مساء / صباح الإشراقة ..
الفاونديشن أو الأساس أكثر أكثر شيء نَهتم به بَمنطقتنا , حتى اللي ما يَهتمون بالماكياج يَعرفون شيء إسمه أساس
أتَوقع مُستحيل فيه بيت يَخلو من كريم الأساس وَ الروج وَ الكَحل .
وَ راح يكون موضوع تَدوينتنا لهاليوم أساس جيرلان الذهبي ذو العبوة السوداء
[ هههههههه واضح أبتلشت بالإسم بَس فيه ناس يحبون يكون فيه أسم عربي عَشان يثبت بالذهن أكثر ] ..
GUERLAIN PARURE GOLD
REJUVENATING GOLD RADIANCE FOUNDATION
أماكن التَوفر : بجميع مَحلات التَجميل سيفورا , باريس جاليري , هارفي نيكلز , دبنهامز .. إلخ
سَعره : ٤٠٠ رَيال تقريباً
مَزاياه ~
• بمزود بتقنية حماية من أشعة الشمس بنسبة ١٥ spf
• يحسن وَ يقلل من مظهر الخطوط الدقيقة وَ التجاعيد
• يضيء البشرة وَ يعطيها مظهر مُشرق
• مغذي للبشرة طوال فترة وَضعه
• يحتوي على ذرات ذهبية تعكس الضوء بجميع الزوايا
• رائحته مُميزه جداً مثل أغلب مُنتجات جيرلان ريحة زهور مع خوخ وَ توت وَ ياسمين وَ بنزوين وَ مسك أبيض طبعاً
عَيوبه ،’
السعر
ألوان المُنتج :
٨ دَرجات
The Photo From temptalia
ماعليه هَي الوَحيدة اللي مَجربته وَ البقية شرق أسيويات تصويرهم غير واضح أو كبيرات بالسن الأساس طالع فيها سيء تراه مَهوب كذا آبداً
لكن حبيت أوريكم مَستوى التَغطية
جيرلان دائماً وَ أبداً درجاته تَليق لي كأنهم صَنعوا لون درجتي نفس السَحنه ..
لما تَشترين البيج منهم ما تَحسينه أصفر وَ باهت
وَ بنفس الوقت لما تشترين البنك ما تَحسينه زَهري بشكل فاضح , عَشان كذا يعطي مَظهر طبيعي للوجه , الدرجة اللي مَعي ٠٢ بيج كلير
رأيي الشَخصي ~
المَزايا هذي مَزاياه بغض النظر إذا تلائمني أو لأ الرائحة أنا من الأشخاص تعجبني المُنتجات اللي ريحتها مُميزة , جيرلان أساسه يَبين إذا أحد جاء يسلم عليك أكون مَرتاحه نفسياً من ريحته , زَمان زمان كنت مَتعصبة لجيرلان ما أشتري غيره , لكن عَشان صَرت أدون مُضطره أجرب مُنتجات أخرى .
وَ لا لو علي ماراح أتَجاوز بَعض البراندات , أول أساس أقتنيته بحياتي أمي شرته لي وَ كان من كَريستيان ديور شَريت عَلبتين
وَ من ثُم شريت أساس من أستي لاودر وَ ماعجبني قَوامه
وَ عقبها حَولت على جَيرلان من عام ٢٠٠٠ وَ أنا ما أستخدم إلا جيرلان وَ لازم يكون مَوجود بعدة الماكياج حتى لو بَجرب غيرهم , بَعدين بَعام ٢٠١٠ بَدأت أجرب
لأن صَرت مَضطره أكتب للبنات تَجارب جَديدة تلائم أكبر شَريحة مُمكنه ..
– مَيزة تغذية البشرة تَهمني لأن فعلاً أساسات جيرلان بالمُجمل مو هالأساس وَ بس , غالباً بعد ما تزيلين وَجهك من الماكياج تَحسين كنك حاطه ماسك مُعالج
وَ ولا مرة بحياتي أزلته وَ طلعت لي حَبه بعد يوم أو يَومين
[ لا تقولون أكيد ما تغسلين وَجهك زَين وَ يبقى شوية أساس فتحسين إن وَجهك مَنور وَ مشرق , لا أزيله زَين لكن هذا اللي لاحظته بجميع أساسات جَيرلان ] ..
– التَجاعيد وَ الخطوط ما بَعد طلعت لي فَكوني أدفع مُنتج بهالسعر عَشان ميزة إخفاء التَجاعيد غير مُفيدة
– ميزة الحماية من أشعة الشمس ما تَفيدني لأن غالباً أستخدم هالأساس بالليل , لأنه ثَقيل شَوي مُقارنه بغير أنواع تغطيته : مَتوسطه
بالنسبة لي ثَقيلة , كأساس سائل أشَوف التغطية ثقيلة , وَ بكذا تعبي على بَشرتي ماراح يَظهر طالما راح أغطيه بهالكثر بَس يغطي ما أحسه يَنفع لكل يَوم
كنظرتي وَ رؤيتي للأساس , لكن إحساسه عالبشرة خفيف وَ ماتحسين بشرتك مَخنوقه
– الذرات الذهبيه , أغلب مُنتجات جيرلان بهالمَيزة تقريباً وَ حتى لو ماشفتي لمعه زي الجليتر , راح تحسين بإنعكاس الأساس على بَشرتك بَشكل حلو
ماهوب لَماع أبداً إنما مَثل الرَونق , وَ بالتأكيد كل هالشيء بَتدفعينه من ظَهرك مافي شيء ببلاش
هل بَرجع بشتريه ؟
شَريته أكثر من ٣ مَرات هالشيء ما يَعني إنه وآآآآآو على فكرة
بس أنا أحب هالبراند وَ بوقتها أغلب الأنواع المَطروحه من جيرلان ماكانت تَلبي مَطلبي , أو ما أحصل درجتي من ماركة ثانية أبي أشتري مَنها فيكون هو الملجأ ..
هل هَو أفضل أساس جَربته ؟!
لا مو أفضل أساس بالنَسبة لي وَ أشوف مَجموعة أساسات PARURE من جيرلان بَمختلف أنواعها سَواء هذا الجولد أبو علبة سوداء
أو الباقيات اللي بَعلبة ذهبية ميتاليكيه مُش الأفضل مو مَستوى جيرلان المَعروف , خَطوط جيرلان حافظتها صَم أفضل أساس طَلعوه أساس ديفينورا النص مَطفي وَ نص لميع
كان تُحفه , ما أدري كيف شَركة يكون عندها مُنتج بهذاك النَجاح تَقطعه , قوامه كان خَيالي
هذاك الأساس يفتح نفسك للمَكياج , لدرجة كنت أشتري علبتين وَ أروح السوق ألقاها مَخلصه من كثر نسبة المَبيعات عليه
التَقييم ،’
٧ مَن عشرة
تقييمي بناء على سَعره مُقارنة بَمنتجات جيرلان , بالإضافة إن فيه مَيزة التَجاعيد وَ أنا ما أقدر أحكم عليها يبيله وَحده عَمرها ٤٠ سَنه وَ طالع بيكون نَقدها مَوضوعي أكثر
وَ أخيراً لون العبوة السوداء ما أدري ليه مازالت شركات التَجميل مُصره على هالألوان بَعبواتها , أوكيه فَخامه لكن غير عَملية بالإستخدام تَطبع تَطبيع ..
كَمية الإستهلاك ~
هالأساس مابقى مَنه إلا الثلث وَاضح بالصورة المَقدار المُستهلك وَ المُتبقي طبعاً صورته وَ هو منسدح فجلست أنتظر يَرقد لتحت عشان أوريكم كم بَقى مَنه
تَهيء تهؤ عشان كذا تأخرت بالكَتابه
بَعض الناس يَقولون أنتِ تشترين مُنتجات جَديدة وَ تعرضينها عَلينا لذلك دايم مكياجك نَظيف
[ هههههههه لا تَخافون ما أنزل رَيفيو إلا بَعد ما أذبح المُنتج إستخدام أقل رَيفيو نَزلته يكون المُنتج مُستخدم شهر واحد عالأقل مَع تجربة أكثر من مرة خلال الشَهر ] ..
عَشان كذا أنا بَطيئة بالطرح وَ الأساس هذا تقريباً من عام ٢٠٠٩ نازل بجيرلان يعني مو شيء جَديد بس ما أنزل إلا الشيء الثَقه , وَ لذلك لما أشتري شيء جديد تقولون لي وَش رايك ؟! ما أقدر أحكم .. مُش ما أقول من مبدأ حَسد , صَعب أحكم من تجربه وَ لا تجربتين
الوَحيد الجَديد بالصَوره هو بلاشر دَيور وَ له ٣ أشهر عَندي بس أستخدمته مرتين , وَ عبوة شدو تو فيسيد بَرضو عبوة مَغلقه ماراح يبين الأستخدام
أنا كذا إستخدامي نَظيف للمُنتجات وَ للي حاب يَستفيد , التَصوير يبيله نَظافة لأن النَقطه تبين دَبل فَدايم أمسح بقطعه قماش لا قَطنيه وَ لا مناديل عشان ما تنزل نَقط ليفية عالمُنتجات , مرات الصور تَسلم من أي تَبقع وَ مرات أرجع أصور ..
وَ أنا طَبعي دايم لما أرجع من مَشاويري أمسح مَكياجي وَ أدخله بعيداً عن أشعة الضَوء دايم داخل الأدراج , الشغلات الدَورية أنظفها بالأسبوع مَره
وَ عفكرة هالشيء فادني ماعمره أي مُنتج عَفن أو أنفصل الزيت عن بقية المَكونات , وَ عطوري نَفس الشيء يَصيبها
صَح لما أتمكيج يَصير شَكل التسريحة رُعب بَس أرجع أنظف وَ أخيراً أهم من الأساس ياليت العالم يَخلوا من السؤال اللي من الأسفل
أكثر سؤال بَمحرك بَحث قوقل عَن الماكياج هُو بهالصَيغ ~
• يا بنات وش أفضل كريم أساس ؟!
