صَباح / مَساء الإشراقة
أخباركم يا عصافير ؟!
أنا من الناس إللي ماتناسبني الشمس مُجرد ما أطلع بشمسنا الحارة يصير وَجهي كنه بعوض قرصني ، يتّفخ وَ يحمر ..
مع إني من عُشاق الشمس للأسف ، لكن هي ماتحبني أو بالأصح الحَر ما يناسبني ..
لذلك فكرة إني أتسدح عِند الشمس وَ أكتسب سُمرة مستحيلة وَ غير واردة ، وَ أساساً التشمس أكبر عدو للبشرة يسرع شيخوختها وَ أساس كل البلاوي
[ تحلف إنها مو مقهورة من الشمس ]
وَ الخيار الأفضل هو السيلف تان أو الماكياج البرونزي . طبعاً إللي أشوفة من البنات في مُجتمعنا هَو اللوك المَحموص مو البرونز وَ عذراً لكل عشاق هالنوع من البرونز لكن إسمحي لي إللي تسوينه تشويه ، بليز مَا نبي نَشوف هالشكل
[ للأن ما أعرف الحَكمة من تَحويل لَون بشرة برونق ، إلى بَشرة شهباء لَهباء ]
شخصياً أحب لوني وَ مو كثير أتجه للبرونز لكن ما أنكر إن بعض الأرواج وَ البلاشرز ما يبرز جَمالها إلا مَع لوك برونزي
حلو الواحد يبين ملفوح حبتين من الشمس حتى لو اللفحة كذبية وَ حلو التغيير مرات
مُلاحظة ،’
بموضوع الكونتور كتبت ريفيو عن كونتور أنستازيا وَ طريقة الكونتور وَ نظرتي عن الكونتور لكن حسيت الموضوع طويل وَ ممل
وَ مليت وَ أنا أكتبه ، لدرجة مارجعت دققت عليه لغوياً وَ لا إملائياً وَ إكتشفت إني أسقطت كم صورة عن غير قصد
[ هذا تالي الإرتجال في الكتابة .. لكن أكيد بَرجع أعدله ]
مَوضوع البرونز أشوف أهميته أكثر من الكونتور وَ التفاصيل فيه دقيقة لذلك فكرت أطرحه على أجزاء ، المُنتجات إللي يبيلها تَفصيل بفردها بتدونيه وَ بعدين بحط طريقتي ككل مع كل المنتجات ، وَ بكذا بترسخ المعلومه بطريقة أسهل
راح نبدأ موضوع البرونز ببرونز سوى ضجة من أربع سنوات أو أكثر أتوقع نزل بعام 2009م ، وَ يعد كقاعدة للبرونز بالإضافة إلى أنه مُتعدد الإستخدام
Chanel Soleil Tan de Chane bronze universel
Bronzing Makeup Base
سولاي تان دو شانيل
سَعره بَموقع شانيل : ١٨٠ ريال سَعودي
سَعره بأسواقنا ٢٨٠ ريال سَعودي تقريباً هذا إذا ما إرتفع
بدأ يَطلع سعره من ٢٢٠ ريال إلى أن وَصل لـ ٢٨٠ ريال هذا آخر خُبري به
[ تذكرون يَوم تَزعلون من التجارات وَ إستغلالهم !! .. وَش تقولون أجل بَخصوص إستغلال المَحلات إللي بَضاعتهم جُملة وَ يطلع لُهم بونص !! ] ..
المُنتج يَعطي نتيجة مَخملية ، وَ شكله يوحي إنه كريم لكن تركيبته بين الجل وَ قليل من الكريم ..
قوامه غريب وَ مميز غير دهني وَ يتحول لبودرة على البشرة ، أحلى مافيه إنه يعطي لوك وَ كأن الشمس لافحتك ، لونه مو برتقالي زي أغلب البرونز أقرب مايكون للون كراميلي بلمسة برتقاليه بسيطة بس يغلب عليه اللون الذهبي ، فيه ذرات لميعة بسيطة تعكس الضوء بشكل يبين مُشرق بدون لمعه دهنيه أو إيحاء إنه جليتري وَ أشوفه أقرب مُنتج يعطي نتيجه مشابهة للون البرونز الحَقيقي
البرونز يجي بلون واحد وَ مصنف إنه يليق بجميع أنواع البشرة
شَكله عَن قُرب :
فَيه أكثر من ١٠ إستخدامات بهالعَبوة ، للأسف صَورته قبل الإستخدام لكن طارت الصَورة
يَعني يكفيك لفترة طَويلة شَوفوا شلون ما تَزحزح ما كأني إستخدمته إلا مَرة واحدة
شَكله من الأسفل وَ من الأعلى مَع الغطاء البلاستيكي
وَجود الغطاء البلاستيكي مُهم عَشان ما يتأكسد مَع الضوء وَ الحرارة ، غير كذا قوامه قابل إنه يَنشف مع الَوقت
بما إنه مائل للصلابة قليلاً
مُدة الصَلاحية : ١٨ شهر أي سَنة وَ نص
أحس بَتخلص هالسَنة وَنص وَ أنا ما خَلصته
إستخداماته ~
• من إسمه Bronzing Makeup Base يعني ينحط كقاعدة قبل الأساس بعد ماترطبين بشرتك تقدرون تمدونه على الوجه وَ بعده تحطون أساس بقوام خفيف .
• يستخدم كفاينل تتش بعد الأساس وَ يمد في مواضع البرونز يعني زي أغلب إستخدامات البرونزر .
• يستخدم في تصحيح ألوان الأساس الفاتح وَ لو إني مو من أنصار هالطريقة وَ لا من أنصار خلط أكثر من أساس .
• يستخدم في تصحيح لون البشرة وَ توحيد لونها
• يستخدم أيضاً للجسم
أغلب الأجنبيات يستخدمونه ككونتور وَ أشوف هالشيء غلط خاصة لو البشرة باردة لأن لونه دافي ..
