مَساء / صباح الياسمين
مِثل ما وعدتكم إني راح أتكلم عن العطور ، وَ لا يصح الحَديث عن العُطور قبل الحَديث عن النَظافة الشخصية
فَتلافياً للملل راح أنزل الموضوع أجزاء صَغيرة إبتداءً مِن النظافة الشخصية وَ من ثم بتكلم عَن العطور
عاد اليوم ضحكت تو وصلني مَقطع بالواتس آب عَن طقاقة بأحد الزواجات تعلنها صريحة بالمكرفون وَ تقول نداء خاص لأهل العروسه
إللي ريحتهن أباط لا يجلسن عِندنا على المَنصه وَ لا شلنا قشنا وَ طلعنا
[ جابت العِيد وَ الله ] ..
– عاد وش رايكم بتصرف الطقاقة !!
المُهم حتى لايقع أحد بإحراج أو أذية هالموضوع خَفيف وَ بسيط راح يوضح لكم إستخدامات مزيل العرق وَ أيضاً راح يعلمكم الفروقات بينهم
بما إنه كَثر اللغط عَن المُزيلات إللي تسبب سرطان وَ هالأمور ، وَ أيضاً ريفيو بسيط عَن أخر مُزيل عرق جربته وَ حبيته
أماكن إستخدام مزيل رائحة العرق ~
البعض يعتقد أن مزيل العرق خاص بالإبط فَقط بس في الحقيقة له عدة إستخدامات منها :
• البنات إللي يعرقون مِن تحت الصدر ، مُمكن تستخدمونه أسفل وَ بين الصدر لأن هالمنطقة خاصه في البنات إللي عندهم زيادة بالوزن تطلع ريحه مزعجة
• أيضاً يستخدم بين الفخذين للناس إللي عندهم ريحة بهالمنطقه مَع الحرص بتجنب المنطقة الحساسه أو إستخدام مُنتجات ملائمه لهالمنطقة ، وَ يستخدم نوعيات دهنية بالذات مو فقط لإزالة الريحة فقط إنما لمنع الإحتكاك وَ تشويك الشعر لما يبدأ يطلع
• يستخدم للأقدام للي يعانون مِن رائحة القدم الكريهة وَ تركزون حول الآصابع وَ تأكدوا إنه نشف قبل لاتلبسون الجزم ، أيضاً يُستخدم حول الكعب النوعيات الدهنية لمنع إحتكاك الشوز بالكعب
• أيضاً يستخدم لبخ الشوزات مِن الداخل لتحسين رائحتها
• يستخدم لراحة اليد للناس إللي عندهم زيادة تعرق بهالمنطقة ( غالباً يُستخدم مانع التعرق لهالنطقة وَ يتم مده قبل النوم )
• وَ المستغرب أيضاً أنه يستخدم للجبهة وَ منابت الشعر وَ أعلى الرقبة للناس إللي يعانون مِن التعرق بهالمنطقه خاصة الناس إللي يعتلون المسارح
( دايم نشوف بالمسرحيات أو بالشو كثير ناس يعرقون من جباههم ، بس يختار له نوعيات خاصه ماتفسد المَاكياج وَ مضادة للتعرق)
• أيضاً يُستخدم في مناطق الثنيات مِثل خلف الركبه للناس إللي يعرقون مِن هالمنطقة مثل سآئقي الدراجات
• يستخدم أعلى الأنف عشان نمنع النظارة الشمسية مِن الإنزلاق
ملاحظة ،’
جميع هالإستخدامات ما تتلائم مَع مُزيل عرق واحد مو كل مزيل عرق يناسب كل بقعه بالجسم ، يعني إنتبهي تستخدمين مُنتج فيه كحول بمنطقة حساسه أو بالوجه إنما ذكرتها من باب العلم بالشيء
طيب السوق مليان بأنواع كثيرة مِن مزيلات العرق وَش الفرق بينهم !! وَ وش أختار !!
