صَباح / مَساء النظافة
مَوضوعنا مِرْوِح حبتين اليوم
من أكثر الاسئلة إللي تجيني بالأنستا هي : كيف علمتي ليون على إستخدام التواليت ؟
How To Toilet Train Yor CAT !
إستحملوني شوي بمدح وَليدي ههههه لا جد ، ليون على كثر عيوبه وَ أخلاقه إللي مش وَ لا بد ، لكن أحلى مافيه إنه قط ذكي وَ نظيف وَ مطيع وَ وسواسي بحكم إنه خواف ( لايغركم شكله تراه جبان ) .
كثير منكم صار يعرف إني تبنيت ليون لما كان عمره 6 أشهر ، يعتبر نسبياً كبير على التعلم شوي ، غالباً القطط تكتسب أكثر عاداتها بعمر الثلاث أشهر وَ يفضل تعليمها بهالعمر .
ماكان عندي مشاكل بتعليم ليون على إستخدام الليتر بوكس ( تربة قضاء الحاجة ) لأنه بالأصل تربية منازل وَ متعلم عليها ، مجرد ماحطيته له إستخدمه دايركت
لكن بعد فترة مليت من التربة ( الليتر بوكس ) لأني كنت حاطتها بموزع جنب الحمام ، وَ بحكم إنه قط وسواسي ، كان يقعد فترة يحفر بهالتربة وَ بقدرة قادر ألقى التربة وَصلت للحمام ، يعني أتعب شوي بكنس المكان بعد كل دخول له للحمام مع إني حاطه له سجادة تحتها ،ناهيك عن تنظيف التربه كل ماقضى حاجته ( الككا تحديداً )
وَ غير الريحة النفاثة إللي تفوح في أرجاء المنزل في حال تأخرت عن تنظيفها ، وَ للمعلومية أنا مو مَع وضع الليتر بوكس لا بالسطح وَ لا بالحوش ، وَ إللي بيجيب حَيوان منزلي وَ بيربيه بالحوش وَ لا بيرميه بالسطح لا يجيب
المُهم لما صار عمره سنه فكرت أعلمه على التواليت ( مرحاض البشر )
وقتها مالقيت معلومات بالنت عن كيفية التعلم ، وَ أخوي قالي صديقة معلم قطوه ع الحمام ، هنا بدت الغيرة قلت مابدهاش وَش ينقص قطوي بعلمه أخذت الوصف من أخوي وَ علمته .
وَ ما أكذب عليكم لو قلتلكم من أصعب التجارب التعليمية ، من كثر ماتعبت كنت قاب قوسين أو أدنى من الرغبة في الإستسلام ، لكن كل ما أتذكر التعب إللي تعبته أقاوم هالرغبة .
تجربتي بتعليم قطي إستخدام التواليت ،’
المرحلة الأولى ~
تركت التربة بالحمام جنب التواليت كنت أخليه يقضي حاجته في الليتر بوكس العادي
وَ بعدين بعد مايخلص دايركت من قضاء الحاجة وَ يحفر ، أشيل الككا قدام عيونه وَ أرميها في التواليت ( على فكرة إنتبهوا من هالحركة تراها تسد المرحاض تصير مثل البلوك لأن التربه تنفش مع الماء ) ، أكثر من مره عشان يحفظ المكان ، طبعاً لا حياة لمن تنادي ، وَ لا كأنه يشوف ، بس كنت أسوي هالحركة تمهيد ،بعدها بديت بالخطوة الجريئة
المرحلة الثانية ~
جبت حوض على مقاس المرحاض بحيث ماتعيق قعدته على طرف التواليت ، وَ ثبته بالضبط على الفتحة وَ تأكدت إنه ثابت ، وَ فوق الحوض حطيت التربه ، وَ هو دايركت يتبع التربه ، في البداية أول ما تمغصه بطنة يروح لمكان التربة القديم وَ يدور تربته وَ يظل يصيح
( صياح المزنوق )
إضطريت في البدايه اني أدله الدرب ، فعلاً حفظ المكان بسهولة، وَ صار يروح لحالة .
المرحلة الثالثة ~
قللت التربة ، بحيث إنه ماتكفيه ، مجرد رمز للدلالة على المكان ، يعني يادوب تكفية لقضاء حاجة لمرة وَحده ، وَ كانت أقرف مرحلة ماطولت فيها لأنه كان يوسخ نفسه ببوله – الله يكرمكم .
المرحلةالرابعة ~
وَ هالمرحلة طلعت عيوني ، شلت الحوض ، وَ خليته يستخدم الحمام بدون شي كأنه بشري ، في البداية جلس يحوس وَ مو داري وين يروح بعدها طلع وَحفر بالهواء ( هالشيء عادة وَ فطرة عند القطط يحفرون قبل قضاء الحاجة لتهيئة المكان ، وَ بعد قضاء الحاجة يحفرون عشن يخبون العملة السوداء )
ثم قضى حاجتة وَ رجع يحفر الهواء من الجَديد لأن مافي شيء ، طبعاً مستحيل يتعلم يسحب السيفون يعني مجرد ما يقضي الحاجة يجي دورك إنت بسحب السيفون .
إللي تعبني بهالمرحلة ، المراقبة ، مستحيل أتركه يبعد عن عيني لأنه مجرد مايلقى فرصة راح يقضي حاجته فوق أي شي إسفنجي خاصة البول _ الله يكرمكم _ ذبحني هبل فيني
مرة إنشغلت راح لملحق الشباب لأنه مفروش موكيت غليظ وَحط ذيك البولة إللي تشق الراس شق ( بول القطط الذكور البالغة نفاث وَ حاد ) وَ الله فشلني عند أخوي خاصة إنه يجتمع مع أصحابة يومياً ، وَ هاتك يا تنظيف مافي فايدة لا فاد فيه ديتول وَ لا شامبو
وَ مرة ما قصر حط بولة بفرشي ، وَ مرة بفراش أختي ، وَ مرة بصوفا الصالة ، وَ مرة بمدعسة الحمام ، يمكن سواها أكثر من عشر مرات في أماكن متفرقة ، أذكر إني علمته قبل رمضان بكم يوم ، وَ قضيت طول رمضان أراقبة وَ أنظف من وراه ، وَ أخيراً تعلم
بس حذاري تقفلون باب الحمام ، لأن أختكم الخبله سوتها قبل ، من عادتي أقفل الحمام وَ بيوم نسيته وَ نمت ، عاد قمت لقيت باللباد إللي قبال باب الحمام كوكيز ينتظرني كبر قريح هههههههههههه
أهم شي كل مايقضي حاجته أكافأه ، المكافأه أعطيه سناك ( دراي فود ) عاد يعبد هالشي عباده لو أقوله قول أرتوس بيقول
لين جاء يوم أسود وَ كل تعليمي له ذهب في مهب الريح
خربت شغلة في الحمام وَ كانت تقطر موية شوي ، وَ قطوي العبيط يخاف من الماء حتى لو شوي ، تعقد وَ لا عاد دخل الحمام أبد ، حتى بعد ماتصلحت بما إنه قط وسواسي
وَ عاد مافي أمل أعلمه بحمام ثاني بالبيت لأن ماشاء الله حنا حماماتنا ناشفه ما نبللها أبد لما ندخلها ، لوووووول دعابه أقصد حماماتنا ما شاء الله الماء يمشي فيها مثل الشلالات
المهم ماعليكم من طريقتي في تعليم ليون ، أنا قلت تجربتي ، عاد الحين جبتلكم الطريقة الصح ، تشبه طريقتي بس أسهل بكثير وَ لا توسخ .