• يا بنات وش أحسن كريم أساس للعروس ؟!
• يا بنات وش أحسن كريم أساس للبشرة الدهنية , الجافه , المختلطه , الحساسة ؟!
الجَواب: مافي أفضل وَ أتمنى تَستوعبون هالنَقطة بكل شيء بالحياة الأفضلية مَحدوده بالشخص نفسه
الميزانية لها الدور الأكبر , طبيعة البشرة , مشاكل البشرة , لون البشرة , سحنة البشرة , فكرتك وَ نظرتك للأساس نَفسه , العُمر
– بشرتك شابه ما راح تحتاجين كريمات أساس غنيه بالمرطبات العاليه وَ المواد المغذية اللي تَوصلك لسعر باهظ الثمن لأن بشرتك ما تَحتاج
– كل ماركة لها تركيبة مُعينه خواص مُعينه فيه ناس مُجرد ما يستخدمون أساسات ماركة مُعينه مُمكن بشرتهم تلتهب وَ تطلع لهم حُبوب
عادي مَثله مثل اللي عندهم حَساسية من الباذنجان أو الموز أو الفراولة , التركيبة الكيميائية اللي بالمُنتج غير ملائمة لَك
– لون البشرة فيه ماركات تَنزل فرضاً ١٠ درجات , لكن كل هالدرجات ما تَمشي مَع لون سحنتك حتى لو بشرتك حلوه وَ لونها حلو
بس مُجرد ما تحطينها تحسينها بدل ما تَعطيك مظهر أحسن بالعَكس أو بشرتك أجمل بكثير من الأساس نفسه النتيجه سيئة فغيري الماركة نفسها
مُمكن أنتِ تعطيك نتيجة سيئة بس أختك أو أمك أو صَديقتك النتيجه عليهم بيرفكت لا تتَحطمين , عادي العيب مو منك العيب إن المُنتج غير ملائم لك
– التطبيق بكريم الأساس على بشرة مُعتناه حتى لو بها عيوب وَ حفر وَ تبقع لكن البشرة مُعتناه وَ مهيئة للأساس , أفضل بمليون مره من بشرة صافيه خلقه بس مُهمله
لأن وقت مَد الأساس تطلع مشاكل تصحر البشرة وَ الشقوق وَ الجفاف أو طبقات الجلد الميت .. سهل تحلين البقع وَ الحفر للإنسان الشاطر وَ المُحترف
بس مُتعب تحلين مُشكلة الجفاف أو عدم نظافة البشرة [ وَ لما أقصد بالنظافة ما أقصد ماء وَ صابون بَس ] ..
– للأسف بالوَقت الحالي إنتشرت موضة مكياج الطبقات تحسين الوَحدة تمثال من الشمع من كثر هالطبقات , شَخصياً مايعجبني هالمَكياج المَتروس
تحسين الوَجه ينقط أساس وَ مافيه نضارة أبداً , جمال البشرة الحَقيقي مُختفي نَشوف برطم منفوخ وَ عيون مموه الشدو بها وَ قدر المستطاع محاولات لتوسيع العين
تحديد للملامح بالشدينق وَ الهايلايتنق لدرجة محاولة لخلق صورة بني آدمي مُختلف جذرياً عن الإنسان الطَبيعي ..
فَشلنا فَشل ذريع مؤخراً كثير عاجبهم هالستايل بَس أنا مو عاجبني
يعني المُمثلات التركيات سَطل بمعنى سطل كريم أساس وَ مع ذلك ما يبين , عَندكم بيرين سات مكياجها ما كأن بها أساس لا تقولون لي بَيضاء فيه كثير بلونها بلبنان وَ سوريا وَ مكياجهم كثيف جداً ..
المُمثلة توبا بالرغم مرات يبين طالع لها حبه بالجبهه أو الخد وَ برضو البشرة يبين نَقية مافيها شيء , صَراحة يبهروني هالتَركيات
أوكيه هذول شابات وَ صغيرات , طيب وش وضع نبهات !! عندها تَجاعيد تعبيرية بَوجهها بَس تبهرني وَ جمال بشرتها مايبين كَصورة بمقاطع الفَيديو واضح أثر الإهتمام وَ العناية
طبعاً نحن مايظهر لنا إلا الظاهر وَ التصوير يتطلب مَكياج من نوع مُعين بطريقه مُعينه حتى يظهر طبيعي
لكن تمت المُقارنه مع مُمثلات من نفس الكار وَ الوضع مُختلف , يبيلنا دَورة نتعلم نَسوي مكياج مَخفي مُش مَتروس وَ طافح
مَرات أقول كان يوم أسود لما أنتشرت موضة تحديد الملامح , صار الكل بشكل واحد
الكل ذقن منحوت , خشم مسطر وَ ضيق , جبهه صغيرة , خدود مَدري شَلون .. صرت لما تطلع وحده بشكل أكثر طَبيعية أشوفها حَلوه
وَ لازم مد البَرطم وَ فتح الشفه نص فتحه وَ تقديم البوز , لما تَشوف صورهم تحسها صَور مراهقات مو أمهات وَ مربيات أجيال , العقل وَ المخ إنقرض
آتمنى لَكم جَمال دائم
وَ أرواح نَقية
دُمتم بحب
لما تَشوف صورهم تحسها صَور مراهقات مو أمهات وَ مربيات أجيال , العقل وَ المخ إنقرض .. ههههههههههههه ضحكتيني الله يسعدك طول عمرك حلطمتك حلوة .. عجبني تعليقك جدااا على بحوث افضل كريم اساس وافضل وافضل… .. ودمتي ايضا بحب ❤❤❤
طَبعاً لأن عيب حركات البعض اللي يَسويها , حركات فتح نص الشفه ما أدري وَش هالعقل , مَقلب الله يا كافي
ارتوس دائمآ اتمني اشوف خطوات مكياج من يدك اتوقع ماراح يقل شغلك عن الصور الي حطيتيهم لتوبا وبيرين احب اتقانك بكل شي تقدمينه واتوقع راح تفيدين الكثير وتصححين اغلاط كثير شائعه لو خطيتي هذي الخطوة خصوصآ بأنك اصبحتي مصدر ثقه للكثير من متابعاتك
الله يوفقك يارب
لا صَراحة ما بَعد وَصلت لهالطريقة بالمَاكياج مو سَتايلي لكن مُلائم لما يَصورون بالمسلسل أنها وَحده فقيره
أو وحده نايمه , مو مثل فنانتنا مايستحون نايمه وَ الظل طَبقات , هذول مُبدعين .. وَ عادي لما يتفننون بالمسلسل وَ يسون أن عندهم حفله يَكثرون
تحسين فيه حياه طبيعيه من خلال الملابس وَ الماكياج ..
وَ دُوم مَشجعتني ..
اي في بعض الناس عليهم حركات لاحول ولاقوة الا بالله احيانا تشكين فيه عقل !! الله لايبلانا ..
العقل مَوجود يَمكن لكن المقلب طَغى عالعقل ..
لو ناس عاديين ما عَليه , بس فنانه طيب أستحي شوي وَ أقري التعليقات .. أنتِ مبهوره وَ معميه
فيه حَولك طاقم عَمل قبل لا يَنزلون الصوره ما قالوا لك ؟
آرتوس يعني برأيك وش الأفضل الكريم الأسود والا القديم الشفاف ؟
لانه القديم خلص من عندي ورايحه اشتري شنو آخذ!
القديم ديفينورا هو الأفضل , خلاص لا تَبحثين عنه ..
حتى لو لقيتيه بيكون مُنتهي الصلاحية .. يعني هالسؤال ما يَنفع وَ جوابي ماراح يَنفع لانه مُش مَوجود ..
ههههههههههههههههههههه والله كنت بقول اسمهها فوق بس قلت بدون اسما احسن .. بس جديا مدري وش تحس فيه وهي تسوي هالحركات ووش المقصد اصلا يعني تتدلع ولا ايش !!! عن اذنك بروح اذاكر ❤
رَوحي ذاكري .. الله يَوفقك هانت ما بَقى شيء وَ مخلصين ..
وَ عفكرة مُش هي لوحدها غيرها الكثير
أنا اشترك معك في حب جيرلان وحتى لو حبيت أجرب شيء جديد حيرلان بالنسبه ليه مثل خطه الطوارئ اذا مالقيت اللي ابغاه واحترت ارجع له أثق فيه وفعلاً تعجبني ريحه منتجاته
♥♥
بالأحضان ..
أرتوس أول شيء شكرا ع تدوينتك .. استمتعت فيها وقلبت المواجع .. أنا انسانه للحين ماحسيت بالرضا عن كريم اساس ع بشرتي ولا حصلت المناسب يمكن بعد لاني ماشيكت ع كل البراندز يعني ما ادري اجرب الشيء بالمحل احسه حلو اجربه ع وجهي ارجع اندم اني شريته اعترف ماعندي الخبرة الكافية لاختيار وثقافتي به الامور لك عليها اقصد من ناحية الانواع والالوان المناسبه جربت ديور و شانيل واف سان لوران مره مخذله .. بعد اذنك لو تتطرقين له الموضوع ايش الحاجات اللي انا احتاح اعرفها لاختار اساس مناسب ..حاجه ثانيه ارتوس بما انك ارتست ماشاء الله وخبيرة .. مكياج الرقبة والصدر مع اليدين كيف اخفف من حدة انه يكونفيه تباين هل احط كريم الاساس ع الرقبه والصدر احس بيبقع بالملابس ادري لازم اختار درجة مناسبه لبشرتي بس احيانا درجة الرقبه تختلف عن درجة لون الوجه يارب فهمنيني .. و آسفه ع الاطالة
ما قَلتي وَش مشكلتك تَحديداً , يعني ليش ما يَعجبك ؟! عشان تك تك تك نَوصل لنتيجه ..
مٌهم تعرفين أند تون بشرتك عَشان تختارين السحنه المُلائمة وَ طبيعة بشرتك يعني لو جافه مُستحيل تشترين لها أساس للبشرة الدَهنيه وَ هكذا ..
