وَحشتني التَدوينات المَيك آبيه
أساساً أنا مَيولي أكثر شيء بالمَاكياج , لَكن أحس لي 6 سَنوات سكتت
مع هبة الناس أحس أتعذب نفسياً لما أجيب طاريه

الماكياج اساساً للتجمل
وَ لكن بعهدنا الراهن صار الماكياج للتوحَش وَ التَرهيب ..
تخيلوا أعرف َحده تقتل جمال بشرتها بكثرة الماكياج , كل ما أشوفها بَعرس قلبي يَعورني

لدرجة أقول لأختي ثبتيني بالكرسي زَين
وَ قفلي فَمي بقفل , لأن وَدي أقولها بصراحه تراك حَلوه وَ هالمكياج يَزيل من بَهاء وَجهك
لكن هي فَرحانه أنا شَسوي بالله

أساساً مدري شلون زوجها أو حَمولتها
رضوا تطلع من البيت بهالشكل , وَاضح بشكل مُوب طبيعي أنهآ لاعبه بعمرها لَعب

حنا بعد عندنا ثقافة اللون الواضح ..
يعني لو وحده جابت ظل موف تبيه يبين بعينها موف موف , تقولين لهآ موهيه شَوي تقولك لآآآ
أبيه يَصير وآضح

وَ المشكلة بعد هبة الأي لاينر وَ الروج الأحمر
محداً يكشخ إلا زين هالستايل , هالخط خط كلاسيكي مَوجود دائماً

لكن تعليقة البشر عَليه مُشكله ..
هو دارج وَ لكن أيضاً دارج غيره , ليش ما نَشوف أي لاينر وَ روج بلون طَبيعي
أو بلون فاتح , مافي إلا أحمر وَ ليته من زين الأسنان بَعد وَ لا من زَين لونهآ
صفرا وَ تشمين ريحة الفم من بُعد 900 مَتر

بكلا الأحوال تَدوينتي عن الأرواج
بالغالب فيه ألوان تَجمل البشرة العربية وَ فيه ألوان تَجمل البشرة الأوروبية
البنك إللي تآخذه الأوربيه غير إللي تآخذه العربية وَ بالنهايه تظهر النَتيجه مُتساويه
يَعني يُخيل للبعض نفس اللون لكن بالحقيقه اللونين مُختلفين ..

وَ هنا الشطارة بالمَيك آب
غالباً العربية لو زَينت ألوان الشقراء بدل ما تصير حلوه
تصير رماديه وَ ما تظهر زَينهآ , لكن لو حابه تكَونين بنفس الأطلاله المُشرقه
وَ لكن بألوانآ أنا أنصح تختارين درجة اللون إللي تضفي جمال على بشرتك

و العَكس صَحيح
لو جبنا أوروبية وَ زينا لها ستايل عربي أو مكياج مُناسب للملامح الشرقية
راح يطلع شكلهآ أوفر و يمكن حتى نحس أن مكياجها زيادة عن اللزوم

المُهم أنا أخترت لكم هاللونين إللي أشوفها برأيي تليق على البشرة العربية
سواء كانت بيضاء أو سمراء , وَ حتى لو كنتِ أوروبيه راح تكون حلوه فيك , لكن أقَصد تضفي
أطلالة جَميله عالعربية وَ بالنهايه التجربة خير بُرهان , دائماً جربوآ

اللونين كَلهم من ماك
MAC


اللون الأول ~
The Photo From Temptalia

أسمه Craving
لونه تقريباً نفس لون الدراق
جاي على شَوية مُوف .. مثل الصورة تماماً لو كنتِ بيضاء حيبين فيك غامق
لو كَنتِ سمراء حيبين فاتح , وَ بكلا الحالتين أشوفه لون جَميل

تقييمي له مُمتاز وَ برجع أشَتريه

اللون الثاني ~
The Photo From Everything That Matters

أسمه Cosmo
لونه مثل ما أنوصف بالمَوقع إنه بنك كاكاو
يعني زهري شَوي كاكاوي , صَح بالصورة مَهوب كذا لكن المَقصد أنه موب البنك الزآهي
هاللون ظليت 6 أشهر ما أحط إلا هُو , لا هو فاقع وَ لا مُريع وَ لاشيء

دائماً يتناغم مع لون البشرة خاصه كنت حابته بالخريف بشكل عآم
بالنسبة لي أفضل من الروج الأول , لكن الأثنين حَلوين وَ مايعطونك هالمظهر إللي يحتاج مكياج كثير
أو تغطيه كبيره , أتوقع حتى بدون أساس راح يكون حَلو

وَ طبعاً طريقة وضعك للروج هي إللي تَغير من لونه
فيه ناس يحطون الروج طبطبه بحيث يبين كأنه رباني طبعاً بألوان مُعينه
وَ فيه ناس يعبون أول شيء بالمُحدد كل الشفاه من ثُم الروج
وَ فيه ناس يعبون بالروج بعدين بالبودر بعدين الروج
وَ فيه ناس يزينون بدل الروج آي شدو لأبراز اللون

يعني حَسب يدينك وَ شطارتك رآح يَظهر اللون

دُمتم بَحب

مُلاحظة / هذه التَدوينه تَم نشرهآ سابقاً بتاريخ 05-06-2013