– ما هو الفرق بين مضادات التعرق وَ مزيلات الروائح ؟
مضاد التعرق وَ يطلق عليه Antiperspirant ~
– يستهدف الرطوبة وَ يمنع تبقع الملابس بالعرق
– يحتوي على الألمونيوم اللذي يمنع العرق أو الزركونيوم
– يوجد تحذيرات صحية ( سرطان الثدي ، الزهايمر ، القصور الكلوي )
– يتفاعل مَع العرق وَ قد يترك بقع صفراء على الملابس البيضاء
– تستخدم قبل الخلود للنوم على بشرة نظيفة
– مفعولها قد يستمر لثلاثة أيام
– تلائم الأشخاص الذين يميلون للتعرق المُفرط
– تصنف مِن العقاقير
مزيل رائحة العرق وَ يطلق عليه Deodorant ~
– يستهدف الرائحة
– يحتوي على التريكلوسان الذي يقلل نشاط البكتريا يحتوي على مكونات حمضية أو ملحية ( قلوية) لتحييد
– لايوجد تحذيرات صحية
– تستخدم بعد الإستحمام
– قد تحتوي على العطور أو الكحول
– تصنف من مواد التجميل
عاليمين ديدورانت ( مزيل رائحة العرق ) من يورياج وَ عاليسار انتي برسبيرانت ( مُضاد تعرق ) مِن كلارنس
أستخدم الديدورانت للدوام ، وَ مزيل التَعرق بالمُناسبات وَ الأعراس أو لو عندي مشاوير طَويلة ( مِن باب الحيطه )
بالأعراس غالباً الملابس ما تكون قطنية فإمتصاصها للعرق ضَعيف ، وَ فيه حركة وَ تشرب كافيين كثير وَ ماتضمنين الجَو
مُزيلات العَرق إللي تجي على شَكل سبراي هي الأكثر شعبية كونها ،’
– تعطيك إحساس فوري بالانتعاش
– تعطي إحساس بالبرودة وَ النظافة
– تنشف بسرعه
– ماتترك أثر أبيض على الملابس وَ لا إحساس لزج
– غالباً تعطيك إنتعاش عطري
منتجنا اليوم إللي يميزه عَن غيره كونه أولاً وَ أخيراً خالي مِن الكحول إللي موجود بأغلب البَخاخات التجميلية
Uriage Fresh Deodorant
وَصف المنتج ~
– من إسمه فرش يعطيك إحساس بالإنتعاش وَ يكافح الإحساس بالرطوبة
– يحتوي على المعادن الطبيعية الحرارية
– يزيل الروائح الكريهة
– يحد من التعرق دون إعاقة العملية الطبيعية للتعرق
– خالي من الألمونيوم كلوروهيدريت
– يناسب البشرة الحساسة ( هيبوالرجينيك )
– لايسبب إسوداد للمنطقة
– يدوم لمدة ٢٤ ساعة
– حجمة سهل التخزين وَ التنقل
المكونات الفاعلة ،’
– حجر الشب يعمل كمزيل للعرق وَ مضاد للبكتيريا ، أيضاً يعمل كقابض للحد من التعرق
– زيت اللوز الحلو
خالي من :
– الألمونيوم كلوروهيدريت ( إللي يُشاع أنه أحد مُسببات سرطان الصدر وَ الزهايمر ، وَ مازال موضع جدل )
– الباربين
– الكحول
( يُحذر مِن تعريضة للحرارة العالية أو النار أو تحت أشعة الشمس المباشرة لايبخ على الوجه وَ العيون )
الطريقة الصحيحة لإستخدام مزيل العرق السبراي ( البخاخ ) ~
البنات اللي يعانون من حساسية الصدر وَ الجيوب الأنفيه أنصحهم يتجنبوب البخاخات لأنها تثير الحساسية
ـ خذي شاور كامل للجسم وَ ركزي على تنظيف مناطق العرق بحيث مايكون فيها ريحه
ـ نشفي المنطقه بالمنشفه وَ تأكدي إنها ناشفة تماماً ( لايستخدم مُزيل العرق البخاخ على إبط رطب )
ـ دائماً ينصح بعدم إستخدام أي عطر أو بخاخ داخل الأماكن الضيقه مِثل: الحمامات فيفضل إستخدام مُزيل العرق بعد مانخرج من الحمام عشان نضمن الجسم يكون جف