وَ كريم الأساس مفروض ينحط عالرقبه وَ الوجه وَ فتحة الديكولتييه للصدر مُمكن باودر أو تَموهين عالخفيف عَشان مايبين هالتباين
بس لو المُشكله فرق شاسع باللون أنا أفضل تعالجين المُشكلة وَقتها بترتاحين لأن كشخص عادي صَعب تشترين لكل منطقه بجسمك أساس
وَ بتضطرين تغمقيين لأغمق لون عَندك بحيث مايبين , مايحتاج أزيلي المُشكله أنا نَظرتي دائماً هي إيجاد الحل
وَ حل مُشكلة اليد وَ الرقبة ما تَطلب منك حتى شهرين لـ ٣ أشهر
ياحبي لقلبك تجربين عشان تفيدينا
اقول ماودك تجربين تمكيجيني من كثر حبك واهتمامك وتدوينك الصادق ودي تمكيجني
هههههههههههه ..
تَعلمي أفضل , يَمكن تطلعين بنتيجه خلابه لَعمرك أفضل من أطلق خبير
ههههههه
اعرف امكيج عمري
بس ودي اجرب شغلك
المهم مدونتك شكلها جوعانه تبلع الردود
الله يسعدك اشبعيها زين
وصباحك كصفاء قلبك
لا تَوها فاطره .. بس شكلك تدخلين من قوقل كروم ؟!
بالعافيه ..
اتصفح من قوقل سفاري
مَدري فيه بنات عَندهم هالمُشكلة وَ بنات ماشاء الله كاتبات دَواوين ..
تَمنيت يَوصلني ردك كامل , لأن كل زَوار صَفحتي مُهمين بالنسبة لي ..
نورتيني بكلآ الأحوال
حبيتي انا سالتك بالبوست عن بشرتي كانت مختلطه ورقيق الجلد حساسه وتحمر احيانا والحين مع جو كندا والبرد والثلوج صارت جافه ومتصحره على قولتك ووقفت غسول واهتمام لانه مافاد شي بس اشياء طبيعيه احط ولا نفع وش تنصحين بغسول خفيف عليها وكريم يرطب ولك الشكر
للأمانة أنا بَشرتي دَهنيه فلو قلت لك أسم مُنتج مَعناته مُش مُجرب إنما بنظرتي أشوفه مُمتاز ..
فجربي تَسوين حمام زيت للوجه , يعني أدهني وَجهك بزيت ملائم للوجه فرضاً زيت أرغان وَ حطي عليه منشفه دافئة وَ أجلسي ١٥ دقيقه فرضاً
وقتها بشرتك راح تترطب من الداخل , وَ الغسول والكريم جيبيه على طبيعة بشرتك من أي ماركة بشرتك تتقبلها ..
شوفي بيوديرما مش الأفضل لكن عندهم مُنتجات للبشرة الحساسه
علی طاري تحديد الوجهة صار جدا مبالغ فيه
الوجهه م فيه حيويه او اشراق اكثر فنانه
اكرررره ماكياجها بلقيس
وَحطي احلام الشامسي مَعهم .. تكبر وَ تستخف ..
الوجيه تحسين فيها كدمات مع الكونتور
شكرا ارتوس
تعليقي مش كامل اعلاه
مااعرف ايش المشكلة 🙁
تَصدقين شوفي رد اللي قَبلك نَفس المشكله
مرحبا ارتوس كيفك
ارتوس انت سعاده
انت صرتي الفاصل بينا انا وصديقاتي لو وحده تقول ارتوس قالت خلاص كلنا نقتنع الله يسعدك يارب .. ارتوس مره خاطري تنزلين تدوينات عن الاتيكيت واتيكيت تقديم الهدايا بالتحديد خاصه انك قد علقتي عليه وقلت تفضلين اسلوب الاجانب في تقديم الهدايا
Luv ya
يؤ مَين قَدي ..
الله يَسلمك إنتِ وَ صديقاتك , وَ إن شاء الله ما أخيب ظَنكم أبداً ..
آبشري بَنزل تَدوينه خاصه لَعيونك يا هَيا
نَورتيني
شكرا ع التدوينه الجميله
حبيت جيرلان من حبك له ❤
وَ أنا حَبيتك من حُبك لَجيرلان ..
لبى قلبك ارتوس تتعبين عمرك عشان الناس تستفيد مثل الشمعه تحترق لجل تضوي الله يجعلها بموازين حسناتك ، ماعندي تعليق ع البوست غير .. الله يريح قلبك ويشرح صدرك ..
قلوب من هنيّا لبيتك وسرير ليون يستاهل 😀 🙂
ههههههه ضَحكتني على هالصَبح
صَباح الخير , وَ لو أستفدتوا أنا أسَتفدت بالنَهايه كلنا نَمثل أمة وَحده .. يَعني نجاح أمتي نَجاح لي .
اللي يَقرأ كلامنا بَيقول هي و المكياج وش قدموا للأمة , بس لو تلاحظين غالباً ما أكتب تقرير عن المكياج فقط
وَ لا هالشيء بتلاقينه بأكبر المدونات الغربيات .. بس أحط فكرة عامه قبل أي مَوضوع وبالنسبة لي هي أهم من الرَيفيو نَفسه ..
وَ وصلتني قَلوبك مَتجمده مع هالبرد , نورتيني
نااااطرة هالتدوينه لاني مشتاقه لتدوين كالميك ابي وتأخرتي وراحت عليا ههههههه
عأساس حشوفا اول وحده
يالله كم الهائل من البلوقرز والمدونات والويتيوبرز
بس انتي غييييييير قولا واحد يقولو تعصب يقولو عنصريه
مااافي متلك ههههههه
تؤبشي البي بتفشيلي ئلبي بحياكتك داايما والله
.
.
.موضوع الكونتورنغ وهالكلام ..لوتلاحظي دايما بعلق اني كرهتو فعلا ولو بزياااده حاول غير من لوك الميك اب تبعي بعمل هايلايتنغ
بس كوتورنغ لا واصلا جربت ومالاق عليي ليش غير شكلي يعني مافهمت شوالمنطق فيه ؟؟لووووول
ونيال غيرلان بعشقك لها
عنجد المفروض تكوني الوجه الاعلاني لهالبراند..تخيلي بس وااو
وبنسبه للتركيات انا الحمدلله مومهوسه فيهم
ابدا بس عندهم ذكاء وتصويرهم واضائتهم لاتنسي تماما تختلف عننا لاحظي اخر فترى اغلب المسلسلات العربيه نفكرها تركية لاول وهلة!!!! لانو كوبي بست بكل شي صار بطريقة غبيه شوي وداعئيه
طولت أخده راحتي عن الانستغرام لوول
لوف يو حياتي انتي
إيه وَ الله تأخرت عَشان الصَور أعدت التَصوير كذآ مَره لين ضَبطها
ههههههههههههههه تؤبري آلبي , بَتول حتى لو جيتي بعد ١٥٠٠ سَنة ضوئية , بعيوني الأولى حتى لو ما رَديتي عارفة قلبك رَد قبل يَدينك لا تَطبع ..
عطاري الكونتور أنا من رأيي الناس العاديين اللي ماراح يطلعوا عالتي في أو ماراح يَتعرضوا لتصوير إحترافي بأيام خاصه لهم مثل العروس وَ حفلات التخرج .. إلخ
يعني لما تكون هي مَحور الحفل , ما أتوقع بيكون مظهر شكلها بالكونتور حلو لآيف .. يعني عالطبيعة بيكون شكلها مُنفر
ففيه طريقه خفيفه للكونتور البشري يعني شوية برونزر على شوية بلاش مَع كريمات أضاءة وَ يكفيها , أنا بُمناسبة مُهمه لَي ما أستخدمت الا هالطرق البسيطه
وَ لما شفت صَوري حسيت أنه أوفر بالرغم كان بسيط بس يمكن نفسي كرهته من جوآآآآآآت آآلب آلبي
وَ صح الأن صار فيه نفس هالستايل بَس أحسه أكثر ماشي عند اللبنانين يسون ستايل شَبه تركي ..
يمكن فيه مسلسلات سورية بس من فترة ماشفت , أخر فترة كنت أتابع أخترب الحي لبناني , وَ مسلسل لو مكياج نادين نجيم كان حلو بس مبين إن فيه مَكياج
عموماً نادين تعجبني ..
وَ لآف يو تو أكيد بنبسط بَحكياتك , حَليتي صَباحي
حطيها بالمكرويف ادري ياسمجي 😀
يختي وفرتي علينا عناء التعب والوقت يعني يقالك اني بزنس وومن من هالاشغال عاد .. بس والله دام انتي اللي تنزلين وتجربين وتسردين تجربتك صدقيني انتي مصدر ثقه للكثير وبجرب وانا مغمضه عندك سحر المنطق والأسلوب ماشاء الله
حاشاك .. مَدري شكلي فاصله من السَهر بس مدري ليه كلامك داخل قلبي ..هههههههه
يجوز يجوز لأنه مَدح فيني هههههههههه ,, يآلبى قَلبك
حبيبتي ارتوسه اول شي الله يعطيك العافيه ويوفقك على قد ماتعطين سبحان الله انتي اكثر شخص اثق فيه وفي كلامه احسك تحاولين تعددين لنا الخيارات ماتوجهيننا لمنتجات معينه او اسلوب معين واخاف منك لمى تعاتبين وتهاوشين احس الكلام موجه لي
التَوجيه لمُنتج مُعين تَجاره بَحته ..
يَعني لو أنقطع المنتج ماراح تستفيدين من كلامي , الأمثل بالنَسبة لي ماراح يَكون أمثل بالنسبة لك وَ العكس صَحيح
بس لو تعلمتي الأساسات الصحيحه وَ عرفتي فكرة الإنتاج لكل شَركة ماراح تكترثين هالكثر للأعلانات وَ التسويق اللي الأغلبية يَكونون ضَحيته
وَ الكلام غير مَوجه لأحد .. هو رَغبة فَقط بالرجوع للمظهر المعقول عالأقل
نَورتيني مَريوم
الله يسعدك ويعطيك حتى يرضيك استفدت منك كثيييير جربت السي سي كريم وجربت كبسولات برايورين والبيبي فوت من تقييمك لهم وفادوووني كثير … وجاري تجربه جيرلان … احب قوة ملاحظتك ماشاء الله ووصفك الدقيق … مميززززه جدا ونفخر بك كسعوديه ❤❤❤
وآآآآآآو ماشاء الله عليك , يَعني أنتِ من المُتابعات المُخلصات ..
