صَباح وَ مساء الفل
واوووو صِدق السوشل ميديا سحبت البساط مِن التدوين
بالرغم أني أفضل التَدوين لكن عدد المُشاهدين في حسابات السوشل ميديا أكثر بكثير مِن مُشاهدات المُدونه
فالجمهوووور عايز كدا ، لكن يضل التدوين له طَعم خاص وَ تفاصيل لذيذة يصعب سردها في مَقاطع الفيديو لأن إللي داخل المُدونه شخص يبي يمخمخ فلأصحاب المَخمخه أسرد التَفاصيل هُنا
مِن فترة شاركتكم تجربتي بصبغ الشعر مِن مانيك بانيك – للإطلاع عالمَوضوع- ( إضغطي هُنا ) وَ كانت تجربه أعتبرها ناجحة وَجميلة
رغم أنها كانت تجربه جديدة مِن نوعها بالنسبة لي بإختيار لون الصبغة أو بإعتمادي على نفسي دون مشوره مُختص أو خبير بالشعر، أيضاً كانت أول تجربة لي بصبغ الشعر صبغة مؤقته ( متعوده على الصَبغات الدائمة )
الصبغة المؤقتة إللي يخليها تَفرق عَن الصبغات الدائمة إنها مَع كل غسل للشعر تفقد لونها وَ يبدأ ينسحب اللون
لأنها مًجرد طلاء سَطحي للشعر يعني لنفرض بما إني إخترت اللون الأخضر أول ما أصبغه راح يكون أخضر قاتم مع كل غسله راح يخف اللون لين يوصل تقريباً للون أخضر باستيل أو يرجع الشعر للون الأشقر المصفر ( أي اللون يرجع مِثل شعرك بعد سحب اللون تقريباً)
إلا اذا جددتي اللون بين كل فتره
وَ بموقع مانيك بانيك كاتبين إن ثبات اللون يختلف مِن صبغة للأخرى يعني قد تعاني مِن ثبات اللون في الألوان القويه أو القاتمه .
حتى لما شريت اللون الأخضر قالوا لي ترى إنتبهي هاللون صعب ينزل مِن الشعر وَ فعلاً ماكذبوا كان لون تقريباً كأنه دائم
وَ كنت حابه أغير لون شعري للون رمادي فمهم يكون لون شعري موحد وَ خالي من أي لون سابق فالحل إني أزيل لون الصبغة السابق
ففكرت قبل كل شيء
١- أزيل لون الصبغة السابق
٢ـ أسحب اللون مِن جذور الشعر إللي نبتت جديد
فالعملية تتطلب خطوتين وَ كان وقتي ضيق لأن كِنا داخلين على عيد الفطر وَ للصراحه العمليه تمت بشكل عشوائي بدون تخطيط
مِن المُمكن اسحب لون كل الشعر وَ قد أتخلص من لون الصبغة السابق مع تجديد الجذور مره وحده بس راح تكون العملية قاسية على الشعر
وَ كانوا كاتبين بموقع مانيك بانيك إذا كنت حاب تتخلص من لون الصبغة حاول الأتي
١ـ حمام زيت ساخن ( يخفف لون الشعر بالتدريج )
٢ـ شامبو قشرة أو شامبو منقي
صراحه مالي بالطويلة وَ لا أحب الزيوت فالخيار الأول ماكان وارد بالنسبة لي
شامبو القشرة عندي رُعب منه مَع الشعر المصبوغ لأنه ممكن يشابك الشعر بشكل جنوني لأني ما أستخدمه إلا ع الفروة أما ع الشعر جربي تحطينه على شعر مصبوغ وَ أوعدك بتقعدين ساعه تَفككين شعرك من التشابك هههه
فيه طرق منزليه لسحب اللون أغلبها بشامبو القشرة أو الباكينج صودا طبعاً مثل ماقلت لكم عندي عُقدة مِن شامبوا القشرة مع الشعر المَصبوغ بس بذكرها لكم قد تفيدكم
( تحذير ماجربت هالطريقة وَ قد تكون مؤذيه للشعر )