بالإضافه إن فيه لمعه بسيطة (شايني) مُمكن البشرة الدافئة يليق لها لكن البيضاء بيبن عليها برتقالي
طريقة المد ~
قاعدة أساسية أي مُنتج كريمي يستخد لمدة فراشي من ألياف صناعية ، وَ يفضل تستخدمون فرشة كثيفة الشعر
بالنسبة للفراشي إللي إستخدمتها هي فراشي الكابوكي من سيقما ، أما ريل تكنيك تقدرون تستخدمونها
لكن بالنَسبة لي ما حَبيتها مع هالبرونز ما تآخذ لون كثير ، لكن تقدرون تستخدمون فرشة الكونتور من ريل تكنيك وَ لو إني إشوفها شَوي صغيرة ، وَ البعض يستخدم البافينق برش من ريل تَكنيك ، وَ الأغلب الأغلب إستخدم الفيس إكسبرت برش من ريل تَكنيك
المُهم ناخذ مَن المُنتج بالفُرشة بحركات دائرية على خفيف لأن المُنتج ( بيجمنت = يعني لون ) ما يَقبل الخطأ
بَعدها نَحطه على يدينا وَ نطبطب عَشان يَنزاح الزائد ، بعدها نبدأ نَحطه بمواضع البرونز بالوجه وَ تقريباً مواضع البرونز مُشابهة للكونتور لكن أكثر إنتشار بَنتكلم عَنها بَمواضيع أخُرى ، بَعدها الأماكن الفاتحة يلي ما حَطينا فيها برونز نَمر ما تَبقى من الفرشة على الوَجه حتى يَعطينا تَجانس
شَوفوا هالمَقطع راح يَفيدكم
https://www.youtube.com/watch?v=BCgRPn7dx04
تَنبيه ~
تحت العَين لازم يَكون فاتح وَ مضوي ، لازم تَحطون كونسيلر ، مافيه شيء إٍسمه أنا إستخدمت تان راح أحطه على كَل وجهي
وَقتها ماراح يكون إسمه تان بيكون أساس غامق ، وَ هالشيء غَلط .. الشَمس لما تلفح بشرتنا ما تَلفحها بنفس الدرجة وَ نفس اللون
الشَمس فقط تلفح الجهات البارزة وَ هذا إللي نَحاكيه أثناء وَضع التان ، لو مَديتي التان على كل وَجهك بيصير وَجهك مَكتوم وَ هذا ٩٩ ٪ من الناس يَسوونه
وَ نرجع نقول الكونسيلر يكون فاتح وَ تحت العَين فاتح وَ مضوي ، بس مو بشكل مُبقع بَشكل مُتجانس مَعقول مَثل الصور إللي راح أضيفها
مزايا المُنتج ،’
– لونه قوي لمسة وحدة منه كفيلة بالتغطية لذلك بيعيش معكم فترة طويله يعني مو حرام فيه سعره
– لونه أقرب للطبيعي
– يناسب أغلب أنواع البشرة خاصة البيضاء وَ الحنطية .
– سهل المد وَ الدمج وَ يتجانس مع البشرة بسهولة
– ثابت لفترة طويله
– قوامه يناسب أغلب أنوع البشرة بما إنه يتحول لبودرة راح يناسب البشرة الدهنية ، كذلك لمسته الكريميه راح تخليه يناسب البشرة العادية ، ممكن قوامه مايناسب البشرة الجافة جداً وَ الله أعلم ( لأن دَهنيته بَسيطة )
– سهل التحكم تقدرين تغمقين وَ تفتحين علي كيفك ممكن تزيدين أكثر من طبقه وَ يعطيك لون غامق وعميق وَ ممكن لمسات خفيفه تعطيك نتيجة مثالية
– يعطي تغطية ممتازه للبشرة
عيوب المُنتج ،’
قد يكون السعر عائق لدى البعض لكن مَثل ما قلت يعيش معكم فترة طويلة
أشوفه ممكن ما يناسب البشرة السمراء وَ ممكن يكون أفتح منها وَ بما إن لونه مايل على ذهبي أو كراميل مابيكون لايق كثير عالسمر وَ مُمكن يعطيهم مَظهر البشرة المَكتومة وَ الباهتة وَ يزيد شحوب وَ مظهر رَمادي بالرَغم هو لونه مُو رمادي لكن راح يَوحي إنه رَمادي عالبشرة الغامقة ، فالأفضل جربوه عليكم قبل الشَراء
البشرة السَمراء لو إختارت برونز بُرتقالي راح يفتحها وَ يعطيها إشراقة
ريانا لاحظوا سَمراء وَ الذكاء بإختيار لون البرونز ، إللي عَندنا تتجنن وَ تحرق بشرتها
حرام إذا ربي أنعم عليك بلون بشرة أسمر ما تَحتاجين كل هالحرق إللي تَسوينه ، خلاص اللهم أعطي بشرتك رَونق
فيه بنات عَندنا قلبت بشرتهم من لون بشرة عربية ، إلى بشرة أفريقية يعني مو مُفترض التان يَغمقك ١٥ دَرجة
ريانا على لون بشرتها ما سَوت إللي نَسويه ، بيونسيه ، كلهم نَشك صراحة بَسمارهم
ما أتَوقع أحد بيشوف لونها بهالصَور ماراح يَتمناه
هل هُناك بدائل لبرونز شانيل ؟!
