صَباح / مَساء الجمال
العدة المُلائمة لمد الماكياج تُعادل جَودة المُنتج التجميلي
يَعني إذا إشتريتي أساس جَيد مع فراشي سيئة راح يَعطيك نَتيجة غير إحترافية وَ من ثُم التَكنيك الصح يلعب الدَور الأكبر ..
من أكثر الأسئلة إللي جتني بالفترة الأخيره هي :
وش أفضل لمد الأساس البيوتي بلندر ، وَ لا الفلات كابوكي من سيقما ؟
[بحكم إن هالأداتين تم التركيز عليهم بكثرة من قبل البيوتي بلوقرز ]
فرشة الكابوكي أو يسمونها ( فرشاة المشروم) ~
هي عبارة عن فرشة كثيفة الشعر وَ شعيراتها قصيرة نوعاً ما ، بالإضافة إنها ناعمه وَ رقيقة ( fluffy ) مصنوعة من شعر طبيعي ( مصدره فرو السناجب أو الماعز أو الخيل)
لكن على الأغلب حالياً تكون بشعر صناعي
مصدر الإسم كابوكي مُستوحي من (من مسرح الكابوكي) أو مايسمى بدراما المسرح الياباني الشعبي، كان الممثلين يغطوون و جيههم بماكياج ثقيل مصنوع من بودرةالأرز
إستخداماته ،’
يستخدم غالباً في المناطق المُسطحة من الوجه
• لمد البودرة بعد الأساس كلمسة نهائية
• لدمج البودرة بحركات دائرية
• لمد المينيرلز باودر بحكم إنها ناعمه جداً تحتاج فرشة شعيراتها كثيرة وَ قريبة من بعض
• لمد البلاشر
• لإزالة الفائض
• لمد بودرة البرونز
طبعاً تختلف إستخدامات الكابوكي حسب تصميمها وَ نوع الشعر فيها ، البعض يكون مخصص للمواد السائلة مثل الأساس وَ البلاشر الكريمي وَ غالباً تكون من ألياف صناعية
الحديث يطول عن إستخدامات وَ أنواع الكابوكي ، راح أقولكم نبدة عن كل نوع
١- F88 Flat Angled Kabuki لمَد الأساس وَ الوصول للإنحناءات حول الفم وَ الأنف
٢- F86 Tapered Kabuki لمد الأساس حول العين وَ للكنتورينق
٣- F84 Angled Kabuki لمد الخدود وَ البرونز
٤- F82 Round Kabuki للماكياج المعدني
٥- F80 Flat Kabuki ( وَهي أساس مَوضوعنا )
٦- 3DHD™ Kabuki هذي ما تَجي مع المَجموعة لأنها الأحدث بَس أنا أضَفتها بالصَورة , مَيزتها كأنها فَرشتين بآن واحد وَ أكثر دقة للوصول للمُنحنيات وَ الحواف وَ تقدرين تَستخدمين جانب للمَد وَ يضل عندك جانب نظيف للرتوش أو لتوزيع الباودر ( هذا كلامهم لكن أنا ما جَربتها ) كابوكي ثري دي إتش دي
موضوعنا الأساسي هو عن فرشة سيجما Sigma F80 Flat Top Kabuki Brush ، وَ مقارنة بينها وَ بين إسفنجة البيوتي بلندر
أشوف مسألة إختيار أداة مَد الأساس وَ أدوات الماكياج بشكل عام يعتمد على ذوق كل وحدة فينا ، أيضاً على اللوك العام اللي تبي تظهر فيه ، على سبيل المثال أنا مِن أنصار الأساس إللي يكون بنصف تغطية وَ أميل إن الأساس مايكون كيكي أحب تغطيتة خفيفة ، يعني طلات الماكياج إللي أشوفها مثل خبير التجميل سامر خزامي ماتلفتني وَ ما أحب أظهر بهاللوك ، طبعاً ما ننكر إنه مبدع وَ مُعلم وَ فنان
أيضاً نوع الأساس يحدد طريقة المد , أنا من أنصار مد الأساس بالأسفنجة مرتاحة عليه وَ تقريباً كنت مُتعصبة لهالطريقة بالأساس السائل ، بينما الأساس الستيك أو الكريمي إللي بطبيعتي نادراً ما أستخدمه كنت أرتاح للفرشة بمده
بفترة كنت أستخدم فُرشة مد الأساس السائل من ماك ، وَ حقيقة كرهتني بالفراشي ، عيوبها كان فيه صعوبة بمد الأساس وَ كنت أخذ وقت على ما يتجانس الأساس ناهيك عن علامات الخطوط إللي كانت تخلفها , وَ غير تساقط شعر الفرشاة على وَجهي وَ صراحة كنت أشوف فراشي سيجما أقل جودة من ماك وَ ماكنت أفكر واحد بالمية إني أشتريها
لين مرة وحدة من التاجرات أهدتني مجموعة ماكياج من ضمنها فرشة الفلات كابوكي .
جربت الفرشة على أيدي بدون مستحضر وَحسيتها ناعمه كثير ، وَ تحمست أجربها على وجهي وَ فعلاً جربتها مع الأساس وَ حبيتها جداً ، خاصة إنها سريعة في المد وَ سهلة وَ تعطي تغطية ممتازة وَ لا تترك خطوط أبداً وَ لا شعرها يَتساقط
[ بَجد التجارب هَي إللي تَصقلك , الإعتماد على مُسمى شركة كبير ما يَجعل تَجاربك الأفضل إنما تَعدد التجارب مَن مُختلف البراندات ] ..
حَتى تعرفون ذوقي بالأساس , أحب هالمَظهر
سحر بحر , يَعني بَجد ما شَفت أحلى من ماكياج ريانا
وَ ما أتوقع إن السحر بريانا وَ بس صَح هي بها مَواطن جَمال , لكن فيه ذكاء هُنا بإبراز الجَمال
ركزوا على تَناغم لون البشرة مع الأساس مَع لون الحَواجب مَع الرموش , مَع التضليل فَن فَن بصراحة
وَ بما إني من عُشاق البيوتي بلندر وَ من عشاق الفلات كابوكي ، راح أذكرلكم الفرق اللي لاحظته بين الأثنين
مُقارنة بين فرشة سيجما فلات كابوكي F80 وَ إسفنجة البيوتي بلندر
F80 Flat Kabuki VS Beauty Blender Spong
• إثنينهم سهلين المد ، بس أشوف البيوتي بلندر سهلة التحكم أكثر خاصة تحت العين .
• الكابوكي تعطي تغطية أكبر من البيوتي بلندر بحكم أن الإسفنجة تشفط كمية من الأساس داخلها
• تحتاجين كمية من الأساس أكبر مع الكابوكي عشان تمدينه يمكن هالشي راجع إن البيوتي بلندر رطبة فتسهل المد وَ الإنتشار بكمية قليلة من الأساس طبعاً وَ الباقي تبلعه
• أحس الفرشة إذا فيك قشور ممكن مع الحركات الدائرية تبرز هالقشور أكثر من البيوتي بلندر إللي تعتمد على الطبطبة أكثر
• بحكم إن البيوتي بلندر أسهل في الإستخدام فأفضلها لمد الكونسيلر وَ الهايلايتر
• الكابوكي يغطي عَيوب البشرة أكثر خاصة عيوب مثل الندب وَ المسام وَ الخطوط التعبيرية , بس القشور لأ
• البيوتي بلندر أرخص بس أشوف عمرها أقصر
خُلاصة الأمر إثنينهم حلوين وَ أثنينهم أحتاجهم ، بس يمكن لو ابي أريح راسي وَ مستعجلة أنوقع بختار البيوتي بلندر لأني تعودت عليها أكثر فقط لأكثر ولا أقل
إذا حابة تغطية قوية أشوف الكابوكي أفضل ، وَ إذا تبين تغطية طبيعية البيوتي بلندر بتكون خيار أمثل ، أيضاً لاحظت شغلة بعض الأساسات تتناغم مع الفرشة أكثر من غيرها مثل أساس تارت ( كَتبت عَنه مَوضوع هُنا ) حبيته مع الفرشة جداً أعطاني تغطية ناعمه وَ سلسة ..