تخلطين كميه متساوية من = شامبو القشرة + باكينج صودا أو إستبدلية بفيتامين سي ( فيتامين سي لابد يكون لونه أبيض وَ مطحون لاتستخدمين البرتقالي لو شعرك فاتح لأن مُمكن يصبغ بشعرك )
تخلطينهم وَ تسوين عجينه وَ تندين شعرك شوي وَ تفردين الخليط على شعرك لمدة ٤٥ دَقيقة إلى ساعة بعدها تغسلينه وَ تسوين حمام زيت لأنه مُمكن يجفف الشعر أيضاَ مُمكن يجفف فروة الرأس وَ يلهبها
مُمكن ما تتخلصين مِن اللون مِن المرة الأولى وَ قد تتطلب مِنك تعيدين العملية مِن جديد حول ٣ مرات لكن إحرصي يكون بينهم فترة زمنيه لاتقل عن يومين
ذكرتها من باب العلم بالشيء وَ لا فعلياً أشوفها طريقة قاسيه علي الشعر
طريقتي بَسحب لون الصبغة ~
نجي للطريقة إللي طَبقتها وَ اللي أشوفها أعطتني نتائج سريعة
مُلاحظة : هالطريقة راح تزيل لون الصبغه لكن مُمكن تسحب لون شعرك الطبيعي شيئ بسيط يعني إذا شعرك الطبيعي أسود قَد يصبح بني محمر
( فعلياً هي أشبه بسحب اللون لكن بطريقة مُخففة )
طَبقتها عـ الشعر المَصبوغ فقط وَ شعري الطبيعي في الجذور مالمسته أبداً لأني راح أسحب لونه لكن جربت على خَصله وحده عشان اعرف النتيجة وَ اعلمكم
( التدوين يخليك فأر تجارب )
المقادير ،’
احرصى على الخلط وَ أخذ المعايير بأواني بلاستيكيه
٣ ملاعق طعام ديڤلوبر ( منشط لون )
٢ ملاعق طعام بليتش باودر
٢ ملاعق طعام شامبو منقي ( أو بالأنجليزي مكتوب عليه clarifying أو deep cleansing)
٢ ملاعق طعام بلسم للشعر الجاف
مرش ماء ( لتبليل الشعر )
تنويه : فيه مُنتجات تسحب لك لون الصبغة لكن ما أستخدمتها ، البليتش باودر وَ الديفلوبر إستخدمت مانيك بانيك من ألطف المنتجات لسحب اللون عالشَعرة
الطريقة ،’
أخفقي جَميع المُكونات بوعاء بلاستيك وَ كأنك تسوين صبغة
إلبسي قفازات بلاستيك وَ بللي شعرك بلل خفيف بالمرش وَ قسمي شعرك أقسام
ضروري تشتغلين بسرعة مدي الخليط وَ كأنك تمدين صبغة إبدي من الأطرف للجذور وَ أتركي مسافه بين الخليط وَ الجذور لاتقربينه مِن فروة راسك كأنه صبغة
أتركي الخليط على شعرك مِن ٥ إلى ١٠ دقائق فقط لا أكثر
إغسلي شعرك بالشامبو وَ بعدها حطي بلسم
للعلم هالطريقة تناسبت مع شعري وَ كان مصبوغ بالصبغة المؤقته مُمكن ماتكون فعالة مَع الصبغات الدائمة أو الحناء
تَنبيه مُهم ~
إزالة لون الصَبغة لايعني إعادة شعرك للونه الطبيعي فقط إزالة اللون المُضاف نفرض أنتِ صابغة أخضر راح تشيلين اللون الأخضر وَ يرجع الشعر لوقت سحب الشعر
حسب قوة سحب اللون اللي سويته
اذا ٢٠ بالمية بيكون شعرك محمر
اما اذا ٣٠ مُمكن يكون برتقالي
يعني لما أزلت اللون ،شعري بين درجات ٩ وَ ١٠ وَ لا كِنت مَخططة أصوره بس عادي نَفس لون شعر ترآمب هههههههه
( رحت أشوف شَعره إرتعت )
بخصوص لون شَعري الحالي ( وَ هو اللون الأحمر ) ماراح أفرد له تَدوينة لكن مَثل ماوعدتكم بنَزل لكم النتيجة وَ راح أستمر عاللون لغاية شهر مارس بإذن الله لأنه لو خريفي وَ شتوي بإمتياز وَ وقعت بغرامه جداً جداً
دُمتم بَحب
تم
نور بيتنا الكبير برجعة امنا للتدوين ?? ?
