صَباح / مَساء النَاس القُمآآآل
وَ مازالت رحلة البَحث عن مُنتجات مِن الصَيدلية بأسعار مَعقولة مُستمرة
إلا مَا تلاحظون شغلة بصيدلياتنا
زمان كنا ندخل الصَيدلية نلقى صَيدلي أو ثنين أو ثلاث صيادله وَ مُمكن نلقى عامل
تذكرون بمحلات التجميل قبل تَأنيث المحلات أول ماكنا ندخل المعرض تلقون مُوظفين مِرتصين بالبوابه وَ يهجمون عليك من كل حدب وَ صوب عَشان تشمين العطر الجديد إللي لوث نص الجو وَ هو يبخبخ فيه
المُهم الصَيدليات صاروا يتبعون نفس النهج [ نهج إلزق بالزبون تبيع أكثر ]
صَارت الصَيدليات غثيثة ، مرات أحب أوقف عند سَتاند المُنتجات وَ أقرأ المُكونات غثاثتهم تعكر صفوي وَ رواقي
وَ المشكلة إني أدور مُنتجات بأسعار تناسب طالبات الجامعه كل الأسعار أشوف إنها صَعبة على هالفئة
[ يا ليت لَو يسوون تَخفيض خاص لطلاب المَدارس وَ الجامعات ] ..
دام الصيدليات موظفين هالكم الهائل من المُوظفين النشب أكيد بيطلعون السِعر من عَيون الزباين ، فَوازنوا بالمَوظفين
وَ نَزلوا تخفيض للطُلاب ( كَف آرتوس على كيفك !! ) ..
قَبل ٣ أسابيع كنت بمركز المملكة وَ تعرفون صيدلية بوتس قرب البوابه قلت خليني أدور يمكن ألقى مُنتج حِليل
صراحة هالصيدلية من يوم ماصار أسمها ترياق الشفاء وَ أنا عِندي إحساس إنها إستهبال
عاد مدري وَش سالفة التكييف بذا المَركز كل ما أروح أحس الحر يقتلني وَ أطلع بسرعة ، خاصة بهالصيدلية لازم يلقون حَل لأن المُنتجات التَجميلية يبيلها تبريد عالي وَ لا راح تفسد ، بديت أشك بسوء التَخزين بصيدلياتنا
عَاد ما كنت رايقة من الحَر قلت له رشح لي أفضل كريم يد عندكم ؟
وَ رشح لي كريم اليد من إن سفن ..
وَ عطيته ذيك العينين إللي تقول أكيد وَ لا تصرف لي بَضاعه
قال : خذيه على ضمانتي فيه أحماض
مو من طبعي إني آخذ عالعمياني بس مدري ذاك اليوم كان عندي مُود المَفهية
وَ شرينآه وَ هذا هُو كريمنا
N7 protect & perfect protection intensive hand treatment
سَعره : إما 65 ريال أو 70 ريال أو 80 ريال
ما عَليه رَميت الفاتورة ظناً بيكون السَعر على الكَرتونه .. بعد ما رَميت الفاتورة إكتشفت مافي سَعر بالكرتونه
بَحاول قَد ما أقدر أكون حريصة عالأسعار
أماكن التَوفر : فقط بصيدلية بوتس
بديت أستخدم الكريم على طُول من نَفس اليوم
لما قمت الصبح حسيت إديني ناعمه وَ رطبه وَ مضوية
بعد أسبوع حسيت أديني أفضل من قبل مِن ناحية النعومة وَ الملمس
بعد ثالث إسبوع كان فيه أثَر خدوش صغيرة بكفي من اللعب مع قطوي ، حسيتها إختفت بسرعة
–كثير يسألوني قَطوك ما يَخدشك !!
إلا يَخدشني أكيد ، بس مرات أجيب كيس زي حق بنده وَ أدخل يَدي فيه وَ ألعبه يَنبسط أكثر
وَ مرات ما يَكون فيه وَقت أجيب الكَيس لأن هُو مَتحمس وَ ألعبه وَ يمخشني ، وَ مرات ما أكتشف إنه مَخشني إلا إذا جيت أسَوي سلطه
تكون مَخوش بالعَين المُجردة سَطحية بس هي كثيرة بس صغار صَغار ، عُموماً تطيب بَسرعة وَ لا تترك أثر أو تَظهر
بالنَهاية مَعي قَطو ما مَعي نَمر أو فَهد ، لَكن عندي جَرح عَميق من ليَون لكن قريب من لون جَلدي مو مبين يوم بَصوره لكم ..
وَصف المنتج ~
تركيبة غَنية وَ رطبة مُقاومة لعَلامات التَقدم بالسن وَ التجاعيد ، يُساعد عَلى عملية تجديد الجلد وَ ترطيبه بالليل
المُنتج يَوعد بنتائج مَلحوظة خِلال أربع أسابيع مِن الإستخدام
• تحسن بنعومة وَ ليونة وَ مُرونة البشرة
• تحسن بالخطوط الدقيقة بالجلد
• تفتح لون الجلد وَ تحسن بقع الجلد الناجمة عن كَبر السن
• تركيبته تحتوي على الريتينول وَ أحماض الفواكة وَ فيتامين سي مع تركيبة مُساعدة في تقوية الأظافر
• أيضاً التركيبة لاتسبب حساسيه وَ غنية بفيتامي B5
طبعاً هالوعود هي وعود الشركات مو بالضرورة تكون حقيقية
مُلاحظة : كثير بَنات بعد ما كَتبت إن كثير كريمات فيها فيتامين بَي !!
أرسلوا لي إنهم راح يشترونه وَ يبلعونه عَشان بشرتهم تتحسن ..
وَ الله لي كَم يوم بالويكيند ما غَير أرد علي أرسلوا لي ، لما أفَصل المواد بأي كريم ما يَعني تروحين تآخذينها بشكل مُستقل
هم عندهم مَعامل وَ مخابر وَ علماء وَ تركيبات يشترونها للدمج وَ الخلط وَ لا ما يَنفع نشرب أي شيء عَمياني ، أنا أفَصل المواد فقط للفائدة
بحال عندك حساسية من مادة أو أشتريتي كريم فيه نفس المادة وَ ناسبك أو حسسك ، تصيرين تعرفين تَقولين أي شيء فيه هالمادة فرضاً يناسبني أو ما يناسبني
وَ كثير من الأبحاث إللي تَجريها شركات التَجميل بخصوص فعالية بعض الفيتامينات بالكريمات ، النتائج السريرية إللي يَتم الإعلان عَنها مو بالضرورة يكون متفق عليها من هيئة الغذاء وَ الدواء الأمريكية يعني أبَحاث غير دَقيقة وَ مشي الحال ، فأنتِ لا تتحمسين يوم تشوفين هالفيتامين بهالكريم وَ تقولين خلاص بروح أشربه أفَضل لي ..