للمَعلومية ليون لليوم لما يطلع عالليتر بوكس ، يطلع على طرف الليتر بَوكس يعني لا يحفر التربة إنما يحفر أطراف الليتر بوكس يعاملها مَثل مُعاملة السيفون ،وَ هالشيء بالتأكيد يريحني لأن قوائمه ما تلمس التربة ، بالتالي يَصير جسمه نظيف حتى لما يمشي بفرشي أو على أرضية المَنزل
[ لأن كثير سألوني ما تَحسينه وسخ بعد الليتر بَوكس .. الحمدلله لأ وَ ترى حتى القطاوة إللي تلمس التربة لو أنتِ تغيرين التربة وَ هي قطة نظيفة مو هالتأثير ]
وَ الأن أنتظر أتفرغ لليون مَن جديد وَ أرجع أعيد التَجربة ، لأن لما ركبت الباركيه بَغرفتي إنحاس مَكان التربة حقته فلما ما لقاها
دَخل الحمام تكرمون وَ سواها من نفسه ، يعني تعليمي له ماراح سُدى
الطريقة الصحيحة لتعليم القط على دخول المرحاض ،’
الطريقة الأولى ~
الصورة توضح كل شيء بس بقولها بشكل مُختصر وَ إتبعوا الأيام المَوجودة بالصورة أو حَسب قدرة قطكم عالإستيعاب
من اليوم ١ – ١٣
جيبي الليتر بوكس وَ حطويه جنب المرحاض وَ خلال هالفترة أرفعي الليتر بوكس شوي ، مُمكن ترفعينه بخشبه أو بلاط بحال توفر عندكم بلاط زيادة بالبيت ، بس إرفعوه بإتزان عشان ما يطيح القطو وَ لا يطيح الليتر بوكس ، وَ بنفس الشيء حطوا شيء قابل للبلل ، لين توصلون الإرتفاع بُمحاذاة التواليت وَ لو قادرة تحطين الليتر بوكس بجانب المرحاض بإتزان حطيه أقصد بشكل مُتلاصق .. لين يتعود
من اليوم ١٤ – ١٦
الأن حطي الليتر بوكس فوق المرحاض بالكامل
من اليوم ١٧ – ٢١
تقريباً تسوون مثل حركتي يوم حطيت الحوض ، كأنه بديل مؤقت ، بعدها تشيلونه وَ بيكون القط تعود
وَ فيه ليتر بوكس يجيك مثل الحوض لكن فيه خرم بالنص مُخصص للمرحاض وَ فيه برضو ليتر بوكس يجي معاه إضافات عشان ترفعين الليتر بوكس بدل البلاط وَ تعلمينه ، طبعاً الجود من المَوجود ما تحتاجون كل هالخطوات بس فيه ناس يحبون ياخذون الشيء بطريقة هندسية يؤمنون بها أكثر لوووول
الطريقة الثانية ،’
تجيك حاوية للمرحاض بعدة احجام بالنسبة للخرم ، مبدئياً تستخدمينه بس تعبينه تربة مثله مثل الصينية
وَ بعدها تبدأين تقللين التربة وَ تبدأين تختارين الطبق وَ تتنقلين بمراحله لين تَوصلين لأوسع فتحة ، إلى أن تزال الأطباق تَماماً وَبس
مقاطع فيديو ،,
هذي يوميات قَط بأول أيام
وَ هذا مَقطع يثبت لكم إن القطط تتعلم وَ تتعلم حتى تسحب السيفون
يَمكن أكثر فيلم يَوصف هالحالة هُو فيلم Meet the Fockers
خاصة موقف روبيرت دنيرو ، كان واثق إن قَطوه مايسحب السيفون ، بينما قطوه كان يسحب السيفون
ما أنكر قَطوه كان يَجنن جداً جداً جداً , وَ لما شفت هالفيلم ما كان عَندي قَط
وَ بالرغم من ذلك علق هالقط وَ جماله براسي
حتى تَكونون بالصورة ، القطط لما تَشوف الموية مُمكن تجلس تتأمل فيها أبو نص ساعة وَ أكثر
خلوهم عادي ، مسألة إستغراب ، كان ليون يَسوي هالحركة
كل شيء يَتحقق بالعمل وَ الصبر
الحيوانات جداً ذكية وَ تتعلم ، بس تطلب مَجهود من صاحبها
بس ما أدري ليه خَطر ببالي بعض البشر إللي يَحطون الككا عند طرف الباب بالحمامات العَمومية
هذول بَشر وَ لا أقل من الحيوانات ؟! كأن البعبع بيطلع لهم من المرحاض أو يع ما نبي نَتوسخ تقومون تَوسخون البشر !!
بَجد الحيوانات صَرنا نَعلمها وَ بعض البشر ما تَعلموا ، حماماتنا العَمومية تَشكي من قذارة البشر ، الله يعين إللي يَنظفون قلبي مَعهم
للأسف أسواق مُحترمة وَ راقية وَ عيادات وَ مستشفيات وَ مطاعم ، روادها ناس كلاسي وَ نشوف هالأخطاء وَ لا حمامات غيرنا عادي ، وَ ليتها عَملة أطفال ، عملة كبار !! .. أنا أشوف إذا أحد شاف الكاكا حَقي كأنه شاف عَورتي
كُنت بنزل تَدوينه رياضية وَ أساسية بالرياضة ، لكن قلت أخليها قرب الويكيند عَشان حماسكم ما يَخف وَ تطبقونها فَوراً بدون أعذار
بُكره راح تَنزل بإذن الله ، إذا ما عاقني شيء هَي مَكتوبة ، بس أدور صَور مُحترمة تَخدم المَوضوع
Turkishcoffee says
ههههههههههههههههههههه
برجع اقراء التدوينه بس جدا ضحكتني المقدمه
ربي يشرح خاطرك
Artos says
وَياك ، صَراحة غريب تَهتمون لهالمَوضوع
ترى حتى أصحاب القطط ما يَفكرون يعلمونها ..
نورتيني
Omnia says
تسجيل حضور
نرجع نمخمخ عليه أكيد
Artos says
وَ أحلى حَضور
Hneen says
ارتوسس .. مسويه لي بلوكك ،، مع اني ما اعلق ابدداا ع اي شي بس اسوي لايكات ،، والله فاقدتك لي وقت …. بليززز شيلي البلوك مني
@7neen100
to.t says
ومساء الكياته
تسجيل حضور وراجعه
Artos says
ههههه زَينكم وَ الله
مَساء الأنوار
to.t says
وزينش انتِ وولدش
قراتها بوقتها وكنت بالسياره بس جبت العيد بالكتابه الحروف مشقلبه فسجلت حضور
ع ان الموضوع مايهمني لكن احب اسلوبك بالكتابه
وكمان طرحك فيه كميه معلومات يمكن مااحتاجها اليوم لكن يجي يوم واستفيد منها
المهمه حسيتها جدا صعبه واحييك ع صبرك
اما سالفه تعطير البيت بالبول الله يكرمك جدا متعبه نفسيا
اذكر قطوة اخوي سوتها بالمطبخ بغيت انجلط
اسجل حضور لتدوينه بكره من الحين ماراح اسالك عن التوقيت ازعجتك اليوم هههههه
Artos says
ههههههه بالعَكس إسألي خذي راحتك ، أحب أشوف حَماسكم ما أنزعج مَنه
لا صَدقيني جداً سهله ، بس صعبة بالنسبة لحماماتنا بس لو الحمام ناشف دائماً ما راح تتعبين أبداً
وَ أكيد يبيلها شَوية صَبر
نورتيني وَ دُوم منورتني
فوووفا says
طيب ارتوسه كيف يتنظف الله يكرمك القط نفسه بعد ما يقضي حاجته مو التراب احسسن له ؟؟
وياليت تكتبي موضوع عن عملية تعقيم او اخصاء القطط؟؟
Sabah says
الموضوع جدا رائع واسلوب الكتابة جميل
يعطيكي العافية
Artos says
تَسلمين لي ، أخجلتم تَواضعنا
Turkishcoffee says
على كثير ما انتظر التدوينات اولى مره في حياتي اسجل اول رد جمال طرحك وتميزه يخليني اتابع اي شئ مع اني مااربي قطط بس حلو الاطلاع ممكن افيد فيها غيري زي ماانت تفيدينا دائما
بصراحه احس فعلا اللي بيربي اي حيوان يايعتني فيه زي الناس يابلاش
اكيد ليون يستاهل منك ذا الاهتمام ماشاءالله عليه عنايتك فيه واضحه تبارك الله
اصبتي فعلا بخصوص الحمامات العموميه مناظر للاسف فعلا الحيوانات ماتسويها بس الشكوى لله
النور نورك ياعسل
Artos says
وَ الله دُوم تواجدك مُميز عندي ، حتى لو ماكان أول رَد ، كل مُتابعيني خاصة المُخلصين مَنهم أوليهم إهتمامي الكامل ..
وَ للأسف أول رَد لك ماكان مَن إهتمامك الفَعلي ..
وَ الله ليون غيرني للأفضل ما أنَكر ، وَ علمني شغلات ما تَوقعتها فَيني ..
وَ منها الصَبر وَ يمكن حتى لو جبت أطفال ، راح أتلافي عيوب كثيرة طبقتها مع ليون ، صَح حيوان مايشبه الإنسان لأن هذاك له مُستقبل
لكن حتى الحيوانات تُفسد بالدلال وَ ما أنكر أفسدت ليون بدلالي ، إن شاء الله أتجنبه بأطفالي
بخصوص الحمامات العمومية تكرمين ، للأن أجهل الحالية النفسية إللي توصلهم لوضع الفضلات خارج المرحاض 🙁
ريناد عبدالله says
مع ان ما عندي قطو بس قريتها ..
عاد اختي الصغيرة بصف ثالث ابتدائي منجنة على اهلي تبغى قطو وامي راافضة حتى حنا موب متشجعين هههه يبيله مسؤولية وميزانية عاد قالها ابوي ابوديك محل حيوانات اذا قدرتي تشيلينه ولا خفتي بحكم اننا نخاف من الحيوانات بشكل عام راح اشتريلك بس تفاجأنا انها شالتها وحضنتها وتبينها بس قوبلت بالرفض الشديد من افراد العائلة كلها طبعا زعلت ابو يومين بعدين رضت .. والحمامات العمومية حدث ولا حرج اعوذ بالله
Artos says
يا حَظي بُمتابعيني المُخلصين ..