وَ سعيده بتجاربك النَاجحه شَكلنا نفس طَبيعة البَشرة ..
نَورتيني , وَ كلامك وَسام على صَدري
يلا دامك تكلمتي عن الهايلاتنغ والكونتورنغ بعترف بشي .. أنا إنسانة ماحط كنتور أبد
على حَظك عَجوبه 🙁
نفسي أعرف ليه بَعض البنات يَصير لهم هالشيء وَ بعض البنات لأ
اليوم بَجيك عالخاص بَشوف وَش المُشكلة تَحديداً
وششش دعوووه كاتبة تعليق طولة مترين طلع بس شبر
صباحك جميل كجمأل مواضيعك ❤️
وكل ماجيت ابغى اذاكر افتح واجلس اقرأ واقول خلاص بروح بذاكر وارجع اقرأ الردود وراح يومي وانا على ذا الحال “)
لا الله الله بالمُذاكرة , فَترة بسيطه وَ تعدي وَ بالتوفيق لك إن شاء الله ..
وَ ترى سَعيدة بتواجدك بَصفحتي بالرغم من إنشغالك لكن مُو مَقصرة
وعلى طاري الكونتور سويته مره قالت لي امي كأن احد
ما سكك ومصفقك :/
ما تَنلام وَ الله ..أنا أثق بَذوق الأمهات
غيرلان هذي اسمها بحد ذاته فخامه الماركة الوحيده اللي ما خيبت ظني اتفق معاج بفاونديشن ديفينورا والباودر هالشي ولااااغلطه ريحه وتغطية ومش كلاكيع وطبقات (الله يرحمها)
فَعلاً الله يَرحمهآ 🙁 إنقطاعها مؤسف جداً
شَكلي بتواصل مَعهم بهالخَصوص , ما نَدري لعل وَعسى يرجعون هذاك الإصدار
كنت بقولك بس سبقتيني ، ودي نسوي تصويت لشركة جيرلان عشان يرجعون اساس ديفينورا
حرام والله ينقطع هاالمنتج المميز من السوق فجأه ٠٠
يا جمال جيرلان ويا جمالك يا ارتوس انتي انسانه تجيب السعادة وتدويناتك تجيب السعادة
أحب تدويناتك للمكياج جدا مفيدة وكلامك جميل واحس ذوقك مقارب لذوقي بالمكياج
يختي كل ما شفت جيرلان بالسوق تذكرتك .. اتمنى لو الموظفات يكونون بنفس خبرتك بالمكياج وما يخربطون من راسهم !!
أجل اول ما نزل السي سي كريم اسأل موظفة وش الفرق بينه وبين البي بي تقول لي نفسه بس ماركات تسميه بي بي وماركات سي سي !!!
يعني مرة ما يتعبون نفسهم ويتعلمون لو شوي يفيدوننا ! وش فايدتهم واقفين وهم مو فاهمين شي ..
بالنسبة لمكياج التركيات انا مرة يعجبني مكياجهم يطلعون البشرة صافية جدا وطبيعية حتى الكبيرات بالعمر ما شاء الله تطلع لك بوجه صافي و ولا كأنها حاطه اساس ..
يعطيك العافيه ارتوس عالتدوينة جدا جميلة وتفتح النفس
كثري من تدوينات المكياج .. روتينك قبل وبعد المكياج .. الارواج .. الفرش .. الاي لاينر .. تدوينات المكياج تسعد وخصوصا منك
تكلمي لنا عن عطور تحبينها .. صحيح الاذواق بالعطور تختلف بس يهمني اعرف ذوقك بالعطور بالمكياج بالملابس وبكل شي
ماشاء الله كل شي منك جميل .. ودي اروح معك السوق تختارين لي مكياجي 🙂 يا بخت اللي اخترتي لها الاساس زمان :))
الله يهنيك ويزيدك ولا يحرمك السعادة يارب
أخجلتم تَواضعنا ..
آآآخ حَرام عليهم مَهابيل ذَول .. أجل ماركات تَسميه بي بي وَ ماركات سي سي ..
إلا قَولي وَين الإدارة عَنها , فيه بنات كثير عندهم خبره وَ طاقة لكن للأسف مالقوا هالوظيفة وَ ووظفوا الأقل كفاءة لأن راتبها أرخص
أساساً مو من المفترض الإنسان العادي يعرف كل شيء , حتى الخبير مرات ما يَعرف إذا فيه كولكشن جديد نازل
أو مُنتج جَديد , هذي وظيفة الموظفات يعطونك نُبذة وَ إنتِ بعدين بذكائك ..
التركيات حتى الحواجب مايلمسونها إلا إذا وحده كبيرة بالسن أو كلها عمليات تَجميل تبدأ تتعبث بالحواجب
بيرين سات مرات حواجبها تصير مخربطه لكن معطيها مظهر طفولي وَ صغر بالعَمر , صَح أنا مو ستايلهم لَكن شَوفي شلون وَ هذا وهم فنانات
يؤ كبرتي فَيني وَ الله .. آبشري بإذن الله القادم أجمل بَمليون مَرة من المَطروح جالسه أضبط قَدر المُستطاع ..
نَورتيني وَ الله يرزقك بَمثل مادعيتي لي وَ يعطيك على قَد قلبك الحلو
يسعد مساك
ارتوس انا عندي مشكله الحين انا بشرتي دافئه جربت طريقتك طلع الذهبي تمام وعروقي لونها خضراء جربت اكثر من اساس خذيت بيج وخذيت كمان على زهر والحين اساس نيود لديور استخدمه واحس ماناسبني مرة مرة بس افضل من غيره المشكله احطه بعد كم ساعه يتأكسد ويطلع على رمادي واحس بسرتي مكتوبه لوني الطبيعي يكون افتح من بعد ماتاكسد المكياج
وش الحل بنظر ووش الاساس اللي يناسب بشرتي وانا بشرتي دهنيه وآلف شكر لك وياليت تتوسعي. بموضوع السحنه لان كثير ضايع فيها
عطيني لون بشرتك مثل مَين ؟! وَ الدرجه اللي أخذتيها ..
وَ الصراحة الأن درج ناس يقولون لك مانحط بودرة بعد الفاونديشن وَ هم خبراء أنا أشوفه يتأكسد بالرغم فيه أساسات بعد المد تتحول لبودرة
لكن مع جونا أفضل بعد مد الأساس تحطين لوس باودر لو بشرتك دهنيه ملائم لك جداً ..
فيه خَطوات يَمكن ناقصه لو تَحطين لي صَور وَ أرقام ممكن أساعدك أكثر وَ الدرجات اللي أخذتيها .. ولو بشرتك مش معتناه مرات الأساس يتأكسد
حتى النَفسية ..وَ بإذن الله بحاول أكتب عن هالمَوضوع أكثر بالرغم أشوف إنه أنكتب لكن بكتب من جَديد
مع انه مالي بالميك اب بس ماافوت لك تدوينه ❤❤❤
والبنات اللي ماتطلع تعليقاتهم كامله يمكن يحطون “ايموجي” لان لاحظت كذا عندي ..
احبك ارتوستي❤
ثانكس ثانكس يا حَبيبتي عالمُساعدة رَبي يَسعدك ..
نفس تَوقعي وَ برضو بعض الرموز لأسباب أمنية تُمنع ..
بس سؤال : ليه مالك بالمَيك آب ؟! .. حابه أفهم تَوجهك
ههههه احبه بس مالي فيه ❤❤
وفعلا اعششق ميك اب التركيات شي يجنن واحترافي جداً
لو تعرفين مسلسل حريم السلطان هذا ذوقي بالميك اب بالظبط تحسينه واقعي ميه بالميه ماكأنها حاطه نقطه ❤❤❤
الحين البنات صايرين يروعون كلهم نفس الحواجب وشفايف كبيره وعيون كبيره وخشم نتفه
الجمال الطبيعي توفّى للأسف
الله يسعدك يناسب البشره الجافه
ههههههه لالالا هيك كتير عليي والله زز
ياعمري انتي …الله يعينك كل شوي حتلاقيني ناطة هون اخده راحتي باكومنتز طويل
نفسرايك بلكونتور هو موضه وبعد كم سنه حنقول يوووه كيف كنا نحدد وجهنا بهالشكل
متأكده من هالشي
بس ماتطلعنا وحده تانية غير كيم وتعلمنا صرعه تانية نقول يامحلا الكونتورنغ لووووول
انا خليني على الاميركي وفن هوليود ساده نفسي عن كلشي عربي ههههههه
انا كميك اب حاليا تعجبني ديالا مكي بيرفكت
واكيد بيبقى الطبيعي مع شوي شمارت بلميك اب هو الاجمل
والاجمل الاجمل من كلشييي انتي والله
الله يعطيكي العافيه ومايحرمنا منك يااحلى حدا بالكون
ههههه مَن حقك مَكانك بالقَلب
ديالا مَكي إنسانه هآديه كانت تَعجبني الآن بطلت تَعجبني ..
أكيد لو راحت كيم كاردشيان متأكده بيطلع غيرها , لكن وقتها أتوقع كل الناس بيكونون شَبه مشاهير
ماراح يَكترثون بأحد [ حسيت بالخوف من الزمن القآدم ]
ارتوس دايما دايما دايما تفديني واظن اول حكيتي عن بي بي كريم غيرليان ورحت وشريته جدا ممتاز .. الله يسعدك ويوفقك جد جد حبيتك في الله
عَساي دُوم عند حَسن الظن ..
