Don’t Miss Out

لَنبقى على تَواصل .. إشَترك مَعنا

Artos chic

Beauty Is Nothing Without Brain

أفضل، أجمل، أغلى ، أخف وَ أذكى مجفف شعر بالعالم Dyson Supersonic! هل يستحق الشراء ؟

by 137 تعليق

رمضان مبارك
وَ كل عام وَ أنتم بَخير هُنا بالمُدونة .. وَ نعود بَحماس قَوي

أكيد كثير منكم سمع عن سشوار دايسون سوبرسونيك
Dyson Supersonic

تقريباً من سبع أشهر ( أعتقد بنوفمبر ٢٠١٧م ) شفته وَ أنا أتصفح … أول ماشفته قلت وااااااااو … آبيه الحين … حالاً بالاً ..
وَ للأمانه مِن جمال شكله حسيت إنه روعه وَ لازم أشتريه بالرغم إني مو بحاجته
لأن بالأساس نادراً أستخدم سشوار وَ ثانياً لأن عندي مُجففات شعر كثير بالبيت

وَطبعاً كعادتي درعمت قلت خل اقرأ مواصفاته سويت بحث طلع لي على طول بسيفورا قريت مُميزاته وَ كانت واو ، وَ ماأكذب عليكم قريته على عجل
وَ لا كملت وَ لا شفت تقييم المستخدمين اللهم شفت إن تقييم نجومه عالي لأن نية الشراء هي الطاغية

لكن أغراني بَعد شكله ، وَ وصف صوته لأن معضلة السشوار الأولى بالنسبة لي صوته
( جد صوته يسبب لي تلوث نفسي ، أنزعج بشكل كبير مِن الأصوات العاليه )

بالرغم إنه متوفر بسيفورا السعودية بذاك الوقت كنت اعرف إن سيفورا إللي عندنا مُتأخر وَ ماراح آلقى جَميع الألوان

فدقيت على جميلتي البيرسونال شوبر إللي ماستغنى عنها هاز
أنا : آلو هاز آبي هذا الشيء الجميل باللون الفوشيا
هاز : تم ، وش تبين بعد ؟
أنا : كل شي حلو وَ كشخه آبي ذاك الفير إللي شكله جميل
هاز : اوك بجيب لك أشياء إن شاء الله يعجبك وَ إن شاء الله ما سبق وَ شفتيها
أنا : OMG كلي حماس ( فيس يسعبل )

وَ ماهي إلا ايام وَ يوصلني ، بس شفت الكرتونه قلت : واو وش هَالجمال شكله شيء جميل ماكأنه اسشوار ! يشبه مُنتجات آبل

الشكل .. الملمس .. الوزن .. دقة الأزرار .. شكل التصميم
أتعب وَ أنا أقول واو … واو … واو أقل مايقال عنه مُجفف شعر ثوري
أول مافتحته شبكته ع الكهرباء إلا وَ أسمع صوته .. آبي اصيح مِن نعومة الصوت … وَ أخيراً تحقق حلمي وَ لقيت سشوار بدون صوت مزعج
إني لن أطيق صبراً لحين أول إستخدام

Stop ..

قبل لاتتحمسون وَ تشترونه إقروا للنهايه بس خل نمشي بشكل سريع على أهم مَزايا هالمُجفف الثوري الجميل وَ بعدها نستأنف الحديث عن تجربتي

ملحقاته وَ مميزاته ،’
السعر : ٣٩٩ دولار أو ١٤٩٦ ريال وَ ترى بالسعودية بَنقاط البيع أغلى إذا مو غلطانه يوصل لـ ١٦٠٠ ريال أو ١٧٠٠ ريال
الضمان : سنتين

طبعاً ماراح أنفخ راسكم بكلام الشركه إللي تقدرون تقرونه بأي مَكان مِثل مُحرك يتخطى بسرعة الصوت وَ بلا بلا تقدرون تدخلون ع الموقع الرسمي وَ تشوفون المزايا .
وَ على فكرة دايسون ماركه إشتهرت بتصنيع المكانس الكهربائية فيقولون أنهم نقلوا تجربة المُحركات الرقميه المُتبعه في المكانس للسشوار

باقي المُميزات بالصورة

الملحقات رأسين تجفيف + دفيوزر ( الملحقات مُمغنطه يعني سهله التركيب وَ الإزاله )


أيضاً سطح الجهاز ضد الحرارة يعني لو مسكتي هيكل الستشوار وَ ملحقاته وَ هو يشتغل ماراح يلسعك

الإنطباع الأول ~
جهزت العدة كعادتي بس هالمرة حسيت إني سابقة الزمن بـ ١٠ سنوات وَ كأني بفيلم خيال علمي
ماحست كثير بالمسكه وَ لا إستغربت الجهاز بالعكس حسيته سلس وَ أنيق جداً ..

وزنه خفيف وَ مريح جداً ، أزراره عَمليه لها ( صوت حاد أثناء التشغيل ) مُميز وَ غريب وَ هادئ مثل الصوت الرقمي ( ممكن يزعج البعض لكنه هادئ جداً )
عادتي إني أقسم شعري أقسام وَ أجفف كل قسم على حدى بالهواء لين ينشف ٨٠ ٪ منه
بعدين أمسك الشعر خصلة خصله وَ أستشورها بالفرشة بالستايل إللي أبيه ( إستخدامي للسشوار مو بالضروره للتمليس مرات أحب أسويه ويفي أو كيرلي بالسِشوار )
وَ مرات أستعين بالدفيوزر لتسريع تجفيف الشعر بتموجاته الطبيعيه

للأمانه ماحسيت إنه أختصر الوقت أو جفف شعري بنصف المدة مِثل مايدعون حسيته أخذ مني نفس الوقت المعتاد
( يمكن هالشيء راجع كوني أستخدم أجهزة مِن قبل سَريعة بالتَجفيف )

