مَساء / صَباح الأجواء الجَميلة
مِن المعروف إن الستروبينق هُو الترند بهالفترة
سبق وَ تكلمت قبل عن هالمصطلح وَ لعب شركات التجميل بالعبارات عَشان تسوي بوووووم ، للإطلاع عالمَوضوع ( إضغطي هُنا )
لكن بإختصار هو نفسه الهايلايتينق أو خل نقول بمعنى أدق إبراز المناطق بوضع اللمعه في مواضع مُعينة كبديل للكونتور
( الهايلايتنق وَ الشدينق )
على فِكرة الماكياج النَدي سبق وَ تكلمت عنه زَمان يمكن قبل ٦سنوات أو أكثر بَموضوع بس كان بقسم خَاص لأن وقتها كان مُوضه
لكن بالعالم العَربي مُو كثير ملتفتين له ، وَ أول فَنانة عَربية سَوته نانسي عجرم بَكليب : إنتا إيه
اللبنانين ماشاء الله دائماً السَباقين بالمَنطقة العَربية ، وَ يسون الشيء صَح مَب إبن عَم الصَح
اليوم بشرح لكم كذا طريقة بكذا مُنتج مُمكن تطبقون فيه الستروبينق وَ ميزة كُل نوع
لكن قَبل كل شي حابه أوضح شغلة ، تعرفون مَع عصر الإنترنت صارت الموضه تنتشر بسرعة البرق وَ توصل للجميع بنفس الوقت ، بس عاد كلاً يفهمها بطريقته
عربوه ماشاء الله لاستلموا شيء كرهوك فَيه مِن قلب ، مَع الكونتور شفنا وَجيه مبكسه وَ محقونه وَ زومبي
وَ مع الهايلايتنق أيضاً شفنا ماشاء الله عَرس وَ حفله بالوجه الواحد ، وَ مو بس العرب حَتى فيه عينات أجنبيه باليوتيوب مَنزلين شروحات وَ بوجهها أطنان مِن الماكياج وَ ترتكب الكَثير مِن الأخطاء خَلال دروسها
أحد الأخطاء الشائعة هًو عدم الفَهم الصح لتكنيك الستروبينق ، الغرض مُو إن وَجهنا يلمع فقط
الغَرض الحقيقي : إن بشرتنا تبين فرش وَ كأنها طبيعية ، نديه ، صحية وَ مضويه من الداخل ، وَ الأهم حطوا عشرين خط تحت طبيعية ، طبيعية ،وَ كأنك غاسلتها وَ كأنها مَبلوله ، نبرز المناطق اللي نبي نكبرها أو بالأصح نبرز الأماكن إللي بالغالب يَسقط فيها الضوء الطبيعي
يعني أطنان الماكياج وَ الباودر وَ الوجه الكيكي مُو مُنطقي يلمع وَ يكون ندي ، لأن النتيجه راح تطلع لمعه فقط ..
ليش هُو صار ترند لأن الموضة المَاكياج الناعم فأبسط طريقة لإبراز مَلامح الوجه هُو إضاءته
بعكس الكُونتور المُلائم للسهرات وَ التصوير الطبقات تكون فيه أكثر وَ المظهر يكون قاسي بعيد عن الطبيعي ، تذكري كُل خطوة وَ كُل مُنتج تضيفينه لوَجهك راح يكون طبقة ، وَ كُل طبقة راح تشكل سُمك على البشرة ..
لذلك لما يكون ببالنا نسوي ستروبينق لابُد قَدر الإمكان نقلل طَبقات الماكياج ، فكثير مِن الخبيرات اللي أشوفهم بالأنستقرام يحطون خَطوات ماكياج بلمعة وَ بنفس الوقت يضيفون طَبقات كثيرة مِن الباودر وَ الباودر عدو اللمعة ، مُو مشكلة مُمكن تسوين سموكي وَ لون غامق بشفايفك بس الأهم أن البشرة تبين بأقل نسبة مِن الماكياج
أخطاء شائعة عند إستخدام اللمعة ~
– أكثر مُشكلة أشوفها هي وضع اللمعه على مَناطق المسامات أو عيوب البشرة ( خذيها قاعدة أي لمعه راح تبين مَشاكل البشرة حبوب مَسام خشونه ندوب )
مُمكن فيه مَسامات مُو واضحة للعيان مَع اللمعة راح تبرز ، وَ هذا مِثال جبته مِن أحد اليوتويبرز متابعينها قُرب المليون ، وَ بشرتها قبل الماكياج نظيفة ، وَ نوعاً ما جيدة لكن فيها مَسام برزت أكثر باللمعه وَ برزت الخشونه على سطح البشرة حتى جبهتها بين فيها خطوط دَقيقة
– إختيار لون لمعة غَير مُلائم للبشرة فالنتيجة إما لمعة ما راح تبين أو مَظهر طباشيري مِثل إللي نشوفه بالمَسلسلات الكويتيه مِن فترة ليست بالبعيدة ، فلون اللمَعه مُهم مثلاً لو وحدة سمراء سوت لمعه فاتحه وَ فضية أكيد راح يطلع شكلها مِثل القصديره .
– تجنب المَظهر الزيتي ، كثير يعتقد أن الستروبينق يعني زيت أو كريم فالبعض يحط فَازلين وَ يكثر مِن الدهن – أوك بالثفافة الكورية – يعتمدون المَظهر الندى بالزيوت فيستخدمون زبدة جُوزالهند وَ أنواع مِن الكريمات ، لكن الستروبينق يَعتمد بشكل كبير على اللمعة مُو الزيت ، بالعكس المَظهر الزيتي غير مستحب ، فدائماً البشرة الدهنية عندها تخوف من الستروبينق ، لذلك مَرات وضع اللمعه في مَناطق الدهون ماراح يبينك نظره بالعكس راح تبينين وَسخه وَ مبقعه وَ مدهنه ، فإما تسيطرين على مَناطق اللمعة ، أو تتجنبين المناطق الدهنية بالـ T زون ( الجبهة وَ جسرالأنف وَ الذقن )
– وضع اللمعه فَي مَناطق غَير مُلائمة لملامح وَجهك ، اللمعه مَعروف راح تعطي حجم للأماكن الصغيرة أو بالأصح راح تلفت النظر لمكان اللمعه ، فأكثر مُشكلة أشوفها ان الكل يحط على جسرالأنف لمَعة رغم أنه ماوده يبرز عُيوب خشمة ، فاللي خَشمها كبير مفترض ماتسلط الضوء على هالمَنطقة أو على الأقل الجزء الغير مَرغوب إبرازة ، على سبيل المثال : أغلبنا بالخليج خشومنا طويلة وَ نعاني مِن بروز عظمة الأنف ، لنفرض خشمي طويل وَ عرضة سليم بس فيني عظمة بارزه بنص الخشم ، المُفترض أرسم جسر الآنف باللمعه ماعدا مَنطقة البروز أتجنبها ، طبعاً فيه تفاصيل كثيرة ، لكن مُو كل أنف يليق له اللمعه أو خل نقول مُو كل أنف تنحط اللمعة فيه بنفس الشكل ..
