صباح / مساء الشَفافيه وَ الإنصاف
بأوقات سابقه طَرحت بها ثرثرتي , لاقيت قَبول لها عَندكم
فقررت بين الفترة وَ الفترة أنزل لَكم القليل مَن حياتي وَ أفكاري وَ مُعتقداتي ..
قبل لا أبدأ بقصتي حابه أطلعكم على إختبار تَم تجربته على القرده ,الهدف منه معرفة رد فعل الحيوانات إتجاه الـ لا عدل وَ عدم المساواة
بما إن فحوى مَوضوعنا عن الإنصاف
الاختبار جداً بسيط جابوا قردين وَ كلفوا الإثنين بنفس المهمة ، طلبوا من كُل قِرد يعطيهم حصى بالمقابل قدمت لهم مُكافأة ، واحد من القرده كُفيء بقطعة خيار ، وَ القرد الثاني عطوه حبة عنب ،في البداية القرد إللي أخذ الخيار قبلها بس المره الثانيه إحتج وَ إشتط غيضاً
شوفوا المقطع , المَقطع بالإنجليزي بس سهل لأن ردة الفعل وَاضحه مايبيلها ترجمه
يعني حتى هالحيوان البسيط مايقبل الظُلم وَ عدم المساواة
نجي لقصتي إللي وعدتكم فيها ممكن تكون سخيفه بس هي تَجربه قد تلفت نَظر الأهالي إللي يشوفون إن إللي قَدامهم طفل مايفهم – وَبليز دونت جدج مي – لحد يحكم علي من هالقصه
القصه أبطالها ~
أنا وَ أخوي إللي أصغر مني وَ أبوي .
سلمكم الله وَ قتها كان عمري يمكن 6 سنوات ، عاد أبوي قرر يعلمنا لعبة الشطرنج وَ المكافأه يودينا السوبرماركت نشتري اللي نبيه
[عيله تتثقف بالرشاوي]
وَ تعودنا أنا وَ أخوي نلعب وَ أبوي الحكم , بحكم إني اكبر من أخوي دائماً أفوز عليه .
فأبوي حب يجبر بخاطر أخوي وَ لو مره ، فعطاني ذيك الغمزه اللي كأنه يقول عديها هالمره وَ خليه يفوز
عاد أنا وَ لا كأني شايفه ، وَ لما شافني مطنشه إضطر يحّكم تحكيم جائر وَ يتغاضى وَ يخليه يفوز .
عاد تحسبوني سكتّ … لا وَ ألف لأ ، أطلقت الوحش إللي بداخلي ، وَ ردة فعلي أشبه بردة فعل القرد اللي بالفيديو إما كانت أكثر عدوانيه .
مسكت لوح الشطرنج ورميته وفركشته شر فركشه [ كنت طفله عصبيه ]
وَ قلت لأبوي: يا شرير يا ظالم أكرهك ليه تخليه يفوز وَ تشجع الغباء
عاد أبوي قالي: عيب لا تغلطين خلك مؤدبه , وَ أنا ماسمع ما غير أصارخ
فقرر أبوي يعطيني درس ، طبعاً أبوي ماسبق وَ ضربني فكان يبي يأدبني ..
فجاب قلم رصاص , وَ على أساس يبي يضربي مَسك قاع رجلي وَ لمسني بالقلم ، يعني إنه ضربني
[كانت الضربة الأولى وَ الأخيرة ]
وَ عاد قابلوني حسيت بالإهانه مع إنها ماعورتني وَ ما سكت
فردت فعلي جبت لوح الشطرنج وَ رميتها على أبوي ههههههههه وَ طبعاً رحت اشتكي لأمي [ كم أنا بثره وَ مُستبده ]
إلى الأن أبوي يعايرني فيها يقول الوحيده بعيالي إللي ضربتني أرتوسه ههههه
المَوضوع ليس مَوضوع للتَفاخر , إنما هُو موضوع يتطلب به الَوقوف عند مَشاعر الطَفل
وَ انا طفلة مُتعودة طول حياتي عالنجاحات , وَ ما أبي أخسر بالرُغم مفروض أتعلم الخسارة
لكن ماعندي مُشكلة لو خسرت بَحق , وَقتها أخوي جداً صغير يمكن حتى ما يَفهم اللعبة
وَ حتى أنا ما كَنت فاهمه أصول اللعبة حتى 40 بالمَيه مَنها بس نلعب بقوانين بَسيطه
لكن كُنت عارفة إن اللي صار خَداع وَ غش ..
لذلك لا تَطلبون من أطفالكم إنهم يفهمون مَواقفكم وَ لا تعتقدون أيضاً إن أطفالكم أغبياء ما يَفهمون
حالياً ببيتنا فيه عَنقودين , أخر العَنقود وَ هو أخوي الصَغير وَ أنا
شكل هالسالفة أثرت بَهم , فما كان لهم إلا أن يَعدلوا
وَ إلى الآن أخوي الصغير ماشاء الله هو حالياً شاب وَ يدرس برا , مرات يَدق علي يَقولي إنتِ بخير ؟!
أقوله إيه وَش فيه .. يقول حَلمتك تصارخين وَ معصبه ههههههههههههه
[ يقصد إني أهاوش , يَقول بسم الله مَنك خرعتيني بالحَلم … صوتك مُخيف ]
فَعلاً أنا صَوتي وقت الصراخ حاد يكسر القزاز , مَثل صفارة الإنذار
وَ أكثر دعوة أخاف مَنها , دعوات أمي إن الله يرزقني ببَنت مثلي , تقول كل شيء فيك زَين إلا هالإستبداد وَ التَسلط وَ عدم السكوت عن الحَق
بَعمري ما سَكت عن حقي , بالرُغم أخسر الكثير لكن ما أقدر أسكت
كبرت وَ هالشيء كل يُوم يكبر بداخلي أكثر وَ أكثر
وَ من هالمَنبر أشكر كل عائلتي على صَبرهم علي , صراحة أهلي أستحملوني كثير وَ عطوني برستيجي
وَ الأهم خلاص لو أبي شيء هو إللي يَصير كلمتي ما تتثنى , وَ صلت لمكانة حلوه بقلوبهم
حتى الأن أتسلط عليهم أنا وَ ولدي ليون [ قَطوي ] .. يا ما طَلعتهم بأنصاف الليالي عَشان أغراض لليون
أقولهم ألحين خايفين مَن صوتي وَ لا مَحبة فيني ..