بالنسبة لبي بي جيرلان أنا ما نَزلت ريفيو عَنه لكن قلت إنه من أفضل البي بي لكن ثقيل شوي يعني مش الأفضل مع البشرة الدهنيه أو مع طبيعة بشرتي عالأغلب
نَورتيني
صادقه ياارتوس والله التركيات يبهروني
وفكرة ان الكل صار يشبه المشاهير والله يوم عن يوم ازداد يقين بخلقتي وجمالي حتى لو كان فيه شي فيني اشوفه لو كان اكبر او اصغر احلى بس تميز بدون كنتور ونفخ وتشقيق
عليك نُور ..
صرت أروح الأعراس ما أفرق بين البنات الكل شَكل واحد .. اللي فَيهم شَكلها بسيط بالنسبة لي صارت تلفتني أكثر من راعية التكلف
لو تكلف يشبهها وَ على ذوقها بتكون مُميزه لكن طَقم حتى بهالإختلاف
تدوينة تبرد القلب كعادتك يا ارتوس ❤️
و انا مثل الاخت اللي فوق مالي بالميك اب هههههه
بصراحة قبل ٣ سنوات كنت مهووسة ميك اب
و تدربت ع طريقة الميك اب الصباحي و المسائي
والسهرات و الذي منو ..
لدرجة صار اللي حولي يسألوني عن طريقتي
بالميك اب وعنايتي ببشرتي ..
و بالجامعة كنت اتفنن بالمكياج الصباحي
مرة مشمشي مرة وردي مرة لحمي ههههههه
الله يذكر هذيك الايام بالخير
المهم فجأة الوجه انعدم !
المعنى الحقيقي لإنعدم !
المشكلة اني احرص ع التنظيف من جميع
النواحي ! لكن وجهي صار حفلة من البثور
السوداء والحمراء 🙁
عالجتها طبياً ونفسياً والحمدلله من سنة
بس ، رجعت بشرتي طبيعية
ومن بعدها و انا اختك وانا مقاطعة المكياج برمّته
و اكتفي بروج ونادراً ماسكرا و المناسبات الكبيرة
استخدم بي بي كريم مع رتوش ههههه
و ارتحت ..
بس المشكلة لما اقرا كلامك عن المكياج
يجيني حماس ألطخ بوجهي ههههههههههههه
واتعوذ من ابليس 3/>
اعتذر ع الاطالة لكن اعتبريها مجرد فضفضة
من احد المارّة ❤️
أكيد فيه شيء خطأ كَنتِ تسوينه فكري شَوي وَ شويتين ؟! ..
زَمان يمكن قبل ٢٠ سَنه كان مُمكن المكياج يسبب هالمشاكل لكن الأن أبداً وَ خاصه الماركات العالمية
بعض الماركات المواد اللي بالفاونديشن أغلى من الكريمات العادية اللي بالصَيدلية ..
فَكري وين كان الغلط ؟! عشان لا تنحرمين ..
حتى فيه ماسكات تنقيه أو طريقة الإزالة كان فيها مُشكلة وَ مع الوقت صح هو أزال لكن دخل جوا المسام بدون ماتحسين وَ تأكسد
لو زبادي يدخل بين المسام راح يتأكسد وَ يسبب حتى خراج بالوجه مابالك لو فاونديشن ..
بالعَكس أسعدتني فضفضتك لعل وَ عسى نَجد ضالتك
ما شاء الله ..ارتوس حبيت مدونتك جددالله يكتب أجرك .بس سؤالي أنا بشرتي تعبانه شوي يعني بثور وشوية مسام .وأنا حابه أستخدم كورس”روكتان” أكيد تعرفينة .فهل تأيديني:(؟
طبعاً أكيد بستخدمه تحت إشراف دكتوره وعمري في العشرينات
إذا الدكتور رشحه لك ليش لأ , لكن البثور ما تستدعي روكتان لأن أثاره الجانبيه قَويه
يعني مُمكن تعانين من جفاف شديد وَ تصبغ , وَ جفاف بالعين وَ أظافرك راح تعورك وَ شفايفك
الروكتان للي يعانون من دهون مفرطه أو حبوب تسبب حفر .. مو بهالسهوله حتى بيسون لك التحليلات اللازمه ..
أساسيات الكُل شيء منك تعلمتها 🙁 ،
مُبهره بمعلوماتك ماشاء الله، واسلوبك بالكتابه رهيب
جداً حاقده على معلمتك للتعبير! أتحدى أسلوبها يقرب لنقطة منك!
من فوق قَريت بالتعليقات أن العلاج هو الأولى
طَيب أنا وحدة أعاني من آثار جروح كثيره كيف بيكون علاجها بخبرتك؟
راجعت كذا طبيبة، لكن كله نَهب فلوس 🙁
+
مودل روز، مدري ليه من أشوف صورها أحس اسلوب مكياجها يعجبك
بَغض النظر عن التَسمير أعرفك مايعجبك التَان اللي هالدرجة :$
* مَرة أيام منتدى شمواه قلتِ ان بودك لو توعين النَاس و تتكلمين عن المَلابس التَحتيه وكيف تريبها على نوع الملابس، بخَاطري تكتبين هالموضوع من قللب، احب كلامك عن الملابس واسلوبك فيه مثل ماتتكلمين عن الماكياج والإهتمام *
شكرا على كل شيء ارتوس :'( .
هههههههههههههه للأن اللي صَححت لي مَجهولة الهويه لأنه أختبار ثانوية عامه
بس شَكلي هايطت وَ أنا مَنب حاسه ..
بالنسبة للجروح ممكن بالديرما رولر تتعالج سويتي بحث ؟! سوي بحث بهالصيغه dermaroller
باليوتيوب وَ شوفي تجارب الناس قبل وَ بعد ..
لا ما يعجبني ستايل موديل روز , مو ستايل نظيف وَ ووجهها مُثقل بالمكياج , يجوز لي ستايل هيفاء وَهبي وَ الان شطحت هيفاء
ريانا قَبل سنتين شيء خُرافي .. موديل روز مو مسويه تان لهدرجه !! هي مو بيضاء أساساً لونها عادي ..
هي ذكيه مسويه ستايل أنو مسويه تان قَوي .. وَ هو خفيف هالشيء يعطيها ستايل حلو وَ الصبغه لها دَورها ..
ما أحس عندي صَبر أتكلم عن الملابس الداخلية , كأني بغير أساس كبير الناس مَتعودين عليه
إذا هُم مرتاحين عليه ليش أغير ؟! .. مو من مصلحتي .. الناس يزعلون كأنك بتقولين لهم إنتوا غلط مافي أحد يبي يَصير غَلط ..
وَ لو جيت نزلت لكم ملابس داخليه تخصني راح تَشوفونه دعاره , وَ سبق وصورت شغله بالآنستا قامت القيامه
المُجتمع يفضل أنه يصير جاهل على إنه يَتعلم , وَ يفضلون الكلام بسريه بين بعض فخليهم عالسَريه شيء ماراح يأثر بالنهايه
مرحبآ يآ وردة ..
شلونج آرتووس؟ عسسآج بخير إن شاء الله..
وآيد إستانست لمآ كتبتي عن هالأساس من جيرلان، كنت آعرف إنج تستخدمينه من زمآن، من لمآ عرفتج في شموآه، وكآن خاطري تكتبين عنه آكثر..
والله أنا بعد مثلي مثل المتابعات الباقيات ، عندي ثقه كبيرة فيج وفي رايج عن أي منتج ، لأن جربت أكثر من شغله والحمدلله وايد إستفدت خاصه فرشاة الجسم اللي نستخدمها بالطريقة السويدية خففت لي الشعر اللي تحت الجلد برجليني بشكل كبييير ما تتصورينه، فيتامينات الشعر من برايورين أن ناسبوني جداً وحاسة بتحسن في صحة شعري وان شاء الله اواصل لما أخلص الكورس، طبعا غير مستلزمات المكياج والبشرة، يعني عطاء من قلب ماعرف شلون أشكرج عليه :'(
تدرين؟
ضايفتج في حساب الماما وحساب أختي اللي أصغر مني عشآن تاخذ نصايح منج وتتعلم كل شي مفيد ويديد، أما الماما ف اهي ترى تحب تجوف صورج خاصه اذا كان فيها موآعين ههههههه
يآرب ما ننحرم منج ومن وجودج
أتمنى لو آقدر أصافحج بيدي وأعبر لج عن شكري بنفسي ..
كل القلوب النقية لج ..
يا مَية وَلكم يا دَخون .. نورتيني وَ الله
كلامك بالحَيل حُلو بَحقي أخجلتم تَواضعنآ , وآآآآو إنتِ متابعه مُخلصه جداً ..
طالما تتذكرين سالفة السنفرة السويدية فَيعني مع طَوال الخَط ..
خلاص طالما أمك تَحب صور المَواعين عَطيني أسمها عَشان أنَزل صَور مَخصوص لهآ ..
وَ ماتَدرين يمكن نتصافح أنا وَ أنتِ فعلياً , وَ بدوري أشكرك على هالتَوقيع بصفحتي إللي يَفتح النفس ..
وَسلامي للوالدة وَ أختك
ممكن !
روتيني مثل البقية ، تنظيف فرش ، بعد ازالة المكياج
مقشر + غسول وكلها اما طبية او مشهورة
مثل لاش وسانت ايفز وغيره
و تونر ماء ورد او جاهز
و مهووسة ماسكات ما انكر
/
والحين المشكلة انتهت الحمدلله
لكن فعلا صرت اكره المكياج !
ماعاد يغريني ويجذبني مثل قبل
صرت اشتري منه وينتهي ماستخدمت منه الا
مرتين الى ثلاث بالكثير !
واللي يستفزني اني اشيل المكياج من هنا
الاقي حبة كتكوتة طالعة من هنا 🙂
صرت اتجنبه بسبب هالشي
صرت احب اطالع وجهي بالمراية
ارتاح لما اشوفه صافي ونظر من غير
هالمكياج ،
صحيح اللي يشوفني الحين يستنكر
تغيّري ! وييين جوان قبل سنتين !
