مساء /صباح العِلم وَ تِكنولُوجيا الحديثة
اليوم عندي لكم مُنتج جديد مِن نوعة وَ مسوي ضجة بكوريا الجنوبية
[ وش رايكم فيني بس !! صايرة خبيرة بالمُنتجات الكوريه ]
صراحة مُنتجاتهم فيها أكشن وَ تبعث عالبهجة ، تحسونهم شعب كيوت ما يكبرون دايم أطفال على قولة أبوي الله يحفظه : دُمى ذول مو أوادم
عاد ماسك اليوم مُستحيل تسوينه وَ ماتضحكين ، جَد يضحك أتوقع سِر فعاليته كونه مُثير للضحك وَ السعادة وَ الدغدغده أيضاً
خل أعرفكم على الماسك الكوميدي إن صح التعبير ..
طَبعاً بالمَوضوع نُوعين من الماسك (وَ لكُل نُوع طريقة إستخدام مُختلفة وَ تركيبة مُختلفة )
الماسك الأول ،’
Elizavecca Milky Piggy Carbonated Bubble Clay Mask
سَعره : ١٠٠ ريال
تَم توفيره مِن : متجر الجُوري ( للإطلاع أضغطي هُنا )
عَنوان المَتجر عالآنستا : aljorys.luxury@
صَراحة صَعب إنا نَواكب الحداثة كمُدونات عربيات ،
فغالباً الشيء ياخذ منا فَترة عبال ما يَوصل وَ عبال ما نَجربه وَ على بال ما يُسمح بدخوله مِن تدقيق الجَمارك السُعودية
فيه ٥ مَتاجر دائماً وَ آبداً أتعامل مَعهم وَ مِن ضمنهم مَتجر الجُوري ، صَراحة ما قَصرت قِلت لها وَفري لي هالأغراض بَطلب مِني وَ وفرتها
[ وَ طبعاً قلت لها لا تَعلمين أحد عَن طلباتي لووووووووول ، وَ لا وِش الفايدة أدون عَني شيء مَحروق سُوقه .. أفقد حَماسي ]
القناع عِبارة عن قناع طين لكن يختلف تماماً عن جَميع أقنعة الطين إللي مَرت عليكم وَ بالنسبة لي ماسبق وَ مريت بقناع شبيه له لا طيني وَ لا غير طيني
القناع غريب أيضاً حتى فيه تطبيقه يمُر بثلاث مراحل : سهل وَ سريع وَ فعال وَ يُناسب جميع أنواع البشرة
الصعوبه الوحيدة إللي واجهتني هُو اللغة المكتوبة بالعبوه مافيه وَ لا كلمه بالإنجليزية كُله كوري فأضطريت أسوي بحث بقُوقل عشان أعرف الطريقة وَ كان فيه تباين بطريقة الإستخدام
فكرة الماسك غريبه وَ مميزة عن ماسك طين مُجرد ما يندهن على البشرة راح يبدأ يتفاعل وَ يسوي فقاعات بفعل الكربون إللي فيه ( الغازات )
وَ يبدأ ينتفش في وجهك بهالأثناء راح يشتغل الماسك وَ يدخل داخل المسام وَ يطرد مِنهاالدهون وَ الأوساخ وَ يزيل مِن البشرة الجلد الميت وَ الرؤوس السوداء
فوائد الماسك ~
• ماسك طين مُقشر وَ منظف
• مزيل للماكياج
• مزيل للرؤوس السوداء
يناسب جميع أنواع البشرة بما فيهم الحساسة
الماسك يجي بعلبة بلاستك كيوت مٌغطاة من الداخل أيضاً بغطى فوق الغطى يجي معه سباتولا بلاستك ( مِثل المغرفه لأخذ الماسك )
قوام الماسك طيني لكن بنفس الوقت شوي لزج وَ هُلامي ، لونه رمادي ، ريحته طينيه عشبيه
المكونات ،’
مكوناتها كله طبيعيه وَ أعتقد أنه ماخذ جائزة
– خلاصة الشاي الأخضر
– خلاصة الصبار
– مسحوق الماتشا
– مسحوق الفحم
– خلاصة الرمان
– خلاصة الصويا المخمرة
– خلاصة الزعتر وقشر الصفصاف
– خلاصة الرجلة وَ القرفة
طريقة مد الماسك ~