أخوي الصَغير يقولي بذيك النَظرة التَعجبية : الإثنين لوووووول
عَفكرة أجَمل شيء إنك تلاقي شَخص يحبك بعيوبك ..
يحبك فعلاً بعيوبك مَب يسلك لَك لأن شتان بينهما
دُمتم بَحب وَ برواق
صح كلامكك ارتوس انا للان اذكر اشياء بصغري بغض التظر ان كانت سلبيه او ايجايبه والاطفال ماينسو اي شي يحصل معاها وبعضهم بناء علي ماصار لهم يكملو حياتهم …. وبالنسبه انا زيك لما اعصب لدرجه مرا عصبت وطلع صوتي واستغربت من نفسي هذا صوتي ..بس كنت مظلومه بوقتها ودعيت ربي والله ي اسوس ماعدا شهر الا ودعوتي مجابه والله … طبعا صراخي اللي طلع ماكان علي احد من اهلي ع شخصه ما .. ومرا شكرا ع التدوينه
دَعوة المَظلوم مُستجابه
وَ الله لا يَذوقك طَعم الظُلم .. نورتيني يا سَهام ..
دايم طَلتك غير شَكل
ملللحك انتي وسواليفك
حياك الله .. نورتيني
صحيح اكبر غلط ان الاهل يعودون اطفالهم على كذا ، حتى ذا الشي يأثر بشخصيته بالمستقبل ، اذكر لما كنت صغيرة بالابتدائي كان اخوي اصغر مني بسنه ويوما هواش وضرب انا وياه وكنت اضربه يعني ما اسكت له بس امي طفشت مننا
ههههههههههههه طيب على وَش تتضاربون ؟!
كأن السالفة اللي كاتبتها لك ما نزلت كاملة :'(=))؟
حسيت فيه شيء ناقص لأن كنت أبي أعرف وَش سبب خلافاتكم ؟! ..
نورتيني بكلا الأحوال .. ما أبي اتعبك بالإعادة
تعجبني الشخصيه اللي ماتسكت عن حقها .. انا مرات يكون الموقف قوي واسكت ومرات بسيط واقلب الدنيا اتوقع هالشي يرجع لكوني جوزاء هههههه
فعلا معك بكون الاطفال مو اغبياء انا يستفزني الشخص اللي يلعب عالطفل او يكذب عليه لان الطفل حساس ورح يتعود على هالشي ولما يكبر رح يسويها
صَدقتي .. أكيد راح ينشأ متعود على الغلط ..
نَورتيني يالجَوزاء
آه ياقلبي كلامك قلب مواجع بخصوص اني الكبيره كنت اسكت ظن مني اني اقوم بالواجب وكنت اشوف عدم المساوه في اغلب التصرفات كبرت صحيح مازال مؤثر بعض الشي بس تعلمت الكثير ووالكثير وباذن الله لو ربي رزقني راح ابعد عن كل شي اثر في حياتي واربي عيالي صح
الله يَرزقك ما تتَمنين ..
وَ ماكان بودي أقلب عليك المواجع , إنما كانت مُجرد لفته حتى لا نَقع مُستقبلاً بمثل هالتصرفات مع الأجيال القادمه
نورتيني
ما عندي مشكلة اكمل هههههههه ببدا من عند ” امي طفشت مننا وقال لي انتي كبيرة وكبري عقلك وطنشيه واذا جا يضربك عادي خليه وهو بيطفش وكم مره قالت لي كذا بس ما زال ولما كبرنا شوي صرت بثاني متوسط وهو بسادس لسا متسلط ومفكر نفسه قوي للعلم انو معد يضربني بس يحارشني بالكلام وتغيرت شخصيتي كثير مستحيل اسكت عن حقي ” والله يسلمك سبب هواشنا بدون سبب هو كذا شيطاني الله يهديه يحب يحارش :'(=))
غلط مفروض أمك تقوله عيب هذي أختك الكبيره ياويلك لو لمستها
أو على الأقل البنات ما يتعامل مَعهم كذا , المٌشكله لو كُبر وَ يكون متعود عالضرب
بتصير ضربة رجال , فأنتبهوا من هالشيء ..
وَ الله يخلي لك أخوك وَ أمك , أكيد محارش طَفل ..
لكن لا تَكبر بداخله ..
هذا الكلام رغم انه البعض يشوفه تافه لكنه موجع و يستمر مع الشخص الين يكبر و المشكلة الأكبر ان شخصية الأنسان تتحدد حسب اول خمس سنوات في حياته و هذه الفترة تأثر علي حياة الشخص كاملة لان العقل الباطن يدون كل شي هذه الفترة و تبأ تبان النتائج في الكبر و هذا السبب وراء السلوكيات الغريبة لبعض البشر و اللي نعجز نلقي لها تفسير الاسباب هي من الماضي من الطفولة المخزنة في العقل الباطن للأسف الشديد أغلب الأمهات و الأباء ما يمكلون الوعي الكافي للتعامل مع الطفل و ما اشوف غير طرف تربية خاطئة حتي لو كان الطفل مدلل هذا لا يعني ان تربيته صحيحة
ارتوس هالدوينه على الجرح
<- باللهجه المصريه
الله يسامحه الله يسامحه الله يسامحه
بما ان الاسم مو ظاهر فخليني اتكلم الي بقلبي
فتحتي الجراح ياتوسه
والدي شديد متزمت مرا شافني اسمع اغاني ورمى جوالي بشده على الجدار وصار يصرخ وكب على وجهي كاسة مويه .. كانت حرارة المويه نفس حرارة الغرفه .. بس مادري ليه لحظتها حسيتها نفس موية النار من شدة وقعها في نفسي .. كنت صغيره مراهقه .. كان يمنعني اقول حقي .. كلمة حقوقي في بيتنا كانت مثل الشرك .. تصدقي هالموقف وكذا موقف والله لليوم لما اتذكره تدمع عيوني .. مادري ليش مع اني لو تعرضت لنفس الموقف الان مارح يألمني بنفس الطريقه .. يمكن لاني كنت صغيره وانتي عارفه كيف الذاكره في الطفوله والمراهقه ماشاءالله تخزن كل شي ههههه
وهذا انا كبرت وادرس وبدات ادرس حقوق و بعدها بدري شريعه اسلاميه هذا حلمي احس هالتخصصين بيخلوني اوعى واقوى وان شالله اوصل لمكانه عاليه يوصل صوتي فيها لكل المظلومين
والدي حبيبي وتاج راسي وكلامي هذا مو عداء له لا والله
بس تطبيق لحديث انصر اخاك ظالما او مظلوما
لوووووولز لو بتكلم كمان بحتاج صفحه كامله
ارتوسه انتي متل الزبديه الصيني ، وين مارنيتها بترن
حَبيبة قلبي , ما وَدي أفتح جراح .. بقول خليني أشاركك جَراحك
وَ إن شاء الله كلامي يَداويك لو ١ ٪
وَ فعلاً وَ حنا صغار لا تَنسين نَسوي من الحبه قُبه وَ نبكي على أتفه الأسباب
الشرهه على الهرمونات لاعبه فينا لعب حنا الحريم ..