بصراحة اللي تعرضت له حتى
مظهري العام ماعاد صار مثل قبل
صحيح مرتب ومنظم لكن بحدود
ماهو مجنون و ع الموضة مثل قبل ،،
ودي ارجع مثل قبل وممكن تكون فترة
وتعدي وارجع احب المكياج والفاشن مثل قبل
وممكن استمر ع وضعي ، لكن الآن مستمرة
ما أنكر .
الديرما رول سُبق وقريت عنهَا لكن تحتاج لطلب حسبما قرأت
ولا أظني مُجازفه بالطلب ، لكنَي بحاول قد ما اقدر وبقولك وش يصير
يالله! ، لمَا الحين قَريت كلامك احس تَوني انتبه!
نفس بالضبط لما تكلمتِ عن التُركيات، يخدعون حليلهم ههههههه
مَاودي أحن على راسك على المَوضوع بَس فعلاً احسه موضوع مهم جدا :'(
وغريبين العَالم يتهمون المُعلم بالدعارة!! وعلى شنو؟ عَلى شيء بيفيدهم ولاهم مجبورين يتبعونه، ( هالفئه مريضه وتحرم غيرها بسبب ردة فعلها) ،
الديرما رولر موجوده كعلاج بالعيادات لو الابرة عميقه ..
أو الابر الغير عميقه تباع بالصيدليات مافي شيء يحتاج طلب من الخارج ..
لكن سعرها حول ٣٥٠ ريال سعودي .. الديرما رولر راح تجدد طبقة الانسجه وبكذا الاثر يزول
أما كريم التبييض أو التقشير راح يبيض التصبغ لكن الندبه الغائره أو المحفوره ماراح يسوي لها شيء ..
صَدقيني لو قدرت أعرض الموضوع بطريقه ما تَخدش الحياء وَ محترمه راح أطرحه من كل بَد لعيونك وَ لعيون المُحترمات
لكن لازم أحاسب بالطرح لأن فيه ناس صح ودهم يستفيدون لكن برضو حياهم يمنعهم من الفائدة لأن تعودا إن الكلام بهالمواضيع عيب ..
السعر فدوه لطالما إمكانية الفائده موجوده،
وشكرا على إهتمامك وشرحك.
يَاروححي والله، شكرا،
والله يوفقك.
هايايات ومراحب باارتوس جيرلان بقولك تجربتي مع جيرلان واساساتهم بس المسميات لك عليها ماني حافظتها اول مرة شريت جيرلان قبل عشر سنوات شريت الاساس اللي بعلبه مدوره ويفتح من فوق تعليبه ماكان جيد بس جربته في المحل وكان بيرفكت المصيبه رجعت البيت وماستخدمته الا بعد اكثر من اسبوع واستخدمته على طول كنت مستعجله ماارتحت له رجعت قريت العلبه طلع غامق مرره بشكل واضح اساسا حسيت انو من درجات السمر … تبين الحق على طول شكيت في البايع انه بيمشي لي البضاعه اللي ماانباعت وكرهته على طول بس كل ماارجع ارجع لجيرلان لان عاجبني عندهم كل شي تقريبا بذاك الوقت المهم رجعت اخذت من عندهم اساس عادي يشبه تعليب اللي فوق ضغاط يعني لونه بيرفكت بس كنت مو مرتاحه سائل دهني وانا بشرتي مختلطه .. والى يومك اليوم وانا اختك حايسه بهالاساسات اهم شي عندي الدرجه ماتتوافق معي دائما او يجيك دهني وانا بشتري دهنيه …. جربت جيرلان وسان لوران وميك اب فور ايفر وبينفيت حاليا انا عليه لاحظت انه للبشرة الدهنيه سائل بس لمن استخدم منه قليل يطلع منظري طبيعي ومناسبني في الايام العاديه بتقولين كيف دهني وبشرتك دهنيه ماراح ينفع بقولك ناسبني لاني هالفتره استخدم الرتن اي وارطب كل فااحس بشرتي صايره عاديه ومناسبني بشكل متوسط موب اللي واو بس كيومي بيرفكت احسه طريقة استخدامي له لو فيه مناسبه بعد مااغسل وجهي واجففه احط كريم مرطب من بيوديرما وبعدها بشي ساعه ابدا اشتغل كريم سي سي شانيل والفضل يعود لك في هذا الكريم عشقته ماعاد اقدر اتركه وبعدها وفي النهاية الميك اب امده على بشرتي ووبس … بالنسبه للتركيات مخبليني بس مو كلهم دائما اقول توبا ذي فيها عيوب بس ماتبين واحس بشرة وجهها قريبه كثير مني يعني مثل ماتقولين تطلع لي حبه مثل مايطلع لها من غير سابق انذار وبروزها خفيف ومن نفس لون الجلد دائما مااتمقلها … وسبحان الله ماافمر بسيء الا وتتكلمين عنه الفتره الاخيره افكر باأساسيات الميك اب والتركيات وسبحان الله جمعتيهم بمدونه وحده … في مشكله تواحهني كثييير قبل فترة اتكلم مع اختي فيها اللي هي دائما اكتب لي قائمه بالاساسيات واحس فيه شيء ناقص اتمنى منك تكتبي مدونه بهيك موضوع يعني يعني تكتبين كيفية اخاتيار كريم الاساس وكيف يتناسب مع درجة البشره ووطريقة رسم الايلانير افضل طريقه لها … طولت عليك بس بصراحه استمتعت وانشرح صدري لمن كتبتي عن التركيات وتمنيت لو انك اطلتي الحديث فيهم تمام
حبي لك يالحب
ياهَلا بك , أنا بالنسبة لي أشوف مو حلو البشرة الدهنية تستخدم أساس للبشرة الدهنيه
هذي نَظرتي طبعاً أكيد كثير بيخالفوني الرأي , لأن أفضل إن البشرة تتعالج من دهنيتها بحيث تصير بشرة عاديه
ولا وش فايدة إن البشرة الدهنيه تتعب نفسها وَ تستخدم منتجات يوميه للعنايه مخصصه للبشرة الدهنيه وَ أخرتها ماتقدر تستخدم أساس للبشرة العاديه
خاصه إن البشرة الدهنيه مش ٢٤ ساعة تصير دهنيه , الأفضل يستخدم سيروم قابض للمسام وَ بعدها منتجات عادية
لكن خطوات الماكياج تكون ملائمة للبشرة الدهنيه , فاونديشن , بودر , مثبت ماكياج ..
كثير بشرتهم دهنيه لكن مسرفين بمعاملتها بقسوه النتيجه بشره دهنيه بعيوب البشرة الجافه
أعذريني يمكن تركيزي اليَوم لك عَليه , لكن لو حابه أرسلي لي رساله بدايركت الآنستا عن الشغلات اللي حابه تعرفينها أفضل أفكر أكتب عنها
لأن يمكن فيه أحتياجات كثير للبنات أنا ما أسَتوعبها وَ أفكر أنها صارت معروفه .. غير كذا كثير يكابر لكن أنتِ واثقه منك لو فيه شيء مَجهول بتقولينه بَصريح العباره
وَدي أطيل الحَديث بكل بَوست , لكن يقولك لما تصير خَفيف يشتاقون لك الناس ..
قريب بَتكلم عن أساس ثاني للبشرة عَجبني .. بالنسبة للأساس ما أشوف بطريقتك شيء غَلط مرات وَدي أشرح براحة لكن بدون تطبيق على مَوديل
يَمر الكلام أحياناً مرور الكرام عالبعض .. أو مايستوعب النقطه اللي أبي أوصلها
اعتذر عن الاخطاء اللي فوق … واضح اني مستعجله
هذا اللي ودي اقوله
انا احب المكياج يزيد من جمال الوحده مو شرط يطلع ملامحها وخشمها حد السيف الخ
المكياج المنتشر احسه يطلع الوحده وصخه مع احترامي وتحسين بشرتها تعبانه ومبين طبقات المكياج والنحت الخ
احب المكياج اللي يخفي العيوب ويطلع البشرة نظيفه واتمنى نوصل لدرجة ماكأننا حاطين مكياج بس مع كذا طالعه بشراتنا منوره وشفايفنا مورده …
أجَدتي الوصف وَ أضفتي للمَوضوع قلتيها تَماماً ..
يعطيك مَظهر كدمات بالوجه وَ ووسخ , ماصار الشكل طَبيعي وَ الوضع طبقات وَ متروس
ما أدري هل عاجبهم ؟! أو خلاص العين تَعودت ماعادت تَشوف الخطأ وَين ..
اهلا ارتوس
ردك اسعدني جدا
جربت لوس باودر وبعد مانناسب
الدرجه اللي اخذتها من ديور بيج ٣٠
ومن فور ايفر hd n125
مافي امكانيه اضيف لك صور
استخدم قبل المكياج برايمر مطفي من فور ايفر وادمجه مع ستروب من ماك
وجهي آغمق ب٥ مرات من بشره جسمي والنفسيه تلعب دور اكيد
الله يرزقك مثل ماتمنين
صراحة أغلب خَطواتك سَليمه ؟! طيب يَمكن بشرتك هالفترة تَعبانه
جربي تَسوين ماسكات لو طَبيعيه وَ تشربين ماء وَ تمسجين وَجهك وَ شوفي وَش يصير
بَحاول أعطيكم خَطوات ما قَبل الماكياج ممكن فيه تفصيل صغير مُش منتبهه له ..
يمكن تسنفرين بشرتك قبل المناسبه ..
ارتوس آنا جودي
اللي كنت بكلمك بشمواه بموضوع خاص فيني وللاسف ماقدرت اتوضل عضويتي لم تفعل ياليت اتواصل معك ودي استشيرك بأمر يعني لي الكثير وكوني احب اقرأ لك ابي مساعدتك
أرسلي لَي بالدايركت مَسج بالآنستا أفضل بَس قوليلي قَبل عالعام بَبوست جَيرلان أنك جَودي أو صاحبة إيميل كاريزما راح أنتبه لك ..