وَ أيضاً نضمن إنا مانستنشق أغلب المُستحضر وَ نكون بمنطقة أكثر إتساع وَ يفضل أن تكون المنطقة مفتوحه ( يعني فيها تهوية )
ـ نرج العبوة لمدة عشر ثواني ثم نبخ بمسافة ١٦ سم من بخة لبختين
ـ ملاحظة لازم تاخذين وقتك بالبخة وَ تغطين كل منطقة الإحتكاك أسفل الذراع وَ الإبط يعني البخه ماتكون سريعة وَ مُركزة لا تضغطين لفترة طويله نسبياً
ـ في حال حسيتي المنطقة ماتغطت زين ( خاصة للناس اللي مايحلقون شعرهم دورياً ) مُمكن الإستعانه بفرك المنطقه باليد لضمان تغلغل المُنتج بين الشعيرات
[ أدري بتقولون لي ووووع خليهم يشيلونه ، طيب فيه ناس شعرهم يَطول بأسبوع .. وَ لا تقيسون عالبَنات فيهم رَجال بَعد ]
ـ نصيحه أثناء البخ لاتفتحين فمك ( إقفليه ) وَ لا تستشقين لاتسوون مِثل الدعايات
ـ تأكدي أن المنتج نشف مِن ثم البسي ملابسك
وَ أخيراً ،’
كَونك تعانين مِن رائحة عرق هذه ليس مُصيبة وَ لا عيب فيك ، العيب هُو تجاهل الرائحة ..
أنا قابلت بنات كثير بحياتي لهم رائحة عرق ، وَ مرات أشوف نفور الناس مِن مُجرد دخلتها بينهم لَكن أستحي أقولها هالشيء
كلنا نَعرف إن الإشارة إلى عيوب الناس جارح ، خاصة فيه بنات أنيقات وَ فنانات لكن غير مُدركين لهالشيء ..
وَ ترى عادي إستخدام مُزيل العرق مايعني إنك مروحه ..
مع فترات العَمل الطويلة ، لما تروحين النادي ، عندك مُحاضرة ، أو إلقاء خطبة مَع التوتر بكثير أوقات ما بنقول تطلع ريحتك مُمكن ريحتك تتغير ، قبل الدَورة كذلك مَع التغيرات الهرمونية
وَ بليز هالمَوضوع لا تَهدونه لأحد يعاني مِن رائحة العرق ، لأن مَره كتبت مَوضوع وَ وقلت أهدوه لأي وَحده تعاني من رائحة الفَم
طلعوا لي إللي أهديتوهم وَ يسبوني كأني شَميت فمهم أو أعرفهم ( شوفوه وَ خلوه بيني وَ بينكم .. الناس ما عاد تتحَمل كلمة مِن أحد حتى لو هالشَخص مجهول )
كُل الحُب
تم
ومساء الفل
تدوينه بطله بطله
اما الطقاقه جرئيه لو تكلمت بدون ماتحدد احد لا اهل عريس ولا عروس كان خففت الاحراج والانظار عن اهل العروس
وبيني بينك ماالومها
استفدت كثير من الموضوع
الحمدلله صح يجسمي يطلع ريحه باوقات محدده خصوصا ايام الدوره ومع اكل محدد لكن احاول اكون حريصه قد مااقدر واذا فيه مناسبه اهتم باكلي تفاديا للاحراج
فيه ناس اذا فيه اجتماع احاول مااروح الوضع صعب بالمره ماادري هو مرض او خوف من استخدام المزيلات او بخل او شي ماااعرفه الله اعلم ?
ودي ينتبهون لكن كلامك باخر التدوينه اتحاشى اتكلم لو بالالغاز
فيه ناس اعرفهم يعانون من ريحه الاقدام باحكي لهم لاني شفتهم قد مايقدرون يعالجون المشكله
ع العموم تدوينه مفيده وباانتظار التدوينات الحايه
دمتي بحب
تمم
انا بعد ابغى اصير مخلصة زيكم
ماشاء الله دايم انتم اول من يعلق على تدوينات سوس
تم
تم .. وسلمت الأنامل ?
جربت كم بخاخ ديودرنت وسبب لي حساسية للأسف ..
حلو اعطيتينا اقتراح .. بإذن الله اجربه .. شكرا ?
