مَساء / صَباح الأجواء الحُلوة
مَوضوع اليُوم عَن مُنتج أثار ضَجة كبيرة في عَالم المُدونين وَ الجمال وَ له تقييمات عالية جداً وَ إللي ميّزة أكثر هُو سرعة نتائجه + رخص سعره
صَاحبة المَاركة وَ إسمها بترا ستراند Petra Strand وَ هي خبيرة تجميل لها ٢٠ سنة فهالمجال وَ أم لـ ٤ أبناء
تَقول إنها أنشأت هَالماركة للمرأة العَصرية إللي مَاعندها وَقت وَ أغلب مُنتجاتها تلبي أكثر مِن أحتياج بوقت قصير ، بإختصار تُناسب رِتم الحياة السريع ، وَ شعارها : كُوني النسخة الأفضل مِن نفسك وَ تعتمد بمُنتجاتها عَلى المُكونات الأَقرب للطبيعية وَ تحب المظهر الطبيعي بالماكياج اللي يوحي إنك حَظيتي بليلة نَوم هادئة ” just had a good night’s sleep ”
المُنتج إللي رَاح نِتكلم عَنه مِن خط العناية اليومي وَ هو تُونر بيكسي
Pixi Glow Tonic
سَعر المُنتج : ١٨ جنيه إسترليني = ٩٦ ريال سَعودي تقريباً بدون الشَحن وَ الجمارك
التونر جاني تقدمة من متجر : La_boutique88 للإطلاع عالمَتجر ( إضغطي هُنا )
وَصلني أعتقد ليلة عيد الحج ، وَ من يومها إنهالت علي الطَلبات بذكر رأيي عنه !!!
كُل مَره أقول راح أجربه قريب ، راح أجربه قريب … وَ القريب مابغى يجي
في الحَقيقة وَ الواقع سبب تأخري هَالمرة مو عرقوب إنما هُو : عقدتي النفسية ههههههههه
صراحة بَشرتي غَريبه تتقبل كُل شيء بالحياة إلا شغلتين : التونر وَ مرطب البشرة
وَ هالشيء هُو السَبب كوني مقلة بتجارب هالشغلتين ..
عِندي شبه خُوف لما أجرب تونر جديد بالذات ، ياما جَربت تونرز بَدل مايفيدني ضَرني بعدها إكتشفت إن العَيب في مُكونات التونر
هَي إللي ماتناسبني وَ تهيج بشرتي ، بس ما زال عندي تخوف دائماً من تجربة الجديد ، عَندي ماركتين مِن شركتين للتونر ما أحيد عَنها مهماً قريت إن التُونر وآآآو ..
عموماً راح أحط لكم مُنتج اليوم وَ مابي اصيبكم بالإحباط ماجربته على وَجهي لكن جربته بطريقتي الخاصة
– ليش ماجربته بوجهي ؟!
رغم إني كنت مأجله تجربته لوقت مُناسب ، لكن مُكوناته تتعارض مَع روتين عنايتي بوجهي ، كَون الرتن يدخل دائماً في روتيني وَ هالتونر يدخل في تركيبه حِمض الجليكوليك ، فما أحب أبالغ بإستخدام أكثر من حمض بنفس الفترة ، لَكن بحللكم مُكوناته وَ منها راح تعرفون إذا يناسبكم أو لا
خلونا نتعرف عالمُنتج مِثل ماذُكر بالموقع الرسمي ( Pixi Glow Tonic ) ~
عِبارة عن تونك مقشر يعطي توهج للبشرة ، يُساعد على تَوحيد لون البشرة وَ شد البشرة وَ يحارب شيخوخة البشرة
يُزيل خلايا الجلد الميته وَ الزيوت الزائدة وَ بقايا المَاكياج فتظهر بَشرة أكثر صحة
يناسب جميع أنواع البشرة بَما فيهم البَشرة الحَساسة مِن مُكوناته الآلوه فيرا وَ الجنسنج
تظهر النتائج خلال أول أسبوعين من الإستخدام اليومي ، خَالي من الكحول
طريقة الإستخدام ،’
يُغسل الوجه بالغَسول مِن ثُم تبلل قطنه بالمحلول وَ يتم مسح كامل الوجه وَ الرقبة وَ الديكولتيه ( ماعدا حول العيون )
يمكن إستخدامه حتى في الصباح ..