شعري أبداً ما أحترق وَ لا دخن وَ لا كان في الغرفة بخار السشوار ،وَ ريحة الشعر نفسه ماكأنه تعرض لحراره ( يعني من هالناحيه فعلاً آمن عـ الشعره )
شعري كان فيه لمعه وَ حيويه ( بس كستايل شكله كان عادي ماأعطاني الشَكل اللي ابيه ) يعني شكله شعر مستشور
( كأني مستشوره بالسشوار المنزلي إللي يجي بفرشه منه وَ فيه وَ هالنُوع مايعطي سَتايل  )
قلت يمكن ماتعودت عـ المسكه 

الإنطباع الثاني ~
كنت توني قاصة شعري كاريه ستريت إللي يجي مايل ، هالقصه بسيطة بس تتطلب الشعر يكون ستريت وَ أنا بالعادة ما أستخدم الستريتنر الا لو اللوك يستلزم بقوة أو أستخدم الستريتنر للف تعجبني لفَته ،وَ أفضل أخلي شعري ستريت بالسشوار ( لأن ضرر الستريتنر أقوى مِن السشوار )
لكن للأسف خيب ظني ،صح الشعر مُستشور وَ مرتب لكن مو ستايل وَ كأني وحده من التسعينات ، مُفترض يكون الشعر مافيه لفه أبداً أو إنحناء 

مَع العلم شعري كيرلي سَهل التصفيف يعني مو خشن ضربتين سشوار تعطيه اللوك يعني لو حابه يكون شعري مسترسل يصير بسهوله وَ لو حاباه كيرلي يصير بسهوله
صراحه توقعت العيب مني قلت يمكن يدي صارت ثقيله لأني ما أستشور كثير بالفترة الأخيرة غالباً أجعد شعري ، وَ قلت يمكن الجو كان رطوبه شوي ( كان بوقتها الجو شوي رطب )

قلت يابنت إدخلي وَ شوفي كلام الناس عنه ، الغريب قريت الكل يمدحه وَ لا أحد ذمه ، شفت ريفيوز الكل تطرق لشكله وَ تصميمهوَ أنه جفف بنصف المده وَ لا أحد تكلم عن الآداء ، حتى الرفيوز البنات اللي جربوه شعرهم طالع مُو ستايل شكل قَديم ،و لا وفوقه مسوين ستريتنر بعد السشوار
قلت آآآآآآها السالفه فيها ( إنَّ )

قلت الحين أنا لما دَرعمت ماقريت الجهاز كم واط ؟ قريت إنه بالأيونات وَ بلا بلا بلا … بس ماشيكت ع الواط
وَ دخلت سيفورا مالقيت الواط تعبت على بال مالقيته فإكتشفت بعدين إنه ١٦٠٠ واط وَ على فكره ماكان هالشيء واضح بصندوق الوصف مَع إنه مُفترض يكون أهم شيء
اليوم لما جيت أكتب الموضوع لقيتهم اضافوه أول شيء ( شكله جتهم شكاوي على هالموضوع )

تقييمي للسشوار ،’
– الشكل : ١٠ / ١٠ وَ لو فيه أكثر بعطيه
– الوزن : ١٠ / ١٠
– الصوت : ٨ / ١٠ طبعاً صوته هادي بس يضل فيه صوت مَع العلم بعض الشركات صنعت سشوار تدعي إنه بدون ضجيج يعني مو هو الوحيد
– المسكه : ٩ / ١٠ بالنسبه لي مريح جداً بس غير مألوف فمُمكن اللي متعود على الستايل التقليدي يتضايق لأن الفلتر جاي بمقبض اليد فمُمكن أحد يضغط عليه بالغلط وَ ممكن موضع المفاتيح يضايق البعض
– الأداء : ٢ / ١٠ مايرتقي يكون إستشوار بروفيشينال وَ ماينفع تسوين فيه ستايلات ( للتجفيف العادي )

التقييم العام ~
السشوار آمن لو وحده حابه تجفف شعرها بس بدون مايكون ستايل ينفع للإستخدام اليومي خاصه للي شعورهم هشه وَ مضطرين يومياً يستخدمونه
لكن لو حابه يكون شعرك ستايل صراحه أشوفه لعب عيال وَ لا يشبه سشوار الصالونات بأي شَكل من الأشكال

– هل يستحق السعر ؟
الجهاز واضح إنه بتقنية عاليه وَ تصميمه مُميز وَ مِثل ماذكرت الشركه إن أبحاث تطويره كلفتهم ٥٠ مليون باوند على مدار ٤ سنوات ، فأعتقد سعره عادل على التقنية إللي فيه وَ الماتيريال

– هل السعر يتوافق مع الآداء ؟
للأسف يستحق السعر لأن التقنيه إللي فيه عاليه وَ جهاز متعوب عليه لكن النتيجه مُمكن تحصلها بسشوار بربع السعر

– هل يستحق الإقتناء ؟
بنظري لا ،مُبالغ في تقييمه ( اوڤر ريتيد)
شكل جميل وَ النتيجه عادية لكن الحسنه إنه آمن فعلياً ع الشعر وَ سشوار جيد على إنه ١٦٠٠ واط لكن مو كافي
أعتقد أي بنت تحب تكون ستايل ماراح تفكر بشكل كبير بصحة شعرها كثر ماتبي سشوار يخدمها بأضرار نوعاً ما مقبوله

لكن ممكن لو تَم تطوير هالمجفف بقوة واط أعلى كأن يكون ١٨٠٠ قد يكون جبار وَ لا له مثيل ـ الله أعلم ـ لكن بالشكل الحالي
لايستحق الشراء كمجفف إحترافي ، عاد أنا مافهم بالتقنيه وَ أعتقد هالشيء صعب لأن وزنه راح يزيد