أنا قبل م كنت استخدم مزيلات العرق كنت اكتفي بمزيلات الريحة بس .. لكن ف الفترة الأخيرة صرت استخدمها خصوصا ف المناسبات م استغني عنها .. بس أول مرة أعرف إنه لها استخدامات هالكثر .. متحمسة لمزيل يورياج ? يعطيك ألف عافية وتسلم إيدينك يارب ??
جزاك الله خير على هالموضوع سبحان الله فيه ناس اخر همها تفكر باباطها و إلا جتك فكر باباطها كثير لدرجه توسوس ان الديودرنت يجيبلها سرطان بابطها طيب انا يا اختي الكريمه عادي يجيني سرطان بخشمي مثلا ارحمونا وتسلم يدينك على هالموضوع ودي احطه على برج المملكه عشان الكل يقراه
يازينك سوس الله لايحرمنا منك
احجز مكاني … جاري قراءة التدوينه ♡♡
ماكانت اعرف الفرق بينهم والله
ومره استخدمت البخاخ وماعجبني ابد
الكفر حبيته اكثر
لاكن بجرب هالمنتج لأنو انا احب اميل
للمنتجات الخاليه من الكحول وبجرب الاستخدام
الصحيح له
وتسلمين اني عرفت الفرق بينهم سوس ?
فاجئتني اخر نقطة من ورا الشاشة لا يعرفونك ولا تعرفينهم بدال ما يشكرونك ويبادلون الاحسان بالاحسان يكون هذا الرد !
عالعموم شكرا لك على الشرح الوافي والمعلومات المفيدة ان شاء الله بيكون لي تجربة معه قريبا ?? دمتي بخير
مرره حبيت التدوينه و ان شاء الله واح اشتريه لان مواصفاته بطله بالنسبه لي
الحمد لله رائحة العرق ما اعاني منها الا نادر
شكراً سوس
??
هههههههههههههههههههههههههه ما الومها الطقاقه عاد اكثر شيء يصك في الراس ويعمي ريحه العرق ?
وفعلاً انا من الناس اللي اذا انحرجت او توترت على طول اعرق حتى لو كان الجو بارد
??
تم
ياعمري والله الموضوع يجنن يجنن اتعععب
مافي اكثر من كذا توضيح حرام تقولين عنه
جزء صغير
الموضوع يستاهل النشر سواء اعرف انها تعاني
من الروائح او لا
الاهم الفائدة العامه تنتشر
المزيل ماجربته انا استخدم فيتشي
لكن اول ماينتهي هذا وجهتي القادمه ?
شكراً من هنا لعندك
مساء الخير
تصرف الطقاقه محرج يعني لو خلتها عامه بدون تحديد أحسن مسكينة العروسه حسيت انها أنحرجت ومالها دخل
أحرص كثير لما أطلع أو تكون فيه مناسبه على هذي النقطة حتى لو تسبحت وتنظفت الجو عندنا حار ومثل ما قلتي الانسان ممكن ماينتبه لريحته فالاحتياط أولى ، ما يسوى ألبس واتعدل وشي بسيط يخرب كل شي .
على أخر نقطة أنتِ ايش ذنبك ما تعرفينهم ولا يعرفونك ممكن البنات احرجوهم خصوصا اذا ما كانت فيه ميانه بس بالأخير أنتِ ما قلتي ارسلوه لفلانه وفلانه.
تدوينه خفيفه جميلة
.
كل الحب والتقدير لك ولتعبك ??
ما حبيت حركة الطقاقة ?
ما تطلع مني ريحة عرق واحياناً احس انها شي وراثي واحيانا احسها اهمال ، اللي يخليني اقول وراثي اني مو من الناس اللي ما يخلى بيتي من مزيل العرق يعني احياناً يمر يوم او يومين وانا ماحطيت ( لا تفكريني وسخة ، اتاكد كل كم ساعة ما اشم ريحة ? ريحة الشامبو بس) واحيانا اذا كان فيه عزيمة وكذا احطه احتياطاً لاني اذا انحرجت اتعرق والجمعات اتوقع فيها مواقف كذا فمن باب الحيطة واذا كان عندي مشوار طويل وكذا
وبالمقابل اشوف بنات ريحة شعورهم شامبو وباين اتروشوااليوم لكن فيهم ريحة عرق قوية ?