– إختيار لمعة مِن نَوعية غير جيدة اللمعة عبارة عَن ذرات مُتقزحه التباين في التقزح وَ المكونات السلسة هَي إللي تصنع لمعه ناعمه وَ ألوان أقرب للطبيعة ، بَعض اللمعات شكلها أوفر وَ تعطي مَظهر تهريجي للبشرة
– المُبالغه في اللمعه ، مِن عيوب اللمعه إذا الإضاءه غير جيدة بغرفتك أثناء وَضع الماكياج لما تحطينها مرات ما تبين النَتيجة إللي تبينها فما تحسين إن فيك لمعة ، مُجرد تنتقلين لدرجة ضَوء مُختلفة تكتشفين الحَقيقة المُره إن وَجهك طالع مَبقع باللمعه
“ هذي العيوب من مُلاحظتي وَ إن شاء الله ماكون أغفلت أي جانب أو خطأ شائع “
مواضع وَضع اللمعة ،’
مواضع اللمعه هَي نفسه المكان اللي يسقط فيه الضوء الطَبيعي على البشرة ، يعني في المَناطق اللي العَظم فيها بارز ، مَع تجنب مناطق العيوب وَهُنا تكمن الخدعة
شَوفوا هالصَورة لأدريانا ليما بدون ماكياج شوفوا وَين الضوء الطبيعي يَسقط (أرنبة الأنف ، جزء من الذقن ، فوق الشفة ، الجبهه ، الوجنتين)
وَ بتلاحظون بأمكان التي زَون اللمعة آوفر لدرجة عَكست أثناء التَصوير ، الماكياج مُحاكاة للشكل الحَقيقي وَ المظهر الطَبيعي وَ تجنب العيوب
[ لو كانت الصَورة على جنب راح تبين لمعة الخد ، لكن الصورة أمامية ]
نقطة مُهمه : لما نمد اللمعه على عَظمة الخد ركزو إن اللمعه تكون على العظمة وَ طالع وَ مُمكن ترفعونها لأعلى الحاجب ، بس تجنبوا تقربونها بإتجاه الأنف
– ليش؟
هالمنطقة كلها مَسامات فراح تبين عيوب البشرة وَ المسام
هالمنطقه توحي إن بَشرتك دُهنية ، أيضاً الجمال أن العظمة تبرز إذا حطيتي اللمعه ، بَحال قربتيها مِن الأنف مُمكن يبين الوجه غلط
حَتي عيونك تبين مَصرقعه ببعض ، كذا أشوف بعض الوجيه إللي تحط اللمعه بَكل مكان
وَ هنا صُورة صَممتها بحيث أوضح لَكم وَين نركز عاللمَعة ، قاعدة عامة لَكن ماتَمشي مَع الكُل أكيد فيه وَجيه يتعامل مَعها بطريقة خاصة
– اللمعة الخفيفة ( بنك ) : جسر الأنف وَ الذقن وَ أعلى الحاجب وَ أيضاً الجبهه لكن أنا تَجنبتها لأن ما أحب المَظهر اللي يَعطي إيحاء بدهنية الوجه لكن مُمكن وَضعها بين الحاجبين وَ على أعلى
– اللمعة القوية ( أصفر ) : مَدامع العين ، فوق الشفة ، عظمة الحاجب ، العظمة البارزة للوجنتين وَ أرنبة الأنف بالإضافة لعظمة الأنف العلوية خاصة للي أنفهم أفطس مع كونتور بلمسات حَلوة بيساعد أن الأنف يستقيم أكثر ، أما إللي عظمتهم بارزة يستغنون عَنها “
مُلاحظة : شَفتوا نَزلت خط مِن بؤبؤ العَين بعد كذا لا تتعدون وَ تدخلون الإضاءة ، راح يوحي بدهنية الأنف وَ بيفرش الأنف وَ راح يبين مَسامات وَ هالقاعدة تمشي حتى عالبلاشر ، يَعطي شَكل مَكسور
الماكياج هَندسة وَ رسم وَ فن وَ مع التجربة تعرفين وَش إللي يليق لك وَ وش إللي مايليق لك ، لو تَركزون على أبسط هالنقاط وَ هالتفاصيل وَ تروحون تطبقون قبل المُناسبة ، راح تَبدعون وَ بتخدمون نفسكم بَنفسكم ، وَ مابتشيلين هَم المُناسبات
كَيف أختار اللمَعة المُناسبة لي ( أنواع اللمعات )~
بشكل مختصر جداً
مِن تجربتي التفاضل مَرات يكون بين الماركات بجودة اللمعة وَ مدى التقزح لكن بالمُجمل القوام له دوره بقوة اللمعة
– اللمعة السائلة ،’
وَ غالباً يكون قوامها ناعم وَ لمعتها لطيفة مو أوفر ( طبعاً مو قاعدة ) يميزها إنك تقدرين تستخدمينها حَتى بدون ماكياج
وَ مُمكن تحطين لمسات بسيطه مِنها بالنهار وَ لو إني ما أفضل ٫ أيضاً تقدرين تخلطينها مَع الأساس أو الكريم المُرطب ، أيضاً مُمكن تستخدمينها قَبل لا تمدين الأساس أو بعد ماتمدين الأساس
– اللمعه كريميه ،’
مُمكن تجي على شَكل كريم مضغوط أو على شكل ستيك أصبع ، يتميز إن البجمنت فيه قوي وَ مرات اللمعه تكون قوية مرة أكثر مِن الباودر وَ السائل ، سميك نوعاً ما وَدهني ، كان عندي سِتيك من أوربن ديكي وقتها كان لميتد أيديشن روعة للأسف مارجعوا وَ أصدروه وَ ماكان دُهني بالمرة ( لليوم مَتحسفة على هَذيك اللمَعة مِن حلاتها وَ سهولتها )
– اللمَعة الباودر المضغوط ،’
الأسهل بنظري وَ أكثرهم إبرازاً للعيوب وَ المسام يعني لو عندك خشونه يبينها مَع أنه في نوعيات باودر صار قوامها سيلكوني يخفف مِن إبراز العيوب
مِن مَحاسنه سهل وَ يناسب جميع أنواع البشرة وَ مُتعدد الإستخدامات
– لمعة على شكل قلم ،’
تناسب عظمة الحاجب وَ أعلى الشفه العلوية وَ مدمع العين أكثر دقه ، سميك وَ دهني شخصياً ما أفضله
– لمعة لوس باودر ،’
مثل البيجمنت الجليتري مِن ماك وَ مِن فور ايفر غالباً لمعته قويه للغايه وَ ذرات الجليتر وَاضحه بالغالب لمعته قويه جداً ببعض ألوان توصل حد الإزعاج
لكن جيد لإضاءة بعض المَناطق الصغيرة مِثل مَدمع العين ، عظمة الحاجب ،وَ حتى الجفن المتحرك
خطوات جانبية لبشرة مثاليه مَع الستروبينق ،’
خذوها قاعدة بشرة حلوه = مَاكياج حلو
خاصة مَع اللمعة إذا بشرتك نظيفه وَ تلمع لمعه صحية بدون ماكياج صدقيني أي لمعه بَسيطة بتفي بالغرض
وَ إذا بشرتك تعبانه نَصيحتي لك إبتعدي عَن اللمعة خاصة الباودر
في أحد المَواضيع كتبت نصايح لماكياج فلولس ، للإطلاع عالمَوضوع ( إضغطي هُنا ) أنصحكم تطبقونها بِشدة خاصة لو تبين تطبقين الستروبينق
نصايح خاصة لـ لمعه مَع مظهر ديوي ( ندي ) وَ صحي ~
• سيلكون … سيلكون … سيلكون … مُنتجات السيلكون هي أفضل مُنتج قادر على تَموية المَسامات وَ إعطاء مَظهر فلولس بغض النَظر عَن الجدل الحاصل
السيلكون مِن الشغلات إللي حَسنت بشكل كبير مِن مَظهر المَسامات وَ حسنت قوام كَريمات الأساس خاصه للي بشرتهم دهنية ..