وَ برضو كَتبت مَوضوع مُستقل عَن البيوتي بلندر للإطلاع ( أضَغطي هُنا )
طريقتي بإستخدام فرشاة الكابوكي ~
أحب أدفي الأساس بإصبعي على أعلى كَفي ثم أنقطه على وجهي ، بعدين ابخ فرشة الكابوكي بشوي من الفيكسر ( مثل هالفيكسر هُنا ) ترطبها وَ تخليها سهلة المد ..
بعدين أوزع الأساس بحركات دائرية ، إذا سهره أمد طبقة خفيفة ثُم أرجع أمد طبقة خفيفة ثانية ..
من ناحية الهايلاتر تحت العين أحب استخدم البيوتي بلندر لمده ، وَ أحياناً أستخدم الكابوكي لمد الكومباكت باودر
فيه شغلة حبيت أذكرها ، صَديقتي الأنستغرآمية الجَميلة toota_daily_beauty
[ نقلاً عن خبير التجميل سامر خزامي ]
سامر خزامي ما يفضل يبل البيوتي بلندر بالماء ، لأن هالشي ممكن يخلي الأساس يقلب رمادي ، وَ فعلاً لاحظت هالشي ..
أحياناً ما أحرص كثير على تجفيف البيوتي بلندر يعني النداوة تكون زايدة تكة ، فعلاً لاحظت إن الأساس يتغير لونه شوي لذلك صايره أحرص تكون نداوتها قليلة أو أبلها بالفكسر
عَفكرة تُوتا من البنات إللي عَندهم خبرة وَ إطلاع واسع , يَعني خبيرة بالأساس لكن تَواضعها يَمنعها من التَباهي
دائماً مُلاحظاتها دَقيقة وَ صائبة , وَ فعلاً الواحد يَستفيد بالإحتكاك بالأشخاص النَيرين .
مُلاحظة ،’
خَميس وَ جمعة وَ سبت راح أراجع أغلب بَوستاتي ..
فأي وَحدة سألتني تَنتظر إجابتها خلال هالأيام , قَد ما أقدر أحاول أكَون ستيب بآي سَتيب وَ لا أهَمل أي إستفسار
راح أُسعد إذا طُرحت مَعلوماتكم وَ ملاحظتكم وَ إستفساراتكم وَ تجاربكم بالردود أسفل كَل تَدوينة , حَتى تساهم تَجاربكم وَ إستفساراتكم بُمساعدة الآخرين
لأن كثير يَهتمون بقراءة رَدودكم , ما تُثرى تَدويناتي إلا بإضافاتكم ..كثير من زَوار المُدونة بنات عَندهم إطلاع واسع بعالم التَجميل لكن ضَيق وقتهم ما يساعدهم على الكَتابة , لذلك أهلاً وَ سهلاً بكم وَ بإضافاتكم
دُمتم بَحب
صباحك الورد
حبيت اصبح عليك وافوز ب اول رد
ضحكتني صراصير الليل اليوم صرنا صراصير الصباح
هجووم على التدوينه اقراها وارجع برد ثاني
قَلبي عَليك إنتِ , وَ الله إهَتمامكم بالتَدوينات عَجيب ..
أسَعدتوني , عطاري صَرصور الليل للأسف الساعة ١ وَنص نَمت لا شَعورياً
وَ قمت الساعة ٣
ياحليلكك ابدا ماتاخرتي بتوقيت العصافير مو اللي ماني قايله
قررت كل رد احط لك شي يعجبني ولاتقولين ما افهم بالادب ههههههههه المهم هنا كتابه لصديقه لي عجبتني حبيت تشوفينها
حُبك سَلام
لماذا أنت بالذات
أشعر بأن كل الاحزان
امام فقدك تافهه
أشعر أنني ناقصه
وضريره بكماء وصماء
لاتتنفس الهواء
مَعك أنت علمتني ماذا
تعني الحياة والأتزان
وأن الطيران لايكن إلا بأحضانك
وأن البشر يملكون الأجنحه
ويرتوون من المياه لا عطشّ بعدها
لماذا بقربك تنقلب السماء لون الزهر
والفقراء يرتدون الأوشحةُ الباهضه
والسماءُ ترسل الادعيه على أطباق الذهب
وينبعث من الاعين السلام الساطع
لماذا قلبي ينبض بسكينه وجسدي دافئ
وصدري واحاتٌ وبساتين، وجدائل شعري مجدولةٍ بالجلنار
وعيناي يداعب كحلها أهدابي وتخجل
والحياة تغني بشغف والمخلوقات تتراقص بسرور
شوراع فلسطين تحتفل بالأنتصار
والسلام يُقبل كل تفاصيل الحياة والاحلام المحققه
تهدي البشر بيوتاً من السَحاب،
قُربك يفجر أوردتي من نبض عشقك حتى تناثر على الحياةّ
وأحياها كَالغوث المُنتظر،
أحبك لغرض فرح الحياة بك
َالجادل
عاد شطحه عن موضوع التدوينه بس تبادل ثقافات ههههههههه تعطينا ثقافه ميك اب واللي انا جاهله بوووه واعطيك ثقافه ادب وشعر وهيكا فيفتي/فيفتي
ربي يسعدك خيتو ويسعدلي صباحاتككك بكل خير وحب وادب ههههههههه شكلي بنجلد باي باي
الكلمات رووعه وصح اللسان الجادل … وياعيني على تبادل الثقافات ^^
يا هَلا بك إنتِ وَ مُختاراتك ..
حَبيت هالجَزئية : أحبك لغرض فرح الحياة بك
عاد تَصدقين ذاك اليَوم رديت عليك وَ فجأة بحركة أصَبعي طَيرت الرد
المُهم مارَجعت أكَتبه بالرغم إنه أحلى من هالرَد لأنه كان بَوقتها , لَكن للدَوام أحكام ..
صبآحك رضى ،، يعطيكي العآفيه صرآحه حلو وتحمست له أنا أفضل البيوتي أحسها تحطه بشويش م كني حآطه أساس ههههههه معرف أوصف بس أشوفها خرآفه تدرين كل قرآيبيني ولا وحده عندها فرشه أو إسفنجه يمدونه بيدينهم أشوفها تقليديه بمآ أن سعر البيوتي بلندر رخيص حتى ماكياجهم سيء أشوفه بنظري عشان كذا جد أشوفها مهمه في إظهار جمال الفونديشن و توزيع البودر بالكبوكي حلو بس ع خفيف بعضهم تفرك وجهها لين تنغمس الفرشه بخشتها هههههههههه ،، نفدا وجهك كلمه جنوبيه ههههههه
صَباح الحُب ..