وَ ماشاء الله عليك شَوفي تَجربتك وَين وصلتك ؟! .. وصلتك لمكان مَرموق وَ إن شاء الله تحققين كل أحلامك ..
وَ أكيد الوالدين لَهم معزه بالقلب , لكن ما يَعني أنهم ملائكة كلنا نَغلط ..
وَنورتيني الصَفحه كلها حَلالك .. حتى لو تبين تكتبين أي شيء وَ تخجلين أكتبيها بمُعرف وَهمي ..
يا زينك يا ارتوس ويا زين سوالفك ..
والله كان بخاطري مره اقولك كثري لنا من مواضعيك و نقاشاتك الهادفه بعد موضوع الفستان الليموني
فَديت قَلبك ..
أخاف مع الوَقت تَنصدمون مَني , أو تَحسون إني نَرجسيه أفرح بَعيوبي ..
تسلمين لي يا بَعدي ..
يوه يا ما قالتها له وطبعا يوميا اروح اخبر ابوي عنه ويهزأه بس ما يفيد حتى لمرة وصلت ان ابوي ضربه بس ما يفيد فيه :(=))
بَرافو عليك .. لكن فيه فكره ثانيه
خَذي بعقله حلاوه , أستميليه نَحوك بطريقه أو أخرى ..
ترى العيال خلقه طبعهم دَفش , يمكن يتسلى وَ يشوفه مَزح ..
جربي بيوم تسوين نفسك تعتمدين عليه وَ تحسسينه إنه رجال عأساس يَعني
هو توه صغير بس نَجرب وَ نشوف , ترى الذكور لو يصير عَمره ٥٠ سَنه فيهم جانب طَفولي سهل التلاعب مَعه
صرااحه الله يجعل مثواهم الجنه والدينك تنشأتهم جدا جميله
انا اشوف الاساس من الوالدين يعني امي كانت بصف العيال دووم
وماتعتبر شكاوينا شي وترا الحقوق شي ايجابي الواحد يعرف عنها انا احاول اربي ولدي واخليه يعرف حقه وحق الناس اتحفينا بمواقفك جدا تنورنا وكلامك له وقع بصدري كبيييير
آمين يارب ..وَ الله يَخلي لك أحبابك ..
بالنسبة لوالدتك لربما تعلمت من أجيال سابقه إن أحترام الرجل واجب
لأن زمان كان الوضع مُختلف أيام سي السيد فصعب تتغير هالنظره بجيل أو جيلين , يبيلها أجيال
لكن بتلقين بداخلها تحن عليكم أكثر وَ إن ما أظهرت المواقف هالشيء ..
أهم شيء لاجبتي بنت أعطيها حَقوقها كامله مثلها مَثل الولد وَ لا تقصرين عليها
الله يَخلي لك وَلدك , وَ شرفتيني صَراحه بكلماتك ..
شكراً لك ارتوس
حبيت اشكرك على عطاءك وكرمك معانا
اثرتي بشخصيتي والهمتيني
موقفك هذا قريته اكثر من مره كأُم وماتنلامي ياقلبي
فَرحتيني بَردك وَ الاهم ماحكمتي علي ..وَ عطيتيني فُرصه ..
العَفو حبيبتي , وَ أتوقع كلنا نأثر ببعض بَشكل أو بآخر ..
اول شي وش هالسعاده وهالشي اللي اول مره ادخله (المدونه)
شفت المقطع بالانستقرام وقلتي فيه قصه لي
.. دخلت هنا تحمست اقرا القصه
مو تطفل لكن لما تحب صفات بشخص تحب تعرف قصص تتعلق به
في مجتمعنا ماينفع اللي يسكت بالعكس يصيرون يقولون يسكت ماراح يزعل ويتمادون
لكن اللي ياخذ حقه هو اللي ماشيه اموره تمام ويريح راسه مو يسكت وينقهر …
مادري اذا فيه غلط في كيفية الرد اعذريني لاني اول مره اجرب
يا هَلا بالطَش وَ الرش , المُدونه كلها تَباركت بَطلتك ..
وَ الله شرفتيني أكثر بهالمَحبه وَ دُوم غامرتني بها بكلماتك اللطيفه ..
سُبحان الله الأحاسيس مَرات تنشاف ..
وَ ردك وَصل ١٠٠٪ بالميه وَ هذاني أرد عليك ..
بالنسبة لنظرتك هذا الواقع إللي يَسكت يقولون أهبل وَعلى نياته خلونا دايم نستغله ماراح يَتكلم ..
بس إللي صَوته عالي يَخافون من صَوته ..
ااااءءء جانب جديد في اردوسه .. مره اغبط اللي ما يسكت عن حقه بس يبيله قلب قوي لان ممكن تخسر كثير , وطبعك هذا بالرغم جميل بنظري الا اني احسه مرهق شوي للشخص نفسه قبل اللي حوله , والله يخلي لك اهلك , وكالعاده بقول “الله يخلي ابوك ” احسه شي طيب ….
المهم موضوع جديد وثرثره مثريه … تشكرات كثيرات
ههههههه أبوي صَراحه مَعطيني وَجه
بالرُغم أخواني الكبار يقولون إن أبوي كان شَديد جداً مَعهم , مُمكن لأن إحنا الصَغار صار عَنده برود
بصراحه بالعَربي أمي كانت تَقوله : إنت مَسلم لهالأثنين الخَيط وَ المَخيط .. بالرُغم جابنا على صَغر يمكن كان عُمره ٣٠ سنه بهالحَدود
بالنسبه للأرهاق أكيد مُرهق , وَ مرات تتواجه مع ناس مو مثل أهلك
مُمكن يقلقون راحتك أو يأذونك من تحت لتحت أو يَغلطون عليك وَ يشوهون حياتك
بس بنظري بتعذب كم يَوم بس النهايه بَوصل , لكن مرات فيه جهات أكبر بكثير مَنك ما تَقدر تقاومها
هذا مَوضوع صَغير عابر , شيء مَلائم ليوم الخَميس
هﻻ ياعيوني ..
