مساء/ صباح الخير ..
تَدوينة هالسنة تأخرت كثير على غَير العادة ، يَمكن أبي أوصل رسالة أن الأرقام لا تعنيني
بداية سنه أو نهاية سَنه ، متى ما طلع ببالكم شيء حابين تسوونه سووه وَ لاتنتظرون مناسبة أو بدايات أو أرقام
( العمر نعيشه مره وَ العمر ما ينتظر ) أهم شيء إشحذوا الهمم .
وَ لا أخفيكم الأيام الماضية كنت أنتظر شوية أخبار عالصَعيد العملي .
فكنت عارفة لو وَصلتني هالاخبار أو خلونا نقول مَشت مثل ما أتمنى بكتب هالتَدوينة بنفسية مُختلفة جذرياً
لكن ماعليه الصبر زين ، ربما تأخرت هالاخبار لأن الله مخبي لي الأفضل
وَ أنا مؤمنة حرفياً إن فيه شيء جَميل ينتظرني .. وَ حقيقة الله دايم مكرمني
مافي شيء تمنيته إلا وَ تحقق ، يمكن يمكن سَقف طموحي وَ آمالي بحدود المنطق وَ المعقول فلذلك يتحقق
وَ يمكن أنا مَحظوظة – الله أعلم- لكن دايم لما أحسبها أو أفكر أكتشف إني مَحظوظه وَ يكفي نعمة الأشخاص المُحبة بحياتي
هالنعمة لا تُقدر بثمن ، و أشكر نفسي صراحة إنه من زمَان أخترت الأشخاص الصح بحياتي ، وَ ما انجرفت مَع الشكليات وَ تركت المعدن
نعمة الأشخاص ( الصح ) ،’
ممكن هالنعمة تُمر حياة كاملة عالإنسان وَ لا يدركها وَ مُمكن بعد عُمر يكتشف إنه أصاب أو أخطأ بالاختيار
لكن الوَضع عندي كان هادي مِن زمان وَ أعتبر نفسي نضجت مُبكراً بموضوع إختيار الأشخاص الصَح ، لدرجة وصلت لمرحلة الاكتفاء
ما أحب حياتي تصير فوضوية ، وَ ناس إكسترا عدد وجودهم يجرك للا إنجاز ، وَ تقلب الحياة هرج وَ مرج
من خلقني الله وَ أنا لي جو مُعين يتناسب مَع فكري وَ راحة بالي وَ نظام حياتي
طلعت نفسي من كثرة المُجاملات الإجتماعية ، وَ لما أتذكر كيف بسنوات مَضت كنت مستهترة بالوقت الضائع
مع الناس المحسوبين زيادة عدد ، أقول حسرة ما أدركت قيمة الوقت وَ إن مفروض يروح فقط للناس الكفو
طبعاً من زَمان وَ أنا حاطه الناس بخانات ، ناس عابرين وَ ناس أقابلهم عند ناس
وَ ناس للبسط وَ ناس مؤقتين .. إلخ ، لكن سنوات كورونا خلتني أدرك أن العُمر حرفياً قصير وَ حرام يضيع على أي أحد
الأفضل يضيع على من يفهمك وَ يتفهمك ، على من يُحسن الظن بك
على من يُسعدك وَ هذا أضعف الإيمان ، أو يضيف شيء لحياتك ، على من يُساندك وَ تسانده ( وَ أكيد الوضع من الطرفين )
قَلبي مايبي إلا الفَرفحه وَ الناس إللي داخلها حُلو وَ الحمدلله وَجدتهم
غمضة عين ~
عام ٢٠٢١م مَر بغمضة عين ، للآن مو مصدقة إنه دخلنا عام ٢٠٢٢م
من يناير بعام ٢٠٢١م لنهاية أغسطس ٢٠٢١م مرت الأيام بسرعة البرق وَ بنفس روح ٢٠٢٠م
حسيت إنها إمتداد له ، اللهم كانت أحلى وَ فيها اشياء تسعد خاطري شخصياً
لين دخلنا شهر سبتمبر وَ حَرفياً تقلبت أموري ، مِن حال إلى حَال
المُحيطين بي إللي عارفين إني كنت سعيدة وَ مبسوطة جداً جداً ( قالوا لي عين عييييييين ) حسدوك
طبعاً كنت أضحك لأن أكيد ماهي عين وَ الحلو إن تقلب الأمور ما أتجاوز أيام لكن ما حَصل رباني تربية من أول وَ جديد
رجعت أستطعم كل شيء بالحَياة ، وَ رجعت أكثر حُباً وَ شغفاً ، وَ وعدت نفسي بأشياء كثيرة وَ من يومها كل فترة أفرح نفسي وَ أحتفل
أصبحت مُدمنة لشيء إسمه ( اسعدي نفسك ) ، عاد أختي تقول : إنتِ من أول كذا بس زاد الوَضع بزيادة
وَ صار أي شيء نفسي فيه ما أأجل أمره ، الآن الآن وَ لا يؤجل للغد
وَ بكذا صار عندي تشتيت هل عام ٢٠٢١م بشع ؟، عشان ٣ أيام أو يومين كانت من أبشع مايكون
وَ انخرشت أقوى خرشه بحياتي بهاليُومين .. وَ لا أحاول أنظر لها بطريقة إيجابية .. بالرُغم ما تأذيت وَ لا صار لي شيء