مُلاحظة : أغلب البَنات لما يَعتنون همها الوَجه وَ الرقبة بالطقاق ، إهتموا بالرقبة أكثر شيء تَشيخ وَ يبين عليها الشَقاء وَ التعب
لليوم أحزن على مَظهر الفنانة بيريانكا تشوبرا بَحفل الأوسكار ( رَقبتها كانت تَبكي وَ أغلب التَعليقات إللي وَصلت على مَظهر رقبتها )
بالرُغم إنها جَميلة وَ بـ براءة بَنفس الوقت وَ شكلها مُميز ، البَعض يخرب جَماله بمثل هالإهمال .. أكيد هَي إنسانة تَهتم لكن يبيلها عَناية أكثر بهالمَنطقة
المكونات الرئيسية :
– حمض الجليكوليك : مقشر
– الآلوه فيرا : ملطف
– بندق الساحرة : مطهر وَ قابض
تجربتي لتونر بيكسي المقشر ~
ريحة المُنتج شَبيه يمكن بالصابون ريحة مألوفة نشمها بكثير من المُنتجات ، إحساسه مُنعش وَ بارد ، لما تمسحينه راح تلاحظين لون رَمادي ينزل منك بالقطنة ، طبعاً مِثل ماقلت لكم ماجربته على وَجهي رُغم إن المُنتج خالي مِن الكحول وَ هذي نقطة تحسب لصالحة لأن اغلب التونك بالسُوق يحتوي على كحول
هالكحول هُو المسبب الأكبر بتهيج البشرة وَ هو السبب إللي دايم يحسس البشرة
[ وَ آتمنى مِن راعيات المَسحات الطبية إللي كَل ماحبت تَهتم مسحت وَجهها بالكحول تتوقف عن هالحركات بيجي يَوم تعضين أصابع الندم ] َ
لكن بما إنه عِندي وَ المُنتج فيه حمض إستخدمته للإبط وَ لتنظيف الأذن مِن الخارج
هههه لا تستغربون تراي مَهووسه بتنظيف الأذن لأن الأذن مِن الشَغلات إللي تجتمع فيها البثور السَوداء مِثل الخَشم بس أقل وَ فيه دهون بعد ، يعطي إحساس مُنعش وَ ينظف
طبعاً ماراح أشوف نتائج بهالبقعة الصغيرة مِن الجسم خاصة إن ماعندي مَشاكل بس هو إحتمال حَُبيت أقوله لكم ممكن يفيد إللي فيه تصبغ بسيط بهالمنطقة
مُلاحظة ،’
بالإبط كُنت أستخدمه ٣ أو ٥ أيام بعد الشاور ، وَ أوقف يوم إذا بديت أحس بحكه ، لأنه يظل مُقشر صَح إنه خفيف وَ يعطيك إحساس بالنَظافة لَفترة طَويلة
بالنسبه للأذن فعلاً صار يلمع وَ خفت تكون الرووس البيضاء بالذات فيه وَ دايم يعطي إحساس بالنظافه واَ لإنتعاش
لكن إللي يحبون يجربونه عَلى وَجههم راح أفَصل عيوب وَ محاسن بعض المُكونات إللي فيه :
مَزايا تونر بيكسي ~
– خالي من الكحول : هالميزة أجمل مافيه مثل ماقلت لكم نادر تقلون تونر بدون كحول
– حمض الجليكوليك بنسبة ٥٪ :
اللي مايعرف حمض الجليكوليك هو أحد أنوع أحماض AHA أي أحماض الألفا هيدروكسي وَ مُستخلص مِن قصب السكر
أللي يمزيه إن جُزيئاته صَغيرة تدخل بعمق البشرة مما يجعله فعال في علاج الخطوط الدقيقة وَ حب الشباب وَ الرؤوس السوداء وَ فرط الدهون وَ تجديد البشرة بالإضافة لعلاج الندب وَ التقليل من حجم المسام
بالعيادات يٌستخدم بتركيز كبير يمكن أكثر بـ ٨ أضعاف هالكمية وَ ينحط فقط لدقائق ، لكن بالإستخدام المنزلي يستخدم بتركيز خفيف
بمنتجنا نسبته فقط ٥ ٪ وَ عشان تحصلين على نتائج مرضية بالإستخدام المنزلي يبيلك تستخدمين نسبة ١٠٪ على الأقل لذلك الأ فضل تتبعينه بكريم يحتوي على نفس الحمض لأفضل النتائج
– غليكولات الأمونيوم: يُستخدم لضبط مُعدل الحموضة مَع الحفاظ على التقشير في المنتجات وَ هو الشكل الصناعي لحمض الجليكوليك
عيوب تونر بيكسي ~
– بندق الساحرة : هالمُركب سبق وَ تكلمت عنه قبل بأحد المُنتجات ، وَ كثير مِن الأجانب يستخدمونه كَونه مُنتج عشبي طبيعي يعني تقدرون تقولون زي ما نستخدم حنا ماء الورد
صحيح هُو يطهر البشرة وَ يقبض المسام وَ يعتبر من مضادات الأكسدة ، لكن قَد يُهيج البشرة الحساسة وَ يزيد الحبوب مَع الإستخدام المتواصل خاصة إن هالمركب يمتاز بعطريته ، فكون الشركة كاتبين إنه يناسب البَشرة الحساسه فهالشيء مو دقيق أبداً
– فيه نسبة بسيطة من العطور الطبيعية
طبعاً للأسف نَسبة القُراء بالعالم العَربي تتناقص يَوماً بَعد يوم للأسف
حتى بالأمور المُفيدة بَحياتهم وَ بالأمور الإستهلاكية يتعاجزون يقرون ، وَ يطلبون مِن الشَخص يَوضح لهم ماراح نَوصل لَمكان بهالطَريقة
يَعني صَرت أحس الكَثير ينقصه الفَهم يمكن لو أختصر التَدوينة بكلمة : وآآآآو أو بَكلمة : وووووع بيرتاحون وَ بتتهافت علي الشَركات بَعد
المَنطق بعيد وَ مُتجرد كُل البَعد عن تَفكيرهم طايرين بالعَجة ، لو يَجيني سؤال بَعد اليوم عند بَودرة الكَولاجين يَمكن أبطل تَدوين
إنقرفت مِن كثرة هالسؤال ، تَطلع فنانة مَشفطه وَ منفخة تتكلم عَن الكولاجين إستحي عَلى وَجهك وَ لا تعتدين على شَغل البلوقرز
خَلك فَنانة بَفنك ، وَ ليت الإعلان الفَاشل ذا جايب نَتيجة بَوجهك ، رَجاءً لا تَصدقون ..
يَعني مو مَعقولة لو شَفتوا توبا مَنزله إعلان عَن زيوت للشعر تَصدقون ترى شَعرها رَباني كذا
إفهموا هالفَروقات الطَبيعية ، كَفاية تَصيرون تُبع تلهثون ، الوَهم لاعب بَحسبتكم لَعب شَوية وَعي إقروآ إطلعوا
لأن بَيجي يَوم إللي يَكتب بأمانة وَ ضَمير يَوقف مَع كمية هالسُخف المُنتشر ، صار السُخف وَ النصب وَ الإحتيال أسرع وَسيلة للوصول
وَ شُكراً
دُمتم بَحب
تم
أنا والتونر مو أصحاب أحس دايم يزيد جفاف بشرتي فأستغنيت عنه.
الناس صايره تشتري أي شي عليه مدح بدون تفكير وأذا ما ناسبهم هاجموا الشخص الي تكلم عنه كأنه أجبرهم يستعملونه ، هذا غير الي يسألون عن شي جوابه مكتوب ، مدري كيف راضين بالضرر على نفسهم والمشكله عندهم وقت يقرأون ويبحثون بس ذابحهم الكسل.
ارتوس قواج الله? ابي رايج ب سيروم فيتامين سي وهل يصلح لكل بشرة وشنو فايدته
يسعد صباحك ??