الماسك يُستخدم على بشرة جافة مايكون فيها وَ لا نقطة ماء ، بهالنقطه شوي أحترت يقولون أستخدميه حتى فوق الماكياج أو على بشرة متسخة
شخصياً نفسياً أحب أغسل وجهي قبل ( وَ جربته مَره آخر الليل مفترض أغسل وجهي بالغسول ماغَسلت حطيت الماسك فوراً ، وَ النتيجة بيرفكت )
يؤخذ المُنتج بالسباتولا وَ أحرصوا تاخذون حَاجتكم مِن غرفه وحده بس
وَ أنتبهوا : لاتنسون المُنتج مَفتوح لأن قوامه راح يتغير وَ ممكن ينتفش مِثل الخميرة لذلك خذوا حاجتكم وَ غطوه مُباشرة
مدوا الماسك بالسباتولا لاتسخدمون الأصابع عشان لا يتفاعل وَ حاولوا تمدونه بسرعة
بعد ثواني راح يبدأ الماسك يتفاعل وَ يكون مثل البابلز ( فقاقيع ) ويَتضاعف حجمه وهنا سيبدأ الضحك
عن نفسي خلاص عرفت شكلي وَ وزني ١٠٠ كيلو وَ لم يرق لي شكلي وَ أنا تختوخه
بعد خمس دقايق راح توصل الرغوة للذروة هنا نبدأ بالتدليك وَ عمل مساج لمدة دقيقتين ( وَ الماسك بوجهك )
بعده نغسل بشرتنا وَ صلى الله وَ بارك
الماسك راح يمر بثلاث مراحل : بالببداية بيكون طين ، بعدين بيصير رغوة ، وَ من ثم بيرجع طين من جديد
تَم حفظ حَقوق الصُورة لصاحبة المَقطع ( مِن تجميعي فَقط )
محاسنه ،’
رغم أن أغلب ماسكات الطين تجفف البشرة هالماسك بالعكس ينظف البشرة وَ يترك بشرتك ندية
الماسك ما يجفف مِثل أغلب الماسكات ، الفقاقيع تخليه يحافظ على قوامه ندي
طبعاً مَكتوب للبشرة الحساسة لكن فيه لذعة بسيطة تشبه إحساس النعناع وَ أعتقد هالشيء يمكن يكون مِن القرفة أو الزعتر
[ لذلك اللي تتحسس بشرتها مِن هالأمور مُمكن مايكون مناسب لهم ]
حببيته جداً لأن إحساس النُعومه بعده مُميز وَ لا هيج بشرتي وَ لا جففها
بالنسبه كَونه يزيل الماكياج صراحة ما جربت أزيل فيه الماكياج نفسياً ما أقدر مع إنه خَطر ببالي أجربه وَ أشوف فعاليته وَ إذا جربته ( بإزالة الماكياج )برجع أعدل على الموضوع وَ أكتب تجربتي ، بس في حال كان يُزيل الماكياج هل مِن المُمكن إستخدامه يومياً كمزيل ؟
للأسف ما أعرف
أيضاً مِن وعود المُنتج إنه يزيل الرؤوس السوداء ، بالفترة الحالية مَع صابون الألماس ( للإطلاع عالمَوضوع إضغطي هُنا )
بما إن الغسول فيه ريتن فما في رؤوس سَوداء ظهرت حَتى أحكم على إزالته للرؤوس السَوداء
لكن فعلاً ينظف وَ تحسين بنعومه وَ كأنك مسويه سكراب ناعم ، لكن إللي لاحظته الرؤوس البيضاء تطلع السطح مُجرد ماتفركينها تطيح
وَ هذي صُورة شفتها لوحدة لاحظت نفس الشيء وَ قالت إن رؤوسها السَوداء صار مِن السهل إزالتها وَ جابت ملقط برأس مايل وَ شالتها
[ صَورة مِن الإنترنت ]
العيوب ،’
ماشفت فيه عيوب تُذكر
إلا أنه ماسك يُسابق الوقت لازم تمدينه بسرعة وَ تحرصين إنك تقفلين العُلبه على طول يُعني مُمكن نقول شوي فوضوي
الرغوة مُنعشة وَ مضحكة وَ تدغدغ فما قدرت أقاوم الرغبة بالضحك عاد أنا مِن النوع اللي أخاف أضحك وَ بوجهي ماسك ، أيضاً اذا مريتي بتيار هواء مُمكن يطير ههههه مِثل رغوة الصابون
