صَباح / مَساء الجَمال
صَراحة كثير ما أحتار أثناء كَتابة تدوينة جَمالية , خاصة بَمفردات الكَلمات
مَثل لما كَتبت عَنوان هالتَدوينة وَ هو مايتعلق بَكلمة [ الإستشوار ] الكلمة غَلط
لان الكلمة الأساسية ما فيها حرف ت وَ لا تُعرف بالـ إ , وَ بنفس الوقت لو كتبتها بغير طريقة رُبما كثير يَجدها خاطئة
وَ لا تُفهم
فَمن باب العَلم بالشيء الإستشوار ما يَنقاله إستشوار , ينقاله سشوار
وَ الكلمة بالأصل كلمة فرنسية تُكتب : séchoir وَ تنطق سيشواغ وَهي أختصار لكلمة أطَول وَ أكثر تعقيداً
لكن العادة جرت عَندنا نقول / استشوار حتى تُكتب الأسعار بصالونات التجميل بهالصَيغة الإستشوار بهالقَيمة الفلانية
خَلونآ بالمُهم وَ هو مُنتجنآ لهاليَوم
Tresemme
Thermal Creations Heat Tamer Spray
السعر : رخيص أتوقع مايتجآوز 30 ريال سَعودي
أماكن التَوفر~
قيل لي أصبح متوفر بصيدليات الرياض
أنا كان تَقدمه لي من مَتجر فيونكة ستور
حسابهم عالآنستغرام / vyuncastore
حاولت أأخر التدوينه قَدر المُستطاع عشان أختبر المنتج بالشكل الكافي ، بس إكتشفت اني مهما إختبرته ماراح أوفيه حقه بالنقد ، لأن نادراً ما أستشور شعري ، غير إنه عندي سيروم خاص بالفير وَ ثاني بالإستشوار
إللي راح يحكم على هالمنتج بموضوعيه وَ دقه يبيله على الأقل 3 أشهر من الإستخدام المُتواصل
لذلك أقولكم من الحين رأيي ما راح يكون دَقيق
أكيد الأغلب صار يعرف إنه لازم يستخدم مُستحضر لحماية الشعر من الحراره ، شخصياً متعوده على منتجات لوريال بروفيشينال وَ مُنتجات شوارتزكوف مرتاحه عليها , لكن لاضير من تجربة كل ماهو جديد خاصه لو كان مصلح ضجه
مَزايا المُنتج ،’
المنتج أحلى مافيه إنه بخاخ وهالشي يخليه سَهل الإستخدام
ريحته حلوه مَثل الحلاوه
( أستغرب من إللي قال رَيحته شَينه ياليت يَركز بالإسم )
قوامه خفيف جداً يعني مايدبق وَ لا هو لزج
يتحمل حراره لـ 40 فهرنهايت
سعره معقول
المَيزه إللي أعجبتني فيه إنه مايدهن الشعر وَ لا يلبده وَ لا يدبقه يعني بإختصار كأن الشعره مافيها شيء لأن اغلب منتجات ما قبل الإستشوار تكون نوعاً ما مثل الجل أو دبقه
ماعندي إنطباع عنه ما أقول إنه واو أو مميز شي عادي وَ جيد
وَ أخيراً مسكة الإستشوار أهم من كَل مُستحضر راح تَشترينه ..
طريقة لف الشَعره أثناء الإستشوار هَي إللي تَحدد المظهر النهائي .. من أول لَمسه ..
اللي يبالغون بحرق شعرهم بالإستشوار , وَ تسطيره .. وَ آخرتهآ النتيجه شَعر مفطس مَدهن بَس أهم شيء عَندهآ يَكون نآعم
بليز إنتهى ذآ الزَمن ..
الشَعر حلاته يكون فريش وَ صحي وَ حيوي وَ مظهره غير دُهني وهذي هي المُعادله إللي خُبراء تَصفيف الشَعر يبحثون عَنهآ ..