أشتهر بديل له من بورجوا أسمه : bronzing primer bourjois
كثير من الأجنبيات قارنو بينه وَ بين برونز شانيل ، أعطاهم نتيجة مشابهه لكن بشوي مجهود وَ بقوام موس
وَ أقل ثبات وَ أقل تَغطية ، لكن النَتيجة نوعاً ما مُشابهه
هذي صَورة المُقارنة يَمين الوجه شانيل ، وَ يسار الوجه بورجوا
إستخدمت البنت قبل وَضع مُنتجات البرونز أساس من لوريال ، يعني مَستخدمته كفاينال تتش
يا حَليلهم الغربيات مو شايفة برونز من الأساس ، لكن أكيد على لَونها مَعطيها لفحة بَسيطة
ترى لا يَغركم لَونه قَوي بس شكلها أخذت منه لَمسه
بالنَسبة لذوقي بالبرونز أحبه بهالمَظهر الطَبيعي جداً
أو
إَنتم ماعليكم من أناقة البَنات نفسها أو سَتايلهم رَكزوا على أماكن اللفحات من الشَمس
طبعاً تُوب التُوب ريانا ، للأسف كنت بَحط صور جينيفر لوبيز ، بس مَعرقة بشكل حسستني كَنها طالعة من الحمام ـ تكرمون ـ
يعني مرات نَشوف فنانات بالتَي في أو بصورة بوستر نَتخيلها وآآآو ، لكن لما أجي أبي أوريكم أنَصدم إن فيه عَيوب وَ مشاكل
وَ برضو كنت بحط صور لكثير شقراوات مَسويين تان ، لكن بعضهم يبالغ باللون وَ البعض بشرتهم واضح مَحروقة من الشمس
طالعين كأنهم عجاجيز ، فما أبي أجيب صَورة وَ أقول مَو مرة أو كذا وَ كذا
نَوال الزغبي وَ مايا دياب هذول حارقين بشرتهم ، صَعب نقول ماكياج برونزي ، فيه حَرق قبل الماكياج
حتى لو ماكياج صَح مو قادرين نَشوف ، إليسا مُبدعة بالتان لدرجة كثير يتوقعون إن إليسا سمراء حقيقية
بينما لونها الحقيقي شَكلها شَوربة بلا مَلح ، أبداً مو معطي ملامحها أي جَمال ، نانسي عَجرم دايم تَزيد برضو لون سُمرتها
لكن بَشرتها كثير كثير بيضاء فَتسوي تان عالخَفيف ، حتى بالشَتاء تحاول تَزيده أكثر ..
فيه كثير فنانات لو شَفتوا لون بشرتهم الحقيقي خاصة الأجنبيات ، بدون تان أو سُمرة أو أساس أغمق بَتكه راح تَنصدمون
كأنهم أشباح أو مَسحوب الدَم من عُروقهم بلا طَعم ، وَ أغلب التان إللي نَشوفه بالمَشاهير ( Fake ) غير حَقيقي ، أغلبهم رَش
حتى إللي نَشوفهم يركضون بالأفلام وَ المسلسلات عالشاطيء عأساس سَكسي ، رَش
لأن صَعب التان ببشرة فاتحة بَدون حروق وَ بدون إحمرار وَ شيخوخة ، حتى بَعض العضلات بالذكور كونتور للعضل
إللي يَميز التان ، جداً يليق للمُمتلائات يَعطيهم نَحف وَ حدة بالمَلامح ، ما شفت مليانة شَوي إلا وَ التان عَطاها جَمال
هل يَستحق الإقتناء ؟!
١٠٠٪ بالمَية ، لأنه سَهل الإستخدام ..
يعني أنا إذا طالعة مَستعجلة وَ ما آبي حَتى أعطي نفسي هاللوك من التان ، بس ما أبي بَشرتي تَصير باهته
آمده بَطريقة خَفيفة مُجرد رَونق وَ لمسة بلاش وَ ماسكارا يَعطيك آحلى لَوك ، وَ كأنك تَعبانة عليه
هل يَناسب البشرة السمراء ؟!
ماراح يَكون أفضل مُنتج لهم ، وَ أغلب السُمر ذموه
هل هالمُنتج أساسي بوضع التان ؟
لأ مُمكن تكتفين ببودرة برونز وَ تعطيك لوك طَبيعي
لكن بني آدم طَماع ، يَعني مثلي أحب أجَمع مُنتجات كثيرة لأي شيء حَلو وَ جديد بالسَوق
لكن هالمُنتج إللي لاحظته يَعطي تغطية أكبر وَ ثبات أكبر
وَ لو ما كَنتِ تحبين التان وَ الماكياج البرونزي ، أحس راح يَحببك فيه لانه سَهل وَ نتيجته بيرفكت
هل سهل الإستخدام فعلاً ؟
مُمكن بالبداية ما تتعودين عليه ، لأن قوامه شوي صلب وبودري على كريمي
لكن لو عرفتي له أنا أضمن إنك راح تَعشقينه
مَين مُمكن يكره هالمُنتج ؟
إللي ما يحب البرونز أساساً ، أو إللي يعقد عليه أمال وَ بعدين يقول تَكلفت
هو مو منتج يَعطي لوك كامل ، هُو مجرد جُزء من اللوك
كيف ريحته ؟
ريحة شانيل مَثل كل مُنتجات شانيل الكريمية بس مو بروعة باودرات شانيل
مُنتجات البرونز كثيرة من كل ماركة فيه مُنتج صَيحة ، فيه مُنتج لا يَعوض ، فيه مُنتج يُداعب أحاسيسنا الشرائية
فيه مُنتج يليق عليك إنتِ بشكل إستثنائي ، هُنا وَقتها نقرر ليش أدمنا هالمُنتج وَ كررنا الشَراء ، بالنَهاية إنتم الحَكم
[ تَدوينة أمس عن الحُب وَ تدوينة الهالات السوداء راح يَتم الرد عليها ، يَعني ما نَسيت رَدودكم ]
دُمتم بَحب
وصباح المسرات
تسجيل حضور
ولي عوده ماراح انام الا اقراها كامله
يا حَبيبتي إنتِ ..
نامي نامي ، ما عَليك لَوم ..
وَ حياك بأي وَقت ..