فعلاً انتشر هالتونر انتشار كبير بس مثل شرحك وتفصيلك له ماشفت دائماً وابداً تدويناتك ومعلوماتك مميزه ?? وحبيييييت استخدامك له للإبط والاذن ??
الله يعطيك العافيه ❤️❤️
يعطيك العافية
انا بصراحة يجلطني الي فاليوم الواحد تكتب عن اكثر خمس منتجات وكل يوم نفس هالموال ومدح
وتكون امس اشترته ههههههههه
استمري اسلوبك جميل وتبسيطك للمعلومة يرسخها بالعقل
احبك
مكااااني ???
اكثر شي حمسني لاستخدامه شكل وجهها المنتعش مع اني مثلك التونر مايناسبني ابد ،، تسلم يدينك على هيك تدوينه
تم
تم.. ?
ماشاءلله التدوينات صايرة تنزل بدري ما نلحق نتسابق عليها ♥️♥️ نقرا وًنعود
ي هلا وغلا بتوسه ??
لي عوده….
انا استخدمته لوجهي يومياً و لاحظت طلع لي حبوب صغيره تحت الجلد ! في البدايه حسبته من سكرب جديد استخدمت بس لمن وقفت و رجعت بينهم. عرفت انه المشكله !
خساره جداً كنت متحمسه له كثير مره من المدح اللي سمعته !
جربت برضو القلو ميست حق بيكسي يعطي مضار مؤقته بس مافرقت فيه ترطيب عالي او شي ثاني !
صباح الجمال ســوس الحُب :*
يلا جاري القراءه ، وعلى فكرة بالوقت اللي كنت ناويه اشتري هالمُنتج ، شفته بعد أسبوع على صورة من صور تسريحتج فقلت بيني وبين نفسي ءأجل الشروه لأنج أكيد بتكتبين ريفيو عن المنتج ( شفتي الثقة عاد )
:*
شرح كافي و وافي والله ، ونويت آخذه إن شاء الله ، ترا سوس أحلى ما في تدويناتج هو التفصيل ، يعني أنا إذا قريت تدوينتج لمنتج معين ما أسير أدور على ريفيوهات ثانية ، لأن شرحج ما في منه ويكون كافي وشافي وملم بكل التفاصيل الصغيرة والكبيرة ..
بالنسبة للفقرة الأخيره من تدوينتـج ، فكنت بيوم من الأيام من هالفئة إللي تصدق الإعلانات والله حتى من دون ما أقرأ للأسف ، أساسًا ما كانت عندي توعية أو عقل منفتح على هالمواضيع ، وياما أنقص علي ، لكن الواحد يتعلم وما يستمر على هالرتم ، لأن الدنيا ما بتبقى على حالها ، والواحد لازم يقرأ ويتثقف قبل ما أيي اليوم إللي العطاء فيه بمُقابل ، لازم نتعلم من ألحين ونتدارك عشان لا يفوتنا شي ..
يسلملي قلبـج سوس على هالعطا ، والله وربي يشهد أني اعتبرج حسبت أختي وأحبـج وما أرضى عليج إلا كل خير ..
لوف يوووو كومايات
:*
آخر تدوينة كانت بتاريخ 9 واليوم نحن بتاريخ 23
حابه أقولــــج آي ميس يوووووووو
لك وحشتينا كومايات ســـوس
قلووووب
قلووووب
قلووووب
يعطيك الف عافيه ❤
ههههه من جد ملينا من النصب .. ويقولون خليهم يسترزقون بالاعلانات
ميخالف لكن شوية ضمير يعني حرام تمدح شيء ويكون ممكن يضر اكثر من ما ينفع والكل صاير يصدق .. ولا تمدح اشياء تكثف الشعر وكل شعرها اكستنشن ?
حتى قبل كم يوم فاتحه السناب على وحده من المشاهير وعندي امي .. من زود كلام ومبالغتها امي تقول مصدقه ؟بتروحين تشترين علطول؟ مو معقول كل شيء مدح مدح
فيه اشياء صحيح استفدنا منها بس يكون على قولتك بعد قراءة وتحري ?
اشكرك على جمالك ?
ياااه زمان عنك ياتوتو ..
مدري وش هالدلع بس طلع معي ع المود المصري ههههه
والله هالفتره بشرتي صايره غريبه تطلع كل اسبوعين حبتين حمرا وتترك اثر ابدا ابدا مو بالعاده بصراحه بشرتي كانت صافيه الحمدلله عمري بحياتي ماعانيت من حبه وحده ولاني عارفه السبب بالضبط من ايش لان تغذيتي اختربت ونومي ملخبط وبديت منتجات جديده .. جد ماعرفت السبب الرئيسي خخخ سويت لي موعد ابشوف اثر هالحبتين اللي طالعهابيه يختفي وان شاء الله ابدا اعدل اموري لاني تازمت نفسيا من هالحبوب 🙁 .. > والله مدري متى ببدأ التغيير والتعديل ?
نفسي اجرب هالتونر بس اتوقع اني بجربه بنفس طريقتك ع منطقة الابط ..
وبالنسبه لكلامك ب ان الناس لازالت تنخدع بهالدعايات ..واكثر شي يقهرني اللي تقول شريت مشد حراري عشان بطن الولاده يرجع اقول لها سوي رياضه تقول لالا هذا يمدحونه البسه 4 ساعات مع شغل البيت ويخفي البطن ?? اي الله يقويك يارب خخخخخ
فلهذا اقول لك انا انسانه استفدت منك وتطورت بقرائه المكونات وهالشي كنت اغفله من قبل وصرت اعرف اسامي مكونات ماكنت اعرفها قبل ولااعرف فوايدها فشكرا لك من القلب يالقلب ??