سجلي اسمي عندك احب المخمخه بمدونتك لا تحرمينا من تدوينك ?
حبيت الموضوع بتفكين ازمة اختي كل مره تخبص بعمرها ومايضبط اللون الي تبيه وباذن الله راح اجرب لها طريقتك
وان شاء الله اوافيك بالنتيجه
الله يعطيك العافيه ماقصرتي وفي انتظر اللون الاحمر بكل حماس
انبسط بالقراءه اكثر من الفيديو
وروحك موجوده حتى بكتاباتك
مشكوره ارتوس ❤️
تم ❤️?
أشتقنا والله ❤️❤️ . .
جو المدونه مختلف أحبها نورتي نورتي ياجميله ??.
مميزه أنتِ بطرحك تعرفين تختارين المواضيع ??? . .
و الحين الوحده تقدر تصبغ و تسحب وهي مرتاحه بعد تجربتك و المعلومات اللي تقدمينها مصدرها ثقه ???
الله لا يحرمنا منك تقدمين لنا مواضيع صعب نلقاها كيف نجازيك ؟ ❤️❤️❤️ . . و كلي حماس على لون شعرك الاحمر ??? . . الله يعطيك العافيه ماقصرتي الشرح سهل جداً ان شاءالله أنضم لاهل الصبغات ???❤️❤️.
✨✨
تم
تم
يعطيك العاافيه قلبي..بسألك ي قلبي الطريقه هذي تنفع لكل انواع الصبغات ولا بس اللي مسويه سحب لون يعني مثلا اللي صابغه شعرها بني فاتح وبتسوي الطريقه هذي وتبغى شعرها يرجع للونه الاصلي ؟..احبببببك..
ماشاء الله تبارك الرحمن
شكراً ارتوس
قد حطيتي عالسناب لمن سحبتي لون باستخدام الاولابلكس ريتك ضفتي التجربه هنا كمان
تتهني بالاحمر احبه كثير من الطفوله اشوف الصهباء ملكة جمال?
للاسف صبغته ولا ناسبني احسه يعزز النمش والهالات عندي .. مع انه ينور بالوجه مدري كيف… ولا ايش رأيك؟
تتهني يارب
اووووه معليش اتابعك فكلش احسب بس عالسناب ورجعت اتأكد لقيتك كاتبه كل التفاصيل بس شكلي مافهمتها زين لذلك حاطه فبالي انك ماكتبتي عنها
مافهمت كم حطيتي اولابلكس عالمفتح
بس جربته مع سحب اللون فالمشغل جدا ممتاز
ودي احوس بعمري زيك بس مافي شجاعه
تم ي عسل ..
انا صابغه اخضر طاؤوس الاطراف الشعر وهالفتره حابه اغير اللون قبل كم سنه استخدمة نفس طريقتك خلطت شامبو مع بليتش ورغيت فيه شعري زي الشامبو وفتح بشكل حلو كنت بصبغ برغندي وحابه افتح تفتيح بسيط وضبط على ان شعري غامق مره بس نفعت هالطريقه معي ولا ضرته بعيدها واغير اللون ان شاء الله.. ويسلمو على الطرح واشتقنا للتدوين لكن عالم السرعه خلا مافينا صبر نبي شي سريع
تم تممممم
اشتقنا وقسم ?????
يارب اكون الاولى ?
سوس انا الي ارسلت لك بسناب وقلت لك كنت دايم الاولى بانستقرام بس ماتذكرتيني ان شاء الله تتذكريني هالمره عاد ?❤️❤️ .