مُمكن إلإحساس المَنعنع يضايق البعض لأنك تحسين الدَم يتدفق
بخصوص الرؤوس السوداء يزيل جزء مِنها لكن مايغني تماماً عن إزالتها بالإبرة أو الضغط
(نَفسي بيوم أتكلم عَن الرؤوس السوداء بالسناب تَشات ، مايبيله سَناب تشات يبيله شيء مِثل بيرسكوب تعرف وَش عبالهم الناس)
البعض يفكر الرؤوس السوداء لون إذا خلاص إستخدمت شيء ماراح يرجع ، حبيبتي دايم راح يرجع وَ دايم لازم يتنظف ، هو مظهرها الوسخ إللي يحولها للون الأسود
تأكسد الزهم مَع الهواء الخارجي يحولها للون الأسود ، وَ لا لو أزلتيها من داخل بتلقينها بيضاء وَ البعض مسام أسود مَع شعرة وَ بعضهم شعرة فقط
( وَ غالباً بالشباب أكثر من البنات مظهر الشعر ، أو تتركز عند أرنبة الأنف )
الماسك الثاني ،’
Mediheal Mogongtox Soda Bubble Acne Sheet Mask
سعره : ٢٧ ريال
تَم توفيره أيضاً مِن : متجر الجُوري ( للإطلاع أضغطي هُنا )
عَنوان المَتجر عالآنستا : aljorys.luxury@
هالماسك يحمل نفس فكرة الماسك الأول وَ يعطي نفس المفعول لكن مُكوناته وَ طريقته تختلف عن سابقه بالإضافة أنه مُخصص كعلاج لحب الشباب وَ البثور
الماسك عبارة عن : كيس بلاستيكي يجي داخلة قماشه على شكل الوجه مُشبعه بمحلول أو جِل لكن الغريب أنه بتصميم المَاسك مُو حاسبين الجبهة لووووول مدري ليش عاد فيه ناس كثير يعانون مِن حبوب بالجبهة
[ أعتقد مِن تصميم الماسك أنه للإستخدام مَرة واحدة وَ الله أعلم لأني ما أعرف وَ لا كلمة بالكوري، عاد يعجبني بالكُوريين معُتزين بثقافتهم وَ لغتهم وَ مايكتبون إلا كوري مو معطين وجه لأحد ]
المكونات الفاعلة ~
– خلاصة البابايا
– خلاصة التفاح
– حمض اللوريك وَ الكابريك
– جلسرين
– عرق السوس
– خلاصة بقلة الماش
– خلاصة الكاكا
– بندق الساحرة
– مياه غازية
طريقة الماسك ~
– يتم فرك الكيس قبل فتحه براحة اليد ( يعني زي الفانوس السحري هههه )
– تفتحين الكيس وَ بتلقين ماسك أسود مَبلول وَ مُمكن يكون لزج وَ فيه شوي فقاعات مُفترض تفتحينه بسرعة وَ تلزقينه بخشتك عاد تَصميم الماسك الله بالخير إما أن هالكوريين تَصميم راسهم يختلف عَن راسي وَ لا راسي إللي غلط
النتيجه النهائيه مُفترض يطلع وجهك كنك لابسه قناع المحاربين القدامي قلادييتر
إسترخي لمدة ١٠ دقايق خلال هالعشر دقايق راح ينتفخ الماسك وَ يتفاعل وَ ينتج فقاعات أشبه بالرغوه وَ ممكن تحسين ببرودة مِثل النعناع أو لذعة بسيطة
بعد العشر دقايق شيلي الماسك وَ للمعلومية الماسك ماراح يتنزع إنتزاع مِثل الصمغ ، لا هُو مجرد قماشه راح تنشال بدون نزع
( خَفت الصوره تلخبطكم وَ تعتقدون أنه مِثل الشمع أو الجيلاتين )
الحين مسجي بشرتك دقيقتين وإذا حسيتي الماسك ناشف شوي مُمكن تبلين أصابعك وَ تمسجين وَ من ثُم إغسلي وجهك بالماء الدافئ
تَم حفظ حَقوق الصُورة لصاحبة المَقطع ( مِن تجميعي فَقط )
رأيي عنه ~
رُغم أن الماسك مَبين سهل في الصورة إلا إني حسيته فوضوي شوي