مشكوره حبيبتي على التدوينه الحلوه
وحمستيني استخدمه مع انه التونر اتحسس منه ويجففلي بشرتي
من فتره نفسي اجربه بس قلت انتظر تجربتك لان بشرتي ماتتقبل اي شي بس ماخطر في بالي استخدمه للابط وبالنسبه للرقبه انا اكثر شي يلفتني في الشخص رقبته احب الرقبه نظيفه وممشوقه لان كثير اشوفهم ترهلت بسبب ميل الرقبه على الجوال او الوزن الزايد
تم مع انه متأخر مره 🙂
ولو اني تحطمت شوي لانك ماجربتيه على وجهك بس وصفك الدقيق عطاني تصور واضح وباذن الله باطلبه قريب ? وآخر جزئية بردتي قلبي صراحه لان الجهل والمشي على كلام الفنانين زااايد واخص الفنانين لان تقريباً ٩٩٪ بيكون اعلان مش شيء أكيد وتجربة صادقه
مرحبآ آرتوسه ❤
صحيح وأنا وحدة من اللي كانوا متحمسين للتجربة هذي
انا أستخدم مسحات جلايكوليك 10 % يوم ايه و يوم لاء
ف أتوقع نفس النتيجة ممكن الاقيها بس مافي مانع أجربه لو توفر عندنا
وبالنسبة للسخافات المنتشرة حدث ولا حرج
ماعرف شلون للحين عقليات ممكن تصدق هالاشياء
بودرة الكولاجين ذكرتني ب مكملات الحلبة اللي هبوا فيها على أساس أنها بتنفخ الخدود والجسم وتصفي البشرة و و و !
عيل تتسكر عيادات الجلدية والتجميل وغيره دام الحلول سهله ومتوفرة في منتج واحد
آرتوسه يا عمري ما تقصرين معانا والله لا يحرمنا منج ❤ جدا مستانسة إني لحقت على التدوينه قبل أنام
سوس انتي لا توصفين بكلمة .. جد جد مافية شي يوصفك .. عمري ما اشتريت شي لمجرد ان انسانه مشهورة مدحتة او اني شفت له دعاية .. اصلا كنت ما اهتم ولا اتفرج هالأشياء .. مصدري بس كان الدكاترة اروح لهم و اخذ منهم و اجرب نفع كملت ما نفع غيرت الدكتور بحكم اني كنت أعاني من حب الشباب من مراهقتي .. و بعد كثرت التجارب صرت اكثر حذّر حتى مع الدكاترة و صرت اسال .. بس بعد ما عرفتك و عرفت مدونتك حسيت اني انسانة جاهلة .. كل يوم تضيفين لي معلومة شكل .. صرت بكل ثقة اروح و اقول سمعت ارتوس تمدح او تذم هالشي لان وصفك و شرحك للتجربة يجبر الشخص يثق فيك .. صرت احاول اقرا اكثر عشان افهم اكثر روتيني و تدويناتك و كمان عشان اتفاهم مع الدكاترة مزبوط .. ارتوس كلمة شكرا لا تكفيك و ما اعرف كيف ممكن نرد هالشي لك ???
مكاني بعد الزحمه
ياههلا ياهلا ?
دايما تكون تجربتك مميزه
وحلو ماقد فكرت استخدم تونر للابط ?
تفي من بؤك ربي يخليكي لناا وماتبطلي
ههههههههه حسيتك عصبتي
قبل فتره انتي قلتي الكولاجين مايتحفز بكولاجين .. واكثر من دكتور قالو انو غير مفيد ومايتحفز كذا
يعني ارتوس احس الي مايفرق بين الشخص الي باين كلامو نصب ولا دعايه ولا بس يقول كذا عشان الشي منتشر واكيد انو كويس مو معقوله الشعب مجربو واطلع انا اقول مو كويس فهمتي .. و الي يتكلم بامانه ومنطق وعارف الشي صح وفاهمو ممره لاتتعبي نفسك
وبالعكس والله ماتدري قد ايش انتي تققفيناا
يعني حتى مكونات صايره افرق واعرف ذا لمين وحق ايش
مانحرمش منك ???
دايما بشوف هالمنتج بس الحين بعرف تفاصيله فوق هههه
ويسعد صباحك ياقمري ..❤
صباح الورد ..?
أكثر جزء مُهمل بعنايتي بوجهي هو التونر يسبب لي تصبغات لذلك مكتفية فقط بماء ورد أرشه على وجهي وأتركه ينشف من نفسه وأحط الكريم المرطب بعده ..?
لكن بما إن هالتونر أصلاً مقشر وخال من الكحول ما أحس بيسبب لي تصبغات أتوقع التصبغات بسبب الكحول اللّه أعلم مجرد تخمين ..?
كل الشكر لقلبك النقي أرتوس المدونة صايرة لي مرجع وروتين مهم وضروري قبل أي مناسبة عشان لو كان فيه نقاط غافلو عنها أتذكرها وكمان يكون مراجعة وتثبيت للمعلومات الجديدة اللي تعلمتها من خلالها ..?
دمتي بكل الحب ..?
اهلاً ارتوس الجميله
انا مثلك اخاف من التونك
بسالك في فرق بين التونك والتونر؟؟
ولا بس مسميات!
حبيته جداً لين ماوصلنا لنقطة بندق الساحره? بشرتي جداً حساسه
شكراً لك على طرحك المميز ، ماتدرين قد ايش تأثرين فيني وكلامك ينفعني الحمدلله
استمري بالتدوين صوتك واصل للقلب❤️
سُوس . . إنتي تغذي فِكر المُتابع قبل لا تفيديه بالتجارب
و الحمد لله ، الوعي بدأ يزيد و إن كان بنسب طفيفة
بس المجهود و السياسة المنطقية الي تتبعينها ، تجيب أثرها – و لو بعد حين ❤
. .
أحيي فيج (روح الأم) الي تحاول تنهض بعيالها (متابعيها)
هالتفاؤل و الحماس للتغيير للأفضل ، هو سبب استمرارج و تراجع الفئة المتفلسفة لمجرد الشهرة و المصلحة ?
. .
و بخصوص المنتج ، مميزاته تجذب قلب كل مُعتنية ببشرتها ، بس
بالنسبة لي ، لإني اتعرض كثير للشمس بحكم الوظيفة
ف ميزة التقشير حالياً بتخليني مترددة .. خاصة لبشرة وجهي
<< الإسمرار و الجفاف و الدهون صارت صعبة إني اسيطر عليهم بسهولة
بس ما يمنع اجربه بمنطقة الإبط ، كتقشير رقيق و مريح و بديل للسنفرة من وقت لآخر .