لكن راح أحتفظ فيه لجماله وَ أستخدمه كمُجفف عادي لتجفيف الشعر مع الدفيوزر

أعتقد أنا الوحيدة إللي في العالم اللي أعطيته هالتقييم وَ لا الكل يمدحه حتى اللي شعورهم خشنه حبوه
قد يكون السبب إن عندي مُجففات جيدة بالأساس وَ نوعاً ما إحترافيه لذلك مالقيت نتيجة جبارة
أو إني أطمح بزيادة للبيرفكشن
أو أن إللي أمدحوه تم غسل أدمغتهم إعلامياً

ما تَم الحُكم على السشوار بشكل عَشوائي وَ لا أنا حَديثة عهد بالسشوار أو غَشيمة هذي كل سشوارتي 
اللهم نَقصت واحد مِن بينهم وَ هو الأكثر حداثة لكن ماطرحته بينهم حتى أستوفي التَجربة

 

مُلاحظة : أثناء كَتابتي للمَوضوع طُرح نُوع أخر من هالسشوار لكن إصدار إحترافي ( تو دخلت مَوقعهم للتأكد من السعر )
لقيت أنهم طرحوا الإصدار الإحترافي لكن ما قريت أي مَعلومات عَنه ( أزود بـ ٥٠ دُولار تقريباً) وَ الله ماينلامون مُستحيل هير ستايلست راح يرضيه بدون تَحسينات

بالرُغم شفت مُصفف شَعر عربي ( كان يسوق للشَركة حاول يظهره بصورة الجَيد ) وَ مع ذلك ما قَدر
إستمر شَعر إللي مَعه بلوك قَديم وَ لا حتى قَدر يقول عنه روعه أو وااااو بس إستعرض جَماليته بدون أي كَلمه

دُمتم بَحب

شارك أصدقائك | Share this:

تعليقات

  1. تدوينة خفيفة، نستنى الوجبات الرئيسية..
    أهم شيء فرحت استشوارك الأحمر زي حقي حسيت بالانتماء??????

    في انتظار المزيد..
    كُل الود..??♥️

    رد

  2. بعيد عن الموضوع لاني بعدني ما قريته
    الا اني بعاتب شوي 🙁
    مشتاقين للتدوينات يا ارتوس لا تقطعينا
    التدوينات شرحها اوفى من الانستقرام و ابقى من السناب
    تدويناتج و مواضيعج بشكل عام من ايام شمواه لها نكهة
    وطعم خاص وذكريات مرتبطه فيها ، نتمنى انج ما تختفين مره ثانيه
    لج حبي ومبارك عليج ما تبقى من الشهر ?

    رد

    • صَح وَ الله كلامك سَليم بس لما كنت أكتب وَ أتعب وَ ينكسر ظَهري كانوا الناس يقولون
      حطيهآ عالأنستغرام أسهل وَ يووووه مَب فاضيين نَدخل مُدونات فلبيت لَهم
      ترى حتى الجَمهور كان يتذمر من الأنستا وَ يقولون قديمة نبي سَناب فنقلت كل شيء سَناب تلبية لرغباتهم
      لما صار الأن يفوتهم أقول بَقلبي كان إختياركم ..

      لكن مَقدرة كلامك وَ محط إهتمامي بَقولك أبشري ..
      وَ ينعاد عليك بصحة وَ سلامة يارب ..

      رد

      • اسعدني اهتمامج برأيي
        وبيني وبينج يا ارتوس بدون تقليل لجمهور الانستا
        محبينج الي صدق ذهب هم الي حبوج من ايام التدوينات
        والكلام الوافي والشامل ؛ السوشل ميديا الحين و اغلب اللي متابعينه ما ينفع معاهم الا اذا قلتي رايج بإختصار و من الاخر واو اشتروه نار عجيب حلو و نقل فعاليه المنتج من الموقع بالنص ، ما يهمهم شي ثاني غير انج وقعتي عليه ب نعم او لا.
        بخصوص التدوينه ما الومج شكله دلوعي ومغري
        يختي مبين عليه انه مب احترافي و مال كياته?
        انا نفسج وما الومج !
        اذا قررت اشتري شي اسوي ignore على
        التقييمات السلبيه واشوف الايجابيه بس ويزيد حماسي له
        والعيون تلمع و احلم فيه لين يوصل ‘)

        رد

        • وَ الله كلامك وَاقعي فعلاً وَ الله أشوفه إجحاف بحقهم .. لأن مو كل شيء يعتمد على نعم أو لا ..
          مثل هالسشوار ماتقدرين تقولين واااو وَ ماتقدرين تقولين مو واااو فماله إلا تدوينة كاملة تنصفه

          أسعدت فعلاً بوجودك

          رد

      • والله يا آرتوس إني من محبين مدونتك أكثر ، و سنابك بعد أحبه كثير ?
        شخصيا أحس التدوبن له طعمه حتى للمدون نفسه،لأن فيه اسهاب ..
        شخصيا لمن اقرأ ، غير الاستفادة من المعلومة أحسني أتعرف على جوانب جديدة فيك ،، مو شرط إني أتفق معاك في كل شيء ، إلا إني مع كل تدوينة ( قريت أغلب تدويناتك و ردود ومواضيع في شمواه ) أستلطفك و أحس بالألفة !

        الخلاصة من جدّ أضم صوتي لعهود ✋ ،، وأتمنى تضمين صوتك معنا ?