تبهذلت شوي وَ أنا أسويه
لما فتحته بعد الفرك كان لزج شوي فحست بفتحه ( مُمكن فركته زيادة عن اللزوم لين المواد تفاعلت )
أيضاً أثناء مده على وَجهي الجهة إللي بين الأنف وَ الفم كانت تطيح كُل شوي ، فأضطر أعيد تلزيقها
المقاسات ماكانت مَضبوطة الظاهر الكوريين راسهم كبير وَ راسي طلع صغير قدام الماسك
بعد ماتفاعل الماسك سَد فتحات خشمي وَ الماسك طلع على عيني وشفايفي ( الحين عرفت ليه !! ماغطوا الجبهة لأنه راح يطيح على العين )
بعد ما تشيلين المَاسك إحساسه خفيف وَ كأنه رغوة صابون وَ سهل إزالته يشبه الرغوة تماماً
مقارنة بَين Elizavecca Milky Piggy Carbonated Bubble Clay Mask وَ Mediheal Mogongtox Soda Bubble Acne Sheet Mask ~
للأمانه تباينت المُكونات بكل موقع فما عَرفت قائمة المُكونات كاملة خاصة بالمُنتج الأول
المُنتجين يحملون نَفس الفكرة وَ نفس النتيجة تقريباً وَ يجمعهم هو الغازيات أو الصودا
الماسك الأول مِن Elizavecca ،’
– قوامه طيني
– تسابقين الوقت لكنه مو كثير فوضوي
– غسله مو مُتعب كثير لكن يشبه أغلب ماسكات الطين بطريقة الإزالة
– مايترك البشرة جافة لذلك أشوف إنه يناسب حَتى البشرات الجافه
– ينظف البشرة تنظيف عَميق
الماسك الثاني مِن Mediheal ،’
– ماعرفت ماهيته لكنه رغوي أشبه بالصابون
– فوضوي شوي وَ مقاس الماسك يخليه يزلق كل شوي
– إزالته سهلة كأنه صابون
– أيضاً مايترك البشرة جافة لكنه أكثر جفاف مِن ماسك الطين
– ينظف البشرة تنظيف عًميق وَ مُفترض أيضاً إنه يقلل إحمرار الحبوب وَ يعالج الحبوب ( عاد ما أعاني مِن الحبوب فما أعرف إذا هالشيء صح )
على العُموم هذا رأيي المبدأي وَ تجربتي للمُنتجين مُو تجربة طويلة ما تتعدى المَرتين لكل مُنتج ، مُو كافي للحكم لكن تعرفون التدوين يتطلب طرح ماهو جديد بسرعة فائقة
وعاد لو أنتظرت ٦ أشهر بيكون مُنتج قديم لكن إذا الشيء كان واو صعب الإستغناء عَنه راح أرجع اضيفة بمفضلة عام ٢٠١٦ م
صَحيح الماسك الأول خَليت أخوي يَجربه ، مافي مِثل بشرة الشباب ..
لأن بَشرتي دائماً مُعتناة فالفَروقات ماراح تَبين عليه ، عاد أخوي بشرته دايم مَحمرة فطفى هالإحمرار وَ قالي صِدق عَجيب وَ فعلاً بشرة وَجهه كانت ناعمة وَ طريه
فيه فَرق واضح بالنظر صار يَلمع الوجه ، وَ يعني ما أقدر أقولكم أكثر بشرة أخوي حُلوووة هههههههه بس مُو مثلي لووووول
المُنتجين لما تَقومين من النُوم تحسين البشرة مَلساء جداً كأنك مَسوية بلور للبشرة
آخيراً ،’
تأكدوآ دائماً مِن أن المُنتج أصلي ، لازم بالماسك الأول يكون بالكَرتون خَتم لاصق فيه بار كُود مكتوب عليه آورجينال نَمبر
إكتفينا بالتَدوينات الآخيرة فيما يَتعلق بالعَناية بالبشرة
بإذن الله التَدوينة القادمة راح تَكون ميك آبيه ( مَكياج ) ..
دُمتم بَحب
تم
كيكه هههههههه من السرعه
تم .. كيكه غش
تم – ترا اول وحده انا بس من السرعة عشان الحق هههههههههه
صباحك عسل???