. .
سلمت إيدج و ما خَطت ?❤
اشكرك ارتوستنا ع الموضوع الممتاز
بس خوفتيني من شغله الكحول ، ابي اعرف شلون اعرف ان المنتج فيه كحول هل هي مركبات معينه ولها اسماء معينه
لاني متخوفه من منتج استخدمه حالياً اللي هو محلول اسمه ديرما تي وهو مضاد للحبوب وريحته قريبه للمسحه الطبيه
آآخ ي التووونررر ?? على قد مابشرتي تحتاااجه بس احسه
ضرررني ? لان اغلب اللي اجربها فيها كحول و كثيرر بيينت مساام
وحرركه مسح الاذن دايم اسويها احسس منعشششه ??
فعلا كنت بحاجه لاحد ينصحني بتونر بدون كحول لاني متضايقه من اللي استخدمه ??
❤️
يسعد صبآح الزييين
التدوينه موو مصدقه خلصت سرعه
شكلي مندمجه بالقرائه وبقوه ي حبني لك
بالنسبه للتونر عجيب شكله خصوصاً استخدامك
له عجبني اكثر ?
انا كنت استخدم موية الورد بارده ومرتاحه
هالشي الحمدلله
كل شي اخذه جاهز إلا تونر مافكرت اشتري ابداً
ماادري باقي مااقتنعت ع شي محدد واخاف اجيب
العيد ف بشرتي ?
منتظرة التدوينة من زماااان
متحمسة لقرائتها جدًا ???
صباح الخير والمحبه
ارتوس الله يكتب لك اجر كل حرف تكتبينه لتوعيه بنات جيلك ماقصرتي صراحه
التونر مااستخدمه ابدا يحسس بشرتي
بس حبيت اعلق عشان اقولك أحببك?
يآ عيني محظوظين إحنا تدوينتين بالآسبوع هنآ انا في قمه الفرحه
صآدقه للآسف لاحظت هذا الشي باللي حولي خلاص مآ يبون يقرون
يبون المعلومه جاهزه يآزين اشتروا او شين وآنتهى بعدين تجي تجرب وتحلطم مآ ناسبني طيب آنتي قريتي بحثتي شفتي إذا هو يناسبك او لا؟!
شي محزن والله
آنا الشي الوحيد اللي مآ تتقبله بشرتي للان اللي هو الترطيب مآ اعرف وش السبب للآن
وآستمري بالتدوين لان صرآحه مافي احد يوصل المعلومه مثلك
شكرًا شكرًا لك من آعمآق القلب ?
ياااصباحات الحب والجمال وكل حااااجه حلووه تستاهلك ❤❤
التونر فعلا اناا مقله مقله فيه مرره وحده بس فكرت اشتريه
وللحين طايح بكبدي بخليه ليديني شكلي خخخخ
اكتفي بالغسسول فقط .
لكن هالتونر ودي اجرربه رغم ان بشررتي حساسه مره بس مايمنع نعيش التجربه.. وع طاري الاذن انا اهتم فيهاا وانظفهاا وكم مره اقول بنفسي هالشي الوحيييد الي ماتطرقت له ارتوس كنت استغرب صراحه واتبين لي انو موو كل شي تسسوينه بعنايتك تقولينه ياختي عليك وع كلامك الموووزون ❤❤
فعلا سالفه الكولاجين تجلط بعذرك لو وققتي تدوين من قبل عشر سنين او اقل وانا اقرا عن هااالبودره ماملو منهااا خلاص
اعانك الله يائللي ع هيك نااس
الله ييسعدك اضعاف اضعاف ماتتعبينه ❤❤
يسلم لي قلبك على هالعطاء ..
ماقصرتي شرح كافي وافي .. موسوعه ومرجع والله لي
ماسوي شي الا ارجع لتدويناتك ..
تونر ماستغنى عنه احس لو ماحطيته ناقصني .. عجيييييييب ويحمس باذن الله باضيفه للقائمه واجرب طريقتك على الابط ..
التونر ما احس يناسبني لاني اقشر وجهي مرتين بالاسبوع مره بالريتن آي ومره ببودره انزيمات الرز فما احتاج اقشر زياده عشان ما تلتهب بشرتي ومبسوطه بروتين تقشيري ونتايجه لي وبالنسبه للكولاجين مره كنت منهبله وحصل اني اخذت حبوب كولاجين اساسها بقري لعبت بهرموناتي وسببت لي تكيسات بالمبايض وطبعاً نتيجه التكيسات سمنت و قب وجهي حبوب حمرا كاني حاكتهم وتبت عقبها اخذ فيتمينات وخرابيط مثل الكولاجين وغيره وتعلمت من الدرس ورحت سويت تحليل للفيتمينات وللحين بعلاج التكيسات الله يكتب لي الشفاء إن شاء الله ..
ويسعد صباحك??
التونر مدري ليه يسبب لي جفاف ولما استخدمت هذا نفس المشكلة
بس بجرب طريقتك
الله لايحرمنا منك تدوينتك موسووووعة ومرجع لي دايم ??
تسلمين على هالتدوينه وعلى هالعطاء ??
بالنسبه للتونر شفت كثير يمدحنوه
صادقه الناس صارت تصدق اي شي للاسف???
تخيلتك توقفي تدوييننن لااااا والف لاااا ?? انتي اجمل حاجة بالنسبة لي .. غيرتي نمط حياتي من جذوره ،، فتحتيني على اشياء كنت استغفلها فلو توقفين بذبحك ? ? عموما نرجع للتدوينة بالنسبة للمنتج حبيت فكرتك لاستخدامه جميلة وبالذات الاذن ، زمان كنت عاشقة المسلسلات الكورية وكنت اشوفهم ينظفوا اذانهم بابرة تنظيف الرؤوس السودا وقلت اشبهم يستهبلون ? للامانة ما كنت متوقعة يطلع فيها رؤوس سوداء لين كبرت وشفت بعيني ..