أنصحكم تستخدمون برايمر فيه سيلكون ( خص نَص البشرة ‘للي فيها مسام أو تجاعيد ) طبعاً مو ضروره خاصة للي بشرتها مافيها عيوب ( إكتفي بمُرطبك اليومي ) وَ اللي بشرتها تتطلع لها حَبوب مِن الماكياج أنصحها تقرأ هالموضوع ( أضغطي هُنا )
وَ هذا برايمر توفيسيد خالي مِن السيلكون للي يخافون مِن السيلكون ( مناسب للبشرة الجافة )
أسمه : HANGOVER PRIMER
REPLENISHING FACE PRIMER
صَراحة جاني هَدية من توفيسيد وَ لا هُو مايليق لبشرتي صَورته لكم كخيار وَ جربته من باب الحَكم عليه فَقط
لكن بالديوي لوك البشرة الجافة تحتاج مِثل هالخيارات لترطيب البَشرة
• إختيار كريم أساس سيلف سيتينق ( يعني ما يحتاج تِستخدمين باودر بَعده )
• تجنب الباودر قدر المستطاع ، إذا مُضطرين نَستخدم باودر في المَناطق الدهنيه بفرشة صغيرة وَ طبقة خفيفه وَ نتجنب المَناطق اللي نبي نحط فيها اللمعه
• إذا حابه مَظهر إكسترا ديوي إستخدمي بلاشر كريمي خاصة للبشرة الجافة ( بالصورة مِن الأسفل بلاشر كريمي مِن ماك واحد عادي ، وَ الثاني فيه ذرات لميعه )
وَ فيه بعد أنواع مثل بلاشر موس سائله غَير دهنية مُجرد ما تمدينها تَتحول لباودر وَ مافيها إحساس دُهني
[ بس للأسف مَخلصه عندي وَ يكون فيها ذرات لميعه بس صغيرة جداً تكاد لاتذكر ]
أيضاً إستخدمي بلاشر باودر عادي بس يكون قوامه ناعم فيه ذرات لمعه بسيطة بَس مو أوفر ، وَ نفس الشيء ينطبق عَلى البرونز
إ ذا حابة تضيفين لمسة برونز على أغلب الوجه ( أو كبلاشر فقط ) البلاشر اللامع بالصَورة من آورجلاس كَتبت عنها مَوضوع ( للإطلاع إضغطي هُنا )
وَ اللمعة البرونزية المُتدرجة من بوبي براون بالأسفل راح أكتب عَنها ريفيو مُختصر
• إستخدمي بخاخات تُعطي مَظهر ديوي مَوجود في كثير ماركات وَ مِن المُنتجات إللي جربتها وَ تكلم عنها كثير من البلوقرز الأجانب وَ بعض العرب هي بخاخ تاتشا
يُستخدم قبل المَاكياج وَ آخر خطوة بالماكياج ، يختلف عَن ُمثبت الماكياج لأن قوامه زيتي شوي ( يناسب البشرة الجافة وَ العادية )
• إهتمي باللوك كَكُل يعني يُستحسن تستخدمين ظلال مُلائمة للوك ، مثلاً روج يكون مَخملي أو حتى قلوسي بَس مايكون شاحب وَ مات وَ ناشف حلو كل شيء يكون فيه قليل مِن الطراوة أو اللمعه الخفيفة
ريفيو مُختصر عَن بعض المُنتجات المَعروضة ~
Tatcha Luminous Dewy Skin Mist
ماركة تاتشا مًاركه قائمة على أسرار فتيات الجيشا اليابانيات تَم تطويرها مَع العلم الحديث
وَ مُنتجاتها قائمة على مَواد مِن أرض اليابان مِنها أفخر أنواع الشاي الأخضر وَ الطحالب الحمراء وَ نخالة الأرز … مالكم بالطويلة
هالمُنتج طلبته خصيصاً بس عشان أسوي ريفيو عَنه مَع علمي المُسبق أنه بأغلب الظَن ماراح يناسب بَشرتي الدهنية لأن الغرض منه هو ترطيب البشرة
عموماً فكرة المُنتج مو جديدة مَوجوده بكثير مِن الماركات ، لكن عَدد قليل مِن الماركات إللي خصصت مَرش خاص بالديوي لوك ( المظهر الندي ) إللي مروا علي يمكن ٥ ماركات منها الرخيص وَ الغالي ، تاتشا أحد هالماركات ..
المُنتج مُو فقط مُخصص للماكياج إنما مُصنف كمنتج مُنعش للسفر أو حتي لترطيب البَشرة على السريع ، وَ لقبل الماكياج وَ بعد الماكياج
أيضاً لعمل ريفريشنق للميك أب ، المُنتج يوعد أنه يهدي البَشرة وَ يرطبها وَ أيضاً مُضاد للشيخوخة
تَم توفير المُنتج مِن متجر روتشي : rucci_store
للإطلاع عالمَتجر إضغطي هُنا
سَعر المُنتج : ٤٨ دُولار مايُقارب ١٨٠ ريال سعودي بدون سعر النقل وَ الضريبة
رأي عنه ،’
كَمُنتج للماكياج مُنتج مميز وَ جيد وَ يعطي لوك ديوي بسهوله ، تجربتي كانت له بَعد الماكياج فقط
وَ أعطاني لوك ديوي بسهولة بدون مايعطي مظهر زَيتي أو معرق غير إنه يعطيك إحساس بالإنتعاش مُلائم جداً للي بشرتها جافه وَ عاديه
( يَستحق الإقتناء لمُحبين الدَيوي لوك ) ..