طريقة الإستخدام ،’
يدهن بالليل فقط مع عَمل مَساج لليد
محاذير ،’
يستخدم بالليل ، لازم تستخدمون سَن بلوك إذا بتطلعون النهار، لاتفركون عينكم وَ إنتم داهنينه أيضاً إذا فيكم جروح أو حروق لا تدهنون مناطق الجروح
رأيي عَن المُنتج ~
تَرطيبه مُمتاز غَير دبق ، وَ يحتفظ بالرطوبه لليوم الثاني يعني تدهنينه بالليل وَ تقومين أدينك مرتاحه الصبح
ريحته تشبه المُنتجات الرخيصه مَعطره شوي بس مو قويه وَ لا خفيفه ، مقبوله
النتيجه فعلاً تبين من أول يوم ، وَ من ثالث إسبوع مثل ماقلت قبل حسيت بفرق
لكن إذا أدينكم شَديدة الجَفاف مُمكن مايكون الترطيب كافي وَ ممكن البشرة الحَساسه جداً ما يناسبها
عُيوب المُنتج ،,
أول عيب تفاصيل المُنتج مو مذكوره بشكل واضح خاصة نسب الأحماض وَ الريتن
فيه نسبة لابأس بها من الـ دايميثيكون ( مُشتقات السَيلكون ) وَ أعتقد هالشيء هو إللي يَعطي النعومه السريعة وَ الفائقة لليد وَ يبين إن الخُطوط نعمت
الكريم فيه مواد علاجيه من ريتن وَ أحماض وَ فيتامين سي لكن تعليب المُنتج غير كفيل بمنع أكسدة هالمواد وَ تفاعلها .
حمض الآسكوربيك حمض حساس ممكن يتأكسد بسهوله بالخلط مع أي عُنصر
وَ أكبر دليل عُبوة السيروم بتلاحظونها بَجنب كريم اليدين شَوفوا شلون مَعتمة ، هكذا يتم التعامل مع حمض الأسكوربيك وَ الرتن أ سلوشن
كَمُنتج مرطب حبيته ، بس كوصف إنه منتج علاجي يقاوم أثار الشيخوخة وَ يوعد بالكثير ما أعتقد فيه في السَوق تركيبات أفضل
وَ تكلمت عن كريمات كثيرة بالسابق ، لانكستر ، كلينيك بنوعيه ، لآش ، وَ لوكسيتان وَ ديرمالوجيكا… إلخ
أسئلة قد تَخطر عالبآل ~
– جربتي من عندهم الواقي الشمسي وَ البي بي كريم وَ وَ !!
أول مرة أشتري تَرى من هالبراند ، يمكن شريت شيء بالماضي وَ نسيته بس ما أتذكر صَراحة
فَيعني ما أعرف وَ الله عَشان أنصحكم هل هُم وآآآو أو لأ بدايتي مَعهم بس من هالكريم وَ مو مَتحمسة أجرب مَنهم ، بس كريمات اليدين ما تَخوفني مو مثل الوَجه ، الوَجه أحرص عليه بَزيادة وَ لا أستخدم له أي شيء
– هل نَقدر نستخدم كريم اليدين هذا للجامعة ؟
لا طبعاً هذا لليل ، عندهم كريم آخر نهاري فيه نسبة وقاية من أشعة الشَمس
بس قريت عن كريم النهار لليدين من إن سفن مو ماخذ هالمَدح أو السمعة الجَيدة فما أقدر أنَصح فيه لكن ركزوا هالكريم إللي عَندي ليلي مَكتوب عليه نآيت
– وَش رايك كريم لوكسيتان بزبدة الشيا أو هو ؟
لوكسيتان بزبدة الشيا مُجرد مُرطب وَ مافي أروع مَنه بالنسبة لي
وَ على فكرة فيه بنت تَحلطمت من كل مُنتجات لوكسيتان وَ قالت إنتِ مدحتيها وَهي تحسست مَنها وَ زعلانه إنها تكلفت فَيها ..
فيه ناس ترى يتحسسون من البَيض ، فأنا ما أعرف وَش المُنتج إللي راح يَحسسكم فأفضل حل جربوا بالمحل فيه عينات خاصة عند لوكسيتان أطلبوها من أدراجهم
أو بنفس المحل خذي من الكريم وَ أدهني يدينك وَ دوري بالسوق إلا ما راح يَظهر التَحسس ، يَعني أنا مو عالمة الغَيب وَ تركيبات الكريمات ترى كلها قبل تَنزل لنا مُجربة
شيء ما ناسبك رَوحي راسلي الشَركة قوليلهم ليش كذا !!! ما عَجبني !! حسسني .. بالدُول المُحترمة يرجعون لك
حنا مُشكلتنا حتى العَينات ما تَوصلنا ، وَ من قريب بسيفورا كانوا يوزعون عينة أساس ديور عشوائياً ، قلت لها : مافي دَرجة ثانية !! قالت : لا بَس درجة وَحدة إللي نَوزعها ..
إنتظروني غَداً بتدوينة ما أدري وَش بتكون جالسة أفَكر ..
دُمتم بَحب
تم
هههههه ضَحكتيني بَسم الله على قَلبك
صباح النقاء
قبل اكتب رائي مدري ليه احس فيك كميه هدوء او شي ما مدري مدري احساس يايكون في محله يايكون غلطان
المهم
حركة الموظفين تجيب لي الهم احيانااقولهم لو سمحت انا بافتش براحتي اذا احتجت ناديتك ووقت الجد اذا كنتي محتاجه احد يخدمك يروح الوقت وانتِ منتظره
لا تشكين بتخزينهم الا تلاقي عفسه تخزين اذا انتِ يذبحك الحر فما بالك المنتج يكون تحت هالتكييف الخايس اسابيع
حبيت المنتج حسيت بيديني رطبه من الشرح بس بوتس وينها عني هي ووايتس ليش مايفتحون بكل منطقه فرع
محتاجه اقتراحات للتدوين نحول لشات بدايه ونقترح وانتِ دوني نعين ونعاون
اول اقتراح تدوينه ثرثره عن ولدك
هههههه إيه وَ الله مَتعشية عَشية حلوة وَ مَجتمعه مَع أحلى صَديقات
يَومي كان غَريب ، بس مُتفائله فَيه ..