وَ ياحليلها تَبي قطوة من قلب ، حتى خوفها من القطاوة زال
بالنسبة للميزانية تهون امام المَسؤولية وَ الإهتمام .. يالله يمكن لو كبرت تقدر عليها تَوها صغيرة
لكن ما أنكر القطاوه تعلم الكثير
Mary says
هههههههههههه
كان بخاطري اشتري قطو
بعد ماقريت وشفت المقاطع ،لله ماطرت
راح عن بالي النقاط اللي ذكرتيها فوق
و و و الله الله الله
تدوينه رياضيه وااااو
تدرين ليش متحمسه
لاني انسانه اتخبط ماادري وش ازيّن
والمعروف عنك انك انسانه تعطينها بالتفصيل
حتى لو كلمتين على بعضها توصل الفكره
متحمسه وربي
خلّي البدايه هالايام
والشغل الجد ع العطله
شغلي حماسنا
خلي الدهون ترجرج هههههه
Artos says
هههههههههههههههههه
هاه غيرتي رأيك ؟! ..
إن شاء الله أحَمسكم قَد ما أقدر ، هالتَدوينة أشوفها أساس
بس ما أبي أحرقها خَلوها تَنزل بَوقتهآ ..
precious says
حلوة التدوينة و اكيد بتفيد اللي عندهم حيوانات..ما شاء الله على اهتمامك و صبرك.. تصدقين وانتي توصفين كيف علميا قطوك كثير تذكرت كيف علمت ولدي على الحمام هههههههه الشغلة يبي لها صبر و طولة بال…خصوصا لمن يعملونها بأي مكان في البيت..، ننتظر تدوينة الرياضية و عساك على القوة
Artos says
الله يَخلي لك وَلدك وَ يرزقك بره ، عشان كذا الجنة تحت أقدام الأمهات
وَ تواجدك هُو الأحلى ، وَ إن شاء الله تدوينة بُكره تناسبكم
دانتيله says
ماشاء الله عليج ارتوس
اول كلمه جت فبالي لمه قريت التدوينه انج سنعه تبارك الرحمن
احييج على حمل مسئولية تربيه حيوان بهالجديه والضمير الحي
محظوظ ليون فيج والله
يعني ممكن الواحد يتسائل بينه وبين نفسه شاللي حادها على هذا كله
خصوصا ان الواحد غالب الاحيان يتعب من العنايه والمسئوليه بضناه لكنه بالنهايه منحبر على الاعتناء فيه
لكن لمه نشوف كميه عنايتج واهتمامج فيه وانتي مو مجبوره عليه ما نملك الا نرفع لج القبعه تقديرا لانسانيتج
اول كنت اشوف ان وجود قطوج معاج بالبيت امر عادي
يعني مجرد قطو يقوم يلعب ويرد ينام والسلام
لكن لمه صار عندي بيبي وعرفت شنو يعني مسئوليه ومراقبه ع مدار اليوم
احترمت فيج هالشي خصوصا ان ليون عايش معاج من سبع سنوات اذا مو اكثر
يعني مشوار طويل من العنايه والصبر وطولة البال
مو اي احد يقدر على هالشي
بس لانج انتي ارتوس ولانج انتي غير ❤️
الله يقويج حبيبتي ارتوس
Artos says
أنا مَحظوظه فيكم وَ محظوظه بليون ..
هالقَطو يَعني لي الكثير ما أدري ليه ، الحُب يخليك تَسوي إللي ما يَتسوى وَ المسؤولية
وَ لا حظي المَوضوع بدأ بغيرة ، دايم الإنسان يحب يتحدى قُدراته
أخجلتم تَواضعنآ ..
ليون كَمل معي ٩ سَنوات حالياً ، وَ الله يخلي لك ولدك ماشاء الله وَ خلفتي يا دانتيله
شَوفي الأيام تُمر بسرعة بغمض البصر ، حتى أيام زَواجك مرت علينا زي الحلم ما أتذكرها زين
[ طبعاً لو كُنت اكلم دانتيله إللي أعرفهآ .. إن شاء الله ما أكون غلطانه ] ..
kasumii_chan says
يازينك وزي ليون ( قلوب )
يحق لك تمدحينه الوحش ويستاهل ابو لول بآن عليه اهتمامك والله
.. بس جد والله متعب حيل تعليمهم ذكرني ليون بالاطفال اول ماتعلمينه دخول الحمام مايترك مكان مايسوي فيه ههههههههههههههه ..
هههههههههههههههههههههههههههههههه حلوه الككا كنها شاف عورتي صادقه .. الحمامات العموميه حدث ولا حرج !
ياسلام هالتدوينه الرياضيه منتظرتها من زمان .. خذي راحتك يالحب يومين ثلاث هههههههههه
Artos says
هههههههه شَفتي !! ..
يوه تراي زي الأمهات يفرحون لما أحد يقول على وَلدهم زَين ..
وَ لا تخافين مافيها التَدوينة الرياضية يَومين لـ ٣ ، لأن تأخرت كثير إن شاء الله أحط الشغلات الأساسية عالأقل
rashooo says
ياهلا ياهلا بالام الصبورة عقبال مانشوف تعليمك لعيالك …
انا اللحين حايسه مع اوماار مع انه كبير ويعرف للحمام يستعبط يحب البامبرز ومتى ماشتهى قال فسخي لي بروح الحمام يعني الدعوه مزاج وانا مخليته على راحته عشان مايعند …
الله يخليلك هاليون ويخليلي هاك المزاجي …
حماااااس حماااااس التدوينه الرياضيه بإنتظارك بفارغ الصبر ..
Artos says
آمين ( فيس مَغمض عَيونه ) ..
الله يَخلي لك أومآر ، حسب شخصية الطفل أتوقع فيه أطفال يفرضون شخصيتهم عليك غصب
وَ التَدوينة الرياضية راح تهم الكثير خاصة إللي مَحتارين شلون يبدون رياضة وَ يخافون من أمور مُعينة بالرياضة
razala499 says
ياهلا وغلا بهالطله ..انا ماحب الحيوانات بشكل عام بس قلت اقرا موضوعك لان بين الاسطر الا ماالقى فايده باسلوبك الجميل .بنتي ذابحتني سنه اولى وتبي قطو بس ماتخيل انو ببيتي تمشي لانه يبغى لها اهتمام وامانه قبل كل شي وانا اعرف نفسي مااقدر المسها ..وبخصوص دورات المياه بالاماكن العامه حكايه ثانيه مجتمع اسلامي لايعكس معنى الاسم الحقيقي للاسلام لا بالتعامل ولا بالاخلاق اتمنى يتغير تفكير وقناعات المجتمع ويمشون على خطى المصطفى صلى الله عليه وسلم ..مثل ماتمنى ادخل المكان نظيف اطلع منه مثل مادخلت ..لمن اقارن مجتمعنا بدول برا استحي من الفروقات الشاسعه صح كفار بس اخلاق واحترام للذات قبل احترام للاخرين ..والمعذره عالاطاله
Artos says
يا حَليلك ، وَ الله مَحظوظه فيكم
تصدقين ليون أنا كنت أخاف ألمسه ، بَعدين تعودت لما ياكل أكلك وَ تحممه وَ تطعمه خلاص ماعاد تقرف منه
لأن حتى ريحتك يلقطها القطو ، يعني المُضحك لما نبخر البيت بالعود لون تصير ريحته عُود ( بس الموضوع يحتاج نظافة وَ إهتمام ) ..
آمين ياليت هالأمنية تتحقق ، خاصة الأن رمضان عالأبواب فُرصة للتغير ..
وَ متأكدة أنا مع الوقت أنا وَ أنتِ وكل شخص عنده رساله راح يَوصلها ، حتى لو تعبنا
نورتيني وَ دُوم منورتني
شَـــاي says
ياقلبوووو !! وهو قَاعد على المرحاض شكله كِيوووت لوووول
وصورة القَطو اللي يطالع بالمويا تِسحر! برااءة فعلاً
عِشت جوك بشرحك وتَفاصيلك .. لدرجة عقلي حبتين اِنهار لما قطوك بَول على المُوكيت! اهئ
فعلاً عَلمتيه وقمتي بدور (المَاما) لان تعليمك بحب وحِرص وقَهر..
كَلبوبتنا” اُوريدي مُدربه ويظهر لي ان الكلاب اسهل بالتدريب والتَعويد وحسب نوعها طبعاً .. يمكن يملكون مُرونة اكثر .. القطط فيها عناد وتاخذ فترة عبال تلين وتِضمنك وترتاح لك .. حسب تجارب اللي حولي
ومع ذلك اَشوف قَطوك بصورك ظَريف ونظراته تذكرني ببعض اَطفالي ! تهقين ليش ! يمكن البَراءة طآغية
الله يهنيك فيه ويَحفظه لك والاهم يكتبلك الاَجر على عَنايتك فيه يائَلبي..
كم انتِ مُخلصة
Artos says
يا حُبني لك ..
وَ الله القطاوة أطفال وَ بريئين بَشكل ..
أكيد الكلاب أذكى وَ أسهل ، وَ ما أنكر إني ألحن على كلب بَس يقولون لي مسؤولية أتوقع خايفين أهلي أتزوج وَ أورطهم بهالكلب
بس متأكدة إن الإصرار يجيب نتيجه ، أنا أبي بمورينيان إذا عندك خبرة أفيديني بخصوص البمورينيان لأنه هو الكلب الوحيد إللي مُمكن يتوافق مع ليون
وَ لا نفسي الحقيقة تبي جيرمان شيبرد وَ لولا الأجواء كان أخذت هاسكي
يَمكن تشوفين ليون بَنظرة حسنة لأنك لطيفة ، بس فعلاً القطط عنيدة وَ ما تتروض مهماً روضتيها لها مَزاجها الخاص
وَ مُمكن تفصل ، مثلاً اليوم ميشو ( قطوة الشوارع ) طبت علينا فجأة وَ ليون زعل ، وفجأة ضرب رجلي بقوة وَ جرحني خلاني أنزف بس نزيف مَعقول
يعني ما تتنبأ بحركاتهم خاصة إن القطط جبانه وَ فيه شراسه خفية ..