كمُنتج للعناية اليومية ما أشوفه يَفي بالوعد ما أنصح فيه كبديل للُمرطبات لأن ماأعتقد ترطيبه بيكون كافي ، بالإضافه إلي أن فيه كَميه بسيطة مِن العطور ( عطور طبيعية) البعض يتوه لما الموقع يكتب خَالي مِن العطور الصناعية وَ يعتقد أنه خَالي مِن العطر بالمره
أيضاً فيه نسبة كحول وَ هي إللي تعطي البخاخ الفعاليه بالبخ وَ الإنتعاش
طريقة إستخدامه مثل باقي البخاخات :
تُرج العبوه ، يبخ الوجه من بخه إلى بختين بمسافه ٦ إنش
The Balm The Manizer Sisters Palette
عاد هاللمعة غَنية عَن التعريف ، الضجه حولها كثير
أحلى مافيهم أنهم جمعوا ثلاث لمعات في واحد ، لكن مايحتاج إختاري إللي تجي مُستقله لأن مُمكن مَو الكل يليق له كل الألوان إللي بالباليت
تستحق الضجة لأنها رخيصة وَ تعطي اللوك المطلوب ذَراتها صغيرة وَ ناعمه وَ تقزحها غير مزعج بالإضافة ألى أنها خاليه من العطور
افضل لون حَبيته ماري لو لأنه أقواهم وَ أنسبهم للون بشرتي
لكن لمعة انستازيا وَ بيكا بالنسبة أفضل مِنه لكن تقوم بالمقام وَ بقوة
للإطلاع على مَوضوع لمعة بيكا وَ أنستازيا ( إضغطي هُنا )
Hard Candy Glow All The Way
هالمنتج جاني هديه زَمان مِن أحد التاجرات مادري هل هو مسوي ضجة أو لا ،لكن مفعوله جيد علي سعره أعتقد هُو مُنتج يتوفر بالصيدليات أو السوبر ماركت
إللي مَعي لونه برونز طبعاً لونه غامق علي لازم أكون مَسويه تان عَشان يليق ، لمعته قويه مُمكن يكون مَظهره مبالغ على الوجه إذا بشرتك فاتحه ..
لكن يأدي الغرض وَ ينفع للجسم بعد ، لكن عيبه مُمكن يبقع بالملابس لأن سبق جربت أنواع ما تبقع وَ يظل جيد على سعره
Bobbi BrownShimmer Brick Compact
من أقدم أقدم اللمعات ‘للي شريتها ٫ شريتها أكثر مِن مره تقدرين تستخدمين كُل لون على حده سواء لمعة على عظمة الحاجب أو حتى كظلال
وَ تقدرين تخلطينه كله سوى وَ تستخدمينه كبلاشر أو برونز ، مِن أشهر اللمعات البرونزيه تقدرين تستخدمينها بعد للجسم ، ذراتها ناعمه وَ خاليه مِن العطور
لكن طلع لمعات تفوقت عليها بمراحل ٫ مُمتازة للبرونز لكن كلمعة يمكن ماتعطي الإيفكت الَمطلوب ، أيضاً اللمعة ما تثبت كثير على الوجه تَتطاير بسهولة
لَكن حُلوة وَ لها مَعزة بالقلب ، فيه ألوان ثانية مِنها لكن البرونزية عاجبتني وَ ترى برونزها مَحروق فاحم شَوي بَس حلوة
أفضل الفراشي لمَد اللمعة الباودر ،’
أشهر الفراشي لإستخدام اللمعة الفان برش ( فرشة المروحة ) لكن مَع موضة اللمعة برزت ماركات خصصت فراشي تحديداً للمعة
ميزتها حجمها صَغير وَ مُدببة تلاقونها عَند سيقما F35 هآيلايتر برش وَ بمورفي M501 مَسمينها بفرشاة جاكلين هَيل
أنا عَندي فراشي سامر خُزامي تَفي بالغرض وَ زيادة ( بكتب لكم قريباً موضوع عن فراشيه ) ..طبعاً بكثير مِن الماركات بس حبيت أسهل لَكم وَ أعطيكم إقتراحات بُمتناول الجَميع
مَواضيع اللَمعة وَ اللوك الديوي بَحر بَحر ، وَ لا حَصر للمُنتجات
عَندنا أكثر مِن 5 مُنتجات مِن كريولاين غير مَتوفرة لَدي لأن فيه شَغلات ما تَناسب بَشرتي وَ أنا ما أشتغل بهالمَجال
عندنا مُنتجات مِن كولور بوب تَعوضك عن كثير مِن اللمعات ، عندك مِن ماك مِن ميك أب فورايفر ، لا حصر لمثل هالمَواضيع وَ السر
بالذكاء بإختيار المُنتجات وَ اليد ، ما يَحتاج تتكدس المُنتجات شَوفي يدينك شاطرة بَوش وَ الشيء إللي ترتاحين عليه وَ مُتمكنه مِنه وَ أعتمديه
الكثرة غالباً شَغلات تَسويقية شَلون بيلفتون نَظرك إذا مانَزلوا مُنتجات جَديدة ، هذي تَجارة وَ مهارة بنفس الوَقت
وَ النفس مَيالة للتَجربة وَ الإقتناء ، وَ لا كُل اللمعات مِن سنين مَوجودة فيه شركات ماكانت بالسَوق صارت مَوجودة لكن الشركات الآولى مُستمرة بالتَصنيع
وَ كل فَترة وَ الثانية بَنزل مُنتج ما ، لأن مَثل ماقلت لكم المَوضوع تجاري
فيه لَمعة مِن شَركة إحترافية ، ياااويلي مِن قوتها تَعمي العَين يوماً ما بكتب عَنها وَ طبعاً إذا أحسنتِ إستخدامها راح تَبهرك النَتيجة
مُلاحظة ،’
فيه كَثير طالبوا بَتدوينات تَكون بُمتناول الجَميع ، الريفيوز دائماً يشمل الحَديث وَ الفَريد
الشيء الجَديد أو اللي مَسوي ضَجة ، الفِكرة أنه بدل ما تتحمسون عليه أو تتكلفون فيه تلاقون الجَواب عَندي
وَ صعبة أدون عَن شيء قَديم جداً وَ أكل عليه الدَهر وَ شرب ..
[ أحب مُدونتي ما تَقل عَن أي مَوقع غربي ، وَ أحاول قَدر المُستطاع أتعاون مَع تاجرات يَوفرون لي أحدث المُنتجات مِن أمريكا وَ أوروبا ]
لدرجة أنتقائية بإختيار المَتجر البَيرفكت ، وَ يتعبون جداً مَعي وَ بمزاجيتي
الشَغلات العَادية أو المُستهلكة مُمكن تلاقونها برَوتين العناية اليومي أو الأسبوعي أو الشهري
بَحال تَطرقت لمَوضوع مِن هالنَوع ، أو بموضوع عن تكنيك مُعين مِثل مَوضوع اليوم
أما تَدوينة مُستقلة عَن مُنتج فرضاً [ بودرة بيبي جونسون ] أنتم بتَضحكون لو نَزلت لكم مَوضوع بهالشَكل
بتقولون يا قِدمك ، بالرُغم أن فيه كثير ناس لليوم ما يَعرفون يَستخدمونها ، يَستخدمونها بشكل بَسيط
مُمكن هالمَواضيع تُدمج ، وَ فيه مُنتجات ماشاء الله أغلب المُدونات مُو مَقصرين فيها وَ كاتبين تَجاربهم عَنها
يعني ما بالبلد إلا هالوَلد !! .. أكيد كُلنا نَكمل بَعض وَ فيه مُدونات فيهم الخَير وَ البركة ، وَ صَعبة أحط شيء بمَدونتي بَسيط لا يَحتمل مَوضوع
بتلاقوني نَزلت عَنه بالآنستا وَ الآن راح أشير لأمور بالسناب تَشات ..