عطاري مَن جد وَقت ما تحتاجينه ما تَلاقينه وَ العكس صَحيح ، أنا بصراحة أشَوف الحركة غلط بكثرتهم بالصيدليات خاصة إن الصيدلية مساحتها صَغيرة
لدرجة مرات أقول إنت روح كذا وَ أنا بَمر من هنا مافي مَكان ..
وَ عادي قَولي إقتراحك ، مرات أقول ثَرثرة وَ مرات أقول بتكلم عن شيء فاشوني ، أو نخليها عن كريم أساس توفيسيد يستاهل
الله يخلي لك صديقاتك صراحه اغبطهم ع وجودك بينهم
والله يجمعني بصديقتي والله وحشتني ويجمعني بك
ان شاء الله يكون يومك كله خير وسعاده
الي يروق لك دوني احنا معك بنهبلك ونقرا ونستمتع لو تنزلين صوره سودا بدون اي كلام معك معك
الله يخليك يارب ويديمك لنا وانتِ بسعاده تامه
الله يَديم صَداقتكم ..
يوووه أقوى تَعزيز الله لا يَحرمني ( قَلوب لك إفتحي الشَباك مَع زقزقة العَصافير ) ..
صبح صبح
صَباح الخيرات وَ الليرات
يسعدلي صباحك ?.. حركة الموظفين تنرفزني جدا م يخلوني اخذ راحتي وانا استمتع بالمحل ذي الحركة دايم الاقيها كل م دخلت سيفورا او وجوه و اذا دخلت وشفت الموظفة وراي اوقف عند البراند اللي ابيه واشوفه بنظره خاطفة وارجع مع الدرب اللي جيت منه الزم م علي راحتي ولا تجي وحده تغثني وتعكر صفوي .. بالنسبة للكريم من خلاص وصفك حبيته والله انا يدي من النوع اللي يحوشها جفاف وانا نايمه مع انو ارطب قبل النوم غيرت اكثر من كريم ولا نفع ): عاد الله يستر بالبرد وشو يصير ?.. كريم لوكسسيتان بزبدة الشيا ناوييين عليه انا واختي نية مش هينه ??.. وحيكون باذن الله مرطب الشتاء ?.. ارتوس اقترح عليك تدوينه بكره انو تكون عن تنظيف الوجه بعد وقبل الميك اب بادق التفاصيل وكمان شفت وحده قبل يوم او يومين بالكومنتات طلبت ذا الاقتراح وشرايك ؟
وَ الله أتوقع بعد فترة الناس ماراح يَشترون إلا من الإنترنت صَراحة
وَ صرت أشَوف بعيني هالمحلات فاضية ، اليوم كنت بسيفورا فاضي تقريباً وَ إللي جايين يجربون وَ يطلعون
قلة إللي يَشتري ، وَ وقتها راح يبكون وَ يقولون وَين رآحوا الناس !! ..
إقتراحك حَلو ، بس المَوضوع بيكون طَويل ..
هالأسبوع أحتاج مَواضيع صَغيرة عَشان أقدر أرد عليكم لكن حَطيته من أول الخَيارات ما يَهمك
صح صار كل شي متاح من خلال الاون لان وارخص كمان من عندهم .. غريبة الفرع اللي عندنا اشوفه زحمة بكل الاحوال .. زينك والله م نحرم منك جعل ايديك م تمسها النار ?.. اوك دام تبين تدوينه صغيره نبيها فاشونيه ?.
بَفتش بَدولابي وَ إن شاء الله آلقى شيء غريب وَ لا يتعبني بالتَصوير
وَ إذا مالقيت بفكر بتدوينة ثرثرة
مكاني لوو سمحتوو^.^
مَكانك مَتوسط بالقَلب
أولاً أحب أشكرك كثير لأني أحس اني أكثر وحده أستفادة منك ????
ثانيا:
ألحقيني طلعت لي كم حبه بوجهي وحطيت عليها أكرٱتين قبل النوم واغسله لما اصحى لمدة 5 أيام وانضرّبت على قلبي وحطيت قناع فيه ليمون وحرق بشرتي وش اسوي قاعده ٱحط عليه عسل كل ليله بس أحس البشره نشفآنه مره آخاف تصير أسّوء ، لآ تنّقدين وربي زي المسّطوله كيف ماوعّيت !! لحظآت هَبّلنه ???
ياهلا بَك يا أحلام ..
عادي الأخطاء واردة وَ الحمدلله ماصار شيء ..
الجفاف وارد ربما من المقشر نفسه ، وَ إنتِ مفروض تحطين فقط عالحبه الإكراتين لأن مشكلتك مع الحبوب
عُموماً حاولي ترطبين وجهك بكريم طبي خالي من العطور ، عشان الجفاف وَ مابيصير لك شيء إن شاء الله
و الغسول برضو يكون غسول خفيف لأن تتعاملين مع مقشرات ..
وَ إذا تحسين بحرقان أو تحسس علميني وَ أنا ما أظن فيك شيء سوى الجَفاف ، لو رطبتي وَ أهتميتي فقط بعد كل غسل ترطيب ماراح يصير لك
وَ بعدي عن الماسكات بفترة التقشير ، وَ بشرتك أتوقع دهنية عشان كذا الترطيب للوجه شلون ؟! بالتربيت عالخفيف وَ لما تتأكدين إن الموية نشفت من وجهك
وَ سلامتك
وصباحك سعاده ?
يااازين فصفصتك للمنتج ?? ربي يحفظك
ويحقق كل احلامك ??
وَياك ياقلبي ..