بس فكرة إنه كان مُمكن أتأذى خرشتني … ما تَوقعت إني أحب نفسي لهدرجة وَ لا تخيلت إن حُبي لذاتي لشديد ( قلبس على نفسي )
إنجازات وَ طموحات ٢٠٢١م،’
أنا بوضعية الإنتظار حالياً ، وَ ماودي انتظاري يطول لأن مرات الأمور إذا تأخرت يصير مالها طعم
حتى لو تحققت ، وَ لا أقدر أقولكم وآآآآآآآآآآو إللي أنجزت إنجازات خارقة
لا الوضع كان إمتداد لعام ٢٠٢٠ م ، بالإضافة للموضوع إللي أنتظره وَ أكيد هو حصاد جُهد وَ عمل وُ قلب قوي
وَ بُعد نظر وَ صبر
دائماً بحياتي أسعى للأفضل وَ لا مَر علي يوم بحياتي كنت مكتوفة اليدين ، وَ الله لا يذيقني قل الحيلة و الضعف
لكن أموري ميسرة لكن لا إنجازات تستحق الذكر ، فقط ترتيبات وَ تنسيقات وَ تيسير أمور
سنوات كورونا فيه أفاق جديدة تُفتح أمامك وَ أكيد بالمُقابل فيه عراقيل
وَ أعتقد أي شخص بمجال الأعمال عارف وَ مُدرك لهالعراقيل ، لكن الحَمدلله أني من الناجيين
هالمرة كتبت التدوينه بدون ما أرجع أشوف كيف كانت نفسيتي السنة الماضية أو إللي قبلها
اليوم أكتب التدوينة وَ أنا فعلياً أحس إني تعلمت من هالدنيا وَ لا آبي أعرف أنا وش كنت أنظر له ، راح أطلع على تدويناتي السابقة العام المُقبل ، و أحس بقول : ههههههههههههههههههههه وَ الله كنت نهفه
أصلاً كيف لليوم أنا قادرة أكون على هالمُستوى من الكُتمان .. ( برضو صفقة لنفسي .. تقدير وَ إحترام )
دائماً يقلك إذا حاب طموحك ما يتحقق ؟ قوله للآخرين .. دايركت يتعرقل وَ هذي حقيقة
غالباً لسببين : مرات يخف حماسك لما تقول للآخرين تعتقد إنك خلاص أنجزت بمُجرد إنك قلت
وَ مرات إذا ماصارت الأمور مثل مُرادك تحس بالإحباط وَ تدمر نفسياً كونك من جماعة يقولون مالا يفعلون .. بيقولون هذي راعية حكي
السبب الآخر مو الكل داعم ، فيه الشخصيات المُحبطة وَ فيه الشخصيات حتى إللي تخاف عليك أكثر من اللازم
وَ فيه الشخصيات الحسودة ، وَ فيه إللي يحاول يعرقلك وَ يسحبك لقاعه المظلم ، مُجرد يعرفون يسوون دوشة لدماغك .. فلذلك يازين الصمت
أمنيات عام٢٠٢٢م ~
آممممممممممم لو فتحوا لي باب الأمنيات ماراح أخلص أتمنى أشياء كثيرة كثيرة
بس أمنيات العام المَاضي لسى ما تحققت ، يكفي إنها تتحقق هالسنة ( شفتوا شلون شكثر قنوعه )
طبعاً الأمنيات إللي أتمنى تتحقق هي الأمنيات إللي سَعيت لها حتى لا تكون أحلام
وفيه أماني ليست بيدي ، أتمنى الله يطيل بعمر قطوي وَ هو بصحة وَ سلامة لأن بديت ألمح بوادر الشيخوخه على قطوي حبيبي
وَ نعم الشيخوخة أزعجتني وَ أكتشفت إنها بشعه جداً جداً ، معناها إقتراب الفقد .. لما إللي تحبه مايكون على عادته هذا فقد مو شرط فقدان الروح
كان قطوي ينام بسلام الآن يشخر شخير خفيف ببعض نوماته ، صار يسرح كثير .. ماهو على عادته
فيه تغير طفيف بالسُلوك ، وَ هالشيء لا مَفر منه لا لنا كبشر أو لهم كحيوانات لكن أدركت الشيخوخة .. وَ أدركت لا حل لها إلا تقبلها
وَ الله يخلي لي عائلتي وَ أحبابي وَ لا يوريني فيهم مكروه ، يمكن شيخوخة قطوي رسالة لي
وَ تعلمني إن العُمر يمضي وَ أنه لا تنتظر بحياتك كثير .. وَ الشيخوخة بتمر على أحبابنا وَ بتمر علينا أيضاً
فأتمنى إذا وصلت لمرحلة الشيخوخة أكون عالاقل عشت حياتي مثل ما أتمنى تماماً
يُمه يُمه دراما ( بس هالإدراك سبب يخلي سنة ٢٠٢١م سنة غير لطيفة ، غير الخرشة إللي أنخرشتها وَ كلهم مريت فيهم بذات التوقيت تقريباً )
وقتها قلت يالله لا تحملني مالا أطيق .. وَ الحمدلله عَدت
الخُلاصة ،’
مُمكن الناس يحبون يقرون كلام إيجابي وَ إن ماحصل لنا إلا الأفراح لا طبعاً