مَد الأساس باليَد مُمكن يكون رائع للي مَكياجها بَسيط بَيمشي حالها وَ أقصد ببسيط شَبه بدائي ما أقصد ماكياج ناعم أو خفيف ..
لكن غير عَملي وَ لكن فيه ناس تَدور الرَخص , أما المَكياج الحَديث بنظري يَحتاج فراشي وَ إسفنج
إلا لو عَندهم مَوهبة خارقة بالدَمج
هههههههه ضَحكتيني على تفرك وَجهها , هُو عَموماً بمقاطع اليوتيوب الفيديو دايم يَظهر الأمر قاسي
بينما نفس فرشاة الكابوكي ناعمة جَداً عالوجه ..
وَ قلبي إنتِ يا بنت الجَنوب
وهذا ثاني رد لي بعد
هذا يدل قد ايش كنت طول الليل مسنتره على المدونه انتظر تدوينتك
جد جد كنت بحاجه لهالتدوينه
عندي زواج بعد اسبوعين وناويه اشتري وحده منهم ومحتاره
كنت جازمه على البيوتي بس بما اني اثق فيك
ف كلامك عن الكابوكي بتدوينة اساس تارت شوقتني لها وخلتها ضمن اللسته
البيوتي بلندر على طاري البلل اختي من زمان تستخدمها
ووﻻ مره بللتها ﻻشوي وﻻ كثير ومشاء الله مااحد يشوفها الا يسالها عن اساسها
يمكن انو كل مايقل البلل احسن هههههه
تسلم يمينك وكل كلمه تكتبينها تنورنا وتفتح مداركنا احسن واحسن
بخصوص تجاربنا مع المنتجات اللي تطرحينها ف مابالغ اذا قلت لك
مااتردد ب اي شي تطرحينه يناسب ميزانتي الا اشتريه
ووﻻ مره قلت بالغت مدحه او اخطت
الله ﻻيحرمنا منك
طولتها^_^
يا حَظي بَك ..
وَ على هالسَنتره مَين قدي , وَ أكيد كل مايقل البل أحسن بالنسبة للبيوتي بليندر ..
وَ تسلمين لي على هالدَعوات , عاد لا جربتيهم عَطينا رأيك .. لأن تجاربكم تَفيد الآخرين
وَ يشرفني ثَقتكم فَيني عن جَد , وَ تخليني أسَعى أكثر وَ أكثر عالدَقة بالوصف
الله لا يَغير علينآ
فَديتكم وَ الله
يااااااامرحبا بالزين كله
صباحك جمال وسعاده وهنا
يا هَلا بالزين ..
وَ صَباحك ..
ماشا الله وش اقول بس غير كفيت ووفيت.. الله يجزاك خير أحلى شي انك بينت عيوب و مميزات كل واحد و هالشي خلاني أخذ قراري في شراء البيوتي بلندر و لو اني متخوفة شوي من أنه يقلب رمادي أحس ماشا الله ملاحظتك دقيقة و هالشي يميزك فعلا،
أهَم شيء إني قَدرت أساعدك بالإختيار وَ يبقى أخر شيء إختيارك الشَخصي وَ إرتياحك
ما أتَوقع راح تصير مَعك رَمادية لأن خلاص عرفتي السَبب , إتبعي الخَطوات صَح وَ بإذن الله تتلافين أي مُشكلة ..
نَورتيني بَعد عيني
مشاء الله كتبت ثاني رد ماكان فيه الا ردي ماخلصته الا فيه كم رد سبقني
عساه نوم الهنا
نحبك توووسا
ترا بكل رد بكتب لك احبك
لي سنين اتابعك وﻻ قدرت اوصل لك
الا عبر المدونه
ف بطلع اللي بقلبي سنين ^_^
ههههههههههه وَ الله قلتها لك هالمَحبة هُو دافعي لبذل المَزيد ..
يا بَعدي وَ أنا أحبك وَ أحب تَواجدك بَعد , تشرفيني ..
وآآآآه يا حَظي
نسيت اقول مكياج ريانا عجييييب شي جميل متجانس و سلس مرة حلو يا ليت أوصل لهالاحترافية هذي
إذا تَخلينا عَن فكرة الماكياج الواضح أتَوقع راح نَوصل ..
لكن يبيله ذَكاء بدمج الألوان وَ حرفية , لأن ريانا حاطة مَكياج بالهَبل
لكن النَتيجة خُرافية
وصباح الورد لعصفورتنا
نوم العافيه
الي يقرا تدوينتك ماراح يحتار وضحتي كل شي
بما اني في مرحله تجديد مكياجي باذن الله راح اشتري البيوتي بلندر
ملاحظه خارج الموضوع
اتصفح من الايباد بعض الكلمات في اول بدايه السطر الحرف الاول مايظهر
بمعنى بوحده من التدوينات كتبتي اخباركم حرف الالف مايظهر عندي
مااعرف المشكله وين بالضبط
صَباح الحُب , مَفروض تسميني لصرصورتنا هههههههه
مُمتاز , عالبَركة .. وَ إن شاء الله تستخدمينه بَهناء وَ صحه
بالنسبة للمُلاحظة أفدتيني الله يَجزاك خَير , أتمنى إذا لاحظتي هالشيء بَتدوينة مُعينة تَبلغيني ..
عشان أعرف أحلها , بَكون مُمتنه لك ..
نَورتيني
يسعدلي صباححك سوسو ♡♡♡
جربت الاساس تبعي بالفرشة وبايدي وبالاسفنجة
حسيتو بالطبطبة بالاسفنجة اكتر شي ناسبني حس بشرتي ماتنشف انو حس بشرتي فيها رطوبة خفيفة يطلع الاساس احلى وانا متلك ما بحب اساس نصف تغطية وبشرتي مافيها عيوب بارزة كتير بتحتاج مني تغطية اكتر من هيك خصوصا اني بستخدم الاساس بشكل يومي بحب الطلة الطبيعية للدوام بركز عالاساس والماسكارا اكتر شي
فراشي سيجما فعلا سمعت عنن مدح كتيييير بس ماجربتن
شفت كتير تاجرات ببيعو مجموعة منن حابه جيب المجموعة الخاصة بمكياج العين
جربتي منن شي غير فرشاية الكابوكي ؟؟
يا عيني عالناس المُهتمين , يا عَيني يا عَين ..
فعلاً بالدَوام الواحد يحتاج ماكياج ما يَجهد بَشرته وَ بنفس الوقت ماكياج سَريع ما ياخذ أكثر من ١٠ دَقايق حَتى ما ناخذ من ساعات النُوم وَ الفطور
بالنسبة لفراشي سَيجما أكثر فراشي حبيتها بوبي براون وَ ميك أب فورايفر
لَكن سيقما تَحديداً ماجربت فراشيهم لأن ماخَلص يَلي عَندي , عَندي كثير فراشي
لكن ناوية عليهم قَريباً , مُمكن تشوفين تجارب الناس باليَوتيوب كثير خُبراء مادحينها
ما أقَدر أجزم لين أجربها , بإذن الله خلال هالأيام راح أعَمل لي أوردر وَ أشوف ..
وانا متلك بحب اساس نص تغطية 》》》 للتصحييح
صباح الحب …
نوم العوافي ….