آمين يارب ، أسعدت بتواجدك يالراقية
وَ الله يخلي لك أطفالك
Ghada says
ماعندي قطو ولا في امل اقتني واحد بس مايمنع اني استفدت واستمتعت
اخر كلامك معاك حق بس صار نادراً مااشوف احس الناس توعّت شوي او لان انا اصلا مااحب ادخل الحمامات العامه مااشوف الله اعلم
ويلا جانا الفرج اخيراً تدوينه رياضيه ❤❤❤
Artos says
يَجوز لأن المُولات فيها خدمة ٢٤ ساعة ما عاد صَرنا نشوف مثل أول
لكن سنتريا فرضاً سوق هادي جداً ، مرة دخلت لقيت بول بالأرض وَ الحمام مكسر وَ مرة تكرمين لقيت فوطه نسائية مجدوعة بالأرض
يعني هذا من أهدأ الأسواق بالرياض وَ أرقاهم يعني مُستحيل أحد رواد هالسوق إللي أغلبهم يجون على سنقة عشرة وَ شنطهم ديور وَ بولغري وَ سيلين .. إلخ
تسوي هالفعلة الشنيعة ، وَ يمكن حسيتيها قلت لأن ماصرنا نَزور الأماكن العامة
يعني خلاص مانروح المدرسة ، أو الحدائق العامة أو خطوط السفر لكن لو رحتيها راح تَنصدمين
و أحمد الشقيري مرة بحلقة من حلقاته ذكر مُعناتنا بعدم شرب الماء عشان ما نضطر ندخل الحمام ..
خلك من هذا كله ، مرة حضرت زواج بقاعة فايف ستار
دخلت الحمام لقيت فوطه مليانه دورة مجدوعة عالأرض ، يعني هذي ما بتكون دورة قديمة
هذي فريش وَ العاملات مَوجودات .. بالرغم إن الحمام كان ناشف وَ نظيف حتى ماقصروا حاطين مناديل وَ أكياس
يعني العيب مو من قصور الخدمات ، العيب من المُستخدمين وَ كل المعازيم ناس مُحترمين ، مين يا ترى ؟!
Ghada says
حسبت بس انا اللي مااشرب مويه عشان ماادخل الحمام ههههههههه ! اتذكر صورتي مره حمامات سنتريا وكانت مش على مستوى السوق ابداً ، مهما ضلينا نوعي الكل عارف ان هالشي غلط واصلا مستحيل يعترف انه مسويها .. شكل هالاشخاص تطغى عليهم ال “هو” همجيين وبدائيين لوول ( فائدة من تدوينة امس بتقسيم الشخصيه)
Artos says
وَ شفتي هذيك الصورة !! قبل سنتين تقريباً وَ أكثر بَشوي
الأن سيئة جداً جداً ، المُشكلة وَين إن الحمامات خزفها كله من فلوري أند بوخ يعني ماركة عريقة وَ مفتتينها تفتيت
ههههههههههه ما أنكر فطست ضحك بصوت عالي لما قلتي تَطغى عليهم الهو ما توقعتها مَنك
يازينك بَس .. أنا أتوقع يخافون يجلسون على المرحاض وَ تجيهم أمراض ، أو يخافون من الأماكن الضيقة فيه تفسير
مَستحيل يكونون ناس مُتعلمين وَ عايشين ببيئة مَتحضره يكون هذا طابعهم
Ghada says
المفروض مستحيل بس الي نشوفه العكس .. اذا دخلوا الحمام تبان وساختهم للأسف التحضر موب بالمكان والملابس لازم النفس تتحضر وترتقي ولا مااستفدنا شي 🙁
دانتيله says
ابد ابد انا دانتيله ماغيرها اللي تعرفينها
صرت ام ناصر الحين هههههههههههههه
اي والله كل شي صار يمر مثل الحلم
السنين صارت تركض ماتمشي
والله يا ارتوس يوميا اطل على حسابج وعلطول متابعه مدوناتج
لكن اعذري قلة تواصلي
والله انكم بالقلب وايامنا الخوالي لازالت فالبال
وليلحين اتذكر البنات و لمتنا الحلوه
عن قريب ان شاء الله ارسل لج صوره لنصور ولام نصور بعد هههههههههه
بس الله يستر لا تعلق بالدايركت وتضيع
Love u artos
Artos says
ياهلا بأم ناصر وَ الله فرحت وَ عاشت الأسامي .. هو من كلامك واضح إنك تعرفيني
لكن لما قلتي جبت ولد ما قَدرت أسكت قلت لازم أقوم بالوآجب
وَ لا إن شاء الله صرت أفضي الدايركت أول بأول ، وَ إذا ضاعت وَ ما أنفتحت أحذفيها من عَندك
ماشاء الله ، وَ أكيد أيامنا لا تُنسى وَ لا صَورنا وَ لا جنانا .. كل شيء له وَقع بالقلب
Love u too
aljamilaaa says
ارتوس من جد اول مرة ادري ان الحيوانات بامكانها تستخدم الحمام البشري اساسا اكرمك الله مدري بالضبط كيف القطط تقضي حاجتها بس الان فهمت و هو جد تربية الحيوانات مسوولية من جميع النواحي بس بالمقابل انتي تحصلين على حب وكمية مشاعر من الكائن تستحق ان تتعبين لها , عندي اغلب اخواني الصغار يموتون في القطط وطلبوا مني اجيبها لهم بس حاليا ظروفي ابدا ماتسمح والبيئة الحاليةمش مهيئة سواء من الاهل استعدادنا ومعرفتنا باسس العناية بس هذا مايمنع ان الفكرة كثيررر تداعب خيالي واتمنى هالشيء
Artos says
تَصدقين أنا كنت أقول للناس يفكروني أكذب عشان أخلي ليون القطو الخارق
مافي أحد يصدق ، خاصة لما أقولهم أنظف أسنان ليون من الجير يضحكون يقولون كذابه
لكن قريباً راح أنزل جلست تنظيف أسنانه عَشان إللي ما يهتم بأسنانه يحزن إن هالقَطو يهتم بأسنانه وَ هو لأ
وَ يبدأ يتدارك نفسه ..
وَ ما تدرين يمكن لما أخلص تَدويناتي تجيبون قَطوة
بس أهم شيء تخصصون لها جَزء من أهتمامكم وَ ماتكون ضَحيتكم وَ قتها كل أموركم بَتمشي بالسليم
دُوم مَنورتني يالجَميلة
aljamilaaa says
اما على طارى الحمامات العامة وقذراتها للاسف هالطبع يفشل ومنتشر وانا اعتبرها انانية وحسد بالدرجة الاولى وهالشيء مو جديد للاسف ترا على ايامي انا بالابتدائي والمتوسط كان حمامات المدارس فيها قذراة لاتوصف بالرغم كنت في خي راقي ومع كذا مستحيل تلاقين مدرسة حمامها نظيفة, وكمان لاتنسين قذارة حمامات المحطات مرة سافرت بالسيارة من دبي للسعودية فرق فرق بين نظافة حمامات المحطات الي ع الطرق الطويلة وفرق بين محطاتنا يوم وصلت السعودية صراحة ماتفشلت الا من ربعنا الخليجين ووش الفكرة السيئة الي بياخذونها عنا. وعموما فيه اطباع تدلك على شخصية الي قدامك مثلا طريقة اكله وحرصه ع النظافة بالاماكن العامة وقيسي كذلك على باقي الامور.
candy says
كيوووووووووووت اللي في المقطع الثاني
قلبوشتي النظيف يستاهل كيسة كاملة من السناك .
مرا احب الحيوانات وكل فترة أحب حيوان جديد
حالياً ب أموت عند أرنب الانجورا لطيف لطيف يجنن ارتوس
ب أمنشنك عليه وان شاء الله يارب اخذه
يعطيك العافية بوست خفيف وجميل .
Artos says
دلبوس على أرنب الأنجوار ، يَجنن
يقطع القلب من جَماله ..
وَ إذا أخذتيه علميني إنطباعك عَنه
وَ تواجدك الأجمل
Sara says
موضوع مهم اكيد ساعدتي مقتنين القطط فيه مشكورة ارتوس على كل شي متميزة و طرحك مفيد و مهم احب القطط و احبك عشان كذا مهتمه اقرأ كل تدويناتك
Artos says
ياحَظي وَ أنا أحبك وَ أحب تَواجدك
الله يَسلم قليبك
Tamiz says
يسعد مساك ارتوس
هيه بس ع الحمامات العموميه ارحم من ان نكون بجامعه بنات والحمامات زباله سوري ع اللفظ بس نتساءل انا وربيعتي كيف بنات جامعيات كبار وكذا ..عاملات النظافه يشتكون وايد من قذارت البنات بالرغم ان التنظيف شغال ٢٤
وياليت ع هالشي بس لاحظت ان البنات يطلعون من الحمام حتئ ايدهم مايغسلونها بصابون ولا حتئ ماي وفوق كل هذا يسلمون علينا .. احس صدددق شي مقرف جدا
التدوينه شي وانا اسولف بشي
Artos says
الحمدلله يوم قلتي كلمة وايد ، أرتحت نفسياً يعني المُشكلة مو بس عَندنا
صح إرتياح نفسي شَرير ، وَ تصدقين بخصوص إللي يدخل الحمام وَ مايغسل
برا ما يَسلمون عليك يقولون لك غسل أول ، أنا لما أدخل الحمامات العَمومية
إما أفتح الباب بَظهري وَ أكون لابسه العبايه ، أو أفتحها بمنديل بس مرات يكون معي أغراض ما أقدر مالي إلا الكتف أو الكوع يحل مُشكلة فتح باب الحمامات ..