محدثتك بينها وبين الشمس عداوه احيانا يمر اسبوع مااشوف الشمس
وتعرفي حركة الطيبين الي يحطون على قزاز السياره منشفه او سجاده ههههههههه ليومك اسوي مثلهم اذا سفري بالنهار
ومااركب السياره الا وقماشي بيدي كله عشان الشمس ماتوصل لي حتى والسياره مضلله شفتي قد ايش بيني وبينها عداوه وفيتامين د يسلم علي من قلبه
نرجع للبرونز والتان التان مو من محبينه ابد ابد يكفي العلاقه الي بيني وبين الشمس
لكن كخدعه بالمكياج مافي مانع اجرب بالمستقبل ببودره لو حبيت نفسي بالبرونزي تعمقت
من كلامك يبي دقه بالتكنيك عشان مانجيب العيد
اما السعر شاطح بالنسبه لي ماراح ينفع بيخس بالدرج وتتنهي صلاحيته وانا مااستخدمته الا مره او مرتين
الله يسعدك وقلوب لك من بيتنا لبيتكم بتوصل سريع مافي زحمه
صباااح الجمال …
مرررررره حماااااس …
شفتي هالتكنيك اللي نمده بعد الاساس ويكون كفاينل تتش هذا اللي بيفيدنا ونتعلم بشكل صحيح …
انا اخذت لي بودرات اشكال والوان كلها برونز بروح ادور حق بورجوا اذا ماحصلي حق شانيل واتدرب على نفسي … شفتي لمن تقولين مدة استخدامه على سعره على طول اقول محرز ندفع مرة وحده ونرتاح واهم شيء مايكون في نفسي شيء لانك خوفتيني يوم تقولين برجوا يبيلي دقه اكثر … طولت حكي بروح اشوفهم الاثنين واشوف فارق السعر واحكم …
واجازة سعيده ماهنيتك فيها احسك جدا مشغوله الله يسعدك ويهنيك ياقمرهم ..
يالله إن شاء الله يَكون عَندك ، وَ تجربين وَ تبدعين ..
تَسلمين لي ، هَو فعلاً إنشغلت شَوي هالأسبوع ماكان بَيدي إني أتَحكم بالوَقت بسبب شَوية ظَروف
بس إن شاء الله الإسبوع القادم راح يَكون مُميز ، ما وَدي ينتهي آبريل وَ أنا ما طَرحت عالأقل ١٥ بَوست
جداً حزينة على التَدوينات القَليلة إللي طرحتها هالشَهر 🙁
ماعمري حبيته بس كلامك فتح شهيتي ودي اقوم الحين اتتنتن. تسلم دياتك ارتوس على المعلومات الي غيرت فكرتي تماما عن التان
وبخصوص مايا دياب فعلا لونها مايعجبني ابد استغرب من تغزل العالم فيها
يالله كَلنا راح نتنتن بالصيف ..
مايا دياب هَي ستايل ، يَعني جيبي الفنانة البحرينية هَند هي وَ مايا دياب واحد لوَنياً
اللهم مايا دياب ستايل وَ شيك وَ مسوية بَوم وَ هذي بصمتها ، يعني آيقونة فاشونية ما نَقدر ننكر
وَ بلبنان يُعتبر لونها مُميز ، وَ هي بالأساس خلقة سَمراء وَ زايدة هالشيء ..
يعني هي تَبي تسوي شيء غير مَسبوق
بينما لون مايا دياب عندنا مَنه كثير ، حنا ما نَشوفه مُميز عادي فيه كثير لونه زي مايا دياب
لكن مافي بنات بجراءة مايا دياب إلا من بَعد ما طَلعت مايا وَ مع ذلك هالبنات ما صآروا زَيها ، حتى بلبنان ما قَدروا عليها
هي فَريدة من نَوعها ، إذا أحد بيسوي أي شيء مَجنون وَ راح يبصم مثلها قَو هَيد
سبحان الله اعشق البرونز اكثر من الكونتور واحسه يحليني اكثر واكتفي به بعض الاحيان ،، ولون السمرة الي احبه نفس هاللون بالظبط شريت منه بودرة برونز من سيفورا نفس اللون حبيتها حبيتها.. بني على ضربة برتقالي .. واضيف له لمعة خفيفة ذهبي احبه حيل .. جد اتمنى اشتري بلاشر نارس اسمه تاج مجل برتقالي فاقع عشان اسويه مع التان الكذبي والبرونز يالطيف احسه مدمر ..
حَبيت ذكرك لمُنتجات بَديلة راح تَساعدين أي وَحدة حابة تَستفيد
وَ تفتحين مَداركنا وَ تلفتين نظرنا ، بالنسبة لتاج مَحل لا تتحمسين عليه هالكَثر
تبين شوفي بلاشرات ديور أو جيرلان بحكم إن نارس مو موجود عندنا
تاج محل يليق بالبشرة الغامقة جداً مثل نايومي كامبل ، أنا ماحبيته أبداً وَ لا شريته
اللهم جَربته بالمحل أيام ماكان نارس موجود بالهارفي نيكلز نَتكلم قبل ٦ سَنوات
جمال جمال يا توسة .. صار نفسي اشوفك بلوك تان !! :بليز:
ريانا يالهي ما اجمل مكياجها ولونها هنا من جد يدوخ ..
وصفك حيخلي محبين التان يجربو هالمنتج 100% يعطيك العافية يا قلبي
قريباً إن شاء الله بوريكم الفرق بين لَوني وَ التان
ريانا مكياجها فَضيع ما أدري هي الجَميلة وَ لا الماكياج ..
حبيبتي بَشورة ، أسَعد بتواجدك يالطَفلة البريئة ( لا تَقولين مو بريئة كذا بَعيوني )
مهماً كبرتي بشوفك صَغنونة ، صَغيرة بالعُمر وَ ليس بالقَدر
تخيلي فيس مبوز >> بالله اجل تورينا الفرق بين لونك والتان هاه يعني يدك > فيس يشمغ مابغى مابغى ههههههههههههه
بعيونك :$
طيب اذا بشرتي فاتحه و حطيته احس غلط وجهي لون و جسمي لون
حَسب الكَمية ، فيه كميات لا تَستدعي بالعَظام برونز وَ مع الماكياج ما يبين
لكن أكيد لما تبين تسوين لوك برونزي كامل وَ متقن مالك إلا تسمرين جَسمك وَ لا بتصيرين مَبقعة
والله شطح تفكيري وانا اقرا المدونة للمرة الثانيه وتخيلت تاج محل مع تان وكم نقطة نمش بعد ههههههههه يالهي مدري فين بوصل
يَسوونها الغَربيات لازم يَنمشون عَشان يبين طَبيعي ..
