صَباح / مَساء الجمال
قَررت أعَيد طرح أحد المُنتجات المُميزة وَ سبق وَ طرحت عنها مَوضوع بتاريخ : 20-05-2012
لَكن بشيء من التَفصيل أكثر بَما إن التَجربة أسَتمرت حتى الآن ..
مَوضوعنا عن قفازات وَ جوارب البارافين من شركة بلِس
وَ عَدة خيارات أُخرى ..
Bliss Glamour Gloves + Bliss Softening Socks
سَعره : المُنتجين بـ ٥٠٠ ريال سعودي ..
أماكن التواجد : بلس دبنهامز المَملكة
فَكرة المُنتج ،’
المُنتج عبارة عن قفازات وَ شراريب تَحتوي على مادة البارافين , يَعني مُش مُجرد قماش خالي من أي مادة
وَ هذا شكلها من الداخل ..
كَما تَحتوي على : زيوت الفواكة , زيت الكانولا , زيت بذور العنب , زيت الجوجابا
رأيي عَنهآ ،’
المُنتج ليس بَديل للبارافين الساخن , لأن البارافين الساخن أكثر فائدة من مُجرد ترطيب لليدين وَ القدمين
لكن هذا المُنتج يعطيك جَزء من فائدة البارافين وَ بنفس الوقت يسهلك العناية باليدين وَ القدمين بالوقت إللي مايكون عندك وقت للجلسات المَطولة
برضو مو كل الناس عندهم القَدرة على تَحمل حرارة البارافين , أو ما عندهم خبرة بالبارافين
بَعام ٢٠١٢ م كنت مَسوية مقارنة بين هالمُنتج وَ منتج سيفورا إللي إسمه : Sephora Spa Socks + Sephora Spa Gloves
ما أنصح بشراء مُنتج سيفورا لأسباب مَنها : ثقل المُنتج أثناء الإستخدام تحسين المُنتج ثقيل وَ بنفس الوقت مافي سَلاسة أثناء نزع المُنتج
يعني لما تجين تفسخين القلفز وَ الجوارب لازم تَشدين وَ هذا وَ أنا حَجم يديني وَ القدمين عَندي صَغير
وَ عفكرة كثير ذموا مُنتج سيفورا , لَكن حُبي للإستكشاف خلاني أجربهم الأثنين حتى أحكم صَح
مافي هالفَرق الشاسع لكن هذي أفضل , طبعاً هالفكرة مَوجودة بعدة ماركات أخرى لكن غير مَتوفرة بالسَعودية
وَ الأكثر شُهرة هي بلِس
طريقة الإستخدام ~
يُستخدم مَن مرة لـ مرتين إسبوعياً ..
[ من راسي لأن مو مَكتوب شيء من هالقَبيل .. ] ..
أنا أدهن يَديني بكريم اليدين وَ القدم بكريم القدمين وَ أنتظر الكريم يَمتصه الجسم لمُدة ٥ دَقايق من ثُم ألبسهم لمُدة ٢٠ دَقيقة قبل النَوم ..
وَ من المُمكن النوم بَها بس ما سَبق وَ نمت بها ..
طَبعاً بعد ما تَزيلينها بتصير يَدك مَعرقه , وَ قتها لا تَغسلين يَدينك أنتظري العَرق يجف وَ نامي
[ لا تتقززون لان الكلام يَظهر الشيء مُقزز لكن هُو مُجرد نداوة مُش عرق يتصبب نابع من مَجهود بَدني ] ..
كيف أهَتم بالُمنتج ؟
بما إن الَيدين عرقت فشيء طَبيعي راح يكون المنتج نَدي
فبكذا تشيلين القفاز وَ الجوارب وَ تخلينها على نفس جهة البارافين عَشان تنشف , وَ تمسحينها بأسفنجة رطبه وَ باردة
بحال حسيتي إنها لزجة رشي عليها شَوية بودرة وَ لما تنشف من النداوة رَجعيها العلبة
أو حَطيها بدرج للحَفظ
المُنتج يَكفي لـ ٥٠ إستخدام ..
فيه تناقض بالكَرتونه مَكتوب بالإمكان غَسلها بالحالات القَصوى وَ بموقعهم كاتبين لا تُغسل ..
لكن شَخصياً ما أغسلها , أستخدمها لين ما أحس بدأ الوسخ يتضح بها من ثُم أرميها ..
طَيب بالأيام العادية وَش تلبسين ؟! ..
قفازات ذا بودي شَوب ماعجبتني تنشف اليدين وَ تمتص الكريم ..