وَ طبعاً بعدين أعلق الأغراض بالعلاقة ، يعني القذارة بكل مكان منتشرة .. لكن ما أنكر فيه أماكن أنظف من أماكن
نورتيني يالغالية
sara says
ياهلا ياهلا ما شاء الله عليك وعلى صبرك وعطاااائك صبرتي ونلتي الاستاذ ليون فديته يختي ينحبون اللي اشكالهم هيبه وبالاخير يطلعون كل الجبن فيهم هههههته طبعا ابد مااقصد البشر شوفي انتي المفروض تدويناتك تسمى نظافه ما شاء الله عليك
Artos says
يادي الكَسوف ، أخجلتم تَواضعنا
حبيبتي وَ الله أرتبطت يديني أمام كلامك ..
نورتيني
شَـــاي says
ياهوو ! هسكي ! الله الله .. والله ذُوقك رهيب .. هالنوع مَجنون ،عَصبي ونشيط ويحب اللعب .. تناقض كنه مُراهق بس ينحب ولو انه ياما تعرضت للنَبذ منه لووول ..
بس ينعشق .. خِذي هالمعلومة واتوقعك عارفه انه ( مُخلص بشكل يبكي لراعيه) ..
المورينيان كيوت بس اَتوقعك عَارفه انه مُعرض لـ لـ لـ لـ الموت ! اهئ ..
نِقطه وكِنه جنين .. يبيله عناية كنه نُونو ( حَرفياً) .. لما شلته كني شايله كَتكوت مش ارنب حتى .. بس جربي واحمليه وشوفي تقبلك يمكن عِندك القُدرة على روتين التدقيق الشديد بحياة هالنوع ..
جيرمن شبيرد .. النوع السَكسي بالنسبة للتسلاب لووول .. فعلاً Good looking guy!
حليو ورَهيب وابضآي .. حتى الهسكي بس الهسكي مرات اَزعر يصير لوول
حَقتنا مهجنه بين pug/ Shih Tzu .. تحب اللعب والدَلال .. مِزاجيه بس ترضى بسرعة لوول .. وتحسينها تِشتااق وتفقدك وتجري عليك لما تِجين بعد طول غياب .. شي عَجيب.. بس هالنوع خطر تعيش برا البيت او تتعرض لتغير بروتينها فَجأه .. يصيبها اِكتئاب عبال تتعود ..
مااَحس افدتك والله .. لكن صَدقيني امره سَهل لو ظروفك تِسمح وعندك طولة بآل ..
وقَطوك فعلاً نظراته فيها تَناحة وبراءة مثل الاطفال ! .. يذكرني بواحد من اَطفالي بقوة .. لما اقول اَطفالي يعني اَطفال العيله مِش اطفالي انا بزآتي .. لكن الحُب ..
وياحِلوك والله وياحلو حُبك للحيوانات
آشوآق says
من زممان لما اشوف بالافلام كيف يعلمون حيواناتهم علی استخدام المرحاض البشري كان يعجبني هالشئ افضل بكثير من حوسة الليتر بوكس ..
بالنسبة لي احب القطط ونفسي اربيها لكن يمنعني انو مااحد راضي وغير كذا انا بصراحه اتقرف نفسي اخذ قط متعلم وخالص ههههههههههههههههههه مع اني احس اذا تعلقت فيه راح اتنازل عن هالشئ يلا ان شاء الله ربي يكتبلي اربي قط ..وفعلا احسسهم زي الاطفال حتی نظراتهم ولعبهم وتصرفاتهم ..
ربي يخليلك وليدك ارتوووسه ”
واه من الحمامات العامة مع اني احس الناس توعو اكثر بس لسسی مااختفت لسسسی موجودين وكله كوووم واللي تخلي الفوطه”وانتو بكرامة” زي ماهي كوووم ثاااني طيب عالاقل حطيها بكيس ماراح يضرك شئ ..عموما اكره الحمامات العامه وماادخلها الا للضرورة ..
ويارب يتحسن مجتمعنا ويكون جميل للاجيال اللي بعدنا >>فقدت الأمل بجيلنا هههههههههههههههههههههه لا لا ان شاء الله فيهم الخير
وشكرا عاللي تقدميه لنا وجدا جدا جدا متحححمسة للتدوينه الرياضية ..
saeedah says
ياربي اموووت ع القطاوة يارب امي ترضى واخذ لي قطوة شيرازية مون كيوين حيل بذات الكتنز ..حبيت التدوسنة حيل بأذن الله اول ما خذ القطو بشتري له هالاشياء اللي تنحط ع التوالبت جدا عملية …ربي يسعدك سوسو مثل ما تفيدينا وتفرحينا ب تدويناتج الشيقة ♡♡♡
ms.moushi says
صباح الخير لأحلى سوس ، قلت أصبح عليج قبل ما اروح أرقد
ما شاء الله بصراحه استمتعت و أنا أقرا ، صح ما عندي قطط ولا أي كائن حيواني لووووول لكني حبيت وضعج ويا ليون ، الحيوانات مثل القطط والأرانب خاصة أحبها لكن من بعيد لبعيد ، عندي خوف قوي منهم ، مع أن المفروض هم لازم يخافوا مني مُش العكس هههههه .. أكثر شي أحبه فـ ليون هو بياااااضه وعيونه : )
الله يحفظ وليدج الدلوع ههههه
ذكرتيني فأبوي أول كان ينهبل من قطو كان أحيانًا يبول أكرمج ربي على سيارته ويترك بقعه هالكبر ، ها غير الريحه حتى على باب البيت .. سُبحان الله كأنها كانت عاده ، لكنه اختفى فجأه لأنه ما صرنا نشوف أي بقعه :q ..
تسلمين على هالتدوينة أرتوس ومتحمسه لتدوينة الرياضه :*
ms.moushi says
صح نسيت أقول تصبحين على خير سوس
♥
ms.moushi says
صح نسيت شغله أرتوس و يا كثر ما انسى ، فوق مكتوب ( لَنبقى على تَواصل .. إشَترك مَعنا ) ونحط الإيميل … ها شو يعني ؟ القصد هو أنه كل ما تعتمدي تدوينة يوصلنا إيميل ولا ؟ إذا هيه فأنا ما يوصلني شي ، وإذا لا ما يخصه فسوي عمرج ماقرتي سؤالي هههههه
غَدير says
مع أنه مايهمني الموضوع مره بس أحب سوالفك ياخي،،
عاد ما أنكر أني فكرت أجيب بسه بس أحس توي مره بدري وماني راعية مسؤولية ، مدري أنتي سحر ؟ كل ماتكلمتي عن شيء أحس الموضوع يدخل ببالي تكلمتي عن البسس وحبيتهم عقب كلامك وصار يجذبوني البسس الصغيرة ، مره قريت ردك بعد عن البنات الي لهم عضلات وتحمست يصير عندي عضلات وتكون باينه شوي ،،
يعطيك العافية ارتوس
sese says
طيب اللحين القط مايغسل مثلنا بالماء احس لازم يبقى ع جلده ككا ،،
Asil_112 says
صراحه مااهتم في الحيوانات كثير بس تعجبني احب اشوفها من بعيد بس ماالمسها اخاف منها بشكل مو طبيعي لدرجه لو قربت مني ابكي لا اراديا ممكن بسبب مواقف صارت لي مع الحيوانات وانا صغيره وخفت منها مره نط علي كلب وكان بيتهجم علي او ممكن انا تخيلته كذا وقتها ماقدرت انام
بس سالفه تعليم الحمام ذكرتيني ببنتي مره اتعبتني مزاجيه بشكل مو طبيعي اذا مادخل مزاجها شيء مستحيل تتقبله ويوم كنت اعلمها كانت تعاندني وما تسوي شيء في الحمام الله يكرمك ومجرد ما تخرج تسويها هنا انهار نفسيا بس ماودي اعاقبها واحاول اتحمل بس مرات تفقدني اعصابي ومااتحمل خاصه وقت الدوره وكنت في هالوقت اضطر البسها الكلوتات المخصصه لهم من الصيدليه نفس فكره البامبرز بس اخف منها والحمدلله تعلمت بعد جهد ومازالت قيد التعليم بس اهون من اول بكثير
