صَباح / مساء العُيون المَزغلله

صَراحه أمَس ما كَنت أدري عَن وَش بكتب ، فكنت أدَور تدوينة قصيرة ما تآخذ كثير من وَقتي
الصَدمة طلعت هالتَدوينة أطول بَكثير مما تَوقعت ، لَو إني مَنزلة مَوضوع ثاني أبرك لي .. عيوني زَغللت
[ زغللت وَ ليس شيء آخر لوووووووول أعرفكم تَحبون المُشاكسه وَ بتحذفون لي حَرف اللام ]

مِن فَترة كُل ماحاولت أرتب أغراضي وَ غرفتي ، أفَشل في إيجاد تَرتيب مُناسب !!!!
[ خاصة التسريحة وَ الماكياج ]

أرتبها وَ ترجع تنحاس بغمضة عين ، مجرد مأطلع وَ أنا مستعجلة التسريحة يصيبها تسُونامي
جَربت الفواصل وَ التقسيمات لكن مافي أمل ، وَ بيني وَ بينكم أحس شَكلها شيب يشوه التسريحة في حال واحد حطها فوقها ، يا دوب أتقبلها داخل الأدراج وَ مع ذلك طريقة توزيعها مُو ملائم لأغلب العبوات ..

لما ماكياجي كان بشَنطة ماكياج مٌستقلة كَنت مرتاحة أكثر ، لكن الشَنطة صارت ما تُستوعب كم الماكياج إللي عندي
وَ إن جيتوا للحق العَيب مُو من الترتيب أشوف العيب الأكبر إن الماكياج صاير أكثر من حاجتنا ..

كَوني أدون بَشكل دَوري صايرة الغُرفة كارثية جزء مُنتجات ما جربتها ..
وَ جزد مُنتجات أستخدمها وَ تحت الإختبار ..

وَ الجزء إللي أشوفه كارثي بالنسبه لي هٌو المُنَتجات إللي خَلصتها وَ محتفظه بعلبها فَاضية بس عشان أتذكر أكتب عنها وَ أصورها، تاخذ حَيز كبير و بحكم إني مُسّوفة وَ كل يوم أقول: بُكره بَصورها وَ بنزل تَدوينة عنها ..

وَ إكتشفت إن هُالمنَتجات عبت كَرتون كامل لدرجة من كثر ما أنساها أنسى إنطباعي عنها وَ غالباً بالأساس تكون منتجات ماعجبتني أو ماتستاهل تدوينة مستقلة .
فبما إن طبعي يغلب عليه التسويف ، حلو كل موسم أو بين الفترة وَ الثانية نقلب غرفتنا رأس على عقب ، الشغلات إللي مانبيها نصرفها لناس مُمكن يحتاجونها ، وَ إللي إنتهت مُدته نرمية وَ الأهم وَ الأصعب إنا ما نشتري شيء إلا وحنا محتاجينه فعلاً

قاعدة الـ ٨ أشهر ~
صار عندي قانون أي شي يَعدي عليه ٨ أشهر وَ ما إستخدمته أصرفه لإني بعد هالفترة ماراح أستخدمه ، عاد تَعرفون الإنسان طبعه تملكي وَ يرتبط عاطفياً بأغراضة
لذلك حتى لو حاطة إحتمال بَقلبي إني مُمكن أستخدمه مَرة وحدة بس أشد على قلبي وَ أصرفه لأنه بالأساس إكتشف إن إحساسي كاذب وَ نابع من مبدأ حُب التملك

قَبل إسبوعين قشيت نُص المَاكياج وَ الشنط وَ الملابس وَ العبايات وَ الجزم وَ حتى الأجهزة وَ الصُحون وَ الشوكولاته وَ صرفتهم
إكتشتفت شَغلات عندي ناسية إنها عندي وَ ناسيه إني شاريتها بالأساس وَ لا إنلبست بالمرة مع إني سَنوياً أصفي أغراضي ، بس هالمرة إتبعت نهج الـ ٨ أشهر
لذلك توصلت لقناعة إن ماعُمر غُرفتي بتترتب إذا عندي مُنتجات فائضة عن الحاجة [ وش رايكم بس بهالقناعة لووووول ]
وَ اللي توصلت لترتيب أفضل رُغم كَثرة أغراضها تعلمني مع إني بستمر بنهج الـ ٨ أشهر

للمَعلومية حَكمل السَنتين تقريباً وَ أنا أدور لي على غُرفة نُوم تَحقق أحلامي ..
وَ غرفة مَلابس تَلبي مَطلبي ، وَ توصلت لفكرة مَبدئية يارب يارب لو طَلعت زي أحلامي بشارككم فَيها
وَ لو تَورطت أنا وَ تصميمي الفاشل بَستر على نَفسي وَ لن يَتم العَرض هههههههه بالرُغم للآن وَ لا شركة قبلت بلي بَراسي
بس إلا ما أحَصل شَخص جريء يَسويها لي ، بالرُغم كل مَن شاف تَصميمي قالي وَش ذا !! ما تَنفع بالسعودية .. بس بَخليها تَنفع
[ يَعني بَسوي لكم روووم تَور قريباً وَ أكيد بعرضه لمُتابعيني إللي دايم مَعي كَنهم خَواتي ]
وَ زي ما قَلت لو فَشل هوووووص لا مَن شاف وَ لا من درى ..

مِن نتائج التصفية إللي سَويتها هو مَوضوع اليوم جمعت لكم مُرطبات الشفايف إللي إستخدمتها خِلال هالسَتة أشهر ، أغلبها مخلصتها وَ ماكتبت عنها وَ حاطتها على جنب
وَ ركزوا مَعي يعني المُنتجات إللي شَريتتها هالمرة مُو الأفضل منها الزين وَ الشين مُجرد توفرت عندي هالفترة بحثاً عن الجديد أو السعر المعقول وَ خلصتها

كُل المُنتجات من الصيدلية ..

المُنتج المِثالي بالنسبه لي ~
• مُنتج تَرطيبه مُمتاز بالدَرجة الأولى
– كيف أحكم على ترطيبه ؟
لما أغسل شفايفي وَ أحس الجِلد المَيت ينزل بسهوله وَ البشرة تتجدد تلقائي أعرف إنه بيرفكت
• ما يكون عطري بشكل مزعج يحسسني إني ماكله عِطر كل ما شربت ماء
• ما يكون فيه لون عشان أستخدمه كل وقت سواء تحت الماكياج أو وَ أنا نايمه بحيث ما يبقع مَخدتي
• يكون سَهل الإستخدام وَ عملي في المد
• نسبة الحماية مِن الشمس ما تعنيني كثير بس لما كنت أطلع الشمس كانت شيء مُهم بالنسبه لي

الريفو بيكون سَريع ما راح أذكر تَفاصيل كثيرة بركز على إللي حَبيت ترطيبه أكثر شيء وَ راح أذكر العيوب بالنسبة لكل مُنتج
بيتم ذكر المُنتجات إبتدأً من اليَمين إلى اليَسار
…