واتوقع الاكل له علاقة انا اذا اكلت اكل مبهر كثير او اندومي لازم احط مزيل احس اخاف لان كمان في الحامعة اشم بنات ريحتهم تشبه الاندومي ?? مدري اكلوه او حاجة تشبه ريحته
موضوع جميل ومتكامل كعادتك ?
دمتي بود
مسساء صباح الورد والفل والياسمين والريحه الطيبه
موضوعك مره مره جميل حبيته فعلا لامستي قلوبنا بهالتدوينه
ع قد ماهو حساس ومُحرج للشخص وبنفس الوقت مؤذي للغير والريحه
الكريهه تعتبر من اذيه اخيك المسلم ! يعني دينياً شئ مكروه صراحه مالوم الطقاقه انحطت بموقف صعب كيف تغني وتطق لهم وهي بهالحاله
والله ياسوس فيه وحده وصلت لمراحل عاليه من التعليم وماعليها قاصر بالفلوس ماشاءالله بس تتصورين ان الناس تنفر من ريحتها اذ اقبلت عليهم
ريحه اباط فضيعه فضيعه انكتم اذ هي موجوده وواكون مجهزه مناديل معطره ماتحمل يصدع راسي مع اني مرات تطرقت لموضوع الريحه وانا وياها بس جالسين وبطريقه غير مباشره اقول الريحه الشينع تنفر الناس لازم الواحده تستخدم مزيل عرق قالت مستحيل استخدمه يجني سرطان
انا هينا جتني صدمه مدري وش اقول ..
بالنسبه للمزيلات الرائحه والعرق زمان بشمواه ان ماخاب ظني قلتي باحد الردود ع البنات انو فيه مزيل عرق ومزيل رائحه يعني شي مو جديد علي بس الجديد االاستخدامات الاخرى لهاا شي غريب سبحلن الله العلم ومستحضرات التجميل بالتطور وبعض عقول الناس مازالت بالعصر الحجري ومعتقده اعتقاددد تام ان هالمزيل بيجيب سرطان !؟؟؟
بالنسبه للبخاخ عندي تحسسس منها زماان ماشريتهم
اخر مره ايام المراهقه وكان منتج من نيفيا نازل جديد وقتها
ان ماخانتني الذاكره .. حالياا استخدم الكوره بس يططول
عشان ينشف اتضايق من هالشي ومفكره اغيره ان شاءالله
بخصوص البنات الي هاجمو سبحان الله خيراً تعمل شراً تلقى !!
يعني بدل كلمه شكراً اهاوش الحين المٌنصح بهالزمن شخص عدائي !!
لكن كلمة شكرا ماتوفيك حقك ياجميله
الله يجزااك كل خير ويجمعك بالجنان البارده مع والدتك ومن تحبين
شكرا شكرا شكرا
مساء الخير توسه انا استخدم مزيل عرق من لوكستيان ايام شمواه تكلمتي عنه مرا مرتاحه عليه بالليمون ورول ..البخاخ حجربه لان بشرتي حساسه اتوقع بيناسبني ..والصراحه مالوم الطقاقه جد لهالدرجه فيه ناس تخاف من مرض او كسل مدري وش سبب عدم استخدامهم للمزيل ..اذكر مرا بمشغل وكوفير تستشور شعري تخيلي الوضع الريحه وانا جالسه منحرجه انا كيف اقوم والا اتكلم واحرجها بس صبرت لمن خلصت ..ومواضيعك مثل كذا بالعكس كثري منها واللي يزعل يزعل خلي بناتنا يتعلمون ويتنظفون بالذات بنات المتوسط فيه امهات جاهلات ماتوعي بنتها ولا تفهمها والام مثقفه وراعيه شهادات وعلم شي يقهر ليه االاهمال …ماقصرتي توسه ربي يوفقك ويسدد خطاك
موضوع جدا مفيد
الرائحة فعلا مشكلة وجربت أنواع كثيرة لأني أحاول أتفادى الاسمرار لذلك تتراكم عندي المزيلات من كثر ما أغيرها
حبيت الرفيو وإن شاء الله أقدر أجرب النوع اللي ذكرتيه
دمتي يا سوس دائما بود
حبيت الموضوع جدًا لكن يا ليت تتكلمين عن مزيل الرائحة للي بين الفخذين توني اسمع عنه !