دُمتم بَحب
مُلاحظة / هذه التَدوينه تَم نشرهآ سابقاً بتاريخ 24-07-2014
تدرين آرتوس غير كلامك المنطقي وتفصيلك ايش اكثر شي يعجبني باسلوب تدوينك؟ لما تفتتحين الكلام بشكل جميل تحكين عن معلومات عامة تخص مادة التدوينة ،، اتذكر من اول كانوا يقولون سشوار وللحين اقول كثير باسشور شعري يضحكون علي يقولون تستشورين قصدك ): ..
حَبيبتي وَ الله
صراحه فعلاً نحن بمُشكله أمام النطق الفرنسي وَ البريطاني وَ الأمريكي ..
وَ حالياً فيه كلمات غريبه مثل كلمة / أتشت يعني عصبت .. بسيف رقمك , يعني بحفظه من كلمة save
يعني كان الله بعون هاللغة شكثر تتحمل من هفواتنا
الله يوفقك ويسعدك يارب
باالنسبه لنقدك على النطق من الاساس ماله داعي الوحده تتكلم غير لغتها مايعجبوني الناس اللي يتكلمو غير لغتهم وباالاخص مشاهير العرب لما يكون نص كلامهم الانجليزيه
انا مااخفيك اني نفسي تكون معي لغات العالم كله بس مو معناته اتكلم مع عربي مثلي باالانجليزيه او الفرنسيه لا مااستخدم لغتي الا بمحلها مثلاً بتعامل مع اشخاص غير عرب سواء باالسفر او باالتسوق
معقوله المشاهير لما يدخلو على كلامهم الانجليزيه يعتبرونه من التحضر
بس فيه كلمات نقولها لابد منها مثل سشوار لانه صعبه شوي اقول مصفف الشعر او مجفف الشعر
وَياك ..
البعض يتعمد إنه يصير غَربي وَ ترى الأجانب مايحترمونهم أبداً أبداً , لا تفكرين إن الغرب يحبونهم بالعكس منبوذين صاروا من الطرفين
وَ كثير لما أكتشفوا هالشيء رجعوا للغة العربيه ..
فيه شغله تعجبني بالألمان وَ اليابانيين , لو وَش مايتكلمون إلا لغتهم .. حنا الشيء الردي إنه ننزل لمستوى البائعين وَ نتكلم إنجليزي
هم اللي من المُفترض يتكلمون لغتنا وَ يتكلمون بالعربي مو العَكس ..
وَ إللي يزعلني أكثر إن البلوقرز الغرب مَليانين وَ بكثرة , ما أعتقد يعني لو تكلمت إنجليزي راح أضيف شيء لعالمهم
مَن جد محتاجين عرب يفيدونا وَ يطورنا ما ٩٠٪ من محتوى اليوتيوب مُش عربي .. يعني شَوية تقدير لهويتنا
أما أنا مَضطره أوضح بكل مَكان بكذا لغه , لأن لا تنسين المُتربصين بي كُثر وَ اللي يدورون الزلات أكثر
فبالمَره أكتبها مَعلومه وَ ثقافه وَ بالمره أسلم
تدرين ياقلبي بس لو من العرب كلهم مايدخل اليوتيوب الا انتي صدقيني تكفين وتوفين
انا انسانه اعتبر نفسي دقيقه بزياده لحد المرض مثلاً قبل اشتري اي شي ابحث عنه كثييييير واتعب مره وفي الاخير مااشتري شي لاني اتوه
مو دايماً مااوصل لنتيجه بس في الغالب اعتبره هذا غلط ولازم اغيره
الزبده من المقدمه هذي انتي الوحيده اللي لو نصحتينا بشي بشتريه او بسويه وانا مغمضه عيوني لانه فعلا عندي ثقه فيك عمياء
تَصدقين حلو طبعك , صَح متعب بس ما أشوف فيه خطأ ..