انا لاجربت ذي ولا ذي عندي فراشي ريل تكنيك ومبسوطه عليها …. بس وصفك للكابوكي يحمس خاصة الجديده ال3dhd مرره اتحمست واحسها عمليه انا لمن امد اعتمد على الفرشه والاسفنجه العاديه للزوايا بس على كذا راح يكون جديدي من الفراشي بيوتي بليندر وسيقما 3dhd…
ريانا اتجنن وبالفعل رموشها تهبل ادور من زمان على كذا رموش طبيعيه وتجمل النظره ومانسى اساسها …الاضاءه كله على بعضه يهبل …
اعجبني وصفك للمد ومنكم نستفيد…
نسيت اقول وانا اتقضى من موقع تارت حصلت عندهم فرشة الكابوكي وكمان سعرها حلو بحدود 30 دولار … ايش رايك فيها اقتنيها والا لا ماادري ارتحت لهاشركه خاصة اغلب منتجاتهم ممدوحه …
وَ الله كثير ما دَحينها بَس مقدر أحكم عليها لأن ما جَربتها
وَ لو كانت مَتوفرة عندنا بالسوق كان لمستها بَيديني وَ شفت نَعومتها ..
أنا مَثلك تَحمست على فرشة الثري دي من سيقما , إثنين بَواحد
ريانا أساس عَينها وَ محجر العَين عندها مَثالي , يعني وَجهها يَقبل الماكياج
عظمتها هي إللي تَساعد , تقطيع وجهها سَليم ( الجَمجمه )
توسه تسلمين عالنشاط
انا جربت فرشة ماك مثل ماقلت فعلا تخطط وما يندمج زين بصراحه
بالمقابل حبيت البيوتي بلندر وتعطي مظهر طبيعي مو كانه حاطه مكياج ومالي غنى عن الاصابع معها
ومازلت مصرة اني اباخذ دورة على يدينك باذن الله خخ
ياختي انت غير الله يوفقك ويسعدك
اهليييين
فراشي ماك صدق كرهتني بالاستخدام لامن الخطوط
ولا الشعر فاشله جدااا مدري ليه الضجه
عقبها ماصرت استخدم شي لمد الاساس الا الاسفنج
فراشي سيجما للان ماجربتها بس ان شالله قريب
لان اشوف كثير مدح وشفت مقاطع لها حبيييتها
بس مرات وكثيرر ههههه اليد ولا اجمل
مكياج ريانا يعجبني بنظري كذا المكياج ماني بقايله
اني اسوي مكياجي زيها
بس صار لي سنتين امشي ع بساطة هالميك اب
لدرجة امي تقولي ماعدتي مهتمه بنفسك ياحبيلها
تصدقين صار لي خمس سنين كحل داخل العين ماحطيت
مغرمه بالكحل البيج والابيض والايلاينرر
هههههههههههههههه عشان هاللوك من الميك اب
دمتي لنا يالعطاء بكل حب
بالنَسبة لفراشي ماك لأن مرات الواحد يجرب شيء بَعد خبير وَ هو مُستواه بالنَقد ركيك
فيخاف يَقول غير جيدة , يَنداس بين الرجلين ههههههههه فَهمتي ؟! ..
وَ الله يَخلي لك الوالدة , ماتدرين يَمكن بيوم تَتقنينه
مَتى الواحد يَتقن مَكياجها ؟! يَبيله شَخص فنان بَدمج الألوان وَ إختيار الألوان إللي تَحلي
يعني فيه بنات عَندنا خلاص تَبي تَسوي ظل بُني بَغض النظر إذا هالدرجة من البُني حلوة عَليها أو لأ
الشطارة بإختيار الدرجات المُناسبة لك
بالنسبه لي وما امدح نفسي انا بروفشينال في انتقاء الاساس الخاص بي وعندي هالات الكل يستغرب ويسال وينها والحمدلله قادره اخفيها بالميك اب بصراحه ارتوسه اشتريت جميع الفرش وبماركات مختلفه مثل ديور ودولتشي اند غابانا وماك وغيرهم والبيوتي بلندر كمان بس بالنهايه الاقي نفسي ارجع لمد الاساس باليد وممكن ساعات بدمج الكننور استخدم البيوتي بليندر يعني طريقتي بدائيه بس دايما اساسي يطلع طبيعي ووجهي منظره ناتشورال لدرجة اني ابي اعالجالاثار وبعض الحبوب الكل يسال مافيك شي وهذا دليل ع اعتمادي ع الاساس وان منظره موحي للطبيعي بشكل واضح…
ارتوس احب اتابعك واحب اقرى لك ودايما اتفق معاك بشغلات كثير من واقع تجربتي بالميك اب واي شي تجربيه جديد انا من بعدك اجرب لاني واثقه برأيك وانتقادك….
واصلي ياجميله
إنتِ شاطرة , أهَم شيء إنتِ مرتاحة وَ إللي حَولك يَطرونك خلاص ..
إذا إنتِ مُبدعة حَتى بريشة نعام بَتقدرين تَمدين الأساس ..
وَ يا حَظي بُمتابعتك لي يا قَمرة , أسَعدت بتواجدك ..
تَواجدك أضاف رَونق لصفحتي , حياك الله
يسعدصباحك وطلتك.
ي عيني احنا ننتظر التدوينه وانتي نمتي هههههههه
ي ستي نوم العوافي
فتحتي عيني علئ الفرشه علئ اني اول م اقتنع امد الاساس
فيها م ارتاح الا بالاسفنجه.
وطلع ذوقك بالأساس نفس ذوقي ي حظي فيك
هههههههههههههه ..يَعافي قَلبك
الفَرشة حَلوة جازت لي , لدرجة قلت لازم يَصير عَندي كابوكيااااات كَثيرات
عندي امنيه صغيره بما ان الموضوع متعلق بالميك اب
ممكن تلغين خاصية الـ 100 رد عن قسم معهد التجميل Institute
ههههههه شَلت يَدي عَن شَموآآه
بس أبشري بَعزك , شيكي خلال هالأسبوع وَ ذكريني إذا ما تَم
لحداللحين شرط 100 رد موجود
تدويناتك سعآاآده
حبيت فرشة الكابوكي دام ماتطلع قشور في الوجه
لانو يطلعلي قشور حتى لما احط CC ماادري ليش
مره يضايقني ومابغى احد يقرب مني خخخ لان شكل القشور في الوجه مزعج حلو لما تحطي الاساس وكانو ممو حاطه شئ لا قشور ولا خطوط وان شاء الله مع الفرشه تنحل ذي المشكله
أحببببك
اووو انتي قلتي الفرشه هي الي تطلع القشور
طيب انا استخدم نفس الاسفنج إلي مع CCكريم ويطلع لي قشور بس طريقتي انو امدها مو طبطبه ان شاء الله اجرب بالطبطبه زي ماقلتي وماتطلع معي القشور
سوري توو استوعب )؛
هههههههههه تَو رديت عليك وَ أكتشفت إنك أنتبهتي ..
جربي وَ عطيني خبر وَ ش يطلع لك
لا قلت إن الكابوكي ممكن يطلع قَشور بالوجه رَكزي عالكلام ..
جربي البيوتي بليندر أنفع لك ..
وَ تسلمين لي على المَحبة
صباحك سعاده
يعطيك العافيه
البيوتي بلندر مره احبه
يالله يمكياج ريانا انا اذا شفتها انجن تحسين طبيعي والاضاة بشرته مبرزتهاسبحان الله لونها قريب من العرب
جد جد الحكي يوقف عند وصفها مافي زيها اذا سوت تان تجنن والالوان تليق عليها فضيعه هالانسانه
ارتوس ياليت تتكلمين عن الكنتور الهيلايتر
يعافي قَلبك ..