وَ عسى يَومك يكون حَلو ، نَورتيني
هلا بالحب ، حبيته ان شاءالله أجربه وسعره حلو
عاد ع قولتك لو فيه خصم للطلاب كان ياسلام
و حتى النهدي بطاقتهم خصم ٢٪ يستهبلون الظاهر
بوتس عندكم ماالاقي شي يخلصونها بسرعه
انجلط من كثر ما أدور شي ماشاءالله
عاد لوكسيتان حلو و أحب ريحته وخصوصا كريم الرجل مارتحت لغيره ، عموما الله يكتب أجرك في هالجهد ماتقصرين يائلبي ?❤️
تصدقين مَعي بس ما أهَتميت بها ..
2 بالمية وَش تسوي ! .. بس نهدي جدة أشَوفه أفضل من إللي عَندنا
عندنا الفروع الجَديدة جداً مرتبة خاصة واحد على شارع الثلاثين ، الباقي يعتمد حَسب الحَي
طلتك غير غير
صباح الورد…
الله يعطيك العافيه بصراحه تحمست له عشانه غير دبق لان الكريمات اللي تكون دبقه توترني جدا مدري احد مثلي ولا انا بس
بس كنت حابه اسألك مايترك طبقه خفيفه تروح مع المويه وتروح معها الرطوبه مدري اذا فهمتي قصدي ولا….
صَباحووو ..
وَ الله أتوقع الكثير مَثلك ، خاصة مع الجوالات الكل يتضايق مَن التدبيق
وَ إللي بتطبع بلاب توب .. إلا ما يتضايقون ، أو بتمسك كتاب بيصير الكتاب كأنه كيس فلافل هههههه
إلا يترك طبقة خفيفة عشان مشتقات السيلكون هي إللي تعطيك هالإحساس
ياهلا وغلا بكل الحلا ….???
عجبني ان شا الله لي تجربه معه حاليا عندي اللي خابرتهم وكريم لاكوستيان اللي للتفتيح اشتريه باستمرار ومعه مرطب ينفعني انه يروح الاجهاد عن يدي بسرعه والا تفتيح النتيجه عادية … الان قاعده اجرب اللي وريتك هو اذا هو زين خبرتك عليه ممكن ينفع البنات …
انا استغرب من اللي يتحلطمون وكأنك ارغمتيهم يشترون اذا دكاترة يوصوفون بالهبل وبذيك القيمه ومن تراجعينها والنتيجه ماجابت غيرت الخطه وهم ماينبسون بكلمه بس عندك لا انت تسوين اعلانات ومايمديك تلحقين ع تجربة كل المنتجات ياشيخه روقينا وكرمينا بسكاتك ناس غريبه !!
يآهلا .. إيه رَشا بجربهم أكيد ..
مَتحمسه عليهم من مَدحك ..
ههههههههه شَكلك جاية من الآنستقرام ، عادي وَ الله إللي بَتقول تقول بَكيفها ..
المُنتج إللي يجيني هَدية أكتب ، بالرغم لو ما كَتبت ماراح يَبين وَ لا أحد يَدري ، فَهنا إللي عنده عَقدة مؤامرة يَتركه ..
بس عادي ، البَعض ما عنده مُشكلة من الإعلان هو عنده مُشكلة ليه إنت تَربح وَ هو جالس ما يَربح !! ..
هالبراند كثير اسمع عنه واشوف تجارب
خصوصاً لواقي الشمس
لاكن مب متوفر عندنا
والصيدليه بعد نفسي يفتحون فرع
بالمنطقه عندنا عشان كذا التدوينه
ماهي من نصيبي لاكن نفس ماتقول الحب توسه
موو شرط نفسه نتقيد فيه
نقدر نحصل بديل عنه
بنفس المواصفات *.*
طيب توسه انا ناويه اخذ زبدة الشيا الخام
ك ترطيب ليلي ينفع ولا لا
قريت عنهابس بعضهم يقولون تسمر
فما ادري نفسي اسألك من زمان
والحمدلله جت الفرصه اليوم
(وتسلمين ع المدونه حتى لوو ماهي متوفره
عندي مااطلع منهاا إلا ومستفيده منها شي
سوا بطريقة الاستخدام او اي معلومه واطبقهاا
بأي منتج ثاني متوفر عندي )
لا تتحسرين .. ترى صيدلية بوتس صَح فيها شغلات حلوة بس تلاقينها بصيدليات ثانية
يعني مو هالشيء إللي تتقطعين عَشانه ..
تَصدقين زبدة الشيا الخام من غير لوكسيتان ما جَربت .. بس كثير قالوا إنها سمرتهم بس الظاهر حددوا ماركة مَعينة تنباع بالصيدليات
بس ما أبي أذكر أي إسم وَ أنا مو متأكدة ، لكن يمكن يطلعون بها بالشمس ، لكن دامك بتنامين ليه ما تآخذين كريم فيه نسبة أحماض خفيفة
يشتغل ينعم بشرتك بالليل وَ لو فيها مشاكل يصفيها طبعاً أتكلم لفترة مؤقتة ..
صراحة استوقفتي جملة زبدة الشيا تسمر !..
اانا استخدمها من قبل سنتين لافخاذي وركبتي ,,
جسمي ابيض وركبتي كانت طبيعية لكن من فترة حسيت انها صار لونها اغمق بعمري ماصار هيج لونها
قلت يمكن لان كنت صغيرة كان لونها جميل وحلو يمكن اكيد لون ركبتي بمراهقتي ميكون نفس لونها بعمر ال25 .!!!
لكن لو تسمر كان تسمرت افخاذي تعودت ع الشيا لاني اعمل جلسات ديرما رولر لأجل تشققات الحمل والولادة واستخدمها كعلاج الها …
افخاذي باقية نفس لونها الاصلي واضافة الها نعومة فائقة تعطي يعني لما اقطع زبدة الشيا احس جلدي مو تمام ..للعلم انا اشتريها من امزون الزبدة الخام الصفرة ..
بخصوص موضوعج ارتوس … يدي فيها خطوط الجلد واضحة مع اني ارطبها تمام لكن مرات لما اكون مستعجلة اغسل الصحون بالفيري دون ان البس كفوف لكن مو كثير يعني قليل جدا … تنصحيني استخدم هذا الكريم او اني اعمل خلطة مرة ذكرتها نونة يمكن بشمواه فيتامن اي وفازلين ع مااذكر ,, واشتريت كفوف من ذ بودي شوب حتى تحفظ الكريم بليل لما ادهنها ….