و هل ممكن يسمر المنطقة و الا لا ؟
موضوع جميل الله يعطيك العافيه ارتوس ???
مساء الروائح الجميلة ..
بصراحة مازلت استخدم فيتشي مرة حبيته بس يبغالي أغير وأجرب السبراي .. وصفك لحاله منعش هههه بقلك سررر انا وحده بخاف من السبراي …
بالنسبة للطقاقه تصرفها مزعج وخربت الحفل وعلى قولتك شكله مقصود كلامها هههه أجل أهل العريس والمعازيم طالعين منها
صح المفروض ليلة حماس و زيطة وزنبليطة الواحد يهتم ويستخدم مضادات تعرق بس برضو مايحوج تقولها بالمايك
سوري لو حفلتي مابعطيها فلوسها ههههه
وحشتني المدونه ?
مواضيعك مره مره حلوه و مفيده بششككل و كمان غير عن الناس
يعطيك العافيه مدوننتتتكك تفووززز
موضوع يفرفش?? .. والله ان مقطع الطقاقه يذكرني بمواقف تصيرلي في الاعراس خصوصا لما أقوم اسلم وقت البنات يرقصون ما أحكيلك على الريحه اللي تغم النفس وتظل عالقه بخشومي ? .. الشي اللي يحيرني دااايما شلون ما يشمون في ريحتهم اشوفه قلة نظافة شخصيه …!
اما بالنسبه للديدورانت كنت استخدمهم وبكثره لكن لي سنه بطلت استخدمهم واستخدم بس الشب اللي يجي باودر .. لكن هذا اللي من يورياج نفس واحد كنت استخدمه من sanex .. المشكله منتجات يورياج في ليبيا قلييييله جدا ومو موفرين كل منتجاتها حمستني العلبه اني اجرررب …
وياريت يا سوس تذكريلنا افضل الأنواع استخداما من ناحية السلامة الصحيه وكمان تجربتك لبرسبيرانت??
وتاااانكيو على كل المواضيع الحماسيه أغيب أغيب وارجع اقرى فرط مره ?
موضوع جداً مفيد. .انا ماكنت اعرف مضادات العرق، وكنت دايم استخدم مزيل رائحه عرق
بكل مكان بالدوام أو جمعه أو مناسبة وكنت جد اتضايق اذا نزل عرق عالملابس مع ان مافيه ريحه بس يحرجني شكله وكل مره اقول لازم ابحث عن حل واكيد فيه شي مايخليه ينزل لفتره وانسى واتكيسل ،لين مره رحت لمناسبة كان فيها كثار ناس ماامون عليهم وكنت مو مرتاحه وينص المناسبة انتبهت اختي إن فستاني مقلوب ?هو سادة ولبسته وانا مستعجلة لإني متأخرة،فاماانتبهت ورحت عدلته وبانت الفضايح?جد جد مره تفشلت وبس جالسه عاجنب وانتظر بس متى امشي، ويوم جيت البيت بحثت وعرفت عن مضاد التعرق ومن هنا تعرفت عليه>حسيته انسان ههههه ، بس جد جداً مهمات لازم كل أحد يكونون عنده
مساءك حب وورد ياوردة??
بالنسبه للي صلحته الطقاقه ماعليش مررره جارح وقوي يعني مو شرط انه من اهل العروس عشانهم جلسوا على الكوشه فقط يمكن يكون صادر من البنات اللي كانوا يرقصون وجلست الرائحه وراهم ودبسوها في اهل العروس …. ?
الشي الثاني مزيلات التعرق ومزيلات رائحة العرق البخاخ مااحب استخدمها عشان عندي حساسيه بصدري وثاني شي مره شفت في برنامج ذا دكتورز الامريكي ان فيه حالات وفاه باالاختناق كان سببها ماده موجوده في بخاخات ازالة التعرق ورائحته وعشان فيه ناس كثير تركز على المنتج وماتعرف كيف تستخدمه فيجيبون “” العيد ?..