أشَطحي وَش وراك ، راس ماله مُزيل ماكياج
يووو تحطمت .. يعني ادور له بديل مشمشي قوي برايك؟؟ جد يوم فتحت قوقل صور حسيته جذبني ع الغامقين
صباح الجمال ..
اخبارنا نزقح ونمرح ههههههههههههههههههههه
وحشتيني ، مدري ليه احس لي يوم عنك
مثل مشكلتك انا والشمس مو صحبه ، خصوصا بالصيف احس بشرتي تنسلخ سلخ حبوب صغيره مثل ماقلتي كن قرص بعوض تعرض لتصبغات سريع سريع < فيس يعيط .. عاد مايحتاج شمسنا يالسعوديه تحرق صيف وشتاء
هههههههههههههههههههه عاد مافيه زي تحميصة شوجي وفاطمه الصفي ماكرهت التان الا من هالاثنين .. من زمان نفسي بتآن تحمست له منك ، متشوقه على تجربته عاد موضوع اليوم زاد الحماس شرحك سهل علي شغلات كنت مستصعبتها ماكنت اعرف شلون ينمد على بالي يتحمص كل الوجه هههههههههههههه ..
ريانا تعجبني ي ختي سمارها يجنن ، عارفه لنفسها وش ماسوت حلو عليها وهي سمرا ماتركت لون ماصبغته .. وحنا الحنطيه والسمراء تقول مايلوق لي شي ' اشوى هالريهآنه مضرب ..
اليسا اول احسبها سمراء ماعرفت الا منك انها تآن .. بس فعلا عليها احلى .. اجل اللي وجهها نحيف وش تسوي ؟! ماينفع لها التان ..
و شكرا شكرا بحجم السماء جنممم ( قلوووب )
ارتوس ادري كثرث بس فيه ممثلات هنديات ادوخ على سمارهم بالرغم باين طبيعي وباين انهم مستميتات ع البياض >احس كذا مثل ديبيكا باديكون اجمل سمار فيهم احسها تعززه وتوهجه بالميكب غير الثانيات يستخدمون نفس درجة الاساس بدون برونز وكذا كنهم مو مبسوطين
ياااه يجمال البرونز سويت التان العام او قبله طبعا ميك اب مو بالشمس
قمه صراحه مع شعر بلمعه ذهبيه وارواج فاقعه شوي ووعدسات فاتحه
والوان معينه بالبس (واسنان بيضا ههههههه) وانصدمت ماتخيلت اني بطلع بهالجمال
شوقتيني لذاك اللوك مع منتج اليوم
حبيته من قلب وحلو انه يعطي لفحه ياكثرهم المحمصين حولي
لدرجه بعضهم اذا شفتها حسها تستهبل
لون ريانا جميل احسها سبيكة ذهب تمشي ♡مااحس فيه احد نفس لونها
عندي استشاره اذا وقت يسمح لك ،،
لووول وانا اقرا قعدت اتفرج في كشخة البنات ونسيت عن البرونزر ولا بعد شوي اقرا ” ماعليكم من اناقة البنات واستيلاتهم ركزوا بالبرونزر ” ههههه ولا عقلي يرجع مكانه ويشوف البرونزر،، حسيت بنهرة الام ايام الطفوله لول
وسؤال هل ممكن الواحدة تعمل تان محروق بالشمس ومن ثم تحط برونزر برتقالي على اساس انها سمراء خلقه
وياليت يوم تتكلمينا عن المكياج الديوي
كالعادة كلامكك وشرحكك ووصفكك قمميل قدأا ` احب التان وان شاء الله بجرب واشوف احس الصور الي حطيتيهم للتان الخفيف كأنها اخختي بمجرد م تحبط بلاشر احسها مسويه تان وتطلع كأنها متكلفة بلوكها لأن بشرتها غيير اما انا اكلف نفسي ولايطلع لوني بنص اللون حقها ههههههههههههه
يعطيك العافية آرتوس
الله يسعدك مثل ماتسعدينا وأكثر ياعسل مره طرحك رائع صراحه انا ما أدخل الإنستقرام الى عشانك انتي من القلة وعلى قولتك لازم نثني وندعم أي شخص يفيدينا في الحياة
بالنسبة للبرونز انا شفت مره جلسة تصوير لجنينفر لوبيز تسوي مكياج على جسمها لان عندها تشققات انا فتحت فمي صدمة . الكلام هذا من زمان استغربت في البداية قلت ما يحتاجلها لانها اساسا سمراء فكان الغرض تغطية التشويه ليصبح لون البشره بيرفكت مافي اي عيوب
شكرا عسوله وابي طلب صغيرون منك تكلمي عن المسامات من جد محتاجين مواضيع مثل هذي خاصة الي في الانف مع انك ذكرتي ماسك الجلاتين بس ماهي البدائل الاخرى الي تخفي هذه المشكلة
و الله يا ارتوس كرهت التان من بنات الجامعة كانهم كانوا حاطين كريم و لافحهم غبار و لزق يوجيههم تحسين وجوهم مكتومة و فيه لا مثل الصور اللي حطيتيهم تان بيرفكت و ماشاء الله ودك كل شوي تطالعين لهم , ما عمري جربت التان لاني سمراء نوعا ما بس تحمست لبرونز بورجوا عشان سعره كبداية و تجربة اخاف اشتري شانيل و اتورط فيه و حبيييييت الايشدو البنفسجي مع التان اااخ يصيح ماشاء الله تسلمي يا جميل عالبوست الجميل .