        رد

  4. و صدمني الموضوع ،، في السناب تقولين بتنزلين عن تنظيف البسرة
    رجعت حدثت مرة ثانية اتأكد إنك ما نزلتي غير هالتدوينك
    ،،
    ما تهمني السشوارات كثير لكن بارجع اقرأ الموضوع لأنه منك
    ثانكس أرتوسة
    و ننتظر منك موضوع البشرة ?

    رد

    • وش سالفتي كله أخطاء إملائية ?

      المهم ،، تدرين أنك برأيي أحسن من يدوّن !!
      كمية رزانة ما شاء الله و واقعية في الطرح ??،، عندك تأني في التجربة و الحكم ،،

      لا عدمنا
      جعلك الله مباركة دوماً ✨?

      رد

  6. الله الشكل لحاله يفتح النفس أحس هالنوع جلو ترزينه عند المرايه كـ ديكور
    من وقت ماصورتيه أنتظر رايك وزي ماتوقعت أحس ينفع للإستخدام اليومي
    الناس اللي يوميا لازم تجفف شعرها ومايهم الستايل أكيد بتدور على شيء يحميه

    شكرا أرتوس -قلوب – .
    وعوده حميده أشتقنا لتدويناتك

    رد

    • ما يَنفع للستايلات .. يعني الواحد مايميلحه بزيادة عَشان يَقتنيه يضل الستايل شيء مُهم ..
      بالضبط مِثل ماتفضلتي ..

      نَورتيني

      رد

      • أحب المدونه حبببب حبببب مش طبيعي ???
        محد كان فرحان يحسب انه الاول ? انجلط يوم شفت التعليقات اللي قبلي ?
        .
        .
        السشوار شكله يهبل وكشخه توقعته واو للامانه و احترافي وكنت بشتريه لانه يحمي الشعر وضرره اقل من السشوار الاحترافي بس تقييمك طلعه على حقيقته المظاهر خداعه والله ?? ، صارله فتره يدور فراسي هالسشوار وانبسطت على هالتدوينه الجميله

        رد

  8. تسلم أنآملك على هالطرح المُميز اللي تعودناه منك ، فعلاً المدونه لها جوها الخاص المتفرد زي صاحبتها بالظبط ، بخصوص ان الكل مدح هالسشوار شيء محزن لان الحين لازم نفكر الف مره قبل مانقتني شيء خاصة اذا كان ممدوح من عدد من الاشخاص في الماضي المدح المتكرر يولد سمعة جيده وثقة عند الشراء واطمئنان لكن الان سار الوضع مريب ومشكك اذا الكل مدح شيء دون ذكر بعض العيوب وكأنه المنتج المثالي المتكامل . شكراً على مصداقيتك ونادراللي مثلك .

    رد

    • طبعاً لازم نَفكر ألف مَرة .. خصوصاً إللي مَيزانيته مَحدودة بتكون ضربة على راسه ..
      لأن عقد آمال على مُنتج ما لَبى إحتياجه ..

      يعني الريفيوز مَهوب صك قرآني .. أجانب عَرب .. كلوووو كلوووو يَلعب
      وَ المُستخدم إللي يشتري حتى بفلوسه يتأثر برأي المَشهور ..

      رد

  9. اول م قرأت قلت من ميزانية العيد بكنسل كذا وكذا وكذا لاخذه ?? بالتسويق سهل اللعب علي ? انا قبل كان شعري يجنن بدون عنايه كنت لامي وخالاتي لانه طبيعة شعرهم بدون عنايه حلوه لكن من طحت ف الحناء مالت علي وعلى من نصحني فيه صار كنه خشن بعد م اتحمم يكون حلو وله لفه جميله لكن بس دقايق و ينفش للسماء وعاد لفه ع نفشه لك ان تتخيلي جماله ?

    رد

    • عادي حبتين عناية بيرجع كما كان ..
      أهم شيء الفروة ما تتضرر إذا الفروة تضررت مُصيبة المصائب ..

      وَ لا حبيبتي خلي فَلوسك عَندك فعلاً .. مُش سحر إلا إذا بتاخذينه كَتجربة

      رد

  11. و اخيييييراً جد ببكي اشتقت لتدويناتك جداً جداً ???

    جعل محد يدون غيرك ??

    ماقريت للحين بس ماقدرت أمسك نفسي مااعلق ???

    رد

      • اممم صراحة انا كنت متحمسة له مره وحاطته في قائمة مشترياتي ، بس الحمدلله يا منقذتي دونتي عنه ??
        هو ممكن يكون حلو بس مايسوى سعره .. خصوصا قبل فترة وحدة مشهورة طيرته للسماء كأنه السشوار الحُلم !
        دائما احب موضوعيتك في طرح الأشياء وهذا الي يميزك عن الجميع ماتحبين تبالغين بالشي او تعطينه اكبر من حجمه وهو مو هذاك الواااو .. ?

        ومس يوووو توووو حياتي ???

        رد

  12. احلى من رجع للتدوين والله
    لك وحشششششه ?❤️
    استمعت بالتدوينه وبصراحه شكله مره مغري ??
    لكن مابعد تجربتك تجربه ??
    كفيتي ووفيتي ارتوس الجميله ❤️

    رد

  14. قلت والله ما انام انتظر تدوينتك بشغف ?
    سبحان الله شفته بس ابد مايشدني اي شي للشعر ? الا الماسكات وحتى قليل اهتمامي له مدري متى جد باعطيه حقه بالاهتمام ?

    المهم اني استمتعت وانا اقراء تجربتك طرح مميز ياجميلة وكل مرة لك بصمة خاصة❤️

    أحبك ❤️❤️

    رد

    • يا حُبي لك زَين ماوراك دَوام ..
      يالله زَين لأن أدري لو دخل بَخاطرك بتشترينه زَين وَ الله ..