انا عني جلست فتره على مزيل رائحة التعرق من بيزلين بالورد ومرتاحه عليه فجاءه غيروا شكل المزيل واشتريته نفس ماهو بس اللهم الشكل تغير ومجرد مااستخدمته جاتني حكه لاني جسمي اصلا حساس فتركته طوالي مو شرط اني استخدمته سنوات انه مايتغير فيه شي واثق فيه فرجعت استخدمت مزيل طبي للبشره الحساسه من فيتشي ونفس الشي جاتني حكه بعد ثاني استخدام والحين على مزيل طبي كمان للبشره الحساسه من نوكس والحمدلله مرتاحه عليه وبقوووه ..
وقبل كل شي وقبل استخدام المزيلات وغيره لازم من النظافه وازالة الشعر الزائد واذا فيه مشاكل صحيه تنحل لان المزيل مو كل شي بس مكمل لسلسة النظافه ..
هذا اللي عندي ياروحي وتسلمين على هالمواضيع اللي تحسين برائحة النظافه فيها وانتي بس تقرينها ????
أحبك
?
السلام عليكم.. يا مساء الفل ارتوسه.
مواضيعك كالعادة قيمة ومفيدة وأحسن شيء الموضوع حق الحصة الغذائية ?
إن شاء الله لي رجعة له اقراه بتركيز..
بس قبل فترة في وحدة من مواضيعك اتكلمتي عن العسل الحضرمي.
اعرف تاجر عسل حضرمي [ من وادي دوعن أشهر منطقة يمنية للعسل]
عنده عسل سدر درجة أولى ومضمون 100% حكيت له عن انك تحبين عسلنا وطلب اتواصل معاك، قال لو حابة يرسل لك ربع كيلو كعينة اذا حبيتيه وحابة تاخذين أكثر أو تعلنين للمتابعين ( وبكل أمانة اذا عجبك، أما إذا لا براحتك)
بكل صراحة مافي أحد ذاقه إلا وأثنى على طعمه.
بس لان بصراحة التاجر لا يزال مو مشهور فقلتله إنك شخص مضمون وإذا عجبك ما بيصير إلا كل خير
[ اذا موافقة عندك ايميلي أو الأفضل رقمي راح اعطيك اياه واتواصل بخصوص التوصيل]
سوري ع اختيار المكان الغلط عشان اعطيك اقتراحي بس لأن الانستقرام خانتني سرعته ههههه
وبس شكراً
حبيت الموضوع .. خفيف ولطيف كلطافة صاحبته
.
بخصوص الطقاقة .. هههههه رحمتها الصراحة، ما رامت تتحمّل و رمست ف أكيد الريحة كانت مُميته!
المهم .. حابة أفيد بشي أنا أستخدمه وتجربتي فيه ممتازة..
الأول اسمه: Driclor solution
يُستخدم كنوع من العلاج الخارجي لهالمُشكله، يعني بعد فترة من استخدامه راح يُلاحظ إن نسبة التعرّق قلّت، بالتالي تقللين من استخدامه. سعره بحدود ال٩٠ درهم.
أنا وخواتي وكم وحدة من العيلة نستخدمه والحمدلله أمورنا طيبة، وفعلاٍ النتيجة ملوحظة.
الثاني اسمه: Certain DRI Anti-perspirant
وصلني من أمريكا.. بعد يعتبر مُمتاز ونتايجة مُرضيه جداً. مفعوله يستمر لأيام.
الثالث اسمه: Absolute Dry extra effective antiperspirant
ما جربته شخصياً ، لكن سمعت عن فعاليته من كذا شخص أثق في آرائهم من هالناحية، ويوم سرت الصيدلة سألت الصيدلانية عنه ومدحته لي.
.
طبعاً كل شخص لازم يراعي النقاط اللي ذكرتيها..ويشوف اللّي يناسبه.
ارتوستنا شريت من الصيدليه فيبكس ماكس ديو كريم مره في الأسبوع مكتوب انه يساعد على التخلص من مسببات رائحة العرق وخالي من الكحول رائحته لا بأس بها جلست أيام مع الإستحمام الدوري حلو لكن هل هو صحي ، عندك خبره في هذا النوع من من مزيلات العرق ؟!