وشكرا لكِ من القلب ع مدونتك ياعسل
صباح الورد يعطيكى الف عافيه على طرحك الوافى الشامل قلوب من هنا الين بيتكم ..
الله وَ صلتني قلوبكم ..
صَحيح قريت إنك جربتي فيتامينات الشَعر صَح ولا غلطانة ؟! كيف النَتيجة .. بشريني
يعطيك العافيه توسه احلا صباح صباح تدويناتك روقان ع الاخر حبيبتي بسالك طلبت الديرما رولر عادي لو حسيت بعوار استخدم البنج؟
يَعافي قَلبك ..
الديرما رولر مفروض مقاس ربع وَ نص ما تحتاجين فيه مُخدر لأن المُخدر نفسه مُضر ..
فشوفي أول مرة بيعورك ، المرة الثانية بيعورك شَوي ، وَ مرة عن مرة بيكون ألمه مقبول
طبعاً أتكلم عن المقاسات المَقبولة
ياصباح الفل والياسمين ..
مع ان هالبراند احس كرهته لكن وش المانع نجربه .. جربت من قبل غسول وتونر بس مدري ماحبيتهم عشان كذا حسيتها براند ابو كلب ههههههه .. يعني اسعارها مو رخيصه ازيد عليها واشتري شي عليه القيمه ومضمون بالنسبه لي ..
وتوسه بسئلك انا حاطه ايميلي عشان يوصلني تنبيه لاي موضوع جديد بس ماعمره جاني شي مدري ليه 🙁
ترى يَمكن بقية مُنتجاتهم كلبية ، أنا ما جَربت إلا ذا ..
عاد أغلب الشركات إللي عجبني كريم يَدهم كريم الوجه مره فاشل ، يمكن لأن الوجه دهني ما يحتاج ذاك الترطيب وَ اليدين دايم تَحتاج ترطيب ..
بخصوص التَنبيه بالإيميل لأن أنا فعلاً ما جلست هالجلسة الجادة مع المُدونة وَ نسقت سالفة الإيميلات ، لكن شكراً شكراً إنك ذكرتيني
فراح أسوي أزين شيء نشرات أسبوعية
خليس ذكيه مثلي وحطي تنبيه لتويتر ابد هي تغرد منا انتي هووبا هنا هههههههههه
ياصباح الخيرات .. ارتوسه بسألك انا فيني اسمرار مفاصل
من الاهمال وبعدين بديت اهتم بالترطيب والعنايه بس ماتفتحت
مع انها مو لونها الاصلي شرايك بالدوكين انا عارفه ان الماده
الفاعله فيه قويه بس قلت بتستخدمه بحذر ولين يرجع لوني الطبيعي واوقفها … وشاكره لكِ جدا على هالمجهود اللي قاعده
تبذلينه لنا ..
صَباح الخير ..
شَوفي أنا الدوكين يَخوفني ، لأن نتايجه العَكسية دايم ما تَطمن ..
طيب ما فَكرتي تشترين مثلاً أحماض !! الحمض زي الليمون بس بشكل إحترافي وَ نتايج غير عشوائية يعني بنفس الوقت مُمكن يجفف
وَ مفاصل اليدين غالباً مُشكلتها الجفاف وَ ضعف الدورة الدموية وَ الجلد دايم مكان المفاصل سميك ، خاصة إنها مو لونك الأصلي
جربي تمسجين وَ إنتِ ترطبين وَ ممكن تجربين أبو أسبوع تدهنين بأحماض وَ توقفين أسبوع ، وَ هكذا لين تحسين رجع لونها لزَمان
توقفين عشان ماتحرقينها بالأحماض وَ بنفس الوقت بس بالليل وَ الصبح مرطب مافيه أحماض ..وَ ووقت الطلعة للشمس واقي شمسي
حبه حبه لين يرجع حتى لو بالشهر مرة بالإسبوع ، بشكل متقطع عشان ما تجففين اليدين ..
هذا رأيي ، لأن الدوكين ممكن ينفعك لكن شهر شهرين وَ كل شيء بيرجع زي زَمان
ياااا صباااااح الخيييييررر ??????
قلت نصبح قبل لا نروح الدوام. =))
نَوره ..
حبيبتي وَ الله تَنوريني وَ الله ، وَ عسى يَومك يكون حَلو
صباح الجمال كجمالك
يآآه اليدين و ما ادراك صرت مقصره بترطيبها و انقد على نفسي فيه .. عجبني الكريم و شكلو حيكون في اللسته بس اخلص اللي عندي .. يازين مواضيعك و التفاصيل اللي صدقني تطلع مميزة منك انتي .. تونر بيكسي من نزلتيه ذاك اليوم و انا احمد ربي لانو الليله اللي قبلها كنت ناويه ارسلك اذا ممكن تجربيه فكلي حماس لتجربتك
يعطيك العافيه يا جميله..
عجييب الكرييم يبالو تجربه ،، بس هذي البراند مره اشتريت منهم بلاشر لونو مره يقهررر حتى لمن شافوني اخواتي حاطتو قعدوا يقولولي ورده حمرا =)) من كثر مالونو فاقع. ،، بس الكريم مره اتحمستلو
،،
ما أصدق حتى انتو عندكم حر بالسوق ، مره سألت موظف قلتلو ليه حرر مافي مكيف قالي حقون الاداره هما اللي يطفون ،، شكلهم يستهبلون :)!!
مشكوره فديتك ع الرد والله يسعدك وينولك مرادك زي مافدتينا وفتحتي مخنا وطيرتي عش الحمام الي كان معشش فيه
شكراا جداً على تعبك
كل يوم شكرا لك ❤️
جذبني الكريم ولي تجربه ان شاءالله
بعد ما اخلص اللي استخدمه
ارتوس يا جميله انا من متابعاتك القديمات جدا جدا كنت اتابعك بصمت لليوم .. مدري ليه بس ما سنجت لي الفرصه اني اشكرك . فعلا فعلا انتي نعمة والحمدلله عالصدفه اللي عرفتني عليك .. بجد فرقت معي اشياء كثيرة بحياتي تعلمتها منك .. تفتحت على اشياء ما كنت معطيتها اهمية فعلا انتي انسانه مميزة والله يفرحك ويحققك لك كل اللي تبينه .. شكرا على هالتدوينة الخفيفه .. وان شاء الله من اليوم ورايح بتلقيني ناطتلك بكل مكان .. I love u
خلاص اقتنعت لاحد يكلمني >فيس ملقي وراه يمشي
يكرم صباحك بالفرح ي نقاء ،،
جهد رائع مشكورة من القلب عليه ?