مدري ايش اقولك غير انك تشبهين كل حته فيني .. صرعتك صح ..
المهم انا لمن كنت صغيره كنت زيك بالذات في الانتقام( تذكيرن سالفه الليموني ( ههههه ..
المهم بقولك احداث الاستبداد حقتي ..
طال عمرك لمن كام عمري يمكن 5 او 4 سنوات كنت احب الشوكﻻه اللي تجي ابيض واسود .. يعني الشوكﻻه البيضاء والسوداء ..
كانت غرامي .. كنا بزواج اﻻ اشوفلك وحده معاه يمكن درزن مشبوكين في بعض
وقامت الدكتاتورية اختك وتطالب امﻻكها بكامل صوتها وصراخهها
ابغاه وجيبوه لي .. امي هنا تفشلت وقالت خﻻص اشتري لك رفضت
ابغاه ابغا اللي معاهها .. طبعا امي اعتذرت ﻻم البنت ( اقاربنا )
وطلبت انها تعطيني .. طبعا البنت طول الوقت مبحلقه
المهم اعطوني حبه .. اﻻ اصرخ ابغاه كله ..
ياليل الصراخ .. المهم اعطوني اياه كله وسكت وقتها ..
بعدين امي وصت عمتي لمن كانت صغيره تشتري لها مثله ينقال تعويض .. بس كان تعويض مادي اما التعويض النفسي عليه العوض ..
المهم لمن شفت انها جابت لها شئ وانا اعتبره اللحين حقنا
قمت ابكي ابغاه ﻻنو حقنا … طبعا امي يأست مني وشالتني ورجعنا البيت
عقاب امي لي انا ما تكلمني ..
والصراحة عقاب مؤلم .. والحين كبرت ومازال فيني هالطبع اني ما احب احد يستواي على شئ من امﻻكي .. تطلبني شئ اشتري لك جديد لكن اعطيك شئ من حقي ﻻ ..
بس عاد ما صرت مستبده على اشياء غيري ..
بس حقانيه وبقوه .. وكلمتي هي اللي تمشي بالطيب وﻻ بالغصب ..
وامي تدعي علي وتقول الله يرزقك ببنت زيك ..
بس انا ما اخاف من الدعوه دي .. ﻻني بكون فاهمتها لو كانت زيي وفاهمة نفسيتها ..
اكره عنادي لكن ما ودي اتركه ..
نفسي اتخلص من عقده انو اذا احد جرحني انو ما اقدر ما امسك لساني
امنيتي بالحياه امسك اعصابي …
ودمتي بحب
هههههههه ضَحكتيني فَعلاً فيه تَشابه بَس إنتِ أكثر إستبداداً مَني
أجل طلعتي عَيون البنت وَ عيون أمك , عرفت هالشوكولاته زي النوتيلا طَعمها بَس للأن بذاكرتي أطَعم
وَ أحلى شيء لما أخلطهم الأثنين سَوا ..
لا أنا صراحه أخاف من الأطفال إللي مَثلي لأن لي مَواقف صَعبه , ياما طَيرت عيون أهلي
مُمكن تكون مَثلي بَكل شيء الا بهالطباع , أخاف أبوها يَكرهها يَقول يا دُوب نتحمل الأم تَجينا البنت ..
نورتيني حَبيبتي إنتِ وسوالفك الحَلوه
يسعد صباحك توستي اهنيك على قونك وشجاعنك عن نفسي ما عشت هالاجواء لاني طفله وحيده واهلي انفصلو عن بعض فسبب لي حساسيه شديده وكنت اتنازل عن حقوقي ورغباتي
حتى لا جرح غيري بتضحكين علي لو قلت لك لني ما كنت االعب هاريبا ااو اركض بالمدرسه حتى لا اصدم احد .الحين تغيرت وقسى قلبي عقب وفاه الوالده لاني الاغلبيه قلبو علي وبينو
اعلى حقيقتهم وجرحوني كثير باتهاماتهم فصرت احس ان فيني طاقه سوداء ورغبه بالانتقام
واحاول اتناسى
واعيش ايامي مع عيالي وبربي فيهم انهم ما يستكتون عن حقوقهم ولا يسمحو لاقرب الناس يستغلونهم
إنتِ إنسانه حساسه جداً .. وَ هالشيء مو عيب
لكن لا تَحولينه لقسوه وَ لا تخلينه يسرق مُستقبلك , الضربه إللي ماتقتلك تَقويك ..
شوفي الجانب الإيجابي , مُمكن الأن صرتي أقوى وَ الاحلى إنك بتعلمين عيالك اللي كنتِ تخافين منه
أو تتجنبينه , والله يَرحم والدتك وَ يعوضك عن كل شيء فَقدتيه ..
عَقد الطفوله شَوي تكون قاسيه حتى لو كانت بسيطه , لأنها ترسخ بالذهن ..
نورتيني حبيبتي
مدري ليش اكلج كثير .. مو اعتذر للقارئ بقد ما اني بقول معلومه .. اللي كبجاته او ﻻزمات لسانه كثيرة .. هذا فيه شئ داخلي خربوطي عنده … طبعا من وجهة نظر نفسية .. بس ياترى ايش فيني أنا ؟؟؟؟
يمكن انسانه عجوله ؟ يمكن مااحب انظر للوراء ..
ماودي اقلب مدونتك عني ..
سؤالي ايش ﻻزماتك ارتوسه ؟؟
لا أعتبره من الحَماس , لا تتحملين واجد الحياه سَهالات ..