مافيها شيء حتى لو عقب الدكتور تأكدت زياده بحال شكيت بأمر ما , صح الدكتور ماهو ملاك ..
وَ ممكن يكون وصفه للشيء صَح , لكن مُمكن يكون أغفل نقطه ضيق وقت الكشفيه أو أنا سهيت أقول له هالتفصيل
أو هو سهى يقولي هالتفصيل , مره دكتور وصف لي فيتامين د وَ أستغربت من طريقة الشرب اللي وصفها لي
مُختلفه إختلاف تام عن المكتوب بإرشادات الدواء , الزبده ما أخذته وَ رجعت له اليوم الثاني وَ قلت له يا دكتور كذا وَ كذا
هههههه زَعل مني , قالي خلاص أنا قلت لك الطريقه الصح المعتمده , قلت له ماعليه بس أنا قريت الروشيته وَ الروشيته مختلفه فشكيت
فقلت أرجع أتحقق منك أفضل .. خاصه إنه ما عدى سوى ٢٤ ساعه على يوم وصفته لي وَ بيتي قريب منكم
يزعلون الدكاتره يحسون إنك تشككين بهم , بالرغم مفروض يقولون للمريض برافو على حرصك هههههههه خاصه أنه ما ألفت من راسي
إنما رَجعت أسأله ..
وَ أخيراً شاكره لك ثقتك فيني , أتمنى أكون عند حَسن الظن
مرحبا توسة معلش أنا أول مرة أتواصل معك بس من زمان بتابعك وبثق فيك وبكل شي بتحكيه لأني بحسك قريبة وأفكارك نفس أفكاري المهم في الموضوع واللي خللني أعلق كلمة إستشوار هاي الكلمة أول مرة بسمعها هون وحتى الفلبينيات والدكاترة اللي مش عرب صايرين يحكوها إحنا في بلاد الشام عامة بنحكيها سشوار فاستغربت لما جيت هون إنه من وين جاي ابكلمة بس هاد كان تعليقي والأهم انه بدي أشكرك كتيييير على إخلاصك وصدقك في الكتابة مع اني كتييير أحيانا ما بستفيد من مواضيع البشرة لأنه بشرتي مش دهنية بس الشعر لأعندي مهم وياريت تجاوبيني أنا عندي مسكلة بشعري ما بعرف أصففه أو بالأحرى بحتار بتصفيفه هو أطرافه ناوية أقصها والقصير مش حلو علي جربته كان خميل بس خف كتيير وما بحسه قاعد يرجع أبدا والمشكلة التانية عندي كتيير شعر قصير خصوصا من فوق ولما أسشور شعري بحسهم بطيروا أو بنفشوا وحتى الكيرلي بحسه ما بزبط بسببهم إذا عندك حل لهيك مشكلة طبعا أنا بالأغلب م أغطي شعري من قدام بطوق أو بكل أو أي شي يمسك الشعر القصير أفيديني حبيبتي وشكرا إلك على كل الجهد وموفقة دايما
عاد انا من اللي يقولون استشور ما كنت اعرف ان الاسم الصحيح سشوار
البخاخ اشتريته من اسبوع وببدأ اجربه وريحته جميله.
يعطيك العافية ارتوس.
تسلمين ارتوس يابنت الاراتيس على هالتعب وتم الشراء الحمدلله وجاري التطبيق على شعري وشعر بنوتتي….على فكره انا اشتريته من أمازون ولقيته بالرياض بالدانوب بس حق أمازون صناعه أمريكية وحق الدانوب صناعه مختلفه ما اتذكرها الحين
سوي ريفيو عن طريقة السشوار الصحيحة
انا بس حابه اعرف كيف استشور شعري؟
بحثت كثير باليوتيوب بس مالقيت شي مناسب
مرره ودي اتعلم كيف – وشكرًا جزيلا ?