الحياة ما تمشي بهالطريقة ، فيه يوم حلو وَ فيه يوم مُر ، وَ فيه يوم حتى رتيب مُمل بلا نكهه
لكن بجميع أيامنا نطلب الصحة وَ العافية فإذا هي وُجدت هان الباقي
وَ كان بالإمكان أكتب كلام لا يُمثلني لكن يبهج القاريء بس ماراح يكون كلام حقيقي وَ أنا ما أحب إلا الشيء الحقيقي
بجميع جوانب حياتي ، كل شيء حقيقي مُقرب لقلبي
أتمنى لكم الكثير وَ الكثير من الخير وَ السعادة
دُمتم بحُب وَ صدق وَ على طبيعتكم
احبك واتوقع اول من قرا التغريده انا سعيده جدا لكونك بحياتي الافتراضيه ملهمه شغوفه خفيفه على النفس
اسال الله ان يرزقك ويحقق احلامك وامنياتك وكل ماتسعين له ويطول بعمر احبابك وقطوك
وسبتمبر شهر صعب بالنسبه لي ايضا انكسرت فيه وجبرني الله بمولودتي
جبر الله عظيم الله اذا اعطى ادهش رغم عندي اطفال لكن سعادتي بهالطفله غير
سعيده وممتنه لك واتمنى يكون لك بصمه بالسوشيال ميديااكثر لكونك مختلفه عن الكل ومميزه ❤️❤️
ماشاء الله عليك أول رد .. دخلتي بدون ماتشوفين إعلاني عنه بالآنستا دليل إنك مُخلصة ..
وَ شكراً لكلامك ياجميلتي وَ مبروك ماجاك وَ الله يخلي لك أطفالك ..
❤️
أهلاً أهلاً بالقمة اللي مايوصلها ولاينافسها أحد
أهلاً بالفكر المنفرد والعقل المنفتح واللا تبعيه
أهلاً بالصديقة والحبيبة والقريبة أهلاً بروح الروح
مدونتك كنز انت بس اكتبي وانسي ، كتاباتك تفتح مدارك وتوسع الأفاق وتخلي الواحد يتمعن بحياته ويتفكر ، وأن الحياة ماتمشي وبس ولا انخلقنا عبث في غايات وأمنيات وطموحات وعلاقات مفروض الواحد يعطيها حقها من شحذ الهمم والاستمتاع بها والصبر عليها، فعلاً اعتقد أن المتعه بالحياة مش بالضرورة تكون على هيئة أو شكل معين يكفي استشعارها بكذا خلاص أنت وصلت .
أنا لو بكتب دواوين ماخلصت ، شهادتي فيك مجروحة الله يخليك لنا ولايخلينا منك أنت نعمة تستحق الشكر ??
❤️❤️ يادي الكُسوف وَ اللهي ..
خلاص لساني انربط ، ماقدرت أرد لأن مهماً أقول ماوفيك
❤️ ياحظي بك وَ الله
وانا اقرأ استشعرت كل كلمة فعلاً العمر مره والفرص مره والأشخاص تروح وتجي غيرها، سبحان الله حتى الأشخاص رزق وتوفيق من رب العالمين. مدونتك غير عن كل مره بس هالمره لامست كل مشاعري وحسيت اني احاكي نفسي واواسيها فيها كمية نضج ووعي غير طبيعي رجعتني لأيام حلوه ولطيفه بدون خروشت السناب وشلته، الله يحفظك ويجعل سنة ٢٠٢٢ خير وسلام وتحقيق امنيات وطول عمر يارب
❤️ ياحبيبتي وَ الله ..
وَ حلو تكون قريب من حبايبك من خلال كتاباتك وَ أكيد أنتم من ضمن هالحبايب
من بؤك للسما ياا رب مرادك يتحقق وقريب
متابعة لك ودائما ألاحظ اهتمامك بالوقت ولمست إنه اهتمام عملي مو حكي
يا ليت تتكلمبن بهالموضوع لنا زيادة، ماشية ع نظام توزيع الساعات وكتابة المهام بالكالندر ولا تمشين اليوم بهدف كبير والتفاصيل بعفوية ولا إيش بالضبط. لو تقولين كم نصيحة بالسناب تشات دامه خفيف بيكون مثري جددا لي ولغيري متأكدة
أبشري ماطلبتي شيء وَ الوقت جداً مُهماً .. لأن بالنهاية الوقت يشكل عمرك فيما أفنيته
نورتيني يالزينه
للأبد يا أرتوس كلماتك لها وقعة في القلب غير عن الجميع، كل تدويناتك لما أقرأها تخليني أحس بمشاعرك لما كنتي تكتبين التدوينات? أتمنى لك عام مليئ بالنجاحات والأفراح وأتمنى ربي يمدك بالصحة وجميع من حولك بما فيهم قطك اللطيف اللي من رقة قلبك شعرتي بهالكائن الضعيف وتغيراته ? أتمنى يا أرتوس يكون لنا لقاء أشعر بستمتع بالحديث معك جداً
متدربتك السابقة: ساره الحسين
❤️ وَ الله وحشتيني جداً جداً جداً ..