وَ حالياً ما أروح فرشي إلا وَ أنا أقلب إما بالأنستا أو الواتس آب .. فصرت ما أسَتخدم شيء ليَديني
أما القَدمين حَسب المَزاج , يومين أتذكر وَ يومين أنسى وَ هكذا , لَكن تواجدها حلو بالبرد
أستخدم جوارب من باث أند بَودي وركس وَ عفكرة مو دايم مَتوفرة , فلذلك إذا لقيتوا مَنها خَذوا كَمية خاصة إن السَعر جَيد : ٥٥ ريال سَعودي
Bath and Body Works
Foot Shea Socks
مَزايا المُنتج ،’
مشبعين بزبدة الشيا وَ العطر ، العطر يكاد لا يذكر يعني يادوب ريحة نظافة
وَ الشيا ما بتحسون بشيء ما كأن فيه شيء أبداً بس لها تَأثير خفيف وقت النوم
وَ أنا أدهن رجولي قبل النوم وَ ألبسها , مو يعني أكتفي بالشيا ..مثل ماقلت ماراح تحسون فيها شيء أبداً
وَ أكيد تغسلونها لأنها تَتوسخ بسرعه مثلها مثل أي شراب ( جوارب )
لكن اهم شي لاتغسلونها بماء حار ، وَ لا تكوونها وَ الأفضل ما تستخدمون منظفات قويه
زبدة الشيا راح تظل لـ 25 استخدام ، بينما العطر من 8 إلى 10 إستخدامات وبعده تقدرين تستخدمينه كجوارب عاديه
وَ هذا شَكلها وَهي مَلبوسة ..
لاحظوا النَقط بالأسفل , هذي نقط تمنعك من الإنزلاق وَ التَشقلب , يعني تقدرين تلبسينها بَغير النَوم وَ تتحركين
طَبعاً راح تَحصلون شَراريب غيرها مُخصصه للنوم عند إيتام , آويشو , ومن سَيكرت ..
لكن هذي أفضل بَمراحل مَنهآ .. أهم شيء نَهتم الشراريب تَكون مخصصه للنوم , بالإضافة بالإمكان الجلوس بها داخل البيت بَغير أوقات ..
عيوب الشراريب العاديه ~
• الشراريب العادية مُمكن مع الوقت تشد وَ تضغط عالجلد ..
فتضعف الدورة الدَمويه , حتى ممكن تقومين تلقين رجلك نفس شَكل الشراب .. إذا مخطط جلدك يتخطط , علامات الشراب تلقينها برجولك
• الشراريب العاديه مُمكن تحتفظ بالرطوبه أو تنشأ رطوبة، وَ الرجول بشكل عام ما تتقبل الرطوبه , فتطلع عفونة وَ بكتيريا وَ على طول تصير القدم مَروحه .
• الشراريب العادية أحياناً تكون من نسيج قوي زَياده فلما ترطبين رجولك وَ تلبسين شَراب
وَش يَصير ؟! كل الكريم تَمصه الشراريب مَص، فما يَبقى شيء لرجولك فتنشف ..
دُمتم بَحب
ارتوس حبيبتي عندي استفسار انتي ذكرتي ان نوعية بشرة أختك دهنية قابلة لظهور الحبوب طيب هي كيف متعاملة مع هالشي او كيف تمنع ظهورها ؟ او عادي عندها p:
تَخيلي عادي عَندها !! .. مايَصحش ..
حَبوبها تَظهر قبل الدَورة , مُمكن حبة حبتين بالشهر .. تتعامل مَعها تستخدم زي غسول ديرمالوجيكا قبل الدَورة ..
تستخدم رتن أ , حتى أنا أستخدم رتن أ نفس العناية اللهم هَي أكثر حرص مَني .. لأن ممكن لو أهملت مَعناتها الوَعد قبل الدَورة بتطلع لها الحَبوب ..
أما لو أهتمت ماراح تَشوف الحبوب ..
شكراً جزيلاً لان انا نفس بشرتها قابلة لظهور الحبوب و معاناة بصراحه
حَسب نَوع الحبوب تَحددين نَوع العلاج ..
وَ لو أخترتي العلاج الصَح مُمكن ما عاد تَشوفين حُبوب نهائياً ..
ياحبني لك
كلاااام راءع كروعتك ارتوس الله يسعدك
كتبتي موضوع قبل عن العنايه الشخصيه وقلتي انه بتكتبين اسماء الكريمات حقت العنايه بالبشره مع اسعارها بس مادري هل نسيتي ولااا لانه مستعجله اشوف مدحك او ذمك للمنتجااااات
دمتي في حفظ المولى
تَواجدك الأروع , ذكريني بأسم المَوضوع ؟! ..