وَ البيوتي بليندر يَحبك
ريانا مُش بشرة عربية , سَحنة أفريقية لكن فيه شَطارة بالإختيارات شَوفيها وَهي طفلة
ذكاء وَ تقاطيعها تَقبل الماكياج بَيرفكت إسم الله ..
بَحطه من ضَمن أولوياتي , لكن أحس يبيله مَوديل للتَطبيق
يعطيك العافيه ياعسل فعلاً شفت البوست الي نزلته صديقتك توتا
حتى كنت برجع اسألك عن اختيار شيء غير الماء او ماء الورد
وهذاك جاوبتي بالتدوينه
يسعد لي صباحك ياقمر
يَعافي قَلبك وَ يسلم لي المُمتاز بالمُتابعة ..
وَ يسعد صَباحك وَ مساك وَ ليلك
لا خلا وَ لا عدم
يسعدلي صباحاتك انا
انا عندي رقم واحد وحابتها كثير صرت احب احط مكياج بعدها تمد الاساس بشكل رهيب احب وجهي بعدها اما بيوتي توها واصلتني مابعد جربناها
وصفك يجيب السعاده
كوني بخير ♡
هلا بالطَش وَ الرش ..
حَبيت وَصفك للمُنتج , فعلاً يستحق مَحبتك
وَ تواجدك هو إللي يَجيب السَعادة
لا خَلا وَ لاعدم ..
والله احترت !! حبيتهم اثنينهم خصوصا اني احتاج شي جديد لمد الاساس لأن اللي عندي نفس ما قلتي تبين القشور ونفس الوقت ما تدمج بسهوله
وشكلي بشرتي الثنتين واجرب وشو بتناسبني اكثر ..
وحابه اعرف رايك بفرش سيفورا هل تستحق التجربه ولا لأ
لأني شفت كثير يمدحونها وخصوصا ٤٥ وحابه اعرف رايك عنهم بشكل عام
يهمني رايك جدا ..
وحابه اسئلك هل ينفع استخدم الفرشه للكومباكت باودر ولا لازم الاسفنجة اللي معها
لأني اشوفها صعبه علي الاسفنجه وبنفس الوقت مو عارفه وش استخدم
انا قريب شريت من شانيل كومباكت باودر علشان فيها نسبه تغطية خفيفه ومات وانا محتاجه هالشي
لأني استخدم سي سي كريم ولما احطه يطلع وجهي يلمع بشكل من عند الجبهه والانف وابغى اخفف هالشي و بنفس الوقت
حبيت اخذ شي فيه تغطيه متوسطه علشان يتناسب مع السي سي كريم حقي
سوري طولت عليك بس حبيت اخذ رايك وابغى يكون عندك علم بالطريقه اللي استخدمها وهل فيها شي غلط ؟ وايش ممكن يناسبني
تسعدنا تدويناتك جدا ارتوس .. الله ييسر لك امورك قد ما يسرتي امورنا
أنتِ حالياً جربي المَتوفر لديك إذا بالسعودية المتوفرة بيوتي بليندر بسيفورا
وَ بعدها إشتري الكابوكي , عَشان لا تخسرين ..
بالنسبة لفراشي سيفورا أمممممممم ما جربتها وَ ما أرتحت لها
لكن تكنيك فرشة ٤٥ مُختلف عن تكنيك الكابوكي ..
وَ بالنهاية ما أقدر أحكم على شيء ما جربته لأن كثير شغلات مَع التجربة الواحد يَقتنع بَها
كومباكت باودر فاونديشن وَ لا بريسد باودر ؟! .. فرقي فيه فرق بين الإثنين وَ إذا بشرتك دهنية فكرتي تاخذين لوس باودر
حلو اللوس باودر مَع الماكياج خفيف بس جربي .. يعني شوفي بودرة ديور الوردية يَمكن تعجبك
http://artoschic.com/1392/diorskin-nude-rose-powder-بودرة-ديور-الوردية-اللميعه-لنضار.html
خذي الإصدار الحديث مَنها ..
وَ لا بُد تجربين بالمَحل أفضل لك .. أما كذا بتتورطين
يعطيك العافيه فعلا من اول ما استخدمت فرشة سيقما وانا حابته
كثير – اما بيوتي جاري بحثها عند سيفورا وماشاء الله البنات ماخلو لي وحده – بنتظر الشهر الجاي بينزلون مجموعه – عندي فرشه جدا جميله وناعمه من دبنهامز ولا تخطط و شعراتها صغيرونه وعمليه – ورخيصه مره
اذا الوحده مو حاطه ببالها سيقما او بيوتي بتكون هذي اوفر لها –
يَعتمد حَسب الجَودة , وَ حسب طريقة الماكياج
نَورتيني
فرش الكابوكي حلم الحياة فعلا فرش تعطي
طلة احترافية..
لا عدمناك ارتوسة
حَسيتها صَيغة إعلانية , لازم يَعرفون عنك شَركة سيقما ..
نورتيني
حمستيني اجرب سيقما
انا جربت فرشة الاساس من ريل تكنيك ومو كثير عجبتني
بس تمشي الحال
بس اذا ممكن ترشحيلي فرشة للكونسيلر تحت العين
(صدقاً مرتاحة على توزيعه باصبعي لاني جربت فرش قبل ومانجحت التجارب بس اثق برأيك )
جَميع فرش ريل تَكنيك على قَدها وَ على قد سَعرها .. لكن ما حَبيتها
وَ زي ما قلتي تَمشي الحال ..
فيه فرشة لأخذ الكونسيلر وَ فيه فرشة لدمج الكونسيلر , بس البيوتي بليندر تفي بالغرض وَ أوفر لك ..
بالنسبة لي أستخدم الفرشة وَ عقب أطبطب بأصابعي للنَعومة , لكن مع البيوتي بليندر يَغنيك
شكراً لنصيحتك باذن الله حجرب طريقتك
العَفو ..
ياهلا ياهلااا
الله يسعدك قد ماتدويناتك تفتح النفس
انا من انصار البيوتي بلندر من جربتها عشقتها بمعنى الكلمه
واحب التغطيه الخفيفه زيك
عشان كذا احس تخلي بشرتي بيرفكت ولله الحمد
جربت مره ديو فايبر برش من ريل تكنيك للبيبي كريم
سيئه جدا ماحبيتها
اثاريها تستخدم للباودر وانا مادري
وَجودك هًو إللي يَفتح النفس ..
بالنسبة لريل تَكنيك فراشيها على قَدها , نَص حَلوة مُش وآآآو
لكن إللي ميزانيتها ما تَسمح تاخذها أحسن مَن ولا شيء ..
وَ بالنهاية اليَد تَحكم عالنَتيجة النَهائية ..
نورتيني
يعطيك العافيك والله يسعدك يارب يارب
عندي سؤال عن منتجات جونسون كلها فيهامواد بترولية غير الاويل الشامبو ومناديل الحفاظ والبودرة والكريم الحفاظ هل هي بعد فيها مواد بترولية او بس الاويل وكيف اعرف وهل فيه بديل موجود عندنا اذا ايه وشكرا لك كثير
فَقط كلامي عن البيبي أويل ..
بالنسبة للبدائل شَوفي منتجات بايوديرما للأطفال , مُمتازة ..
تَسلمين لي لدَعواتك
شكرا على التدوينة الي يت في وقتها..