هههههه لزماتي كل مره بشيء بَس بتلاقين كلمة طبعاً .. طبعاً
أو يلي .. يلي .. يلي ههههه أو إللي .. إللي .. لأن غالباً أكتب تَدوينات وَ أسابق أفكاري وَ أكتب مُباشره
وَ اكون واعدتكم وَ تأخرت فأكتب على عَجل .. مرتبطه بزمن مُحدد
خنقتني العبره ياارتوس مدري عشان بعبر عن مشاعري لك ولا تذكرت معاملة ابوي الله يرحمه ويغفر له انابنت وحيده بين عيال وابوي اكثر انسان في الدنيا كان يحسسني اني اميره ماينقصني عن العيال شي لا اميرتهم بعد الله يرحمه ويغفر له ويرحم امك ويغفر لها ويطول بعمر والدك ووالدتي على طاعته يارب ..
️
استغل التعليق عشان ابوح بمشاعري لك ههههههه
ارتوس انا جدا جدا جدا جدا معجبه بك تعجبيني بدرجة كبييره واحب تفاصيلك مع ان فيه اشياء كثيره اختلف معك فيها واشياء اتناقض معك تماما فيها بس مدري ليه احبك كل هالمحبه الله يسعدك دنيا واخره
انا عكسك كنت طفله هادئه ولان هادئه بس هذا الهدوء هو اللي جراء الناس علي وحتى اقرب الناس لي لدرجه تعرضت لتحرش كثيرر في طفولتي جتني فترات كنت اكره نفسي ،وللاسف للان اعيد نفس الاخطا مو لاني ماتعلم لا لاني هشه من جوا ومنكسره احساس النقص اللي ضل مسيطر علي من طفولتي ماقدرت اتخلص منه بالعكس كل ماله يكبر صرت استمد قوتي من غيري.
احب سواليغك ي ارتوس واغلب افكارك قريبه لي ♡
ذكرتيني بالطفوله انا مثلك كنت اخذ حقي حتى لو ضربني احد
ضربه بسيطه لازم اردها لها بالمثل بس م احد ياكلها الا انا اتكفخ كثير خصوصا من بنات وعيال عمي كان عمي و زوجته يسكتون م يبعدونهم عنا او يوبخونه لا
استمتعت وانا اقرا لك.. كعادتك اسلوب وطرح .. اهنيك على هذا القلب وهذا القلم… وسعداء جدا عن كشف جوانب من حياتك وافكارك وشخصيتك … اتمنى لك السعاده والتوفيق…
ههههههههه ياحليييك يا ارتوس
من جد هذا الشي الي بإذن الله أحاول أربي بنتي عليه
انها ما تسمح لأحد ياخذ حقها أو يسيء لها
اتذكر لمن كنت صغيرة كنت قوييية بأخذ حقي و حق اخواتي
لأن أنا الكبيرة
و ما كان لنا أخو فكنت بدور الاخ في الحماية خخ
اخذ حقي وحق أختي
و ابوي كان أكثر واحد يشجعني
وكان مدللنا لآخر درجة
ولما كبرنا عرفنا سر هالدلال
يقول انه قبل لا يتزوج امي كان يدعي ان ربي يرزقه بثلاث بنات اول شي بعدين ولد
عشان ينال الفضل في حديث من عال جاريتين حتى تبلغا كن له حجاباً من النار
و سبحان الله استجاب ربي دعوته و جابت امي ثلاث بنات بعدين جابت اخوي
فعشان كذا كان ابوي هو اكثر واحد يشجعنا ناخذ حقنا
طبعاً ما كان يقول نفس هالحريم اذا طقك طقه
لا كان يقول اذا احد بياخذ منكم شي و ما تبونه ياخذه قولوا لا و لاتخلونه ياخذه
و ترا محد بيقدر يتعرض لكم
واذا صار لكم شي تعالوا لي
و فعلاً كنا نقدر ناخذ حقنا الحمد لله
الله يخليه لك ويطول بعمرهـ يارب والله يرحم الوالدة ويغمد روحها الجنه
فعلاً شي جميل مانسكت عن الظلم والاجمل مؤازرة المظلوم
انا ماحب اسكت عن حقي ابداً ابداً
ماشاء الله عليك أنتِ كذا
@iartos كتبت تعليقي فى المدونة كذا مره وماطلع لذالك راح اكتبه هنا مشاعر والدك كانت جميلة جدآ بقدر ما احزنتك فى حينها يكفي بأن احب آن تتقاسمي مع اخييك حتي مشاعر الفرح والنجاح واتوقع علاقتك حاليآ مع اخوتك وحبك لهم ماجاء الا من مردود تربية سليمة حفظ الله والدك ارتووس في دواخلنا شي يرفض إن نرا من نحب في حالة ضعف او خسارة وهذا الشئ الي خلى والدك يتصرف بهذآ التصرف. يعني الأمر مربووط عندنا بمشاعر الحنان والخووف بأن يفقد الطرف الخاسر ثقتة بنفسه يعني مثلآ انا اذكر جدتي الله يخليها لنا اذ جات تكافأنا على النجاح تعطينا كلنا نفس المبلغ وتعطي الراسب اضعاف ماعطتنا طيب ممكن يجي ببالنا بأن الرسووب والفشل شي حلووو بس لما كبرنا فهمنا وش السبب وراء هذي التصرفات دئمآ يجي ببالي بأن ردات فعلنا وسلوكياتنا وراثية مهمآ بلغ الأنسان من العلم والثقافة يعني ممكن تمر علي شخص مواقف تخلية يتصرف بتصرف اكتسبة من والدة او جدة ومازال يعمل فيه حتي لوو كان على قناعه بأن هذا التصرف غلط بسردلك ياتوسة قصة سريعة حصلت معاي قبل عدة اسابيع والحين من خلال قراتي لتدووينك تذكرتها انا عاشقه للعبه الهووكي ووصلت لمرحلة مافيه احد من اخواني واخوواتي يتغلب علي في هذي العبه وفي احد اجتماعاتنا وتحدياتنا قررت بأن يكوون التحدي بيني وبين والدي وقتها يا ارتوووس بدأت العب بكل حماس وبدأت بتسجيل الأهداف وفجاءة على نهاية العبة قررت بداخلي انه ماراح افووز وحابة اخسر بدوون ما احسس احد انه انا فعلت هذآ الشي عمدآ و ماعرفت وقتها كيف العب وقتها الكل متحمس وينتظر مرحلة الفووز وداخلي كان جدآ متوتر كل تفكيري حينها مو متخيله انه افووز وبالطرف الثاني والدي الخسران انتهت العبة بفوز والدي وخسارتي وكانت اجمل خسارة خسرتها في حياتي حتي ماكان بداخلي مشاعر زعل. دائمآ تسعدينا ياتوسة الله يسعدك
ماشاء الله ارتوسه الف مبروك على المدونة الجميلة <3
بالتوفيق يارب و الف شكر لمجهودك الواضح <3
تظلين عطر السعادة في الأجواء بدون منافس
مااعرف كيف اعبر لك عن مدى امتناني لك …و احيي فيك أخلاقك
اللي صارت نادرة في زمن الأخلاق الحسنه ، انتي من النوادر <3
التدوينات قرأتها اكثر من مرتين و استمتعت و كأني اقرأها لأول مره سبحان الله اسلوبك عسل على القلب تستحقين الشكر كل لحظه
و من نجاح الى نجاح اكبر بإذن الله <3
تدوينتك جميله و اكثر حاجه شدتني يوم قلتي متعوده ع النجاحات
السلام عليكم ..