وَ يوماً ما بَجمع لكم الأفَضل وَ بنزله لكم مِثل موضوع قديم وَ سابق لي جَمعت المُنتجات الفاعلة وَ الرخيصة
دُمتم بَحب
تم
ماشاء الله شكلكم تَحبون يوم الخَميس
انتِ لو تشوفي جلستي ?? راجعه من طلعه مبلله من المطر وجالسه بوسط الصاله واغراضي حوليني
والشاحن يالجهاز وكل هالحوسه لعيونك
أرتوس اللمعه الاحترافيه اللي تقوليها آخر البوست هي اللي على علبتها علامة برق صح ⚡️ ناسيه إسم الشركه
فدوه فدوه 🙂
بسم الله ع قلبك
التدوينه طويله لكنها غير ممله فصلتي باسلوب مريح ولونتي حتى العيون ماتتعب
الله لا يحرمك الاجر ع هالتعب احب امانتك بالشرح واسلوبك السلس
قبل كم يوم كنت اسولف مع زوجة خالي عن اللمعات وطريقتها وتدوينتك جت بوقتها راح ارسلها لها قبل تشتري حتى تعرف المناسب
سهلتي علينا اماكن اللمعه بعد شرحك مايحق لنا نشوف لمعات بكل الوجه
الله يعطيك العافيه ماقصرتي تدوينتك راح تكون مرجع مهم لي
?
تم
هلآ هلآ بناسي وَ هلي
وأخيرا
هاااه غَلبك النعاس !!
آحيي نفسي على المقاومة ههههههههه من زود الهي نفسي رحت آكلم آخوي
مرره عيوني تسكر من النوم بس ما أوفت حماس نزول التدوينه
تم وَ وحشتيييني مره
مُش آآآآآآدي ، عاد ماعاد صَرت أصادفك
ولك تسلم هالانامل الالماسات
سآعات مخي يدوخ من الشرح لازم نطبق عشان افهم كلامك حرفيا وهذا الشي اللي يحمسني دايما ..
جربت لمعه ذا بالم كانت فاتحه فعلا كانها طبشور غيرتتها واخترت لون أفضل وجربت حق انستازيا وبكا حبيت بيكا اكتر .. احطها بس على عظمة الخد ما امدها قدام لانو تقريبا يبان مثل صورة اليوتيوبرز في أكتفي بجزء بسيط من الخد واحطها فوق وتحت الخاجب وساعات شي بسط فمقدمه الانف مع انو مايحتاج بس يعطي لوك حلو وفي مدمع العين .. ويسلم أديكي مره تانيه يا الماستنا
وحبيت أقولك جربت طريقتك في مد الفاونديشن والاشياء اللي قبلها وطلعت البشره فلووووووولس فعلا قلت من قلب شكراً آرتوس وشكرا لك دائما وأبداً
?
ياهلا بَرهف
تم
رِحاب الحُب
اللمعه و الكونتور ورسم الحواجب بالنسبه لي أذا صارت بطريقه غلط خرب الشكل كله ، الأضاءه بمكان وضع المكياج مهمه وأحيانا يكون المكياج مرتب بس المكان الي بتروحين له الأضاءة فيه سيئه ?.
أحب التدوينات الي تضيفين لها روابط لتدوينات سابقه بالنسبه لي تبين كمية الجهد الي تبذلينه ما شاء الله عليك ❤️❤️.
تم
مكااااني ? وراجعه بعد القراءة ?
راجعه للتدوينه ??
ماشالله تبارك الله،كفيتي و وفيتي و الله يكون بعونك لتغيير ثقافة الميك اب عندنا??
الله الله على الجمال هنااا
أنا اللي سألتك في الانستا واستخدمت برنامج ثاني لقراءة التدوينة لما كانت محمية ??
سلمت الأنامل الذهبية ?
?
اخيراً ،،
يعطيك العافيه سوس . موضوع جميل و احب التكنيك هذا بس اخاف منه و انو اخطي باستخدامه و بدل مايجملني يشوهني اكثر .
سوس سؤال : ايش افضل اضاءة اقدر استخدمها في الغرفة عشان يوضح لي مكياجي البيضاء او الصفراء؟؟
نستنى لمواضيع جديدة و الأكيد بتكون جميلة كالعادة ..❤️
يعطيك العآفيه على آدق التغآصيل في الشرح عآد آنا من محبين اللمعه بس بمظهر طبيعي وجميل
مو آصير لمبه من بعيد ..قريت التدوينه ولآ مليت وبوجه آقراها برواق
عآد اللحين بنآآم ..تصبحي بألف خير ?
مآقدرت اكتب تمم مثل الجميلات
لأنوو ماقدرت اقاوم ف قرأت ع طول ?
دايماً تسحرينا بجمال مواضيعك ومُميزه
عن غيرك فعلاً تخلين الواحد يتحمس ينتظر
ايش بتنزلين ف الايام الجايه
اللمعه مآجربتها علي متردده كيف ووين احطها!!
لأن اكيد كل شي وله طريقه صحيحه حتى لو كان
شي بسيط بس انتِ ماقصرتي وضحتي هالشي
بإذن الله رح اجرب بأقرب فرصه
وتسسلم يدينك الناعمه
دُمتي لي ?
كنت انتظرها تنزل عشان انام ??
ارتوس بعيداً عن موضوعك بستشيرك بشي
هو للبشره طبعاً?
تعرفين الزوائد الجلديه الصغيررة
انا طالعه لي من فترة ومزعجتني جدااا
بمنطقة اللي بين منابت الشعر والحاجب والعين
وفي الرقبة كمان
كيف اتخلص منها!
قريت انو عن طريق الكي البارد
اش رايك
هل عندك خلفية عن الموضوع؟
يعطيك العافية سوووس ؛؛
اللوك الديوي يعجبني غالباً و بالأخص من أول مرة شفته بكليب نانسي خطف قلبي اشراقة وجهها و ما كان لي بالميك اب و لا اعرف التكنيك ؛ بالبداية كنت اكتفي باللمعة تحت الحاجب
و مع الوقت و استخدامها عرفت الأنسب لوجهي و مثل الأماكن اللي ذكرتيها لكن ما اركز ع الخشم لأن عندي ميلان و خايفة يصير التركيز عليه و يوضح مع اللمعة فابعد افضل او شي بسيط لا يذكر ..
بخصوص اي نوع استخرم الستيك كريمي اسمها واتس أب من بنيفت و حابتها و ماشية معي تمام؛ فكرت اشتري ماري لو ع بداية نزولها لكن كنت مرتاحة وللآن مرتاحة على الكريمية لكن اغرتني انسازيا و كنت مقررة اشتريها و بعد تدوينتك راح اعيد النظر أكيد لأن الباودر تخفي العيوب و برضو ممكن اللي عندي يكفي
بخصوص ملاحظاتك فعلاً صحيحة و بالأخص الاضاءة أحياناً تكون هي السبب بالتخبيص و كثرة اللمعة و غيرها؛؛ لمعة بوبي براون كانت عند اختي من قبل ابدا احط ميك اب و كانت تلفتني كثييييير حسيت بحنين لما شفتها عندك
الله يحرم يدينك عن النار يا رب 🙂
صباح الورد
ماشاءالله الله يعطيك العافيه موضوع شيق جدا صح طويل بس غني جدا بالتفاصيل الجميله زي عوائدك بصراحه كنت متحمسه عشان اطبق عندي مناسبه ان شاءالله بكره بس بعد التدوينه حسيت انه لازم اجرب بيني وبين نفسي اول عشان مااجيب العيد لاني صح احبها بس ماقد جربتها بطريقه جديه عشان كذا الموضوع محتاج اعاده نظر فيه اشياء كثير كنت غافله عنها
ربي يعطيك العافيه ياعسل….