وَ للأمانة ماعاد تواصلت مَعك خوفاً من إزعاجك .. وَ من أجمل من دربت وَ من الناس إللي يمشون بالمل
يالله .. فرحت فيك وَ الله كثير كثير ماتتصورين لأي درجة ..
ياحبيبتي وَ الله
اهلا وسهلا?دائما فريده ومتميزه ،الله يحقق لك كل ماتتمنين ويسعدك دنيا واخره .
احيانا احس بالذنب لاني من الاشخاص الصامتين ومااعلق بحكم العاده ولانشغالي . بالرغم من استفادتي من اشياء كثير ،فمن كل قلبي شكررا على كل شي تقدمينه الله يجزاك عنا خير الجزاء ,+اتمى ف يوم من الايام اشترك معاك لانه للان ما حالفني الحظ .
الله يكتب إللي فيه الخير ، وَ أكيد ما اشتركتي يمكن خيرة لك بالالتحاق ببرامجي الجديدة بإذن الله
إللي بتكون بأسعار جَميلة تتناسب مَع ظروف كثير من الناس .. بس نقول يارب التيسير حتى نقدم شيء يليق بالناس الطيبين
أسعدت بك ، وَ شكراً لدعواتك ❤️
هلا حبيبتي ارتوس كلام فعلا احزني ..ظ بالذات على ليون حسيت انا اللي بفقده مو انتي .. نعم نهاية لا مفر متها لكن من بعد فقد ابوي وانا ما اقدر اتحمل فكره غياب احد … انا كمان فقدت قطي الجميل توماس حبيته لدرجه قطعت نفسي من البكى واستغربت نفسي اني احبه لهءي الدرجه..
كتومه بشكل يخليني ودي اعررررررف ايش تخبين طيب لا تقولي اللي راح يجي قولي لنا ايش اللي صار ومن ايش انخرشتي .. حسيت دام ذكرتي ودي كنت اعرف بس يضل هذا شيء خاص …
انا كرونا ساعدتني و اذتني نوعا ما في موضوع شغلي لكن الحمدلله على كل حال …
اما الاشخاص المحيطين اااااااااه الكم شهر اللي فات خلاني اعرف انو فعلا مافيه احد يستحق الا اللي يبادلك نفس الاهتمام بعد ام قرب … الوعي ثم الوعي ثم الوعي هو كل شيء …..
واخيرا اتمنى لك تحقيق احلامك السعيده وطموحاتك الى حقيقه …
انا من طموحاتي اكون احد صديقاتك في ارض الواقع
الله يرحم والدك يارب ،وعسى مثواه الجنه
عاد هذا حال الدنيا لو اعتراضنا بينفع صدقيني كان اعترضنا عالقضاء وَ القدر لكن اللهم لا إعتراض
بس نقول عسى أقدارنا القادمة مليئة بالخير لنا وَ الفرح
و قطك توماس تعازي الحارة لك .. لأن مو الكل يتفهم فقدك وَ الله يصبرك
ههههههههه ودي أقول من وش انخرشت بس الموضوع فيه أطراف أخرى جاري مُحاسبتهم عالخرشه
وَ صدقتي الوعي ثم ثم الوعي ثم الوعي
وَ ماتدرين الحياة فعلاً قصيرة وَ العالم صغير مو مثل ماتتخيلين .. يمكن الله يجمع أقدارنا يوماً ما
وَ أتشرف بك ..نورتيني
أهلاً أرتوس ،،،
سعيده بخربشاتك ربي يرزقك كل راحه وسعاده ويحقق للجميع طموحاته وآماله بلا آلام أو متاعب …
إنتِ قويه بتجاوزاتك وبقراراتك مرات تمر عليها ظروف تكسرنا بس لأنها تريد صقلنا من جديد تعلمنا تأدبنا تفتح مداركنا أكثر صح المها يكون مختزن لكن تعتبر في الأرشيف والشخص هو من يقرر يقف متأملها أو يغلق عليها بإحكام لأنها مرت وانتهت بسلام ?
شكراً لك وسعيده بما كتبتي ?
يازينك وَ كلامك كله دُرر وَ حكم
❤️
يارب يا ارتوس سنينك الجاية تكون احسن والحمدلله على كل شي وكل يوم مر علينا وكلامك لامس صماصيم قلبي والله فعلا دايم احب منك كل حرف وكل كلمة♥️♥️♥️♥️♥️
آمين يارب ، لي وَ لك وَ لكل أحبائنا يارب
نورتيني ❤️
حنيييت حنيييت للمدونة ولليالي الجميلة اللي كنت استمتع فيها بكلامك واستفيد فيها من معلوماتك .. قد ايش وقتها كانت امنياتي بسيطة وكان عامل الوقت مو بذيك الاهمية عندي! وقد ايش الان افكر بتفاصيل حياتي بدقة وترقب اكثر وكأننا جميعا نمشي في مسارات متشابهة
..
هذا حال الدنيا يا غالية يوم لك ويوم عليك < حكم ايام المتوسط والثانوي
اتمنى ربي يحقق امنياتك ويحفظك من كل سوء
إنه النضج سيدتي ❤️
نورتيني ياعزيزتي وَ حلو إخلاصك وَ تواجدك
وحشتيناااا الله يجعل ايامك وسنينك كلها سعاده بسعاده ويحفظ لك كل غالي ❤️❤️❤️❤️
بس يرضيك ننتظر من السنه للسنه انا امنيتي 2022 ترجعين للمدونه مثل قبل ?