ابد ما ذكرتيني بنفسي وانا صغيره >>لول
بس سبحان الله كبرت وتغيرت وصرت اكره ذي الصفه ولو انها تعجبني >>عاد افهميها .
والله يحفظ لك الوالد ويطول في عمره ..
….
ارتوس حبيت اسستفسر عن حبوب صغيره في وجهي بنفس لون الجلد ما كانت موجوده فيني وفجأه ظهرت
حابه اعرف وش هي ووش علاجها لان شكلها مزعج بالنسبة لي …
والله يعطيك العافيه
love u
بصراحة أحييك على صراحتك … بس كان لي ملحوظة المفروض الوالدين مايظلمون الأبناء ويعطون كل طفل حقه والعدل بينهم .. لأن هذا الشيء يورّث الحقد والبغض بينهم … بس لو أنا مكان أبوك كان قلت لأخوك عشان هي كبيرة وتفهم أكثر فازت بس شوف أنا الحين بألعب معاها وأفوز عليها لأني أعرف للعبة هذي أكثر منها .. وأفوز عليك .. وبكذا أضرب عصفورين بحجر ( أذوقك طعم الخسارة ) و ( ويشعر بطعم الفوز عليك ) …
أنا عندي ولد ٤ سنوات كان يلعب مع أخوه اللي في الجامعة وتخيلي يعني في الجامعة ورافض ان الصغير يفوز عليه وجاء يبكي الصغير ويقول أنا مافزت … قلت طيب شوف كيف بأفوز عليه ولعبت معاه وفزت عليه وفرح ولعبت مع الصغير وخسرت نفسي وفرح جداً وتعزز جانب لديه كبير … والكبير ذاق طعم الخسارة …
أتمنى تجربتي هذي تسهم في حل مثل هذه المشاكل …
لكن أؤكد وبشدة أن العدل بين الأبناء في العطاء تسهم في المحبة بينهم …
دمت بحب .
قصدي من تذوق طعم الخسارة .. هي ليس تعود الشخص على الخسارة وليس المذلة .. لا .. ولكن الإنسان الناجح لابد ويمر بأمور يخسر فيها … وهنا يتعلم كيف يتعامل معها … وأحياناً نخسر أمور يريدها الله ليربينا ويرزقنا بخير منها …
ارتوس والله انك حبيبه بس عندي سوال لاحظت كم مره تقولي عنك حاجه شيويه تحرج وتبين انك شريره ونرجسيه ومتكبره ماهمك ايش يقولو الناس عنك ؟! وكيف متقبله دا الشي في نفسك يعني كيف منحرجه من نفسك واتمني ماتفهميني غلط
أجل انا كلش مسحوب على حقي وانا صغيره ومراهقه ماكنت شريره كنت زي مايقولون دابه سليمه كنت ما احب الهواش وبس اسكت ما احب احد يقعد يصارخ وكذا ياه شقد كنت اصيح لوحدي وقلبي مكسور ياحياتي يا أنا :/
لكن شوفيني الحين تغيرت 180 درجه تعلمت من حياتي تعلمت من مواقفي اللي صارت صار الزم ماعلي حقي لو يزعلون طقاق اللي يزعل زاتو يراضي زاتو هههههه
و احمد ربي ع كذا اني تغيرت : ) .
ياحلوك ارتوس والله يزيد المحبة يارب ويخلي لنا حبايبنا () وإحنا نحبك ارتوسه .
هههههههه آه تدرين يسموني صفارة البيت
بس ايش اسوي اذا عصبت ماشوف حولي احد
هذي نقطه و الشيء الثاني لو احد غلط
ونقص بحقي شيء سواء معنوي
او حسي ممكن الغي الاحترام
الي بيني وبينه و اعلمه كياني ومستحيل اعدي
احب اعيش حياتي وَ ما اسكت عشان خاطر احد
وامي ياما دعت علي وضحك لما وصلت عند هالسالفه
حقتك هههههههههههههه
للتوضيح امي تدعي تقول عسى بناتك يطلعون عليك
بس اعتبرها دعوه جميله هههههه :$
ارتوس الحين انتي اسمج ارتوس اوهذا لقب ؟
هالبوست لامس فيني حاجات كثير .. ثانك يو فور شيرنق توستا ♡♡
اجمـــل شيئ اقراه في مـــدونتك لما تتكلمي عن جانبك الشخصــي ، بِبساطه لانــي احب شخصيتگ واحب اكتشفگ اكثر .
للاسف الشـــديد اصنف شخصيتــي بالضعيفه ، والسلسله اللي تحاول تتجنب المشاكل وتتعامل بسهوله مع الناس .
اتعبنــي هذا الشيئ بشكل قووي خصوصا ، ادركت ان الوقت مَ تأخر عشان اعدل شخصيتــي ، ببساطة صرت ام وصار عندي طفلين وصارت عندي الحياه الخاصه ، وعدت نفسي اولا واولادي ثانيا انّ اكون الشخصية اللي ماتقبل الظلم ، ولا ترضــاه على نفسها واولادها ، نوعا ما شخصيتي تتعدل وصرت اواجهه وعندي كامل الاستعداد استمر اكثر ، لان النتايج مرضيه جدا ع الجانب النفسي بالنسبه لي .