مرررة حببيت الموضوع ، احب الميك اب الديوي مرررة في حاجات كنت ما اعرفها وعرفتها بفضلك ،، الله يسعد قلبك يختي ?? تحمست اعرف اش الاشياء اللي ممكن نستخدمها للبودرة لان انا بالنسبة لي استخدامي لها يقتصر على ٣ شغلات ..
أهلين سوس أضفتك بالسناب أمس بس ماتوصلني سناباتك فمستغربة وأتمنى أتمنى أعرف السبب???..
وبالنسبة للتدوينة فعلاً طرحك وشرحك للوك بجد لا يعلى عليه ..
دوماً مميزة سواء بالأسبقية بالطرحة أو بطرق الطرح والنقد..
شخصية مستقلة مثلك أتمنى له التوفيق بحياتها..
أحبك?
أموواااااه?
تششاوووو
التدوينه ماشاءالله دسمه مافيه مجال لسوال يابعدي
كفيتي وفيتي بشرحك .. لو اني صعب افهمها شرح كلام لازم اشوف بعيني عشان اقدر اطبق بس انتِ غيييييير توصلين المعلومه وطريقتها بسهوله ..
فعلا كل ماكانت البشره جميله وصحيه كل ماضبط المكياج فيها , واكثر شي خوفني من استخدام لمعه انها تبين المسام عشان كذا اكتفي بمدمع العين ..
و الله يحرم يدينك عن النار يارب .. و باذن الله راح اجرب
يامسساء الجمال والجو الحلو والتدوينه الاحلئ ❤❤
تدوينه كافييه وربي انك مدرسسسسه مدرسه تعلمييين ادق التفاصيل
وماتغفلين عن شي لبااك والله ❤❤❤
انا وقعت بغرررام المنتج كونه بخااخ احسسه سهل الاسستخدام
ان شاءالله راح اقتنيه قرريب واقولك تجربتي معه .. بخصوص اللمعه
انا قبل كنت احب اللمعه واحب لوكهاا بس كنت احطها ع جسسر الانف
انا خشمي صغير ومافيه زوائد حمدلله بس جد كان يعطي شكل واااو
احس ماتكمل طلتي وتزين الا بهاالتكنيك .. راح اطبق كلامك ان شاءالله فيه اموار انا غافله عنهاا
مرره حبيت شرحك ربي يخليك لاحبببابك متعوب عليه الله لايحرمني❤❤❤❤
❤❤❤❤
شكرا ياسوس شكرا من الاعمااق ❤
كفيتي ووفيتي
يامساء الحب
انا اكثر شي تحمست له البخاخ لاني احب الديوي كثير لكن مااضبطه وخصوصا بشرتي جافه
واللمعات اكثر شي اخطه على الشفه او مدمع العين
لكن بحوس فيها لين اضبطها ?
يعطيك العافيه وربي يوفقك ويسعدك
الكلام عندك يوقف ماني عارفه لكن مااقول الا ربي يسعدك ويحقق لك اللي تبين
الله يعطيك العافية يارب ..
تدوينة شاملة ماشاء الله ..قرأتها على جزئين امس واليوم ..
تسلمي لنا يا أحلى سوس ?❤
السلام عليكم
أرتوووووس ❤️ ❤️ ❤️ من زمااااان مارديت على مدونتك :”(
الموضوع ماشاء الله كافي ووافي ❤️
مرة أعشق الهايلايتنق وجدا انبست يوم صار موضة صار عندي عذر لما أحد يقول ليه ماتحطين كونتور أقول مو لازم مسوية ستروبينق هو عالموضة، يعني صار أسهل الرد عالناس، مو مثل أول كنت أقول ما أحب الكونتور وبس وكان الكل يدخل بنقاش معي عن الموضوع، افففف طيب ما أطيق الكونتور وبس مو غصب 🙂
بأسألك شي، أنا الى الآن مابعد تجرآت وحطيت إضاءة على أنفي، أنفي قصير وعريض شوي لكن صغير، ماجربت احط إضاءة على الأنف، تتوقعين يناسبني؟ مع ان أنفي مو طويل ونحيف؟ وللمعلومية أنا ماأطيق الكونتور أبدا، فمستحيل أسوي كونتور لأنفي ثم أحط إضاءة..بس أبي رأيك.
وبالنسبة لإضاءة اناستازيا، قبل كم يوم كنت بأشتريها من الموقع الرسمي، لكن للأسف مالقيت الا لونين فقط: Peach Nectar – Riviera
كنت ناوية أشتري سو هوليوود أو ستارلايت لكن كلها غير متوفرة..مابقى الا هالثنين تتوقعين ايش يناسبني؟ درجتي فاتح إلى متوسط، ولا ما أشتري ولا وحدة وأنتظر لما يجيبون الدرجات اللي كنت أبيها؟
مرحبا ارتوس انا من سنة مدمنة مدونتك،بتكلم بشكل عام مو بس رد على هالموضوع،،استفدت منك كثييييير كثييير الله يسعدك دنيا وآخرة واحس بالذنب كل ماقريت موضوع وما ارد لو بشكر بس انا مو من هواة الكتابة كثير بس من حقك علينا انا نرد ونشكرك مثل ما انتي تكتبين وتتعبين .. ماشاء الله .. الله وهبك اسلوب يخاطب القلب مباشرة ويعلق بالذهن انتي ماتمرين مرور الكرام انتي تتربعين بالقلب والوجدان وهذي هبة من ربي مو اي احد يمتلكها .. اول ماتعرفت ع مدونتك قبل سنة كنت ابحث بقوقل عن الكونسيلر وطحت ع موضوع وش طوله بس انسحرت باسلوب كاتبته بالعادة اذا دخلت منتدى ماقرأ اسم الكاتب بس كنت اقول هالبنت وش زينها اسلوبها يجنن وطلعت بعدها بالصدفة عرفت مدونتك ومن اول موضوع قرأته ذكرت ذيك البنت صاحبة موضوع الكونسيلر نفس الاسلوب ورجعت دورت عليه ويالسعادتي يوم طلع لي نفس الاسم ارتوس. من وقتها ادمنت مواضيعك وحكيك وعلى طولهاماشاء الله القى نفسي اقرأها اكثر من مرة ..استانس كثير اذا فيه شي يعجبني ونفس الشي يعجبك .. يمكن لانك صاحبة ذوق رفيع .. وكثيير احب حكيك عن امك الله يرحمها احب التأثير الله تركته فيكم ونفسي اترك نفس الاثر في بناتي لو باجلس اكتب مابينتهي الكلام.. بالنسبة للإضاءة اكثر شي يعجبني في الميك اب واحب كثير اللوك الديوي نفسي اطبقه وانا بشرتي جافة ياليت ترشحين لي اضاءة كريمية لان الاضاءة الباودر ماحبيتها وماعطتني اللوك اللي تكلمتي عنه تطلع خط لمعة في وجهي وكرهت هالشي .. موفقة حبي..