ارتوووس شككرررا من القلب ع هالمدونه الممتعه والموضوع الأكثر متعه ?شرحك بسيط وبنفس الوقت دقيييق جدا وأحب اشارك اني جربت الطريقة الأولى من موقع اجنبي الله لا يوريك شعري انعدم تشبك في بعض وتقطع ونهاية كانت قص?بجرب طريقتك ان شاءالله تنفع مع صبغتي الحاليه لاني طفشت منها ….
اشتقتلك ❤️❤️
عبالي اول تعليق?
تم
ياعيني بس على كل المعلومات اللي تنبض نبض ، مو قلت لك بتبدعين بالصبغ وانت اهلا له ?❤…
تجربتك ولاروع خصوصا اني معاك خطوة بخطوة ?❤ ياحظي بس
الصبغه والسحب من مانيك بانيك بحياتي كلها ماعمره مر علي وانت ادرى فيني اصبغ بالسنه مرتين ثلاث وبصوالين وتكاليف ومن بعد نصيحتك واشارتك لي عليها من جد ماخيبتي ظني واختصرتي علي الكثير جدا متحمسه ، هذا غيرحتة الجراءة زادت فوق ماهي زايدة عندي او بالاحرى عندنا ثنيناتنا ?…
طبيعي هالطريقة راح اسويها بس مو الان خل نشبع من الاحمر ?❤❤❤.. وفعلا معي ينزل اللون الان لي اكثر من شهرين فيه خف اللون من بعد الشهرين ناوية اعيد عليه بنفس اللون فقط ماحتاج سحب مجرد تعزيز للون ❤?
جدا امتعتينا بتدوينك وافدتينا الله لايحرمنا?❤
كعادتك اسلوب علمي سردي وصفي جميل و غني و ثري و انيق ، اتمنى اللي بصالونات الشعر يركزون مع هالتغريدات و يرحمون شعورنا من عبثهم
هلا والله
جيتك طايره اول ما قريت في تويتر انك نزلتيها تو ما قريتها بس متاكده انه موضوع جميل وغير تقليدي زي ما عودتينا ومن زمااان عن المدونه كنت مشتاقه لها مرره ??
جمالك وجمال المدونه وحشتنااا ❤️
يعطيك الف الف عافيه ياقلبي جداا متحمسه اجرب الطريقه كنت محتاجه طريقه بسيطه كذا ومو قاسيه علي الشعر?
وكان اللون الأخضر جداا جميله الدرجه الي صبغتيها ? ومتاكده الاحمر اجمممل منهاا عادد الاحمر اكثر لون اشوف تخبيص في الي صابغينه الدرجه ماتكون تمام او ستايل لبسهم مو ماشي معاه متاكده عليك خرافه ?? لانك اذا سويتي شي تسويه صح وعلي اصوله ومع جمالك ? احبك توسه ❤️❤️
اخيرا.. احس بعطش لتدوينك ??
كان نفسي اشوف الاحمريكا ?
اعشق الاحمر ودرجاته ❤️
تدوينه متكامله ما يجي ببالي تساؤل
الا واكمل للاخير مجاوبه على كل شي
شكرا?
عوداً حميداً يا جميلة ❤️❤️
بصراحة ياسوس ماكنت دايما اهتم بمواضيعك عن الصبغات لكن احب اقرأها واطلع بفائدة وماقتنعت بالصبغات وتغيير النيولوك الا منك انتي وصبغت والحمدلله ماندمت ابددا???بس ماكنت اعرف المعلومات الي قلتيها?وطريقه المحافظة ع اللون باقصى وقت والرنساج وهالامور بالرغم بحثت عن حلول حق الشعر النحاسي brassy hair بس كأنه كيمياء ??خلط ومكونات وكميات وخفت أخاطر بس عقب هالتدونية فهمت زين وجاوبتي أسئلة كثير ببالي وتعلمت مهما صار للصبغة ابدا ماصبغه غامق وارتكب هالخطا الفادح
ارحبي ملايييييييييييييييين ????
توني البارح اقول اشتقت لنهايات العام عشان ترجع تدويناتك
وحشتيني مووووووت .. وكالعاده متميزه بطرحك وتدويناتك ومواضيعك عشان كذا لاتلومينا اذا تعطشنا لك ولمعلوماتك …
تصدقين وربي من كثر مااشتقت لتدويناتك رجعت اقرا تدوينات لك بشمواه عام 2012 ????
