدويناتك
ارتوس طلب …كيف اعيد الثقه بعدما فقدتها ..واكيد بعد الزواج ..لان المرأة تتغير بعد الزواج
وكيف اتحمس للعنايه …كسوله درجه اولى مع انو لو اهتميت يبين فيني اني متغيره
غير الجمال….مثلا الهوايات …انا رسامه لكن مش محترفه وارسم اذا بغيت بس …لكن يجي النقد لما يشوفوا رسوماتي …يعني ..فيها شي غلط …يبغالك تتدربين ….
طيب ليش ماتقولوا حلوه بدون نقد يجرح …انا مثلا انسانه اعرف اغلاطي وما اطور من نفسي الا بس ابي اعدل اغلاطي واكون راضيه عن ذاتي مو عشان ارضيكم …
اعذريني طلباتي كثير..
لكن ساضيف لمقالك الجميل واقع اعيشه …
اي وحده من برا جماعتك حلوه انتي لا ..يعني لو تزوج حد من برا قالوا زوجته جميله وحلوه ووو ..مع ان الواقع غير مايقولون
لكن انتي بنت حمولتهم …يكسرونك ومايمدحون
يعني مايمنع تمدحين احد…انا من الناس الي اذا شفت شي يعجبني امدحه بانصاف
ليش المجامله والكذب …خليكم واقعيين ومنصفين ..
.واذا منتي جميله …في اشيا اخرى تبرز جمالك مثل الادب والخلق والاناقه بالمظهر والمعامله الجميله لمن حولك تجعلك جذابه وجميله في اعين الناس …
وشكرا لك مره اخرى
خلاص ..اسحب طلبي …لقيت جواب سؤالي في مدونتك للبنت الي رديتي عليها من الاستقرام
صادقه …التسويف والكسل هو السبب …خلاص ستوب …بحاول اتغلب عليه واتعود على العنايه
شكرا ارتوس
احب فلسفتك او مثل ماتقولين ثرثرتك
حبيت مقاييس الجمال .. اول مره اركز على نيفرتيتي
اول كنت اشوفها قبيحه لكن جد طلعت مقاييس مثاليه …لكن البعض يقولون انهم معدلين على التمثال ولا الهي موش بهالمثاليه
شكرا ارتوس من كل قلبي
تدرين إني قاعده اكتب سيرة ذاتيه لملفي واشوف نفسي بكم وحده من عباراتك واخذهم؟سواء بهالبوست او حق السنة الجديدة او الشطرنج :” أنتي فعلا إنسانة مؤثرة -ثقافة الكتابة منعدمة حالياَ :P-
الجمال شي نسبي ومو لازم الكل يعجب بالكل
كل الاشياء جميله باختلاف وجهات النظر …
انا من الناس اللي مستحيل انتقد حتى لو شي مو عاجبني
لانو احس الناس تسال مو عشان تبغى رايك بس تبغى دعم نفسي …
الا اخواتي والناس القريبين مني عادي نتشارك في الراي ونختار الافضل لبعض …
بس كلو كوم والناس اللي تقول يع على بنت حلوه منجد استغرب
حتى لو جمالها مايناسبك بس تفضل حلوه مو يع …
والناس اللي لو وريتيهم شخص جميل يقولو بس ليش لازم نطلع شي مو حلو فيه الا عشان نحس نفسنا احسن …
اخيرا احيانا اكون اقرا قصه ووحده كاتبه انا جميله تلقي الردود كلها قالبه عليها منجد شي يحير يعني ليش افترضتي انها مو حلوه طيب على افتراض انها شخص مو جميل خليها اقل شي تقرا مدح اذا هيا ماتسمعو يعني حتى في عالمها الوهمي مناقرينها…
شكرااااااا لك من الأعماق على كل كلمه
اهلا بالحلوه * *
يَ ختي احبك والله 3> عجزت بَطلع من المدونة :)) كل تدوينة تسحبني من جهه :() ,,
تعجبني طريقة تفكيرك و تعبيرك :)) واتفق مع بشدُه حول الفكرة الاولى بالموضوع وهي ان بعض الناس تفكر” الناس الجميلة مزيفة “:/
تعبت اهوش على الناس الي تفكر كذا :/ وبالنسبة لي هالناس حقيقة ماتشوف الجمال مع الاسف 🙁 وَ الي مادري كيف عاشت بدون الجمال 🙂
طولت * *
شكرا على كل تدونة وكل حرف تكتبينه لنا الله يسعدك دنيا واخره 3>3> .