بس اذا في مجال تتكلمين اكثر عن استخدام البودرة بانواعهامثل كومباكت و اللوس و حتى الفاونديشن الي ايي ع شكل باودر اذا ممكن..
بإذن الله ..
شَكله يَبيلي أخَصص تَدوينات مَثل هالنَوع ..
شكراً لإقتراحك ..
بيت هالريفيو حسيتو لزييييييييييز
وبسيط
بنسبه لل Q&A
لسا بقرأ فيها من يوم منانزلتيها حابة كل جواب اتمعن فيه
لانو كل كلمة منك فيها فائده بنسبه لي
ياربي مايحرمني منك
وَ الله للأن ما رَديت على الإستفسارات إللي بَها ..
بعضها حرد عليها وَ بعضها حخليه بإستفسارات الأشهر الـ ٣ القادمة
نورتيني يا لزَيزة
يا حبي لك ارتوس
كنت محتاره اخذ الاسفنجه ولا الفرشاه بس باخذ الاسفنجه حاليا لانو عندي طقم فرش من مكياجي اذا تطورت بالمكياج يصير خير
هههههههه ..
الإسفنجة هي المُتوفرة بالسَعودية فهي الخَيار الأقرب لك
نورتيني
تووسا نبي طريقه تقضي على ان الكريم يطلع رمادي بالذات حول الفم
وافضل مرطب للجسم اثناء استخدام احماض الفواكه
ينفع ستيفز ؟
حَول الفَم هذي مشكلة تتعلق بمشاكل بالبشرة قبل وضع الأساس ..
أو فيه شقوق حول الفم أو تجاعيد تعبيرية ..
وَ أختيار لون الأساس المناسب وَ تثبيته بالباودر , حسب نوع البشرة طبعاً
بالنسبة لمرطب الجسم فكري بسيتافيل جَيد
كعادتك ،، مقارنه جميله ومفصله ،،
الله يعطيك العافيه ،،
انا من الناس اللي كانت لهم تجريه فاشله مع الفرش ،، ولذلك انا من انصار بيوتي بلندر ،، جربتها مبلوله جربتها جافه صراحه جميله والاهم سهله وسريعه بالاستخدام ،، احسها حاجه مااستغني عنها الا اذا وجدت البديل الافضل والاسهل ،،
الفَرش مو كلها واحد , حتى نفس الماركة تلاقين عَندها فرشة وآآآآو وَ كَم فرشة سيئة
نَورتيني حَبيبتي
مستانسه حدي ارتوسه صرتي تجربين منتجات منتشره وبسبب
االاعلانات ماصرت اتحمس لليوتيوب مثل زمان اثق بقله فقط .. جربت البيوتي بليندر على مدحك خصوصا اني متعوده عالفراشي اكثر وحبييييييتها بالسهرات امد بفرشاه اساس عاديه وادمج بالبيوتي بليندر .. بس صح عليج فرش سيفما لاتقارن بماك اقصد فرش العيون والفرش العاديه فررررق بينهم بس الكابوكي لا ماجربتها افكر اجربها واتراجع بس اللحين لازم اجربها ياحبي لج ارتووووسه
حَكمي عَقلك إستفيدي من مَعرفة مُنتج جَديد من أي شَخص تشككين بَه
وَ بعدها تبدأ تَجربتك الواقعية هي إللي تَحدد مُستوى إرتياحك …
وَ يالله إذا جربتي الكابوكي عَطيني رأيك عَجبتك أو ما عَجبتك ..
نَورتيني يا قُمر
يس يس في ناس اتابعهم بس كذا اتعرف عالمنتجات وفي ناس للهاي ايند متابعينهم قليل بس احب تنويعهم انا قديمه باليوتيوب ،، اكيييييد بتعجبني
هههههههه شَكلك مُدمنة يَوتيوب ..
جلست اقرأ و أقول ذحين ح تتكلم عن مد الفاونديشن باليد بس للأسف لا شكل ما عاد فيه احد يمد الأساس بايده الا أنا و المرحومة نفرتيتي المهم أنا مو ميك أب أرتيست عشان أفتي بس ما احس انه الفاونديشن يتمازج مع بشرتي تمام و يعطيني تغطية طبيعية الف بالمئة الا بهالطريقة احس دفى اصابيعي مع وجهي يخليه يتمازج أحسن و يمكن لانه تجربتي مع فراشي الأساس كانت سيئة او عدم معرفتي بالطريقة الأمثل لاستخدامها أعطتني نتيجة فييييك احس كأني حاطة ماسك تظل البلندر خياري الثاني بعد أصابع الايد تمنيت لو قلتي اي شي عن طريقتي اللي من عهد أبرهه في مد الفاونديشن بس ماااااش و مع ذلك ح أظل أناضل و استمر عليها لحد ما اكتشف مساوئها
هههههههههههههههه ضَحكتيني , وَ الله عليك تَعليقات ذَكية جداً ..
طريقة مَد الأساس بالفاونديشن طريقة ناجحة وَ سليمة ما عَليها أي غُبار ..
لكن الفراشي وَ البيوتي بليندر تَعطيك نتيجة فلوليس ( يعني لا تشوبه شائبة ) ..
صَحيح من زَمان وَدي أسألك , إنتِ بأي منطقة بالسعودية ؟!
حاليا مش مستقرة بالسعودية يعني يا دوب نزلتي للسعودية زيارة خلال فترة الصيف و غالبا أقضيها في المنطقة الغربية يعني على حسب الوضع كيف
ما شاء الله كعادتك مبدعه
بس المشكله في الطلب اتكيسل
بس حمستيني اجرب الكابوكي بروش وان شاء الله اتنشط و اطلبها
ودايما اتابع جديدك لك الحب و التقدير
تسلمين لي على مُتابعتك ..
بالنَسبة للطلب إما تَطلبينها من تاجرة ثَقة أو من المَوقع .. شَوفي الأسهل لك
نَورتيني
مساء الخير.. يعطيك العافيه على المدونه الاكثر من رائعه استفدنا كثثير بسالك وش افضل كريم اساس لتغطية ندب حب الشباب وطريقه مد الاساس
مَساء الحُب ..
الندب تتغطى بشمع لكن هذي الطريقة القَديمة , أبحثي عن مُنتجات من هالقبيل ..
وَ أفضل أساس لتغطية المشاكل هو ستيك فاونديشن , لكن قبله لا بُد من تصحيح البشرة قبل بالكوريكتر ..
وَ حسب نوع المُشكلة يتم إختيار الكوريكتور
حياتي ارتوسه
جميله التدوينه زي جمالك
ماعشق القلب الا الفرشه خصوصاً فرشة ريل تكنيك والكابوكي من سجما اللي تكلمتي عنها
اما البيوتي بلندر يمكن انا السعودية الوحيده اللي ما اشترتها ههههههه
متعقده من اي شي اسفنجي بسبب الاسفنجه القديمه الدائريه ذيك
كانت تشوهني بشششكككل , رغم ان الناس بالزمن الغابر كانت تقدسها
ههههههههههههههه ما تَدرين يَمكن تَشترينها قَريباً ..
جربيها مُش خسرانة حَاقة , لأن فَعلاً فنتاستيك ..
وَ ماعرفت أي إسفنجة دائرية تقصدينها ؟!