احب الشمس ف الصُبح قبل الدوآمم فتعودت اطلع واتشمس ربع ساعه او ثلث وعقبهآ اروح الجامعة ..تعطيني شعور البنت النشيطة اللي كلهآ حيوية للدوآم “̮
غير فتره الصُبح أتجنب اتعرض لهآ خوفاً من زيآدة التصبغآت الجلدية ..
وانآ من محبين البرونز وأحبْ التغيير ،وبشرتي من النوع اللي يتغير تطلع ف الشتآ بيضآ وف بداية الصيف يبدأ يبان عليها سمآر خفيف اسميه السمآر البرآزيلي (صدقت هههههه).
وي جمآل لون ريآنا بالصورةة (فضييع) ♡
امآ سمآر مآيا ديآب مميز فيهآ لو غيرهآ م راح نحبه ،تقنية السولاريوم اللي تستخدمهآ للتسمير تعطيهآ النتيجه اللي تبيهآ من دون الشمس (ويُقآل إنها مضره).
الله يخلي المآكيآج ف غضون ساعة نغير اللون اللي نبيه ولآ مآنع من التنتنه تحت الشمس من دون حرق وسوآد “̯
يعطيك العآفيه سُوس ♡
هَلا بالإِخلاص واَنسة التفاصيل ..
فِتنة بالنسبة لي هَـ البرونز ، فعلاً فعلاً يجذبني .. واحس اللي تزبطة فآتنة..
بجد الجَمآل له اساسيات غَريبة ونسبي لدرجة الجُنون ..
البرونز يزيد الجَمال والرَونق ، يخليني اطالع بالبنت واَتنح واُعجب بعد ( عِند الجمال اتنح لاني احب اَمتع عيوني ) ..لوول
دائما بالتان مااحب لَفت النظر بكَثرة الميك اب الواضح ، اَحب اللي يطالعني يُعجب بطلتي ودِفآ لون البشرة ! يحس ان شَكلي Alive! يمكن لان كذا نَظرتي للعالم سواء للمَرأة او الرَجل ، التَان بمكياج Bold له طَعمه وسِحره .. وايضاً بمكياج هَادي له فِتنته!
ايام اولى جَامعة كنت مع صَديقاتي نتعمق بالسَواليف وقلنا وش تبون اشَكال فارسات احلامكم! ( فَرضاً لو كنا شباب) ..
اتذكر قِلت لهم ابي شَكلها يكون عِبارة عن رَونــق) .. ابي بَشرتها لون برونزي واسنانها تِلق وعِيونها رموش نَاعسة و ذات نَظرات نَاطقة .. هَقوتي وقتها ببالي تشارليز ثِيرون !
التَان لو نترجمة للي مايعروفنه ابدا نقولهم ( هو عِبارة عن لون سِحري يجعل شَكل الانثى Irresistible)! اذا اِنوضع صَح طبعا!
هالمُنتج سَمعت عنه بس ماجربته وبجربه لانك حَكيتي عنه، دائما بالبرونز تَقليديه بالمُنتجات مااغامر ابد لان لوني صَعب مرات بما يخص هالشي ..
مااجمل سَردك اسم الله عليك ..
تِسلمين يا فَنآنة
اعععععشق البرونز بس للامانه ما افهم له ،، بمعنى اشوف وحدة بدرجة برونز معينة ما اقدر أميز هيه مزينه تان او ميك أب او ميكس بين الاثنين ،، المهم انه يعجبني و خلاص ،، زي على ريانا أحسه قممممة في الجمال ،، بس برضوه ما اعرف هل بشرتها كذا او لعب بألوان الميك أب ،، أتمنى أسويه بس ما عندي هالاحتراف في الميك أب اللي يخليني أغامر و تجربه ،، أحب في تدويناتك انه تعطي الشخص الهام بالتجديد و التجربة ،، فيها روح مختلفة دائما ،، و ربي يسلم ايديك على كل هالتعب ،، بس بصراحة مدونتك أنصفت اللي يتابعوك لانه حضورك فيها دائم بعكس المنتدى و ان كنت اشوف سردك بنفس مستوى الجمال في المنتدى و المدونة
ناطرة المدونة من لما قلتي البيضا هي يلي لازم تبقى بقرب … مرة كنت عند رفيقتي هي بيضااااا كتيير تقريبا متل مي عز الدين بيضا وشعر اسود وعلقت فترة على بخاخات وكريمات التان اول مرة شفتها فيه ما كتير حبيتو عليها .. المهم قالتلي تعي جربلك نفسي شوفك فيه ماحبيت التان علي حسيت حالي طلعت متل الناس يلي بتشتغل بالشمس وبغيير لونها مدري كيف ماحبيتو علي ولا رجعت جربت المكياج البرونزي علي ومن يومها اخده فكرة انو البيضا مو حلو عليها البرونز بجوز لو انعملي على ايد خبيرة يتغيير رأيي بس ماجربت وانا وشي مو نحيف و مو سمين بس عندي خدود وشفافي معبايين وبارزين يمكن يطلع حلو لو انعمل صح لانو قلتي حلو للمتلئات لانو مهما نحف جسمي خدود ما برحو
اكتر من مره قرأت تعليقات الك حس انو رح يجي يوم نشوف التان على اديكي واظافرك بستايل تاني … بحب بياضك وبيطلع بعئد مع كتير الوان مناكير وصورتك ببالي ارتبطت بهالشغلتين اديكي البيضا واظافرك ♡♡♡
تدونية رائعه استمتعت فيها انا لونى حنطى وتحمست ل كريم شانيل بس ماحط كثير برونزى لان وجهي نحيف انتى قلتى يناسب اكثر الوجهه الممتلى رغم انه على البشره يعطى انعكاس جميل وومميز تقريبا اغلب المشاهير لونهم ومكياجهم كذا اشكرك على هالتدوينه ويسرنى متابعتك
صباحك جمال .. إيش أحلا من موضوعين بيوم واحد
أتوقع بيجي عليك بيرفكت هالبرونز بس للأسف
قبل سنتين كان معي برونز و كان يطلع علي حلو كثير