وبالنسبه للحمامات العامه مااحب ادخلها وزي ماقلتي احرم نفسي من شرب مويه او عصير عشان ماادخل واذا اضطريت لازم يكون معي مويه لان مستحيل استخدم المويه تبعم خاصه بعضها يكون الشطاف مرمي في الارض وامسك الباب وصنبور المويه بمناديل صراحه حريصه اكثر لان اوقات تلتهب عندي الاكزيما وتكون يدي مجروحه واخاف ينتقل لي مرض من دورات المياه ولد عمي جاه الوباء الكبدي بسبب هالشيء في الحج
كثرت حكي بس تسلمين ياقمر على كل شيء ومتحمسه لتدوينه الرياضه من زمان انتظرك تدونين عنها
mony says
يا مية هلا ،
ماعندي قطو بس احب اسلوبك بالحكي درر يختي
احب اهتمامك بليون سبحان الله كيف الاهتمام يعطي رونق للطرف الثاني وجمال واضح
دايما أقول الحب يضيف جمال للشخص بشكل ملحوظ يعطي سعاده يخليك تترنم وتحلق بعيددد
وهالشيء شفناه بليون كطرف مستقبل وفيك كشخص معطي
تدويناتك عن ليون بالذات ملهمه كثيررر
وانبسطت يوم قلتي فيه تدوينه للرياضه قريب
Monsh_ says
بصرآحه ما عندي قط ولو آقول لك في البداية كنت آخاف منهم من بعيد لبعيد
بس صآر تراودني فكره اني آقتني قط بس قبل دآيم آفكر اني لو آجيب آعطيه حقه وما اهمله
هالشي آنتي خليتيني آحبه
بس مآشفت صورة المزيون مرتزه هنا
آسمك في ذهني مرتبط فيه جمال ونظآفه وأخلاق وسنآعه
دمتي لنا جمييله
Lamoshaa says
دايما بقرأ كلامك عن ليون وانا مستمتعة ♡♡♡♡ وبتمنى تحكيلنا كللل شي عنو لانو عن جد حببتيني بالقطط رغم خوفي منها ….مرة وحده بكروب عالفيس بوك سألت عن نوع معيين لاكل قطتها فسألتها وحده مابتتعذبي معها بالحمام قاللتها ابدا وصورت فيديو القطة راحت لحالها للتواليت وعملت كل شي بكل نظافة … عاد انا هالشغلة هي يلي مخليتني اتردد بموضوع انو ربي قطة مع انو رفيق اخي عرض عليه وحده زغيرة عمرها اشهر بس ما وافقنا بالبيت لانو عالاغلب نغيير بيتنا بعد رمضان فصعب تتعود اشوي هون وبعدين هنيك وفترة الانتقال صعبة علينا وعليها …. فقلت ممكن بالبيت الجديد جهزلها مكان وجرب جيب بس قلت لاخواتي واهلي بدكن تساعدوني فيها بخاف مع دوامي قصر معها وحس بذنب اني ما كنت اد مسؤوليتها وهي عندي …. فالفكرة ببالي وبخبرك اكيد بس اعملها (؛
somaya says
ماشاء الله تبارك الله عجبتني تدوينتك استفدت من الموضوع رغم اني مو من هواة تربية القططط .. متحمسة لتدوينة الرياضة انتظرها بفارغ الصبر .. شاكرة لك ولعطائك اللامحدود بوركتي .
Omnia says
صباحك مياو حلوه بصوت ليون
استغرب من نفسي كثير هذي ثالث مدونة تكتبينها عن القطط واول ما ابتدي اقرأ إلى ماانتهي منها وانا مندمجة بشكل مو طبيعي
حاستني جد عندي قط اربيه وابي استفيد من كل كلمه
مذهوله انا من صبرك و اكيد هالشي اللي سويتيه تفتخرين فيه وتعتبريه من نجاحاتك يحقلك اكيد
جمالك وجمال ابنك
خلود says
رهييييبة التدوينة جددا هذا وانا مالي اي اهتمام بالحيوانات استمتعت مررره .. كأني معك بجد.. الحين ببدأ اعلم ولدي الحمام احس بستفيد ههههه
mnosh says
تووووسسه ياحبه عيني انتي من زمان مااارديت عليك هييينا مع ان فيني النوم عين مغمضه وعين مفتحه بس ابي ارد واصبح عليك.بالخيير اهنيك صراحه ع صبرك ذكرت نفسي يوم اعلم بنتي ع الحمام تكرمين قسم بالله معاناه كيف صبرتي ع حيوان مااشااءالله اهني فيك هالروح الجميله جد جد كل مره انبهرر فيك ويزيد اعجابي اكثر … الله يخليك لليونك وولغاليك يارب احبك ياتوسسه
Mannar says
فيك سحر غريب حاجات مومن اهتماماتي بس بنفس الوقت استمتع باالقراءه
باالنسبه لحمامات الاماكن العامه شي لايصدق اذا صرت حسرانه ارقص ديسكو لما اصل البيت ههههه اقصد اهز من كثر ماانا حسرانه والحمامات تكون وصخه مااقدر ادخلها
ياحبني لك
متحمسة للتدوينه الرياضيه
الله يسعدك
Asma almuneef says
حبيت المعلومآت اللي ذكرتيهآ واكيد كل انسآن مهتم ويحب كل شي يخصه رآح يعتني ويدقق ف كل التفآصيل بالنسبه لنفسه ولبيته حتى النبآت الطبيعي ف بيته رآح يهتم فيه ويحل مشاكله و…إلخ
كنت افكر اجيب لي قطو ورحت اقرأ عن تربيتهم واكلهم وكل شي يخصهمم حتى اكسسوآراتهم الدلوعه “̮
لكن شلت الفكره من رآسي مب عشآن اتعب او اهتم واتحمل مسؤوليه لأ ..أبوي عنده مشآكل صدريه (الله يحفظه ويعآفيه ) وهالشي خلآني ابطل ..
بس هالشي م يمنع اني استفيد واتعلم اكثر عن القطاوه “̮
ثآنكيو ارتوس ♡
جمرة غضى {ام الجوهره says
ههههههههه وسبحان الله
ماكنت ادري انهم ممكن يروحون للحمام عشان كذا دوم اقول يالله اربي بناتي
بربي قطو يازينه ليوون المؤدب والله عطيتني معلومات كني ولا بالدنيا
عقبال اعلم بنتي هههههه من اصعب مراحل التعليم ياربي
موضوعج جا ع الجرح هههههه
الهم لاتطولين ع ليون ويروح التعب
دمتي بحب وربي يخلي ليون❤️
aljuharah, says
جماالك انت وتدوينتك تفوح حنان ونظافه أتخيلك وانت تكتبين ابتسامتك واااسعه هههه يارب تكوني دوم سعيده ولايكدر عليك شي … اما عن القطط مالي فيها ابدا من بعييد لبعيد بس احب اشوفها ماشاء الله اهنيك على صبرك ، ذكرتيني بوقت ماكنت اعلم عيالي يالله لاابد اكون مراقبه علطول تعب من جد . اما عن الحمامات العامه حدث ولاحرج بالرغم بالسنوات الاخيره كثير تكلموا عن هالموضوع لكن الوضع مستمر ، لابد نحن نعلم الجيل القادم الا هم الحين اطفال كيف النظافه حتى نتاافو هالاشياء بالمستقبل ، انا عيالي انبه عليهم لابد الطشاش مايلعبون فيه ويحطونه مكانه حتى المماديل يرمونها بالزباله هذا باذن الله بيرسخ ببالهم ان المظافه مهمه ومثل مانبي ندخل حمام نظيف وانت بكرامه مهم نطلع منه وهو نظيف . وااااه اخيرا تدوينه رياضيه بانتظرها بفااارغ الصبر تسلم دياتك ارتوسه وشكرا كثيييييير . حبي وبوساتي لك
aljuharah, says
يتلافوا – النظافة مهمه
Fazulina says
ههههههههههههههههه
الله يخلي لك ليون الشطور
استمتعت كثير بالتدوينة و طرافتها .. القطط عالم آخر إذا تولع فيه الشخص ما بتعيقه المشاكل.
برافو عليك بس انتبهي لا يضيع جهدك سدى وتبدين من جديد.