      I LOV YOU MORE

      رد

  16. رمضان مبارك عليك أشكر تعبك وصدق معلوماتك أنا من الناس اللي ماأعرف وش أكتب أواعبر لامتناني لأحد لاكن حقيقي ممتنة لك من قلبي لاكن ماأنسي أحد فادني بدعواتي

    رد

  18. نحن هنا ❤️
    والله على بالي دخلت اشيك ع المدونة والا الاقيك نزلتي التدوينة ❤️
    انت اكتبي ونحنا نقرا عسى مايدون غيرك ولاتغرب شمسك ،مافي لك مثيل وتدويناتك مالنا غنى عنها مثل الجرعات معلومات تغنينا عن الكل .
    وهذا لسى وانا ماقرأت التدوينة كيف لو قرأتها ??

    رد

    • يازينك بَس ..
      ياقلبي قَلباه على ذا الكلام الزين ..

      هههههه لا هين إنتِ شهادتك مَضروبة .. تنوريني يالقلب

      رد

      • هههههههههههههههه
        انا راجعه وجايتك بطلب ??تكفيين لاتحرمينا هالتدوينات الحلوات ياختي لو مادونتي انت نروح لمين ؟ ناخذ من مين ؟ بنصير نحزن فحني علينا شوي وتعالي شخبطي هنا ??
        ياشيخه الله يسعدك انت وهاز راقيات وعمليات وفاهمات وتسلم لنا مصدايقتك اللي ماتضاهيها مصداقية بالعالم كله ❤️

        رد

  19. سوسيتي لك دخيل طلتك ريتاااا ماتبلى شو تسعد قلبنا ,
    و تسلملي مصداقيتك و صراحتك لي بتسلخ كتير هههههه ,
    ياستي ئولتك خليه للتجفيف والله هالشركات بيعرفوا شغلن عالمزبوط
    عاملين لي سشوار بهالجمال و الرتابه و ليك شغلو !
    يعيشوا ايديكي.. وعفكرة ” نااااااطر أنا ” ههههههه
    وعنجد بعدك ماحدن يساوي مواضيع
    لأنو لو كل حدا حكا متلك ما كان صرلنا هيك .

    رد

    • ههههههههه تؤبري عداكي يا حَق ..
      بغيت أكتب تؤبري آلبي بس أعرفك تَزعلين لا قلتها ..

      ههههههههههههههههههههههههههههه حبيت ناطر أنا .. شو خطرلك لك مجدوبي

      رد

  20. اشتقنا ياحلو اشتقنا ? ليتك كتبتي بالمقابل أيش افضل سشوار جربتيه ? لان على كثر مااشتري تخف حرراته ?

    رد

  22. اشتقت انا كمان لتدويناتك واجري جري ابغى اخلص واشوف كلامك ❤️شكرا لك على وقتك اللي تفيدينا فيه

    رد

  23. الله اشتقت صدق للمدونه ومواضيعها لا الانستقرام ولا السناب له طعم مثل المدونه هنا اقرا بكل تركيز تذكرين كل شيء بالتفصيل فعلا يطلع الواحد وهو فااهم كل شيء اتمنى ترجعين للمدونه مثل قبل ☹️❤️❤️❤️❤️❤️

    رد

    • آبشري ..
      التَدوين له سَحره وَ مايقدر الإنسان يكذب فيه أو يتملص .. الحقيقة لازم تظهر كاملة
      لكن للأسف بعض القراء وَ لا حتى الكتاب البعض يبون ينزلون وَ السلام بغض النظر عن المادة المكتوبة
      نَورتيني ..

      رد

  24. داخلة بسرعه وبكُل حماس أحسبني بكون الرد الأول أو كأقل تقدير الرابع ?

    ماهذه السرعة قوم أرتوس!

    يعطيك العافية برجع أكون من الشعب المُتابع بصمت ??

    رد

    • هههههههههه وَ الله أغلب مُتابعيني الأصليين هُم رواد التَدوين فلذلك تلقينهم مَتحمسين
      نَورتيني وَ الله

      رد

  27. مبارك عليك الشهر يا جميله.. اشتقنا لتدويناتك ?☹️
    يعطيك الف عافيه ع التقييم و رأيك دائما آخذ فيه

    رد

  30. واخيررراااا طليتي .. رحت اتسحر وبعدها صليت وادخلوالا ومنزلتها وياجعلها ترحب مليااااار بهالطله الزينه
    للامانه ماعرفت هالاستشوار الا منك اول ماوصلك من هاز على السناب واذكر كان معاه ليقنز وملابس رياضيه كنتي تقولين من زمان انتظرها ومن هالكلام
    يكفي امانتك واخلاصك في طرحك والله انبسطت وفي نفس الوقت انصدمت منه لان شكله يوحي بشي من الخيال

    لا تقطعينا ياسوسو والله من حبك دااايم ارسل لك انستقرام واطل اول بااول واقسم باالله اليوم كنت افكر في الظهر اقول طولت سوسو مانزلت شي وهي واعدتنا الفتره هاذي تنزل لنا شغلات حلوه

    على العموم نورتي و٦ شهور فاقدتك المدونه
    ومثل مااقول دائما اعلى درجات الشكر عندي .. احبك
    استودعتك ربي ياعسل

    رد

    • يازَينك صَح …
      شكله فعلاً خيالي بس الفَعالية أهم مِن الشكل ..

      بإذن الله بعود لَسابق عَهدي بالطَرح .. وَ الله لا يعوق بَشر
      وَ ياحظي بَمحبتك ..