اول مره اقرا المدونة بدري واوصل بسرعه للنهايه واقدر اعلق ههههههههه
مدونة جميلة وشرحك كالعادة سلس وبسيط بشكل غريب
مساء الخيرات ??
من التدوينات اللي اقرأها مره ومرتين وثلاث لان فيها تفاصيل مهمة وماشاءالله عليك ماأهملتي ولا نقطة كفيتي ووفيتي ربي يسعد روحك سوووس ???
على الرغم من اعجابي الشديد بالكونتور الا انه عمري ما جربته
عندي قناعة ( قد تكون مضروبة و مالها داعي ) انه اي مكياج يغير ملامحي الأفضل اني ما أحطه !!!!!
على رأي وحدة من صاحباتي تقول انه يناسبني الميك اب القوي بس بالنسبة لي ارتاع من شكلي اذا كنت حاطة ميك اب مغيرني ١٨٠ درجة بغض النظر عن مدى جمال الشكل بس احس انه مو انا ( حتى لو اللي مزيني بسام الفتوح و الا فادي قطايا ما ح يعجبني و بأظل احس اني فيك جددددا )
المظهر الديوي ك موضة أحب لنفسي بكثير
لكن مشكلتي في بشرتي الدهنية ،، هي من الله تلمع و احاول أسوي كونترول على هالمشكلة ،، يعني اي لمعة احطها ممكن تنتهي بكاااااااارثة
تصدقين
مرات مدونتك تخليني اتحسر ع نفسي
منتجات اتمنى لو استخدمها من جمال طرحك لها ،، بس للأسف ما اقدر
ادين لك بمنتجات عرفتيني عليها و صارت جزء لا يتجزا من حياتي
فاونديشين جيرلان كان نقطة تحول بالنسبة لي من كثر ما لائمني
و جل الحواجب من انستازيا كسر في عيني كل منتجات الحواجب اللي استخدمتها من قبل
المصيبة انه جل الحواجب و البي بي كريم تبع تارت صرت ما استغني عنهم
و في السعودية ما ألقاهم
و للأسف كثير من التاجرات استغلاليات اكثر من وكلاء البراند نفسها
فصار الحل الوحيد اني اطلب الغرض قبل الهناء بسنة
يوصلني بطلوع الروح
استغرب جددددا انه على الرغم من الإقبال المحموم على الميك اب بالسعودية
الا ان السوق فاشل جدا في تلبية طلبات المستهلك !!!!!!!!!
مثلي بالضبط ما أطيق الكونتور وأرفض أسويه، ليه أغير ملامحي؟ أحس الكونتور اذا استخدمتيه كأنك تقولين أنا غير جميلة بأجمل نفسي وأحور في ملامحي..
بنهاية اليوم اذا أزلت المكياج بأحس اني غير جميلة، عشان كذا أرفض أسوي كونتور هذا غير عن اني أحس اني جدا مزيفة.
أعشق الديوي لوك والستروبينق.
يعطيك العافيه على الشرح تكلمتي عن كل شيء بالتفصيل ❤️❤️❤️
صادقه انا اضاءه غرفتي ما تبين بس اذا خلصت اروح اشوف في مكان ثاني واعدل الحوسه ?
ماشاء الله بوست متكامل ومرجع للكل ،،
يعطيك العافيه ارتوس??
واحشتني مواضيع المكياج موووت ونفسيتي مفتوووحة اتطور واتعلم اكثر بصراحة من زمان ماتحمست لموضوع ميك اب مثل موضوع اليوم لان الاضاء او اللمعه حقت اللوك الديوي هي احد الاشياء الي تخليني اعشق المكياج بذات من ايام المجلات سيدتي ولها كنت انسطل من جمال هاللوكات والحمدلله صار بامكاني الحين اتعلم بفضل الله ثم بفضل التقنية وانتشار الموضة السريع.
طبعا كعادتك دايما تفاجئينا بامور مهمة ونقاط جديدة علينا وبذات يوم ذكرتي ساالفه اللعب باسماء المنتجات التجارية واعادة طرحها من جديد بالرغم انها موجودة من زمان ايضا ذكرتي ان هالتكنيك مو شيء جديد وانه هو نفسه الهايلايتنق وبخصوص الاخطاء الشائعة هذي حطي تحتها الف خط بالفعل ذكرتي امور كثيرة مهمة والاهم انك ذكرتي الغرض انه البشرة تبان صحية ومشرقة مش لمعة وبس ع الاقل وانا اطبق اللوك اعرف وش ابي اوصل له ووتسهل مهمتي بدل التخبيص او التقليد. احلى شيء انك ركزتي بالتفصيل على مواضع اللمعة لان هذا اكثر شيء يحيرني وانا احط المكياج حتى انواع وطريقة اختيار اللمعة افادني ووفر علي ووقت وجهد تخيلي كنت بشتري اشياء مالها داعي بس الحمدلله الحين بشتري وانا عارفه وش احتاج بالضبط وزين تكلمتي عن الفرش هذا جزء من المشكلة للي ماتعرف مثلي تحط لمعة وحتى المنتجات بخاخ تاتاشا والعصار ومقارنتك بباقي انواع الاضاءة بيكا وانستازيا شيء اضاف للموضوع الكثير وشخصيا ارتحت يوم عرفت الفرق وخواص كل نوع.
تسلم هَـ الروح الجميلة المعطاءة مَ ننحرم منك ♥️
هلا وغلا بالزين
يعطيك العافية ارتوس
مواضيعك جميلة .. استمري وربي يحفظك
حتى لو نزلت ريفيوهات عن منتجات أكون متأكدة إني مو قادرة على شرائها ومع ذلك الفترة الأخيرة صرت أقرأها (عكس أول ما أقرأ الريفيو إذا شفته غالي) لأن مثل ما قلت الشركات صارت تنزل منتجات لغرض التجارة وأنا أقرأها عشان بس يكون عندي اطلاع على الأشياء اللي نزلت السوق غير أحس مواضيعك أرتوس إلا ما أطلع منها بفائدة شخصية
فربي يزيدك علم ويحفظك من كل مكروه
عندي سؤال عن البلاشر .. هل من طرق وضع البلاشر الصحيحة إنه ما يوضع بالقرب من الأنف لأن لاحظت هذه المنطقة فيها مسامات تبان مع البلاشر
كمان هل لو استخدمت الثلج يوميا على بشرتي ممكن تخفف من المسامات والأهم هل بشرتي ماراح تضرر من الثلج يوميا؟؟؟
بشرتي غير دهنية أقرب للعادية لكن فيها مسامات (خصوصا في الخدود وأرنبة الأنف) يمكن بسبب مناخ المنطقة الرطبة، فمع المكياج تبان المسامات حتى لو استخدمت برايمر
جربت استخدم الدفيرين وإلى الأن استخدمه ومستمرة (لي حوالي 8شهور من استخدامه) طبعا لاحظت إن بشرتي تحسنت لكن مشكلة ظهور المسامات مع المكياج ما انحلت
دمتي دائما بود :))
تدوينه جدا رائعه وانتظرهتها بفارغ الصبر بس صار ظرف وما قدرت اقراها الا الحين
الاضاءه لها دور كبير بالمكياج واحب وجودها في المكياج
انا استخدم الاضاءه السائله و البودريه وجد احب السائله اكثر لانها تعطي لوك طبيعي اكثر
الله يسعدك ارتوس على هالفوائد الي تقدمينها لنا قلووب إلى عندك
ما قصرتي والله تدوينه بالنسبه لي عطتني المفيد و وصلت لي الفكره
عندي لمعة ماري لو بس ما اقتنيت غيرها ولا جربتها بهاللوك يبي لي اتدرب عليه
ملامح ويهي يبيلها دقه ولا بيبين عليها الغلط شنيع جداُ ..