عَشان أفتح المسج ما أقدر أفتح كل المسجات مَرات
السلام عليكم ، كيفك ارتوس ؟
جداً عجبتني تدوينتك عن الاساس ويعجبني فيك انك ماتتقيدين وتملليننا يعني مثلاً تدوينه عن اساس مو بس تكتبين رايك لا الاحلا فيك انك تسولفين معنا وتخرجين عن المحور شوي وهالشي ممتع بالنسبه لي ههههههههه
المهم سؤالي هو وشو رايك بميك اب حنان النجاده بكل صراحه ؟
مَكياج حنان النجاده حَلو كرسم يعني ماشاء الله عليها فنانه جداً بتغيير المَلامح
وَ فنانه بالرسم عيونها مَسطره هندسيه الله يَحفظها .. لكن ما أحب مَكياجها بَوجهي ..
فَنها ما يَختلف عليه إثنين تستحق مَكانة أفضل من المَكانة اللي وَصلت لها ,وَ مفروض تصنف أفضل خبيرة لعام ٢٠١٤
لكن مَرات الإنسان المُبدع مايَوصل بهالسَهوله فيه أعتبارات ثانية بأوساط الشَهره , فيه ناس يدفعون للوصول وَ فيه ناس لهم واسطات
وَ فيه ناس أذكياء يعرفون من أين تؤكل الكَتف وَ حنان النجاده للأن ما أنتبهت لنقاط قَوتها وَ شلون توصل للعالمية ..
لكن تَستحق , ما أحس من العادل إني أقَيمها .. الموضوع مسالة ذوق
تصدقي انا ماعندي كريم اساس . مخالفه القاعده وغير كذا ممكن بطول عمري كله ماحطيت ميك اب كامل الا ممكن 4او 5مرات ..اهتم بالبشره واحب احط روج هادي . بس ك رغبه ما احط ع طبيعتي ممكن تستغربي بس لو اقولكك السبب ممكن تستغربي ما احب اظهر شي فيه فرح خصوصا قدام امي عشان هي مريضه احب اطلع بهندام جميل وبس ما اتكلف بشغلات كثير الحمدلله جميله وليس غرورآ بس والله ارتوس يحز بخاطري اتزين وامي مريضه ماودي يجي بخاطرها اي شي ورغم مو كذا نظرتها وتحبن تشوفني باحسن وافضل شي بس انا كذا من جواتي . واهم شي عندي بالمكياج البساطه والشي الخفيف بالمكياج وشغل قوس قزح ابدا كرهي له . عشان كذا لاتستغربي ماعندي اساس هههههههههههههههخ بس باجيب اساس دمتي بوديا قمر
مو بالضَرورة أهم شيء إنتِ مرتاحه ..
وَ بالعكس اللي تَسوينه شيء كَثير حَلو وَ الله يوفقك ببرها وَ يشفيها وَ يخليها لك
كبرتي بَعيني , مَرات إهتمامنا بَمشاعر أحبابنا أهم من الأمور الماديه وَ السطحيه
نَورتي
الله يعطيك حتى يرضيك ، معطائه ماتبخلين بمعلومه او فايده للناس
ليتك تكتبين اكثر عن ماركات الدرق ستور لان مو كل الناس تقدر تشتري الغالي
واهم شي سويلنا درس عن طريقة تصويرك ولمساتك بالصور ❤️❤️❤️
ماراح أطرح أي شيء يَتعلق بالتَصوير لأن ماشاء الله خبيرات التصوير ما يَقصرون بأي مَكان مو هذا مَجالي
أكثر من كذآ راح أتشتت , نَورتيني
مساء النور أرتوس
انا بشرتي دهنية مافيها حبوب او بثور ولو طلعت يومين وتختفي لكن ذابحتني المسام وبعض آثار الحبوب :/
ايش الشيء اللي ممكن يخفي هالاثار والمسام بعد 🙁
ابغى بالاسم لاهنتِ 3>
كل هالشغلات بَوصفة طبيه يعني الأسم اللي بَقوله غير مُهم , حتى لو سَويتيه أثاره الجانبيه راح تَحوشك وَ أنتِ بكيفك
ديفرين جل أو ريتن أ وَ كلهم بَوصفه طبيه , بدون وصفه طبيه لا تستخدمينه
خلاص اوك انا بعد كنت مشتته شوي … بس بروق واكتب كل شيء مو مفهوم بالنسبه لي وممكن يكون كثير غيري مو فاهمه بس راح اطول الى ما ارسله لك يعني يومين هيك شي عشان اختصر كثير واكون ملمه بكل شي بالنسبه لي …بجد انا صريحه ولو ماكنت صريحه كثير من الحقائق مارح اوصلها بفضل الصراحه…بالنسبه للمقوله اللي قلتيها اقولك غلطان اللي قالها مادامه ماعرفك انتي كثيرك المشبع المجوع<<<<<هذي المقوله من راسي ….
هههههههههههههههههههه ..
آوكيه بإنتظارك وَ يسلم لَي قَلبك
يا جمالك ارتوس ❤️ احب اسلوبك بالريفيو تغطينه من كل النواحي عشان نقدر نحدد اذا يناسبنا او لا ، تشكرين ع هالشي حبيبتي.
الحلو ان بشرتي مثلك دهنية ف المنتجات اللي تتكلمين عنها احطها ببالي ع أساس بيوم اجربها لأني مو راعيه طلعات ف المكياج عندي جداً بسيط كل ماجيت اشتري اتحسف تنتهي مدته ما خلص منه ربع.
ودي تتكلمين عن الانتفاخات والخطوط تحت العين كيف اخفف منها واعالجها / مرة تكلمتي عن كونسيلر من ميكب فور ايفر ومعه حاجه مثل الباودر قلتي مناسب للانتفخات (علبه صغيرة فيها دائرتين هههههه) المهم اني دورته مالقيته 🙁
ايه واحب اقرا التعليقات
نَورتيني يآ هلآ بَك ..
بس ما أظن تكلمت عن كونسيلر ميك أب فوريفر ؟! متأكدة إنتِ ..
شكله كونسيلر بوبي بَراون , أدخلي موقع بوبي براون على قائمة الكونسيلر يَمكن هو اللي تَقصدينه
النفخه وَ الخطوط ما تَزيل بَماكياج , المكياج الذكي راح يَخففها وَ يوحي أنها مُش موجوده بس كمبتدئه صَعبه عليك
اتفق معك من الناحية الماك أب الطبيعي انا من الناس الي يموتون في اللوك الطبيعي
و البسيط و ما أحب أحط غير هذا اللوك بس احيانا المناسبة تحدك
كثير مرات لما أكون في مناسبة او طلعة الي حولي يسألون ليش ما تحطين ماك أب ما أني حاطة و يبدون يتفلسفون علي ليش ما تحطي روج غامقة ليش ما تزيدين البلشر…. و هلم جر
و ما اخلص منهم و المشكلة أقول أني أحب الماك أب كذا تطلع لي وحدة تقول لي بس إنتي تبينين منتي حاطة ماك أب
اي نسيت أقول تراني متبعتك يمكن من نهاية ٢٠١٣و يا حب لك ياخي يعطيك العافية وش ها المدونة الطيبة ماشاء الله
هههههههه حَبيبتي إنتِ ..
لي الشرف بتواجدك بالمُدونه ..
المَكياج الطبيعي مُمكن يكون أطناااااان لكن الشطارة وَ الذكاء تظهره بمظهر خفيف
يعني مكياج الأتراك تراه أطنان بَس شطار يستخدمون المَواد الصَح وَ التكنيك الصَح ..
وَ للأسف قَوليلهم هذا أسلوبي وَ شخصيتي تَحب الخفايف , إذا فيه شيء بتكنيكي للمَكياج غلط مُمكن أصلحه
لكن ألواني هذي ذوقي الشَخصي وَ أنا أحبه وَ لا أرتاح إلا به , ما أتوقع بعدها راح يَناقشونك ..
عيب مفروض يحترمون ذوقك بدون فرض الرأي وَ زي ما قلت لك إذا فيه شيء ينبهونك له للتصحيح حياهم وَ إذا كانوا أهلاً لهالتَصحيح
أما بكل طلعه وَ جيه إزعاج , أعتبره أختراق للخصوصية
ان شاء الله برسلك يافرحتي
ارتوس انا دايم اسوي سنفره قبل المناسبه ٢٤ ساعه منتبه لكل خطوه ومتابعه كل خطوات ونفذت كل ماسكاتك يعني ماشيه ١٠٠ ميه آمس جلست ادور بالنت عن وحده تشبه لون بشرتي ماقدرت اطلع اللون انا متوسطه البياض احس وجهي على بيج وجسمي لونه على آصفر بس افتح من وجهي بكثير فادايم لمى احط يدي على وجهي احس بالفرق وحتى لمى اكون اشتري ماكياج يجربون يدي اقلهم لا يدي افتح بكثير بجرب على وجهي
وحده من خواتي تقلي خذي افتتح منك
اتمنى انك تفيدينا مثل ماقلتي بالتفاصيل الصغير والسحنه وكيف نختار الدرجه افتح او اغمق من البشره وعن المشاكل المتعلقه بالفاونديشن تكفين ارتوس متحمسه لها خليها عنوان تدوينتك الجاهزه
الله يسعدك ياارب
لو أخذتي أفتح مَنك راح تصيرين زَرقاء ..
وَ حرام هالتباين بلون بشرتك , هو الوجه غالباً يصير أحمر وَ بشرة الجسم أقل حَمار من الوجه إلا منطقة الصدر وَ الأطراف .. إلخ
صَراحة جالسه أفكر وَش نسيتي بالضبط عَشان هالشيء يَحصل مَعك لكن الله أعلم
صار خاطري أجي عَندك وَ أشوف شنو المشكله
رسلت لك دايركت
الكونتورنق
لا لو اخذت افتح اصير على رمادي شهباء مع التأكسد
طيب شفتي الدرجات اللي حطيتهن
انا عجزت وجربت جربت بس ماش واحس الدرجات عندنا ناقصه فنفسي اشوف الاساس خاررج المملكه واخذ اللي يناسبني
غريبه بشرتي حسيت ارتوس يعني انه مو صحيح تكون بشره جيدي افتح من وجهي
نفسي احل هالمشكله والقى شيء يناسبني
لا تتوقعين خارج المملكه الدرجات كلها مَوجوده بالعكس السعودية كل الألوان بَها تصدقين
وَ الوجه مفروض يكون أسمر بتكه من الجسم وَ لكن اللي عندهم العكس غالباً يهتمون بوجههم بزياده
بيكونون راعيين كريمات بالوجه , أو يهتمون بوجههم وَ ناسيين الجسم .. الوجه أغمق لأنه أكثر أحمرار
وَ أكثر حساسيه وَ معرض للشمس ..