يا جمالكم ♥
سوسو says
طيب أرتوس …
هل يتنظف بعد الحمام (الله يكرمك) ؟؟؟؟
حضرميه .. says
يهبلوون ف الفيديوو ماتوقعت تكون التدوينه بدون صور لليووون وين صوره ؟؟’
اتذكر زوجي زمان قبل امكن ٥ او ٦ سنوات كان عنده قطو كبييير عملاق نمر مهب قطو
كان مايسوي ككا او بول الا ف الحمام وبجلسة القرفصاء بعد مدري كيف سبحان الله ،، ذكرتيني فيه عمري ماشفت قطو مثله شنننب وشموخ ودمه خفيف ويحب الاطفال ونشيط للاسف مات بتسمم
Haifaa says
صباح الخير أرتوستنا
متابعة قديمة ودائمة لك
بس ولا عمري علقت
بس صراحة لي فترة كل مرة بأعلق بس يضيع مني الكلام
لأن شكرك أو حتى التعبير عن جمال مواضيعك ومصداقيتك
ما يوفيه كلام
لكن اليوم لما قريت هالموضوع اللي ما يهمني بتاتاً
عرفت إني وصلت للإدمان هههههههههه
ما شاء الله تبارك الله أسلوب غصب يشد
الله يحفظك لأهلك ويحفظك لنا ويديم وجودك يارب
وَيَا بخت أهلك فيك
أشهد الله إني أحبك فيه
ajhezah says
حياتي الكبار إلى يتعلمون ع الحمام،، انا تونى معلمة ولدي ع الحمام و اعتبره اختبار للصبر بس الحمد لله اول أسبوع و بعدها ارتحت و الحمدلله هو متحمس معي و أحس انه مستعد عشان كذا بديت علمته،، قعدت أسبوع كامل ما طلعت من البيت عشان اتفرغ له و ما أعصب عليه و الحمدلله ع كثر ما كنت شايلة هم ع كثر ما تسهلت،، ضحكتيني لما قلت انه يقعد يتأمل في الموية و ضحكتني الصورة يا زينهم براءة هههههههههههههههه عاد من جد الحمامات عندنا تشكي و الله تجيب الصياحة مرة في مصلى من المصليات في الله يكرمك ككا و جمبها الحفاظة متخيلة؟ وش هالناس الله لايبلانا تخلف و وصاخه،، ع قولتك الحيوانات تتعلم و تفهم حتى حمامات المطار عندنا تفشل عيب و الله،، شكرا لك ع طرح تجربتك قريت شي مختلف و ما قد سمعت عنه
الريم says
على ان ما عندي بسه اصلاً عندي شبه فوبيا منها 🙁
الا اني قريت الموضوع والردود بعد مستحيل افوت لك حرف ❤️
ميما says
يازينه ليون
على إني مستحيل أربي قطط لأني أخاف منها
بس إلا ما أقرأ التدوينه دامها منك
اما سالفة ذورات المياه فعلاً كلامك صحيح
اغلب الأماكن بالذات على طرق السفر شيء
مو طبيعي قرررف قررررف
اما المولات نادر ادخلها لكن مره اضطريت ورحت للرد سي
في جده فعلاً كان نظيف نظيف وريحته تجنن و موفرين كل شيء
أحب الاهتمام و لو اخاف اني اجلس ع الكرسي خوفاً من الامراض
ماراح اسويها ع الارض
اصلا قرف وربي
متحممممسه لتدوينه الرياضه جداً
hessa says
بالرغم اني مااحب اقتناء الحيوانات ولا لي نية حبيت اقراء التدوينه لاني كنت واثقه اني ماراح انهي القراءة الا وانا كاسبه شئ منك .. حبيت اهتمامك .. وفعلا وضعتي بصمتك في اخر البوست الاضافه الاخيره بخصوص حمامات الاماكن العامه جميله .. اتمنى يتغير الواقع المر .. والله اني احيانا افضل الخلا على دخول حمامات الطرق او احاول امسك نفسي .. الوضع مزري … يعني تمرين على محطة في طريقك من اروع مايكون بس المصلى الحمامات الله المستعان .. اتمنى من وزارة الشؤون الاسلامية تعاقب اصحاب المحطات وتغرمهم على اهمالهم .. يمكن هي الجهة الوحيده اللي الموضوع يخصها الا اذا فيه جهات اخرى .. مااعتقد البلديات لانها خارج نطاق المدن
hend says
ارتوس
انا ماعندي قطه
ولا من هوات تربية الحيوانات
لكن قريت التدورنه
لأني فعلا احب اقرالك كل شي
اعرف اني بطلع بفايده ولو انه موضوع لايعنيني
شكرا لك
واحبك والله
hend says
اللي فوقي والله صدفه غريبه
ماقريت ولا اي تعليق
وانصدمت ان اللي فوقي نفس الكلام
كلنا نتفق على هالشي
نيالك ارتوس
Raffef says
ما عندي قطو و يمكن ما يصير عندي ابدا بس فيه احد يقدر يفوت تدوينة لأرتوس ؟ أكيد لا
ff_new says
روووووورعة جدا رائعة هالتدوينة.. سبيل لهداية الحيارى مع قطاوتهم… الله يعطيهم طولة بال اللي يربون حيوانات األيفة ويكونوا أصحاب مسؤولية تجاهها.. انا احبهم بس ما افكر اني اربّيهم . خواتي يعشقونهم عشان كذا دايما يكونوا مشغولين فيهم… يعطيك ألف عافية أرتوس ع مواضيعك المميزة
Seham says
أنا وحده عندها فوبياء من الحيوانات والحشرات الزاحفه والطاىره حاولت مرارً وتكراراً
ابطل هالخوف لو دخلت فراشه بغرفتي ماقدر أنام الا. وهي طالعه أوسوس
عصافير شريت وانا صغيره وجانتي هديه أطالع فيهم اسمع صوتهم وشيلهم بالقفص لكن ماقدرت أنظف قفصهم لو مره
لين امي اخذت فيهم اجر وطيرتهم هههههه ذالحين اقول ابي اجيب قطو
امي تقول اذا تقدرين عليها تلمسينها تهتمين فيها ماتخفين وتهربين اوك بجيب لك وحده قلك أتحداك الخوف اللي فيه
لعل وعسى يروح ههههههه لكن للاسف ماقدرت اصيح اذا قربت مني او تجمد بمكاني ماعاد انو احبهم وأشكالهم تجننن
حاولت لكن للحين هاالعقده معي لعل يوم من الايام اكون تعديت المرحلة
نجود says
هلا ب ارتوس القلب
زمان عن مدونتك بس اختبارات ما اختبارات 🙁
قلت ارتاح من المذاكره و اجيب عند الحب ارتوسه ♥
مدري ليش شدتني هالتدوينه على الرغم مو مهوسه بالقطط يعني
احبها من بعيد لبعيد يعني كصورة اما تحطينها قدامي ما تشوفين
الا غبرتي انا خوافه بشكل مش طبيعي مع الحيوانات على الرغم
ان اني اعشق الاحصنة و فكرت اكثر من مرا اربي حصان بس
ماش انا انسانه ما اتحمل المسؤولية و ملوله جدا بس لا زالت هالفكرة
في بالي لدرجة اني سميته بس من يقنع جنتي -_-
الا قبل كنت اتابع برنامج ذا دكتورز يقولون ان الحيوانات
تصاب بحالة نفسية و اتذكر انهم كانوا يتكلمون عن القطط
جاء في بالي ليون اتذكر قبل نزلتي صورة بالانستا لشوز رياضي و كانت خيوطه رايحتن فيها و قلتي ان اللي يربي قطط لازم تكون
عنده ميزانية للشواحن و الاشياء اللي تشبه الثعبان او شي كذا
المهم قال واحد من الدكاتره ان اذا شفت القط يهاجم سلك او من هالشيء فتأكد ان قطك فيه حاله نفسيه هو له علاج بس نسيت وش قال ماش الزهايمر هالايام لاعب فيني لعب .. وبس والله بروح اشوف التدوينات الباقية و شفت التدوينة حقت الرياضة بس اخلص برد بنفس التدوينة
و ختاما واصلي ابداعك ي جميلتي و تأكدي ان مدونتك جزء من حياتي
يعني بدون مدونتك انا مش انا و احبك و امنيتي الوحيدة في هالحياة
اني اشوفك و متاكد لو جت هالفرصة اللي اشوفك فيها مليون بالميه
راح اسحب و ما اجي انا انسانه اخاف من المقابلات اللي تكون لاول
مرا لاني اجيب الاعياد كلها و سلامتك والله ♥ ♥
Nouf says
يَ سلام عليك والله راح استفيد واعلم بستي صراحه التنظيف اليومي للتر بوكس متعب والريحه تنتشر ولا يشيلها لا بخور ولاشىء ان شاءالله افضالها في الاجازه ويارب تتعلم
Bshayer says
السلام عليكم ، مساء الخير ارتوس شخبارج عشاج طيبة
بسألج حبيبتي ريلي ياب قطو وانا ما عندي خبرة ابد
ابا اعرف القطو لو تم خلال اليوم اغلب الوقت بروحه هل يتأثر ؟ لازم يكون ويانا دوم ؟ لاني اخاف المسه وشوي وشوي يالسة اتعود ووايد يغمضني لانه صغير عمره شهرين ونص ، واسمحيلي خذت من وقتج
amomty says
–
السلام عليكم ،
متابعه من بعيد لبعيد $
عندي كم سؤال .. اللحين اذا طلعتي برا البيت جامعة او سوق فتره طويله يعني ست ساعات كذا ..
وين تحطينه .؟
عادي بالغرفه مايصير له شي ، من ناحية الاكل والحمام الله يكرمك ..
الشي الثاني لو سافرتي مثلا .. نفس الشي وين تحطينه : (
بانتظارك يالحب ، وشككرا ()()
سوزان علي says
ههههههههههههه كنت أتصيد قططي الجميلة لما تروح الحمام وألحقها وأشيلها وأحطها ع الكرسي
كانت تقعد تصيح لأن أشيلها وقت م تبدأ (( كنت مجرمة شوي )) هذا الكلام قبل 11 سنة تقريباً
وبعد كيذا وقفت طبعاً م تعلمت لأني كنت أعورها بذا الطريقة بششدة .
الآن عندي قطة جميلة ببدأ أدربها .