      رد

  32. عودا حميدا جميلتنا ?
    من تدويناتك ومواضيعك في المنتدى كنت أقرر اخذ المنتج أو لا بناءا على كلامك لأنك وبلا مجاملة الأصدق سوشليا.. احب اعرف البدايات والتفاصيل وهذا اسلوبك المنفرد..
    وكنت اراود نفسي اشتري هالاستشوار ولكن الحين تراجعت لأن الاستشعار اليدوي يؤدي الغرض بالنسبة لشعري..
    مشتاقين لفلسفتك الأنيقة ومعلومات ارتوس المقطرة بصدق بدون زيف..
    ورحم الله ام جابتك وجمعنا وياها بالفردوس الأعلى.. دمت بحب?

    رد

  34. ماشاءالله عالتعليقات الواحد مايلحّق يكون من الأوائل ☹️???
    عموماً كنت اتأمل في هذا السشوار وافكر فيه بجدية بما ان شعري صعب التصفيف وعندي عقدة سشوار من طفولتي واكرهه فقلت يمكن يحببني في السشوار ???
    وخاصة اني اخذت ستريتنر GHD وكنت عرفته منك بوقتها وماندمت ابداً ، ف كويس اني قرأت رايك في السشوار لان بنظري مابعد رأيك رأي ??
    فعلاً انتِ كنز .. لا خلا ولا عدم من هذي المدونة الرائعه ♥️✨

    رد

  35. صباح الجمآل ?

    من وقت ماصورتيه وانا متحممسه وانتظر تجربتك قبل ما اشتريه لاني كنت محتاره اخذه او اخذ الي من شركة ghd

    انا تهمني الحراره .. مره اخذت سشوار صحيح كان حار بس كان يحرق شعري فوقفت استخدامه

    فصرت اخاف استخدم سشوار الا من شركة معروفه وكويسه وماتحرق الشعر

    الف شكر وحمدلله ماتسرعت ❤️

    رد

  37. صباح الورد ..?

    امممم بصراحة مايهمني كثيرر موضوع الأمان عالشعرة بالاستشوار لأني تقريباً معتنية بشعري وكمان نادراً نادراً نادراً أستشوره ?
    لكن الحق ينقال شكله مغرررري جداً ✨✨✨✨
    تجربتي للاستشوار هو الأحمر الإبطالي المرفق بالصورة جمييييل جدا للستريت وللف وحتى أحسه يعطي الشعر رونق وحيوية يصير الشعر كأنه فرحان ?

    اشتقنا ياتوسة والله مرررة اشتقنا لك الله يحفظك ويخلي لك أحبابك ويرحم ميتك .. لاف يو ?

    دمتي بحب ?

    رد

    • الآحمر ماعليه كَلام بس الآن صار فيه الأفضل مِنه .. من ٢٠٠١ أتوقع فطلعت تقنيات غير
      وَ فعلاً السشوار الصح مظهره غير

      وَ شكراً لكلامك الجَميل نَورتيني يا صَديقة المُدونة

      رد

      • وأتمنى أكون صديقة إنستقرامية ? للأسف ما ألحق على بوستاتك فريش إلا باليالله مع إني مفعّلة التنبيه لكن إلتزاماتي الشخصية كثيرة وأحب أفصل الواي فاي عن الجهاز عشان استهلاك الطاقة ?

        رد

  39. اول شي اجت عيني عليه هو الواط استغربت انو قليل انو معقول ممكن يصفف الشعر فعلا انا وقت شفتو اغرمت بالشكل بس حسيت انو بلبك بالمسكة ومع ذلك خلص حاببتو رغم انو سعروا غالي بالنسبة ل يلي عندي / منيح الي نزلتي التدوينة قبل ما اتورط ?

    ميرسي عالتدوينة اللطيفة انا بثق برأيك كتييير

    الله يعطيكي العافية حبيبة البي ???

    رد

    • ياهلا يا صَفاء
      يالله منيح لحقنا قبل لا نتورط بُمشتريات عيد مُش توب التوب .. للأسف هذي الحَقيقة
      بالرغم الشَكل خيالي

      رد

  40. أنتي كنز في هذا العالم الرقمي ?
    رجعه قوية كأنك تدرين كنت أقرأ عنه قبل فترة ودي اشتريه بس والله ماخلاني انتظر الا اني اتذكر نزلتي بالسناب مرة انك اقتنيتيه قلت بأنتظر لحد ماتتكلم عنه أرتوس لأن بالنسبة لي مابعد كلامك كلاااام
    إن شاءالله هذي بداية انتعاش المدونة ، ولكم باك ??

    رد

  42. طيب ينفع نبوسك ? اشتقت لتدويناتك مررررة
    سوس لا تحرمينا منها ??
    شكرًا لكرمك شكرًا لمصداقيتك شكرًا لنزاهتك شكرًا لكل التفاصيل اللي تشبع فضولنا

    رد

  43. 34د وكل هاذي تعليقات ماشاء الله تبارك الله
    رح اقرا بس حبييت اسلم عليك يا جمييييل قسّم اني مشتاقه لك شكرا لكل حرف تكتبيه بحب واخلاص في العطاء رزقك الله اضعاف ما اعطيتي من تجاربك وعلمك

    رد

      • يا حب قلبي كله .. مزبوط لي زمان عليك وعلى مواضيعك وسوالفك بالسناب لاني التهيت بوفاة والدي رحمه الله، كتبت لك كومنت عالانستا قبل اخر صورة نزلتيها ياريت تقريه .. اما بالنسبه للاستشوار قريت المحتوى واكيد نكتفي بتقييمك وماراح نضيع فلوسنا في شي مو منه فايده شكرا من القلب على الطرح اللي يجذب كلمة ورا كلمة سطر ورا سطر وما ينشبع من القراءه والاستماع عذوبه وذوووق ❣️ بس حبيبتي ياريت تكتبي لنا اسماء الاستشوارات اللي تستخدمينها وماشيه معاك ..
        دمتي بحب ?