مو راضي يطلع تعليقي انا اول وحدة
تم ،،، love u artos
يسعد صباحك توسة .. لك وحشة ..
??
تم أرتوسه
أعجبنتني الفكرة وخاصة سهولة إزالة الرؤوس السوداء ??
تسلمي ?? كالعادة أستمتع بتدويناتك جدا
تـم ??
صباح النظافه والانتعاش
هههه ابوك صادق اشكالهم دمى .. مايكبرون ماشاءالله والبشره تجيب العافيه ..
هههههههه فعلا ماسكاتهم كبيره لان روسهم كبيره بعضهم:( جربت امدها احس كبيره عاد مساحة الخشم كبيره فاكويس معي سيم سيم ..
الماسك الاول حبيته حبيته حسيت باحساس الانتعاش والبشره تنفس اكثر يونس شكله .. متحمسه على تجربته .. بق بق !
المكونات مثل ماقلتي صح عليك ..
دوم تبهريني .. شكراً يالحب
❤️
تم يا جميلة
تحمست اشتري الماسك الاول سعره مناسب ونتائجه مرضية. بشرتي تقريباً جافة او عادية ، يعني خالية من العيوب بس فيها ذبول شوية واظن بسبب الحمل والولادة بنتظر شهر كمان اشوف اش السبب ، و يمكن من قل الاكل ما ادري اش فيها لكن كل ما جيت استخدم لها شي يقولون مايصلح للحامل ولا المرضع وأفكر استغني عن الرضاعة لأنها عطلتني عن أمور كثير دراسة وعناية وبلا بلا بلا
القرار راجع لك مالي دخل، لكن أرجو انك ماتوقفين عن رضاعة طفلك بس عشان كذا.
الرضاعة الطبيعية لها فوايد كثيرة صحية من ناحية الجسد والنفسية.
غريبة كل مالقيتي شي يطلع مايصلح للمرضع، بس اللي أعرفه مايصلح للمرضع هو الروكتان وحبوب الريتين اي، ناااااادر ألقى شي مايصلح للمرضع غيرهم.
كنت ابغى ريتن ا ، وكثير فيتامينات لما اسأل الصيدلي يقول انتظري يصير عمر البيبي سنة. وتعبت مع اني احس زي ماقلتي ممكن القى حلول اسهل من ترك الرضاعة ❤️ أشكرك على اهتمامك
صبآح الزيييين كله،،
لازم انتظر تدويناتك مستحيل انام قبل
لا اقراها ?
الموضوع حبييته لأنو اعاني من الرؤوس السوداء
واتعب بتنظيفها ولازم الاستمرار بالعنايه
عشان ماترجع نقط سوداء
الماسك الاول حبيته اكثر من الثاني فوايده جميله
والاجمل انو ينآسب جميع انواع البشره
بأاقرب فرصه رح اخذه واجربه بإذن الله
تسسلم يدينك ي الحب دووم تبهرينآ بكل
جديد ودآيم اتحمس وش بتنزلين ?
بالصدفة شفت هالماسك و اتحمست لو مرا حسّيت ينفع لجمعة بنات و نجلس نلعب بالماسكات ?????
انا حاطة الاثنين ف الوش لست بس شكلي ح اشيل الثاني مني ناقصة جفاف ? انا جربت الطين العادي و حبيت نتيجتو بس ع قولك يجفف
صح ابله ارتوس جربت فاونديشن بورن ذيس وي ???? حبيتو مرا شكرًا اول مرا احط فاونديشن و كُنت متخوفة حتى من الدرجة بس طلعت طبيعية الحمدلله اللي هي ساند .
يسعدك ربي ❤️❤️?
يسعد حياتك أرتوسة .. تدوينة جميلة گ جمالك حبيبتي وَ إن شاءالله نجربه ماننحرم منك ❤️?
بعد الحفلة اللي سويتها بالكومنتات عشان اكون المركز الاول .. قرات التدوينة صراحة احب الماسكات الطينية لان بشرتي دهنية فأحس دايما وجهي بعدها نظييييف بس كان احيانا يضايقني احساس الجفاف اخاف اكون بالغت بالاستخدام ? او يمكن لان ماني متعودة بشرتي تجف ? المهم تحمست اجرب هالماسك لسببين الاول عشان اضحك ?? و الثاني اتوقع احساس النداوة بعد الماسك بيكون جمييييييل .. بالنسبة للماسك الثاني احب اطمنك سوس رأسك طبيعي هم رؤوسهم كبيرة و دائرية .. ذكرتيني بصاحبتي ? و الايام الخوالي ..