مالي حَق والله ..
وفعلاً مفروض أحسن من مُستواي بالتدوين .. لكن بحاول أكون أكثر نشاط بالسناب تشات
بالرُغم إنه مجهود غير باقي ❤️
نورتيني
ودامت روحك دائما مليئة بالبهجة والانجاز
سعدت لقراءة ما خطت اناملك
لا اراك الله مكروه في احب الخلق على قلبك واولها قطوك
وغمرك بفرحة ما تنتظرين لأجله
احبك واحب روحك وسجيتك وهذا سر حبنا لك
انت نقوة النقوة اتمنى انه ربي يعطيني ويكرم علي منا اعطاك من علمه
وزادك رفعة
ياه يالجميلة .. وَ دوم دوم تواجدك ماله شبيه
❤️ آمين ياحبيبتي
السلام عليكِ وَ رحمة الله .
الله يحيي هالطلّة ♥️ وحششتينا يا آرتوس
أنا من رواد المدونة وسابقاً كنت أتابعك بشمواه من لما كنت تقريباً بثالث متوسط
وَ الآن عمري ٢٥ سنة !!! أتذكر ببدايات مدوّنتك كنت أنتظرك مرات الصباح تنزلي التدوينة وَ أنا بالكلاس هههههه ? بجد السنين مرررت بسرعة ♥️
ولو اني ما كملت قراءة التدوينة إلا إنك أسعدتيني بتواجدك هنا ♥️
يالله .. لا إنتِ إستثناء فعلاً ..
ودايم كانت مَواضيعي عالفجريات ..
أسعدت بطلتك ❤️
تمنيت التدوينة أكبر وأكثر .. لانه كلامج عميق لامسني .. أنا حسيت هالسنة )٢٠٢١( فعلا إني كبرت لمن دخلت الأربعين .. حسيت بأن أغلب الأشياء باهتة خصوصا الكماليات .. عمليات الشراء في ازدياد عند الناس بالهبل .. أما أنا ضربت بريك قوي وشعرت في داخلي بالاكتفاء والقناعة شي أقرب للزهد .. تكلمتي عن شعورج نحو قطوج نفس شعوري لمن أشوف بابا وهو كل يوم يكبر ويذبل جدام عيني .. بابا كان قوي مهاب .. الحين خلال هالسنتين فقد وزن كبيييير ولازمه الاكتئاب وفكرة اقتراب الموت .. أدركت إنه الصحة لاتقدر بثمن والله نعمة عظيمة .. صرت أهدى من بعد عصبتي .. أخطاء عيالي ماقامت تنرفزني بل بالعكس صوت ابتسم .. الحمدلله الحمدلله اني تغيرت للافضل وزاد عندي الوعي عشن أحمد ربي على كل شي وهبني إياه .. ولكن غلبة النفس الكسولة هي اللي متعبتني .. آسفة حسيت إني كتبت تدوينة في تدوينتج ارتوس .. الله يعطينا الخير كلللله ياعزيزتي
العُمر كله يا حبيبتي .. Just a Number
وَ صحيح كلامك بخصوص عمليات الشراء ، وَ الكماليات وَ الثانويات
وَ الله يحفظ والدك وتشوفينه بأفضل حال وَ أفضل صحة وَ نفسية
و حلو إن عصبيتك خفت .. عاد تصدقين دايم عبالي إنك رايقة ولكن حلوه العصبية ليش لا ملح الحياة
وبالعكس خذي راحتك لو تكتبين ١٠٠٠ سطر بالنهاية هي مشاركات وجدانية معكم وَ أكيد يهمني أعرف أخبارك
❤️
كل ما اقرأ ثرثرتك احس اني حبكي في النهايه.. مو لانها حزينه بس لاني عارفه ان مفروض انتظر سنه للتدوينه القادمه لول… اولا ابا اقلك اني احبك كثيرا وعلي الصعيد الشخصي تدويناتك حقت الثرثره ساعدتني كثير في حياتي بوقت ماكان في شخص اطلبه للمساعده ولاللنصيحه حتي…. بالنسبه لقصه الناس الصح في حياتك ماحقول للاسف ضيعت وقتي ولكن الحمد لله اني تعلمت متاخر صح بس تعلمت وانا الان هذه السنه في رحلتي للتعرف علي ناس تستحق واكون سعيده معاهم واتمني كل سنواتك تكون سعيده ومن نجاح لنجاح ❤️❤️
ههههههههههههه نقول الله يحسن الحال وَ أصير أدون أكثر ❤️
والله لا يحرمني هالقلب وَ هالمحبة ، وَ حلو إنك تعلمتي حتى لو متأخر
لأن الإنسان دايم أكثر قناعه وَ راحه مع تجاربه ، ماراح يقتنع لما يصدر من الآخرين
آمين وياك يارب
أهلاً.. أهلاً
و انا اقرأ تدوينتك تذكرت كلام د/ خالد المنيف.. يوم سأله المقدم..ما الذي يمنعنا من الفرح؟ قال التأجيل.. الانتظار انه لو ما حصلت الشيء الفلاني ما افرح
المهم انه نكون متعلقين فيه.. و كأننا مربطين.. فما نعيش يومنا ولا نفرح ويضيع الوقت
مازال الكلام حقيقة ومؤثر.. يمكن لانه فيه اشياء ما زلت انتظرها.. ويارب يحققها
شكراً سوس عالتدوينة
إضافتك رائعة وَ د/خالد المنيف دائماً سلس وسمح وَ فعلاً كلام سليم ..