        رد

  44. يسلمو ياقمر الله لايحرمنا من مواضيعك الحلوه زيك بالنسبه لي سعره جدا غالي مااتوقع اشتريه ابدا الله يبارك لك ومن تشتريه يمكن لانزلتي تدوينه تمدحينه ان شاءالله نتشارك انا وخواتي بواحد ??✌?

    رد

    • يالله أحسن صار سَعره غالي لأن فعلاً مايسوى إنك تتكلفين بَه ..
      وَ الله يعطيك ما تتمنين بهالدَنيا

      رد

  45. ع كثر ما اتسوق اونلاين تعودت اقرا الريفيوز و انا مثلج الشكل يلفت انتباهي و يجذبني بس الريفيوز هي اللي ترجح كفة اشتريه او لا .. .. اهم شي عندي الامان للشعر عادي ما اسشور شعري ويظل صحي .. لكن يانبني ضميري لو سويت له ستريتنر لان اعرف انه ضار وغير امن .. حرام نتعب ع الاهتمام فيه ونستخدم شي يضر ..و بنفس الوقت نحتاج منتج امن عالشعر + جودة بالاداء .. اهم شي السشوار الاحمر اتوقع مافي بيت ما يخلى منه ?عودة حميده ارتوسه

    رد

    • إذا السشوار عالي الوآطات وَ إستخدمتي حماية وَ تكنيك سَليم أضمن سلامة الشَعرة
      اللهم يكون إستخدام السشوار قليل .. لكن مو كل الشعور تتحمل البقاء بلا سشوار

      نَورتيني

      رد

  47. ارتوس مبسوطه انك رجعتِ للتدوين هذي فعلًا مملكتك الخاصه ولو كان فيه ابلكيشن يخصك وتستفيدين منه عن طريق الاعلانات او يكون بفلوس افضل صراحه محد يفيد بالتدوين العربي الا انتِ وكم وحدة حرام يضيع تعبكم تجي وحده ثانيه تنسبه لنفسها سواء كانت نفس المجال او بمجال مشابه
    دعواتي وقبلاتي ?

    رد

    • فكرتك جَميلة بس بإذن الله ألقى حَل مُريح للجَميع وَ يعطي مُتابعيني المُخلصين حَقهم ..
      بدون ضرر .. وَ تسلمين إنك فكرتي فيني

      رد

  48. عوداً حميداً ♥️
    بداية التدوينة بغيت أقفل وأجري أشتريه ? معاناة السشوار عندي والله شعري مو صعب بس كثير وكثرته متمركزة ورا الرأس فمتعب جداً بالسشوار كنت أستخدم سشوار إمجوي الموف أيام الثانوي حار جداً وأخلص شعري بسرعة طبعاً مع أضرار بس المهم عندي الستايل وبعدها خرب ولا عاد حصلته جبت سشوار بيبي ليس حرارة أضعف لكن الهوا أقوى بكثير وصوته عالي لكن أتعب أسشور فيه إمجوي كان أسرع والنتيجة أفضل جربت كمان سشوار براون صوت أهدى والحرارة والهوا أضعف ممكن لو وحدة شعرها جداً ناعم يمشي معاها لأنه زي اللي كتبتي عنه شغل أيونات وما أيونات وشكل حلو وما يعطي الستايل المطلوب اخر شي جبت سشوار beurer صوت هادي نوعاً ما وحرارة جيدة لما اسشور فيه وانزله يطفي الهوا عشان ما يحتر من جوا كانت تواجهني هذي المشكلة مع امجوي وبراون يحتر ويطفي شوية الين ما يبرد.

    رد

  49. قبل اكثر من سنة بشوي كنت ابحث عن أفضل مجفف شعر ..
    طحت عليه قبل يجيبونه سيفورا .. و عكسك لقيت عدد لايحصى ينتقدونه بيوتيوب بالتحديد ? ..
    كان في خيارات كثير كويسة غيره وبأسعار أفضل ..
    آخر شي استقريت على 8th sense from elchim ..
    جميل جدًا مريح بالاستعمال وصغير نسبيًا وأخف من المجففات اللي جربتها قبل..
    أبدًا ما ندمت اني شريته ..

    وكنت بكل تهور طالبته أونلاين .. يعني مافي ضمان لكن الحمدلله ماشي معي حلو ..

    رد

  51. الشكل من جد واااو .. بالرغم إني م أستخدم المجففات بشكل عام بس الظاهر لو فكرت أشتري باخذ هذا عشان شكله ف المرتبة الأولى ? الله يستر صاير فيني نفس م صار لك يوم شفتيه أول مرة .. بس باحاول أكون عاقلة وأمسك نفسي .. صح قلتي إنه آمن ع الشعر لا لا خلاص باخذه باخذه ???

    رد

  52. ولكم باك ?
    شكراً انك تكلمتي عنه كان مره عاجبني بس سعره مرتفع بس لما عرفت ان اداءه مو حلو خفت رغبتي فيه مررره
    نستنى جديدك ?❤️

    رد

  53. اخيراً♥️ احب تدويناك صرت تقريباً كل كم يوم افتح تدريناتك اقول يمكن نزلتي سي جديد وصرت بس اعيد قراءة التدوينات القديمه?♥️♥️ نورتينا ولا ننحرم من دويناتك الحلوه

    رد

  55. مبارك عليج الشهر أول شي
    أحب نشاطج بشهر رمضان ما شاء الله عليج رغم ان احس رمضان ماكو وقت الوقت يمشي بسرعة
    بصراحة شكل السشوار أخاااذ ?
    واعتقد الشركة استغلت هالشي عدل لأن الناس غالبًا يجذبهم المنتج اللي شكله وتصميمه جميل وبسيط
    بس سعره جدًا مبالغ فيه مقارنة بأدائه انا وحده من الناس يهمني في السشوار ان يعطيني الستايل اللي انا ابيه

    اشتقت حيييل لتدويناتج لا تقطعين?