نَورتيني حبيبتي
صباح الورد
تدوينة ومعلومات مفيدة كعادتك
وتقريبا طريقتي نفس طريقتك بمد الاساس
لكن ماقد جربت فراشي سيقما ولا الاسفنجه
,حابه تعملي ريفيو عن artis brush
صراحة اعجبني شكلها واتوقع بتصير هبه
خاصة فرش الوجه اما فرش ظلال العيون ماحبيت
soon لها فَترة ببالي .. لكن ما تَوقعت أحد راح يَتحمس عليها
لكن طالما ذَكرتيها دليل فيه كثير حابينها ..
نَورتيني ..
يعطيك العافية وويجزيك الجنة الباردة ممكن تكلمي عن كريمات فعالة لعمار٣٥ حق محاربة تجاعيد العين والوجهه والرقبة
ما راح تَكون عن تجربة ..
لكن نَصيحة لتغذية البشرة بشكل دَوري , الأحماض وَ الرتن أ أطلق من أي كَريم
لشباب دائم
حبيبتنا ي آرتوس..
كثير كنت أوقف قدام الفرش و أحتار، بس مع اليوتيوب و كلام تشيكا الله يذكرها بالخير تحمسسسست و اشتريت سيقما، و صرت أنوع مع فرش ميكاب فورإيفر
و حاليا بيوتي بلندر دخلت ع الخط، تجربتي بسيطة جدا لكن اللي لاحظته انه الفلات كأكبوكي من سيقما أجمل مع الأساسات اللي تعطي لوك ستين او مات، و البيوتي بلندر أجمل مع السيسي كريم و الديوي لوك.
فيه نقطة كمان الأساس لما كنت أمده بيدي او بفرشاة مد الأساس العادية سواء من سيقما او فورإيفر كانت تبين عيوب بشرتي بشكل أوضح برغم بدون مكياج تكون أجمل ، اعتقد انه تتحسس من المد نفسه فتفتح المسام و يزيد إفراز الدهون و كمان تطلع حبوب الحر بعد مدة، هالشي كله ما أشوفه لما أمد بالكاكبوكي بطريقة دائرية او حتى بالبيوتي بلندر بالطبطبة.
أمي تناسبها طريقة المد و بعدها بشكل دائري تعيد ع الأساس بالكابوكي لان بشرتها افضل من بشرتي من ناحية التحسس .
سوس عندي سؤال بعيد عن هالموضوع، ينفع نستخدم اللونا انا و أختي بنفس الوقت؟
يخليك لنا :*
أيه وَ الله الله يذكرها بالخَير وَ عساها تَكون سالمة ..
لا تَستهين بتجربتك , أي تَجربة تفيد أي مُلاحظة تَفيد ..
حبيت تفصيلك جداً , زدتي تَدوينتي رَونق ..
بالنسبة للونا للأسف الجواب لأ , لأن مثلها مثل فرشاة الأسنان وَ فرشاة الجَسم ..
أدري سَعرها غالي شَوي لكن ممكن تاخذون اللونا ميني أو الكونجاك بديل رخيص وَ جيد أفضل من المَخاسير ..
مساء الخير ارتوس
بعد السلام وكل كلمات الثناء اللي ماتوفي حقك
عندي كم استفسار بما انك قلتي هالويكند بتردين على جميع الاسنفسارات بالبوستات اللي نزلتيهم
قلت انزلهم باخر بوست (حتو لو اسئلتي مالها علاقه بعنوان البوست)
1:اتمنى اتنمى تسوين بوست جديد بقسم الميك اب ويكون عن الارواج والله ودي ,لو مثلا تكون عن براند معين وجوده ارواجهم , او لون دارج ويكون له بدائل ببراند اخرى او مقارنه بين عده براندات لنفس درجه اللون . مواضيع زي كذا دايما مفيده وحماس,
2: ممكن تقترحين علي مرطب جسم يومي بحمايه من الشمس! لان مرات البس تيشرت ولا توب بمكان مفتوح بالشمس واصير شايله هم بشرتي تتاثر, ولا احط كريمي العادي ويسمرني, بشره جسمي عاديه لاحساسه ولا جافه
3: , هل لك تجربه لمنتجات Kiehl’s !! عندهم سيروم مسوي ضجه , وسنفره الوجه كمان .اتمنى تجربينه لانك بتكونين خير من يقيمه
4:اتمنى انا وكثير من متابعاتك نعرف ذوقك بالعطور , ا1ذكر قد ذكرتي اكثر من مره انه تزعجك العطور القويه وان ذوقك وطريقتك بالتعطر غير . ياليت نشوف امثله
وشكرا جزيلا
مَساء الحُب ..
أخجلتم تَواضعنآ ,, لو طَرحتيها ببوست الأسئلة أفضل لكن طالما سألتي مَن عيوني أجاوبك ..
بالنسبة للطلب الأول وَدي لو أفيد من هالنَاحية لكن مُمكن أكتب ريفيو عَن مُنتج أنا أعجبني وَ أدور لكم بَديل عَنه ..
بالنسبة للمُرطب مُمكن تستخدمين مرطب خالي من العطور وَ تبخين جسمك ببخاخ يقي من الشمس لكن تراه مو فاعل ١٠٠٪ ..
نعم لي تَجربة لمنتجات كليز لكن أكثر من تَكلم عنها بنت إسمها BLACK ROSES أبحثي عن مَواضيعها بَشمواه تَكلمت عن أحد هالسيرومز قبل أكثر من 3 سَنوات تقريباً
حسابها بالأنستا memeyo86
بالنسبة للعَطور بإذن الله .. راح تحبون إللي راح أطَرحه لكم
مساء الورد ..
دائما مأاخرج من تدويناتك الا وانا مستفيدة منها اي حاجة حتی لو كانت بسيطة وحتی الردود اقراها ..
بالنسبة لي احب البيوتي بليندر اكثر من الفرش..
تعجبني انها تعطي لوك طبيعي ..
واخيرا اتمنی لو تتكلمي عن الرياضة .. بجد بجد نفسي تتكلمي عنها..
اممم كمان عندي فكرة لو تتكلمي عن العناية بالبشرة لكل مرحله عمرية يعني العناية لبشرة العشريينات والثلاثينيات والاربعينيات ..
وربي يسعدك ويعطيك العافية عاللي تقدميه لنا ..
يا حَظي ..
وَ مساء الحُب , بالنسبة للفرش مَليون نَوع وَ نوع ..
لو جربتي الكابوكي راح تَعشقينها , مو مثل أي فرشاة ..
وَ إن شاء الله كل إقتراحاتكم مَحط إهتمامي ..
الله يسعدك ارتوسه ياكثر ماستفدت منك من زمااااان اتابعك وكم تمنيت تتكلمي عن هالموضوع لان كان عندي فرشاه من سيقما سيئه جدا وتطلع خطوط شكرا ع كل شي يا اطيب اطيب اطيب قلب
احبك من كل قلبي
أسَعدت أني قَدرت أفيدك , وَ أنا أحب تَواجدك حبيبتي
لا خَلا وَ لا عَدم ..
سلام ارتوسه هل الكونسيلر يستخدم فقط تحت العين وين ممكن استخدمه كمان و
بعد مااحط الكونسيلر احط هاي لايت تحت العين اواكتفي بالكونسيلر والفاونديشن انا سنه اولئ مكياج واستفدت منك كثير دمتي بحب
وَش رايك أخليها بَتدوينة أفضل ؟!