تدوينتك ذي اشبه بسوالف مع صديقه وفضفضه عجيبه من المجتمع العجيب وبصراحه كثير من كلامك يمثل الواقع للاسف! عاد انا ديني ودين جملة”فيه اجمل منها” طيب انا ماقلت هي جميلة الكون! انا قلت انها جمليه! والله يعني عقليات تحسينها محصوره بين جدران اعوذ بالله! لا وغير كذا الفئه اللي تلاقينهم من النوع اللي يعيبون على كل شي والا تدور عيب فاللي قدامها! ولو تبين احلف لك انها بقراره نفسها عاجبتها حلفت، بس يحسون بنقص ذاتي لما يمدحون شخص او يقولون عنه جميل! انا قبل فتره تكونت عندي قناعه اسمها “الكل جميل” بصراحه كل شخص او كل وحده ولها جمالها حتى لو كانت مب بالمستوى المعياري او ابمقايس الهندسيه الا وما تلقين فيها شي حلو! صرت اتفكر بس وصدق لما دققت فالعالم وشفت اشكالهم ، ملامحهم طبعا مع دمج اسلوبهم وعفويتهم الا وماتلقين فيهم شي حلو! اللي ربي رازقه بجمال يمكن يكون اسلوبه منفر بينما العادي تلقينه لطيف ومحبوب فهالشي يعطي لمسه على جماله الخارجي! حبيبتي ارتوسه الواحد مايمل منك ولا من كلامك:( الله يخليك بالقرب! وعجبتني حركة الدش بين كل كم موضوع بجي هنل وبقرأ .. الله يحفظك يارب
أسَعدت بوجودك شَوفي يقولون الذوق ليس أن تحب شيئاً جميلاً فقط , الذوق أن لا تستقبح ما يُحبه الأخرون ..
وَ حنا صراحة ثقافة الإستقباح مَنتشرة , سواء أعجبتي بآدمية وَ بجمالها , أو طريقة لبسها
أو حتى أكله أعجبتك إلا مَا يجيك شَخص يناقضك وَ كأننا بحرب عالمية أو بُمسابقة ..
وَ تفكرك برأيي مَعناته وَ صلتي لدرجة من الوَعي وَ التصالح الذاتي وَ عندك ثقة بنفسك
ما يَحتاج تنتقصين الآخرين للإرتقاء بذاتك ..
نَورتيني
تدوينه رائعة قاريتها من أيام شمواه بس هذي يمكن رابع مرة اقرها عاجبتني مرة وكل مرة اقراها استفيد..
بخصوص البياض والسمار انا من صغري كنت أحب البياض وأشوفه رمز للجمال والسمار العكس والصراحة فيه أكثر من سبب غير الجينات ..
مثلا كنا نشوف أفلام ديزيني وسندريلا والأميرات ذولي كلهم تقريبا بييض وكنا خاقين معهم وامي اذا قرتلي قصة قبل م انام وتبي توصف لي جمال البنت تقول لي هي بيييييييضاء ويوم كبرت شوي قريت معلومة عن الحور العين اللي دايم يقولون لنا عن جمالهم انك تشوفين مخ ساقيها من بياضها .. مدري عن صحة هالمعلومة بس بعد كل هالمؤثرات أحس شي طبيعي اني انجذب للون الأبيض وللحين احس بانجذاب له بس اكيد برضو احب التان والسمار أحيانا .. مرة جت مرة عمي بيتنا وطلبت باودر من عندي ع اساس تستخدمها وأعطيتها بودرتي كان لونها ساند على ترابي على تان المهم انها نفس لوني اول م شافتها بغت تنجلط وصرخت علي قالت وش ذااااا اللووون! ليه بودرة غامقة اشتري ابيييض قلتلها بس انا مو بيضا بس م رضت تقتنع وللأسف هي اسمر مني بواجد بس الناس اللي كذا مقتنعين بأفكارهم حتى لو اقنعتيهم ان لونهم حلو راسهم يابس .. نص صديقاتي وقرايبي سمر واشوف لونهم حلو بس مو عاجبهم يبون البياض .. طولت بالحكي بس فعلا موضوع يستحق النقاش
هذي التدوينة حاطتها انا في المفضلة و ارجع اقراها من فتره لفتره, تعطيني ثقه في جمالي و انو انا مو لازم اكون اشبه شخص مشهور عشان اصير جميله, اشكرك من كل قلبي و تدويناتك اللي في قسم الثرثره اشوفها شيئ يفوق انو مجرد ثرثره بالنسبه لي ❤ .