تسلم يدينك يا اجمل سوس على هالتدوينة اللطيفة .. و انك تنورينا بكل جديد من بدري ???
صباح الروقان ..?
* غيّرت لون الوردة للأزرق عشان يعطي راحة بالنظر لعيونك *.
أول مرة أسمع بهالمنتجات هي مالقت ضجة أو أنا بكوكب ثاني ، عموماً تجربتي مع المنتجات الكورية تقريباً 99% ناجحة فقط في ماسك الطماطم إنخذلت مايستاهل مدحه عادي مجرد لون أبيض و دبق حتى بعد غسله للأمانة إستخدمته مرتين فقط وركنته قد يكون خلل في إستخدامي له اللّه أعلم .. ?
المنتج الأول حسيته رهيب وعملي يعني ألطخه بوجهي وأروح أخلص
لي كم شغلة صايرة من جماعة إستثمار الوقت اللّه يثبتني .. ??
وفيه شي كمان مدري هنا مكانه أو لا بس أبي أبشرك من إستمريت ع الرياضة ورياضتي كانت بدون أدوات أو أجهزة حبيت أعتمد على وزن الجسم فقط طلعت لي عضلات البطن الثلاثية خفيفة واللّه تجنن بخليها تبرز شوي كمان وأوقف تمرين عضلات البطن ، وبس واللّه بغيت أبشرك مرة شكراً أرتوس فضلك بعد اللّه نورتي لي عقلي وفتحتيه كنت أقول نحيفة ما أحتاج.. ??
كل الحب لقلبك ياجميلة ..?
شعب يحب الفله في كل شيء حتى الماسكات ?
حبيت فكرته مره يحمس واحسه ينظف من قلب
وكالعاد تفتحين عيونا على كل جديد وشرح مفصل شكراً شكررراً ❤️❤️❤️❤️❤️❤️
صباح الحب صباح التجديد صباح النظافه والاهتمام ..
التدوينه اليوم تشششع نظافه ،فعلا هالكوريين عندهم اعتزاز فضيع بثقافتهم
ماعمري شفت منتج كوري مكتوب بلغه ثانيه فضيعين
المااسك ياسوس خوراااافي خورافي حسيت بشعور النظافه من كلامك
بس لمن قلتي باليدايه طيني جا ببالي يجفف البشره لانس قد استخدمت ماسك
طيني وجففها بشكل ..حمستيني صرراحه له
الماسك الثاني احسه يخووف مدري ليه بتهاوش انا وياه عشان يضبط
خخخخخخخخ.. ان شاءالله راح اجربه قرييب
الله يسسسعدك سسعاده الدارييين بقدر تعبك واكثر ياا ئلبي
وويك اند جميل وممتع ومليئ بالسسسعاده
صباح النظافه والانتعاش
حسيت بالانتعاااااش وانا اقرأ شلون لااستخدمته ?
الله يسعدك ياارتوس جد انتي مميزه
بس مااتوقع موجود باستراليا ?منتجااات كثيره امريكيه كوريه وغيرها كثير ماحصلتها هنا
وننتظر طريقه الازاله بالضغط كل شي منك فريد وومميز ??
حبيت المنتج الأول أكثر من الثاني وحسيت بأحساس النظافة ، أول مره يمر علي منتج دمه خفيف ??، لو بجرب أزيل المكياج فيه ما راح أحس بالأكتفاء ممكن بعد ما أجرب يختلف الأحساس ، حبيت أنه ما يجفف البشره مو ناقصه بشرتي جفاف.
فعلا الكوريين يكتبون بلغتهم وما يهتمون فهمنا ولا لا.
لك ❤️
الله احب الماسكات الكورية وهذا حمستيني عليه ?
سيلاااام ?