دُمتي ورحم الله الوالده
تذكرت اشياء حزينة ،. ودمعت عيوني:(
كنت حقانيةمن صغري
بس كانو اهلي يقولون لي عوبا ويقفون ضدي
عشان خاطر اختي ،
ف صرت اخاف من الحق والرد ولازلت ،
محظوظه بأهلج حلوه طؤيقة تهذيبهم ربي يخليهم لج
انا ةاخوي اللي اصغر مني طق و مطاقق بالبيت ع أي شي اهاوشه وهو ما يتحمل
الين امي مره لبست عبايتها وفتحت باب البيت وطلعت , وقفت برا عند الباب و احنا فكرنا انها راحت ..
حزتها اتفقت انا معاه ما نتهاوش و اذا في شي ابيه يعطيني اياه او العكس عشان امي ما تطلع
رجعت امي كانت تسمعنا اساساً فمتعمده هالحركه .. وليومج أموري انا معاه عال العال =))
تعودت اسكت واتنازل حتى عن اغراضي
بنتي الحين عمرها سنه ونص اذا اخذت شي منها لازم تاخذه واذا شافتني ماسكه اي شي لازم تاخذه واشجعها على هذا الشي واذا احد هاوشها امسك يد بنتي واخليها تضرب الي يهاوشها بما انها ماتقدر تتكلم ابغاها تاخذ حقها من اي شخص كبير او صغير ولا تتنازل عن اغراضها لاي سبب
ارتوس شخصيتك جميله ماشاء الله
اتمنى بنتي تكون نفسك
معليش سؤال خارج الموضوع ممكن اعرف اسم الخط الي تكتبين فيه تدويناتك شكرا
ياحبي لك ماتوقعتك عصبيه كذا ههههههههه بعذرك نحيفه كذا تصدقين انا ماجتني العصبيه الا من تالي إذا عصعبت أصرخ واحس الأحبال الصوتيه توجعني
صراحة جمييييلة مدونتك نبهتني لأمور كثييير بخصوص التربية يعطيييك العافيه بالرغم إن دموعي مانشفت طول ماااقرا القصه قلبت المواجع لكنِ طلعت بقيمة وفايدة بخصوص التربيه
هههههه ارتوس الله يهديك ذكرتيني بمواقف ماضية تقهرررر
شخصيتك فيها شبه كبير من شخصيتي وأتوقع أن شخصيتك هي شخصية العقل المدبر
ارتوس تعرفين البوصلة الشخصية كل ما اقرأ فيها خصوصا الشخصية الشرقية اتذكرك ، وكل ما اقرأ إي كلام تكتبينه اقول في نفسي شرقية شرقية ، ادري ماتحبين احد يحلل شخصيتك الخ بس فعلا حبيت اعلق
لفت انتباهي شيء كنتِ طفلة لكن كان عندك مصطلحات عندك ثراء في الكلمات ( لاتستغربي ) يمكن لو تعرفي كيف كنت في طفولتي كنتي حتبكي والله أًصلا ماراح تصدقي إنه هذه أنا
ماكان فيه قوانين محددة البقاء للأقوى والأدهى وفعلًا جمعت الاثنين رغم اني ماكنت ولا وحدة فيهم , كنت أحس بالقهر والاضطهاد بس مافي بوصلة ترشدك في أي طريق راح تمشي أو هل أنا الوحيدة ولا في غيري يعاني مثلي – كان عندي أخوات بس ماكانوا مثلي كانوا انسحابيين- وعلى فكرة مسلسل سالي الكرتوني كرّس في بعض الأطفال صفة انك لما تكون ضعيف وحزين أمك راح تعطف عليك فكنت امشي بضعف ماالقى الا الخبطة أو الضربة امشي عدل لوووووووول
سنين وكانت هذه الذكريات تؤسرني وتقيدني وتبكيني إلى أن وضعت حد لها كتبت كل شيء وقطعته ورميته وراي … إلى الآن أنا عاجزة ألقى قدوة لي في مواقف معينة .
– قلبتها دراما صح – بس أنا متأكدة إنه في بنات إلى الآن عايشين مثل ماكنت أعيش أنا
والحل على النفس ثوراتنا أولا وثانيا اكسري القيد بذكاء ..
غَريب لأن مَن عنوان مُدونتك وَجدت إنك من أكثر الشَعوب إتقان للغة العربية
فأكيد عَندك مٌفردات جَميله لكن ما تَم تحفيزك لها من الصغر ..
بالنسبة لسالي ما وجدت هالشيء يمكن ما أذكره زَين زين , بس اللي أذكر إنها كانت يَتيمه ..
مو بالضروره يكون لك قدوه بالحياه على فَكره , كَوني كما أنتِ .. طالما إنتِ إنسانه صالحه ما أظن فيه أي إشكاليات أُخرى ..
وَ أكيد فيه كثير يقبعون تحت ظَلم بس ضعف الحيله مو الكل بإمكانه التَمرد
نَورتيني وَ إن شاء الله أشوفك عَطول مُشرقه وَ سعيده
شكرًا لك ..
يا حلوك وربي مت من الضحك بس اقول لش شي وما تزعلين انا والناس العصبيه مش أصحاب ولا أعرف اتعامل معهم واسوي اللي يبغون خوف منهم ..شخصيتي تنرفزني نفسي اصير قويه
بس مُمكن أكون أنا وَ أنتِ أصحاب ..
فيه عصبيه بقلة أدب وَ بدون سبب , هههههه ما تَدرين هذاني أنا وَ أنتِ نتكلم ..
والله انتي مثلي ماعرف اسكت عن حقي .. والصراخ وقت العصبية عجزت القا له حل
هههههه الصراخ ماراح يجيب نتيجه , لكن مرات يخوف
وَ مرات يعقد المٌشكله , لكن بالنهايه يَفش الخلق بالنَسبه لي
كلامك دُرر تُرفع لها القُبعة ..
أنا شخصيتي مُشابهه في أمور كثير منكِ ..
الأهم بالموضوع :
انا إنسانه أكره الظلم والتسلط والإستبداد جدًا جدًا ..
لكن المُصيبة الأعظم أنو بغض النظر عن الأطفال و طريقة التعامل معهم ..
تلاقين كثيييير من الجامعات تتبع هالنظام ” الظُّلم ” في كل شي ..
صار لي اكثر من موقف بالجامعة انظلمت ظُلْم شنيع و مع ذلك جيت بدافع عن حقي بتكلم بسمعهم صوتي بس للأسف اذا ما كانوا اللي معاي متحدين وكلمتنا وحده راح يكون كل الخطأ علي ” بإعتقادهم ” أنتِ الوحيدة اللي عارضتي أنتِ الوحيدة اللي بتتعاقب سواءً بالدرجات سواءً بالحرمان … الخ
يعني أمور تأثر بمعدلي الجامعي ولو جيتي تشكين لمسؤولة دات منصب مسموع ف الجامعة تنصدمين إنّو فكرها طبق الأصل منهم ” الظُلام ”
بكذا اضطريت للسكوت و رفعت يدي بالدعاء عليهم ..