وش رايك تاخذين أساس جاي على قَولد ؟!.. البيسه تبعه قولد يمكن ما يتأثر مَعك ..
كمان ارتوس بسئلك هاللحين جربت حركه انه تحطي منديل ابيض جنب بشرتك حسيته بيج طيب عروقي اخضر والذهب يلائمني وش اخذ اساس
قريت كذا بلوقر اني اخذ بيج وبعضهم قال لا على زهر او خوخي
وشو الصح
تعبتك معاي مررررة ، كل الشكر والتقدير لك
اخذ ولا يهمك
بس رشحي لي ماركه واروح
متحمسه اجرب دولشي وجيرلان
وش تنصحيني
مقدر أرشح ماركة مُعينه , أنا جالسه أتخيل لون بشرتك وسبب التأكسد ..
إذا رايحه السوق جربي هالأساس من كرستيان ديور : Diorskin Nude Skin-Glowing Makeup
أنا طبعاً معرف لون بشرتك لو أني وَش صعب أجيبها تَحديداً بس جربي هالثلاث ألوان وَ يارب واحد فيهم يَصيب مَعك
مو بالضروره يطلع هو الأساس الصح لكن ممكن نفس الدرجه تطلبينها من الماركة اللي نفسك بهآ ..
الدرجه الأولى : Peach 023
الدرجة الثانيه : Beige 030 هذا أحسه مُناسب
الدرجة الثالثه : Apricot Beige 033
ترى مُجرد توقع على وَصفك لنفسك , يمكن أنتِ وصفتي نفسك غلط أو تقييمك للألوان مُختلف عن تقييمي للون
أتمنى أكون أفدتك وَ ترى كلامي مُجرد توقع ليس مؤكد
يعطيك العافيه ارتوس عالتدوينة الاكثر من رائعة
انا معك ماحبيت طريقة المكياج اللي فيه مبالغه
ارتوس انا عندي هالاساس بس الدرجة اللي عندي صفرين 00 غريبة مالقيتها عندك بالصورة اللي نزلتيها
لونه حلو وحسيته انسب اساس استخدمته بس لاحظت بعد ماااحطه يبين الخطوط حول الفم .. مادري انا حطيته خطأ ولا ماناسبني
ارتوس الدرجه اللي قلتي تناسبني هي اللي اخذتها اخر شيء درجه ٣٠
المشكله اللي واجهتني لمى حطيته بالصبح حسيتها مع الشمس تغير ولمى احطه بالليل مرة تمام مايتزحزح ولاشيء بس لمى حطيته بالليل كنت بمنطقه بارده
فااتوقع عشان الشمس والحراره وهو الافضل والانسب بس بجرب peach شفت التستر ومتفائله فيه
سؤالي الاخير الباود. يكون افتح ولا اغمق انا اخذت نفس باودر الاساس والدرجه اللي تتماشى معه
هالشيء صح او غلط
وشكرا لك الله يسعدك زي مااسعدتيني ورسلت لك دايركت انتظر ردك
رائعه ، وعلى فكره ما اقدر أفكر في كلمه ثانيه غير رائعه احسها توصفك وتوصف تدويناتك خصوصا الريفيوز يجي شي تفصيلي ووافي يبرد القلب 🙂
انا اول مرا اجرب جيرلان قبل كم شهر وفعلا زي ما كتبتي رغم اني جربت أساس (بلان دو بيرل ) ودونت عنه بس وين تدوينتي ووين تدوينتك هههههه
ماشاء الله عليك لا قوة الا بالله
وانا من الناس الي أحب الكونتور بس اللي الحين صاير ويغير الملامح ذا انا اسميه الوجه الثاني مو كونتور حسبي الله عليهم
وأي بعد كنت بعلق على الحركات اللامنطقية في التصوير بس تذكرت ان الضرب في الميت حرام 😡
حمستيني أروح أشوف تَدوينتك , بلان دو بيرل من الأساسات الفاخرة
بس ترطيبهآ زَياده لو كان يلائمني كان جَربتهآ ..
وَ صدقتي الضرب بالمَيت حرام , جبتيهآ بالصَميم ..
عطاري الكونتور الكونتور حَلو لكن المُبالغه به هي اللي تَخليك تبطلين أو تَنصدمين ..
أي شيء بالحياه يَزيد عن حده يَخليك تكرهينه نورتيني وَ لي زَياره لك
ارتوس ودي اعرف رأيك عن مكياج خبير التجميل سامر كوزامي و لو أُتيحت لك الفرصة تروحي وحدة من دوراته راح تروحي ؟؟ ❤️
سامر خزامي مُبدع وَ فنان .. يَعني مو أنا إللي بَقيمه
لكن مو ستايلي لذلك ماراح أحضر دوراته بَس لو بتجيني مَجاناً زَيادة العَلم عَلمين لووووول
أنا استخدم اساس غيرﻻن الذهب من 2010 اول ما تزوجت وعاجبني ولا عمري غيرته رقم 02
بس قبل كنت استخدم اساس سانت لوران اللي فيه فرشه بنفسه يجي سايل مره حلو طبيعي وتخطيته خفيفه
أهم شيء مَرتاحه مَعه مو ضروري التَغيير
نورتيني وَ شكراً عالإضافة
انا جربت هالسنه جيرلان لانجري ريحته حلووه وتغطيته حلوه مع اني احط نتفه
كل ماجيت اشري من جيرلان ع طول تجي فبالي ارتوس لانكك تفضلينها دايماا واول منتج جربته من مدحك لهم وبعدها ادمنت
لانجري جداً ناعم وَ مُنتج مُميز , أجدتي الإختيار ..
وَ حبيت إني بالبال , الله يَسعد قلبك ..
واقي الشمس والمواد اللي فيها واقي شمس كثرتها تضر البشرة الدكتور العيسى نصحني وقال فيها مواد تضر البشرة وقالي ان كل شخص له فترة تحمل للشمس وتحمر البشرة بعدها فيه ناس خمس دقائق وناس عشر الشمس اللي تخلي بشرتك تحمر وانتي تحتها تحتاجين واقي ام المرور السريع مايضر ومايحتاج واقي تبدأ تحترق البشرة اذا بدت تحمر ياليت تتكلمي عن هالموضوع لان ناس كثير ماتعرفها وشكرا لجهودك
العَفو , بس أستغربت حديثك عن المَوضوع بموضوع أساس جيرلان ؟!
ما حسيت فيه ترابط .. الموضوع أكبر بكثير من الكلام اللي قاله الدكتوره شرحه لك بشكل مبسط
واقي الشمس ثقيل عالبشره يسد المسام لذلك بحال إستخدامه يتم تنظيفه بطريقه مُعينه
فيه ناس أشغالهم تَحتم عليهم وضع واقي شَمسي , أما اللي يشتغلون تحت التكييف وَ بالمَكاتب أكيد وضعهم مُختلف ..
وَ الشمس ضررها أكثر من فائدتها للأسف تشيخ البشرة , بكلا الأحوال شاكرة لك إهتمامك بَخواتك وَ حرصك
الله يوفقك
تدوينه جميله؛
ورائعه>>
وخطيره<<
تفصيل ممل لكل "خطوه"
//اتحمس لكل تدوينه
(أثق بكل كلمه). شكرا لك
ترى اللي فوق حطيت كل شي تعلمته من البرمجه بشوف ليش ينقص الكلام
كنت شاكه بالفاصله المنقوطه وغيرها بس ماطلع هو
ماش بجرب شي ثاني
انا مع البنت اللي طلبت تتكلمي عن موضوع الاندر وير ، فعلا احس الموضوع مهم و لما شفت ردك حقدت للامانة على اصحاب العقول الضيقة ، اللي غالباً يقرون الموضوع و يستفيدون و لكن غرورهم او جهلهم – ما ادري ايش اسميه – يمنعهم من الاعتراف و يخليهم ينتقدون بشكل غير مبرر ابدا، اسسفة وش ينتقدون – النقد – احسها كلمة مؤدبة مقابل اسلوبهم الـ …
يمكن حبهم للظهور بـ صورة الملاك ! اللي يقيم الناس و ينتظر جمهور يصفق له لانه شخص واعي و حريص ع الامة و هم يبغالهم تصفيق ع قلة عقلهم و دخولهم بـ نوايا الخلق اجل دعارة ههههههههههه .. عموما بـ اضل ع امل تلاقي سبيل تفتحي هالموضوع بطريقة ما ترضي الكل مع اني ما تعودت انك من النوع اللي يلتفت لهم ، اخيرا شكرا كبيرة و قبلات من هنا لبيتكم .
ياريت لو تتكلمين عن الاندرتون كثير تكلمو فيه
لكن منك بيكون غير ❤️
ما ادري وش اقول او كيف اشكرك !
جد شكرا شكرا على كل شي تكلمتي عنه سواء فالمدونه او الانستقرام ، استفدت منك كثير
وبدون مبالغة اغلب الاشياء اللي تكتبين عنها اروح اجربها حتى الاشياء الغريبه زي بلسم بعد الحلاقه حق نيفيا هههه . اثق فيك وفي كلامك بشكل ماتتصورينه.
كنت اعاني من الفاونديشن وكل مره اجرب شي ويفشل بس جيرلان مو مو طبيعي مرره ناااسبني .
الله يسعدك يارب ويحققلك اللي تتمنين
يعطيك العافيه