شكرا للانسان المصداق الاول بالنسبة لي، و الفاهم بالتجميل و الذوق و التسويق كمان..
شكرا آرتوس،،،
عجبني التونر بالذات افتش عن عناية بالبشرة تناسب الحامل،، و الجليكوليك اسيد هو الوحيد الامن نسبيا في كذا مرحلة…
آتمنى آقابلك شخصيا اناقش معك مجريات الامور… اذا فتحت الاستقبال سجليني باول المواعيد
اهليين .. ومساء التدونياات الاحلى ?
حبيت بصراحة استخداماتك له ، وتمنيت صحيح اشوف رايك عنه كتونر للوجه بس يالله وصفك كافي وشافي ..
يسعدك يارب عن جد دقيقه بالوصف ما ننحرم ..
عاد مشكلة القراءة والمحتوى ببعض الشغلات مشكلة البعض يتشابه والمحتوى العربي مو قوي ..و لا تفهمين بالتركيبات صدقيني عشان كذا الكثير يجي يبي شرحك الدقيق ..
ومن بين السطور الواحد يتعلم اكثر واكثر ويتفتح مخه ..
شكرا ?
سلام
ي اختي لو اقولج اني احب هالتونر حب احسه معقم للبشره احس وجهي يتنفس كفاية احساسي النفسي به
لكني ما اكثر استخدامي له مرة مرتين ف الاسبوع كفايه
ولما قلتي لابطج قلت الحمدلله مب بس انه الي استخدمه في غير مكانه الي مكتوب ??ابداع وابتكار يا حبيبي
نقطتج الي ذكرتيها عن الكتابة عن المستحضرات ونقلهم الغير دقيق يختي ع الجرح والله
قط جفتي ذي الحساب الي تحط منتج وتقول يلا كتبو عنه والناس تتهاوش والي تمدحه تودييه فووق فووق كانه الشركه شركة ابوها
والي تذمه ماتقول ليش بس مب زين و خلاص
اقعد افكر انزين شنو نوع بشرتها متا استخدمته
لكن عاد شتقولين
اليوم اجوف كاريكاتير عن التفاهه ان محتله الرقم واحد والي عندهم شهادات ومخهم شغال مهمشين والسبة الناس قامت تهتم من اكثر مكياج من ساعاتها وعبايتها احلى لكن تطوير الذات معدوم تماما
الله يهدينا ويهديهم
شكرا لج ارتوس الجميله ❤استفدت منج الشي الكثير الله يبارك لج ف كل شي
و ع فكرة كيكة التمر ?طريقتج انشهرت عندنا ف العايله كل مامدحوها دعيت لج ?
وااااااه من زمان م علقت هنا .. المشاغل كثرانة هاليومين .. عموما أنا مثلك التونر دايما م يناسب بشرتي للأسف .. عشان كذا اكتفيت بماي الورد .. بس هالتونر شكله عجييب حبيته .. واستخدامك له فتح مخي ع مناطق ثانية ممكن استخدمه فيها .. يعطيك العافية يارب وتسسسسلم إيدينك الجميلة ???
بالنسبة للسطرتين الاخيرات ذكروني بالفنانة أروى لما تطلع باعلانات الشعر يكون شعرها واااو ولما اشوفها ببرامجا او لقاءاتها يكون شعرها مو صحي ابدا ومنتف الظاهر اللي بالإعلان ياباروكة يا وصلات مدري
يا مراااحب والله وحشني المكان هنا ? من زمان ماعلقت بس دايما اجي اخد لفة بالمدونة الاختبارات شغلتني عنك المعذرة
التونر حمسني خصوصا ان في عناية ما استخدم اي حمض لاني ناوية اعمل ليزر لوجهي واخاف اسبب مشكلة بالتقشير حبيت انك بتشرحي المكونات من فترة سرت احاول اعلم نفسي اني اقرا المكونات وابحث عنها عشان اعرف ايش اللي يناسبني شكرا لانك بتهتمي بالنقطة دي ❤️ وارتوس الله يخليكي لاتفكري توقفي كتابة ولا بنجلط من جد ياخي مين يعلمنا بعدين ? انتي كنزي الثمين اللي اتعلم منو دايما وممتنة جدا لعطائك ووجودك اما الناس السخيفة اللي تجري ورا كل من هب ودب بتاكل على راسها في النهاية وبتندم
حاولت اتقبل التونر بروتين العناية ما قدرت .. جربت ٣ او ٤ تونرات ووقفت ماحسيت بالفايده وبنفس الوقت شعور مزعج !
والحين صرت استخدم ماي الورد بغرشه وابخه على وجهي يعطي انتعاش وما يضر ..
عاد هالتونر لو موجود عندنا كنت تحمست اجربه من كلام الناس عنه بس بعد هالتدوينه خف حماسي للمنتج
احب تفصيلك لمكونات المنتج وفايدتهم .. متى بتنزلين روتين عنايتك بالبشرة ؟ متحمسه اشوف نظامك لأن نظامي انا جدا بسيط وحابة اغير شوي بالمنتجات اللي استخدمها
يا اهلاً ?
حزينه لان حضوري صار متأخر 🙁
الف شكر على تفصيلك و شرحك ؛ انا من الناس اللي طلبتك تتكلمين عنه
من كثر هبة الناس فيه و مدحهم له
والان تأكدت اني ابغى اجربه فعلاً من بعد شرحك
حسيته يناسب احتياجاتي ..
و حبيييت شرحك عن صاحبة الشركة و ادخالك لمثل هالتفاصيل بتدويناتك
لانها فعلا تميزك ..
اسعدك الله و عن الشر ابعدك ?