كل هذا علشان ما يقولون لي ” جنت على نفسها براقش ”
دُمتي بعقليتك المثقفة تُعلمين و تُفيدين الكثير ..
يمه منك هههههههههه … بس طلعتي طعمة بعد الفستان الليموني جيتي بالشطرنج لا ورايحة تتظلمين عند امك .. اش كان رد فعلها اعطتك جوك والا وجهتك كعادتها… الله يرحمها
ياحبي لك ياارتوس… انا عكسك انسانه مساااالمه لابعد درجه وام دميعه .. بس اهلي الله لايحرمني منهم مايتحملون دمعتي او غصتي كله الا دمعه مني يعرفون اني ماعاد اتحممممل خلاص وصلت حدي
الله يَخليهم لَك ..
انا اهلي معطيني فوق حجمي كسن كنت اتحكم بكل شي مع ان عندي اخوان عيال اكبر مني انا اللي اختار المطعم لو بنتعشا برا انا اللي اختار وين نسافر انا اللي اختار ملابس امي وانا اللي احط لها المكياج
كنت حقوده وحساسه وغيوره ودايم احس بيني وبين الناس منافسه لازم اصير احسن وحده تقريباً لما دخلت المراهقه وتزوجت بذا السن بعد زواجي تغيرت شخصيتي جداً جداً صرت اتمنى الخير لناس وافرح لهم وبعيده كل البعد عن المنافسه حتى المنافسه الاجابيه اسمع كلام ينقال عني قوي وربي مااكره اللي قالوه واوقات اضحك من كلامهم وكان عندي كبرياااااء عظيم مااطيق احد يحطن غلطانه بينما الحين باالعكس اجلس واسمع لهم واذا حسيت انهم فاهمين قصدي غلط وشالو بخاطرهم يضيق صدري واجلس اشرح وجهة نظري مااااااا احب ازعل احد من ابداً
ومستغربه من نفسي مثلاً لو غلط معاي اي احد اجلس اخلق له الاعذار ومعليش حرام يمكن مضغوط نفسياً يمكن يمكن الا زوجي مستحيل اخلق له الاعذار ودايم مقدمه سوء النيه على حسن النيه بس مساااامحه درجه اولى ومااطيق ننام متزاعلين حتى لو هو الغلطان وهذي النقطه ماتعجبن فيني اني اعتذر حتى لو مو غلطانه لو انا اخذها من قول الرسول صل الله عليه وسلم خيركم الذي يبدأ باالسلام كان عادي افرح بنفسي واعتز اني اعتذر بس انا اخذها من اني مااااقدر انام اصلن
وراي قلت قصة حياتي!!!!!!
وش رايك ليه تغيرت شخصيتي بعد زواجي؟باالنسبه لي انه للافضل بس اش السبب مستغربه
بس على فكره للحين عصبيه واتحكم بس طبعاً عند زوجي مو مثل اهلي اللي كانو معطيني جوي ع الاخر ههههههه
يمكن كلامي مو راكب مع تدوينتك مره بس حابه اشوف اذا عندك فكره لسبب تغيري واشوف هذي انسب مكان تشاركيني فيه عن منظورك لسبب تغير شخصيتي
هذا*
الله يديم عليكم المحبة ولايغير عليكم يارب ويديمها للجميع ياربب وكل عيلة فيها هالشخصيات وقصص واختلافات كثير ويقبى الكل متعلق بالذكرياات
وشخصية الصغير اللي مرة ناشبلهم فكل شي وكمان كسول فدراسة ههههههههههههه نعم انها انا الحمدلله اني كبرت لازالت اخجل من طفولتي بس للحين الكل يقول كان علية حركات اصرار وعناد فالاخير اندم بس الواحد يكبر ويتغير من المساؤى ..
لازلت عنننيييييدة ترا هههههههههههههه
.. استمتعت بالقصه ..
نفس طبعي أرتوس مع أنّه ممكن الحق ينقلب ضدي من صراخي وكلامي الكثير مع ذلك ما أسكت ^=^
أحس أني ما أقدر أكتم في نفسي لأني لو ما اتكلّمت بأروح أبكي وأفتح لهم مناحة خخخخخخخخخخخخخخ
وأنا بعد آخر عنقود البنات بس جا بعدي ولد وسيطر على مكانتي :”(
يمكن أنضرب التدوينة صار لها سنتين ههههه
بس مصرة أعلق ترى اول مرة اشوف هالتدوينة
بقلك موقف صار لي في أولى ابتدائي مرة حضرت لنا المشرفة الحصة الثالثة
عاد تعرفين الأبلة وقتها تطلع كل مهاراتها بالشرح وتتمطع
لين خلصت الحصة الثالثه ودخلنا الفسحه والأبلة باقي تشرح والمشرفه لازقة
وعيوني برا الفصل البنات كل الفصول طالعين لعب وجري وأكل واحنا محبوسين ومر الوقت تك تك وانا انتظر اﻻبلة تسكت او المشرفه تضف وجهها
ياناس احنا أولى ابتدائي ارحمونا ..باقي نتفه وتخلص الفسحة
قمت اطلقت صرخه مدوية وبكيت وقلت بأعلى صوتي للأبلة
خلاص اسكتي
اصلا انتي ماتعرفين تشرحين ياهبلا أول مرة تحطين روج يوم جتنا هذي >> قصدي المشرفة ?
مو شغلي الحين تعطونا الحصة الجاية كلها فسحة
طبعا الحمد لله عدى الموقف على خير وكنت حديث الساعة خخخ
وفعلا اعطونا الحصة الرابعة كلها فسحة
بس مع انه صار كل الي أبغاه قضيت كل الحصة الرابعة انهش سندويشتي وانا ابكي وقالوا لي ليش تبكين
عاد جاوبتهم بكل براءة انه مافي غيرنا في ساحة المدرسة ماحسيت بطعم الفسحة .. حررقه مدري كله جوع ولا فاتنا اللعب ههههههه
الاستبداد جيد أحيانا هههه