    رد

  56. كل سنة وأنتِ طيبة يا حلو ، انبسطت كثير لما رجعتِ للمدونة ، بغض النظر عن رأي الباقي المدونة بالنسبة لي يعني آرتوس ، شكراً كثير لمجهودك

    رد

  57. دائم متتميزه وتدوينك يبرد القلب ، تظلين الاساس اللي مانستغني عنه ، يعطيك الف عافية آرتوس على ماتقدمين ..

    رد

  58. مبارك عليك الشهر اشتقنا كثييير للتدوينات

    جمال الشكل ما تنلامين أنيق لو يكملها مع اداء رائع راح يكون ياسلام
    مثل ما قلتِ المنتجات الي عليها مدح كثير مشكوك في أمرها
    ننتظر التدوينه القادمة

    رد

  59. دخول كان منتظر التدوينة وراحت عليه نومة ??‍♀️?
    حبيت ذكرك للتجربة بالتفصيل + تصميمهم له ياخذ العققل ما ألومك عليه ?

    رد

  60. هلآآ .. هلآآآآ اشقتنا والله ?
    فعلاً شكله مبهر توقعت الاداء منتاز بس طلع شكل بدون اداء نقطة تحسب لنا ننتبه لان الاشياء الحلوه تنعمي العين عندها ، لكن حلو مايندم عليه يكفي الشكل و يحمي الشعر?? ..

    شكراً .. شكراً على مصداقيتك سوس الله لايحرمنا منك ❤️❤️ ، انبسطت حيل و انا اقرأ تعليقات وحده وحده من زمان عنها احس اللي هنا غير مافيه اي رد مستفز الردود تفتح النفس ??.

    رد

  61. كنت ناويتة و مترددة بقوووة
    فعلا شهرتة و كل دعاياتة عن الصوت التقنية الخ
    شكرا شكرا شكرا ارتوس
    love you

    رد

  62. هذا لا قالو لك الزين مايكمل
    منورة يالحب، اشتقت لمقالاتك وسواليفك وطريقتك ف السرد
    من كثر ما اشتقت لك احس ان المقال قصير 🙂

    رد

  63. والله انت اللي افضل واجمل واغلى واخف واذكى مدوِنة شفتها بحياتي ?
    صراحة انا من المتتبعين الصامتين بس ما افوت لك ولا شي ?
    ودايما اقول فنفسي ياليت ارتوس صديقتي?❤️
    ماشاء الله عليك والله يرحم من رباكِ
    متابعتك من المغرب
    ❤️

    رد

  64. صباح الخير ارتووس
    كثييير شفت مدح علييه وشكلله جدا جدا أنيق بس للأمانه مافكرت حتى اشتريه لأني مو مرا مع الاستشوار ولأن شعري ناعم فمو شيء مهم لي تدرين عاد استمتع بصوت الاستشوار عكسك وادخل جووو معه ههههه
    يعطيك العافيه ع التدوينه♥️♥️♥️

    رد

  65. مبارك عليك الشهر
    صح تدوينه خفيفه بس تعلمت منها اهمية قوة الواط بسبب اعتمادي على الصالونات

    عوداً حميداً

    رد

  66. أنا أحب أتابعج ف كل مكان ف السناب أحب يومياتج اللطيفه و ف الانستا بس المدونه اعتبره هو الأساس لانه دايم والمعلومات ثابته وسهل اننا نبحث فيه ونرد نقرأ مره ومرتين وعشر عكس السناب المعلومات تطير و الانستا جدا صعب البحث فيه

    رد

  67. مساء الخير ??اخيرا رجعتي للتدوين ماني من محبين للاستشوار ولكن كل تدويتنتس لازام اقراهن على العموم اشوف الستريت اجمل الاستشوار بالنسبه لي اما بخصوص تجفيف الشعر فان اترك شعري يجف من حاله حتى بالشتاء لكن جدا حبية انه يحمي الشعر ?

    رد

  68. ودوم راح تكونين رمز للمصداقية عندي والجميع بعد ؛ للامانه كنت افكر فيه بحكم ان شعري نوعيته خفيفه وقلت لعل ينفع معي لاني بحاجة لاستشوار يومي؛ بس من البداية منت متشككة وخايفه من سعره بحكم تجربتي في اشياء كثيره اخذت اكبر من حجمها ؛ فعلا تقريرك انقذني ؛ جزاك الله خير ?

    رد

  69. مبسووطة انك رجعت للتدوين ?
    وتدوينه خفيفه وجميلة وتعلمت لما اشتري جهاز انتبه للقوة
    ربي يسعدك ونتظر منك مواضيع جميلة ??

    رد

  70. مرحبا و هلا هلا و اخير نزلت تدوينه .، اعجبني كيف الريفيو ولا غلطه انا شعري بالضبط نفس وصف شعرك و اشتريت السشوار او ما نزل ولاني ” ا احب شعري يكون مسشور مضبوط عجبني جدا هالمظهره القديم و حبيته “وكل ما جيت بمدحه لاحد مقدر ما يعطيني قلبي والحين عرفت السبب ههههههههه جد خفيف وشكله روعه وبدون صوت والاهم ما يخلي شعري مره ستايل لووول يعطيك العافيه ارتوس ونطمع بالمزيد السريع مو طولين ياخي دام عندك هالتميز حرام تحرمينا << شوفي قلبتها علينا مره بالاسبوع مره بالشهر راضين ومبارك عليك الشهر

    رد

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Privacy Policy|سياسة الخصوصية • Terms of use| شروط الإستخدام