ان شاء الله بعد هالتدوينه عرفت شاللي راح اسويه والله راح اتجنبه …
شكراً لج يا جميله
ماشاء الله دايماً مواضيعج متعوب عليهأ عندج كاريزمآ جداً
مميزة مافي أحد يشابهج فيها .. حبيت ذكرج لبداية ظهور موضة اللمعة
أنا بصراحة أذكر الكل كان متخبل على خدود كيم كارديشيان قبل ٦ سنوات ههههه
وفي ناس عبالهم تحط فازلين بخدودها ..
يعجبني جداً الللوك الديوي بس للأسف بشرتي دهنية وبسرعة تدهن 🙁
بس أستفدت وااايدد من موضوعج يعطيج ألف عافية حبيبتي .
هلا ارتوس طولتي علينا مانزلتي تدوينة اشتقنا لك ❤️ اكيد بسوين شي جميل كعادتك، المهم انتي دائماً تفيديني و اعتبرك مولهمتي وانتي شخص مفيد للمجتمع انا عن نفسي استفت منك الكثير مو بس انا لا بعد اختي تستفيد منك انا دائمة بضل ادعمك حتى ان سويتي شي مايعجبني انا مراح اعصب ولا اتليقف لان هذي حياتك الخاصة بس بعلق على اللي يجبيني مو مثل بعض الجهلة اللي لانستا يهاجونك على اي شي و على العموم اول مرا كذا اهتم لمدونة عربية ! لاحظي مو سعودية لا عربية بصراحة يعني احسك تبين تفيدينا على اي شي وانا اقدر هذا الشي منك واحبك واتمنى لك قد الافادة اللي تعطينا ايها تنرد لك واكثر❤️يعني انتي فتحتي عيني على اشياء ماكنت اعرفها واحبك سوس❤️❤️
واتمنى تعليقي يسعدك
Hey Artos,
Perfect post as usual.. love all the lil details..
as u said it’s so scary the way some of the bloggers how they use the stobing in a ascary way..
one of the nicest products for a perfect stobing is Ambient lighting Palette from Hourglass. I have a modest post about it in my humble blog.. take a look it might be useful for u..
Thanks
Sophie
ما شاء الله كفيتي و وفيتي .. موضوع جميييل ولازم كثير ناس يعرفوه كون الستروبنق موضه هالوقت وكثير هابين فيه بطريقه غلط ?..
صراحه انا وجههي في مسام صغيره تبين مع المكياج .. فحاليا ما احس ان اللمعه تناسب وجهي …جربت كم مره حسيت الشكل مو حلو مره .. فلين ما احس وجهي صفى مره بحطها ان شاء الله ?
يعطيك العافية صراحة التدوينة مرره حلوه ومهم بالنسبه لي لان وضحت لي اشياء كثير بس حبيت اسأل عن ماك فكس بلس هل يعتبر بديل لبخاخ تاتشا او يأدي نفس النتيجة؟!
لان كل يلي استخدموه وتكلموا عنه كانو يقولون نفس شي انه تبخين قبل المكياج وانه يعطيك مظهر ندي للبشرة ..الخ
رائع الكلام والشرح الوافي وسبحان الله مهمااسهبت وطولتي بالشرح كلامك ممتع ومفيد ويدخل القلب مررره ومايقنعني غيرك حدا
الليله لفيت بمدونات كثير اسوي بحث عن منتجات عنايه بالشعر المصبوغ وانواع السيرم ?ياربي مااحد مثلك مخلص بالشرح ومايخلي نقطه ممكن اسال عنها لازم يغفلون شيء مثل اماكن الشراء او السلبيات او سعره
الله يجزاك خير ياشيخه على وفائك لمتابعينك
وبخصوص اللمعه واللوك الديوي اموت فيه ويناسبني لان بشرتي شبه جافه
واستفدت كثير من هالتدوينه
عندي لمعه ماك سوفت اند جنتل وماشي حالها عمليه
وجربت الكريميه بنفت هاي بيم
روعه وافضل من الباودو وشكلي برجعلها
بس كيف وضع اللمعه مع البودره الشفافه
كيف احطهم مع بعض
احيانا استخدمها لتثبيت الكونسيلر
استخدم كمان فكس من ماك وحلو مابه شيء ?كخطوه نهائيه
بس شكل البخاخ تبعك افضل
لك كل الحب ??❤️
يسعدلي مساك ?
حبيييت هالتدوينة بشكل! غنية جداً من ناحية الشرح و عرض المنتجات
حبيت والله
انا من الناس اللي ازعجتك بكل مكان عن الديوي لوك و الهايلايتيتق و هالسوالف ؛ بس عشان اتأكد انها ما تناسب لي
و فعلا اليوم تأكدت انه مش اللوك المثالي لي .. استسلمت خلاص
زمان كنت الوم المنتج بعدين قمت افكر بالتكنيك
لكن الحين خلاص فهمت ☹️
لان بشرتي دهنية و عندي مسامات واضحة
فكل هالشغلات راح تبين عيوبي بشكل يتعبني ?
عاد اسمحي لي اطلبك لوك سموكي و بعض التكنيك اللي يفيد
انا احب عيني تكون كحيلة بدون استخدام كحل!
ساعديني بأفكار للوك مثالي
مع اقتراح لارواج نود .. كدرجة لون ؟
مع كل الشكر و التقدير لشخصك
اسعدك الله و عن الشر ابعدك ❤️
مسائك ليلك ..
ماشاء الله تبارك الرحمن .. اول موضوع يتكلم عن إضاءة الوجة بهالشكل الدقيق والمفصل ..
لفتني مو بس إلمامك بالأمور الجمالية .. اتقانك للسرد بلغة جميلة والفاظ انا شخصياً اول مرة تمر علي مثل (التقزح ) كلمة ميلة تصف المعنى
اللي غالباً دارج بلغة اجنبية ..!
ع العموم لو بقول كل اللي بخاطري ماراح تكفي صفحات .. لكن حبيت اقل شي اشكرك على تنويرنا بشغلات مهمة لمكياج صحي ونظيف ..
شكراً بحجم السماء .
ليلى*