والله يحقق لك أمانيك يارب♥️
كل جزء أقرأه أقول ايييه والله صح!!
تخيلي كل الكلام عن العمر و الحياة و الصحة
كلنا عارفينه مسبقاً لكن محد فينا تدبر فيه بشكل حقيقي واخذناه بشكل جدي ، انا تعلمت درسي بموقف ماكان سهل
بنفس الوقت أقول الحمدلله ، على الأقل هذا تنبيه لي خلاني فعليا أبدأ بالتطبيق مو بس الموافقة و العلم اللي مامنه فايدة
اه ياحلو رجعتك ، صدق وحشتيني ..
يازينك .. وفعلاً قلتيها العمر و الحياة وَ الصحة كلنا ندرك الكلام
بس ماناخذ الأمر بشكل جدي .. وَ مرات الإنسان يمر بمواقف و دروس ينجو منها تكون رسالة
وَ يمكن تنبيه حتى يدرك النَعم ..
أسعدت بإضافتك ♥️
واو
هذي الكلمه اللي قلتها يوم قريت التدوينة
مره أحب الكلام الواقعي وماأحب المنطقي بزيادة
أتمنى يارب تتحقق أحلامك وأحلام كل من يتمنى
عندي انجاز أعتبره كبير تحقق لي في ٢٠٢١ هو إني علمت طفلي-متلازمة داون-الحمام??وعمره اربع سنوات ونص مررره مبسوطة وفرحانه وقلت أشارككم اياه♥️♥️شكراً لأنك رجعتينا لأيام حلوه بالتدوينة
سعيدة جداً جداً بانجازك وَ الله ..
والله يخليه لك يارب وهذا دليل إنك أم جيدة وَ مدرسة ♥️
وفرحت بهالمُشاركة منك .. دليل الأريحية وَ الحُب ، لذلك دايم أستأنس برواد المُدونة
آآآآمين يارب ، من بؤك لباب السما
استمتعت وأنا أقرأ التدوينة واسترجعت ذكريات التدوينات السابقة، لها بقلبي حب كبيييير❤❤
الله يحقق لك أمنياتك ويبشرك بأخبار تسر خاطرك يارب
الله يحفظ لك عائلتك وأحبابك وقطوك ويطيل بعمرهم يارب ?
ياحبيبتي آمين يارب ♥️
لي ولك ولكل الناس المُحبة
ياقلبي انتي الله يبعد عنا وعنك كل شر ..
الله يحفظ لك احبابك كلهم ..♥️♥️
اكثر شي عاجبني فيك غير صراحتك و وضوحك وانك انسانة صادقة
الى اليوم وسط هالزحام والغوغاء محتفظة بخصوصيتك
و تأثيرك .. انت فعلا مؤثرة لك بصمتك .. وستايلك الجذاب
يارب تكون ايامك من حسن لأحسن ..
اشتقت للمدونة و للتجارب والتقييمات غير عن الانستا والسناب
هنا لها طعم خاص مادري ههههه
خدي?
♥️ عاد تدرين إني أميزك بكل مكان ..
ورواد المُدونة هم الناس إللي يتعنون لي تعني .. فلذلك حبكم بالقلب
وشكراً لكلامك يكفي يوم قلتي إنسانة صادقة ،من أحلى انواع المديح على قلبي
وَ خذي ?
وحشتيناااااااا قد الدنيا وسبحان من جعلك ملهمه والله جلست اتمعن بكلامك واحس من جواتي لامس شي فيني يمكن شي مااحب اتذكره او امر عليه لأن بصراحه احس مو بيدي اغيره ماادري او انا انسانه ضعيفه ممكن المهم نورتي الحته والمدونه ويارب ايامك القادمه اسعد
♥️ ما أعتقد إنك إنسانه ضعيفة ، الضعيف غالباً مايعبر وَ لا ينطق
وَ لا يجيب طاري لإحساس لازمه ماكان عاجبه .. أعتقد إنك قوية
نورتيني ياحبيبتي ♥️
ارتوس شكرا من القلب ما اعرف اكتب لك كلام حلووو مثل الي كتبتيه بس احبك ومشتاقه كثيير للمدونه ?????????