جزاج الله الف الف خييييييير ❤️❤️
كلامك فكرك ثقافتك رؤيتك أعجبتني ، وحسيت أنك قريبة مني ، ماأقدر أقول الا الله يسعدك دنيا وآخره ، على كل ماتقدمينه ، استمري .
ما شاءالله كلامك لذيذ ينشرب شرب 🙂
كتاباتك ممنطقة وعقلانية وجذابة .. بصمتك مميزة ما شاء الله … مشرع كاتبة ناجحة 🙂
وفيه عامل مهم اللي هو الغيرة اللي ذابحة نص البنات والمصيبة تلقينها في الشباب بعد هههههه
يعني لما تمدحين احد في شكله او شخصيته ينطون فيك ويستنقصونه ،، او الكلمة اللي تقتلني انا احلى منه !!! يعني لما امدح احد نقص شيء منك ؟! هذا دليل على انعدام الثقة في ذاتك …
لا و فيه عقليات تافهة تارسة مجتمعنا تجيب لي الجلطة مستحيل تمدح أحد او يطلع منها كلمة حلوة تقولك ليه أقولها شنطتها او جزمتها حلوة تحسب نفسي فيها او ابيها تجيب لي مثلها !!!!!!! والا تبيني اقولها شكلهاحلو تشوف نفسها علينا ،، بالله هذي الفئة وش الحل معهايعني وش فيها لما ترفعين معنويات اللي حولك شيء جميل انك تمدحين حتى على شيء تافه .. واللي يرفع الضغط انها ما تكف لسانها لو شافت شيء ما دخل مزاجها ..
عموما أنا الي يدخل مزاجي ويجذبني للبنات موب شكلها ولا لونها ولا ملامحها .. الي يجذبني فعلا اهتمامها وثقتها واعتدادها بنفسها .. وياما فيه بمجتمعي بنات ما شاء الله يطيحون الطير من السماء بس ما يجذبوني ابدا ولا اقدر اتذكر لهم لوك او لبس لان اهتمامهم زيرو مع الاسف … والي يجلطني فعلا البنات اللي شابة وصغيرة بس ماتهتم يعني كثير بنات بالجامعة ما تمشط شعرها و تلبس اي لبس على السريع ووجهها أشهب مافيه ولا لون حتى حواجب ماتكلف نفسها ترتبهم وجزاها الله خير اذا غسلت وجهها وفرشت اسنانها !!!
اذا مالبستي واستمتعتي بشبابك متى ناوية تهتمين بنفسك ؟؟ لما تطيح سنونك مثلاااا ..!
وتدوينة جميلة ومدونتك تسبب الادمان 🙂
توني أتعرف على المدونة و توني اقرأ ما فيها ،،، شكرًا لكل يلي تقدمينه . عندي تعليق بسيط على مسالة الجمال و القبح ! انا مثلا بشوف حالي جميلة رغم كثير من الناس يشوفون جمالي مش لين هناك ! و اعتقد ان هذا هو الأشكال ! في نظري بعشق عشق المرأة يلي ممكن ما تكون بيرفكت بس بتحس في داخلها بالجمال ! ما في اجمل من ابتسامة حرمة حتى لو شافها بعض قليلين الوعي شينة ! حتى لو كانت مثل ما يقول بعض السذج خاله !!!! بعتقد ما في اجمل من خلقت الله و ما في اجمل من امرأة تصحى الصبح. تقعد على مرايتها تتجمَّل ??❤️ بشوف ان الجمال موجود في الجسم و فيها داخلنا ! سمعت مقولة رائعة جدا ” beautiful is some thing inside you no one can take it away from you ” الجمال طاقة في داخل كل منا من رب جميل ! اذا رح نعتمد على معايير فهي نسبية و هي من موسم لموسم تتغير !!! جمال الله دايم و حطه في خلقه شي ثابت حبيه ! بعتقد سر الجمال في قبول الذات و تصيد الجمال حوالينج في زهرة في ضحكة طفل في موسيقى تحبيها في لون مانكير جميل ! بتمنى الناس توعى لمعنى الجمال ! تتثقف فيه اكثر ! للجمال ثقافة ايضا ???