يعجبني اسلوبك انك تتكلمين عن اصحاب الشركة او نبذة بسيطة عنهم استمري
انا والتونر شكلنا عداوة وابد ماراح نتصالح لان بشرتي حساساه كثير وصعب كثير علي القى اللي يصلح لي لدرجة حتى ماي الورد يهيج بشرتي فصرت ما استخدم شي الا ببحث قبل واتاكد ان اكثر من. وحده مادحينه واشوف اللي ذامينه ولسه يذمونه في ناس مع عالم النت قاموا يتثقفون ويعرفون لنفسهم بس في ناس هم من نفسهم مايبون يتثقفون وتجرب على العمياني واذا ضر ببشرتها قامت تتفلسف طيب شوفي انتي شنو الغلط اللي سويتيه يمكن ماناسب بشرتج يمكن عندج تحسس من مكوناته على طول كذا بس
وصح بالنسبة لكلامج بالنهاية كنت كذا اي شي أشوف عليه مدح اجربه من دونبعدها بفترة لما قمت استوعب صرت ما اصدق اي شي يمكتب الا لما اشوف مدح كثير عليه ومن بنات عاديات مو مشهورات علشان ماتكون عندهم مصلحه بمدحهم له بس لما عرفتج وكذا قمت انتبه اكثر لهاذي التفاصيل مو من هاذي الناحيه حتى بالملابس واشياء ثانية كثير
أمانة لفتتني نقطة و استغربتها اللي هي البنات اللي يمسحون وجيههم بمسحة طبية استغربت مرررة وش الفايدة طيب منطقياً بيضرها اكييد
بخصوص التونر بصراحة نادر ما استخدمه بشرتي متقلبة و حاليا مختلطة مايلة للجفاف و التونر يزيدها سوء اذا هذا وضعها ،، للان ما حددت موقفي تجاهه بالاخص المواد العطرية ما احب المنتجات اللي فيها عطور تقرب لوجهي اخاف تحسسه
شرحك وافي و عطيتينا تصور و فهم للمنتج و بخصوص نسبة القراء خفت هي فعلا خفت لكن موجودين و نحب نقرا و شجعتي بالبعض حب القراية ، لو خليت لخربت سوس
اما الاذن ما كنت اهتم فيها بصراحة و قبل كم سنة نصحتني اختي و قالت بتحسين بالفرق و فعلاً فرق هايل و معتمدة تنظيفها مع جسمي بالشااور او بوقت عناية وجهي بعد
شكراً بحجم السماء ،، دوم تدويناتك مميزة و تشدين للقراءة ??
مع اني كنت متحمسه له مووت هالتونر بس بصراحة استخسرت ادفع فيه هالمبلغ خصوصا انه ماركة جديدة ولاتعتبر معالجة او طبية مثل ليراك اول مرة شفت ستاند الماركة وتفاجئت بس سرعان ماجاني احباط منهم خخخ لفت انتباهي منتجاتهم كثيرة مكياج وعناية بس التعليب عادي ولايشجع والوان حقت الارواج كذلك وفوق كذا غالية عادي مو معناه كلامي هذا اني احكم على جودة منتجاتهم بس بصراحة امتعضت منهم قد يكون السبب هو نوعية وجودة المكونات بس بس مافكرت اجرب منهم لهالاسباب وافضل الماركات العلاجية مثل ليراك
على فكرة ستاند الماركة موجودة في ماركس سبنسر لندن
مرحبا ارتوس
انا وحدة من متابعاتك ولكن من خارج المملكة
انا من سلطنة عمان وبصراحة لفتتني مدونتك لما كنت ابحث عن موضوع وبالصدفة طلعلي موضوع من مواضيعك بشمواه وحبيت طريقة شرحك للمواضيع ومصداقيتك ومن بعدها دخلت للمدونة وصرت من الزوار الدائمين لها
شرحك ومواضيعك وشخصيتك لزييييزة اوي
ربي يحفظك
دمتي بود
انا استخدمت مره تونر ماي ورد من شركه اجنبيه ووخرب بشرتي زياده فمن يومها وانا اخاف اجرب التونرز مهما قريت عن فايدتها
مشكوره ع كم المعلومات يلي تنطرح جدا متعه وفائده حتى ولو م شريت المنتج يعني فيه حاجه تنضاف ع المنتج المطروح من كلام ينفع?براڤو والله
السخف بيستمر الله يعينكم لكن الشطورين كثار ارتوسه ?
انا كثير احتار ببشرتي واخاف علليها قررت اروح اخصائيه ما ابي اهبب بنفسي لأن سبق وسويت اشيائات دمرت وحهي
صُرِف لي الروكتان صارت بشرتي حلوه لكن ابي الافضل يبيلي اهتمام وقراءه اكثر … والله للآن تدويناتك الجماليه مستفيده منها الأسنان واللي قلتي فيها كل انسانه لها خط عنايه مره وسعتِ افاقي
كلمة احبك قليله ..
يا حبيبي اهو بئولها بكل اللهجات? مرا مرا بزاف وايد اموت عليك واتمنىلك الخير مثل ما تتمنينه للكل والخير والنفع لو بسيط ربي بيجازيك عليه اضعاف بعفوه ورحمته و بإذنه ?
نوني عبدالرحمن .. سما
اخيرا سمعت حد يتكلم عن الاهتمام بالاذن ??????
صحيت من النوم وجيتي على بالي ، اقول لنفسي : ماشفت تدوينة أمس ❤️
المهم، بالنسبة للمنتج..
التونر عموماً ما احبه مع ان عندي واحد ومبتلشه فيه بسبب انه معطر ، هو مفروض ما تغسل البشرة بعد استخدامه بس ما تقبلت هالشيء..
يعجبني انك تفصلين بمكونات المنتج، بحيث اقدر اقارن واميز بين المنتج الجيد والمناسب لبشرتي او لا..
في ناس تستخدم التونر لظهرها ، يقولون جميل ..
عن نفسي استخدمته بس مرة وقبل اتروش .. لأنه معطر فالاحساس مزعج ..
واخر التدوينة صحيح مع الاسف، قليل ناس واعية وتفهم ان العرض اعلان مش شيء حقيقي هي تستخدمه..
وان لكل شخص طبيعته وظروفه وعمره اللي يحكم عليه مش المنتج..
الله يعطيك العافية ، ويجّمل ايامك بكل خير ❤️
السلام عليكم
كعادتي عرقوبية في الرد هههههه اخر وحدة تعلق
التونر ما استخدمه ابدا كل اللي جربتهم حسيت وجهي بيتشقق معاها من الجفاف حتى اذا حطيت مرطب
بس هذا اتوقع يكون الطف بما انه خالي من الكحول.