وشكراً جزيلاً
موكا says
اها ياربي تحمست اعلم موكي الحمام وانا للحين ماعرف وشلون اتفاهم معه ههههههههههه
مطفيه النور بقوه لووووول
Layla says
امانه كيف ترجعين تستخدمين المرحاض بعده ولا تعقمينه؟؟؟ انا وحده مااتقرف بس والله يوم شفت الفديو لاعت كبدي مع اني احب القطوه مره
Artos says
وَ الله شوفي البراز سواء من حيوان وَ لا إنسان هُو براز وَ مُقزز وَ مقرف ، مافي أقل قرف وَ أكثر قرف البراز براز
الوسوسة الزايدة مالها داعي ، يعني خلاص أنشفط ما يَحتاج له هالتعقيم وَ بعدين الحمامات يَومياً تتغسل ما أتوقع لما تروحين لأقاربك وَ حابة تتبولين الله يكرمك
راح تقولين يوووه من جلس قبلي ؟! القذارة قذارة ..
وَ لا تنسين قاعدة المرحاض وَ ش فايدتها ؟! .. خليها دايم مَرفوعة ..وَ لا جيتي تجلسين أنتِ إجلسي عليها وَ صلى الله وبارك
ترى الليتر بوكس مو نظافة أبداً ، وَ إللي يخلون قطاوتهم بالحوش يجرمون بحقهم لأن القطاوة عمرها يقصر من الحرارة ، فالأفضل ما يجيبون حيوانات وَ يعاملونهم بإزدراء
malak says
الله يسعدج ارتوس طول ما انا اقرا وانا اضحك وعلى فكره مافهمت شنو الككا الا بالنص ههههههههههههه يمكن لأني انا أقول لبنتي أسمها يع هههههههههه حتى بنت اختي لما كانت صغيره تعرفين الشباب مايحبون يمسكون الأطفال لما يكونون عاملينها بنت اختي قامت بالمهمه لما اخواني يمسكونها وهي تبي تلعب تقوول لهم يع يع على طول يتركونها وتعالي ضحكي عليهم وقتها هههههههه بس جذبني الموضوع لأني ناويه اعلم بنتي عالتواليت مبكر بعد ليون مو احسن من بنتي هههههههههههه
أثير عبدالعزيز says
بصراحه موضوع جميل قريتو وانا ماعندي قطة نفسي مرا بس ماما حالفه لو اشتريت انا وهيا برا البيت بسبب النظافة ، الله يهنيك ، مدونة جميلة تسلمي
Nadalh says
طيب بسالك لو بدربه على الحمام الله يكرمك اخليه تستخدم نفس اللي انا استخدمه ؟
Fio says
طيب واذا المرحاض عربي اقدر اعلمها؟ من يوم قطوتي صغيرة وانا اعرف عن هالموضوع والحين عمرها ٤ سنوات مع ذلك ماتشجعت اسويها اخاف تطيح او تشرب من الافرنجي
بطة says
سلام ي أوطة (= ،
اتفق معاك انو البسة تكون نظيفة وعلى التواليت وكلش
بس صراحة احس التراب انظف من ناحية ثانية .. عموما اختلاف الاراء لا يفسد للود قضية ؛)
https://www.youtube.com/watch?v=GVe44TWVwIA
قولي لي رائيك في الفيديو الي فوق ،
موفقة هننّي
sara alzaki says
آه 🙁
اخيراً خلصت 🙁
من ٣ سنوات وانا نفسي فحيوان آليف 🙁
وابد امي وابوي معيين 🙁 ابوي يكرههم وامي تخاف منهم !
تخيلي وحده بتوزع بسسها 🙁 !!! وانا بموت على واحد 🙁
الله يعطيك آلف عافيه يا ارتوس ويسعدك ،مستفيدة جداً منك وانشر معلوماتك لصاحباتي 🙁
الله يسعدك.
sumayah says
حبيت موضوعك خصوصا اني من عشاق القطاوه مربيه يمكن بحدود 8 مو مع بعض كل واحد لحاله ويجوني بعمر بالاسابيع واربيهم لا كبروا وصارو بالسنه وشي يا يطلعون وتصدمهم سيارات جرح عمري ولا يسرقون ويروح تعب السنين
الا اخر واحد الي الحين معي من طينت ليون خواااااااف مرررره
ودي مرره اربيه ع هالحمام بس يخاااف من الحمام بشكل لان شاف فيه مره صرصور وصار يخاف منه ههههههههه اتوقع خواف اكثر من ليون
بس صدق عندك حيوان بالبيت يبي لك طولة بال عشان تتعلم خصوصا الحمام او كان يعاني من مشكله بالاكل لانك بتقضي شهر رفيقك المنضفات والمناديل والفوط والبروش مرحله صعبه بس يهون انك تشوفينه متعلم ومتربي صح ونظيف وطيب..
reem says
قاعده اقرأ ومستمتعه وكأن معي بسه 🙁
للاسف اختي الكبيره تخاف منها جدا جداً وأهلي رافضين عشانها .
بس الحمدلله حوشنا مليان قطط لاننا نعطيها اكل واقدر العب معها لكن فرق عن اقتنائه والعنايه فيه احسها ممتعه وتحسسني اني مسؤوله عن شيء ثمين 🙁
هناء السويدي says
الموضوع اول مرة ادري فيه رغم انه عندنا قطتين
واتوقع لو فكرنا نعلمهم امي تذبحنا لانها مو حابتهم تحسهم يوسخوا البيت
لان واحد منهم وسواسي في النظافة ويقعد يحفر في الليتر بوكس ويبهدل الدنيا
حتى قبل ما يشرب موية يسوي رقصة حول الطبق هههههههههه ويحفر وبعدها يشرب
وهذا النظيف خواااااااااااااااف وخاصة لو سمع او شاف اطفال رعبه الاكبر واقل حركة تخوفه
واستغرب فيه ما يحب اللمس ولا احد يشيله .
الثاني (من فصيلة ليون)
مرررة متهور وما يخاف وماهو نظيف يعمل عملته وما يغطيها ونقعد نجري وراه نغطي وننظفه
ومتعبنا شعره متساقط في كل مكان رغم انه نمشطه مرتين يوميا
هذا عكس الاول يحب الحنان والدلع ويبغاكي تلعبيه طول الوقت ويمر عاللي في البيت واحد واحد
يحتك بجسمهم ويتدلع عشان يدلعوه شويتين ويمشي اقولهم هذا (attention seeker)
حتى لو نايمين يززززززززززززززززززززننننن الين نصحى ولو خرجنا ورجعنا يقعد يصرخ كانه يفهمنا انه فقدنا
بس في الاخير رغم انه متعبنا اكثر بس نحبه اكثر .
سعيد says
مدونة راقية أفادني موضوعك كثيرا شكرا لك
multa says
ماضحكتني الا الدعاية اخر الصفحة مشاركات يقبلن بالمسيار ههخخخخخ ،،
قريت الموصوع بدون الردود هالمرة وباعلق قبل اسكر الجوال واروح لشغلي ، اجل بدون اي تردد جايبة قطو جايبته مدام يتعلم الحمام وش أسهل وعجبتني الليتر بوكس اللي حلقات ينفع للي صغار لجل يتعلمو أسرع ،، حبيتها ، وعن طولة الصبر ابشرك موجودة عندي بنتي خلصت تعليمها للحمام واخيرا انا يبقا لي اغسلها ،، وولدي بدأ يبي لكن باخليه بعد البرد أسهل لي ،،، اجل القطوة نفس الشي طولة بال في التعليم وعندي حمام الثاني فاااضي ونادر ندخله بيكون هو حمامه ي سلام عليك يسسسسعدك شكراً شكراً
Reemonda says
ماشاء الله واخيرا لقيت مدونه عربيه شامله وترفع الراس من حسن حضي fainaly . قرأت اكثر من موضوع تعجبني شخصيتك ارائك او تقييماتك لايعلى عليها ووجدت نسخه مني في شخصك من جميع النواح بس ماشاء الله عليك اكثر دقه ورواق بالنسبه للحب القطط محد بيعرف شعور الا عاااشق لهالحيوانات فعلا فيها ذكاء وحنيه ع صاحبها جدا جدا جدا استمتعت بمواضيع ليون لاني كنت اربي اجيال من القطط في مراهقتي بس ماعندي خبرات كافيه وافتقد اقتنائها بشده بس الاهل رافضين تماما اي حيوان اليف يدخل البيت حاليا للاسف لي عوده ان شاء الله ولكن مع صديق لليون باذن الله ❤دمتي بود❤
toto-pink says
يسلموووووو ع المعلومات جد استمتعت واستفدت جزاكِ الله خير
eis says
ارتوس ..
طرجك وطريقتك اكثر من رائعة حقيقي اهنيك
انا كنت جدا متحمسة لاقتناء قط او قطة لكن بعد ماشفت مواضيعك المتعلقة ب ليون وانه يبي له مسوؤلية واشياء كثير احس ترددت جدا خصوصا اني مرة مهتمة بالنظافة وهو شكله بيحوس لي الدنيا
المشكلة انه بكل قلبي ابي امتلك قطوة وبكل عقلي رافضة بسبب الحوسة اللي بتصير
وبالنسبة للحمامات العمومية حدث ولا حرج وجدا شي بشع
وطرحك رائع كالعادة .. دمتي بحب 3>
نوف says
توني اتبنيت قط ، واستفدت جدا من مدونتك I love Artos اثريتيني