كفيتي ووفيتي ارتوس، بججججججججججججد العاديات أو عديمات الثقة بالنفس حتى لو هم حلوات داااايم يهمشون بالجميلات او اللي حولهم وتلاقينهم حتى لو احد مدحك بمجلس، تقوم هي على طول تعلق بتعليق سلبي او تلزم الصمت علامة انه موب عاجبها، زي مثلا هيفاء وهبي واشواريا راي وغيرهم اذا مدحتهم قالوا لك سمرا وهي اصلا سمرا وركبها سود بالثمانينات ووجهها بدون مكياج فيه ومالا فيه…….ألخ بالرغم من أنها ما حيضرها شيء لو قالت وجهها يفتح النفس أو سكتت على الأقل بدل التعييب بالناس، وفعلا وحده من بنات خوالي جميـــــــــــلة جدا بس انها سمرا يا الله كلهم تحزن مها تضيق الصدر لون بشرتها فيه وما لافيه بس لو انها بيضا بس لو انها ما اعرف ايش! تركوا جمال شعرها وطول وجسمها ووجهها اللي مشاء الله يجيب العافية! بعد لاحظت مثلا وحدة من صديقاتي اخوها(خلق الله حسن) واسمر غاااامق جدا مع هذا مقطعين عمرهم يدورون جميلة الجميلات اللي تكون بيضا بياض صارخ ووجهها مدري شلون وطولها مدري وش قايل وجسمها مدري كيف مع انه اخوها (لا تعليق) ومو بس هذا أنا اكره اسلوب التعييب اللي مثلا احد يمدحك وتجيك تنط تقول لااا فلانه تعتبر صفرا ما تعتبر بيضا لاااا فلانه لو تسمن شوي تطلع زينه لاااا فلانه لو تصبغ شعرها تغير حواجبها بلا بلا بلا….
عموما أنا بجججد نادرا ما اشوف القبح في الناس وخصوصا في البنات دايم اقول لو يعرفون لنفسهم يبرزون طبعا اتكلم عن اغلب المحيط من حولي
يا حَلوك وَ يازين رَدك
لأن داخلك مُتصالح وَ مَقدر إن الناس ما خَلقوا أنفسهم وَ لا لهم يد بالهيئة إللي خلقوا لها
علينا مِن النظافة و الهندمة و الترتيب وَ الذوق العام وَ التعامل الحَسن ، وَ الباقي خلقة ربك
نَورتيني
ليش الحور العين بيض لانه شي جميل وفاتن
تراي مو بيضاء
بس صايره انهبل على البياض
كل ما كبرت نضج تذوقي
وانا معك فيه اثيوبيات يااااه جميلات
بس انا لاحظت في وقتنا العنايه والهندمه صار من الجمال والجاذبيه
مثله مثل الروح الجميله لما تجذبك باي ميزه اعطاها ربي سواء اسلوب حركات لسان لبق
فيه حاجه تذكرتها
هل انتي يا مأرتسه شخصيه مغناطيسيه في عايلتكم مجرد فضول
الكل يهتم فيك وبحضورك ويسألون عنك ويهتمون بارائك يعني عايلتك ما اقصد اهل بيتكم لا قصدي محيطك العائلي
اهتمام خلف الكواليس
لاني شفت شخصيات كذا قليله قليله مره اغبطهم على اهتمام الخلق فيهم
حتى لو ما يوضحون بس تعبيراتهم تفضحهم ويحاولون يخفون مشاعرهم لهم مركز بسبب مزايا تميزو بها نمبر ون الجمااااال .