جميييلة فكرررة الماسسك جمييلة بججد جلست اضحك من الصور واحس بدغدغة من جد الكوريين شعب كيوت مرة كانهم ألعاب مش بني آدميين مناجاتهم أحسها ألعاب يعني لما أسمع ان المنتج كوري احس ينفع للمراهقات يعني أشكالها تحمس للبنات الصغنونات يهتمون في بشرتهم مرة ?? وياليت تتكلمين عن الروؤس السوداء كيف نهتم فيها وبس ماتقصرين ارتوسا
مساء الخيرات سوس…. جميل جدا هالماسك….وجاااااري الطلب من الجوري ونخبرك بالنتيجة قريبا باذن الله….. وقلووووووب من القصيم لبيتكم ? ? ? وربي يعطيك حتى يرضيك
حبيت المساكات لكن الماسك الاول حسيت سعره مناسب لنتيجته واهم شي ماسك يظهرك بشكل حلو مو مثل ماسكات الطين ماترتاحين وانتي حاطته حبييت التدوينه
الفكرة جديدة و غريبة و المنتج الأول حسيته مناسبني أكثر
شكراً لك ع الطرح استفدت منك كثير <3
يسعد مساك
صراحه طلعت المنتجات الكوريه مو هينه وتنافس الأوروبيه
عجبني فكرة المنتج بشرتي عاديه تميل للجفاف وحلو انه يناسب كل البشرات
يعطيك العافيه ????
السلام عليكم توسه فعلا شفت الماسك بقناة اسرار وطبقت على وجهها وكان فعلا بعد ماغسلته بانت النضاره والنظافة وصارت بشرتها مشرقه فعلا على الرغم اللي ظهر لنا كمشاهدين جزء صغير يعطيكي الف عافية على مجهودك وبحثك عن كل جديد وتجربته لك
من جد funny mask ? .. تسلم إيدك ويعطيك العافية .. دايما سباقة .. الماسك الثاني تصميمه غريب .. لما شفته بالبداية استغربت وكأني استنكرته .. لأني دايما لما أمد أي ماسك ع وجهي أغطي كل وجهي مع الرقبة .. بس بعد م قرأت التدوينة عرفت ليه م غطوا الجبهة .. سوس نحببببببككككك ???
انتظرت كل الليل عشان اكون اول رد بس بالاخير استسلمت لسلطان النوم لوووول
انا ما احب المنتجات الكورية احسها خرابيط او لعب عيال مع ان تغليفهم الكيوت يجذبني و اسعارهم المعقولة بس هم من اكثر الشعوب اهتمام بالبشرة و عندهم فوبيا التقدم بالعمر دائما يحبون يكونون صغار
بالنسبة للقناع الاول ففكرته حلوة و مبتكرة و بصراحة جاز لي و خصوصا انك مدحتيه و انا اثق في كلامك و رح اطلبه بإذن الله من الجوري و الثاني بعد مع اني حاسة انه بيتعبني باللبس
منتظرين اي جديد منك الله لا يحرمني طلتك البهية ??????????
الكوريين دايما يطلعون بمنتجات غريبة لكن فعالة عشان كذا أحب منتجاتهم
وشي ثاني مثل ماقلتي ماشاء الله عليهم مرة معتزين بثقافتهم ولغتهم
بس الصراحة ودي يكتبون بالانجليزي بالإضافة للكوري كذا بتصير حياتي أسهل هههه
تدوينة رائعة يا أرتوس بالرغم من اني أحس بخيبة أمل :”(
لأنك سبقتيني، كنت ناوية أكتب عن المنتج بمدونتي وأكون أول عربية تكتب عنه لكن أنتي سبقتيني *تبكي بزاوية الغرفة*
ننتظر مواضيع الميك اب
وأنتظر بعد موضوع عنايتك اليومية من زمان ننتظرك 🙁
ربي يسعدك سوس تدوينة خفيفة وتوووونس ???? الله يعطيك العافيه ??
فكرة اجربه انا وخواتي مع بعض ماسك التسليه ونضحك على بعض بجرب الاول
اشوفه انسب لي
❤️❤️
حبيت لما علقتي ع الاعتقاد ان البعض يفكر لو نظف الرؤوس السودا نا راح ترجع استغربت بصراحة ، عقدتي هالرؤوس السوداء و مقياسي بالحكم ع النظافة اللي ماشي معي تمام ماسك الجيلاتين و ماسك الطين مع العنايو اليومية بس لفتني الماسك الاول كثيييير و حبيت احساس الدغدغة ضحكت و انا باقي ما حربته
عموماً المنتجات الكورية لسى ما جربت منها اي شيء ،، و متحمسسة لها كعادتك سوس دوم متميززززة بطرحك ??