لروحكِ سِلال زهر ?
ارتوس حتى الصيدليات عندهم عينات بس م يعطونا هيا بس الحمدلله زوج صحبتي صيدلاني فعند ذمة ويعطيني شوي بس هوا م يشتغ بالنهدي بصيدليات النحاس
ارتوس اتمنى تتكلمين عن شغلتين مأزمتني
ودي تعطينا معلومات عنها
كلها بالمكياج
بس ابيك تشرحينها من قلب
بكامل التفاصيل
مثل ماشرحتي
تدوينة الحمام المغربي و تدوينة الكنتور
،
،
الموضوعين
الاول
رسم الحواجب كيف ارسم حواجبي بطريقه مثاليه وصحيحه
،
،
الثاني
كيف ادمج الشدو ايش هو التكنيك او بمعنى اصح السر
انا ماوصلت لدرجة اني اعرف ادمج
واتابع مايا احمد بس فيه تكنيك ماتقوله
اتمنى تفيديني
يارب تقرأين ردي
ارتوس اذا شفتي ردي لاتنسين الله يوفقك
،
،
مرحبا ارتوسة
انا وحدة انزعج لدرجة ممكن اسيب المكان واطلع اذا اتبع معي البائع نهج الزق بالزبون تبيع اكثر هههه والله صدق شي مربك ومزعج بالنسبة لي
بالنسبة للمنتج انا احب ادور دئماً عن الكريمات الي ترطيبها عالي وتعطي اثر ندي على بشرة اليد وبصراحة سعره حلو بالنسبة للمواصفا ت واختي امس كانت تشتكي لي من اثر خدوش صغيرة في يدها فاتدوينتك جات في وقتها انشالله اليوم اجيب لها هوا تجربه ونشوف انشالله يفيد
مشكورة ياعسل
تقبلي مروري
صبآح الروقآن ..
سبحآن الله على كثر مآ ادخل الصيدليه عمري ما عطيت هالشركه وجه ولا وقفت عندها وقريت عنها ..
حبيت المنتج من كلآمك و وصفك له وممكن بعد عشآن نسبه الاحمآض فيه
آما الموظفين اللي فيهآ صراحه آزعآج وقلق درجه أولى آخر مره رحت كآن واحد يلاحقني ويطلع ومن أمسك شي تكلم ذآك اليوم كان مرسول لي
حتى طلعت نسيت غرض مآ شريته آحتاج اني آقترح عليهم يوظفون المودبيين لرآحه زباينهم
والشي الثآني صيدلية الدواء من شهر ٩آعطوني بطآقه اللي تجمعين فيها رصيد من مشتريآتك وبعدين تشترين منها لما رحت قلت خليني آشيك كم فيها طلع ٣ريآل
متخيله كل مره آدفع مبلغ وآخرتها كذا صرت مآ اهتم لها
يضحكون على عقول النآس
بااذن الله بجربه لان يديني تجف بسرعه
الله يحرم يدينك عن النار ماقصرتي معنا فديتك
مساا الخير ارتوستنا
عنجد شغلة الموظفين الي بوقفولك صف ب صيدلية بوتس او وايتس مشكلة
آخر مرة رحت من يومين )بفرع غرناطة )الوضع فوضى وزحمة بشكل مو طبيعي الموظفين اغلبن موقفين عند الكريمات وهالاشياء..ومافي ولاواحد غند المكياج متخيله!
كنت واقفه عند ميبلين ووحدة عم تنادبصوت عالي انو شي حدا يساعدها .. والمكياج تخيلي اغلبو مفتوح! يعني فعلا تخلف هن ليش حاطين تيستر مو مشان تجربو فيه!!!
لا وأغلظ شي كنت جايبة منتج عليه عرض واحد والتاني مجانا وحاططتو بالسله ونقريبا ماضل موظف الا اجا لعندي وقالي هاد عليه عرض جيبي واحد تاني ..والله بدون مبالغة كل ثانيتين يجي واحد آخر شي عصبت قلتلو بعرف انو عليه عرض..
طيب فرضا انا مابدي العرض تبعن ..
فعلا شغلة غليظة انا من الناس الي قبل ماتشتري الشي بتحب تقرأ كل حرف عليه ف بهالصيدلية مافي مجال لهالشي ابدا..
ييي شوفي شو كتبت جريدة بس عنجد لانو مجاكرني الوضع
بالنسبه للكريم مابعرف يمكن جربو بس هي الماركة مابتجذبني
جبت من عندن البيبي كريم مدحلي ياه الموظف واخدتو مع اني ماكنت مقتنعه كتير بس قلت بجربو شو خسرانة ..بس القهر لما رجعت عالبيت طلع اغمق مني يعني صح انو مو هالفرق الكبير بس كنت شايفتو بالمحل قريب كتيير للوني
عالعموم انا لحد هلأ مالقيت البيبي او الفاونديشن الي لونو بيرفكت علي ومازالت رحلة البحث مستمرة ..