بالنسبة للجزئية الاخيرة من التدوينة ههههههههههههههه
دايما اقول لاخواتي شعب المعلومة الجاهزة
ما في بحث وقراءة وفهم يبغوا كل شي سريع وجاهز وبكلمتين
وهذا اواجهه في النادي الرياضي اللي اروحه
اوه تشيلي اثقال حتتعضلي وتصيري رجال ورحمك يطيح وووووووووووووالخ
وحدة تسالني ايش اليوغا قعدت اشرح لها وافصل وانها انواع وبعد هذا كله قالت لي يعني تحرق !!
جتني جلطة وقلت لها ايوة تحرق وقفلت الموضوع.
يعني مدري كيف شخص قرر يعمل رياضة يسافر يهتم بنفسه ما فكر يقرأ قبل ويفهم ويتثقف !!!!!!!
ربي يحفظك ارتوسه مواضيعك جنان لو فضيت اول ما ادخل على مدونتك احب اسلوبك واحب مواضيعك واحبك بعد
ارتوسه بسالك على زبدة الشيا ااخام ينفع ارطب فيها بشرتي
بشتري جدا جافه شلت الغدة من قبل 11سنه واللن مسترة على العلاج بس مدري ليش بشرتي كذا ملمسها كان فيها قشووور بس طبعا مافيها جربت اغلب كريمات الترطيب برصو ملمسها خشنه حتى زوجي يسالني ليه بشرتك خشنه جربت افين وبياديرما ونيفيا وفازلين جربته بعدين خفت ووقفته قالو يسد المسام ويسمر الان اشتريت من محل يبيعو زبده الشيا الخام وخفت تسببلي مشاكل لو عندك حل اسعفيني فيه
اسالك على بشرة الوجه
يمكن بعد تطرقك لكريم الرتن وكيف يتعارض مع استعمالك للتونر يخليني اعيد النظر لروتين عنايتي ببشرتي، حسيت الموضوع اكبر مني.بالنسبة لبيع الوهم فعلا موجود وماحد يقول هادي جينات..لاننكر انه العناية تحدث تغيير بسً مش ممكن تحولك لشخص اخر .. موفقة توسي بنسميك توسي زي ما انادي بنتي تسبيح لانك غالية على قلبي ❤️
الله يوفقك ياملي ولايخلينا منك ودووووم مو مقصره معانا
باي حال من الاحوال
ربي يجزاك الفردوس الاعلي من الجنه
اروع جمله
كوني النسخه الاجمل من نفسك
اوف عليهم تعابير تترجم دواخلنا بشكل
الاسم بيكسي سمبل مقلوب¡ وجذاب
القاروره شكلها جذاب
تشبه عطور ديور اصفهان والشله
تعجبني هالاشكال
Sos حلو انك تطرقتي للاذن ماخلف الاذن واعلاه
كله يبي تنظيف فتحة الحلق ايضا تحتاج
عفوا النسخه الافضل غلطت كتبت الاجمل`
موضوع رائع ماشاءالله
وينج عن التدوين يا أرتوس..اشتقنا لج.. كل يوم أفتح المدونه وما ألقى تحديث ..غريبه
يا حلوها صاحبة الماركة مشرقه ما شاء الله والله أحزن كثير على جهلي بالعناية وأنا صغيرة الحين المشاكل الي عندي تتحسن بنسبه بسيطه مع العنايه ولكن ما تروح لما اشوف بشرة أطفال أقول بنفسي كذا كانت بشرتي وأنا جنيت عليها كنت أداوم بالمدرسة من الابتدائي الى الثانوي والشمس بمنطقتنا حاااارة ولا مرة حطيت واقي . مو اهمال ولكن جهل ما كنت ادري انه مهم واهلي يخوفوني ان هاذي مواد كيميائية تخربك
كلمة بندق الساحرة رناانه حيييل احس من الكلمه اذا جربت المنتج بطلع وااو ههههه انا اول مرة اسمع فيها والله مشكورة انك نبهتي على جوانبها الي ممكن تكون ضارة خلتني ارجع للواقع وانتبه
بخصوص رقبة بريانكا تشوبرا أتوع هي كذا خلقه لان من زمان تمثل وهي كانت باول العشرينات وكانت رقبتها كذا ملفته خطوطها والله اعلم .
والله الاعلانات صارت شي متعب يعني الواحد يتابع خبيرة تجميل فنانة يبي ياخذ من تجاربهم ويقولون مو اعلان وانا عندي ضمير وانا وانا يخلون الواحد يصدقق حتى ان البعض صار يشك بالصادق انه يعلن بعد 🙁
طحت على مدونتج بالصدفة ؛ بصراحة وبإختصار حبيت حبيت حبيت ??
طريقتج بالطرح والشرح والتفصيل جداً جميلة ومشوقة ؛ الله يعطيج ألف عافية ويقويج ؛ ومن اليوم ورايح قبل ماأفكر أشتري أي منتج أكيد راح أدور بمدونتج إذا إنتي كاتبة عنه أو لا ؛ ماشاء الله حلو أسلوبج والأحلى إنج فاهمة فكرة إنه المنتجات هذي وبإختصار لو ناسبتج يمكن ماتناسب غيرج لإنه السبب بشرتج مو المنتج نفسه ؛ وهذا الشي لاحظته على بعض المنتجات اللي جربتها ؛ أنا نوعيتي أحب أشتري وأجرب ويا هالبشرة اللي تطلب الرحمة من كثر ماتعبثت وجربت عليها بس فعلاً ولاحظت وايد بعض المنتجات كثر مافي مدح عليها أحياناً ماتناسبني والعكس بعضها ماألقى عنها أي موضوع وأتفاجأ بجمالها وكيف إنها تناسبني ؛
ألف شكر لج على هالمدونة الأكثر من رائعة ?
يعطيك العافيه شرح مفصل وخفيف ❤️
بس عندي سؤال لما استخدمتيه لمنطقة الابط كنتِ تحطين مزيل عرق ؟
مايحرقك لأنه مقشر ؟ واذا كنت استخدمتي دليني اي نوع استخدمتي ؟