نورتيني
صباااااح الخيرااات
اسم الموضوع سلسلة العنايه
يسعد صباحك ارتوس
وَصباحك ..
فعلا هالاشياء تسهل العناية كثييييير
عندي قفاز من ماركة ثانيه والله لاعرق ولا يحزنون
يدي تشفط كل شي شفففط من كثر ما هي جافه
تسلمي لنا ارتوس ماعرفنا هالحاجات الحلوة الا منك
وذكرتيني بجو شمواه يالله ما انسى واحنا مسنترين
على الشاشات كل شوي نحدث الصفحه وانتي تكتبين
واحنا معاك بنفس الوقت
واراقب اسمك تحت موجوده والا طلعتي
يازينها من ايام
يا هَلا بالزين كَله , دُوم مَنورتيني يالجَمال ..
وَ كان زَمن شموآه زَمن جَميل , يالله الآن نَتحمس عالأنستا الآن
دائماً وَ أبداً لك بَصمة بَتدويناتي , لا خَلا وَ لا عَدم بعد قلبي وَ الله
وَ صحيح أمس صححت تدوينة الغَسول راجعيها لأن كان فيه غَلط مَع السهر وَ اللخبطه ضَيع عَلومي
للاسف مومتوفره عندنا محلات المنتجات الي ذكرتيها
بهالمدونه
احب اجررب كل شئ تكتبين عنه اذا لقيت مناسب لي
احسس مره تنفع لي زي ماذكرت بشرتي جدا جافه وخصوصا الاقدام لواتركها يوم ماارطبها تزعجني كثير بجفافها
يعطيك العافيه حبيبتي
للأسَف .. الجَود من المَوجود
بإذن الله تَجدين بديل نافع , وَ نورتيني وَ الله
أهلا آرتس
انا عندي جرابات ثانية من شركة أخرى
حسيت أنها مجرد مرطب أو كريم
وكانوا كاتبين الاستخدام اليومي ( 40 مره )
وبعد الاستخدام تحسين يدك ترطبت وصار فيها نعومة ~!
نحتاج نجرب “دلاغات” بلس ونشوف الفرق
تسلم لي يديك على المدونة البطلة
ياليت ذَكرتي إسم المُنتج حتى تَعم الفائدة
وَ أتوقع أغلبهم نفس الفكرة بَفروقات بسيطة جداً ..
وَ أسعَدت بوجودك يا قَلبي ..
ياصباح الكمال والدلال …
زين زين نبهتي على شراريب وقلفزات سيفورا والله كنت ناويتها خلاص بشيلها من راسي وبشتري بيلس من علياء على خير بأذن الله …
اذكر لمن كتبتي عن شراريب باث اند بودي ووركس قبل ثلاث سنين تقريبا او اكثر كنت بالرياض ساكنه عندكم رحت دورتها على طول مالقيتها ودورتها مرره ثانيه مالقيتها ونفسي فيها الى الان …
انا استخدم بالعاده شراريب شتويه تجي واسعه من عند الساق متهدله شوي بس كلامك ان سماكة الشراريب اتجفف بالفعل وانا حاطه كريم احيانا من بعض الشراريب احسها جافه رجلي …
ويعطيك العافيه حبيبتي …
ماننحرم منك … ولا من زولك
يا هَلا برشآ ..
شَوفي لو بتتكلفين لو تشترين جهاز البارافين أفضل وَ أفضل طبعاً إذا حابه تتقنينه وَ تَتعلمين عَليه ..
بخصوص شراريب باث أند بودي وركس قوليلهم شراريب الشيا لأن هي بزبدة الشيا
دايم مَوجودة أخر مره كان شَكلها ضَفدع , ركزي عليها زَين الأن الموظفين مايركزون بتلاقينها وَين ؟! بالصناديق الصَغيرة بحاول إذا رحت السَوق أصورها لك
وَ أرسلك إياها , وَ عسى الله ما أنسى ..
بعض الشراريب العادية تسبب حَكة أو حرارة .. أو تَمص نص الكريم فتضيع الفائدة ..