بس الحين لمن أسويه ماعرفت يمكن وجهي نحف عن قبل
ولا عرفت أو إنه ماعجبني و دايم أمر و أفكر أشتريه بس أتردد لأني صرت أشتري و أخليها و تنتهي و أنا م أستخدمتها بس لايمنع أشتريه
لو تمشتي يمكن يليق لك بس خفيف أنا مره فحياتي تشمست بطريقه غلط و طولت ولا أنتبهت لنفسي وكان ف نفس اليوم عندي زواج و ألغيته هههههههههه لإني أنحرقت و بعدها حرمت أتشمس ❤️❤️❤️
انا من محبات التان بس ما احب التان الطبيعي اللي احرق عمري وانا بالشمس حتى السدحه تحت الشمس يبيلها تكنيك ووقت مش تعال وتشمس ههههه عموما افضّل تان الاجهزة الضوئيه يعطي لون صح ومع الاهتمام والترطيب يبين برونز نضر فيه لمعة خصوصا ان فيه كريمات تنباع في مراكز التان انتي تحددين تبين سمار ع غولد او برونز او اورانج هذي معلومه للي مهتم بأمور التان جربت الرش حسيت كأن وصخ ع جسمي يومين ويصير مبقع ما صدقت شلته بحمام مغربي بخصوص البرونزر من شانيل هالمنتج انا معاه حالة عشق منتج فخم وأساسي يكون عندي استخدامي له قاعده للبلاشر احطه كابلاشر واوزعه عدل وعقب اخذ اي بلاشر غامق لاف جوي من ماك او اورجازم من نارس او البلاشر اللي لونه صريح مثل الوردي او البرتقالي واحط مسحه فوقه عسب يعطيني لوك دافي استخدامي الثاني له احطه برونز بس مش كامل الويه مجرد تتش استخدامي الثالث قاعده لاي فاونديشن فاتح الاستخدام الرابع ايشدوا كريمي عسب يصفي الجفن وعند المدمع اضائه برونز او ذهبيه مع ماسكارا ويطلع احلى لوك فرش وابدا ما احبّذ ان ينحط كونتور لانه مايل للبرتقالي ومثل ماتكرمتي وذكرتي يستحق الاقتناء وبجداره وكالعاده السموحه ع الاطاله
صبآح الجمآل ي جميلتي
انا أحب آشوف البرونز على غيري بس مو علي مدري يمكن من الصدمة اللي جتني
كنت عند كوفيره وريتها صورة رسمة عين ابي مثلها الأخت سوت لي نفس الصورهـ الطختني برونز كرهت عمري بعدها م أقول لك أني طلعت من عندها آصيح ورحت اعدل في البيت
انا سماري فاتح جدآ م ادري اذا بيناسبني او لا؟
آه ي ريانا يعجبني مكياجها وبرونزها احس هي مثال عندي على المكيآج النظيف
بس آنتي لو تشوفين برونز البنات في الجامعه متآكده انگ راح تنخرعين ومن الصدمة تبطلين تسوينه هههه
ي الله شي مبالغ فيه
دمتي لنا ي جمييله
جميله التدوينه كالعاده على فكره انا شاريته الاسبوع الي فات
وكان٢٢٠ استغربت انك كاتبه وثماني جربته واعجبني كفاينل تتش
انا سماري متوسط حطيت الاساس ثم هو جدا جمميل يعطي رونق
صباحك ورد
بصراحه التان مايعجبني مره بالذات زي مايا دياب احس حارقه عمرها صح ستايلها حلو وتعرف لنفسها بس مااحب درجه هااللون يعجيني زي اليسا
انا لوني حنطي مصفر صراحه ماعرفت ابرز لوني واخاف اجازف بالرغم لي فتره نفسي اسوي تان بعيد عن الشمس لان ماتناسبني تخلي وجهي احمر ومحقون
وبالنسبه لريانا عجزت اعرف لونها صراحه تبهرني تعرف لنفسها مره
اوقات اشك في لونها مرات تبين فاتحه ومرات يبن لون بشرتها غامقه بس جذابه في كلا الاحوال
وشرحك وافي وكافي توصلين المعلومه بطريقه بسيطه وسهله واللي لاحظته فيك تراعين جميع الاعمار
ترى اللي حببني في التان انتي اذكر لك تجربه سويتيها في عياده ومدحتي منتج ناتورا بيسيه بس ابي اعرف الطريقه الصح ماابي العب بعمري خاصه اللي حولي نقادين درجه اولى
احب البرونز وزي ماقلتي ماهو المحرووق
لي الان اربع سنين استخدم الحب برونز شانييييل رووووعه لابعد حد
انا سفت هدى قطان تستخدمه كونتور اما تبع برجوا تو اعرفه
والبرونز اللي يسونه البعض وكنها حرق تشووويه
دمتي بحب ❤️
ارتوس ياقلبي بسالك ماركه ناتورا بيسيه وين القاها بلندن؟ بالضبط يعني اذا تعرفين
مساااج فل،.
صار لي فتره غايبه عن المدونه ، فاتني موضوعين ، انشغلنا شويات .!
أحب البرونز ، بس مكياج طبعاً
انا بشرتي حنطي فاتح وإذا استحريت بس خدودي على طول تحمر كيف اطلع بالشمس وشكلي ورثت بنتي ها الشي .،
احس شمسنا بالخليج ما تنفع للكل ، الا اذا بالشتا الشمس أتكون أبرد شويات ،
من حول شهر تقريبا كانوا حاطين مسلسل جديم شوي خليجي مال كم سنه ورى شكلها كانت هبه التان الممثلات الخليجيات كأنو محروقين مش متنتنين،
والبنات ماشاء الله البودره ع كامل الويه المشكله ملطخ لون اغمق من لون جنهم ديايه مشوايه بالفرن ،.
ريانا ها الانسانه ملامحها جذابه جد انيقه وجميله ولونها اللي محليها .