لأن حتى لو جاوبت ماراح تَستفيدين شيء .. لكن بشكل عام فيه كوريكتر وَ فيه كونسيلر وَ فيه هايلايتر
دُمتي بَحب
شكرا ارتوس على التدوينه المقارنه افادتني كثير جزاكي الله خير
العَفو يا جَميل ..
كثير كنت انصح متابعاتي في سناب شات او الانستغرام واهلي وصديقاتي اهم شغله للمكياج الناجح بشره نظيفه وأساس نظيف في بنات يعانون من مشاكل في البشرة حبوب تصبغات هذا مش معناته اني احط اطنااان من الفاونديشن او الباودر عسب اغطي عدل لو كانت رسمة عينها خيال بيطلع الميك اب بشع لأن الأساس بشع طريقه الوضع غلط مثل ماقلتي مثل ما نوع الأساس مهم الأدوات المستخدمه هم بعد مهمه جربت امد الفاونديشن بفرشه ماك اللي شرا الباندا فضيعه ومضيعة وقت ومال ويهي يصير خرايط وفرشة الريل تكنيك اللي مع الطقم ما حبيتها خرايط بعد سيجما الكابوكي f80 هذي لاااازم اتكون عند كل احد فظيعه فظيييعه تدمج الفاونديشن صح بدون ما تكتله ولا تحتاجين كمية كبيره من الفاونديشن ،طريقتي بعد الترطيب والبرايمر امد الفاونديشن طبقه وحده بفرشة الكابوكي ع كامل ويهي وانطر ع بال مالفاونديشن يتجانس مع بشرتي ويطلع مرتب احط عقب طبقه ثانيه بالبيوتي بلندر لتغطيه كامله مرتبه وفلولس وثااابته أما اذا حابه استخدم كومباكت باودر استخدم الخطوة الاولى الكابوكي مع الفاونديشن وعقب بالبيوتي بلندر امد الباودر يطلع الويه ناعم مخملي مش كيك طبعا اخر شي مهم رشة الفكس عسب يتجانس كل شي ، عندي الكابوكي والبيوتي أداتين مكملات لبعض البيوتي استخدمها للكونسيلر وتثبيت الكونتور وسامحيني ع الاطاله معلومات حابه افيد غيري فيها وثااانكس موضوعج رااائع كعادتج
تَرى حَمستيني أعرف مَين أنتِ , حياك الله
وَ بالفَعل كلامك سليم ١٠٠٪ ما عَليه أي غُبار ..
وَ حبيت ذكرك للمُنتجات إللي جَربتيها بالفعَل كلامك دُرر إسم الله عليك ..
وَ بالعكس ما أعتبر إطالتك إطالة , إنما فَوائد وَ يا هلا بَك دائماً وَ أبداً بأي نَصيحة حابة تَقدمينها
نَحنا هُنا لتبادل المَعلومات يا مُحترفة
نَورتيني
انا ماطليت عالمدونه لفتره انشغلت ولما جيت اشوف اللي فاتني لقيتج ذاكرتني بكلام طيب جد جد جد انحرجت وفرحت وشعور متلخبط شكرا شكرا شكرا ارتوس انتي تعرفين انتي شنو تعنيلي وانج مرجع لي انا جدا سعيده برايك فيني ،يشرفني جدا وحده مثلج تقول عني كلام طيب الله يسعدج مثل مااسعدتيني جد ماعرف اعبر اكثر من فرحتي
بَعد عُمري وَ الله ..
هالكلام قَليل بَحقك وَ الله , وَ ياما أسَتفدت مَنك بتفاصيل التَفاصيل
إنتِ تذكريني بالزَمن الجَميل , لأن تَقدمين الشيء بَحب وَ بسلاسه وَ بقمة التواضع وَ بنفس الوقت مُتمكنة من مَعرفتك ..
وَ الله لا يَحرمني من وَجودك , لي الشرف بمَعرفتك وَ الله
نورتيني وَ دُوم منورة بكل حالاتك ..
وابتدت اجمل سهره ع اجمل مدونه لأجمل ميك أب ارتيست
معليه تحملي خقتي ;p
بالنسبه للبيوتي بليندر لاحظت تأكسد الاساس من اول ما هبيت فيها بس ابدا ما جا ببالي ان السبب رطوبتها :/
وشكراً من القلب على تقييمك لفرش سيقما كنت احتاج تقييم صادق من ميك أب ارتيست عشان اجربها لأن تاريخي مع الفرش سيّء خصوصا اللي اشتريها بناء على مدح الـ بلوقرز :((
صحيح انا بعد لاحظت كل اللي قلتيه مع البيوتي بليندر و الكابوكي احيان لو انا مستعجله للجامعه امد الاساس او البيبي كريم بالبليندر اسرع بس بنفس الوقت استهلك معاها كثير لانها -تبلع كثير اساس- !
بس فعلًا الاثنين مهمين و حلوات !
شكرًا ارتوس
يعطيك العافيه والله استفدت من مواضيعك وخلصه موضوع الاساس مع انواع الفرش والبلندر
تصدقين مره زهقت مايضبط معي الاساس مع البلندر ولا اي اسفنج احسه يمتص الكريم
وكنت امد الاساس باصابعي
ماطلع باقي تعليقي غريبه
المتصفح سفاري من ايفون هل له دخل؟
مرحبا .. تقريرك رائع بارك الله فيك واستفدت منه كم شغله .
انا ماخذه اسفنجة انجلوت الفوشية تشبه البيوتي بليندر نفس الفكره وتوزيعها ممتاز وبرضو كابوكي انجلوت لتوزيع الاساس.. وارتحت لهم اثنينهم
عندي فكره اتمنى تعطيني رايك فيها بما ان الفرشاة زي ماذكرتي تعبي الخطوط والاسفنجه تغطي اكثر ايش رايك استخدم الفرشاة اول وبعدين اسوي طبقه ثانيه بالاسفنجه ؟ 《《طبعا اقصد اذا عندي مناسبة كبيرة
تدرين اني مثلك ما كنت مفكره حتى ١٪ اجربها؟ مادري ليه بس بعد كلامك بشتريها اجربها طبعاً ?
شكرًا واحده لا تكفي ممتنه لك بكل حرف تكتبيه .. استفدت مرررره من قرائتي للمواضيع المتعلقة بمد الأساس والفرش ولكن عندي اسئله باختصرهم في سؤال !!
قلتي الفرق بين البيوتي بلندر وفرشة كابوكي،، طيب وش الفرق بينهم وبين فرشة ماك اللي تكلمتي عليها بمدونه لحالها !! انا حسب ما قريت وحسب القدره اللي ما امتلكها في التوزيع اشوف ومن (وجهة نظري) فرشة ماك تبيلها واحد محترف وأيده واخده على المكياج وخفيفه اما البيوتي بلندر تنفع حق المبتدئين وسهله جدا ومافيها عيوب بالمد اما كابوكي برش احس انها كويسه اذا فهمت كيف اعرف أوزع زين الأساس وإذا ابي تغطيه فل ،،
طيب عندي شي يراودني في مخي هو انه عادي استخدم فرشة ماك والبيوتي بلندر مع بعض (الفرشه أخذ بيها الفاونديشن واوزعه بالطريقه اللي شرحتيها (ايير رش) وامد بالبيوتي بلندر وكذا أكون حطيت كريم الأساس بكميات متساويه على وجهي وكمان اقتصاديه ههههههه ما ادري اذا فكرتي صح او غلط ووش ذَا الهياط انتظر تعليقك ??