فعلاً لوكسيتان ترطيبه يجنن
وواقعه بغرام زيت اللوز، ريحته تهبّل
لارطبت جسمي بمرطب عميق بعد الشاور
اخذ دهنه بسيطه على رقبتي وأماكن النبض بزيت اللوز
ريحه ويعطي الجلد طراوه
وهالماركه ماسبق وجرّبت منهم أي منتج
لكن بحاول أقتني هالكريم وأجربه
حجمه حلو ومميزاته حلوة
بعد عيني أنتِ.. تسلم يدينك الحلوة على هالتدوينه
أحب هالتدوينات البسيطه وسريعه ومفيدة
أسميها سناك هههههه
البقاء للأفضل… البقاء لكِ
لطالما كنتي الأفضل
كوني أنتِ *قلب*
ياحبي لك حتى التدوينات الخفيفه منك تطلع لذيذه انتي ماينشبع منك ليتني صديقتك بالواقع ……
ارتوس بسألك اذا تعرفين كريم مبيض من كوزمديكس اللي مره نزلتي عن مقشر انزيمي من نفس الشركه،، اسمه برايتنق ومكتوب عليه 24/7 وفيه حمض السالسيك
انا مشكلتي الازليه سرعه تكون الحبوب وحساسه جدا واستخدمت ديفرن جل ورتن ومقشرات وماسكات كلهاعرفتها منك بس مازالت البشره غير صافيه وفيه اثار حبوب وكل ماشافني دكتور قال استخدمي روكتان والحبوب ماتستاهل روكتان ع اضراره الجانبيه تقريبا كل شهر ٦ حبوب متفرقه مع اثار مع مسامات يعني بشره دمااااااار ولا شي نفع معي حتى الديتوكس جربته
مساء الخير يا عسل ❤️❤️❤️اي والله حركتهم تغث مكثرينهم حتى بصيدليه وايتس كذا واحد يمر علي و يقول تبغين خدمه يا ربي استحي اقوله لا شكراً احس عيب بس مظطره لان جد ما في شي اخذت اغراضي و قاعده اشيك على الجديد،، تصدقين ارتوس هذا محل سيفورا ما عمري طبيته سبحان الله ما اتحمس له من كثر النقد عليه لو اخذ مكياج اخذ من وجوه حتى محل ماك صرت ادخل و انا مكتئبه لاني متأكده بطلبهم شي و يقولون مخلص مخلص الئ متى مخلص يا ربي مرة ما صرت اتحمس لما اروح محلات المكياج ،، بالنسبه للكريم رائع و مع قدوم الشتاء انا خلاص شريت كريمي الشتوي بس بسرعه يخلص لانه صغير فيما ادور على هذا الكريم ،، ارتوس قريتي البوست الي نزلته عن الشاور جل من المحل الكوري نسيت اكتب انه اساساً مجموعه كان زمان متكون من لوشن و جل شور و الان زادو زيت المساج جداً جميل بليز جربيهم ارتوس ودي تفرحين و اتمنى يكونون هما طلبك كمان اشتريت المريم حق المسامات بس خايفه يكون حتى هو في سيليكون او مشتقاته صراحه مساماتي مو واضحه لكن قلت اجرب،، دمتي بود ❤️❤️?
بالنسبه لفيتامينات الشعر ايه ابتديت فيه من يوم ٣-١٠ يعنى توى لى أسبوعين بس اكمل شهر ببلغك بالنتايج أن شاءالله ،، البياعات او البياعين اللزقه زمان كنت اخجل اردهم اللحين لا خلاص اقولهم لا شكراً بس أتفرج وأمشى ،، الكريم باذن الله رح أشتريه عجبنى وصفك وارتحت له ،، شكراً حبيبتى ??
هلا هلا بالزين
مند مايقهرني الا لمن يتلزقو فيني وانا ساعات يجي فبالي زي ماقلتي اقرا مكونات او اشياء زي كدا ف تلاقي الرجال او الحرم فوق راسك شوفي دا وجا وماني عارفه ايه وخصوصا انا استحي ف ما اخد راحتي .. اانا صراحه احتاج كريم ترطيبه قوي لانو ماعرف ايش السبب يدي تعتبر خشنه ولمن رحت عند الروفيسور قال سبب هرمونات دورة ف ساعات ما اقدر احكم على ترطيب شي معين في كريم دكرتيه من بنهامز بشوف فعاليته وترطيبيه وانا صراحه احب الكريمات بعد الشور وقت الجسم ندي تترطب بسرعه ويجلس وقت أطول ويسعدك ربي يائلبي
بدور ردي واقراءه مرة ثانيه وبشوف انا كتبت زعلت ولاا لا لان بعض الاحيان اكتب ومو مركزه ياالنتفه تصيح وتبي لها جو ولا عيني ع كتبي ومذاكرتيي …. ولا اعرف اركز بفكرتي اللى اوصلها 🙁 واكتب اي كلام مشي حالك
كل اللى ابي اوصل مو اللي يناسب غيري يناسبني حتى لو تشابهت البشرات …. اعرف جسمي جدا حساس ويتحسس من اشياء غريبه عجيبه … عادي ممكن تقطعين طماطم من اشم ريحتها يولع جسمي حساسيه اكلها عادي جدا ماتاثر فيني مثل الريحهه ….لوبكتب لك قائمه الاشياء اللى تحسسني بتعب ……..
بروح ادوره وارجع لك ثانيه … اتضايق لما كلامي ينفهم غلط
جمال ياسوس وجمال حرفك ..الله يسعدك ع الجهدد الي تبذلينه لأجل هامنتجات الاقتصاااديه تستحقين كل كلمات الشكر والثناء انتي من جد غير عن كل البلوفرز اذ كتبتي لو سطر
تكتبينه بذمه وضميرر الله يسعدك اضعاف اضعاف اضعاف هالعطاااء الي بدون مقابل❤❤❤
فعلا الصيدليات صايره خدمتهمم غيثه مره لمن كنت بالحبيب ابي اخذ راحتي بالشرا الا فجاه كيف اقدر اخدمك قلت مابي شي خلاااص انغثيت صراحهه اكثر من شخص يسالك هالسؤال
ام الي يوزعووون العطر ضحكتيني من جد وصفك بمحله ?
الماركه ذي ان سفن ان ماخاب ظني تكلمتي عنها قبل بشمواه انا قد قريت عنها قبل بسس وين ماذكرر راح اشتريه قريب واقولك النتيجه تستهويني الكريمات المعالجه احبهاا
بالنسبه للي زعلت لانو مانفعها الكرريم وشتبي يعني هذا جزاتها سوس الي دلتنا عليه من جد ناس غريبه يعني نصنع لها كريم معين مثلا دايما البشرات تختلف واكثر من مره وضحتي هالشي انو انتي واخت وهي اختك مو كل شي يناسبك يناسبهااا وربي استغربت من رد هالبنت كأنك انتي ياسوس الي صنعتيه !!!
بالنسبه للمنتجات الاقتصاديه شريت من الصيدليه منتج ب9 ريال بس! انا شريته كذا بجرب اسمه كريم 21 مرطب لليد ويجي للجسم والوجه مدعم بفيتامين سي مرره فضيع
يرطب من قلب وينعم البشره تحسين بشرتك نديه بعد فتره من استخدامه ..
