صَباح / مساء الخَير

البلاشرات المائيه مِن أنواع البَلاشرز إللي تعتبر الأقدم ، نَقدر نَقول الشكل البدائي للماكياج عِباره عَن صبغه تنحط للخدود وَ الشفايف
طبعاً الأشهر على الإطلاق هو تنت بنفيت الغني عن التعريف

أول بَلاشر إستخدمته وَ أنا صغيره بالمراهقه مَن نفس النوعيه كان من ذَا بودي شوب
عِباره عن رُول مائي شبيه ببنفت بس لونه ضارب على فُوشيا أكثر ما أعتقد موجود للحين
كنت أستخدمه بدون ماكياج ..

بنفس الوقت كان موجود منتج بنفت لذلك ما تحمست أشتريه تقريباً نفس تأثيره على حسب تجربتي بالمحل وقتها ، للأمانه مافكرت أقتني تنت بنفيت لسبب إن فرشته ماحسيتها عَمليه وَ لازم فَرك بالأصبع أو إسفنجه أو برش خارجي

قبل سنه تقريباً من الآن كنت حابه أجرب مُنتجات تليق لبنات المدارس أو لَماكياج بالبيت وَ جذبتني عبوة بسام فتوح حسيتها أفضل من بنفيت من ناحية التصميم وَ سهولته بالمد كما يبدوا لأن عليه إسفنجه قابله للإزاله

هذا شكل العبوه من الخارج 
Bassam Fattouh Blush Tint


بلاستيكيه تستخدم بالضغط ( عصار )
مِن الداخل إللي جَذبني إن الراس يَفتر لأجل تفتحينه وَ تغلقينه ، عشان ماينشف أو يسيح لأن العلبه توضع بشكل رأسي
الشي الثاني إن الأسفنجه ممكن تزيلينها وَ تنظفينها وَ ترجعينا

وَصف المُنتج ،’
نجي لقوام المُنتج عباره عن جل غَير دبق ، إحساسه بارد وَ رطب وَ منعش عالبشره ، بنفس الوقت غير دهني لكن يعطي نعومه للبشره وَ رطوبه ، لون طبيعي جداً يبين كنك وَحده مسخنه ، وَ لونه شير يعني شفاف ، مايخوف مو يبقع بالوجه
وَ تحوسين بلونه لأ خفيف وَ يتمازج كأنه بشرتك ، ثباته يدوم لفتره طويله حتى بعد الغسل راح تظل بقايا في حال أُستخدم بدون ماكياج .

طَريقة المد ~
عاد هنا تجي العقده راح أذكرها مع العيوب بس مفترض إنك تضغطين العلبه ( تعصرينها) وَ تحطين نقطه عالخد وَ تدمجين بالإسفنجه ، وتقدرين تصلحين هالحركه بدون ماكياج أو مع الماكياج ، أيضاً تقدرين تستخدمين فوقه بَلاشر عادي عشان يزيد الثبات

العيوب ،’
جينا لبيت القصيد هنا ، جد من أكثر العلب اللي تعبتني في الإستخدام
أول مره ماحسيت بهالشي ، لكن حسيت إن المنتج صعب ينزل مع الأسفنجه ، غير إنك ماتقدرين الكميه إللي نزلت ، بالإضافه إلى إن قوام البلاشر جِل يعني سميك وَ ياخذ وقت على ماتمتصه الأسفنجه
أحياناً يحوس معك وَ لا ينزل ، وَ إن نزل اثناء المد تحسين إنك تبقعين وجهك يعني مدري شلون أشرحها ما يمتد بسلاسه

المنتج ممكن يحوس الأسفنجه وَ تحسين الإسفنجه تدبق وَ تتلبد على طول وَ تمنع نزول المنتج ، يبيلها غسل دائم

إللي صلحته : إني أحياناً أشيل الإسفنجه وَ أطبقه مرات بفرشه وَ مرات بأصبعي وَ هالشي ماحبذه لان الاصبع يتوسخ وَ ماينزل منه اللون ..

غير إني آبي شي عملي وَ سريع يومي ، صعب إني أغسل الإسفنجه يومياً ، وَ على فكره اللي لاحظته إن اللون آقوى وَ أكثر ثبات مع مده بالاسفنجه أكثر من الإصبع ، فممكن مده بإسفنجه خارجيه بس ليه هالطريقه وَ دام العبوه مصممه إنك تستخدمين المُنتج بكل سلاسه

تَقييمي له ،’
خلاصة الموضوع تقييمي له كلون وَ قوام وَ ثبات جيد وَ حلو للبنات إللي يبون يستخدمون شي طبيعي خاصه بدون ماكياج طبيعي وَ لونه خفيف وَ حطوا خطين على خفيف، بس يعطي سحنه ورديه تتناسب مع لون كل بشره

على فكره كل البلاشرات المائيه من عيوبها تبين عيوب البشره يعني لو فيك حبه بتبين أغمق مما هي لو بشرتك منقطه بتوحي إن النقط أغمق وَ أكثر وممكن تبين المسام ، لذلك أنصح البنات اللي بشرتهم فيها شوائب يبعدون عن هَالنوعيه من البلاشرز سواء من بنفيت أو غير ماركات

بالنسب للعبوه تقييمي لها سيء مثل ماقلت شكلها يوحي إنها عملي لكن ياالعيب مني أو من عدم تناغم قوام البلاشر مع تصميم العلبه ، لذلك مده غير سلس بالنسبالي وَ أشوف إني ماستفدت من تصميم العلبه لأن هو السبب الأول اللي خلاني أشتريه ، مابي استخدم فرشه أو اصبعي وَ اعتقد المراهقات مزاجهم مو رايق إنهم يستخدمون عده كثيره وَ يبون شي سهل الاستخدام وَ مايحوس معهم

بسام فتوح وعدني بأنستقرامي يعلمني الطَريقه الصَحيحه لأستخدامه ، وقتها بكتشف هل أنا خرقاء أو المنتج فيه عيب ، عموماً ماراح آشتريه من جديد

هالمُنتجات غالباً تستخدم للشفاه و الخَدود , مع تحذير عدم وَضعهآ على العينين ..
لكن أنا ما أستخدمته عالشفآه لأن برضو عندي مُنتج مُشابه له من بسام فتوح خاصه بالشفآه وَ لونه تَوتي آقوى من هذآ

مُلآحظه ~
إللي تَفكيرهم مَحدود وَ قآلوا إن بسام فتوح دَفع لي إعلآن
ههههههههههههههه دآ يُوم المُنى لو أتعامل معه , فهو أستاذي وَ إطراء الجَيد وَ المُمتاز من مُنتجاته لا يُعد عَبء بالنسبه لي أو تَقليل من مَصادقيتي , لكن آنا أرتوس ألتزم بَعهد المَصداقيه إللي من بدأت أكتب أول حرف بَالعالم الألكتروني للآن وَ أنا أنهجه ..

وَ النقد البناء مَثل إللي أنتقدته حالياً ما أعَتقد يعيب على أحد قَطعياً إنمآ يَطور من الإصدارات القآدمه
يعني منب مَثل بعض الناس إللي تعليقاتهم .. وووع خايس بدون تبرير مَنطقي

وَ سلآمتكم

دُمتم بَحب

 مُلاحظة / هذه التَدوينه تَم نشرهآ سابقاً بتاريخ 07-09-2014