سحرتيني بطرحك يابت
احبك
واو الله لا يحرمنا منك ?
التفاصيل هي اللي نحبها و تميزك عن غيرك سوس .. حتى لمن تنزلي موضوع باي مكان لازم ارجع للمدونه .. مكان لطيف و جميل و اخذ راحتي فيه ..
بحكم ان مالي خبرة بالصبغ و سحب اللون .. الا اني اشوفها طريقة لطيفة
نفسي اشوف اللون الأحمر عليك زي ما شفنا الأخضر .. بس الأكيد انه راح يطلع جميل جداً عليك ❤️
اشتقنا لمواضيع مُفصلة تفصيل دقيق .. لا تحرمينا منها
اشتقنا لتدوينك ❤️❤️❤️
ربي يسعدك.. انا من الناس اللي احب المخمخة?? وتدويناتك دائما تكون سلسة وبالتفصيل الجميل والدقيق
شكرا ارتوس????
ياصباح الورد أرتوس❤️❤️
عودًا حميدًا/اشتقنا لك والله??
التدوينة جات في وقتها،الله لايحرمنا منك ياشيخة??
لي فترة أقول باصبغ شعري لأول مرة خلال الربع قرن اللي عشتها(حابة أعمل نيو لوك من وإلى وماوقفت عند شعري?)…كنت راح أصبغه برا،وكنت اعمل بحث سريع لدولة احتمال أروح لها قريب،لكن انصدمت من النتائج،كانت جدًا مريعة،فقررت اعمله بنفسي،وكنت مترددة عشان أخاف أخربه،وتدوينتك جات في وقتها(أفضل طريقة للخروج بأقل أضرار ممكنة?)…
استشارة جانبية بعد إذنك?
لون بشرتي حنطية فاتحة(مو بيضا) وحابة أصبغ لون أو اثنين تعطيني إشراقة ما أبغى وجهي يكون باهت،إيش الألوان اللي تنصحين فيها؟
وبس..الله يكتب أجرك يارب…شكرًا شكرًا قد السماء?❤️
الله يعطيك العافيه شرح بسيط ومعلومة جداًمميزه ??
ومتحمسة للون الاحمر ?
أنا أقرآ التدوينات حتى لو ماعندي إهتمام بالموضوع لأن فعلاً مخمخة ولأن استمتع بعنايتك بالتفاصيل وتطرقك أحيان لمعلومات خارجية ممكن تفيد ناهيك عن التصوير الجميل .. يعطيك العافية ونعيماً على الشعر الأحمر كنت مرا متحمسة اشوف النتيجة ليتك صورتيه لنا ..
الجمهور عايز التدوين وجمال التدوين وتفاصيل التدوين وخط التدوين كللللها غيييير عن السوشيال ميديا المؤقت! ?
شكرًا يا أرتوس على هالتدوينة الجميلة اللي قريتها كلها مع اني ما أحتاجها الحين ولا راح أطبقها مستقبلاً لأني خوافة ?
بس بسأل سؤال عن الشعر المصبوغ
انا صبغت شعري تقريبًا ٤ مرات منهم مرة في صالون تعييييس وغير متخصص كنت مستعيلة بسافر وتضرر شعري وودي اصبغ بس قاطعت الصبغ لأني حسيته تعب شعري حيل واحس العناية فيه يبيله جهد مضاعف والحين ما بين خيارين إني أستخدم ماسكات طبيعية (صبار-جرجير) وهالاشياء او إني أعالجه بكريمات وجلسات علاج عن طريق ماسكات جاهزة (فيلر-بوتكس-لوريال) شرايج؟
مبدعه كعادتك يا أرتوس ،،
بالتوفيق يا جريئه <<< إختيار الألوان جريء ??
المدونات عشقي وفعلا انسحب عنها البساط لكن احس بقهررر ابي الناس يتفاعلون
دخلت المدونه أقول لج اني ولهت عليج ياجميله ❤️