♥️ تواجدك صدقيني أحلى من الحلا نفسه
أسعدت بك يالوفيه
اشتقنا والله اشتقنا الله يحقق لك كل ماتتمنيه بصحه وسعاده ويحفظ لك اهلك واحبابك وقطوك الحلو ♥️♥️♥️
هلا بارتوس .. كلامج حيييل يلامسسسني السنه اللي طافت فقدت امي الله يجعلها و والدتج واموات المسلمين ممن يدخلون الجنة من غير حساب ولا سابق عذاب .. عرفت وقتها معادن الناس عرفت ان الصداقه ماهي بعدد السنين لا بالمواقف .. عرفت اللي فعلا يحبوني ويخافون علي ومين اللي ينطرون طيحتي عشان يضحكون .. وربي صدقتي لما قلتي موقف يحصل لك حتى لو انج ما تاذيتي منه يبين لج اشياء كنتي غافله عنها .. بالاخير ياجعل ايامج كلها سعاده ويارب تتيسر لج امورج ويارب يجي اليوم اللي تبشرينا بتحقيقه .. مانعرفج بالصج لكن سبحانه يعلم بمحبتج بقلوبنا ❤️❤️
سبحان الله كيف هالتدوينة تنقلت بي من الفرح للحزن للقلق للخوف للسكينة.. خفت عليك و فرحت لك… كنت اتوقع ان السنوات تمضي و الأمر متقبل لين انتبهت ان كورونا بؤس مر سنتين و للآن مو قادرة آخذ امي سفره حلو أو عمره وانا ٢٠١٨ كتبتها من اهدافي السنوية لكن جانا كورونا و عطلنا وخوفنا على أحبابنا.. كنت اقول العمر قدامنا لكن انتبهت هالسنة ان أمي تكبر ابغى اسبق الزمن وتطلع وتستمتع وهي بصحتها.. فعلاً فيه أشياء لا تشترى… كل سنة و انت بالف الف الف خير و يتحقق لك كل اللي تتمنينه وحلمتي به هالسنة وتعيشين ومن تحبين سنوات طويله مديدة بصحة وسعادة يا جميلة الخلق و الأخلاق و الحرف
سبحان الله جوّ دخول المدوّنة وقراءة التدوينات أو انتظارها يذكّرني بعالم المنتديات والحنين له كبيييير 🙁 ❤️
وصدقتِ فيما قلتِ، أكثر شيء يستفزني اللي يتكلمون عن الإيجابية دائماً كأننا مهرجين لازم طول الوقت تكون نفسياتنا حلوة ووجيهنا مبتسمة، أكثر ناس أمقتهم لأنهم يخربون حقيقة الحياة ويشوهونها
جميل ومريح إنّ الواحد يعطي نفسه فرصة للحزن ويسمح له يطلع منه بأيّ هيئة حتى يرتاح ويقدر يرجع أقوى وأحكم، ويقدر يستمتع ويشوف أشياء ماكان مدركها من قبل، الحزن يعلّم ويوعّي رغم مرارته
وهذا صميم واقع الدُّنيا
طُبِعَت على كدَرٍ وأنتَ تُريدُها صفواً من الأقذَاءِ والأكدارِ
الله يجعلها سنة سلام علينا ورحمة بنا وإنجاز لذواتنا وواقع لأمنياتنا ❤️
تمضي الايام والسنين وهناك اشخاص باقيه محبتهم متأصلة في القلب.. ♥️ على كثر العتب والشوق لكن مابيد حيلة، احتراماً لقرارك.. ولا غيابك مانسمح فيه .. يارب سنينك كلها سعادة وراحت بال وبعيدة عن الخرشات ويحفظلك عائلتك وليون يارب♥️.. فعلا سنه ٢٠٢١ اسميها سنه كبيسه رغم انها اخف وطئة من صدمة ٢٠٢٠ والكاورونا .. استفتحتها بمرض قطوي تيو الغير معروف سنه كامله اشوفه يذبل قدام عيني من عياده لعياده لدرجة دكتوره المشرف عليه من ولادته قالي بالحرف الواحد”انا اسف اسيا بكل مااوتيت من علم ومعرفه وكل اللي سويته لتيو عاجز لان كل شيء سليم من تحليل واشعات”??.. تخيلي صرت اشوف اعظامة ولا يقدر يمشي يطيح بعد ماكان قط يجنن وجميل بشكل. والله يلهمني لرقيه الشرعيه وماء زمزم قليل اخلي له. والله العظيم بعد ثلاث شهور رجعت له عافيته ومنعت خواتي من نشر فيدوات او صور له بتك توك وغيرة .. سوس ماشاء الله تبارك الرحمن قطوي ذكي بشكل يخليك تتفكرين انه ماعنده عقل كيف ذكي وفطين والغريب لما يموي كأنه يلفظ اسمائنا كانه يقول مي او اسوي وعندي تسجيلات?.. وقالي الدكتور استعدي لمرحله الشيخوخه عمره تسع سنوات ونفسيا ماابغى اخرب فرحة شفائه☹️ وافكر بان العمر يمضي .
ويارب هالسنة ينتهي فيها هالوباء وسنه خير وسلام على الجميع♥️?
لي كم يوم انتظر التدوينة كلامك الحقيقي هو اللي كنت احتاجه فعلاً مافيه تفائل زايد ولا تشاؤم بزيادة انما حقيقي يمثل الواقع والحياة ..
كلامك لامسني في جزئيه قله الحيلة بالرغم اني مااحب العجز وقله الحيله الا اني اعيشها وعلى قدر المقاومه والتعب التغير صفر لكن احاول جاهدة ومرات استسلم .
وكلامك عن ان الشخص يضل صامت بخصوص اهدافه فعلاً حطيت لي هدف ومشيت في تحقيقه الا ان انجزت الشي الكبير بدون علم اي شخص فقلت خلاص بعلم بشوف ايش يصير والصدمه اني ماقدرت اكمل الهدف للاخير ?