وبانتظار تدوينتك ياقمرر ..❤❤
يسعد مساك ارتوسه
تدوينه جميله
وجد جد يديني تحتاج ترطيب و جربت لوكيستان وجدا فادني وعجبني
و ان شاء الله اشوف هالكريم لان ما عمري شريت من هالبراند وما تحمست لها بس انتي تحمسين الي ما يتحمس
واي تدوينه تحطينها حنا معك
قلوب لعندك
اي والله ليت يسون خصم لطلاب الجامعة عاد الحين المكافاة طلعوه من عيونن تخيلي اذا غبتي يخصمون من المكافاه ?استه???
ياحبي لمنتجات اليدين هي اكثر شئ احللة
وانتظم لما اخلص العبوة
لكذا م استخسر لاي منتج اشترية لها لان متاكدة اني بستهلكه
يعطيك الف عاافية ??
اختي جربت لاين كامل من هالشركه و حبتها بعدين عطتها نتايج عكسيه
اما كريم اليدين منهم صراحه ما انتبهت له الا منج الحين,
ومثل ما قلتي صار الوضع يزهق و جداً مستفز بالصيدليات
بوتس اللي اروح لها صغييييييره و معبينها من هالموظفين المستفزين
اكون اشوف شي و هو ينط لي يعلق اقول له لا شكراً بس بشوف ممكن ؟
يسكت و يضل واقف ع راسي !!! والله ما اذكر جم مره اد و اطلع و ايدي فاضيه
انسى شنو ابي من كثر ما يوتروني ><
شكراً ارتوسه
يسعد مساءك..
تدوينة رايقة.. حبيت المنتج وحبيت وصف النتيجة.. وأنه كريم ليل فقط
هالماركة كثير أسمع عليها مدح لكن ما جربت منها ولا شي..
يسلم دياتك يا عسل
ياربي موضوع كريمات اليدين يعور قلبي لاني اشتري افضل واغلى الانواع ولا استخدمها من الكسل والتعيجز .
وبخصوص خصم الطلاب انا استغرب شلون الطلاب هنا مسحوب عليهم بكل شيء ياعمري لا هو من زين المكافاة ولا رخص مستلزماتهم برا في بطاقات خصم خاصه بكل شيء مطاعم واسواق وومواصلات وعيادات وكل شيء.
اما بالنسبة لكريم اليوم الصراحة هالماركة ماحبيتها بالرغم عندهم منتجات غريبة وتستحق مثل ماسكرا الحواجب البنات يمدحونها وايضا توفيرها لبدائل المكياج احيانا بسعر ارخص وعموما كريمات العناية انا شبه مكتفيه باللي عندي بذات كريم يدين ديرمالوجيكا اتعب وانا اقول رهيب ومافكرت اغيره.
ارتوس ودي اعرف متى تفكرين تجاوبين ع الاستفسارات من زمان عنها
شكرا لك ارتوسه بجد كل مالنا نستفيد منك ربي يحقق كل امنياتك
هلا بالعزيزة ارتوس ..
هالبراند جربت منه كم منتج ماعجبني جربت مجموعة عناية للبشرة المختلطة و فاونديشن و بلشر كلهم ماعجبوني .. ولا ناسبوني .. مميزات كريم اليد حلوة لكم ما ادري حسيت العلبة صغيرة ع سعرة .. يعطيك العافيه يا جميلة
يازين اللي يعززون للطلاب:) ..
الله يسعدك
ما تطرقتي لتفتيح اليدين خلال شرحك عنه ،، خابت رجاوي في البحث عن مفتح ليديني من شموس امريكا 🙁
لوشن نيڤيا بالتوت جربته قبل وفتح يديني بس مع الأسف ما حصلته هنا بأمريكا 🙁
متى يفتحون عندنا صيدليه بوتس مالنا غير جده
اعجبني ياارتوس تفصليك للمنتج للمكونات
الله لايحرمنا منك ويعطيك من خير الدنيا والاخره ??❤️❤️❤️
يسعدك ايامك يارب
منتجات ان سفن جميله استخدمت من عندهم كريم ترطيب للبشرة مره يرطب
بس مهما كان مالنا غناة عن الاشياء الطبيعيه
فيه بنات يبونه بين يوم وليله تترطب اليد وتوحد اللون … الخ
يبي لها مشوار طويل واستمرار
يا مساء الجماال
ما شاء الله تبارك الرحمن كالعادة طرح جمميل و مميز ، الله يجزاك الجنة يا عسسل ??
و بخصوص اللي يلزقون فيك اول ما تدخلين الصيدلية ، يوووه ياكرهي لهم قابلتهم في صيدلية وايتس
بس طنشته ثم طار ههههههه ، لان ع قولتك احب اقرا مكونات اي منتج قبل لا اشتريه
آهلينَ .. ❤
اول شي احب اشكرك مرررره شكرًا على هالتدوينـه الجميله
جدا جدا فادتني +
و اتوقع انه مُناسب لعمري ()
اممم ممكن تتكلمين لنا عن التغذيه و ايش الاشياء المفيده بالتفصيل عشان جسمنا ما يكون ناقصه اي عنصر
انا اعاني من نقص في الهيموجلوبين تقريبا 7 من 15 – فقر دم –
و ترسبات في الدم بنسبة 6 من 20
غير قلة المناعه و الجيـوب الانفيه اللي عقدتني
في الاخير اتوقع ان هالاشياء راجعه لسـوء تغذيتي و حالتي النفسيه السيئة بسبب الضغوط و المشاكل اللي واجهتني
جسمي مصفر و باهت ما فيه اي نضارة او حيـاة و جاااف جدا و شعري نفس الشي على طول حاسه اني منهده و تعبانه وضايق خلقي كسسسل و خمول ما اعرف كم كأنه عمري ما احس اني طفله ابدا ما فيني ابد أي نشاط و التركيز و الحفظ معدووم صفر؛ بجد اذا تقدري تتكلمي عن التغذية الصحيحه المتكامله لا تنسينا ممُتنه لك جدا :””
و الله يجعله بموازين حسناتك و يبعد عنك كل شر.
آخر كومنت?✋? هم بعد هالموضوع طحت عليه من موضوع ثاني❤️، عجبتني مواصفاته جاري التجربة ❤️ .