ويا قلبي كنتي بتخلين خانة التعليق بعد الموضوع ياليت تسوين هالشي لأنه أسهل طبعا بعد ما تفضين وتكونين رايقه راح اكون لك شاكره ويمكن كثير مثلي يبون كذا ؛ قد قلتي بغير يمكن أنشغلتي ما أقول الا الله يحقق اي شي ببالك ويسعدك سعاده وطمأنينه وراحه طول عمرك ويخلي لك احبابك ويجمعك بهم في الفردوس مع النبيين والصديقين والشهداء ?
نهاية أنا أموت عليك?تشووووك تشوووك سيفيورم جنم بنم ?
شريت يورياج ديودرنت أنا كان عندي قبل كريم لنفس البراند رائحته مو مزعجه وفعال ماشا الله شريت سبراي والنوع الثاني اللي يجي كريمي مع كره دواره
تدوينة حلوه ..استخدم حاليا من فيتشي بس الحين عرفت انو مضاد للتعرق مو للريحة وممكن هالشي يسبب مشاكل وبعيد الشر ..
ويعطيك العافيه
مامره دققت بالنوع اللي اشتريه غالبا يحكم عملية الشراء مزاجي وقتها والريحة اللي مياله لها اكثر ?
بس المصادفه لسى اليوم شريت من دوف ستيك مكتوب عليه انتيبيرسبرينت و بنفس الوقت ديودرنت ؟! اخذته لاني جربت الرول نفس الريحه وحبيتها
” بالخيار اعرفك تحبين المنتجات بروايح الخيار لوول ”
اما ريحه الفم مصيبة عظيمه غالبا الشخص مايحس فيها ابد
واللي حوله ماقولون له عشان لا يحرج ، بالاول كنت اعتقد الريحة ماتبان الا من قريب بس مؤخرا اضطريت اتعامل مع زباين كثير في محيط عملي وجهه لوجه ولاحظت حتى من بعيد تبان وبقوووه وصرت اخاف يكون عندي ريحه بدون ما احس !!
تسلمي على الموضوع الخفيف ?
عمرها مواضيعك ما كانت مملة بالعكس اتمنى لو كانت اطول..
النظافة الشخصية مهمممممة و الله يا سوس ناس يتعظرون ع وصاخة وريحة و تعالي شمي امتزاج الروائح
غالباًاستخدم ديودرنت مش مضاد للتعرق لكن بشهر جولاي و اوقست و سبتمبر افضل مضاد التعرق؛ بخصوص التعرق بين الصدر انا اعاني من هالمشكلة لكن ايش الديودرنت المخصص لها ايش اسمه يعني اذا ما عليك كلافة و أنا بحاول ابحث عنه بطريقتي
ممتنة لك ع هالموضوع عطيتيني خيار ديودرنت
الله يعطيج العافية ، شكراً ?
صباحك / مساءك ورد وروائح جميله
بصراحه بوقت طرحك للموضوع حبيت اقرأ التدوينه
لكن قفلت الإيباد وقلت بالليل أحسن عشان اقرأ بكل أريحية (بحكم كثره انشغالي خلال النهار )
ومااعرف كيف صراحه فاتني ..الحين رجعت اتصفح المدونة وقرأت التدوينه
استفدت وأكثر شيء تعلمت مصطلحات الانجلش لمزيل رائحته العرق ومضاد التعرق
تسلم يدك ارتوس فعلا تعطين بإخلاص وحب
شكرًا شكرًا من الأعماق
قد يمون الرد على تدوينتك متاخر لكن ماحبيت اقرأ وأستفيد واقفل الموضوع
تقديرا لجهدك .فعلا تستحقين الشكر??
طيب والناس اللي لهم فترة يستخدمون مضاد تعرق ودوبهم انتبهوا؟؟؟
المشكلة إني مو غافلة عن أشياء زي كذا وأعرف أقرأ انجليزي لكن ما انتبهت أقرأ أبدًا,نصحني فيه الصيدلي مرة وخلاص صرت أشتريه بدون لا أقرأ
اليوم فتحت علبة جديدة وأقرا مضاد للتعرق شكيت في نفسي وجرررري ع اللابتوب اقرأ تدينتك اتأكد,وطلع فعلًا مضاد مش مزيل…..
يلا كل دقة بتعليمة,ذحسن ندور لنا ديودرانت مناسب ,
وربي مايحرمنا منك أرتوس 3> 3> 3>
موضوع مفيد جدددًا شكرًا ♥️