قرأت جزء كبير من مدونتك واول مره اتفاعل لكن حبيت جداً اشكرك على وقتك وجهدك ومدونتك والاصرار على مبدأك حقيقي اتمنى اكون زيك جداً معجبه بعقليتك وفكرك وتجاربك في الحياة ونظرتك لها
ارتوس يا ارتوس
فعلا طلاتك منفردة ومخالفة..
وحشتيني ❤️❤️❤️
سبحان الله طلاتك بكل السوشيل ميديا احبها، بس المدونة مختلفة ❤️ أتمنئ اشوف لك تدوينات أكثر وربي يقويك بحياتك ويحقق لك طموحك ويحفظ لك احبابك بصحتهم وعافيتهم..
وع فكرة علئ قد اني م احب برنامج سناب بس احب وجودك فيه لذلك كل مابي احذفه اقول ارتوس موجودة وانا استفيد منها ❤️❤️❤️
أحبك في الله ❤️❤️❤️❤️❤️❤️
أهلاً اهلاً بالجميلة قلباً وقالباً
أقرا كلامك وعيوني كذا ? وفجاءه تصير كذا ? وحشتيني والله
سبحان الله كلامك له وقع خاص بقلبي كذا انضج وادرك بعض النقاط اللي ذكرتيها فعلاً نغفل احيانا عن امور واشخاص ويجيك شي يوعيك??
احب القط الدرس قبل مايوجعني واعيد الخطا بجهل بدون ما افهم نفسي
احبك والله والله يديم عليك السلام والحب ولا يحملك ما لا طاقة لك فيه يارب ❤️
الله يخلي لك احبابك ويحميك ويحميهم ❤️??
اهلاا بالرائعة
تدوينة لامست قلبي كثير لدرجة مو عارفه اعبر عاللي جواتي ? بالفعل الانسان لا ينتظر اكثر و يبدأ من الان
.
.
حماك الله من كل مكرروه انتي غالية علينا مثل ما انتي غاليه على نفسك ?
اهلين يالجميله اللي اشتقنا لها ، اشتقت للمدونه و طرحك فيها .. الله يجعل القادم من حياتك هو الأفضل .. صحيح ٢٠٢١ كانت امتداد للسنه اللي قبلها و فعلاً يمكن اخر شهرين هي اللي نقول صار فيها تغيير .. و مرت بغمضه عين صحيح مررور الوقت كذا شي يفجع يفجع و لكن نسأل الله حسن التدبير و المعونه على انجاز اعمالنا
والله فعلا الاهتمام بالنفس المفروض يكون أول الأولويات
وبعدها كل شي راح يترتب في المكان الصحيح
أدركت انه مع ٢٠٢١ الإكثار من كل شي مضر
بما فيهم الأشخاص
ربي يخلي لنا احبابنا ويخلي لك احبابك
دمت متألقه
الله علييك وعلى تدويناتك.
تدرين كيف متأكدة انك إنسانه ! من بداياتك للآن وأنتِ بنفس الشخصية والمبادئ.
جداً أحيي هالشي فيك بزمن صار الأغلب يقلد بعض ويضرب بالقوانين ومبادئه عرض الحائط.
بكل مرة يزيد إعجابي فيك أكثر، ويارب إنه يحقق لك كل ما تتمنين لأن شخص مثلك يستاهل يوصل لكل ما يطمح له.
الشيخوخة شفتها بأبوي الله يحفظه فعلياً بآخر سنتين ومرره هالشي مخوفني عليه، مؤمنة بالله وما كتبه لنا بس ما ودكِ تشوفين من تحبينه وكان مصدر قوتك بهالضعف.
الله يخلي لنا ولكِ حبايبنا ويطول بأعمار الجميع بصحة وعافية ♥️
على إستعداد إني انتظر بداية كل سنة عشان أقرا تدوينتكِ وصدقكِ ♥️
ما تبدأ السنه عندي بدون هذي التدوينة ، فعلا سنه ٢٠٢١ كانت امتداد لسنه الي قبله فماله داعي انتظار التغيير الواحد يصنعه على قدرته والقناعة لها دور ما يطلب الانسان المستحيل ممكن يحلم ويتمنى اشياء فيها تحدي وصعبه لكن قابله لللتحقيق عشان يقدر ينجزها ويحققها ولا يتحطم لانها ماراح تحقق.
مع الاسف الفقد لابد منه ، في سنة ٢٠١٩ فقدت اول شخص من المقربين وحسيت بعدها مافيه احد معصوم من الفقد لكن اتمنى ان الله يحفظ لك احبابك ويحفظك طبعا واسم الله عليك من الخرشات وان شاء الله الي تنتظرينه يتحقق باقرب وقت.
سنه سعيدة دائما لك ارتوس
يالله ي سوس ماعرف ليه اتأثر من كلامك ويارب يحقق لك كل اللي تتمنينه
الحياة تمشي ونتعلم وكل يوم تتغير احلامنا وطموحاتنا الله يقدرنا ويعيننا
لاتقعطين ?♥️♥️
اه يا توته مدونتك ها المره جت على الجرح.. لم انتبه للعمر الا عندما رأيت الشيب ملى راسي. جبر الله مصابك في ليون..