وَ يالبى قَلبك يا رَشو , دوم مَنورتني يالجَمال
رد صغنون قبل مااطلع مااحبيت امر مرور الكرام
يحليل القدمين كانهم قدم بيبي ماشاء الله
انا جربت البيبي فوت صحيح قشر لي وتعدلت كثير بس اذا نمت وصحيت احس بحراره فضيعه بباطن القدم رغم اني ارطب من قلب
لي عوده لاحقا اقرا مرة ثانيه
وصباحك سعاده
يا صباح الورد…ايه هذا الموضوع الزين الي يصلح للامهات المكروفات مثلي الله يسعد قلبش بس مدري تتعارض مع جرعاتي والا عادي!!اتوقع عادي مجرد ترطيب مايضر طفشت دكتورتي من كثر ما اسال احس بتحط لي رقم مخصوص ههههههههه
يسعد لي الصباح اللي بوجودك..
وش ذا انتي كمية جمال والله.. اذا شفتك منزله شي
في الصباح تجيني سعاده
عاد مع تقلبات الاجواء صايره يدي تنشف بسرعه تلقين المرطب في جيبي كل شؤي ارطب
هههههههههه
هالشراريب كل ماوصيت مندوبه تقول مخلصات
اثريك توصين العالم تقش ههههههه
بنات بالله الشهر الجاي خلو لي وحده بس بجربها
تسلميين تسلميين تسلميين على هيك تدوينه
وعلى طاري ردك عن رتن أ
وش البديل عنه
لانه مقطوع من اسواقنا
سووس طلعيني من مدوونتك .. ماشاءالله هو اسلوب هو فايده
تكاااامل من كل شي ماشاءالله عليك .. ويعجبني فيك انك ماتسوقين للمنتج لغرض مادي .. ونصايحك من قلب .. الله يسعدددك
اييه نسيت اقولك انها راحت ساعتين ماحسيت هههههههه
صباح الخير ارتوس
تسلمين عالمجهود اللي تبذلينه، انت موبس التدوينه اللي تكتبينها مفيده ! لا حتى تعليقاتك وردودك الا مااطلع بفائده او معلومه ، سواء هنا او بانستقرام
واليوم طلعت بوحده منهم ، قريت انه اختك تستخدم رتن أ ، هل لازال ينباع ؟ لان فقدت الامل انه الاقيه صراحه ، سؤالي من وين اشترته ؟ حتى لو برا السعوديه عادي
وشكرا مقدما
يازينك ياارتوس
انا متابعه انستقراميه عتيقه بس ويني عن هالجمال البلوقي
حمستيني وحسفتيني على شراريب باث اند بودي ووركس
ليتني قشيت منها قبل ارجع للسعوديه
الحبه ب 8 دولار
شكرا لك ياجميله
صباح الجمال انا شاربه زيهم مررره جميلات ويرطبون حبيتهم مره من pamper me وتسلم يداتك على هيك تدوينه
توووسة عارفة صار عندي ادمان على مدوناتك ههههههه
وبخصوص ترطيب القدم انا رجلي كل ما اشوفها احب ارطبها ومع ذلك لسا اشوفها مو موحدة .. قرات مرة السبب من الفلات وانو الافضل بالطلعات الجزم ومشكلة اخرى احنا بيتنا جلسة عربية فيصير الاحتكاك اكبر مع اني احاول اخترعلي جلسة من غير ما احتك هههههههه
شكرا ارتوس على كل شييي
الله يوفقك ويسعدك
تصدقين ارتوس مقدر البس شراب وقت النوم واذا نسيت ونمت فيه
اصحى احس فيني شي وبس انزله ارتااح واحس ببروظه برجليني
بنتحر من انه مايكمل تعليقي
ونن اخطائي الاملائيه
طيب ارتوس انا جريت الجوارب هذي واصلا من زمان هذي عنايتي وارطب بس منطقة كعب القدم غامقة مره حامت كبدي منها جربت مقشرات تركيبات ما نفع وجربت محلول مقشر قشر بس يطلع لون وردي بدل المقشر و يظل كذا بعدين مع الأرض يقلب غامق بس الوردي لونه ملفت شيء يجيب الياس مره مو موحده أبيه يخف الغامق نفسي انبسط لما البس البالرينا مو اتعقد وراضيه لا يختفي اختفاء تام بس يروح شوي وما اقدر أروح لمراكز او عيادات لان بمحافظه والعيادات اللي عندنا ما نفع معي شغلهم ولا تركيباتهم ومافيه غيرهم جربت بيبي فوت بعد اسبوع قشر بشكل خفيف و لا وحد و لا لون و لا سوا شيء جديد ابدا ولي عنه الحين اكثر من شهرين