أحب بشره السمر احس فيها صفاء وتتأخر فيهم التجاعيد يعني ما يبين عليهم الكبر بسرعه ، هذا من اللي اعرفهم ما ادري بشكل عام ،.!
المنتج بطل وخاصة للي يحبون التان ، مستهلك بالنسبه للسعر بس خاطري اعرف ليش الفرق الكبير بالسعر ضرائب مثلا او استغلال المستهلك وإلا البترول اللي يرمون عليه كل شي ،.
برروح أطل ع التدوينات السابقه ،
ياعشقي للبرونز احببببه ❤️❤️ وانا شاء الله اشتريه
ياهلااا و مسسسسهلااا
من فتره والله ودي بهالتدوينه
لاني احب البرونز بس ماعرف كيف اوزعه ابداً
ولاعندي اصلا برونز خير شر لاني مابي اغامر فيه بصراحه
وانا ماعرف له
ودايم اتابع فيديوز اغلبهم يحطونه او يثبتون فيه الكونتور الكريمي
ع باالي انو لازم كنتور :/
المهم حمستيني له
وانا ماحب التان ولا اسويه ولا افكر صح يجذبني على البعض
بس انا اسويه مستحيل لا الصدقي ولا الفيك
بس تتوقعين لو وزعته بخفه على وجهي مابيصير شاذ
لان بشرتي بيضاااء
سلام ارتوسي فية شي مافهمتوه يعني نحط تان بعدين كونسيلر ولا اول كونسيلر بعدين تان لان انا احط تان بعدين كونسيلر فيصير وجهي شكلوه غبي يعني تحت العين ابيض وباقي الوحه تان يارب تفهمين شرحي
ارتوسي شلون ادري اذا هذا المنتج يناسبن ولا لا؟
تدرين ارتوس اكثر شي حبيته فيك وبطريقة شرحك انك تحبين الواحد يكون ع طبيعته ويغير باشياء بسيطه جدا ممكن انها تبرز جماله يعني مايغير من شكل ملامحه من إلى ..
يعني اقدر اقول انك تمثليني بهالشي احب المكياج بس ماحب اغير من شكلي من إلى أحب تكون لي اطلاله مميزه بدون ما اغير من ملامحي
شكراا ع التدوينة ..❤️
يعطيكك العافيه جميلتي
يعطيك الف عافية ارتوس على التدوينة الجميلة , صور السيلبرتيز اللي حطيتيهم فعلا روعة و جميلة
ارتوس يا ارتوس
حرام عليكِ شوقتيني فوق ماانا متشوقه للتان والبرونزر
من الصيف اللي فات وانا مره نفسي في برونزر شانيل لونه ساحرني والباكيجنج مرره روعه وانا زيك من الناس اللي تهتم بالتغليف وشكل العلبه نفس اهتمامها بالمنتج
المشكله انو لمن خلاص قررت اشتريه كانت معايا اختي وهيا من اعداء التسمير وخلتني اوقف ساعه عند ستاند شانيل تقنع فيا انو مو حلو وانتي اصلا سمرا ايش تبغي فيه ، طيب غالي ويمكن مايعجبك ، لونه مارح يبين عليكي .. ومن هادا الكلام الين بطلت
بس السنه دي قررت اخذه بسكات بدون رأي احد وافاجئهم باللوك لكن محتاره
خايفه انو فعلا مايناسبني او مايبان عليا لانو انا في الاصل سمرا موش غامق مرره بس اعتبر سمرا يعني نقدر نقول السمار الخليجي ( درجة اساسي في ماك 40c ) ولوني مصفر ومشهب شويه يعني مو السمار المحمر
ايش رايك هل ممكن يناسبني او حيكون فعلا خسارة فلوس لو اخذته
بعمري ماجربت البرونز دايما أخاف من ردة فعل أمي لإنها تكرهه ، حتى بالهوني مون زوجي كان يقول سوي تان ، ورفضت خايفه تنصدم فيني اذا رجعت لها
لكن هالأسبوع قررت خلاص بجرب وطلعت اشتريت شغلات ما أدري اذا بيضبط اللوك اولا ، لإن ماعندي خبره كافيه ..
صاحبتي نصحتني بفاونديشن سيفورا وإضاءاة برجوا لكن ماحصلتهم عندنا ..
فـ أخذت الفاونديشن من ديور والبودرة من بودي شوب والإضاءاة برضو من بودي شوب ..
يعطيك العافيه عالبوست ، ما أعلق تحت البوست لكن من معجباتك الدائمات.
غير البلوق ، تعجبني شخصيتك وعفويتك أو ممكن نقول وضوحك
انا فتحت مشروع صغير ولاحظت كثير من البنات تتخيلنا بضروس دراكولا بس بدال مانمص الدم نمص فلوسهم وان التاجرات جشعات وخلافه .. فا قررت اوفر المنتجات بعموله بسيطه ١٠ ٪ من سعر السلعه المطلوبه .. على اساس يكون فيه شفافيه بالاسعار وماتشتري الا هي عارفه التكلفه .. لكن صدقيني ماسلمت ناس تدعي وناس تتهم لانهم يحسبون تكلفه المنتج بس من غير تكلفه الشحن وبعض المواقع فيها تاكس برضو .. انا اخذته من فيسس ٣٠٠ ريال ابشرك ارتفع عن ال ٢٨٠ هههههه ..
الله يرزقك ويوفقك على كمية هالمعلومات اللي استفيدها منك .. اكثر شي استفدت منه اني ابحث عن المنتج وابحث عن البدائل واقارن وفر علي اشياء كثير وقت وفلوس (f)
الله يبارك لك بَرزقك ، وَ الله أنا أحب أي إنسان ما حط يد على يَد وَ أشتغل مُثابر وَ طموحه عالي
وَ بعدين عمولتك ١٠٪ روعة ، ما أشوفها تكسر الظهر وَ حق مشروع
وَ أوف يرتفع سعره مرة عن مَرة ، صار بترول مو برونز
نورتيني ، وَ آمين وَياك