يا مساء النعومة :* ، حبيت فكرة الماسك وللأمانة ما مر علي من قبل ، وناوية عليها مليون بالميه بعد ، من أكثر المواضيع إللي أحبها هي مواضيع العناية .. قريت الموضوع أمس من الوقت لكن ما أمداني أترك رد ، والله هالكورين لاحظت أهم شي عندهم العناية ما شاء الله وبشراتهُم نعومة وأشكال أغلب منتجاتهُم إلي مرت علي كمية كياته لدرجه أقول يا ترى هالمنتج بيفيدني ، أحسه للأطفال ههههه ، يا زين الكورين ..
يتني فترة يلست أدور على منتجات كوريه غريبه وممدوحه عشان أجرب ، لكن مشكلتي ما أفهم للغتهُم ولازم مشوار طويل عشات اترجم .
والله أنّي ناويه على أول ماسك ، الماسك الثاني حاسه أني بحوس الدنيا فيه هههه ..
شُكرًا ســوس ع الموضوع الحلو والمُميز ، دايما أنتي في القمة
♥
يسلموووو يا احلى توسة بالكون افدتيني الله يسعدك
تكلمي عن الرؤوس السوداء هني ???
ربي يسعد قلبك زي مابتسعدينا بمواضيعك الحلوة
صباح الخير ..
شكرا آرتوس مقدرين تعبك وبحثك خصوصا ان اللغة ع المنتجات كانت كورية فقط ..
تحمست جدا ع الماسك الأول عملي ولطيف ع البشرة ??
كم المدة بين كل استخدام واستخدام اذا نبي نستمر ؟
تسلمين وكلك ذوق ?
مساء النظافة والانتعاش ?
فكرة المنتج تونس وتشوق حبيتها ? اول مره اسمع فيه
حبيت مفعوله جدا جدا لان عندي عقدة المسام مع ان ماكان فيني بس طلعوا من الاهمال خاصة ان بشرتي مختلطة .. اللحين سوس فيه امل نشيلهم اذا ماكانو فالاصل فيك ادري ان المسام ثابته وشي جيني بس يتوسع قطره مدري حجمها بس شلون نقدر نخفيها وبس يامزة ?
ياخي هالكوريين من وين يجيبون هالأفكار ? Unique فيها فرفشة يعني ماتخيل مناج فرنسي او سويسري بهالفكرة ?
عجبتني فكرة الماسك كون بشرتي حساسة وأيضاً يصيبني ضحك دايم وقت الماسك ?
الاول عجبني اكثر من الثاني حسيت طريقة استعماله اسهل ما تلعوز
يعطيك العافية آرتوس تحاولين تواكبين كل جديد وشكلج حبيتي المنتجات الكورية ههههههه
ناطرين تدوينات ثرثرة فاقدينها ?
شفت فيديو وينجي أول وفعلًا كانت تضحك كثير ههههه وفكرت أطلبه بعدها طوالي نزلتيه سبحان الله
دحين إتشجعت عليه أكثر لأنه أغلب ماسكات الطين تنشف ويحرقني الجفاف دا
شكرًا آرتوس دائمًا تجيبيلنا كل جديد واصلي احنا متابعينك حتى وان كنت أغلب الوقت عالصامت بس والله من على زمن مدونتك بشمواه ويالله فرحت لما عملتي هالمدونة ررااحة من السكرول الكثير وانتقل الى الصفحة الثانية لووووووووول
كتاباتك عذْبَة ???
أرتوس أي برنامج تستخدمي لتعديل صور المدونة ??؟
فوتوشوب حَبيبتي ، حَبيب الكُل
وَ نورتيني
اهليين ارتوس ، يسعد ايامك ?
تدوينة جميلة يعطيك العافية
حبيت كثير فكرة القناعات خصوصا نوعها يناسبني
ودائما افكار وتجدد المنتجات الكورية ملفت
موضوع رائع جدا
وشكلي باجرب الاول
آرتوس حبيبتي لو تقدرين تنزلين موضوع تنظيف المسام بالابرة أكون لك شاكرة
محتاجة جدا لها الموضوع
الله يسعدك حبيبتي ماقصرتي