الله يعطيك العافيه على قد ماتعطين من خبراتك
مايطلع التعليق كامل
يسعدك ربي على هالتدوينة ارتوس ممكن طلب ياليت لو تتكلمين عن العناية الشخصية وقت الدورة لان صراحة قاعدة اشوف خزعبلات لو اقوله للك يمكن تنصدمين صدمة قويه
ارتوس يااختي الجميله ابي اقولك شي خاص جدًا جًدا مااتوقع اقدر اقوله لاحد غير نفسي وانت
ارتوس ابي اقولك شي خاص جدًا جًدا مااتوقع اقدر اقوله غير نفسي وانت
ما يتأجل الموضوع ابدا
الموضوع طويييل جدًا بالانستقرام ارسله ينفع ؟
اذا ايه بعطيك اكاونتي هنا
شككككرا
ما شاءالله مبدعه … استفدت منك كثير الله يسعدك
دوووب اقرا التدوينه ارتوس حبيبتي هل البارافين هذا اللي بالجوارب هو اللي يستخدمونه بشمع البارافين بالصالونات واذا ايه ايششش يفرقون عن بعض سمعت عنه بصالون اروح له بس جاهله بشمع البارافين. وجزاك ربي خير ع تعبك ويانا حبيبتي
الشرابات العاديه تحرق رجلي تخليها تورم ومهما ارطب ماتترطب ، توني اعرف ان فيه فرق بينهم
يبغالي امر باث اند بودي وان شاءالله البنات مايخلصونها
على فكره تصويرك صاير خراااافي ماشاءالله
حبيت قفازات بلس وحبيت أسم الماركه أصلاً ههههههه
إن شاءالله أشتريها وأجربها لأني تحسمت لها :$
وأحبك يختي.
مره شكرا علي كل شي جميل الجميل مايجيب الا جميل مثله
سلمت يداك ياحلوتي
يعطيك العافية يارب
عندي سؤال عن الرتن اي انا استخدمه وبشرتي دهنية بس اذا جيت احط اساس لو بطلع مثلا معاناة في ان بعض الاماكن تتقشر وحطيت مرطب قبل الاساس نفس الشيء وش الحل الله يخليك مرة معاناة وياليت تكتبي موضوع بالمستقبل عم هالمشكلة لان اكيد كثير بنات يعانون منها ويعطيك العافية يارب
متجدده بسم الله عليك يخليك لنا يارب
كل شي منك منج هههه بكلامي
رووووعه بروعة روحك وعطائك وحبك
مدونتك متنفس لي وحب للحياااه
ع فكره حبيت اسم ريحة الماضي يااااه ومافي احلى من
الماضي الله يجمل ايامنا وايامج بكل الحب والخير ياغاليه
الله يجزاك خير الصراحه موضوع رائع و منتج ممتاز تحمست له
تسلم يمينك ارتوسه على هالتدوينة المخمليه
حاطه ببالي اشتري جهاز البرافين وودنا بتدوينه عنه
يسعد قلبك ارتوس
بقولك خبر حزين
اول كان متوفر بِلس في دبنهامز الحين يقولون قطعوها رحت كذا مره ومالقيت الا بعض الكريمات ومره رحت قالو انهم شالو الستاند كله
جزاك الله خير…كعاده مواضيعك جميله ومفيده
وَياك ..
نورتيني
يعطيك العافيه جدا استفدت و استمتعت و انا اقرأ و ودي تكتبين أنواع قفزات أخرى بديلة ل بلس و جودتها ممتازه
يعطيك العافية مرره استفدت واستمتعت ومواضيعك غريبة ومهمة بنفس الوقت شكرا لطرحك الاكثر من رائع
اهنن ارتوسه شكرا لأنك تتعبين عشاننا وتحبين تغيرين الافكار بخصوص الجمال
حبيبتي ارتوسه قد مره من المرات بأيام حسابك القديم وعدتينا انك تتكلمي عن المنطقة الأنثويه الحساسه
وكيف العنايه بها وكذا
وارسلت لك بشمواه بالدايركت مسج اذكرك ومارديتي علي
حبيبتي متى ناوية تكتبيه مازال عندي أمل وانتظر
أحبتس يابنتي
مرحبا يا جميلة
الله يسعدك عندي امي متضايقه من كفوف يدينها فيها بقع بنيه .. و استخدمت كريمات كثير اسعارها 200 و فيها رغم ان العلبه يدوب تكفي شهر و لا استفادت ابدا .. و قلت لها عن قفازات البارافين و انبسطت يا قلبي .. بس اذا عندك خبر ياليت تفيديني هي تنفع لمرضى السكر ..؟
و شاكره لك مقدما ..
البارافين لا يتناسب مع مرضى السكر وَ إرتفاع ضغط الدم
دُمتي بَود